11. கேவட்டஸுத்தவண்ணனா

கேவட்டக³ஹபதிபுத்தவத்து²வண்ணனா

481. ஏவம் ஸுப⁴ஸுத்தம் ஸம்வண்ணேத்வா இதா³னி கேவட்டஸுத்தம் ஸம்வண்ணேந்தோ யதா²னுபுப்³ப³ம் ஸம்வண்ணனோகாஸஸ்ஸ பத்தபா⁴வம் விபா⁴வேதும், ஸுப⁴ஸுத்தஸ்ஸானந்தரம் ஸங்கீ³தஸ்ஸ ஸுத்தஸ்ஸ கேவட்டஸுத்தபா⁴வம் வா பகாஸேதும் ‘‘ஏவம் மே ஸுதம்…பே… நாளந்தா³யந்தி கேவட்டஸுத்த’’ந்தி ஆஹ. பாவாரிகஸ்ஸாதி ஏவம்னாமகஸ்ஸ ஸேட்டி²னோ. அம்ப³வனேதி அம்ப³ருக்க²ப³ஹுலே உபவனே. தம் கிர ஸோ ஸேட்டி² ப⁴க³வதோ அனுச்ச²விகம் க³ந்த⁴குடிம், பி⁴க்கு²ஸங்க⁴ஸ்ஸ ச ரத்திட்டா²னதி³வாட்டா²னகுடிமண்ட³பாதீ³னி ஸம்பாதே³த்வா பாகாரபரிக்கி²த்தம் த்³வாரகோட்ட²கஸம்பன்னம் கத்வா பு³த்³த⁴ப்பமுக²ஸ்ஸ ஸங்க⁴ஸ்ஸ நிய்யாதேஸி, புரிமவோஹாரேன பனேஸ விஹாரோ ‘‘பாவாரிகம்ப³வன’’ந்த்வேவ வுச்சதி. ‘‘கேவட்டோ’’ தித³ம் நாமமத்தம். ‘‘கேவட்டேஹி ஸம்ரக்கி²தத்தா, தேஸம் வா ஸந்திகே ஸம்பு³த்³த⁴த்தா’’தி கேசி. க³ஹபதிபுத்தஸ்ஸாதி ஏத்த² காமஞ்சேஸ ததா³ க³ஹபதிட்டா²னே டி²தோ, பிது பனஸ்ஸ அசிரகாலகததாய புரிமஸமஞ்ஞாய ‘‘க³ஹபதிபுத்தோ’’த்வேவ வோஹரீயதி. தேனாஹ ‘‘க³ஹபதிமஹாஸாலோ’’தி, மஹாவிப⁴வதாய மஹாஸாரோ க³ஹபதீதி அத்தோ², ர-காரஸ்ஸ பன ல-காரம் கத்வா ‘‘மஹாஸாலோ’’தி வுத்தம் யதா² ‘‘பலிபு³த்³தோ⁴’’தி (சூளனி. 15; மி. ப. 6.3.7; ஜா. அட்ட². 2.3.102) ஸத்³தோ⁴ பஸன்னோதி போது²ஜ்ஜனிகஸத்³தா⁴வஸேன ரதனத்தயஸத்³தா⁴ய ஸமன்னாக³தோ, ததோயேவ ரதனத்தயப்பஸன்னோ. கம்மகம்மப²லஸத்³தா⁴ய வா ஸத்³தோ⁴, ரதனத்தயப்பஸாத³ப³ஹுலதாய பஸன்னோ. ஸத்³தா⁴தி⁴கத்தாயேவாதி ததா²சிந்தாய ஹேதுவசனம், ஸத்³தா⁴தி⁴கோ ஹி உம்மாத³ப்பத்தோ விய ஹோதி.

ஸமித்³தா⁴தி ஸம்மதே³வ இத்³தா⁴, விப⁴வஸம்பத்தியா வேபுல்லப்பத்தா ஸம்புண்ணா, ஆகிண்ணா ப³ஹூ மனுஸ்ஸா ஏத்தா²தி அத்த²ம் ஸந்தா⁴ய ‘‘அம்ஸகூடேனா’’திஆதி³ வுத்தம். ‘‘ஏஹி த்வம் பி⁴க்கு² அன்வத்³த⁴மாஸம், அனுமாஸம், அனுஸம்வச்ச²ரம் வா மனுஸ்ஸானம் பஸாதா³ய இத்³தி⁴பாடிஹாரியம் கரோஹீ’’தி ஏகஸ்ஸ பி⁴க்கு²னோ ஆணாபனமேவ ஸமாதி³ஸனம், தம் பன தஸ்மிம் டா²னே ட²பனம் நாமாதி ஆஹ ‘‘டா²னந்தரே ட²பேதூ’’தி. உத்தரிமனுஸ்ஸானந்தி பகதிமனுஸ்ஸேஹி உத்தரிதரானம் உத்தமபுரிஸானம் பு³த்³தா⁴தீ³னம் ஜா²யீனம், அரியானஞ்ச. த⁴ம்மதோதி அதி⁴க³மத⁴ம்மதோ, ஜா²னாபி⁴ஞ்ஞாமக்³க³ப²லத⁴ம்மதோதி அத்தோ², நித்³தா⁴ரணே சேதம் நிஸ்ஸக்கவசனம். ததோ ஹி இத்³தி⁴பாடிஹாரியம் நித்³தா⁴ரேதி. ஏவம் உத்தரிஸத்³த³ம் மனுஸ்ஸஸத்³தே³ன ஏகபத³ம் கத்வா இதா³னி பாடிஹாரியஸத்³தே³ன ஸம்ப³ஜ்ஜி²தப்³ப³ம் விஸுமேவ பத³ம் கரோந்தோ ‘‘த³ஸகுஸலஸங்கா²ததோ வா’’திஆதி³மாஹ. மனுஸ்ஸத⁴ம்மதோதி பகதிமனுஸ்ஸத⁴ம்மதோ. பஜ்ஜலிதபதீ³போதி பஜ்ஜலந்தபதீ³போ. தேலஸ்னேஹந்தி தேலஸேசனம். ராஜக³ஹஸேட்டி²வத்து²ஸ்மிந்தி ராஜக³ஹஸேட்டி²னோ சந்த³னபத்ததா³னவத்து²ம்ஹி (சூளவ. 252). ஸிக்கா²பத³ம் பஞ்ஞாபேஸீதி ‘‘ந பி⁴க்க²வே கி³ஹீனம் உத்தரிமனுஸ்ஸத⁴ம்மம் இத்³தி⁴பாடிஹாரியம் த³ஸ்ஸேதப்³ப³ம். யோ த³ஸ்ஸேய்ய, ஆபத்தி து³க்கடஸ்ஸா’’தி (சூளவ. 252) விகுப்³ப³னித்³தி⁴படிக்கே²பகம் இத³ம் ஸிக்கா²பத³ம் பஞ்ஞபேஸி.

482. கு³ணஸம்பத்திதோ அசாவனம் ஸந்தா⁴ய ஏதம் வுத்தந்தி த³ஸ்ஸேதி ‘‘ந கு³ணவினாஸனேனா’’தி இமினா. தேனாஹ ‘‘ஸீலபே⁴த³’’ந்திஆதி³. விஸஹந்தோ நாம நத்தீ²தி நிவாரிதட்டா²னே உஸ்ஸஹந்தோ நாம நத்தி². ஏவம்பி இமினா காரணந்தரேனாயம் உஸ்ஸஹந்தோதி த³ஸ்ஸேதும் ‘‘அயம் பனா’’திஆதி³ வுத்தம். யஸ்மா விஸ்ஸாஸிகோ, தஸ்மா விஸ்ஸாஸம் வட்³டே⁴த்வாதி யோஜனா. வட்³டே⁴த்வாதி ச ப்³ரூஹேத்வா, விபூ⁴தம் பாகடம் கத்வாதி அத்தோ².

இத்³தி⁴பாடிஹாரியவண்ணனா

483-4. ஆதீ³னவந்தி தோ³ஸம். கத²ம் தேன கதா, கத்த² வா உப்பன்னாதி ஆஹ ‘‘தத்த² கிரா’’திஆதி³. ஏகேனாதி க³ந்தா⁴ரேன நாம இஸினாவ. ஏவஞ்ஹி புப்³பே³னாபரம் ஸம்ஸந்த³தீதி. க³ந்தா⁴ரீ நாமேஸா விஜ்ஜா சூளக³ந்தா⁴ரீ, மஹாக³ந்தா⁴ரீதி து³விதா⁴ ஹோதி. தத்த² சூளக³ந்தா⁴ரீ நாம திவஸ்ஸதோ ஓரம் மதஸத்தானம் உபபன்னட்டா²னஜானனா விஜ்ஜா. வங்கீ³ஸவத்து² (ஸம். நி. அட்ட². 1.1.220; அ. நி. அட்ட². 1.1.212) சேத்த² ஸாத⁴கம். மஹாக³ந்தா⁴ரீ நாம தஸ்ஸ சேவ ஜானனா, தது³த்தரி ச இத்³தி⁴வித⁴ஞாணகம்மஸ்ஸ ஸாதி⁴கா விஜ்ஜா. யேபு⁴ய்யேன ஹேஸா இத்³தி⁴வித⁴ஞாணகிச்சம் ஸாதே⁴தி. தஸ்ஸா கிர விஜ்ஜாய ஸாத⁴கோ புக்³க³லோ தாதி³ஸே தே³ஸே, காலே ச மந்தம் பரிஜப்பேத்வா ப³ஹுதா⁴பி அத்தானம் த³ஸ்ஸேதி, ஹத்தி²ஆதீ³னிபி த³ஸ்ஸேதி, அத³ஸ்ஸனீயோபி ஹோதி, அக்³கி³த²ம்ப⁴ம்பி கரோதி, ஜலத²ம்ப⁴ம்பி கரோதி, ஆகாஸேபி அத்தானம் த³ஸ்ஸேதி, ஸப்³ப³ம் இந்த³ஜாலஸதி³ஸம் த³ட்ட²ப்³ப³ம். அட்டோதி து³க்கி²தோ பா³தி⁴தோ. தேனாஹ ‘‘பீளிதோ’’தி.

ஆதே³ஸனாபாடிஹாரியவண்ணனா

485. காமம் ‘‘சேதஸிக’’ந்தி இத³ம் யே சேதஸி நியுத்தா சித்தேன ஸம்பயுத்தா, தேஸம் ஸாதா⁴ரணவசனம், ஸாதா⁴ரணே பன க³ஹிதே சித்தவிஸேஸோ த³ஸ்ஸிதோ நாம ஹோதி. ஸாமஞ்ஞஜோதனா ச விஸேஸே அவதிட்ட²தி, தஸ்மா சேதஸிகபத³ஸ்ஸ யதா²தி⁴ப்பேதமத்த²ம் த³ஸ்ஸேந்தோ ‘‘ஸோமனஸ்ஸதோ³மனஸ்ஸம் அதி⁴ப்பேத’’ந்தி ஆஹ. ஸோமனஸ்ஸக்³க³ஹணேன சேத்த² ததே³கட்டா² ராகா³த³யோ, ஸத்³தா⁴த³யோ ச த⁴ம்மா த³ஸ்ஸிதா ஹோந்தி, தோ³மனஸ்ஸக்³க³ஹணேன தோ³ஸாத³யோ. விதக்கவிசாரா பன ஸரூபேனேவ த³ஸ்ஸிதா. பி-ஸத்³த³ஸ்ஸ வத்தப்³ப³ஸம்பிண்ட³னத்தோ² ஸுவிஞ்ஞேய்யோதி ஆஹ ‘‘ஏவம் தவ மனோ’’தி, இமினா பகாரேன தவ மனோ பவத்தோதி அத்தோ². கேன பகாரேனாதி வுத்தம் ‘‘ஸோமனஸ்ஸிதோ வா’’திஆதி³. ‘‘ஏவம்பி தே மனோ’’தி இத³ம் ஸோமனஸ்ஸிததாதி³மத்தத³ஸ்ஸனம், ந பன யேன ஸோமனஸ்ஸிதோ வா தோ³மனஸ்ஸிதோ வா, தம் த³ஸ்ஸனந்தி தம் சித்தம் த³ஸ்ஸேதும் பாளியம் ‘‘இதிபி தே சித்த’’ந்தி வுத்தம். இதிஸத்³தோ³ சேத்த² நித³ஸ்ஸனத்தோ² ‘‘அத்தீ²தி கோ² கச்சான அயமேகோ அந்தோ’’திஆதீ³ஸு (ஸம். நி. 2.15; 3.90) விய. தேனாஹ ‘‘இத³ஞ்சித³ஞ்ச அத்த²’’ந்தி. பி-ஸத்³தோ³ இதா⁴பி வுத்தஸம்பிண்ட³னத்தோ². பரஸ்ஸ சிந்தம் மனதி ஜானாதி ஏதாயாதி சிந்தாமணி ந-காரஸ்ஸ ண-காரம் கத்வா, ஸா ஏவ புப்³ப³பத³மந்தரேன மணிகா. சிந்தா நாம ந சித்தேன வினா ப⁴வதீதி ஆஹ ‘‘பரேஸம் சித்தம் ஜானாதீ’’தி. ‘‘தஸ்ஸா கிர விஜ்ஜாய ஸாத⁴கோ புக்³க³லோ தாதி³ஸே தே³ஸே, காலே ச மந்தம் பரிஜப்பித்வா யஸ்ஸ சித்தம் ஜானிதுகாமோ, தஸ்ஸ தி³ட்ட²ஸுதாதி³விஸேஸஸஞ்ஜானனமுகே²ன சித்தாசாரம் அனுமினந்தோ கதே²தீ’’தி கேசி. ‘‘வாசம் நிச்ச²ராபேத்வா தத்த² அக்க²ரஸல்லக்க²ணவஸேன கதே²தீ’’தி அபரே. ஸா பன விஜ்ஜா பத³குஸலஜாதகேன (ஜா. 1.9.49 ஆத³யோ) தீ³பேதப்³பா³.

அனுஸாஸனீபாடிஹாரியவண்ணனா

486. பவத்தேந்தாதி பவத்தனகா ஹுத்வா, பவத்தனவஸேன விதக்கேதா²தி வுத்தம் ஹோதி. ஏவந்தி ஹி யதா²னுஸிட்டா²ய அனுஸாஸனியா விதி⁴வஸேன, படிஸேத⁴வஸேன ச பவத்திஆகாரபராமஸனம், ஸா ச அனுஸாஸனீ ஸம்மாவிதக்கானம், மிச்சா²விதக்கானஞ்ச பவத்திஆகாரத³ஸ்ஸனவஸேன தத்த² ஆனிஸம்ஸஸ்ஸ, ஆதீ³னவஸ்ஸ ச விபா⁴வனத்த²ம் பவத்ததி. அனிச்சஸஞ்ஞமேவ, ந நிச்சஸஞ்ஞம். படியோகீ³னிவத்தனத்த²ஞ்ஹி ஏவ-காரக்³க³ஹணம். இதா⁴பி ஏவம்-ஸத்³த³ஸ்ஸ அத்தோ², பயோஜனஞ்ச வுத்தனயேனேவ வேதி³தப்³ப³ம். இத³ம்-க³ஹணேபி ஏஸேவ நயோ. பஞ்சகாமகு³ணிகராக³ந்தி நித³ஸ்ஸனமத்தம் தத³ஞ்ஞராக³ஸ்ஸ சேவ தோ³ஸாதீ³னஞ்ச பஹானஸ்ஸ இச்சி²தத்தா, தப்பஹானஸ்ஸ ச தத³ஞ்ஞராகா³தி³கே²பனஸ்ஸ உபாயபா⁴வதோ து³ட்ட²லோஹிதவிமோசனஸ்ஸ புப்³ப³து³ட்ட²மம்ஸகே²பனூபாயதா விய. லோகுத்தரத⁴ம்மமேவாதி அவதா⁴ரணம் படிபக்க²பா⁴வதோ ஸாவஜ்ஜத⁴ம்மனிவத்தனபரம் த³ட்ட²ப்³ப³ம் தஸ்ஸாதி⁴க³மூபாயானிஸம்ஸபூ⁴தானம் தத³ஞ்ஞேஸம் அனவஜ்ஜத⁴ம்மானம் நானந்தரிகபா⁴வதோ. இத்³தி⁴வித⁴ம் இத்³தி⁴பாடிஹாரியந்தி த³ஸ்ஸேதி இத்³தி⁴யேவ பாடிஹாரியந்தி கத்வா. ஸேஸபத³த்³வயேபி ஏஸேவ நயோ.

பாடிஹாரியபத³ஸ்ஸ பன வசனத்த²ம் (உதா³. அட்ட². பட²மபோ³தி⁴ஸுத்தவண்ணனா; இதிவு. அட்ட². நிதா³னவண்ணனா) ‘‘படிபக்க²ஹரணதோ, ராகா³தி³கிலேஸாபனயனதோ பாடிஹாரிய’’ந்தி வத³ந்தி, ப⁴க³வதோ பன படிபக்கா² ராகா³த³யோ ந ஸந்தி யே ஹரிதப்³பா³. புது²ஜ்ஜனானம்பி விக³துபக்கிலேஸே அட்ட²ங்க³கு³ணஸமன்னாக³தே சித்தே ஹதபடிபக்கே² இத்³தி⁴வித⁴ம் பவத்ததி, தஸ்மா தத்த² பவத்தவோஹாரேன ச ந ஸக்கா இத⁴ ‘‘பாடிஹாரிய’’ந்தி வத்தும். ஸசே பன மஹாகாருணிகஸ்ஸ ப⁴க³வதோ வேனேய்யக³தா ச கிலேஸா படிபக்கா², தேஸம் ஹரணதோ ‘‘பாடிஹாரிய’’ந்தி வுத்தம், ஏவம் ஸதி யுத்தமேதம். அத² வா ப⁴க³வதோ சேவ ஸாஸனஸ்ஸ ச படிபக்கா² தித்தி²யா, தேஸம் ஹரணதோ பாடிஹாரியம். தே ஹி தி³ட்டி²ஹரணவஸேன, தி³ட்டி²ப்பகாஸனே அஸமத்த²பா⁴வேன ச இத்³தி⁴ஆதே³ஸனானுஸாஸனீஹி ஹரிதா அபனீதா ஹோந்தீதி. ‘‘படீ’’தி வா அயம் ஸத்³தோ³ ‘‘பச்சா²’’தி ஏதஸ்ஸ அத்த²ம் போ³தே⁴தி ‘‘தஸ்மிம் படிபவிட்ட²ம்ஹி, அஞ்ஞோ ஆக³ஞ்சி² ப்³ராஹ்மணோ’’தி (ஸு. நி. 985; சூளனி. 4) பாராயனஸுத்தபதே³ விய, தஸ்மா ஸமாஹிதே சித்தே விக³துபக்கிலேஸே ச கதகிச்சேன பச்சா² ஹரிதப்³ப³ம் பவத்தேதப்³ப³ந்தி படிஹாரியம், அத்தனோ வா உபக்கிலேஸேஸு சதுத்த²ஜ்ஜா²னமக்³கே³ஹி ஹரிதேஸு பச்சா² ஹரணம் படிஹாரியம், இத்³தி⁴ஆதே³ஸனானுஸாஸனியோ ச விக³துபக்கிலேஸேன கதகிச்சேன ச ஸத்தஹிதத்த²ம் புன பவத்தேதப்³பா³, ஹரிதேஸு ச அத்தனோ உபக்கிலேஸேஸு பரஸத்தானம் உபக்கிலேஸஹரணானி ஹோந்தீதி படிஹாரியானி நாம ப⁴வந்தி, படிஹாரியமேவ பாடிஹாரியம். படிஹாரியே வா இத்³தி⁴ஆதே³ஸனானுஸாஸனிஸமுதா³யே ப⁴வம் ஏகேகம் ‘‘பாடிஹாரிய’’ந்தி வுச்சதி. படிஹாரியம் வா சதுத்த²ஜ்ஜா²னம், மக்³கோ³ ச படிபக்க²ஹரணதோ, தத்த² ஜாதம், தஸ்மிம் வா நிமித்தபூ⁴தே, ததோ வா ஆக³தந்தி பாடிஹாரியம், இத்³தி⁴ஆதே³ஸனானுஸாஸனீஹி வா பரஸந்தானே பஸாதா³தீ³னம் படிபக்க²ஸ்ஸ கிலேஸஸ்ஸ ஹரணதோ வுத்தனயேன பாடிஹாரியம். ஸததம் த⁴ம்மதே³ஸனாதி ஸப்³ப³காலம் தே³ஸேதப்³ப³த⁴ம்மதே³ஸனா.

இத்³தி⁴பாடிஹாரியேனாதி ஸஹாதி³யோகே³ கரணவசனம், தேன ஸத்³தி⁴ம் ஆசிண்ணந்தி அத்தோ². இதரத்தா²பி ஏஸ நயோ. த⁴ம்மஸேனாபதிஸ்ஸ ஆசிண்ணந்தி யோஜேதப்³ப³ம். தமத்த²ம் க²ந்த⁴கவத்து²னா ஸாதே⁴ந்தோ ‘‘தே³வத³த்தே’’திஆதி³மாஹ. க³யாஸீஸேதி க³யாகா³மஸ்ஸ அவிதூ³ரே க³யாஸீஸனாமகோ ஹத்தி²கும்ப⁴ஸதி³ஸோ பிட்டி²பாஸாணோ அத்தி², யத்த² பி⁴க்கு²ஸஹஸ்ஸஸ்ஸபி ஓகாஸோ ஹோதி, தஸ்மிம் பிட்டி²பாஸாணே. ‘‘சித்தாசாரம் ஞத்வா’’தி இமினா ஆதே³ஸனாபாடிஹாரியம் த³ஸ்ஸேதி, ‘‘த⁴ம்மம் தே³ஸேஸீ’’தி இமினா அனுஸாஸனீபாடிஹாரியம், ‘‘விகுப்³ப³னம் த³ஸ்ஸேத்வா’’தி இமினா இத்³தி⁴பாடிஹாரியம். மஹானாகா³தி மஹாகீ²ணாஸவா அரஹந்தோ. ‘‘நாகோ³’’தி ஹி அரஹதோ அதி⁴வசனம் நத்தி² ஆகு³ பாபமேதஸ்ஸாதி கத்வா. யதா²ஹ ஸபி⁴யஸுத்தே –

‘‘ஆகு³ம் ந கரோதி கிஞ்சி லோகே,

ஸப்³ப³ஸம்யோகே³ விஸஜ்ஜ ப³ந்த⁴னானி;

ஸப்³ப³த்த² ந ஸஜ்ஜதீ விமுத்தோ,

நாகோ³ தாதி³ பவுச்சதே தத²த்தா’’தி. (ஸு. நி. 527; மஹானி. 80; சூளனி. 27, 139);

அட்ட²கதா²யம் பனேத்த² ‘‘த⁴ம்மஸேனாபதிஸ்ஸ த⁴ம்மதே³ஸனம் ஸுத்வா பஞ்சஸதா பி⁴க்கூ² ஸோதாபத்திப²லே பதிட்ட²ஹிம்ஸு. மஹாமோக்³க³ல்லானஸ்ஸ த⁴ம்மதே³ஸனம் ஸுத்வா அரஹத்தப²லே’’தி (தீ³. நி. அட்ட². 1.486) வுத்தம். ஸங்க⁴பே⁴த³கக்க²ந்த⁴கபாளியம் பன ‘‘அத² கோ² தேஸம் பி⁴க்கூ²னம் ஆயஸ்மதா ஸாரிபுத்தேன ஆதே³ஸனாபாடிஹாரியானுஸாஸனியா, ஆயஸ்மதா ச மஹாமோக்³க³ல்லானேன இத்³தி⁴பாடிஹாரியானுஸாஸனியா ஓவதி³யமானானம் அனுஸாஸியமானானம் விரஜம் வீதமலம் த⁴ம்மசக்கு²ம் உத³பாதி³ ‘யம் கிஞ்சி ஸமுத³யத⁴ம்மம், ஸப்³ப³ம் தம் நிரோத⁴த⁴ம்ம’ந்தி’’ (சூளவ. 345) உபி⁴ன்னம்பி தே²ரானம் த⁴ம்மதே³ஸனாய தேஸம் த⁴ம்மசக்கு²படிலாபோ⁴வ த³ஸ்ஸிதோ, தயித³ம் விஸதி³ஸவசனம் தீ³க⁴பா⁴ணகானம், க²ந்த⁴கபா⁴ணகானஞ்ச மதிபே⁴தே³னாதி த³ட்ட²ப்³ப³ம். ஸங்கா³ஹகபா⁴ஸிதா ஹி அயம் பாளி, அட்ட²கதா² ச தேஹேவ ஸங்க³ஹமாரோபிதா, அபிச பாளியம் உபரிமக்³க³ப²லம்பி ஸங்க³ஹேத்வா ‘‘த⁴ம்மசக்கு²ம் உத³பாதீ³’’தி வுத்தம் யதா² தம் ப்³ரஹ்மாயுஸுத்தே, (ம. நி. 2.343) சூளராஹுலோவாத³ஸுத்தே (ம. நி. 3.416) சாதி வேதி³தப்³ப³ம்.

‘‘அனுஸாஸனீபாடிஹாரியம் பன பு³த்³தா⁴னம் ஸததம் த⁴ம்மதே³ஸனா’’தி ஸாதிஸயதாய வுத்தம். ஸஉபாரம்பா⁴னி யதா²வுத்தேன பதிரூபகேன உபாரம்பி⁴தப்³ப³தோ. ஸதோ³ஸானி பராரோபிததோ³ஸஸமுச்சி²ந்த³னஸ்ஸ அனுபாயபா⁴வதோ. ஸதோ³ஸத்தா ஏவ அத்³தா⁴னம் ந திட்ட²ந்தி சிரகாலட்டா²யீனி ந ஹோந்தி. அத்³தா⁴னம் அதிட்ட²னதோ ந நிய்யந்தீதி ப²லேன ஹேதுனோ அனுமானம். அனிய்யானிகதாய ஹி தானி அனத்³த⁴னியானி. அனுஸாஸனீபாடிஹாரியம் அனுபாரம்ப⁴ம் விஸுத்³தி⁴ப்பப⁴வதோ, விஸுத்³தி⁴னிஸ்ஸயதோ ச. ததோயேவ நித்³தோ³ஸம். ந ஹி தத்த² புப்³பா³பரவிரோதா⁴தி³தோ³ஸஸம்ப⁴வோ அத்தி². நித்³தோ³ஸத்தா ஏவ அத்³தா⁴னம் திட்ட²தி பரப்பவாத³வாதேஹி, கிலேஸவாதேஹி ச அனுபஹந்தப்³ப³தோ. அத்³தா⁴னம் திட்ட²னதோ நிய்யாதீதி இதா⁴பி ப²லேன ஹேதுனோ அனுமானம். நிய்யானிகதாய ஹி தம் அத்³த⁴னியம். தஸ்மாதி யதா²வுத்தகாரணதோ, தேன ச உபாரம்பா⁴தி³ம், அனுபாரம்பா⁴தி³ஞ்சாதி உப⁴யம் யதா²க்கமம் உப⁴யத்த² கா³ரய்ஹபாஸம்ஸபா⁴வானம் ஹேதுபா⁴வேன பச்சாமஸதி.

பூ⁴தனிரோதே⁴ஸகவத்து²வண்ணனா

487. அனிய்யானிகபா⁴வத³ஸ்ஸனத்த²ந்தி யஸ்மா மஹாபூ⁴தபரியேஸகோ பி⁴க்கு² புரிமேஸு த்³வீஸு பாடிஹாரியேஸு வஸிப்பத்தோ ஸுகுஸலோபி ஸமானோ மஹாபூ⁴தானம் அபரிஸேஸனிரோத⁴ஸங்கா²தம் நிப்³பா³னம் நாவபு³ஜ்ஜி², தஸ்மா தது³ப⁴யானி நிய்யானாவஹத்தாபா⁴வதோ அனிய்யானிகானீதி தேஸம் அனிய்யானிகபா⁴வத³ஸ்ஸனத்த²ம். நிய்யானிகபா⁴வத³ஸ்ஸனத்த²ந்தி அனுஸாஸனீபாடிஹாரியம் தக்கரஸ்ஸ ஏகந்ததோ நிய்யானாவஹந்தி தஸ்ஸேவ நிய்யானிகபா⁴வத³ஸ்ஸனத்த²ம்.

ஏவம் ஏதிஸ்ஸா தே³ஸனாய முக்²யபயோஜனம் த³ஸ்ஸேத்வா இதா³னி அனுஸங்கி³கபயோஜனம் த³ஸ்ஸேதும் ‘‘அபிசா’’திஆதி³ ஆரத்³த⁴ம். நிய்யானமேவ ஹி ஏதிஸ்ஸா தே³ஸனாய முக்²யபயோஜனம் தஸ்ஸ தத³த்த²பா⁴வதோ. பு³த்³தா⁴னம் பன மஹந்தபா⁴வோ அனுஸங்கி³கபயோஜனம் அத்தா²பத்தியாவ க³ந்தப்³ப³தோ. கீதி³ஸோ நாமேஸ பி⁴க்கூ²தி ஆஹ ‘‘யோ மஹாபூ⁴தே’’திஆதி³. பரியேஸந்தோதி அபரியேஸம் நிருஜ்ஜ²னவஸேன மஹாபூ⁴தே க³வேஸந்தோ, தேஸம் அனவஸேஸனிரோத⁴ம் வீமம்ஸந்தோதி வுத்தம் ஹோதி. விசரித்வாதி த⁴ம்மதாய சோதி³யமானோ பரிசரித்வா. த⁴ம்மதாஸித்³த⁴ம் கிரேதம், யதி³த³ம் தஸ்ஸ பி⁴க்கு²னோ ததா² விசரணம் யதா² அபி⁴ஜாதியம் மஹாபத²விகம்பாதி³. விஸ்ஸஜ்ஜோகாஸந்தி விஸ்ஸஜ்ஜட்டா²னம், ‘‘விஸ்ஸஜ்ஜகர’’ந்திபி பாடோ², விஸ்ஸஜ்ஜகந்தி அத்தோ². தஸ்மாதி பு³த்³த⁴மேவ புச்சி²த்வா நிக்கங்க²த்தா, தஸ்ஸேவ விஸ்ஸஜ்ஜிதும் ஸமத்த²தாயாதி வுத்தம் ஹோதி. மஹந்தபா⁴வப்பகாஸனத்த²ந்தி ஸதே³வகே லோகே அனஞ்ஞஸாதா⁴ரணஸ்ஸ பு³த்³தா⁴னம் மஹந்தபா⁴வஸ்ஸ மஹானுபா⁴வதாய தீ³பனத்த²ம். இத³ஞ்ச காரணந்தி ‘‘ஸப்³பே³ஸம்பி பு³த்³தா⁴னம் ஸாஸனே ஏதி³ஸோ ஏகோ பி⁴க்கு² ததா³னுபா⁴வப்பகாஸகோ ஹோதீ’’தி இமம்பி காரணம்.

கத்தா²தி நிமித்தே பு⁴ம்மம், கஸ்மிம் டா²னே காரணபூ⁴தேதி அத்த²ம் த³ஸ்ஸேதும் ‘‘கிம் ஆக³ம்மா’’தி வுத்தம், கிம் ஆரம்மணம் பச்சயபூ⁴தம் அதி⁴க³ந்த்வா அதி⁴க³மனஹேதூதி அத்தோ². தேனாஹ ‘‘கிம் பத்தஸ்ஸா’’தி. கிமாரம்மணம் பத்தஸ்ஸ புக்³க³லஸ்ஸ நிருஜ்ஜ²ந்தீதி ஸம்ப³ந்தோ⁴, ஹேதுக³ப்³ப⁴விஸேஸனமேதம். தேதி மஹாபூ⁴தா. அப்பவத்திவஸேனாதி புன அனுப்பஜ்ஜனவஸேன. ஸப்³பா³காரேனாதி வசனத்த²லக்க²ணரஸபச்சுபட்டா²னபத³ட்டா²ன-ஸமுட்டா²னகலாபசுண்ணனானத்தேகத்தவினிப்³போ⁴கா³- வினிப்³போ⁴க³ஸபா⁴க³-விஸபா⁴க³அஜ்ஜ²த்திகபா³ஹிரஸங்க³ஹபச்சயஸமன்னாஹாரபச்சயவிபா⁴கா³காரதோ, ஸஸம்பா⁴ரஸங்கே²பஸஸம்பா⁴ரவிப⁴த்திஸலக்க²ணஸங்கே²பஸலக்க²ணவிப⁴த்திஆகாரதோ சாதி ஸப்³பே³ன ஆகாரேன.

488. தி³ப்³ப³ந்தி ஏத்த² பஞ்சஹி காமகு³ணேஹி ஸமங்கீ³பூ⁴தா ஹுத்வா விசரந்தி, கீளந்தி, ஜோதேந்தி சாதி தே³வா, தே³வலோகா. தே யந்தி உபக³ச்ச²ந்தி ஏதேனாதி தே³வயானியோ யதா² ‘‘நிய்யானிகா’’தி (த⁴. ஸ. து³கமாதிகா 97) ஏத்த² அனீயஸத்³தோ³ கத்வத்தே², ததா² இத⁴ கரணத்தே²தி த³ட்ட²ப்³ப³ம். ததா² ஹி வுத்தம் ‘‘தேன ஹேஸா’’திஆதி³. வஸம் வத்தேந்தோதி ஏத்த² வஸவத்தனம் நாம யதி²ச்சி²தட்டா²னக³மனம். தந்தி இத்³தி⁴வித⁴ஞாணம். சத்தாரோ மஹாராஜானோ ஏதேஸம் இஸ்ஸராதி சாதுமஹாராஜிகா. கஸ்மா பனேஸ ஸமீபே டி²தம் ஸதே³வகலோகபஜ்ஜோதம் ப⁴க³வந்தம் அபுச்சி²த்வா தூ³ரே தே³வே உபஸங்கமீதி சோத³னமபனேதி ‘‘ஸமீபே டி²த’’ந்திஆதி³னா. ‘‘யே தே³வா மக்³க³ப²லலாபி⁴னோ, தேபி தமத்த²ம் ஏகதே³ஸேன ஜானேய்யும், பு³த்³த⁴விஸயோ பனாயம் பஞ்ஹோ புச்சி²தோ’’தி சிந்தேத்வா ‘‘ந ஜானாமா’’தி ஆஹம்ஸு. தேனாஹ ‘‘பு³த்³த⁴விஸயே’’திஆதி³. ந லப்³பா⁴தி ந ஸக்கா, அஜ்ஜோ²த்த²ரணம் நாமேத்த² புச்சா²ய நிப்³பா³த⁴னந்தி வுத்தம் ‘‘புனப்புனம் புச்ச²தீ’’தி. ‘‘ஹத்த²தோ மோசேஸ்ஸாமா’’தி வோஹாரவஸேன வுத்தம், ஹந்த³ நம் தூ³ரமபனேஸ்ஸாமாதி வுத்தம் ஹோதி. அபி⁴க்கந்ததராதி ஏத்த² அபி⁴ஸத்³தோ³ அதிஸத்³த³த்தோ²தி ஆஹ ‘‘அதிக்கந்ததரா’’தி, ரூபஸம்பத்தியா சேவ பஞ்ஞாபடிபா⁴னாதி³கு³ணேஹி ச அம்ஹே அபி⁴பு⁴ய்ய பரேஸம் காமனீயதராதி அத்தோ². பணீததராதி உளாரதரா. தேன வுத்தம் ‘‘உத்தமதரா’’தி.

491-493. ஸஹஸ்ஸக்கோ² பன ஸக்கோ அபி⁴ஸமேதாவீ ஆக³தப²லோ விஞ்ஞாதஸாஸனோ, ஸோ கஸ்மா தம் பி⁴க்கு²ம் உபாயேன நிய்யோஜேஸீதி அனுயோக³மபனேதி ‘‘அயம் பன விஸேஸோ’’திஆதி³னா.

க²ஜ்ஜோபனகந்தி ரத்திம் ஜலந்தம் கு²த்³த³ககிமிம். த⁴மந்தோ வியாதி முக²வாதம் தே³ந்தோ விய. அத்தி² சேவாதி ஏதி³ஸோ மஹாபூ⁴தபரியேஸகோ புக்³க³லோ நாம விஜ்ஜமானோ ஏவ ப⁴வேய்ய, மயா அபேஸிதோயேவ பச்சா² ஜானிஸ்ஸதீதி அதி⁴ப்பாயோ. ததோதி ததா² சிந்தனதோ பரம். இத்³தி⁴வித⁴ஞாணஸ்ஸேவ அதி⁴ப்பேதத்தா தே³வயானியஸதி³ஸோவ. ‘‘தே³வயானியமக்³கோ³தி வா…பே… அபி⁴ஞ்ஞாஞாணந்தி வா ஸப்³ப³மேதம் இத்³தி⁴வித⁴ஞாணஸ்ஸேவ நாம’’ந்தி இத³ம் பாளியம், அட்ட²கதா²ஸு ச தத்த² தத்த² ஆக³தருள்ஹினாமவஸேன வுத்தம். ஸப்³பா³ஸுபி ஹி அபி⁴ஞ்ஞாஸு தே³வயானியமக்³கா³தி³ஏகசித்தக்க²ணிகஅப்பனாதி³னாமம் யதா²ரஹம் ஸம்ப⁴வதி.

494. ஆக³மனபுப்³ப³பா⁴கே³ நிமித்தந்தி ப்³ரஹ்முனோ ஆக³மனஸ்ஸ புப்³ப³பா⁴கே³ உப்பஜ்ஜனகனிமித்தம். உத³யதோ புப்³ப³பா⁴கே³தி ஆனேத்வா ஸம்ப³ந்தோ⁴. இமேதி ப்³ரஹ்மகாயிகா. வேய்யாகரணேனாதி ப்³யாகரணேன. அனாரத்³த⁴சித்தோதி அனாராதி⁴தசித்தோ அதுட்ட²சித்தோ. வாத³ந்தி தோ³ஸம். விக்கே²பந்தி வாசாய விவிதா⁴ கே²பனம்.

495. குஹகத்தாதி வுத்தனயேன அபூ⁴ததோ அஞ்ஞேஸம் விம்ஹாபேதுகாமத்தா. ‘‘கு³ஹகத்தா’’தி படி²த்வா கு³ய்ஹிதுகாமத்தாதி அத்த²ம்பி வத³ந்தி கேசி.

தீரத³ஸ்ஸீஸகுணூபமாவண்ணனா

497. பதே³ஸேனாதி ஏகதே³ஸேன, உபாதி³ன்னகேன ஸத்தஸந்தானபரியாபன்னேனாதி அத்தோ². அனுபாதி³ன்னகேபீதி அனிந்த்³ரியப³த்³தே⁴பி. நிப்பதே³ஸதோதி அனவஸேஸதோ. தஸ்மாதி ததா² புச்சி²தத்தா, புச்சா²ய அயுத்தபா⁴வதோதி அதி⁴ப்பாயோ. புச்சா²மூள்ஹஸ்ஸாதி புச்சி²துமஜானனதோ புச்சா²ய ஸம்மூள்ஹஸ்ஸ. விதத²பஞ்ஹோ ஹி ‘‘புச்சா²மூள்ஹோ’’தி வுச்சதி யதா² ‘‘மக்³க³மூள்ஹோ’’தி. புச்சா²ய தோ³ஸம் த³ஸ்ஸேத்வாதி தேன கதபுச்சா²ய புச்சி²தாகாரே தோ³ஸம் விபா⁴வேத்வா. புச்சா²விஸ்ஸஜ்ஜனந்தி ததா² ஸிக்கா²பிதாய அவிதத²புச்சா²ய விஸ்ஸஜ்ஜனம். யஸ்மா விஸ்ஸஜ்ஜனம் நாம புச்சா²னுரூபம், புச்சா²ஸபா⁴கே³ன விஸ்ஸஜ்ஜேதப்³ப³தோ, ந ச ததா²க³தா விரஜ்ஜி²த்வா கதபுச்சா²னுரூபம் விரஜ்ஜி²த்வாவ விஸ்ஸஜ்ஜேந்தி, அத்த²ஸபா⁴க³தாய ச விஸ்ஸஜ்ஜனஸ்ஸ புச்ச²கா தத³த்த²ம் அனவபு³ஜ்ஜ²ந்தா ஸம்முய்ஹந்தி, தஸ்மா புச்ச²ம் ஸிக்கா²பேத்வா அவிதத²புச்சா²ய விஸ்ஸஜ்ஜனம் பு³த்³தா⁴னமாசிண்ணந்தி வேதி³தப்³ப³ம். தேனாஹ ‘‘கஸ்மா’’திஆதி³. து³விஞ்ஞாபயோதி யதா²வுத்தகாரணேன து³விஞ்ஞாபேதப்³போ³.

498. ந பதிட்டா²தீதி பச்சயம் கத்வா ந பதிட்ட²ஹதி. ‘‘கத்தா²’’தி இத³ம் நிமித்தே பு⁴ம்மந்தி ஆஹ ‘‘கிம் ஆக³ம்மா’’தி. அப்பதிட்டா²தி அப்பச்சயா, ஸப்³பே³ன ஸப்³ப³ம் ஸமுச்சி²ன்னகாரணாதி அத்தோ². உபாதி³ன்னம்யேவாதி இந்த்³ரியப³த்³த⁴மேவ. யஸ்மா ஏகதி³ஸாபி⁴முக²ம் ஸந்தானவஸேன ப³ஹுதா⁴ ஸண்டி²தே ரூபப்பப³ந்தே⁴ தீ³க⁴ஸஞ்ஞா, தமுபாதா³ய ததோ அப்பகம் ஸண்டி²தே ரஸ்ஸஸஞ்ஞா, தது³ப⁴யஞ்ச விஸேஸதோ ரூபக்³க³ஹணமுகே²ன க³ய்ஹதி, தஸ்மா ‘‘ஸண்டா²னவஸேனா’’திஆதி³ வுத்தம். அப்பபரிமாணே ரூபஸங்கா⁴தே அணுஸஞ்ஞா, தது³பாதா³ய ததோ மஹதி தூ²லஸஞ்ஞா, இத³ம்பி த்³வயம் விஸேஸதோ ரூபக்³க³ஹணமுகே²ன க³ய்ஹதீதி ஆஹ ‘‘இமினாபீ’’திஆதி³. ‘‘பி-ஸத்³தே³ன சேத்த² ‘ஸண்டா²னவஸேன உபாதா³ரூபம் வுத்த’’ந்தி ஏத்தா²பி வண்ணமத்தமேவ கதி²தந்தி இமமத்த²ம் ஸமுச்சினாதீ’’தி வத³ந்தி. வண்ணஸத்³தோ³ ஹேத்த² ரூபாயதனபரியாயோவ. ஸுப⁴ந்தி ஸுந்த³ரம், இட்ட²ந்தி அத்தோ². அஸுப⁴ந்தி அஸுந்த³ரம், அனிட்ட²ந்தி அத்தோ². தேனாஹ ‘‘இட்டா²னிட்டா²ரம்மணம் பனேவம் கதி²த’’ந்தி. தீ³க⁴ம் ரஸ்ஸம் அணும் தூ²லம் ஸுபா⁴ஸுப⁴ந்தி தீஸுபி டா²னேஸு ரூபாயதனமுகே²ன உபாதா³ரூபஸ்ஸேவ க³ஹணம் பூ⁴தரூபானம் விஸும் க³ஹிதத்தாதி த³ட்ட²ப்³ப³ம். ‘‘கத்த² ஆபோ ச பத²வீ, தேஜோ வாயோ ந கா³த⁴தீ’’தி ஹி பூ⁴தரூபானி விஸும் க³ய்ஹந்தி. நாமந்தி வேத³னாதி³க்க²ந்த⁴சதுக்கம். தஞ்ஹி ஆரம்மணாபி⁴முக²ம் நமனதோ, நாமகரணதோ ச ‘‘நாம’’ந்தி வுச்சதி. ஹேட்டா² ‘‘தீ³க⁴ம் ரஸ்ஸ’’ந்திஆதி³னா வுத்தமேவ இத⁴ ருப்பனட்டே²ன ரூபஸஞ்ஞாய க³ஹிதந்தி த³ஸ்ஸேதி ‘‘தீ³கா⁴தி³பே⁴த³’’ந்தி இமினா. ஆதி³ஸத்³தே³ன ஆபாதீ³னஞ்ச ஸங்க³ஹோ. யஸ்மா வா தீ³கா⁴தி³ஸமஞ்ஞா ந ரூபாயதனவத்து²காவ, அத² கோ² பூ⁴தரூபவத்து²காபி. ததா² ஹி ஸண்டா²னம் பு²ஸனமுகே²னபி க³ய்ஹதி, தஸ்மா தீ³க⁴ரஸ்ஸாதி³க்³க³ஹணேன பூ⁴தரூபம்பி க³ய்ஹதேவாதி இமமத்த²ம் விஞ்ஞாபேதும் ‘‘தீ³கா⁴தி³பே⁴த³ம் ரூப’’ மிச்சேவ வுத்தம். கிம் ஆக³ம்மாதி கிம் அதி⁴க³ந்த்வா கிஸ்ஸ அதி⁴க³மனஹேது. ‘‘உபருஜ்ஜ²தீ’’தி இத³ம் அனுப்பாத³னிரோத⁴ம் ஸந்தா⁴ய வுத்தம், ந க²ணனிரோத⁴ந்தி ஆஹ ‘‘அஸேஸமேதம் நப்பவத்ததீ’’தி.

499. தத்ர வேய்யாகரணம் ப⁴வதீதி அனுஸந்தி⁴வசனமத்தம் சுண்ணியபாட²ம் வத்வா வேய்யாகரணவசனபூ⁴தம் விஞ்ஞாணந்திஆதி³ம் ஸிலோகமாஹாதி அதி⁴ப்பாயோ. விஞ்ஞாதப்³ப³ந்தி விஸிட்டே²ன ஞாணேன ஞாதப்³ப³ம், ஸப்³ப³ஞாணுத்தமேன அரியமக்³க³ஞாணேன பச்சக்க²தோ ஜானிதப்³ப³ந்தி அத்தோ². தேனாஹ ‘‘நிப்³பா³னஸ்ஸேதம் நாம’’ந்தி. நித³ஸ்ஸீயதேதி நித³ஸ்ஸனம், சக்கு²விஞ்ஞேய்யம், ந நித³ஸ்ஸனம் அனித³ஸ்ஸனம், அசக்கு²விஞ்ஞேய்யந்தி அத்த²ம் வத³ந்தி. நித³ஸ்ஸனம் வா உபமா, ததே³தஸ்ஸ நத்தீ²தி அனித³ஸ்ஸனம். ந ஹி நிப்³பா³னஸ்ஸ நிச்சஸ்ஸ ஏகபூ⁴தஸ்ஸ அச்சந்தபணீதஸபா⁴வஸ்ஸ ஸதி³ஸம் நித³ஸ்ஸனம் குதோசி லப்³ப⁴தீதி. யம் அஹுத்வா ஸம்போ⁴தி, ஹுத்வா படிவேதி, தம் ஸங்க²தம் உத³யவயந்தேஹி ஸஅந்தம், அஸங்க²தஸ்ஸ பன நிப்³பா³னஸ்ஸ நிச்சஸ்ஸ தே உபோ⁴பி அந்தா ந ஸந்தி, ததோ ஏவ நவபா⁴வாபக³மஸங்கா²தா ஜரதாபி தஸ்ஸ நத்தீ²தி வுத்தம் ‘‘உப்பாத³ந்தோ வா’’திஆதி³. தத்த² உப்பாத³ந்தோதி உப்பாதா³வத்தா². வயந்தோதி ப⁴ங்கா³வத்தா². டி²தஸ்ஸ அஞ்ஞத²த்தந்தோதி ஜரதா வுத்தா. அவஸேஸக்³க³ஹணேன டி²தாவத்தா² அனுஞ்ஞாதா ஹோதி. தித்த²ஸ்ஸாதி பானதித்த²ஸ்ஸ. தத்த² நிப்³ப³சனம் த³ஸ்ஸேதி ‘‘தஞ்ஹீ’’திஆதி³னா. பபந்தீதி பகாரேன பிவந்தி. ததா² ஹி ஆசரியேன வுத்தம் ‘‘பபந்தி ஏத்தா²தி பபந்தி வுத்தம். ஏத்த² ஹி பபந்தி பானதித்த²’’ந்தி (தீ³. நி. டீ. 1.499) நிருத்தினயேன, யதா²ருதலக்க²ணேன வா ப-காரஸ்ஸ ப⁴-காரோ கதோ.ஸப்³ப³தோதி ஸப்³ப³கம்மட்டா²னமுக²தோ. தேனாஹ ‘‘அட்ட²திம்ஸாய கம்மட்டா²னேஸு யேன யேன முகே²னா’’தி. அயம் அட்ட²கதா²தோ அபரோ நயோ – பகாரேன பா⁴ஸனம் ஜோதனம் பபா⁴, ஸப்³ப³தோ பபா⁴ அஸ்ஸாதி ஸப்³ப³தோபப⁴ம், கேனசி அனுபக்கிலிட்ட²தாய ஸமந்ததோ பப⁴ஸ்ஸரம் விஸுத்³த⁴ந்தி அத்தோ². ஏத்த² நிப்³பா³னேதி நிமித்தே பு⁴ம்மம் த³ஸ்ஸேதி ‘‘இத³ம் நிப்³பா³னம் ஆக³ம்மா’’தி இமினா. யேன நிப்³பா³னமதி⁴க³தம், தம் ஸந்ததிபரியாபன்னானம்யேவ இத⁴ அனுப்பாத³னிரோதோ⁴ அதி⁴ப்பேதோதி வுத்தம் ‘‘உபாதி³ன்னகத⁴ம்மஜாதம் நிருஜ்ஜ²தி, அப்பவத்தம் ஹோதீ’’தி.

தத்தா²தி யதே³தம் ‘‘விஞ்ஞாணஸ்ஸ நிரோதே⁴னா’’தி பத³ம் வுத்தம், தஸ்மிம். விஞ்ஞாணம் உத்³த⁴ரதி தஸ்ஸ விப⁴ஜ்ஜிதப்³ப³த்தா. சரிமகவிஞ்ஞாணந்தி அரஹதோ சுதிசித்தஸங்கா²தம் பரினிப்³பா³னசித்தம். அபி⁴ஸங்கா²ரவிஞ்ஞாணந்தி புஞ்ஞாதி³அபி⁴ஸங்கா²ரசித்தம். ஏத்தே²தம் உபருஜ்ஜ²தீதி ஏதஸ்மிம் நிப்³பா³னே ஏதம் நாமரூபம் அனுபாதி³ஸேஸாய நிப்³பா³னதா⁴துயா நிருஜ்ஜ²தி. தேனாஹ ‘‘விஜ்ஜா²த…பே… பா⁴வம் யாதீ’’தி. விஜ்ஜா²ததீ³பஸிகா² வியாதி நிப்³பு³ததீ³பஸிகா² விய. ‘‘அபி⁴ஸங்கா²ரவிஞ்ஞாணஸ்ஸாபீ’’திஆதி³னா ஸஉபாதி³ஸேஸனிப்³பா³னதா⁴துமுகே²ன அனுபாதி³ஸேஸனிப்³பா³னதா⁴துமேவ வத³தி நாமரூபஸ்ஸ அனவஸேஸதோ உபருஜ்ஜ²னஸ்ஸ அதி⁴ப்பேதத்தா. தேன வுத்தம் ‘‘அனுப்பாத³வஸேன உபருஜ்ஜ²தீ’’தி. ஸோதாபத்திமக்³க³ஞாணேனாதி கத்தரி, கரணே வா கரணவசனம், நிரோதே⁴னாதி பன ஹேதும்ஹி. ஏத்தா²தி நிப்³பா³னே. ஸேஸம் ஸப்³ப³த்த² உத்தானத்த²மேவ.

இதி ஸுமங்க³லவிலாஸினியா தீ³க⁴னிகாயட்ட²கதா²ய பரமஸுகு²மக³ம்பீ⁴ரது³ரனுபோ³த⁴த்த²பரிதீ³பனாய ஸுவிமலவிபுலபஞ்ஞாவேய்யத்தியஜனனாய ஸாது⁴விலாஸினியா நாம லீனத்த²பகாஸனியா கேவட்டஸுத்தவண்ணனாய லீனத்த²பகாஸனா.

கேவட்டஸுத்தவண்ணனா நிட்டி²தா.