40. நிஸ்ஸயமுச்சனககதா²

103. அத² கோ² ப⁴க³வா த³க்கி²ணாகி³ரிஸ்மிம் யதா²பி⁴ரந்தம் விஹரித்வா புனதே³வ ராஜக³ஹம் பச்சாக³ச்சி². அத² கோ² ப⁴க³வா ஆயஸ்மந்தம் ஆனந்த³ம் ஆமந்தேஸி – ‘‘கிம் நு கோ², ஆனந்த³, ததா²க³தோ ஓக³ணேன பி⁴க்கு²ஸங்கே⁴ன த³க்கி²ணாகி³ரிம் சாரிகம் பக்கந்தோ’’தி? அத² கோ² ஆயஸ்மா ஆனந்தோ³ ப⁴க³வதோ ஏதமத்த²ம் ஆரோசேஸி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ப்³யத்தேன பி⁴க்கு²னா படிப³லேன பஞ்சவஸ்ஸானி நிஸ்ஸாய வத்து²ம், அப்³யத்தேன யாவஜீவம்.

‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம். ந அஸேக்கே²ன ஸீலக்க²ந்தே⁴ன ஸமன்னாக³தோ ஹோதி ந அஸேக்கே²ன ஸமாதி⁴க்க²ந்தே⁴ன, ந அஸேக்கே²ன பஞ்ஞாக்க²ந்தே⁴ன ந அஸேக்கே²ன விமுத்திக்க²ந்தே⁴ன ந அஸேக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம்.

‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம். அஸேக்கே²ன ஸீலக்க²ந்தே⁴ன ஸமன்னாக³தோ ஹோதி அஸேக்கே²ன ஸமாதி⁴க்க²ந்தே⁴ன. அஸேக்கே²ன பஞ்ஞாக்க²ந்தே⁴ன… அஸேக்கே²ன விமுத்திக்க²ந்தே⁴ன… அஸேக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம்.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம். அஸ்ஸத்³தோ⁴ ஹோதி, அஹிரிகோ ஹோதி, அனோத்தப்பீ ஹோதி, குஸீதோ ஹோதி, முட்ட²ஸ்ஸதி ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம்.

‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம். ஸத்³தோ⁴ ஹோதி, ஹிரிமா ஹோதி, ஓத்தப்பீ ஹோதி, ஆரத்³த⁴வீரியோ ஹோதி, உபட்டி²தஸ்ஸதி ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம்.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம். அதி⁴ஸீலே ஸீலவிபன்னோ ஹோதி, அஜ்ஜா²சாரே ஆசாரவிபன்னோ ஹோதி, அதிதி³ட்டி²யா தி³ட்டி²விபன்னோ ஹோதி, அப்பஸ்ஸுதோ ஹோதி, து³ப்பஞ்ஞோ ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம்.

‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம். ந அதி⁴ஸீலே ஸீலவிபன்னோ ஹோதி, ந அஜ்ஜா²சாரே ஆசாரவிபன்னோ ஹோதி, ந அதிதி³ட்டி²யா தி³ட்டி²விபன்னோ ஹோதி, ப³ஹுஸ்ஸுதோ ஹோதி, பஞ்ஞவா ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம்.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம். ஆபத்திம் ந ஜானாதி, அனாபத்திம் ந ஜானாதி, லஹுகம் ஆபத்திம் ந ஜானாதி, க³ருகம் ஆபத்திம் ந ஜானாதி, உப⁴யானி கோ² பனஸ்ஸ பாதிமோக்கா²னி வித்தா²ரேன ந ஸ்வாக³தானி ஹோந்தி ந ஸுவிப⁴த்தானி ந ஸுப்பவத்தீனி ந ஸுவினிச்சி²தானி ஸுத்தஸோ அனுப்³யஞ்ஜனஸோ – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம்.

‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம். ஆபத்திம் ஜானாதி, அனாபத்திம் ஜானாதி, லஹுகம் ஆபத்திம் ஜானாதி, க³ருகம் ஆபத்திம் ஜானாதி, உப⁴யானி கோ² பனஸ்ஸ பாதிமோக்கா²னி வித்தா²ரேன ஸ்வாக³தானி ஹோந்தி ஸுவிப⁴த்தானி ஸுப்பவத்தீனி ஸுவினிச்சி²தானி ஸுத்தஸோ அனுப்³யஞ்ஜனஸோ – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம்.

‘‘அபரேஹிபி, பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம். ஆபத்திம் ந ஜானாதி, அனாபத்திம் ந ஜானாதி, லஹுகம் ஆபத்திம் ந ஜானாதி, க³ருகம் ஆபத்திம் ந ஜானாதி, ஊனபஞ்சவஸ்ஸோ ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம்.

‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம். ஆபத்திம் ஜானாதி, அனாபத்திம் ஜானாதி, லஹுகம் ஆபத்திம் ஜானாதி, க³ருகம் ஆபத்திம் ஜானாதி, பஞ்சவஸ்ஸோ வா ஹோதி அதிரேக பஞ்சவஸ்ஸோ வா – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம்.

நிஸ்ஸயமுச்சனககதா² நிட்டி²தா.

பஞ்சகத³ஸவாரோ நிட்டி²தோ.

104. ‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம். ந அஸேக்கே²ன ஸீலக்க²ந்தே⁴ன ஸமன்னாக³தோ ஹோதி, ந அஸேக்கே²ன ஸமாதி⁴க்க²ந்தே⁴ன, ந அஸேக்கே²ன பஞ்ஞாக்க²ந்தே⁴ன, ந அஸேக்கே²ன விமுத்திக்க²ந்தே⁴ன, ந அஸேக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி, ஊனபஞ்சவஸ்ஸோ ஹோதி – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம்.

‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம். அஸேக்கே²ன ஸீலக்க²ந்தே⁴ன ஸமன்னாக³தோ ஹோதி, அஸேக்கே²ன ஸமாதி⁴க்க²ந்தே⁴ன, அஸேக்கே²ன பஞ்ஞாக்க²ந்தே⁴ன, அஸேக்கே²ன விமுத்திக்க²ந்தே⁴ன, அஸேக்கே²ன விமுத்திஞாணத³ஸ்ஸனக்க²ந்தே⁴ன ஸமன்னாக³தோ ஹோதி, பஞ்சவஸ்ஸோ வா ஹோதி அதிரேகபஞ்சவஸ்ஸோ வா – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம்.

‘‘அபரேஹிபி, பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம். அஸ்ஸத்³தோ⁴ ஹோதி, அஹிரிகோ ஹோதி, அனோத்தப்பீ ஹோதி, குஸீதோ ஹோதி, முட்ட²ஸ்ஸதி ஹோதி, ஊனபஞ்சவஸ்ஸோ ஹோதி – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம்.

‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம். ஸத்³தோ⁴ ஹோதி, ஹிரிமா ஹோதி, ஓத்தப்பீ ஹோதி, ஆரத்³த⁴வீரியோ ஹோதி, உபட்டி²தஸ்ஸதி ஹோதி, பஞ்சவஸ்ஸோ வா ஹோதி அதிரேகபஞ்சவஸ்ஸோ வா – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம்.

‘‘அபரேஹிபி, பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம். அதி⁴ஸீலே ஸீலவிபன்னோ ஹோதி, அஜ்ஜா²சாரே ஆசாரவிபன்னோ ஹோதி, அதிதி³ட்டி²யா தி³ட்டி²விபன்னோ ஹோதி, அப்பஸ்ஸுதோ ஹோதி, து³ப்பஞ்ஞோ ஹோதி, ஊனபஞ்சவஸ்ஸோ ஹோதி – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம்.

‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம். ந அதி⁴ஸீலே ஸீலவிபன்னோ ஹோதி, ந அஜ்ஜா²சாரே ஆசாரவிபன்னோ ஹோதி, ந அதிதி³ட்டி²யா தி³ட்டி²விபன்னோ ஹோதி, ப³ஹுஸ்ஸுதோ ஹோதி, பஞ்ஞவா ஹோதி, பஞ்சவஸ்ஸோ வா ஹோதி அதிரேகபஞ்சவஸ்ஸோ வா – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம்.

‘‘அபரேஹிபி, பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம். ஆபத்திம் ந ஜானாதி, அனாபத்திம் ந ஜானாதி, லஹுகம் ஆபத்திம் ந ஜானாதி, க³ருகம் ஆபத்திம் ந ஜானாதி, உப⁴யானி கோ² பனஸ்ஸ பாதிமோக்கா²னி வித்தா²ரேன ந ஸ்வாக³தானி ஹோந்தி ந ஸுவிப⁴த்தானி ந ஸுப்பவத்தீனி ந ஸுவினிச்சி²தானி ஸுத்தஸோ அனுப்³யஞ்ஜனஸோ, ஊனபஞ்சவஸ்ஸோ ஹோதி – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா ந அனிஸ்ஸிதேன வத்த²ப்³ப³ம்.

‘‘ச²ஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம். ஆபத்திம் ஜானாதி, அனாபத்திம் ஜானாதி, லஹுகம் ஆபத்திம் ஜானாதி, க³ருகம் ஆபத்திம் ஜானாதி, உப⁴யானி கோ² பனஸ்ஸ பாதிமோக்கா²னி வித்தா²ரேன ஸ்வாக³தானி ஹோந்தி ஸுவிப⁴த்தானி ஸுப்பவத்தீனி ஸுவினிச்சி²தானி ஸுத்தஸோ அனுப்³யஞ்ஜனஸோ, பஞ்சவஸ்ஸோ வா ஹோதி அதிரேகபஞ்சவஸ்ஸோ வா – இமேஹி கோ², பி⁴க்க²வே, ச²ஹங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³’’ந்தி.

அப⁴யூவரபா⁴ணவாரோ நிட்டி²தோ அட்ட²மோ.

அட்ட²மபா⁴ணவாரோ.