12. லோஹிச்சஸுத்தவண்ணனா

லோஹிச்சப்³ராஹ்மணவத்து²வண்ணனா

501. ஏவம் கேவட்டஸுத்தம் ஸம்வண்ணேத்வா இதா³னி லோஹிச்சஸுத்தம் ஸம்வண்ணேந்தோ யதா²னுபுப்³ப³ம் ஸம்வண்ணனோகாஸஸ்ஸ பத்தபா⁴வம் விபா⁴வேதும், கேவட்டஸுத்தஸ்ஸானந்தரம் ஸங்கீ³தஸ்ஸ ஸுத்தஸ்ஸ லோஹிச்சஸுத்தபா⁴வம் வா பகாஸேதும் ‘‘ஏவம் மே ஸுதம்…பே… கோஸலேஸூதி லோஹிச்சஸுத்த’’ந்தி ஆஹ. ஸாலவதிகாதி காரணமந்தரேன இத்தி²லிங்க³வஸேன தஸ்ஸ கா³மஸ்ஸ நாமம். கா³மணிகாபா⁴வேனாதி கேசி. வதியாதி கண்டகஸாகா²தி³வதியா. லோஹிதோ நாம தஸ்ஸ குலே புப்³ப³புரிஸோ, தப்³ப³ம்ஸவஸேன லோஹிதஸ்ஸ அபச்சம் லோஹிச்சோதி ப்³ராஹ்மணஸ்ஸ கோ³த்ததோ ஆக³தனாமம்.

502. ‘‘கிஞ்ஹி பரோ பரஸ்ஸ கரிஸ்ஸதீ’’தி பரானுகம்பா விரஹிதத்தா லாமகம். ந து உச்சே²த³ஸஸ்ஸதானம் அஞ்ஞதரஸ்ஸாதி ஆஹ ‘‘ந பனா’’திஆதி³. தி³ட்டி²க³தந்தி ஹி லத்³தி⁴மத்தம் அதி⁴ப்பேதம், அஞ்ஞதா² உச்சே²த³ஸஸ்ஸதக்³கா³ஹவினிமுத்தோ கோசி தி³ட்டி²க்³கா³ஹோ நாம நத்தீ²தி தேஸமஞ்ஞதரம் ஸியா. ‘‘உப்பன்னம் ஹோதீ’’தி இத³ம் மனஸி, வசஸி ச உப்பன்னதாஸாதா⁴ரணவசனந்தி த³ஸ்ஸேதி ‘‘ந கேவலஞ்சா’’திஆதி³னா. ஸோ கிர…பே… பா⁴ஸதியேவாதி ச தஸ்ஸா லத்³தி⁴யா லோகே பாகடபா⁴வம் வத³தி. யஸ்மா பன அத்ததோ அஞ்ஞோ பரோ ஹோதி, தஸ்மா யதா² அனுஸாஸகதோ அனுஸாஸிதப்³போ³ பரோ, ஏவம் அனுஸாஸிதப்³ப³தோபி அனுஸாஸகோதி த³ஸ்ஸேதும் ‘‘பரோ’’திஆதி³ வுத்தம். கிம்-ஸத்³தா³பேக்கா²ய சேத்த² ‘‘கரிஸ்ஸதீ’’தி அனாக³தகாலவசனம், அனாக³தேபி வா தேன தஸ்ஸ காதப்³ப³ம் நத்தீ²தி த³ஸ்ஸனத்த²ம். குஸலம் த⁴ம்மந்தி அனவஜ்ஜத⁴ம்மம் நிக்கிலேஸத⁴ம்மம், விமோக்க²த⁴ம்மந்தி அத்தோ². ‘‘பரேஸம் த⁴ம்மம் கதே²ஸ்ஸாமீ’’தி தேஹி அத்தானம் பரிவாராபேத்வா விசரணம் கிமத்தி²யம், ஆஸயவுத்³த⁴ஸ்ஸபி அனுரோதே⁴ன வினா தம் ந ஹோதி, தஸ்மா அத்தனா…பே… விஹாதப்³ப³ந்தி வத³தி. தேனாஹ ‘‘ஏவம்ஸம்பத³மித³ம் பாபகம் லோப⁴த⁴ம்மம் வதா³மீ’’தி.

504. ‘‘இத்தி²லிங்க³வஸேனா’’தி இமினா புல்லிங்கி³கஸ்ஸபி அத்த²ஸ்ஸ இத்தி²லிங்க³ஸமஞ்ஞாதி த³ஸ்ஸேதி. ஸோதி லோஹிச்சப்³ராஹ்மணோ. பா⁴ரோதி ப⁴க³வதோ பரிஸபா³ஹுல்லத்தா, அத்தனோ ச ப³ஹுகிச்சகரணீயத்தா க³ரு து³க்கரம்.

508. கதா²பா²ஸுகத்த²ந்தி கதா²ஸுக²த்த²ம், ஸுகே²ன கத²ம் கதே²துஞ்சேவ ஸோதுஞ்சாதி அத்தோ². அயம் உபாஸகோதி ரோஸிகன்ஹாபிதம் ஆஹ. அப்பேவ நாம ஸியாதி ஏத்த² பீதிவஸேன ஆமேடி³தம் த³ட்ட²ப்³ப³ம். ததா² ஹி தம் ‘‘பு³த்³த⁴க³ஜ்ஜித’’ந்தி வுச்சதி. ப⁴க³வா ஹி ஈதி³ஸேஸு டா²னேஸு விஸேஸதோ பீதிஸோமனஸ்ஸஜாதோ ஹோதி, தஸ்மா பீதிவஸேன பட²மம் க³ஜ்ஜதி, து³தியம்பி அனுக³ஜ்ஜதி. கிம் விஸேஸம் க³ஜ்ஜனமனுக³ஜ்ஜனந்தி வுத்தம் ‘‘அய’’ந்திஆதி³. ஆதோ³ பா⁴ஸனம் அல்லாபோ, ஸஞ்ஞோகே³ பரே ரஸ்ஸோ. தது³த்தரி ஸஹ பா⁴ஸனம் ஸல்லாபோ.

லோஹிச்சப்³ராஹ்மணானுயோக³வண்ணனா

509. ஸமுத³யஸஞ்ஜாதீதி ஆயுப்பாதோ³தி ஆஹ ‘‘போ⁴கு³ப்பாதோ³’’தி. ததோதி ஸாலவதிகாய. லாப⁴ந்தராயகரோதி த⁴னத⁴ஞ்ஞலாப⁴ஸ்ஸ அந்தராயகரோ. அனுபுப்³போ³ கபி-ஸத்³தோ³ ஆகங்க²னத்தோ²தி த³ஸ்ஸேதி ‘‘இச்ச²தீ’’தி இமினா. அயம் அட்ட²கதா²தோ அபரோ நயோ – ஸாதிஸயேன ஹிதேன அனுகம்பகோ அனுக்³க³ண்ஹனகோ ஹிதானுகம்பீதி. ஸம்பஜ்ஜதீதி ஆஸேவனலாபே⁴ன நிப்பஜ்ஜதி, ப³லவதீ ஹோதி அவக்³க³ஹாதி அத்தோ². தேன வுத்தம் ‘‘நியதா ஹோதீ’’தி.

510-511. து³தியம் உபபத்திந்தி ‘‘நனு ராஜா பஸேனதி³கோஸலோ’’திஆதி³னா வுத்தம் து³தியம் உபபத்திம் டா²னம் யுத்திம். காரணஞ்ஹி ப⁴க³வா உபமாமுகே²ன த³ஸ்ஸேதி, இமாய ச உபபத்தியா தும்ஹே சேவ அஞ்ஞே சாதி லோஹிச்சம்பி அந்தோகத்வா ஸம்வேஜனம் கதம் ஹோதி. யே ச இமே குலபுத்தா தி³ப்³பா³ க³ப்³பா⁴ பரிபாசேந்தீதி யோஜனா. உபனிஸ்ஸயஸம்பத்தியா, ஞாணபரிபாகஸ்ஸ வா அபா⁴வேன அஸக்கோந்தா. கம்மபதே³ன அதுல்யாதி⁴கரணத்தா பரிபாசேந்தி கிரியாய விப⁴த்திவிபல்லாஸேன உபயோக³த்தே² பச்சத்தவசனம். யே பன ‘‘பரிபச்சந்தீ’’தி கம்மரூபேன பட²ந்தி, தேஸம் மதே விப⁴த்திவிபல்லாஸேன பயோஜனம் நத்தி² கம்மகத்துபா⁴வதோ, அத்தோ² பனஸ்ஸ து³தியவிகப்பே வுத்தனயேன தா³னாதி³புஞ்ஞவிஸேஸோ வேதி³தப்³போ³. அஹிதானுகம்பாதி³தா ச தஸ்ஸ தம்ஸமங்கீ³ஸத்தவஸேன ஹோதி. தி³வி ப⁴வாதி தி³ப்³பா³. க³ப்³பே⁴ந்தி பரிபச்சனவஸேன அத்தனி பப³ந்தே⁴ந்தீதி க³ப்³பா⁴, தே³வலோகா. ‘‘ச²ன்னம் தே³வலோகான’’ந்தி நித³ஸ்ஸனவசனமேதம். ப்³ரஹ்மலோகஸ்ஸாபி ஹி தி³ப்³ப³க³ப்³ப⁴பா⁴வோ லப்³ப⁴தேவ தி³ப்³ப³விஹாரஹேதுகத்தா. ஏவஞ்ச கத்வா ‘‘பா⁴வனம் பா⁴வயமானா’’தி இத³ம்பி வசனம் ஸமத்தி²தம் ஹோதி. ‘‘தே³வலோககா³மினிம் படிபத³ம் பூரயமானா’’தி வத்வா தம் படிபத³ம் ஸரூபதோ த³ஸ்ஸேதும் ‘‘தா³னம் த³த³மானா’’திஆதி³ வுத்தம். ப⁴வந்தி ஏத்த² யதா²ருசி ஸுக²ஸமப்பிதாதி ப⁴வா, விமானானி. தே³வபா⁴வாவஹத்தா தி³ப்³பா³. வுத்தனயேனேவ க³ப்³பா⁴.தா³னாத³யோ தே³வலோகஸம்வத்தனிக புஞ்ஞவிஸேஸா. தி³ப்³பா³ ப⁴வாதி இத⁴ தே³வலோகபரியாபன்னா உபபத்திப⁴வா அதி⁴ப்பேதா. ததா³வஹோ ஹி கம்மப⁴வோ புப்³பே³ க³ஹிதோதி ஆஹ ‘‘தே³வலோகே விபாகக்க²ந்தா⁴’’தி.

தயோசோத³னாரஹவண்ணனா

513. அனியாமிதேனேவாதி அனியமிதேனேவ, ‘‘த்வம் ஏவம் தி³ட்டி²கோ, ஏவம் ஸத்தானம் அனத்த²ஸ்ஸ காரகோ’’தி ஏவம் அனுத்³தே³ஸிகேனேவ. ஸப்³ப³லோகபத்த²டாய லத்³தி⁴யா ஸமுப்பஜ்ஜனதோ யாவ ப⁴வக்³கா³ உக்³க³தம். மானந்தி ‘‘அஹமேதம் ஜானாமி, அஹமேதம் பஸ்ஸாமீ’’தி ஏவம் பவத்தம் பண்டி³தமானம். பி⁴ந்தி³த்வாதி வித⁴மேத்வா, ஜஹாபேத்வாதி அத்தோ². தயோ ஸத்தா²ரேதி அஸம்பாதி³தஅத்தஹிதோ அனோவாத³கரஸாவகோ ச அஸம்பாதி³தஅத்தஹிதோ ஓவாத³கரஸாவகோ ச ஸம்பாதி³தஅத்தஹிதோ அனோவாத³கரஸாவகோ சேதி இமே தயோ ஸத்தா²ரே. சதுத்தோ² பன ஸம்மாஸம்பு³த்³தோ⁴ ந சோத³னாரஹோ, தஸ்மா ‘‘தம் தேன புச்சி²தோ ஏவ கதே²ஸ்ஸாமீ’’தி சோத³னாரஹேவ தயோ ஸத்தா²ரே பட²மம் த³ஸ்ஸேதி, பச்சா² சதுத்த²ம் ஸத்தா²ரம். காமஞ்சேத்த² சதுத்தோ² ஸத்தா² ஏகோ அது³தியோ அனஞ்ஞஸாதா⁴ரணோ, ததா²பி ஸோ யேஸம் உத்தரிமனுஸ்ஸத⁴ம்மானம் வஸேன ‘‘த⁴ம்மமயோ காயோ’’தி வுச்சதி, தேஸம் ஸமுதா³யபூ⁴தோபி தே கு³ணாவயவே ஸத்து²ட்டா²னியே கத்வா த³ஸ்ஸேந்தோ ப⁴க³வா ‘‘அயம்பி கோ² லோஹிச்ச ஸத்தா²’’தி அபா⁴ஸி.

அஞ்ஞாதி ய-காரலோபனித்³தே³ஸோ ‘‘ஸயம் அபி⁴ஞ்ஞா’’திஆதீ³ஸு (தீ³. நி. 1.28, 37; ம. நி. 1.154, 444) விய, தத³த்தே² சேதம் ஸம்பதா³னவசனந்தி த³ஸ்ஸேதி ‘‘அஞ்ஞாயா’’திஆதி³னா. ஸாவகத்தம் படிஜானித்வா டி²தத்தா ஏகதே³ஸேனஸ்ஸ ஸாஸனம் கரோந்தீதி ஆஹ ‘‘நிரந்தரம் தஸ்ஸ ஸாஸனம் அகத்வா’’தி. உக்கமித்வா உக்கமித்வாதி கதா³சி ததா² கரணம், கதா³சி ததா² அகரணஞ்ச ஸந்தா⁴ய விச்சா²வசனம், யதி³ச்சி²தம் கரோந்தீதி அதி⁴ப்பாயோ. படிக்கமந்தியாதி அனபி⁴ரதியா அகா³ரவேன அபக³ச்ச²ந்தியா. தேன வுத்தம் ‘‘அனிச்ச²ந்தியா’’திஆதி³. ஏகாயாதி அது³தியாய இத்தி²யா, ஸம்பயோக³ந்தி மேது²னத⁴ம்மஸமாயோக³ம். ஏகோ இச்சே²ய்யாதி அது³தியோ புரிஸோ ஸம்பயோக³ம் இச்சே²ய்யாதி ஆனேத்வா ஸம்ப³ந்தோ⁴. ஓஸக்கனாதி³முகே²ன இத்தி²புரிஸஸம்ப³ந்த⁴னித³ஸ்ஸனம் கே³ஹஸ்ஸிதாகே³ஹஸ்ஸிதஅபேக்க²வஸேன தஸ்ஸ ஸத்து²னோ ஸாவகேஸு படிபத்தித³ஸ்ஸனத்த²ம். அதிவிரத்தபா⁴வதோ த³ட்டு²ம்பி அனிச்ச²மானம் பரம்முகி²ம் டி²தம் இத்தி²ம். லோபே⁴னாதி பரிவாரம் நிஸ்ஸாய உப்பஜ்ஜனகலாப⁴ஸக்காரலோபே⁴ன. ஈதி³ஸோதி ஏவம்ஸபா⁴வோ ஸத்தா². யேனாதி லோப⁴த⁴ம்மேன. தத்த² ஸம்பாதே³ஹீதி தஸ்மிம் படிபத்தித⁴ம்மே பதிட்டி²தம் கத்வா ஸம்பாதே³ஹி. காயவங்காதி³விக³மேன உஜும் கரோஹி.

514. ஸஸ்ஸரூபகானி திணானீதி ஸஸ்ஸஸதி³ஸானி நீவாராதி³திணானி.

515. ஏவம் சோத³னம் அரஹதீதி வுத்தனயேன ஸாவகேஸு அப்போஸ்ஸுக்கபா⁴வாபாத³னே நியோஜனவஸேன சோத³னம் அரஹதி, ந பட²மோ விய ‘‘ஏவரூபோ தவ லோப⁴த⁴ம்மோ’’திஆதி³னா, ந ச து³தியோ விய ‘‘அத்தானமேவ தாவ தத்த² ஸம்பாதே³ஹீ’’திஆதி³னா. கஸ்மா? ஸம்பாதி³தஅத்தஹிததாய ததியஸ்ஸ.

நசோத³னாரஹஸத்து²வண்ணனா

516. ந சோத³னாரஹோதி ஏத்த² யஸ்மா சோத³னாரஹதா நாம ஸத்து²விப்படிபத்தியா வா ஸாவகவிப்படிபத்தியா வா உப⁴யவிப்படிபத்தியா வா ஹோதி, தயித³ம் ஸப்³ப³ம்பி இமஸ்மிம் ஸத்த²ரி நத்தி², தஸ்மா ந சோத³னாரஹோதி இமமத்த²ம் த³ஸ்ஸேதும் ‘‘அயஞ்ஹீ’’திஆதி³ வுத்தம். அஸ்ஸவாதி படிஸ்ஸவா.

517. மயா க³ஹிதாய தி³ட்டி²யாதி ஸப்³ப³ஸோ அனவஜ்ஜே அனுபவஜ்ஜே ஸம்மாபடிபன்னே, பரேஸஞ்ச ஸம்மதே³வ ஸம்மாபடிபத்திம் த³ஸ்ஸேந்தே ஸத்த²ரி அபூ⁴ததோ³ஸாரோபனவஸேன மிச்சா²க³ஹிதாய நிரயகா³மினியா பாபதி³ட்டி²யா. நரகபபாதந்தி நரகஸங்கா²தம் மஹாபபாதம். பபதந்தி ஏத்தா²தி ஹி பபாதோ. த⁴ம்மதே³ஸனாஹத்தே²னாதி த⁴ம்மதே³ஸனாஸங்கா²தேன ஹத்தே²ன. ஸக்³க³மக்³க³த²லேதி ஸக்³க³கா³மிமக்³க³பூ⁴தே புஞ்ஞத⁴ம்மத²லே, சாதுமஹாராஜிகாதி³ஸக்³க³ஸோதாபத்திஆதி³மக்³க³ஸங்கா²தே வா த²லே. ஸேஸம் ஸுவிஞ்ஞேய்யமேவ.

இதி ஸுமங்க³லவிலாஸினியா தீ³க⁴னிகாயட்ட²கதா²ய பரமஸுகு²மக³ம்பீ⁴ரது³ரனுபோ³த⁴த்த²பரிதீ³பனாய ஸுவிமலவிபுலபஞ்ஞாவேய்யத்தியஜனனாய ஸாது⁴விலாஸினியா நாம லீனத்த²பகாஸனியா லோஹிச்சஸுத்தவண்ணனாய லீனத்த²பகாஸனா.

லோஹிச்சஸுத்தவண்ணனா நிட்டி²தா.