20. பணாமனா க²மாபனா

80. தேன கோ² பன ஸமயேன அந்தேவாஸிகா ஆசரியேஸு ந ஸம்மா வத்தந்தி…பே… ப⁴க³வதோ ஏதமத்த²ம் ஆரோசேஸும்…பே… ந, பி⁴க்க²வே, அந்தேவாஸிகேன ஆசரியம்ஹி ந ஸம்மா வத்திதப்³ப³ம். யோ ந ஸம்மா வத்தேய்ய, ஆபத்தி து³க்கடஸ்ஸாதி. நேவ ஸம்மா வத்தந்தி. ப⁴க³வதோ ஏதமத்த²ம் ஆரோசேஸும்…பே… அனுஜானாமி, பி⁴க்க²வே, அஸம்மாவத்தந்தம் பணாமேதும். ஏவஞ்ச பன, பி⁴க்க²வே, பணாமேதப்³போ³ – பணாமேமி தந்தி வா, மாயித⁴ படிக்கமீதி வா, நீஹர தே பத்தசீவரந்தி வா, நாஹம் தயா உபட்டா²தப்³போ³தி வா. காயேன விஞ்ஞாபேதி, வாசாய விஞ்ஞாபேதி, காயேன வாசாய விஞ்ஞாபேதி, பணாமிதோ ஹோதி அந்தேவாஸிகோ; ந காயேன விஞ்ஞாபேதி, ந வாசாய விஞ்ஞாபேதி, ந காயேன வாசாய விஞ்ஞாபேதி, ந பணாமிதோ ஹோதி அந்தேவாஸிகோதி.

தேன கோ² பன ஸமயேன அந்தேவாஸிகா பணாமிதா ந க²மாபேந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, க²மாபேதுந்தி. நேவ க²மாபேந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, பணாமிதேன ந க²மாபேதப்³போ³. யோ ந க²மாபேய்ய, ஆபத்தி து³க்கடஸ்ஸாதி.

தேன கோ² பன ஸமயேன ஆசரியா க²மாபியமானா ந க²மந்தி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, க²மிதுந்தி. நேவ க²மந்தி. அந்தேவாஸிகா பக்கமந்திபி விப்³ப⁴மந்திபி தித்தி²யேஸுபி ஸங்கமந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, க²மாபியமானேன ந க²மிதப்³ப³ம். யோ ந க²மேய்ய, ஆபத்தி து³க்கடஸ்ஸாதி.

தேன கோ² பன ஸமயேன ஆசரியா ஸம்மாவத்தந்தம் பணாமேந்தி, அஸம்மாவத்தந்தம் ந பணாமேந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, ஸம்மாவத்தந்தோ பணாமேதப்³போ³. யோ பணாமேய்ய, ஆபத்தி து³க்கடஸ்ஸ. ந ச, பி⁴க்க²வே, அஸம்மாவத்தந்தோ ந பணாமேதப்³போ³. யோ ந பணாமேய்ய, ஆபத்தி து³க்கடஸ்ஸ.

81. ‘‘பஞ்சஹி, பி⁴க்க²வே, அங்கே³ஹி ஸமன்னாக³தோ அந்தேவாஸிகோ பணாமேதப்³போ³. ஆசரியம்ஹி நாதி⁴மத்தம் பேமம் ஹோதி, நாதி⁴மத்தோ பஸாதோ³ ஹோதி, நாதி⁴மத்தா ஹிரீ ஹோதி, நாதி⁴மத்தோ கா³ரவோ ஹோதி, நாதி⁴மத்தா பா⁴வனா ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தோ அந்தேவாஸிகோ பணாமேதப்³போ³.

‘‘பஞ்சஹி, பி⁴க்க²வே, அங்கே³ஹி ஸமன்னாக³தோ அந்தேவாஸிகோ ந பணாமேதப்³போ³. ஆசரியம்ஹி அதி⁴மத்தம் பேமம் ஹோதி, அதி⁴மத்தோ பஸாதோ³ ஹோதி, அதி⁴மத்தா ஹிரீ ஹோதி, அதி⁴மத்தோ கா³ரவோ ஹோதி, அதி⁴மத்தா பா⁴வனா ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தோ அந்தேவாஸிகோ ந பணாமேதப்³போ³.

‘‘பஞ்சஹி, பி⁴க்க²வே, அங்கே³ஹி ஸமன்னாக³தோ அந்தேவாஸிகோ அலம் பணாமேதும். ஆசரியம்ஹி நாதி⁴மத்தம் பேமம் ஹோதி, நாதி⁴மத்தோ பஸாதோ³ ஹோதி, நாதி⁴மத்தா ஹிரீ ஹோதி, நாதி⁴மத்தோ கா³ரவோ ஹோதி, நாதி⁴மத்தா பா⁴வனா ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தோ அந்தேவாஸிகோ அலம் பணாமேதும்.

‘‘பஞ்சஹி, பி⁴க்க²வே, அங்கே³ஹி ஸமன்னாக³தோ அந்தேவாஸிகோ நாலம் பணாமேதும். ஆசரியம்ஹி அதி⁴மத்தம் பேமம் ஹோதி, அதி⁴மத்தோ பஸாதோ³ ஹோதி, அதி⁴மத்தா ஹிரீ ஹோதி, அதி⁴மத்தோ கா³ரவோ ஹோதி, அதி⁴மத்தா பா⁴வனா ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தோ அந்தேவாஸிகோ நாலம் பணாமேதும்.

‘‘பஞ்சஹி, பி⁴க்க²வே, அங்கே³ஹி ஸமன்னாக³தம் அந்தேவாஸிகம் அப்பணாமேந்தோ ஆசரியோ ஸாதிஸாரோ ஹோதி, பணாமேந்தோ அனதிஸாரோ ஹோதி. ஆசரியம்ஹி நாதி⁴மத்தம் பேமம் ஹோதி, நாதி⁴மத்தோ பஸாதோ³ ஹோதி, நாதி⁴மத்தா ஹிரீ ஹோதி, நாதி⁴மத்தோ கா³ரவோ ஹோதி, நாதி⁴மத்தா பா⁴வனா ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தம் அந்தேவாஸிகம் அப்பணாமேந்தோ ஆசரியோ ஸாதிஸாரோ ஹோதி, பணாமேந்தோ அனதிஸாரோ ஹோதி.

‘‘பஞ்சஹி, பி⁴க்க²வே, அங்கே³ஹி ஸமன்னாக³தம் அந்தேவாஸிகம் பணாமேந்தோ ஆசரியோ ஸாதிஸாரோ ஹோதி, அப்பணாமேந்தோ அனதிஸாரோ ஹோதி. ஆசரியம்ஹி அதி⁴மத்தம் பேமம் ஹோதி, அதி⁴மத்தோ பஸாதோ³ ஹோதி, அதி⁴மத்தா ஹிரீ ஹோதி, அதி⁴மத்தோ கா³ரவோ ஹோதி, அதி⁴மத்தா பா⁴வனா ஹோதி – இமேஹி கோ², பி⁴க்க²வே, பஞ்சஹங்கே³ஹி ஸமன்னாக³தம் அந்தேவாஸிகம் பணாமேந்தோ ஆசரியோ ஸாதிஸாரோ ஹோதி, அப்பணாமேந்தோ அனதிஸாரோ ஹோதீ’’தி.

பணாமனா க²மாபனா நிட்டி²தா.