26. பஞ்சாபா³த⁴வத்து²

88. தேன கோ² பன ஸமயேன மக³தே⁴ஸு பஞ்ச ஆபா³தா⁴ உஸ்ஸன்னா ஹோந்தி – குட்ட²ம், க³ண்டோ³, கிலாஸோ, ஸோஸோ, அபமாரோ. மனுஸ்ஸா பஞ்சஹி ஆபா³தே⁴ஹி பு²ட்டா² ஜீவகம் கோமாரப⁴ச்சம் உபஸங்கமித்வா ஏவம் வத³ந்தி – ‘‘ஸாது⁴ நோ, ஆசரிய, திகிச்சா²ஹீ’’தி. ‘‘அஹம் க்²வய்யோ, ப³ஹுகிச்சோ ப³ஹுகரணீயோ; ராஜா ச மே மாக³தோ⁴ ஸேனியோ பி³ம்பி³ஸாரோ உபட்டா²தப்³போ³ இத்தா²கா³ரஞ்ச பு³த்³த⁴ப்பமுகோ² ச பி⁴க்கு²ஸங்கோ⁴; நாஹம் ஸக்கோமி திகிச்சி²து’’ந்தி. ‘‘ஸப்³ப³ம் ஸாபதேய்யஞ்ச தே, ஆசரிய, ஹோது; மயஞ்ச தே தா³ஸா; ஸாது⁴, நோ, ஆசரிய, திகிச்சா²ஹீ’’தி. ‘‘அஹம் க்²வய்யோ, ப³ஹுகிச்சோ ப³ஹுகரணீயோ ராஜா ச மே மாக³தோ⁴ ஸேனியோ பி³ம்பி³ஸாரோ உபட்டா²தப்³போ³ இத்தா²கா³ரஞ்ச பு³த்³த⁴ப்பமுகோ² ச பி⁴க்கு²ஸங்கோ⁴; நாஹம் ஸக்கோமி திகிச்சி²து’’ந்தி. அத² கோ² தேஸம் மனுஸ்ஸானம் ஏதத³ஹோஸி – ‘‘இமே கோ² ஸமணா ஸக்யபுத்தியா ஸுக²ஸீலா ஸுக²ஸமாசாரா, ஸுபோ⁴ஜனானி பு⁴ஞ்ஜித்வா நிவாதேஸு ஸயனேஸு ஸயந்தி. யம்னூன மயம் ஸமணேஸு ஸக்யபுத்தியேஸு பப்³ப³ஜேய்யாம. தத்த² பி⁴க்கூ² சேவ உபட்ட²ஹிஸ்ஸந்தி, ஜீவகோ ச கோமாரப⁴ச்சோ திகிச்சி²ஸ்ஸதீ’’தி. அத² கோ² தே மனுஸ்ஸா பி⁴க்கூ² உபஸங்கமித்வா பப்³ப³ஜ்ஜம் யாசிம்ஸு. தே பி⁴க்கூ² பப்³பா³ஜேஸும், உபஸம்பாதே³ஸும். தே பி⁴க்கூ² சேவ உபட்ட²ஹிம்ஸு ஜீவகோ ச கோமாரப⁴ச்சோ திகிச்சி². தேன கோ² பன ஸமயேன பி⁴க்கூ² ப³ஹூ கி³லானே பி⁴க்கூ² உபட்ட²ஹந்தா யாசனப³ஹுலா விஞ்ஞத்திப³ஹுலா விஹரந்தி – கி³லானப⁴த்தம் தே³த², கி³லானுபட்டா²கப⁴த்தம் தே³த², கி³லானபே⁴ஸஜ்ஜம் தே³தா²தி. ஜீவகோபி கோமாரப⁴ச்சோ ப³ஹூ கி³லானே பி⁴க்கூ² திகிச்ச²ந்தோ அஞ்ஞதரம் ராஜகிச்சம் பரிஹாபேஸி.

89. அஞ்ஞதரோபி புரிஸோ பஞ்சஹி ஆபா³தே⁴ஹி பு²ட்டோ² ஜீவகம் கோமாரப⁴ச்சம் உபஸங்கமித்வா ஏதத³வோச – ‘‘ஸாது⁴ மம், ஆசரிய, திகிச்சா²ஹீ’’தி. ‘‘அஹம் க்²வய்யோ, ப³ஹுகிச்சோ, ப³ஹுகரணீயோ, ராஜா ச மே மாக³தோ⁴ ஸேனியோ பி³ம்பி³ஸாரோ உபட்டா²தப்³போ³ இத்தா²கா³ரஞ்ச பு³த்³த⁴ப்பமுகோ² ச பி⁴க்கு²ஸங்கோ⁴; நாஹம் ஸக்கோமி திகிச்சி²து’’ந்தி. ‘‘ஸப்³ப³ம் ஸாபதேய்யஞ்ச தே, ஆசரிய, ஹோது, அஹஞ்ச தே தா³ஸோ; ஸாது⁴ மம், ஆசரிய, திகிச்சா²ஹீ’’தி. ‘‘அஹம் க்²வய்யோ, ப³ஹுகிச்சோ ப³ஹுகரணீயோ, ராஜா ச மே மாக³தோ⁴ ஸேனியோ பி³ம்பி³ஸாரோ உபட்டா²தப்³போ³ இத்தா²கா³ரஞ்ச பு³த்³த⁴ப்பமுகோ² ச பி⁴க்கு²ஸங்கோ⁴, நாஹம் ஸக்கோமி திகிச்சி²து’’ந்தி. அத² கோ² தஸ்ஸ புரிஸஸ்ஸ ஏதத³ஹோஸி – ‘‘இமே கோ² ஸமணா ஸக்யபுத்தியா ஸுக²ஸீலா ஸுக²ஸமாசாரா, ஸுபோ⁴ஜனானி பு⁴ஞ்ஜித்வா நிவாதேஸு ஸயனேஸு ஸயந்தி. யம்னூனாஹம் ஸமணேஸு ஸக்யபுத்தியேஸு பப்³ப³ஜேய்யம். தத்த² பி⁴க்கூ² சேவ உபட்ட²ஹிஸ்ஸந்தி, ஜீவகோ ச கோமாரப⁴ச்சோ திகிச்சி²ஸ்ஸதி. ஸோம்ஹி [ஸோஹம் (ப³ஹூஸு, விமதிவினோத³னீடீகா ஓலோகேதப்³பா³)] அரோகோ³ விப்³ப⁴மிஸ்ஸாமீ’’தி. அத² கோ² ஸோ புரிஸோ பி⁴க்கு² உபஸங்கமித்வா பப்³ப³ஜ்ஜம் யாசி. தம் பி⁴க்கூ² பப்³பா³ஜேஸும், உபஸம்பாதே³ஸும். தம் பி⁴க்கூ² சேவ உபட்ட²ஹிம்ஸு, ஜீவகோ ச கோமாரப⁴ச்சோ திகிச்சி². ஸோ அரோகோ³ விப்³ப⁴மி. அத்³த³ஸா கோ² ஜீவகோ கோமாரப⁴ச்சோ தம் புரிஸம் விப்³ப⁴ந்தம், தி³ஸ்வான தம் புரிஸம் ஏதத³வோச – ‘‘நனு த்வம், அய்யோ, பி⁴க்கூ²ஸு பப்³ப³ஜிதோ அஹோஸீ’’தி? ‘‘ஏவம், ஆசரியா’’தி. ‘‘கிஸ்ஸ பன த்வம், அய்யோ, ஏவரூபமகாஸீ’’தி? அத² கோ² ஸோ புரிஸோ ஜீவகஸ்ஸ கோமாரப⁴ச்சஸ்ஸ ஏதமத்த²ம் ஆரோசேஸி. ஜீவகோ கோமாரப⁴ச்சோ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம ப⁴த³ந்தா [ப⁴த்³த³ந்தா (க.)] பஞ்சஹி ஆபா³தே⁴ஹி பு²ட்ட²ம் பப்³பா³ஜேஸ்ஸந்தீ’’தி. அத² கோ² ஜீவகோ கோமாரப⁴ச்சோ யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஜீவகோ கோமாரப⁴ச்சோ ப⁴க³வந்தம் ஏதத³வோச – ‘‘ஸாது⁴, ப⁴ந்தே, அய்யா பஞ்சஹி ஆபா³தே⁴ஹி பு²ட்ட²ம் ந பப்³பா³ஜேய்யு’’ந்தி. அத² கோ² ப⁴க³வா ஜீவகம் கோமாரப⁴ச்சம் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² ஜீவகோ கோமாரப⁴ச்சோ ப⁴க³வதா த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹம்ஸிதோ உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, பஞ்சஹி ஆபா³தே⁴ஹி பு²ட்டோ² பப்³பா³ஜேதப்³போ³. யோ பப்³பா³ஜேய்ய, ஆபத்தி து³க்கடஸ்ஸா’’தி.

பஞ்சாபா³த⁴வத்து² நிட்டி²தம்.