39. ஆஹுந்த³ரிகவத்து²

102. தேன கோ² பன ஸமயேன ப⁴க³வா தத்தே²வ ராஜக³ஹே வஸ்ஸம் வஸி, தத்த² ஹேமந்தம், தத்த² கி³ம்ஹம். மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘ஆஹுந்த³ரிகா ஸமணானம் ஸக்யபுத்தியானம் தி³ஸா அந்த⁴காரா, ந இமேஸம் தி³ஸா பக்கா²யந்தீ’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம். அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். அத² கோ² ப⁴க³வா ஆயஸ்மந்தம் ஆனந்த³ம் ஆமந்தேஸி – ‘‘க³ச்சா²னந்த³, அவாபுரணம் [அபாபுரணம் (க.)] ஆதா³ய அனுபரிவேணியம் பி⁴க்கூ²னம் ஆரோசேஹி – ‘‘இச்ச²தாவுஸோ ப⁴க³வா த³க்கி²ணாகி³ரிம் சாரிகம் பக்கமிதும். யஸ்ஸாயஸ்மதோ அத்தோ², ஸோ ஆக³ச்ச²தூ’’தி. ஏவம், ப⁴ந்தே, தி கோ² ஆயஸ்மா ஆனந்தோ³ ப⁴க³வதோ படிஸ்ஸுணித்வா அவாபுரணம் ஆதா³ய அனுபரிவேணியம் பி⁴க்கூ²னம் ஆரோசேஸி – ‘இச்ச²தாவுஸோ ப⁴க³வா த³க்கி²ணாகி³ரிம் சாரிகம் பக்கமிதும். யஸ்ஸாயஸ்மதோ அத்தோ², ஸோ ஆக³ச்ச²தூ’’’தி. பி⁴க்கூ² ஏவமாஹம்ஸு – ‘‘ப⁴க³வதா, ஆவுஸோ ஆனந்த³, பஞ்ஞத்தம் த³ஸவஸ்ஸானி நிஸ்ஸாய வத்து²ம், த³ஸவஸ்ஸேன நிஸ்ஸயம் தா³தும். தத்த² ச நோ க³ந்தப்³ப³ம் ப⁴விஸ்ஸதி, நிஸ்ஸயோ ச க³ஹேதப்³போ³ ப⁴விஸ்ஸதி, இத்தரோ ச வாஸோ ப⁴விஸ்ஸதி, புன ச பச்சாக³ந்தப்³ப³ம் ப⁴விஸ்ஸதி, புன ச நிஸ்ஸயோ க³ஹேதப்³போ³ ப⁴விஸ்ஸதி. ஸசே அம்ஹாகம் ஆசரியுபஜ்ஜா²யா க³மிஸ்ஸந்தி, மயம்பி க³மிஸ்ஸாம; நோ சே அம்ஹாகம் ஆசரியுபஜ்ஜா²யா க³மிஸ்ஸந்தி, மயம்பி ந க³மிஸ்ஸாம. லஹுசித்தகதா நோ, ஆவுஸோ ஆனந்த³, பஞ்ஞாயிஸ்ஸதீ’’தி. அத² கோ² ப⁴க³வா ஓக³ணேன பி⁴க்கு²ஸங்கே⁴ன த³க்கி²ணாகி³ரிம் சாரிகம் பக்காமி.

ஆஹுந்த³ரிகவத்து² நிட்டி²தம்.