19. அந்தேவாஸிகவத்தகதா²

79. [சூளவ. 381-382] ‘‘ஆசரியேன, பி⁴க்க²வே, அந்தேவாஸிகம்ஹி ஸம்மா வத்திதப்³ப³ம். தத்ராயம் ஸம்மாவத்தனா –

‘‘ஆசரியேன, பி⁴க்க²வே, அந்தேவாஸிகோ ஸங்க³ஹேதப்³போ³ அனுக்³க³ஹேதப்³போ³ உத்³தே³ஸேன பரிபுச்சா²ய ஓவாதே³ன அனுஸாஸனியா. ஸசே ஆசரியஸ்ஸ பத்தோ ஹோதி, அந்தேவாஸிகஸ்ஸ பத்தோ ந ஹோதி, ஆசரியேன அந்தேவாஸிகஸ்ஸ பத்தோ தா³தப்³போ³, உஸ்ஸுக்கம் வா காதப்³ப³ம் – கிந்தி நு கோ² அந்தேவாஸிகஸ்ஸ பத்தோ உப்பஜ்ஜியேதா²தி. ஸசே ஆசரியஸ்ஸ சீவரம் ஹோதி, அந்தேவாஸிகஸ்ஸ சீவரம் ந ஹோதி, ஆசரியேன அந்தேவாஸிகஸ்ஸ சீவரம் தா³தப்³ப³ம், உஸ்ஸுக்கம் வா காதப்³ப³ம் – கிந்தி நு கோ² அந்தேவாஸிகஸ்ஸ சீவரம் உப்பஜ்ஜியேதா²தி. ஸசே ஆசரியஸ்ஸ பரிக்கா²ரோ ஹோதி, அந்தேவாஸிகஸ்ஸ பரிக்கா²ரோ ந ஹோதி, ஆசரியேன அந்தேவாஸிகஸ்ஸ பரிக்கா²ரோ தா³தப்³போ³, உஸ்ஸுக்கம் வா காதப்³ப³ம் – கிந்தி நு கோ² அந்தேவாஸிகஸ்ஸ பரிக்கா²ரோ உப்பஜ்ஜியேதா²தி.

‘‘ஸசே அந்தேவாஸிகோ கி³லானோ ஹோதி, காலஸ்ஸேவ உட்டா²ய த³ந்தகட்ட²ம் தா³தப்³ப³ம், முகோ²த³கம் தா³தப்³ப³ம், ஆஸனம் பஞ்ஞபேதப்³ப³ம். ஸசே யாகு³ ஹோதி, பா⁴ஜனம் தோ⁴வித்வா யாகு³ உபனாமேதப்³பா³. யாகு³ம் பீதஸ்ஸ உத³கம் த³த்வா பா⁴ஜனம் படிக்³க³ஹேத்வா நீசம் கத்வா ஸாது⁴கம் அப்படிக⁴ம்ஸந்தேன தோ⁴வித்வா படிஸாமேதப்³ப³ம். அந்தேவாஸிகம்ஹி வுட்டி²தே ஆஸனம் உத்³த⁴ரிதப்³ப³ம். ஸசே ஸோ தே³ஸோ உக்லாபோ ஹோதி, ஸோ தே³ஸோ ஸம்மஜ்ஜிதப்³போ³.

‘‘ஸசே அந்தேவாஸிகோ கா³மம் பவிஸிதுகாமோ ஹோதி, நிவாஸனம் தா³தப்³ப³ம், படினிவாஸனம் படிக்³க³ஹேதப்³ப³ம், காயப³ந்த⁴னம் தா³தப்³ப³ம், ஸகு³ணம் கத்வா ஸங்கா⁴டியோ தா³தப்³பா³, தோ⁴வித்வா பத்தோ ஸோத³கோ தா³தப்³போ³.

‘‘ஏத்தாவதா நிவத்திஸ்ஸதீதி ஆஸனம் பஞ்ஞபேதப்³ப³ம், பாதோ³த³கம் பாத³பீட²ம் பாத³கத²லிகம் உபனிக்கி²பிதப்³ப³ம், பச்சுக்³க³ந்த்வா பத்தசீவரம் படிக்³க³ஹேதப்³ப³ம், படினிவாஸனம் தா³தப்³ப³ம், நிவாஸனம் படிக்³க³ஹேதப்³ப³ம். ஸசே சீவரம் ஸின்னம் ஹோதி, முஹுத்தம் உண்ஹே ஓதாபேதப்³ப³ம், ந ச உண்ஹே சீவரம் நித³ஹிதப்³ப³ம். சீவரம் ஸங்க⁴ரிதப்³ப³ம். சீவரம் ஸங்க⁴ரந்தேன சதுரங்கு³லம் கண்ணம் உஸ்ஸாரேத்வா சீவரம் ஸங்க⁴ரிதப்³ப³ம் – மா மஜ்ஜே² ப⁴ங்கோ³ அஹோஸீதி. ஓபோ⁴கே³ காயப³ந்த⁴னம் காதப்³ப³ம்.

‘‘ஸசே பிண்ட³பாதோ ஹோதி, அந்தேவாஸிகோ ச பு⁴ஞ்ஜிதுகாமோ ஹோதி, உத³கம் த³த்வா பிண்ட³பாதோ உபனாமேதப்³போ³. அந்தேவாஸிகோ பானீயேன புச்சி²தப்³போ³. பு⁴த்தாவிஸ்ஸ உத³கம் த³த்வா பத்தம் படிக்³க³ஹேத்வா நீசம் கத்வா ஸாது⁴கம் அப்படிக⁴ம்ஸந்தேன தோ⁴வித்வா வோத³கம் கத்வா முஹுத்தம் உண்ஹே ஓதாபேதப்³போ³, ந ச உண்ஹே பத்தோ நித³ஹிதப்³போ³. பத்தசீவரம் நிக்கி²பிதப்³ப³ம். பத்தம் நிக்கி²பந்தேன ஏகேன ஹத்தே²ன பத்தம் க³ஹேத்வா ஏகேன ஹத்தே²ன ஹேட்டா²மஞ்சம் வா ஹேட்டா²பீட²ம் வா பராமஸித்வா பத்தோ நிக்கி²பிதப்³போ³. ந ச அனந்தரஹிதாய பூ⁴மியா பத்தோ நிக்கி²பிதப்³போ³. சீவரம் நிக்கி²பந்தேன ஏகேன ஹத்தே²ன சீவரம் க³ஹேத்வா ஏகேன ஹத்தே²ன சீவரவம்ஸம் வா சீவரரஜ்ஜும் வா பமஜ்ஜித்வா பாரதோ அந்தம் ஓரதோ போ⁴க³ம் கத்வா சீவரம் நிக்கி²பிதப்³ப³ம். அந்தேவாஸிகம்ஹி வுட்டி²தே ஆஸனம் உத்³த⁴ரிதப்³ப³ம், பாதோ³த³கம் பாத³பீட²ம் பாத³கத²லிகம் படிஸாமேதப்³ப³ம். ஸசே ஸோ தே³ஸோ உக்லாபோ ஹோதி, ஸோ தே³ஸோ ஸம்மஜ்ஜிதப்³போ³.

‘‘ஸசே அந்தேவாஸிகோ நஹாயிதுகாமோ ஹோதி, நஹானம் படியாதே³தப்³ப³ம். ஸசே ஸீதேன அத்தோ² ஹோதி, ஸீதம் படியாதே³தப்³ப³ம். ஸசே உண்ஹேன அத்தோ² ஹோதி, உண்ஹம் படியாதே³தப்³ப³ம்.

‘‘ஸசே அந்தேவாஸிகோ ஜந்தாக⁴ரம் பவிஸிதுகாமோ ஹோதி, சுண்ணம் ஸன்னேதப்³ப³ம், மத்திகா தேமேதப்³பா³, ஜந்தாக⁴ரபீட²ம் ஆதா³ய க³ந்த்வா ஜந்தாக⁴ரபீட²ம் த³த்வா சீவரம் படிக்³க³ஹேத்வா ஏகமந்தம் நிக்கி²பிதப்³ப³ம், சுண்ணம் தா³தப்³ப³ம், மத்திகா தா³தப்³பா³. ஸசே உஸ்ஸஹதி, ஜந்தாக⁴ரம் பவிஸிதப்³ப³ம். ஜந்தாக⁴ரம் பவிஸந்தேன மத்திகாய முக²ம் மக்கே²த்வா புரதோ ச பச்ச²தோ ச படிச்சா²தே³த்வா ஜந்தாக⁴ரம் பவிஸிதப்³ப³ம். ந ச தே²ரே பி⁴க்கூ² அனுபக²ஜ்ஜ நிஸீதி³தப்³ப³ம், ந நவா பி⁴க்கூ² ஆஸனேன படிபா³ஹிதப்³பா³. ஜந்தாக⁴ரே அந்தேவாஸிகஸ்ஸ பரிகம்மம் காதப்³ப³ம். ஜந்தாக⁴ரா நிக்க²மந்தேன ஜந்தாக⁴ரபீட²ம் ஆதா³ய புரதோ ச பச்ச²தோ ச படிச்சா²தே³த்வா ஜந்தாக⁴ரா நிக்க²மிதப்³ப³ம்.

‘‘உத³கேபி அந்தேவாஸிகஸ்ஸ பரிகம்மம் காதப்³ப³ம். நஹாதேன பட²மதரம் உத்தரித்வா அத்தனோ க³த்தம் வோத³கம் கத்வா நிவாஸேத்வா அந்தேவாஸிகஸ்ஸ க³த்ததோ உத³கம் பமஜ்ஜிதப்³ப³ம், நிவாஸனம் தா³தப்³ப³ம், ஸங்கா⁴டி தா³தப்³பா³, ஜந்தாக⁴ரபீட²ம் ஆதா³ய பட²மதரம் ஆக³ந்த்வா ஆஸனம் பஞ்ஞபேதப்³ப³ம், பாதோ³த³கம் பாத³பீட²ம் பாத³கத²லிகம் உபனிக்கி²பிதப்³ப³ம். அந்தேவாஸிகோ பானீயேன புச்சி²தப்³போ³.

‘‘யஸ்மிம் விஹாரே அந்தேவாஸிகோ விஹரதி, ஸசே ஸோ விஹாரோ உக்லாபோ ஹோதி, ஸசே உஸ்ஸஹதி, ஸோதே⁴தப்³போ³. விஹாரம் ஸோதே⁴ந்தேன பட²மம் பத்தசீவரம் நீஹரித்வா ஏகமந்தம் நிக்கி²பிதப்³ப³ம்; நிஸீத³னபச்சத்த²ரணம் நீஹரித்வா ஏகமந்தம் நிக்கி²பிதப்³ப³ம்; பி⁴ஸிபி³ப்³போ³ஹனம் நீஹரித்வா ஏகமந்தம் நிக்கி²பிதப்³ப³ம்; மஞ்சோ நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், நீஹரித்வா ஏகமந்தம் நிக்கி²பிதப்³போ³; பீட²ம் நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், நீஹரித்வா ஏகமந்தம் நிக்கி²பிதப்³ப³ம்; மஞ்சபடிபாத³கா நீஹரித்வா ஏகமந்தம் நிக்கி²பிதப்³பா³; கே²ளமல்லகோ நீஹரித்வா ஏகமந்தம் நிக்கி²பிதப்³போ³; அபஸ்ஸேனப²லகம் நீஹரித்வா ஏகமந்தம் நிக்கி²பிதப்³ப³ம்; பூ⁴மத்த²ரணம் யதா²பஞ்ஞத்தம் ஸல்லக்கே²த்வா நீஹரித்வா ஏகமந்தம் நிக்கி²பிதப்³ப³ம். ஸசே விஹாரே ஸந்தானகம் ஹோதி, உல்லோகா பட²மம் ஓதாரேதப்³ப³ம், ஆலோகஸந்தி⁴கண்ணபா⁴கா³ பமஜ்ஜிதப்³பா³. ஸசே கே³ருகபரிகம்மகதா பி⁴த்தி கண்ணகிதா ஹோதி, சோளகம் தேமேத்வா பீளேத்வா பமஜ்ஜிதப்³பா³. ஸசே காளவண்ணகதா பூ⁴மி கண்ணகிதா ஹோதி, சோளகம் தேமேத்வா பீளேத்வா பமஜ்ஜிதப்³பா³. ஸசே அகதா ஹோதி பூ⁴மி, உத³கேன பரிப்போ²ஸித்வா ஸம்மஜ்ஜிதப்³பா³ – மா விஹாரோ ரஜேன உஹஞ்ஞீதி. ஸங்காரம் விசினித்வா ஏகமந்தம் ச²ட்³டே³தப்³ப³ம்.

‘‘பூ⁴மத்த²ரணம் ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²பஞ்ஞத்தம் பஞ்ஞபேதப்³ப³ம். மஞ்சபடிபாத³கா ஓதாபேத்வா பமஜ்ஜித்வா அதிஹரித்வா யதா²டா²னே ட²பேதப்³பா³. மஞ்சோ ஓதாபேத்வா ஸோதே⁴த்வா பப்போ²டேத்வா நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், அதிஹரித்வா யதா²பஞ்ஞத்தம் பஞ்ஞபேதப்³போ³. பீட²ம் ஓதாபேத்வா ஸோதே⁴த்வா பப்போ²டேத்வா நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், அதிஹரித்வா யதா²பஞ்ஞத்தம் பஞ்ஞபேதப்³ப³ம். பி⁴ஸிபி³ப்³போ³ஹனம் ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²பஞ்ஞத்தம் பஞ்ஞபேதப்³ப³ம். நிஸீத³னபச்சத்த²ரணம் ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²பஞ்ஞத்தம் பஞ்ஞபேதப்³ப³ம். கே²ளமல்லகோ ஓதாபேத்வா பமஜ்ஜித்வா அதிஹரித்வா யதா²டா²னே ட²பேதப்³போ³. அபஸ்ஸேனப²லகம் ஓதாபேத்வா பமஜ்ஜித்வா அதிஹரித்வா யதா²டா²னே ட²பேதப்³ப³ம். பத்தசீவரம் நிக்கி²பிதப்³ப³ம். பத்தம் நிக்கி²பந்தேன ஏகேன ஹத்தே²ன பத்தம் க³ஹேத்வா ஏகேன ஹத்தே²ன ஹேட்டா²மஞ்சம் வா ஹேட்டா²பீட²ம் வா பராமஸித்வா பத்தோ நிக்கி²பிதப்³போ³. ந ச அனந்தரஹிதாய பூ⁴மியா பத்தோ நிக்கி²பிதப்³போ³. சீவரம் நிக்கி²பந்தேன ஏகேன ஹத்தே²ன சீவரம் க³ஹேத்வா ஏகேன ஹத்தே²ன சீவரவம்ஸம் வா சீவரரஜ்ஜும் வா பமஜ்ஜித்வா பாரதோ அந்தம் ஓரதோ போ⁴க³ம் கத்வா சீவரம் நிக்கி²பிதப்³ப³ம்.

‘‘ஸசே புரத்தி²மா ஸரஜா வாதா வாயந்தி, புரத்தி²மா வாதபானா த²கேதப்³பா³. ஸசே பச்சி²மா ஸரஜா வாதா வாயந்தி, பச்சி²மா வாதபானா த²கேதப்³பா³. ஸசே உத்தரா ஸரஜா வாதா வாயந்தி, உத்தரா வாதபானா த²கேதப்³பா³. ஸசே த³க்கி²ணா ஸரஜா வாதா வாயந்தி, த³க்கி²ணா வாதபானா த²கேதப்³பா³. ஸசே ஸீதகாலோ ஹோதி, தி³வா வாதபானா விவரிதப்³பா³, ரத்திம் த²கேதப்³பா³. ஸசே உண்ஹகாலோ ஹோதி, தி³வா வாதபானா த²கேதப்³பா³, ரத்திம் விவரிதப்³பா³.

‘‘ஸசே பரிவேணம் உக்லாபம் ஹோதி, பரிவேணம் ஸம்மஜ்ஜிதப்³ப³ம். ஸசே கோட்ட²கோ உக்லாபோ ஹோதி, கோட்ட²கோ ஸம்மஜ்ஜிதப்³போ³. ஸசே உபட்டா²னஸாலா உக்லாபா ஹோதி, உபட்டா²னஸாலா ஸம்மஜ்ஜிதப்³பா³. ஸசே அக்³கி³ஸாலா உக்லாபா ஹோதி, அக்³கி³ஸாலா ஸம்மஜ்ஜிதப்³பா³. ஸசே வச்சகுடி உக்லாபா ஹோதி, வச்சகுடி ஸம்மஜ்ஜிதப்³பா³. ஸசே பானீயம் ந ஹோதி, பானீயம் உபட்டா²பேதப்³ப³ம். ஸசே பரிபோ⁴ஜனீயம் ந ஹோதி, பரிபோ⁴ஜனீயம் உபட்டா²பேதப்³ப³ம். ஸசே ஆசமனகும்பி⁴யா உத³கம் ந ஹோதி, ஆசமனகும்பி⁴யா உத³கம் ஆஸிஞ்சிதப்³ப³ம்.

‘‘ஸசே அந்தேவாஸிகஸ்ஸ அனபி⁴ரதி உப்பன்னா ஹோதி, ஆசரியேன வூபகாஸேதப்³போ³, வூபகாஸாபேதப்³போ³, த⁴ம்மகதா² வாஸ்ஸ காதப்³பா³. ஸசே அந்தேவாஸிகஸ்ஸ குக்குச்சம் உப்பன்னம் ஹோதி, ஆசரியேன வினோதே³தப்³ப³ம், வினோதா³பேதப்³ப³ம், த⁴ம்மகதா² வாஸ்ஸ காதப்³பா³. ஸசே அந்தேவாஸிகஸ்ஸ தி³ட்டி²க³தம் உப்பன்னம் ஹோதி, ஆசரியேன விவேசேதப்³ப³ம், விவேசாபேதப்³ப³ம், த⁴ம்மகதா² வாஸ்ஸ காதப்³பா³. ஸசே அந்தேவாஸிகோ க³ருத⁴ம்மம் அஜ்ஜா²பன்னோ ஹோதி பரிவாஸாரஹோ, ஆசரியேன உஸ்ஸுக்கம் காதப்³ப³ம் – கிந்தி நு கோ² ஸங்கோ⁴, அந்தேவாஸிகஸ்ஸ பரிவாஸம் த³தே³ய்யாதி. ஸசே அந்தேவாஸிகோ மூலாய படிகஸ்ஸனாரஹோ ஹோதி, ஆசரியேன உஸ்ஸுக்கம் காதப்³ப³ம் – கிந்தி நு கோ² ஸங்கோ⁴ அந்தேவாஸிகம் மூலாய படிகஸ்ஸேய்யாதி. ஸசே அந்தேவாஸிகோ மானத்தாரஹோ ஹோதி, ஆசரியேன உஸ்ஸுக்கம் காதப்³ப³ம் – கிந்தி நு கோ² ஸங்கோ⁴ அந்தேவாஸிகஸ்ஸ மானத்தம் த³தே³ய்யாதி. ஸசே அந்தேவாஸிகோ அப்³பா⁴னாரஹோ ஹோதி, ஆசரியேன உஸ்ஸுக்கம் காதப்³ப³ம் – கிந்தி நு கோ² ஸங்கோ⁴ அந்தேவாஸிகம் அப்³பே⁴ய்யாதி. ஸசே ஸங்கோ⁴ அந்தேவாஸிகஸ்ஸ கம்மம் கத்துகாமோ ஹோதி, தஜ்ஜனீயம் வா நியஸ்ஸம் வா பப்³பா³ஜனீயம் வா படிஸாரணீயம் வா உக்கே²பனீயம் வா, ஆசரியேன உஸ்ஸுக்கம் காதப்³ப³ம் – கிந்தி நு கோ² ஸங்கோ⁴ அந்தேவாஸிகஸ்ஸ கம்மம் ந கரேய்ய, லஹுகாய வா பரிணாமேய்யாதி. கதம் வா பனஸ்ஸ ஹோதி ஸங்கே⁴ன கம்மம், தஜ்ஜனீயம் வா நியஸ்ஸம் வா பப்³பா³ஜனீயம் வா படிஸாரணீயம் வா உக்கே²பனீயம் வா, ஆசரியேன உஸ்ஸுக்கம் காதப்³ப³ம் – கிந்தி நு கோ² அந்தேவாஸிகோ ஸம்மா வத்தேய்ய, லோமம் பாதேய்ய, நேத்தா²ரம் வத்தேய்ய, ஸங்கோ⁴ தம் கம்மம் படிப்பஸ்ஸம்பே⁴ய்யாதி.

‘‘ஸசே அந்தேவாஸிகஸ்ஸ சீவரம் தோ⁴விதப்³ப³ம் ஹோதி, ஆசரியேன ஆசிக்கி²தப்³ப³ம் – ‘ஏவம் தோ⁴வேய்யாஸீ’தி, உஸ்ஸுக்கம் வா காதப்³ப³ம் – கிந்தி நு கோ² அந்தேவாஸிகஸ்ஸ சீவரம் தோ⁴வியேதா²தி. ஸசே அந்தேவாஸிகஸ்ஸ சீவரம் காதப்³ப³ம் ஹோதி, ஆசரியேன ஆசிக்கி²தப்³ப³ம் – ‘ஏவம் கரேய்யாஸீ’தி, உஸ்ஸுக்கம் வா காதப்³ப³ம் – கிந்தி நு கோ² அந்தேவாஸிகஸ்ஸ சீவரம் கரியேதா²தி. ஸசே அந்தேவாஸிகஸ்ஸ ரஜனம் பசிதப்³ப³ம் ஹோதி, ஆசரியேன ஆசிக்கி²தப்³ப³ம் – ‘ஏவம் பசேய்யாஸீ’தி, உஸ்ஸுக்கம் வா காதப்³ப³ம் – கிந்தி நு கோ² அந்தேவாஸிகஸ்ஸ ரஜனம் பசியேதா²தி. ஸசே அந்தேவாஸிகஸ்ஸ சீவரம் ரஜிதப்³ப³ம் ஹோதி, ஆசரியேன ஆசிக்கி²தப்³ப³ம் – ‘ஏவம் ரஜேய்யாஸீ’தி, உஸ்ஸுக்கம் வா காதப்³ப³ம் – கிந்தி நு கோ² அந்தேவாஸிகஸ்ஸ சீவரம் ரஜியேதா²தி. சீவரம் ரஜந்தேன ஸாது⁴கம் ஸம்பரிவத்தகம் ஸம்பரிவத்தகம் ரஜிதப்³ப³ம், ந ச அச்சி²ன்னே தே²வே பக்கமிதப்³ப³ம். ஸசே அந்தேவாஸிகோ கி³லானோ ஹோதி, யாவஜீவம் உபட்டா²தப்³போ³, வுட்டா²னமஸ்ஸ ஆக³மேதப்³ப³’’ந்தி.

அந்தேவாஸிகவத்தம் நிட்டி²தம்.

ச²ட்ட²பா⁴ணவாரோ.