27. ராஜப⁴டவத்து²

90. தேன கோ² பன ஸமயேன ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ பச்சந்தோ குபிதோ ஹோதி. அத² கோ² ராஜா மாக³தோ⁴ ஸேனியோ பி³ம்பி³ஸாரோ ஸேனானாயகே மஹாமத்தே ஆணாபேஸி – ‘‘க³ச்ச²த², ப⁴ணே, பச்சந்தம் உச்சினதா²’’தி. ‘‘ஏவம், தே³வா’’தி கோ² ஸேனானாயகா மஹாமத்தா ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ பச்சஸ்ஸோஸும். அத² கோ² அபி⁴ஞ்ஞாதானம் அபி⁴ஞ்ஞாதானம் யோதா⁴னம் ஏதத³ஹோஸி – ‘‘மயம் கோ² யுத்³தா⁴பி⁴னந்தி³னோ க³ச்ச²ந்தா பாபஞ்ச கரோம, ப³ஹுஞ்ச அபுஞ்ஞம் பஸவாம. கேன நு கோ² மயம் உபாயேன பாபா ச விரமேய்யாம கல்யாணஞ்ச கரேய்யாமா’’தி? அத² கோ² தேஸம் யோதா⁴னம் ஏதத³ஹோஸி – ‘‘இமே கோ² ஸமணா ஸக்யபுத்தியா த⁴ம்மசாரினோ ஸமசாரினோ ப்³ரஹ்மசாரினோ ஸச்சவாதி³னோ ஸீலவந்தோ கல்யாணத⁴ம்மா. ஸசே கோ² மயம் ஸமணேஸு ஸக்யபுத்தியேஸு பப்³ப³ஜேய்யாம, ஏவம் மயம் பாபா ச விரமேய்யாம கல்யாணஞ்ச கரேய்யாமா’’தி. அத² கோ² தே யோதா⁴ பி⁴க்கூ² உபஸங்கமித்வா பப்³ப³ஜ்ஜம் யாசிம்ஸு. தே பி⁴க்கூ² பப்³பா³ஜேஸும், உபஸம்பாதே³ஸும். ஸேனானாயகா மஹாமத்தா ராஜப⁴டே புச்சி²ம்ஸு – ‘‘கிம் நு கோ², ப⁴ணே, இத்த²ன்னாமோ ச இத்த²ன்னாமோ ச யோதா⁴ ந தி³ஸ்ஸந்தீ’’தி? ‘‘இத்த²ன்னாமோ ச இத்த²ன்னாமோ ச, ஸாமி, யோதா⁴ பி⁴க்கூ²ஸு பப்³ப³ஜிதா’’தி. ஸேனானாயகா மஹாமத்தா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா ராஜப⁴டம் பப்³பா³ஜேஸ்ஸந்தீ’’தி. ஸேனானாயகா மஹாமத்தா ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஏதமத்த²ம் ஆரோசேஸும். அத² கோ² ராஜா மாக³தோ⁴ ஸேனியோ பி³ம்பி³ஸாரோ வோஹாரிகே மஹாமத்தே புச்சி² – ‘‘யோ, ப⁴ணே, ராஜப⁴டம் பப்³பா³ஜேதி, கிம் ஸோ பஸவதீ’’தி? ‘‘உபஜ்ஜா²யஸ்ஸ, தே³வ, ஸீஸம் சே²தப்³ப³ம், அனுஸ்ஸாவகஸ்ஸ [அனுஸாவகஸ்ஸ (க.)] ஜிவ்ஹா உத்³த⁴ரிதப்³பா³, க³ணஸ்ஸ உபட்³ட⁴பா²ஸுகா ப⁴ஞ்ஜிதப்³பா³’’தி. அத² கோ² ராஜா மாக³தோ⁴ ஸேனியோ பி³ம்பி³ஸாரோ யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ராஜா மாக³தோ⁴ ஸேனியோ பி³ம்பி³ஸாரோ ப⁴க³வந்தம் ஏதத³வோச – ‘‘ஸந்தி, ப⁴ந்தே, ராஜானோ அஸ்ஸத்³தா⁴ அப்பஸன்னா. தே அப்பமத்தகேனபி பி⁴க்கூ² விஹேடே²ய்யும். ஸாது⁴, ப⁴ந்தே, அய்யா ராஜப⁴டம் ந பப்³பா³ஜேய்யு’’ந்தி. அத² கோ² ப⁴க³வா ராஜானம் மாக³த⁴ம் ஸேனியம் பி³ம்பி³ஸாரம் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² ராஜா மாக³தோ⁴ ஸேனியோ பி³ம்பி³ஸாரோ ப⁴க³வதா த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹம்ஸிதோ உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அத² கோ² ப⁴க³வா ஏதஸ்மிம் நிதா³னே ஏதஸ்மிம் பகரணே த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, ராஜப⁴டோ பப்³பா³ஜேதப்³போ³. யோ பப்³பா³ஜேய்ய, ஆபத்தி து³க்கடஸ்ஸா’’தி.

ராஜப⁴டவத்து² நிட்டி²தம்.