4. படிஞ்ஞாதகரணம்

200. தேன கோ² பன ஸமயேன ச²ப்³ப³க்³கி³யா பி⁴க்கூ² அப்படிஞ்ஞாய பி⁴க்கூ²னம் கம்மானி கரோந்தி – தஜ்ஜனீயம்பி, நியஸ்ஸம்பி, பப்³பா³ஜனீயம்பி, படிஸாரணீயம்பி, உக்கே²பனீயம்பி. யே தே பி⁴க்கூ² அப்பிச்சா²…பே… தே உஜ்ஜா²யந்தி கி²ய்யந்தி விபாசேந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² அப்படிஞ்ஞாய பி⁴க்கூ²னம் கம்மானி கரிஸ்ஸந்தி – தஜ்ஜனீயம்பி, நியஸ்ஸம்பி, பப்³பா³ஜனீயம்பி, படிஸாரணீயம்பி, உக்கே²பனீயம்பீ’’தி! அத² கோ² தே பி⁴க்கூ² ப⁴க³வதோ ஏதமத்த²ம் ஆரோசேஸும்…பே… ‘‘ஸச்சம் கிர, பி⁴க்க²வே…பே… ‘‘ஸச்சம் ப⁴க³வா’’தி…பே… விக³ரஹித்வா…பே… த⁴ம்மிம் கத²ம் கத்வா பி⁴க்கூ² ஆமந்தேஸி – ‘‘ந, பி⁴க்க²வே, அப்படிஞ்ஞாய பி⁴க்கூ²னம் கம்மம் காதப்³ப³ம் – தஜ்ஜனீயம் வா, நியஸ்ஸம் வா, பப்³பா³ஜனீயம் வா, படிஸாரணீயம் வா, உக்கே²பனீயம் வா. யோ கரேய்ய, ஆபத்தி து³க்கடஸ்ஸ.

201. ‘‘ஏவம் கோ², பி⁴க்க²வே, அத⁴ம்மிகம் ஹோதி படிஞ்ஞாதகரணம், ஏவம் த⁴ம்மிகம். கத²ஞ்ச, பி⁴க்க²வே, அத⁴ம்மிகம் ஹோதி படிஞ்ஞாதகரணம்?

‘‘பி⁴க்கு² பாராஜிகம் அஜ்ஜா²பன்னோ ஹோதி. தமேனம் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘பாராஜிகம் ஆயஸ்மா அஜ்ஜா²பன்னோ’தி? ஸோ ஏவம் வதே³தி – ‘ந கோ² அஹம், ஆவுஸோ, பாராஜிகம் அஜ்ஜா²பன்னோ, ஸங்கா⁴தி³ஸேஸம் அஜ்ஜா²பன்னோ’தி. தம் ஸங்கோ⁴ ஸங்கா⁴தி³ஸேஸேன காரேதி. அத⁴ம்மிகம் படிஞ்ஞாதகரணம்.

‘‘பி⁴க்கு² பாராஜிகம் அஜ்ஜா²பன்னோ ஹோதி. தமேனம் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘பாராஜிகம் ஆயஸ்மா அஜ்ஜா²பன்னோ’தி? ஸோ ஏவம் வதே³தி – ‘ந கோ² அஹம், ஆவுஸோ, பாராஜிகம் அஜ்ஜா²பன்னோ, து²ல்லச்சயம்…பே… பாசித்தியம்…பே… பாடிதே³ஸனீயம்…பே… து³க்கடம்…பே… து³ப்³பா⁴ஸிதம் அஜ்ஜா²பன்னோ’தி. தம் ஸங்கோ⁴ து³ப்³பா⁴ஸிதேன காரேதி. அத⁴ம்மிகம் படிஞ்ஞாதகரணம்.

‘‘பி⁴க்கு² ஸங்கா⁴தி³ஸேஸம்…பே… து²ல்லச்சயம்…பே… பாசித்தியம்…பே… பாடிதே³ஸனீயம்…பே… து³க்கடம்…பே… து³ப்³பா⁴ஸிதம் அஜ்ஜா²பன்னோ ஹோதி. தமேனம் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘து³ப்³பா⁴ஸிதம் ஆயஸ்மா அஜ்ஜா²பன்னோ’தி? ஸோ ஏவம் வதே³தி – ‘ந கோ² அஹம், ஆவுஸோ, து³ப்³பா⁴ஸிதம் அஜ்ஜா²பன்னோ, பாராஜிகம் அஜ்ஜா²பன்னோ’தி. தம் ஸங்கோ⁴ பாராஜிகேன காரேதி. அத⁴ம்மிகம் படிஞ்ஞாதகரணம்.

‘‘பி⁴க்கு² து³ப்³பா⁴ஸிதம் அஜ்ஜா²பன்னோ ஹோதி. தமேனம் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘து³ப்³பா⁴ஸிதம் ஆயஸ்மா அஜ்ஜா²பன்னோ’தி? ஸோ ஏவம் வதே³தி – ‘ந கோ² அஹம், ஆவுஸோ, து³ப்³பா⁴ஸிதம் அஜ்ஜா²பன்னோ, ஸங்கா⁴தி³ஸேஸம்…பே… து²ல்லச்சயம்…பே… பாசித்தியம்…பே… பாடிதே³ஸனீயம்…பே… து³க்கடம் அஜ்ஜா²பன்னோ’தி. தம் ஸங்கோ⁴ து³க்கடேன காரேதி. அத⁴ம்மிகம் படிஞ்ஞாதகரணம். ‘‘ஏவம் கோ², பி⁴க்க²வே, அத⁴ம்மிகம் ஹோதி படிஞ்ஞாதகரணம்.

‘‘கத²ஞ்ச, பி⁴க்க²வே, த⁴ம்மிகம் ஹோதி படிஞ்ஞாதகரணம்? பி⁴க்கு² பாராஜிகம் அஜ்ஜா²பன்னோ ஹோதி. தமேனம் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘பாராஜிகம் ஆயஸ்மா அஜ்ஜா²பன்னோ’தி? ஸோ ஏவம் வதே³தி – ‘ஆம, ஆவுஸோ, பாராஜிகம் அஜ்ஜா²பன்னோ’தி. தம் ஸங்கோ⁴ பாராஜிகேன காரேதி. த⁴ம்மிகம் படிஞ்ஞாதகரணம்.

‘‘பி⁴க்கு² ஸங்கா⁴தி³ஸேஸம்…பே… து²ல்லச்சயம்…பே… பாசித்தியம்…பே… பாடிதே³ஸனீயம்…பே… து³க்கடம்…பே… து³ப்³பா⁴ஸிதம் அஜ்ஜா²பன்னோ ஹோதி. தமேனம் சோதே³தி ஸங்கோ⁴ வா, ஸம்ப³ஹுலா வா, ஏகபுக்³க³லோ வா – ‘து³ப்³பா⁴ஸிதம் ஆயஸ்மா அஜ்ஜா²பன்னோ’தி? ஸோ ஏவம் வதே³தி – ‘ஆம, ஆவுஸோ, து³ப்³பா⁴ஸிதம் அஜ்ஜா²பன்னோ’தி. தம் ஸங்கோ⁴ து³ப்³பா⁴ஸிதேன காரேதி. த⁴ம்மிகம் படிஞ்ஞாதகரணம். ஏவம் கோ², பி⁴க்க²வே, த⁴ம்மிகம் ஹோதி படிஞ்ஞாதகரண’’ந்தி.