3. அமூள்ஹவினயோ

196. தேன கோ² பன ஸமயேன க³க்³கோ³ பி⁴க்கு² உம்மத்தகோ ஹோதி, சித்தவிபரியாஸகதோ. தேன உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் ஹோதி பா⁴ஸிதபரிக்கந்தம். பி⁴க்கூ² க³க்³க³ம் பி⁴க்கு²ம் உம்மத்தகேன சித்தவிபரியாஸகதேன அஜ்ஜா²சிண்ணேன ஆபத்தியா சோதே³ந்தி – ‘‘ஸரதாயஸ்மா ஏவரூபிம் ஆபத்திம் ஆபஜ்ஜிதா’’தி? ஸோ ஏவம் வதே³தி – ‘‘அஹம் கோ², ஆவுஸோ, உம்மத்தகோ அஹோஸிம் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் பா⁴ஸிதபரிக்கந்தம். நாஹம் தம் ஸராமி. மூள்ஹேன மே ஏதம் கத’’ந்தி. ஏவம்பி நம் வுச்சமானா சோதே³ந்தேவ – ‘‘ஸரதாயஸ்மா ஏவரூபிம் ஆபத்திம் ஆபஜ்ஜிதா’’தி? யே தே பி⁴க்கூ² அப்பிச்சா²..பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம பி⁴க்கூ² க³க்³க³ம் பி⁴க்கு²ம் உம்மத்தகேன சித்தவிபரியாஸகதேன அஜ்ஜா²சிண்ணேன ஆபத்தியா சோதே³ஸ்ஸந்தி – ‘‘ஸரதாயஸ்மா ஏவரூபிம் ஆபத்திம் ஆபஜ்ஜிதா’தி! ஸோ ஏவம் வதே³தி – ‘அஹம் கோ², ஆவுஸோ, உம்மத்தகோ அஹோஸிம் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் பா⁴ஸிதபரிக்கந்தம். நாஹம் தம் ஸராமி. மூள்ஹேன மே ஏதம் கத’ந்தி. ஏவம்பி நம் வுச்சமானா சோதே³ந்தேவ – ‘‘ஸரதாயஸ்மா ஏவரூபிம் ஆபத்திம் ஆபஜ்ஜிதா’’தி? அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, பி⁴க்க²வே…பே… ஸச்சம் ப⁴க³வா’’தி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி –

‘‘தேன ஹி, பி⁴க்க²வே, ஸங்கோ⁴ க³க்³க³ஸ்ஸ பி⁴க்கு²னோ அமூள்ஹஸ்ஸ அமூள்ஹவினயம் தே³து. ஏவஞ்ச பன, பி⁴க்க²வே, தா³தப்³போ³ – ‘‘தேன, பி⁴க்க²வே, க³க்³கே³ன பி⁴க்கு²னா ஸங்க⁴ம் உபஸங்கமித்வா, ஏகம்ஸம் உத்தராஸங்க³ம் கரித்வா, வுட்³டா⁴னம் பி⁴க்கூ²னம் பாதே³ வந்தி³த்வா, உக்குடிகம் நிஸீதி³த்வா, அஞ்ஜலிம் பக்³க³ஹேத்வா, ஏவமஸ்ஸ வசனீயோ – ‘அஹம், ப⁴ந்தே, உம்மத்தகோ அஹோஸிம் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் பா⁴ஸிதபரிக்கந்தம். மம் பி⁴க்கூ² உம்மத்தகேன சித்தவிபரியாஸகதேன அஜ்ஜா²சிண்ணேன ஆபத்தியா சோதே³ந்தி – ‘ஸரதாயஸ்மா ஏவரூபிம் ஆபத்திம் ஆபஜ்ஜிதா’தி? த்யாஹம் ஏவம் வதா³மி – ‘அஹம் கோ², ஆவுஸோ, உம்மத்தகோ அஹோஸிம் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் பா⁴ஸிதபரிக்கந்தம். நாஹம் தம் ஸராமி. மூள்ஹேன மே ஏதம் கத’ந்தி. ஏவம்பி மம் வுச்சமானா சோதே³ந்தேவ – ‘ஸரதாயஸ்மா ஏவரூபிம் ஆபத்திம் ஆபஜ்ஜிதா’தி? ஸோஹம், ப⁴ந்தே, அமூள்ஹோ ஸங்க⁴ம் அமூள்ஹவினயம் யாசாமீ’தி. து³தியம்பி யாசிதப்³போ³. ததியம்பி யாசிதப்³போ³ – ‘அஹம், ப⁴ந்தே, உம்மத்தகோ அஹோஸிம் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் பா⁴ஸிதபரிக்கந்தம். மம் பி⁴க்கூ² உம்மத்தகேன சித்தவிபரியாஸகதேன அஜ்ஜா²சிண்ணேன ஆபத்தியா சோதே³ந்தி – ‘ஸரதாயஸ்மா ஏவரூபிம் ஆபத்திம் ஆபஜ்ஜிதா’தி? த்யாஹம் ஏவம் வதா³மி – ‘அஹம் கோ², ஆவுஸோ, உம்மத்தகோ அஹோஸிம் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் பா⁴ஸிதபரிக்கந்தம். நாஹம் தம் ஸராமி மூள்ஹேன மே ஏதம் கத’ந்தி. ஏவம்பி மம் வுச்சமானா சோதே³ந்தேவ – ‘ஸரதாயஸ்மா ஏவரூபிம் ஆபத்திம் ஆபஜ்ஜிதா’தி? ஸோஹம் அமூள்ஹோ [ஸோஹம் ப⁴ந்தே அமூள்ஹோ (க.)] ததியம்பி, ப⁴ந்தே, ஸங்க⁴ம் அமூள்ஹவினயம் யாசாமீ’தி. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –

197. ‘‘ஸுணாது மே, ப⁴ந்தே, ஸங்கோ⁴. அயம் க³க்³கோ³ பி⁴க்கு² உம்மத்தகோ அஹோஸி சித்தவிபரியாஸகதோ. தேன உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் பா⁴ஸிதபரிக்கந்தம். பி⁴க்கூ² க³க்³க³ம் பி⁴க்கு²ம் உம்மத்தகேன சித்தவிபரியாஸகதேன அஜ்ஜா²சிண்ணேன ஆபத்தியா சோதே³ந்தி – ‘ஸரதாயஸ்மா ஏவரூபிம் ஆபத்திம் ஆபஜ்ஜிதா’தி? ஸோ ஏவம் வதே³தி – ‘அஹம் கோ², ஆவுஸோ, உம்மத்தகோ அஹோஸிம் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் பா⁴ஸிதபரிக்கந்தம். நாஹம் தம் ஸராமி, மூள்ஹேன மே ஏதம் கத’ந்தி. ஏவம்பி நம் வுச்சமானா சோதே³ந்தேவ – ‘ஸரதாயஸ்மா ஏவரூபிம் ஆபத்திம் ஆபஜ்ஜிதா’தி? ஸோ அமூள்ஹோ ஸங்க⁴ம் அமூள்ஹவினயம் யாசதி. யதி³ ஸங்க⁴ஸ்ஸ பத்தகல்லம், ஸங்கோ⁴ க³க்³க³ஸ்ஸ பி⁴க்கு²னோ அமூள்ஹஸ்ஸ அமூள்ஹவினயம் த³தே³ய்ய. ஏஸா ஞத்தி.

‘‘ஸுணாது மே, ப⁴ந்தே, ஸங்கோ⁴. அயம் க³க்³கோ³ பி⁴க்கு² உம்மத்தகோ அஹோஸி சித்தவிபரியாஸகதோ. தேன உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் பா⁴ஸிதபரிக்கந்தம். பி⁴க்கூ² க³க்³க³ம் பி⁴க்கு²ம் உம்மத்தகேன சித்தவிபரியாஸகதேன அஜ்ஜா²சிண்ணேன ஆபத்தியா சோதே³ந்தி – ‘ஸரதாயஸ்மா ஏவரூபிம் ஆபத்திம் ஆபஜ்ஜிதா’தி? ஸோ ஏவம் வதே³தி – ‘அஹம் கோ², ஆவுஸோ, உம்மத்தகோ அஹோஸிம் சித்தவிபரியாஸகதோ. தேன மே உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் பா⁴ஸிதபரிக்கந்தம். நாஹம் தம் ஸராமி மூள்ஹேன மே ஏதம் கத’ந்தி. ஏவம்பி நம் வுச்சமானா சோதே³ந்தேவ – ‘ஸரதாயஸ்மா ஏவரூபிம் ஆபத்திம் ஆபஜ்ஜிதா’தி? ஸோ அமூள்ஹோ ஸங்க⁴ம் அமூள்ஹவினயம் யாசதி. ஸங்கோ⁴ க³க்³க³ஸ்ஸ பி⁴க்கு²னோ அமூள்ஹஸ்ஸ அமூள்ஹவினயம் தே³தி. யஸ்ஸாயஸ்மதோ க²மதி க³க்³க³ஸ்ஸ பி⁴க்கு²னோ அமூள்ஹஸ்ஸ அமூள்ஹவினயஸ்ஸ தா³னம், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸேய்ய.

‘‘து³தியம்பி ஏதமத்த²ம் வதா³மி…பே… ததியம்பி ஏதமத்த²ம் வதா³மி…பே….

‘‘தி³ன்னோ ஸங்கே⁴ன க³க்³க³ஸ்ஸ பி⁴க்கு²னோ அமூள்ஹஸ்ஸ அமூள்ஹவினயோ. க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

198. ‘‘தீணிமானி, பி⁴க்க²வே, அத⁴ம்மிகானி அமூள்ஹவினயஸ்ஸ தா³னானி, தீணி த⁴ம்மிகானி. கம்மானி தீணி அத⁴ம்மிகானி அமூள்ஹவினயஸ்ஸ தா³னானி?

‘‘இத⁴ பன, பி⁴க்க²வே, பி⁴க்கு² ஆபத்திம் ஆபன்னோ ஹோதி. தமேனம் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘ஸரதாயஸ்மா ஏவரூபிம் ஆபத்திம் ஆபஜ்ஜிதா’தி? ஸோ ஸரமானோவ ஏவம் வதே³தி – ‘ந கோ² அஹம், ஆவுஸோ, ஸராமி ஏவரூபிம் ஆபத்திம் ஆபஜ்ஜிதா’தி. தஸ்ஸ ஸங்கோ⁴ அமூள்ஹவினயம் தே³தி. அத⁴ம்மிகம் அமூள்ஹவினயஸ்ஸ தா³னம்.

‘‘இத⁴ பன, பி⁴க்க²வே, பி⁴க்கு² ஆபத்திம் ஆபன்னோ ஹோதி. தமேனம் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘ஸரதாயஸ்மா ஏவரூபிம் ஆபத்திம் ஆபஜ்ஜிதா’தி? ஸோ ஸரமானோவ ஏவம் வதே³தி – ‘ஸராமி கோ² அஹம், ஆவுஸோ, யதா²ஸுபினந்தேனா’தி. தஸ்ஸ ஸங்கோ⁴ அமூள்ஹவினயம் தே³தி. அத⁴ம்மிகம் அமூள்ஹவினயஸ்ஸ தா³னம்.

‘‘இத⁴ பன, பி⁴க்க²வே, பி⁴க்கு² ஆபத்திம் ஆபன்னோ ஹோதி. தமேனம் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘ஸரதாயஸ்மா ஏவரூபிம் ஆபத்திம் ஆபஜ்ஜிதா’தி? ஸோ அனும்மத்தகோ உம்மத்தகாலயம் கரோதி – ‘அஹம்பி கோ² ஏவம் கரோமி. தும்ஹேபி ஏவம் கரோத². மய்ஹம்பி ஏதம் கப்பதி. தும்ஹாகம்பேதம் கப்பதீ’தி. தஸ்ஸ ஸங்கோ⁴ அமூள்ஹவினயம் தே³தி. அத⁴ம்மிகம் அமூள்ஹவினயஸ்ஸ தா³னம். இமானி தீணி அத⁴ம்மிகானி அமூள்ஹவினயஸ்ஸ தா³னானி.

199. ‘‘கதமானி தீணி த⁴ம்மிகானி அமூள்ஹவினயஸ்ஸ தா³னானி?

‘‘இத⁴ பன, பி⁴க்க²வே, பி⁴க்கு² உம்மத்தகோ ஹோதி சித்தவிபரியாஸகதோ. தேன உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் ஹோதி பா⁴ஸிதபரிக்கந்தம். தமேனம் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘ஸரதாயஸ்மா ஏவரூபிம் ஆபத்திம் ஆபஜ்ஜிதா’தி? ஸோ அஸ்ஸரமானோவ ஏவம் வதே³தி – ‘ந கோ² அஹம், ஆவுஸோ, ஸராமி ஏவரூபிம் ஆபத்திம் ஆபஜ்ஜிதா’தி. தஸ்ஸ ஸங்கோ⁴ அமூள்ஹவினயம் தே³தி. த⁴ம்மிகம் அமூள்ஹவினயஸ்ஸ தா³னம்.

‘‘இத⁴ பன, பி⁴க்க²வே, பி⁴க்கு² உம்மத்தகோ ஹோதி சித்தவிபரியாஸகதோ. தேன உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் ஹோதி பா⁴ஸிதபரிக்கந்தம். தமேனம் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘ஸரதாயஸ்மா ஏவரூபிம் ஆபத்திம் ஆபஜ்ஜிதா’தி? ஸோ அஸ்ஸரமானோவ ஏவம் வதே³தி – ‘ஸராமி கோ² அஹம், ஆவுஸோ, யதா² ஸுபினந்தேனா’தி. தஸ்ஸ ஸங்கோ⁴ அமூள்ஹவினயம் தே³தி. த⁴ம்மிகம் அமூள்ஹவினயஸ்ஸ தா³னம்.

‘‘இத⁴ பன, பி⁴க்க²வே, பி⁴க்கு² உம்மத்தகோ ஹோதி சித்தவிபரியாஸகதோ. தேன உம்மத்தகேன சித்தவிபரியாஸகதேன ப³ஹும் அஸ்ஸாமணகம் அஜ்ஜா²சிண்ணம் ஹோதி பா⁴ஸிதபரிக்கந்தம். தமேனம் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘ஸரதாயஸ்மா ஏவரூபிம் ஆபத்திம் ஆபஜ்ஜிதா’தி? ஸோ உம்மத்தகோ உம்மத்தகாலயம் கரோதி – ‘அஹம்பி ஏவம் கரோமி. தும்ஹேபி ஏவம் கரோத². மய்ஹம்பி ஏதம் கப்பதி. தும்ஹாகம்பேதம் கப்பதீ’தி. தஸ்ஸ ஸங்கோ⁴ அமூள்ஹவினயம் தே³தி. த⁴ம்மிகம் அமூள்ஹவினயஸ்ஸ தா³னம். ‘‘இமானி தீணி த⁴ம்மிகானி அமூள்ஹவினயஸ்ஸ தா³னானீ’’தி.