18. ஆசரியவத்தகதா²

74. தேன கோ² பன ஸமயேன அஞ்ஞதரோ மாணவகோ பி⁴க்கூ² உபஸங்கமித்வா பப்³ப³ஜ்ஜம் யாசி. தஸ்ஸ பி⁴க்கூ² படிகச்சேவ நிஸ்ஸயே ஆசிக்கி²ம்ஸு. ஸோ ஏவமாஹ – ‘‘ஸசே மே, ப⁴ந்தே, பப்³ப³ஜிதே நிஸ்ஸயே ஆசிக்கே²ய்யாத², அபி⁴ரமேய்யாமஹம் [அபி⁴ரமேய்யஞ்சாஹம் (ஸீ.), அபி⁴ரமேய்யம் ஸ்வாஹம் (க.)]. ந தா³னாஹம், ப⁴ந்தே, பப்³ப³ஜிஸ்ஸாமி; ஜேகு³ச்சா² மே நிஸ்ஸயா படிகூலா’’தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, படிகச்சேவ நிஸ்ஸயா ஆசிக்கி²தப்³பா³. யோ ஆசிக்கே²ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, உபஸம்பன்னஸமனந்தரா நிஸ்ஸயே ஆசிக்கி²துந்தி.

தேன கோ² பன ஸமயேன பி⁴க்கூ² து³வக்³கே³னபி திவக்³கே³னபி க³ணேன உபஸம்பாதே³ந்தி. ப⁴க³வதோ ஏதமத்த²ம் ஆரோசேஸும். ந, பி⁴க்க²வே, ஊனத³ஸவக்³கே³ன க³ணேன உபஸம்பாதே³தப்³போ³. யோ உபஸம்பாதே³ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, த³ஸவக்³கே³ன வா அதிரேகத³ஸவக்³கே³ன வா க³ணேன உபஸம்பாதே³துந்தி.

75. தேன கோ² பன ஸமயேன பி⁴க்கூ² ஏகவஸ்ஸாபி து³வஸ்ஸாபி ஸத்³தி⁴விஹாரிகம் உபஸம்பாதே³ந்தி. ஆயஸ்மாபி உபஸேனோ வங்க³ந்தபுத்தோ ஏகவஸ்ஸோ ஸத்³தி⁴விஹாரிகம் உபஸம்பாதே³ஸி. ஸோ வஸ்ஸம்வுட்டோ² து³வஸ்ஸோ ஏகவஸ்ஸம் ஸத்³தி⁴விஹாரிகம் ஆதா³ய யேன ப⁴க³வா தேனுபஸங்கமி, உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஆசிண்ணம் கோ² பனேதம் பு³த்³தா⁴னம் ப⁴க³வந்தானம் ஆக³ந்துகேஹி பி⁴க்கூ²ஹி ஸத்³தி⁴ம் படிஸம்மோதி³தும். அத² கோ² ப⁴க³வா ஆயஸ்மந்தம் உபஸேனம் வங்க³ந்தபுத்தம் ஏதத³வோச – ‘‘கச்சி, பி⁴க்கு², க²மனீயம், கச்சி யாபனீயம், கச்சி த்வம் அப்பகிலமதே²ன அத்³தா⁴னம் ஆக³தோ’’தி? ‘‘க²மனீயம், ப⁴க³வா, யாபனீயம், ப⁴க³வா. அப்பகிலமதே²ன மயம், ப⁴ந்தே, அத்³தா⁴னம் ஆக³தா’’தி. ஜானந்தாபி ததா²க³தா புச்ச²ந்தி, ஜானந்தாபி ந புச்ச²ந்தி, காலம் விதி³த்வா புச்ச²ந்தி, காலம் விதி³த்வா ந புச்ச²ந்தி; அத்த²ஸம்ஹிதம் ததா²க³தா புச்ச²ந்தி; நோ அனத்த²ஸம்ஹிதம். அனத்த²ஸம்ஹிதே ஸேதுகா⁴தோ ததா²க³தானம். த்³வீஹி ஆகாரேஹி பு³த்³தா⁴ ப⁴க³வந்தோ பி⁴க்கூ² படிபுச்ச²ந்தி – த⁴ம்மம் வா தே³ஸேஸ்ஸாம, ஸாவகானம் வா ஸிக்கா²பத³ம் பஞ்ஞபேஸ்ஸாமாதி. அத² கோ² ப⁴க³வா ஆயஸ்மந்தம் உபஸேனம் வங்க³ந்தபுத்தம் ஏதத³வோச – ‘‘கதிவஸ்ஸோஸி த்வம், பி⁴க்கூ²’’தி? ‘‘து³வஸ்ஸோஹம், ப⁴க³வா’’தி. ‘‘அயம் பன பி⁴க்கு² கதிவஸ்ஸோ’’தி? ‘‘ஏகவஸ்ஸோ, ப⁴க³வா’’தி. ‘‘கிம் தாயம் பி⁴க்கு² ஹோதீ’’தி? ‘‘ஸத்³தி⁴விஹாரிகோ மே, ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனனுச்ச²விகம், மோக⁴புரிஸ, அனனுலோமிகம் அப்பதிரூபம் அஸ்ஸாமணகம் அகப்பியம் அகரணீயம். கத²ஞ்ஹி நாம த்வம், மோக⁴புரிஸ, அஞ்ஞேஹி ஓவதி³யோ அனுஸாஸியோ அஞ்ஞம் ஓவதி³தும் அனுஸாஸிதும் மஞ்ஞிஸ்ஸஸி. அதிலஹும் கோ² த்வம், மோக⁴புரிஸ, பா³ஹுல்லாய ஆவத்தோ, யதி³த³ம் க³ணப³ந்தி⁴கம். நேதம், மோக⁴புரிஸ, அப்பஸன்னானம் வா பஸாதா³ய பஸன்னானம் வா பி⁴ய்யோபா⁴வாய’’…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, ஊனத³ஸவஸ்ஸேன உபஸம்பாதே³தப்³போ³. யோ உபஸம்பாதே³ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, த³ஸவஸ்ஸேன வா அதிரேகத³ஸவஸ்ஸேன வா உபஸம்பாதே³து’’ந்தி.

76. தேன கோ² பன ஸமயேன பி⁴க்கூ² – த³ஸவஸ்ஸம்ஹா த³ஸவஸ்ஸம்ஹாதி – பா³லா அப்³யத்தா உபஸம்பாதே³ந்தி. தி³ஸ்ஸந்தி உபஜ்ஜா²யா பா³லா, ஸத்³தி⁴விஹாரிகா பண்டி³தா. தி³ஸ்ஸந்தி உபஜ்ஜா²யா அப்³யத்தா, ஸத்³தி⁴விஹாரிகா ப்³யத்தா. தி³ஸ்ஸந்தி உபஜ்ஜா²யா அப்பஸ்ஸுதா, ஸத்³தி⁴விஹாரிகா ப³ஹுஸ்ஸுதா. தி³ஸ்ஸந்தி உபஜ்ஜா²யா து³ப்பஞ்ஞா, ஸத்³தி⁴விஹாரிகா பஞ்ஞவந்தோ. அஞ்ஞதரோபி அஞ்ஞதித்தி²யபுப்³போ³ உபஜ்ஜா²யேன ஸஹத⁴ம்மிகம் வுச்சமானோ உபஜ்ஜா²யஸ்ஸ வாத³ம் ஆரோபேத்வா தம்யேவ தித்தா²யதனம் ஸங்கமி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – கத²ஞ்ஹி நாம பி⁴க்கூ² – த³ஸவஸ்ஸம்ஹா த³ஸவஸ்ஸம்ஹாதி – பா³லா அப்³யத்தா உபஸம்பாதே³ஸ்ஸந்தி. தி³ஸ்ஸந்தி உபஜ்ஜா²யா பா³லா ஸத்³தி⁴விஹாரிகா பண்டி³தா, தி³ஸ்ஸந்தி உபஜ்ஜா²யா அப்³யத்தா ஸத்³தி⁴விஹாரிகா ப்³யத்தா, தி³ஸ்ஸந்தி உபஜ்ஜா²யா அப்பஸ்ஸுதா ஸத்³தி⁴விஹாரிகா ப³ஹுஸ்ஸுதா, தி³ஸ்ஸந்தி உபஜ்ஜா²யா து³ப்பஞ்ஞா, ஸத்³தி⁴விஹாரிகா பஞ்ஞவந்தோதி. அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். ‘‘ஸச்சம் கிர, பி⁴க்க²வே, பி⁴க்கூ² – த³ஸவஸ்ஸம்ஹா த³ஸவஸ்ஸம்ஹாதி – பா³லா அப்³யத்தா உபஸம்பாதே³ந்தி. தி³ஸ்ஸந்தி உபஜ்ஜா²யா பா³லா, ஸத்³தி⁴விஹாரிகா பண்டி³தா, தி³ஸ்ஸந்தி உபஜ்ஜா²யா அப்³யத்தா ஸத்³தி⁴விஹாரிகா ப்³யத்தா, தி³ஸ்ஸந்தி உபஜ்ஜா²யா அப்பஸ்ஸுதா, ஸத்³தி⁴விஹாரிகா ப³ஹுஸ்ஸுதா, தி³ஸ்ஸந்தி உபஜ்ஜா²யா து³ப்பஞ்ஞா, ஸத்³தி⁴விஹாரிகா பஞ்ஞவந்தோ’’தி? ‘‘ஸச்சம், ப⁴க³வா’’தி. விக³ரஹி பு³த்³தோ⁴ ப⁴க³வா…பே… கத²ஞ்ஹி நாம தே, பி⁴க்க²வே, மோக⁴புரிஸா – த³ஸவஸ்ஸம்ஹா த³ஸவஸ்ஸம்ஹாதி – பா³லா அப்³யத்தா உபஸம்பாதே³ஸ்ஸந்தி. தி³ஸ்ஸந்தி உபஜ்ஜா²யா பா³லா, ஸத்³தி⁴விஹாரிகா பண்டி³தா, தி³ஸ்ஸந்தி உபஜ்ஜா²யா அப்³யத்தா ஸத்³தி⁴விஹாரிகா ப்³யத்தா, தி³ஸ்ஸந்தி உபஜ்ஜா²யா அப்பஸ்ஸுதா, ஸத்³தி⁴விஹாரிகா ப³ஹுஸ்ஸுதா, தி³ஸ்ஸந்தி உபஜ்ஜா²யா து³ப்பஞ்ஞா, ஸத்³தி⁴விஹாரிகா பஞ்ஞவந்தோ. நேதம், பி⁴க்க²வே, அப்பஸன்னானம் வா பஸாதா³ய…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, பா³லேன அப்³யத்தேன உபஸம்பாதே³தப்³போ³. யோ உபஸம்பாதே³ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, ப்³யத்தேன பி⁴க்கு²னா படிப³லேன த³ஸவஸ்ஸேன வா அதிரேகத³ஸவஸ்ஸேன வா உபஸம்பாதே³து’’ந்தி.

77. தேன கோ² பன ஸமயேன பி⁴க்கூ² உபஜ்ஜா²யேஸு பக்கந்தேஸுபி விப்³ப⁴ந்தேஸுபி காலங்கதேஸுபி பக்க²ஸங்கந்தேஸுபி அனாசரியகா அனோவதி³யமானா அனனுஸாஸியமானா து³ன்னிவத்தா² து³ப்பாருதா அனாகப்பஸம்பன்னா பிண்டா³ய சரந்தி, மனுஸ்ஸானம் பு⁴ஞ்ஜமானானம் உபரிபோ⁴ஜனேபி உத்திட்ட²பத்தம் உபனாமேந்தி, உபரிகா²த³னீயேபி – உபரிஸாயனீயேபி – உபரிபானீயேபி உத்திட்ட²பத்தம் உபனாமேந்தி; ஸாமம் ஸூபம்பி ஓத³னம்பி விஞ்ஞாபேத்வா பு⁴ஞ்ஜந்தி; ப⁴த்தக்³கே³பி உச்சாஸத்³தா³ மஹாஸத்³தா³ விஹரந்தி. மனுஸ்ஸா உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ஸமணா ஸக்யபுத்தியா து³ன்னிவத்தா² து³ப்பாருதா அனாகப்பஸம்பன்னா பிண்டா³ய சரிஸ்ஸந்தி; மனுஸ்ஸானம் பு⁴ஞ்ஜமானானம் உபரிபோ⁴ஜனேபி உத்திட்ட²பத்தம் உபனாமேஸ்ஸந்தி, உபரிகா²த³னீயேபி – உபரிஸாயனீயேபி – உபரிபானீயேபி உத்திட்ட²பத்தம் உபனாமேஸ்ஸந்தி; ஸாமம் ஸூபம்பி ஓத³னம்பி விஞ்ஞாபேத்வா பு⁴ஞ்ஜிஸ்ஸந்தி; ப⁴த்தக்³கே³பி உச்சாஸத்³தா³ மஹாஸத்³தா³ விஹரிஸ்ஸந்தி, ஸேய்யதா²பி ப்³ராஹ்மணா ப்³ராஹ்மணபோ⁴ஜனே’’தி. அஸ்ஸோஸும் கோ² பி⁴க்கூ² தேஸம் மனுஸ்ஸானம் உஜ்ஜா²யந்தானம் கி²ய்யந்தானம் விபாசேந்தானம் …பே… அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும். ஸச்சம் கிர, பி⁴க்க²வே…பே… ஸச்சம், ப⁴க³வாதி…பே… விக³ரஹித்வா த⁴ம்மிம் கத²ம் கத்வா பி⁴க்கூ² ஆமந்தேஸி –

‘‘அனுஜானாமி, பி⁴க்க²வே, ஆசரியம். ஆசரியோ, பி⁴க்க²வே, அந்தேவாஸிகம்ஹி புத்தசித்தம் உபட்டா²பேஸ்ஸதி, அந்தேவாஸிகோ ஆசரியம்ஹி பிதுசித்தம் உபட்டா²பேஸ்ஸதி. ஏவம் தே அஞ்ஞமஞ்ஞம் ஸகா³ரவா ஸப்பதிஸ்ஸா ஸபா⁴க³வுத்தினோ விஹரந்தா இமஸ்மிம் த⁴ம்மவினயே வுத்³தி⁴ம் விருள்ஹிம் வேபுல்லம் ஆபஜ்ஜிஸ்ஸந்தி. அனுஜானாமி, பி⁴க்க²வே, த³ஸவஸ்ஸம் நிஸ்ஸாய வத்து²ம், த³ஸவஸ்ஸேன நிஸ்ஸயம் தா³தும். ஏவஞ்ச பன, பி⁴க்க²வே, ஆசரியோ க³ஹேதப்³போ³. ஏகம்ஸம் உத்தராஸங்க³ம் கரித்வா பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘ஆசரியோ மே, ப⁴ந்தே, ஹோஹி, ஆயஸ்மதோ நிஸ்ஸாய வச்சா²மி; ஆசரியோ மே, ப⁴ந்தே, ஹோஹி, ஆயஸ்மதோ நிஸ்ஸாய வச்சா²மி; ஆசரியோ மே, ப⁴ந்தே, ஹோஹி, ஆயஸ்மதோ நிஸ்ஸாய வச்சா²மீ’தி. ‘ஸாஹூதி’ வா ‘லஹூதி’ வா ‘ஓபாயிக’ந்தி வா ‘பதிரூப’ந்தி வா ‘பாஸாதி³கேன ஸம்பாதே³ஹீ’தி வா காயேன விஞ்ஞாபேதி, வாசாய விஞ்ஞாபேதி, காயேன வாசாய விஞ்ஞாபேதி, க³ஹிதோ ஹோதி ஆசரியோ; ந காயேன விஞ்ஞாபேதி, ந வாசாய விஞ்ஞாபேதி, ந காயேன வாசாய விஞ்ஞாபேதி, ந க³ஹிதோ ஹோதி ஆசரியோ.

78. [சூளவ. 380 ஆத³யோ] ‘‘அந்தேவாஸிகேன, பி⁴க்க²வே, ஆசரியம்ஹி ஸம்மா வத்திதப்³ப³ம். தத்ராயம் ஸம்மாவத்தனா –

‘‘காலஸ்ஸேவ உட்டா²ய உபாஹனம் ஓமுஞ்சித்வா ஏகம்ஸம் உத்தராஸங்க³ம் கரித்வா த³ந்தகட்ட²ம் தா³தப்³ப³ம், முகோ²த³கம் தா³தப்³ப³ம், ஆஸனம் பஞ்ஞபேதப்³ப³ம். ஸசே யாகு³ ஹோதி, பா⁴ஜனம் தோ⁴வித்வா யாகு³ உபனாமேதப்³பா³. யாகு³ம் பீதஸ்ஸ உத³கம் த³த்வா பா⁴ஜனம் படிக்³க³ஹேத்வா நீசம் கத்வா ஸாது⁴கம் அப்படிக⁴ம்ஸந்தேன தோ⁴வித்வா படிஸாமேதப்³ப³ம். ஆசரியம்ஹி வுட்டி²தே ஆஸனம் உத்³த⁴ரிதப்³ப³ம். ஸசே ஸோ தே³ஸோ உக்லாபோ ஹோதி, ஸோ தே³ஸோ ஸம்மஜ்ஜிதப்³போ³.

‘‘ஸசே ஆசரியோ கா³மம் பவிஸிதுகாமோ ஹோதி, நிவாஸனம் தா³தப்³ப³ம், படினிவாஸனம் படிக்³க³ஹேதப்³ப³ம், காயப³ந்த⁴னம் தா³தப்³ப³ம், ஸகு³ணம் கத்வா ஸங்கா⁴டியோ தா³தப்³பா³, தோ⁴வித்வா பத்தோ ஸோத³கோ தா³தப்³போ³. ஸசே ஆசரியோ பச்சா²ஸமணம் ஆகங்க²தி, திமண்ட³லம் படிச்சா²தே³ந்தேன பரிமண்ட³லம் நிவாஸேத்வா காயப³ந்த⁴னம் ப³ந்தி⁴த்வா ஸகு³ணம் கத்வா ஸங்கா⁴டியோ பாருபித்வா க³ண்டி²கம் படிமுஞ்சித்வா தோ⁴வித்வா பத்தம் க³ஹேத்வா ஆசரியஸ்ஸ பச்சா²ஸமணேன ஹோதப்³ப³ம். நாதிதூ³ரே க³ந்தப்³ப³ம், நாச்சாஸன்னே க³ந்தப்³ப³ம், பத்தபரியாபன்னம் படிக்³க³ஹேதப்³ப³ம். ந ஆசரியஸ்ஸ ப⁴ணமானஸ்ஸ அந்தரந்தரா கதா² ஓபாதேதப்³பா³. ஆசரியோ ஆபத்திஸாமந்தா ப⁴ணமானோ நிவாரேதப்³போ³.

‘‘நிவத்தந்தேன பட²மதரம் ஆக³ந்த்வா ஆஸனம் பஞ்ஞபேதப்³ப³ம், பாதோ³த³கம் பாத³பீட²ம் பாத³கத²லிகம் உபனிக்கி²பிதப்³ப³ம், பச்சுக்³க³ந்த்வா பத்தசீவரம் படிக்³க³ஹேதப்³ப³ம், படினிவாஸனம் தா³தப்³ப³ம், நிவாஸனம் படிக்³க³ஹேதப்³ப³ம். ஸசே சீவரம் ஸின்னம் ஹோதி, முஹுத்தம் உண்ஹே ஓதாபேதப்³ப³ம், ந ச உண்ஹே சீவரம் நித³ஹிதப்³ப³ம். சீவரம் ஸங்க⁴ரிதப்³ப³ம். சீவரம் ஸங்க⁴ரந்தேன சதுரங்கு³லம் கண்ணம் உஸ்ஸாரேத்வா சீவரம் ஸங்க⁴ரிதப்³ப³ம் – மா மஜ்ஜே² ப⁴ங்கோ³ அஹோஸீதி. ஓபோ⁴கே³ காயப³ந்த⁴னம் காதப்³ப³ம்.

‘‘ஸசே பிண்ட³பாதோ ஹோதி, ஆசரியோ ச பு⁴ஞ்ஜிதுகாமோ ஹோதி, உத³கம் த³த்வா பிண்ட³பாதோ உபனாமேதப்³போ³. ஆசரியோ பானீயேன புச்சி²தப்³போ³. பு⁴த்தாவிஸ்ஸ உத³கம் த³த்வா பத்தம் படிக்³க³ஹேத்வா நீசம் கத்வா ஸாது⁴கம் அப்படிக⁴ம்ஸந்தேன தோ⁴வித்வா வோத³கம் கத்வா முஹுத்தம் உண்ஹே ஓதாபேதப்³போ³, ந ச உண்ஹே பத்தோ நித³ஹிதப்³போ³. பத்தசீவரம் நிக்கி²பிதப்³ப³ம். பத்தம் நிக்கி²பந்தேன ஏகேன ஹத்தே²ன பத்தம் க³ஹேத்வா ஏகேன ஹத்தே²ன ஹேட்டா²மஞ்சம் வா ஹேட்டா²பீட²ம் வா பராமஸித்வா பத்தோ நிக்கி²பிதப்³போ³. ந ச அனந்தரஹிதாய பூ⁴மியா பத்தோ நிக்கி²பிதப்³போ³. சீவரம் நிக்கி²பந்தேன ஏகேன ஹத்தே²ன சீவரம் க³ஹேத்வா ஏகேன ஹத்தே²ன சீவரவம்ஸம் வா சீவரரஜ்ஜும் வா பமஜ்ஜித்வா பாரதோ அந்தம் ஓரதோ போ⁴க³ம் கத்வா சீவரம் நிக்கி²பிதப்³ப³ம். ஆசரியம்ஹி வுட்டி²தே ஆஸனம் உத்³த⁴ரிதப்³ப³ம், பாதோ³த³கம் பாத³பீட²ம் பாத³கத²லிகம் படிஸாமேதப்³ப³ம். ஸசே ஸோ தே³ஸோ உக்லாபோ ஹோதி, ஸோ தே³ஸோ ஸம்மஜ்ஜிதப்³போ³.

‘‘ஸசே ஆசரியோ நஹாயிதுகாமோ ஹோதி, நஹானம் படியாதே³தப்³ப³ம். ஸசே ஸீதேன அத்தோ² ஹோதி, ஸீதம் படியாதே³தப்³ப³ம். ஸசே உண்ஹேன அத்தோ² ஹோதி, உண்ஹம் படியாதே³தப்³ப³ம்.

‘‘ஸசே ஆசரியோ ஜந்தாக⁴ரம் பவிஸிதுகாமோ ஹோதி, சுண்ணம் ஸன்னேதப்³ப³ம், மத்திகா தேமேதப்³பா³, ஜந்தாக⁴ரபீட²ம் ஆதா³ய ஆசரியஸ்ஸ பிட்டி²தோ பிட்டி²தோ க³ந்த்வா ஜந்தாக⁴ரபீட²ம் த³த்வா சீவரம் படிக்³க³ஹேத்வா ஏகமந்தம் நிக்கி²பிதப்³ப³ம், சுண்ணம் தா³தப்³ப³ம், மத்திகா தா³தப்³பா³. ஸசே உஸ்ஸஹதி, ஜந்தாக⁴ரம் பவிஸிதப்³ப³ம். ஜந்தாக⁴ரம் பவிஸந்தேன மத்திகாய முக²ம் மக்கே²த்வா புரதோ ச பச்ச²தோ ச படிச்சா²தே³த்வா ஜந்தாக⁴ரம் பவிஸிதப்³ப³ம். ந தே²ரே பி⁴க்கூ² அனுபக²ஜ்ஜ நிஸீதி³தப்³ப³ம். ந நவா பி⁴க்கூ² ஆஸனேன படிபா³ஹிதப்³பா³. ஜந்தாக⁴ரே ஆசரியஸ்ஸ பரிகம்மம் காதப்³ப³ம். ஜந்தாக⁴ரா நிக்க²மந்தேன ஜந்தாக⁴ரபீட²ம் ஆதா³ய புரதோ ச பச்ச²தோ ச படிச்சா²தே³த்வா ஜந்தாக⁴ரா நிக்க²மிதப்³ப³ம்.

‘‘உத³கேபி ஆசரியஸ்ஸ பரிகம்மம் காதப்³ப³ம். நஹாதேன பட²மதரம் உத்தரித்வா அத்தனோ க³த்தம் வோத³கம் கத்வா நிவாஸேத்வா ஆசரியஸ்ஸ க³த்ததோ உத³கம் பமஜ்ஜிதப்³ப³ம், நிவாஸனம் தா³தப்³ப³ம், ஸங்கா⁴டி தா³தப்³பா³, ஜந்தாக⁴ரபீட²ம் ஆதா³ய பட²மதரம் ஆக³ந்த்வா ஆஸனம் பஞ்ஞபேதப்³ப³ம், பாதோ³த³கம் பாத³பீட²ம் பாத³கத²லிகம் உபனிக்கி²பிதப்³ப³ம். ஆசரியோ பானீயேன புச்சி²தப்³போ³. ஸசே உத்³தி³ஸாபேதுகாமோ ஹோதி, உத்³தி³ஸாபேதப்³போ³. ஸசே பரிபுச்சி²துகாமோ ஹோதி, பரிபுச்சி²தப்³போ³.

‘‘யஸ்மிம் விஹாரே ஆசரியோ விஹரதி, ஸசே ஸோ விஹாரோ உக்லாபோ ஹோதி, ஸசே உஸ்ஸஹதி, ஸோதே⁴தப்³போ³. விஹாரம் ஸோதே⁴ந்தேன பட²மம் பத்தசீவரம் நீஹரித்வா ஏகமந்தம் நிக்கி²பிதப்³ப³ம்; நிஸீத³னபச்சத்த²ரணம் நீஹரித்வா ஏகமந்தம் நிக்கி²பிதப்³ப³ம்; பி⁴ஸிபி³ப்³போ³ஹனம் நீஹரித்வா ஏகமந்தம் நிக்கி²பிதப்³ப³ம்; மஞ்சோ நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், நீஹரித்வா ஏகமந்தம் நிக்கி²பிதப்³போ³; பீட²ம் நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், நீஹரித்வா ஏகமந்தம் நிக்கி²பிதப்³ப³ம்; மஞ்சபடிபாத³கா நீஹரித்வா ஏகமந்தம் நிக்கி²பிதப்³பா³; கே²ளமல்லகோ நீஹரித்வா ஏகமந்தம் நிக்கி²பிதப்³போ³; அபஸ்ஸேனப²லகம் நீஹரித்வா ஏகமந்தம் நிக்கி²பிதப்³ப³ம்; பூ⁴மத்த²ரணம் யதா²பஞ்ஞத்தம் ஸல்லக்கே²த்வா நீஹரித்வா ஏகமந்தம் நிக்கி²பிதப்³ப³ம். ஸசே விஹாரே ஸந்தானகம் ஹோதி, உல்லோகா பட²மம் ஓஹாரேதப்³ப³ம், ஆலோகஸந்தி⁴கண்ணபா⁴கா³ பமஜ்ஜிதப்³பா³. ஸசே கே³ருகபரிகம்மகதா பி⁴த்தி கண்ணகிதா ஹோதி, சோளகம் தேமேத்வா பீளேத்வா பமஜ்ஜிதப்³பா³. ஸசே காளவண்ணகதா பூ⁴மி கண்ணகிதா ஹோதி, சோளகம் தேமேத்வா பீளேத்வா பமஜ்ஜிதப்³பா³. ஸசே அகதா ஹோதி பூ⁴மி, உத³கேன பரிப்போ²ஸித்வா ஸம்மஜ்ஜிதப்³பா³ – மா விஹாரோ ரஜேன உஹஞ்ஞீதி. ஸங்காரம் விசினித்வா ஏகமந்தம் ச²ட்³டே³தப்³ப³ம்.

‘‘பூ⁴மத்த²ரணம் ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²பஞ்ஞத்தம் பஞ்ஞபேதப்³ப³ம். மஞ்சபடிபாத³கா ஓதாபேத்வா பமஜ்ஜித்வா அதிஹரித்வா யதா²டா²னே ட²பேதப்³பா³. மஞ்சோ ஓதாபேத்வா ஸோதே⁴த்வா பப்போ²டேத்வா நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், அதிஹரித்வா யதா²பஞ்ஞத்தம் பஞ்ஞபேதப்³போ³. பீட²ம் ஓதாபேத்வா ஸோதே⁴த்வா பப்போ²டேத்வா நீசம் கத்வா ஸாது⁴கம் அப்படிக⁴ம்ஸந்தேன, அஸங்க⁴ட்டேந்தேன கவாடபிட்ட²ம், அதிஹரித்வா யதா²பஞ்ஞத்தம் பஞ்ஞபேதப்³ப³ம். பி⁴ஸிபி³ப்³போ³ஹனம் ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²பஞ்ஞத்தம் பஞ்ஞபேதப்³ப³ம். நிஸீத³னபச்சத்த²ரணம் ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²பஞ்ஞத்தம் பஞ்ஞபேதப்³ப³ம். கே²ளமல்லகோ ஓதாபேத்வா பமஜ்ஜித்வா அதிஹரித்வா யதா²டா²னே ட²பேதப்³போ³. அபஸ்ஸேனப²லகம் ஓதாபேத்வா பமஜ்ஜித்வா அதிஹரித்வா யதா²டா²னே ட²பேதப்³ப³ம். பத்தசீவரம் நிக்கி²பிதப்³ப³ம். பத்தம் நிக்கி²பந்தேன ஏகேன ஹத்தே²ன பத்தம் க³ஹேத்வா ஏகேன ஹத்தே²ன ஹேட்டா²மஞ்சம் வா ஹேட்டா²பீட²ம் வா பராமஸித்வா பத்தோ நிக்கி²பிதப்³போ³. ந ச அனந்தரஹிதாய பூ⁴மியா பத்தோ நிக்கி²பிதப்³போ³. சீவரம் நிக்கி²பந்தேன ஏகேன ஹத்தே²ன சீவரம் க³ஹேத்வா ஏகேன ஹத்தே²ன சீவரவம்ஸம் வா சீவரரஜ்ஜும் வா பமஜ்ஜித்வா பாரதோ அந்தம் ஓரதோ போ⁴க³ம் கத்வா சீவரம் நிக்கி²பிதப்³ப³ம்.

‘‘ஸசே புரத்தி²மா ஸரஜா வாதா வாயந்தி, புரத்தி²மா வாதபானா த²கேதப்³பா³. ஸசே பச்சி²மா ஸரஜா வாதா வாயந்தி, பச்சி²மா வாதபானா த²கேதப்³பா³. ஸசே உத்தரா ஸரஜா வாதா வாயந்தி, உத்தரா வாதபானா த²கேதப்³பா³. ஸசே த³க்கி²ணா ஸரஜா வாதா வாயந்தி, த³க்கி²ணா வாதபானா த²கேதப்³பா³. ஸசே ஸீதகாலோ ஹோதி, தி³வா வாதபானா விவரிதப்³பா³, ரத்திம் த²கேதப்³பா³. ஸசே உண்ஹகாலோ ஹோதி, தி³வா வாதபானா த²கேதப்³பா³, ரத்திம் விவரிதப்³பா³.

‘‘ஸசே பரிவேணம் உக்லாபம் ஹோதி, பரிவேணம் ஸம்மஜ்ஜிதப்³ப³ம். ஸசே கோட்ட²கோ உக்லாபோ ஹோதி, கோட்ட²கோ ஸம்மஜ்ஜிதப்³போ³. ஸசே உபட்டா²னஸாலா உக்லாபா ஹோதி, உபட்டா²னஸாலா ஸம்மஜ்ஜிதப்³பா³. ஸசே அக்³கி³ஸாலா உக்லாபா ஹோதி, அக்³கி³ஸாலா ஸம்மஜ்ஜிதப்³பா³. ஸசே வச்சகுடி உக்லாபா ஹோதி, வச்சகுடி ஸம்மஜ்ஜிதப்³பா³. ஸசே பானீயம் ந ஹோதி, பானீயம் உபட்டா²பேதப்³ப³ம். ஸசே பரிபோ⁴ஜனீயம் ந ஹோதி, பரிபோ⁴ஜனீயம் உபட்டா²பேதப்³ப³ம். ஸசே ஆசமனகும்பி⁴யம் உத³கம் ந ஹோதி, ஆசமனகும்பி⁴யா உத³கம் ஆஸிஞ்சிதப்³ப³ம்.

‘‘ஸசே ஆசரியஸ்ஸ அனபி⁴ரதி உப்பன்னா ஹோதி, அந்தேவாஸிகேன வூபகாஸேதப்³போ³, வூபகாஸாபேதப்³போ³, த⁴ம்மகதா² வாஸ்ஸ காதப்³பா³. ஸசே ஆசரியஸ்ஸ குக்குச்சம் உப்பன்னம் ஹோதி, அந்தேவாஸிகேன வினோதே³தப்³ப³ம், வினோதா³பேதப்³ப³ம், த⁴ம்மகதா² வாஸ்ஸ காதப்³பா³. ஸசே ஆசரியஸ்ஸ தி³ட்டி²க³தம் உப்பன்னம் ஹோதி, அந்தேவாஸிகேன விவேசேதப்³ப³ம், விவேசாபேதப்³ப³ம், த⁴ம்மகதா² வாஸ்ஸ காதப்³பா³. ஸசே ஆசரியோ க³ருத⁴ம்மம் அஜ்ஜா²பன்னோ ஹோதி பரிவாஸாரஹோ, அந்தேவாஸிகேன உஸ்ஸுக்கம் காதப்³ப³ம் – கிந்தி நு கோ² ஸங்கோ⁴ ஆசரியஸ்ஸ பரிவாஸம் த³தே³ய்யாதி. ஸசே ஆசரியோ மூலாய படிகஸ்ஸனாரஹோ ஹோதி, அந்தேவாஸிகேன உஸ்ஸுக்கம் காதப்³ப³ம் – கிந்தி நு கோ² ஸங்கோ⁴ ஆசரியம் மூலாய படிகஸ்ஸேய்யாதி. ஸசே ஆசரியோ மானத்தாரஹோ ஹோதி, அந்தேவாஸிகேன உஸ்ஸுக்கம் காதப்³ப³ம் – கிந்தி நு கோ² ஸங்கோ⁴ ஆசரியஸ்ஸ மானத்தம் த³தே³ய்யாதி. ஸசே ஆசரியோ அப்³பா⁴னாரஹோ ஹோதி, அந்தேவாஸிகேன உஸ்ஸுக்கம் காதப்³ப³ம் – கிந்தி நு கோ² ஸங்கோ⁴ ஆசரியம் அப்³பே⁴ய்யாதி. ஸசே ஸங்கோ⁴ ஆசரியஸ்ஸ கம்மம் கத்துகாமோ ஹோதி, தஜ்ஜனீயம் வா நியஸ்ஸம் வா பப்³பா³ஜனீயம் வா படிஸாரணீயம் வா உக்கே²பனீயம் வா, அந்தேவாஸிகேன உஸ்ஸுக்கம் காதப்³ப³ம் – கிந்தி நு கோ² ஸங்கோ⁴ ஆசரியஸ்ஸ கம்மம் ந கரேய்ய, லஹுகாய வா பரிணாமேய்யாதி. கதம் வா பனஸ்ஸ ஹோதி ஸங்கே⁴ன கம்மம், தஜ்ஜனீயம் வா நியஸ்ஸம் வா பப்³பா³ஜனீயம் வா படிஸாரணீயம் வா உக்கே²பனீயம் வா, அந்தேவாஸிகேன உஸ்ஸுக்கம் காதப்³ப³ம் – கிந்தி நு கோ² ஆசரியோ ஸம்மா வத்தேய்ய, லோமம் பாதேய்ய, நேத்தா²ரம் வத்தேய்ய, ஸங்கோ⁴ தம் கம்மம் படிப்பஸ்ஸம்பே⁴ய்யாதி.

‘‘ஸசே ஆசரியஸ்ஸ சீவரம் தோ⁴விதப்³ப³ம் ஹோதி, அந்தேவாஸிகேன தோ⁴விதப்³ப³ம், உஸ்ஸுக்கம் வா காதப்³ப³ம் – கிந்தி நு கோ² ஆசரியஸ்ஸ சீவரம் தோ⁴வியேதா²தி. ஸசே ஆசரியஸ்ஸ சீவரம் காதப்³ப³ம் ஹோதி, அந்தேவாஸிகேன காதப்³ப³ம், உஸ்ஸுக்கம் வா காதப்³ப³ம் – கிந்தி நு கோ² ஆசரியஸ்ஸ சீவரம் கரியேதா²தி. ஸசே ஆசரியஸ்ஸ ரஜனம் பசிதப்³ப³ம் ஹோதி, அந்தேவாஸிகேன பசிதப்³ப³ம், உஸ்ஸுக்கம் வா காதப்³ப³ம் – கிந்தி நு கோ² ஆசரியஸ்ஸ ரஜனம் பசியேதா²தி. ஸசே ஆசரியஸ்ஸ சீவரம் ரஜிதப்³ப³ம் ஹோதி, அந்தேவாஸிகேன ரஜிதப்³ப³ம், உஸ்ஸுக்கம் வா காதப்³ப³ம் – கிந்தி நு கோ² ஆசரியஸ்ஸ சீவரம் ரஜியேதா²தி. சீவரம் ரஜந்தேன ஸாது⁴கம் ஸம்பரிவத்தகம் ஸம்பரிவத்தகம் ரஜிதப்³ப³ம், ந ச அச்சி²ன்னே தே²வே பக்கமிதப்³ப³ம்.

‘‘ந ஆசரியம் அனாபுச்சா² ஏகச்சஸ்ஸ பத்தோ தா³தப்³போ³, ந ஏகச்சஸ்ஸ பத்தோ படிக்³க³ஹேதப்³போ³; ந ஏகச்சஸ்ஸ சீவரம் தா³தப்³ப³ம்; ந ஏகச்சஸ்ஸ சீவரம் படிக்³க³ஹேதப்³ப³ம்; ந ஏகச்சஸ்ஸ பரிக்கா²ரோ தா³தப்³போ³; ந ஏகச்சஸ்ஸ பரிக்கா²ரோ படிக்³க³ஹேதப்³போ³; ந ஏகச்சஸ்ஸ கேஸா சே²தே³தப்³பா³; ந ஏகச்சேன கேஸா சே²தா³பேதப்³பா³; ந ஏகச்சஸ்ஸ பரிகம்மம் காதப்³ப³ம்; ந ஏகச்சேன பரிகம்மம் காராபேதப்³ப³ம்; ந ஏகச்சஸ்ஸ வேய்யாவச்சோ காதப்³போ³; ந ஏகச்சேன வேய்யாவச்சோ காராபேதப்³போ³; ந ஏகச்சஸ்ஸ பச்சா²ஸமணேன ஹோதப்³ப³ம்; ந ஏகச்சோ பச்சா²ஸமணோ ஆதா³தப்³போ³; ந ஏகச்சஸ்ஸ பிண்ட³பாதோ நீஹரிதப்³போ³; ந ஏகச்சேன பிண்ட³பாதோ நீஹராபேதப்³போ³. ந ஆசரியம் அனாபுச்சா² கா³மோ பவிஸிதப்³போ³, ந ஸுஸானம் க³ந்தப்³ப³ம், ந தி³ஸா பக்கமிதப்³பா³. ஸசே ஆசரியோ கி³லானோ ஹோதி, யாவஜீவம் உபட்டா²தப்³போ³, வுட்டா²னமஸ்ஸ ஆக³மேதப்³ப³’’ந்தி.

ஆசரியவத்தம் நிட்டி²தம்.