10. ஸுப⁴ஸுத்தவண்ணனா

ஸுப⁴மாணவகவத்து²வண்ணனா

444. ஏவம் போட்ட²பாத³ஸுத்தம் ஸம்வண்ணேத்வா இதா³னி ஸுப⁴ஸுத்தம் ஸம்வண்ணேந்தோ யதா²னுபுப்³ப³ம் ஸம்வண்ணனோகாஸஸ்ஸ பத்தபா⁴வம் விபா⁴வேதும், போட்ட²பாத³ஸுத்தஸ்ஸானந்தரம் ஸங்கீ³தஸ்ஸ ஸுத்தஸ்ஸ ஸுப⁴ஸுத்தபா⁴வம் வா பகாஸேதும் ‘‘ஏவம் மே ஸுதம்…பே… ஸாவத்தி²யந்தி ஸுப⁴ஸுத்த’’ந்தி ஆஹ. அனுனாஸிகலோபேன ‘‘அசிர பரினிப்³பு³தே’’தி வுத்தந்தி த³ஸ்ஸேதி ‘‘அசிரம் பரினிப்³பு³தே’’தி இமினா யதா² போட்ட²பாத³ஸுத்தே ‘‘அப்பாடிஹீரக தம் பா⁴ஸிதம் ஸம்பஜ்ஜதீ’’தி, அசிரம் பரினிப்³பு³தஸ்ஸ அஸ்ஸாதி வா அசிரபரினிப்³பு³தோ யதா² ‘‘அசிரபக்கந்தோ, மாஸஜாதோ’’தி. அத்த²மத்தம் பன த³ஸ்ஸேதும் ஏவம் வுத்தம். அசிரபரினிப்³பு³தேதி ச ஸத்து² பரினிப்³பு³தபா⁴வஸ்ஸ சிரகாலதாபடிக்கே²பேன ஆஸன்னதாமத்தம் த³ஸ்ஸிதம், காலபரிச்சே²தோ³ பன ந த³ஸ்ஸிதோதி தம் த³ஸ்ஸேந்தோ ‘‘பரினிப்³பா³னதோ’’திஆதி³மாஹ. விஸாக²புண்ணமிதோ உத்³த⁴ம் யாவ ஜேட்ட²புண்ணமீ, தாவ காலம் ஸந்தா⁴ய ‘‘மாஸமத்தே’’தி வுத்தம். மத்தஸத்³தே³ன பன தஸ்ஸ காலஸ்ஸ கிஞ்சி அஸம்புண்ணதம் ஜோதேதி. துதி³ஸஞ்ஞிதோ கா³மோ நிவாஸோ ஏதஸ்ஸாதி தோதே³ய்யோ. தம் பனேஸ யஸ்மா ஸோணத³ண்டோ³ (தீ³. நி. 1.300) விய சம்பம், கூடத³ந்தோ (தீ³. நி. 1.323) விய ச கா²ணுமதம் அஜ்ஜா²வஸதி, தஸ்மா வுத்தம் ‘‘தஸ்ஸ அதி⁴பதித்தா’’தி, இஸ்ஸரபா⁴வதோதி அத்தோ². அயம்பி ஹி ரஞ்ஞோ பஸேனதி³கோஸலஸ்ஸ புரோஹிதப்³ராஹ்மணோ. புத்தம்பி ஆஹாதி ஸுப⁴ம் மாணவம்பி ஓவத³ந்தோ ஆஹ.

அஞ்ஜனானந்தி அக்கி²அஞ்ஜனத்தா²ய க⁴ம்ஸிதஅஞ்ஜனானம். வம்மிகானந்தி கிமிஸமாஹடவம்மிகானம் ஸஞ்சயம் தி³ஸ்வாதி ஸம்ப³ந்தோ⁴. மதூ⁴னந்தி மக்கி²கமதூ⁴னம். ஸமாஹாரந்தி மகரந்த³ஸன்னிசயம். பண்டி³தோ க⁴ரமாவஸேதி யஸ்மா அப்பதரப்பதரேபி க³ய்ஹமானே போ⁴கா³ கீ²யந்தி, அப்பதரப்பதரேபி ச ஸஞ்சியமானே வட்³ட⁴ந்தி, தஸ்மா யதா²வுத்தமுபமத்தயம் பஞ்ஞாய தி³ஸ்வா விஞ்ஞுஜாதிகோ கிஞ்சிபி வயமகத்வா ஆயமேவ உப்பாதே³ந்தோ க⁴ரேவஸே க⁴ராவாஸமனுதிட்டே²ய்யாதி லோபா⁴தே³ஸிதபடிபத்திம் உபதி³ஸதி.

அதா³னமேவ ஸிக்கா²பேத்வா ஸிக்கா²பனஹேது லோபா⁴பி⁴பூ⁴ததாய தஸ்மிம்யேவ க⁴ரே ஸுனகோ² ஹுத்வா நிப்³ப³த்தி. லோப⁴வஸிகஸ்ஸ ஹி து³க்³க³தி பாடிகங்கா², ‘‘ஜனவஸபோ⁴ நாம யக்கோ² ஹுத்வா நிப்³ப³த்தீ’’தி (தீ³. நி. அட்ட². 1.150) ஏத்த² வுத்தனயேன அத்தோ² வேதி³தப்³போ³. புப்³ப³பரிசயேன அதிவிய பியாயதி. வுத்தஞ்ஹி ‘‘புப்³பே³வ ஸன்னிவாஸேனா’’திஆதி³ (ஜா. 1.2.174). நிக்க²ந்தேதி கேனசிதே³வ கரணீயேன ப³ஹி நிக்³க³தே. ஸுப⁴ம் மாணவம் அனுக்³க³ண்ஹிதுகாமோ ஏககோவ ப⁴க³வா பிண்டா³ய பாவிஸி. பு⁴க்காரந்தி ‘‘பு⁴ பூ⁴’’தி ஸுனக²ஸத்³த³கரணம். ‘‘போ⁴ போ⁴’’தி ப்³ராஹ்மணஸமுதா³சாரேன பரிப⁴வித்வா பரிப⁴வனஹேது. ‘‘போ⁴வாதி³ நாம ஸோ ஹோதி, ஸசே ஹோதி ஸகிஞ்சனோ’’தி (த⁴. ப. 396; ஸு. நி. 625) ஹி வுத்தம். நனு ச ஹேட்டா² ‘‘அதா³னமேவ ஸிக்கா²பேத்வா ஸுனகோ² ஹுத்வா நிப்³ப³த்தோ’’தி ஆஹ, கஸ்மா பனேத்த² ‘‘புப்³பே³பி மம் ‘போ⁴ போ⁴’தி பரிப⁴வித்வா ஸுனகோ² ஜாதோ’’தி வத³தீதி? ததா² நிப்³ப³த்தியா தது³ப⁴யஸாதா⁴ரணப²லத்தா. ஆனிஸம்ஸப²லஞ்ஹி ஸாதா⁴ரணகம்மேனபி ஜாதம், ந விபாகப²லம் விய ஏககம்மேனேவாதி த³ட்ட²ப்³ப³ம். அவீசிம் க³மிஸ்ஸஸி கதோகாஸஸ்ஸ கம்மஸ்ஸ படிபா³ஹிதுமஸக்குணேய்யபா⁴வதோ. ‘‘ஜானாதி மம் ஸமணோ கோ³தமோ’’தி விப்படிஸாரீ ஹுத்வா. உத்³த⁴னந்தரேதி சுல்லிகந்தரே. நந்தி ஸுனக²ம்.

தம் பவத்திந்தி ப⁴க³வதா யதா²வுத்தகாரணம். ப்³ராஹ்மணசாரித்தஸ்ஸ அபரிஹாபிததம் ஸந்தா⁴ய, ததா² பிதரம் உக்கம்ஸேந்தோ ‘‘ப்³ரஹ்மலோகே நிப்³ப³த்தோ’’தி ஆஹ. முகா²ருள்ஹந்தி ஸயம்படிபா⁴னவஸேன முக²மாருள்ஹம். தம் பவத்திம் புச்சீ²தி ‘‘ஸுதமேதம் போ⁴ கோ³தம மய்ஹம் பிதா ஸுனகோ² ஹுத்வா நிப்³ப³த்தோ’’தி தும்ஹேஹி வுத்தம், ‘‘கிமித³ம் ஸச்சம் வா அஸச்சம் வா’’தி புச்சி². ததே²வ வத்வாதி யதா² புப்³பே³ ஸுனக²ஸ்ஸ வுத்தம், ததே²வ வத்வா. அவிஸம்வாத³னத்த²ந்தி ஸச்சாபனத்த²ம், ‘‘தோதே³ய்யப்³ராஹ்மணோ ஸுனகோ² ஹுத்வா நிப்³ப³த்தோ’’தி வசனஸ்ஸ அவிஸம்வாத³னேன அத்தனோ அவிஸம்வாதி³பா⁴வத³ஸ்ஸனத்த²ந்தி வுத்தம் ஹோதி. அப்போத³கந்தி அப்பகேன உத³கேன ஸம்பாதி³தம். மது⁴பாயாஸந்தி ஸாது³ரஸம், மது⁴யோஜிதம் வா பாயாஸம். ததா² அகாஸி, யதா² ப⁴க³வதா வுத்தம். ‘‘ஸப்³ப³ம் த³ஸ்ஸேஸீதி பு³த்³தா⁴னுபா⁴வேன ஸோ ஸுனகோ² தம் ஸப்³ப³ம் நேத்வா த³ஸ்ஸேஸி, ந ஜாதிஸ்ஸரதாய. ப⁴க³வந்தம் தி³ஸ்வா பு⁴க்கரணம் பன புரிமஜாதிஸித்³த⁴வாஸனாவஸேனா’’தி (தீ³. நி. டீ. 1.444) ஏவம் ஆசரியேன வுத்தம். உபரிபண்ணாஸகே பன சூளகம்மவிப⁴ங்க³ஸுத்தட்ட²கதா²யம் ‘‘ஸுனகோ² ‘ஞாதோம்ஹி இமினா’தி ரோதி³த்வா ‘ஹும் ஹு’ந்தி கரோந்தோ த⁴னனிதா⁴னட்டா²னம் க³ந்த்வா பாதே³ன பத²விம் க²ணித்வா ஸஞ்ஞம் அதா³ஸீ’’தி (ம. நி. அட்ட². 3.289) ஜாதிஸ்ஸராகாரமாஹ, வீமம்ஸித்வா க³ஹேதப்³ப³ம்.

‘‘ப⁴வபடிச்ச²ன்னம் நாம ஏவரூபம் ஸுனக²படிஸந்தி⁴அந்தரம் பாகடம் ஸமணஸ்ஸ கோ³தமஸ்ஸ, அத்³தா⁴ ஏஸ ஸப்³ப³ஞ்ஞூ’’தி ப⁴க³வதி பஸன்னசித்தோ. அங்க³விஜ்ஜாபாட²கோ கிரேஸ. தேனஸ்ஸ ஏதத³ஹோஸி ‘‘இமம் த⁴ம்மபண்ணாகாரம் கத்வா ஸமணம் கோ³தமம் பஞ்ஹம் புச்சி²ஸ்ஸாமீ’’தி, ததோ ஸோ சுத்³த³ஸ பஞ்ஹே அபி⁴ஸங்க²ரித்வா ப⁴க³வந்தம் புச்சி². தேன வுத்தம் ‘‘சுத்³த³ஸ பஞ்ஹே புச்சி²த்வா’’தி. தத்த² சுத்³த³ஸ பஞ்ஹேதி ‘‘தி³ஸ்ஸந்தி ஹி போ⁴ கோ³தம மனுஸ்ஸா அப்பாயுகா, தி³ஸ்ஸந்தி தீ³கா⁴யுகா. தி³ஸ்ஸந்தி ப³வ்ஹாபா³தா⁴, அப்பாபா³தா⁴. து³ப்³ப³ண்ணா, வண்ணவந்தோ. அப்பேஸக்கா², மஹேஸக்கா². அப்பபோ⁴கா³, மஹாபோ⁴கா³. நீசகுலீனா, உச்சாகுலீனா. தி³ஸ்ஸந்தி து³ப்பஞ்ஞா, தி³ஸ்ஸந்தி பஞ்ஞவந்தோ. கோ நு கோ² போ⁴ கோ³தம ஹேது கோ பச்சயோ, யேன மனுஸ்ஸானம்யேவ ஸதம் மனுஸ்ஸபூ⁴தானம் தி³ஸ்ஸந்தி ஹீனபணீததா’’தி (ம. நி. 3.289) இமே சூளகம்மவிப⁴ங்க³ஸுத்தே ஆக³தே சுத்³த³ஸ பஞ்ஹே. ‘‘கம்மஸ்ஸகா மாணவ ஸத்தா கம்மதா³யாதா³’’திஆதி³னா (ம. நி. 3.289) ஸங்கே²பதோ, வித்தா²ரதோ ச விஸ்ஸஜ்ஜனபரியோஸானே ப⁴க³வந்தம் ஸரணம் க³தோ. அங்க³ஸுப⁴தாய ‘‘ஸுபோ⁴’’ திஸ்ஸ நாமம். மாணவோதி பன மஹல்லககாலேபி தருணவோஹாரேன நம் வோஹரதி. அத்தனோ போ⁴க³கா³மதோதி துதி³கா³மதோ ஆக³ந்த்வா தங்க²ணிகம் வஸதி. தேனேவ பாளியம் ‘‘கேனசிதே³வ கரணீயேனா’’தி வுத்தம்.

445. ‘‘ஏகா ச மே கங்கா² அத்தீ²’’தி இமினா உபரி புச்சி²யமானஸ்ஸ பஞ்ஹஸ்ஸ பகே³வ தேன அபி⁴ஸங்க²தபா⁴வம் த³ஸ்ஸேதி. மாணவகந்தி கு²த்³த³கமாணவம் ‘‘ஏகபுத்தகோ, (ம. நி. 2.296, 353; பாரா. 26) பியபுத்தகோ’’திஆதீ³ஸு விய க-ஸத்³த³ஸ்ஸ கு²த்³த³கத்தே² பவத்தனதோ. விஸபா⁴க³வேத³னாதி து³க்க²வேத³னா. ஸா ஹி குஸலகம்மனிப்³ப³த்தே அத்தபா⁴வே உப்பஜ்ஜனகஸுக²வேத³னாபடிபக்க²பா⁴வதோ ‘‘விஸபா⁴க³வேத³னா’’தி ச காயம் கா³ள்ஹா ஹுத்வா பா³த⁴னதோ பீளனதோ ‘‘ஆபா³தோ⁴’’தி ச வுச்சதி. கீதி³ஸா பன ஸாதி ஆஹ ‘‘யா ஏகதே³ஸே’’திஆதி³. ஏகதே³ஸே உப்பஜ்ஜித்வாதி ஸரீரேகதே³ஸே உட்ட²ஹித்வாபி அபரிவத்திபா⁴வகரணதோ அயபட்டேன ஆப³ந்தி⁴த்வா விய க³ண்ஹாதி, இமினா ப³லவரோகோ³ ஆபா³தோ⁴ நாமாதி த³ஸ்ஸேதி. கிச்ச²ஜீவிதகரோதி அஸுக²ஜீவிதாவஹோ, இமினா து³ப்³ப³லோ அப்பமத்தகோ ரோகோ³ ஆதங்கோ நாமாதி த³ஸ்ஸேதி. உட்டா²னந்தி ஸயனனிஸஜ்ஜாதி³தோ உட்ட²ஹனம், தேன யதா² ததா² அபராபரம் ஸரீரஸ்ஸ பரிவத்தனம் வத³தி. க³ருகந்தி பா⁴ரியம் அகிச்சஸித்³தி⁴கம். கி³லானஸ்ஸேவ காயே ப³லம் ந ஹோதீதி ஸம்ப³ந்தோ⁴. லஹுட்டா²னேன சேத்த² கே³லஞ்ஞாபா⁴வோ புச்சி²தோ. ஹேட்டா² சதூஹி பதே³ஹி அபா²ஸுவிஹாராபா⁴வம் புச்சி²த்வாபி இதா³னி புன பா²ஸுவிஹாரபா⁴வம் புச்ச²தி, தேன ஸவிஸேஸோ ஏத்த² பா²ஸுவிஹாரோ புச்சி²தோதி விஞ்ஞாயதி. அஸதிபி ஹி அதிஸயத்த²ஜோதனே ஸத்³தே³ அத்தா²பத்திதோ அதிஸயத்தோ² லப்³ப⁴தேவ யதா² ‘‘அபி⁴ரூபஸ்ஸ கஞ்ஞா தா³தப்³பா³’’தி. தேனாஹ ‘‘க³மனட்டா²னா’’திஆதி³. புரிமம் ஆணாபனவசனம், இத³ம் பன புச்சி²தப்³பா³காரத³ஸ்ஸனந்தி அயமிமேஸம் விஸேஸோதி த³ஸ்ஸேதி ‘‘அத²ஸ்ஸா’’திஆதி³னா.

447. காலோ நாம உபஸங்கமனஸ்ஸ யுத்தபத்தகாலோ, ஸமயோ நாம தஸ்ஸேவ பச்சயஸாமக்³கீ³, அத்த²தோ பனேஸ தஜ்ஜம் ஸரீரப³லஞ்சேவ தப்பச்சயபரிஸ்ஸயாபா⁴வோ ச. உபாதா³னம் நாம ஞாணேன தேஸம் க³ஹணம் ஸல்லக்க²ணந்தி ஆஹ ‘‘பஞ்ஞாயா’’திஆதி³. ‘‘ஸ்வே க³மனகாலோ ப⁴விஸ்ஸதீ’’தி இமினா காலம், ‘‘காயே’’திஆதி³னா ஸமயஞ்ச ஸரூபதோ த³ஸ்ஸேதி. ப²ரிஸ்ஸதீதி ப²ரணவஸேன ட²ஸ்ஸதி.

448. சேதியரட்டே²தி சேதிரட்டே². ய-காரேன ஹி பத³ம் வட்³டே⁴த்வா ஏவம் வுத்தம். ‘‘சேதிரட்ட²தோ அஞ்ஞம் விஸும்யேவேகம் ரட்ட²’’ந்திபி வத³ந்தி. ‘‘யஸ்மா மரணம் நாம தாதி³ஸானம் த³ஸப³லானம் ரோக³வஸேனேவ ஹோதி, தஸ்மா யேன ரோகே³ன தம் ஜாதம், தஸ்ஸ ஸரூபபுச்சா², காரணபுச்சா², மரணஹேதுகசித்தஸந்தாபபுச்சா², தஸ்ஸ ச ஸந்தாபஸ்ஸ ஸப்³ப³லோகஸாதா⁴ரணதா, ததா² மரணஸ்ஸ ச அப்படிகரணதா’’தி ஏவமாதி³னா மரணபடிஸஞ்ஞுத்தம் ஸம்மோத³னீயம் கத²ம் கதே²ஸீதி த³ஸ்ஸேதும் ‘‘போ⁴ ஆனந்தா³’’திஆதி³ வுத்தம். ‘‘கோ நாமா’’திஆதி³னா ஹி ரோக³ம் புச்ச²தி, ‘‘கிம் ப⁴க³வா பரிபு⁴ஞ்ஜீ’’தி இமினா காரணம், ‘‘அபிசா’’திஆதி³னா சித்தஸந்தாபம், ‘‘ஸத்தா² நாமா’’திஆதி³னா தஸ்ஸ ஸப்³ப³லோகஸாதா⁴ரணதம், ‘‘ஏகா தா³னீ’’திஆதி³னா மரணஸ்ஸ அப்படிகரணதம் த³ஸ்ஸேதீதி த³ட்ட²ப்³ப³ம். மஹாஜானீதி மஹாஹானி. யத்ராதி யேன காரணேன பரினிப்³பு³தோ, தேன கோ தா³னி அஞ்ஞோ மரணா முச்சிஸ்ஸதீதிஆதி³னா யோஜேதப்³ப³ம். இதா³னீதி ச அத்தனோ மனஸிகாரம் பதி வோஹாரமத்தேன வுத்தம். லஜ்ஜிஸ்ஸதீதி லஜ்ஜா விய ப⁴விஸ்ஸதி, விஜ்ஜிஸ்ஸதீதி அத்தோ². பீதபே⁴ஸஜ்ஜானுரூபம் ஆஹாரபோ⁴ஜனம் போராணாசிண்ணந்தி ஆஹ ‘‘பீத…பே… த³த்வா’’தி.

ஹுத்வாதி பாட²ஸேஸோ ஸந்திகாவசரபா⁴வஸ்ஸ விஸேஸனதோ. மாரோ பாபிமா விய ந ரந்த⁴க³வேஸீ, உத்தரமாணவோ விய ச ந வீமம்ஸனாதி⁴ப்பாயோ, அபி து க²லு உபட்டா²கோ ஹுத்வா ஸந்திகாவசரோதி ஹி விஸேஸேதி. ந ரந்த⁴க³வேஸீதி ந சி²த்³த³க³வேஸீ. யேஸு த⁴ம்மேஸூதி விமோக்கு²பாயேஸு நிய்யானிகத⁴ம்மேஸு. த⁴ரந்தீதி அது⁴னா திட்ட²ந்தி, பவத்தந்தீதி அத்தோ².

449. அத்த²தோ பயுத்ததாய ஸத்³த³பயோக³ஸ்ஸ ஸத்³த³பப³ந்த⁴லக்க²ணானி தீணி பிடகானி தத³த்த²பூ⁴தேஹி ஸீலாதீ³ஹி தீஹி த⁴ம்மக்க²ந்தே⁴ஹி ஸங்க³ய்ஹந்தீதி வுத்தம் ‘‘தீணி பிடகானி தீஹி க²ந்தே⁴ஹி ஸங்க³ஹேத்வா’’தி. ஸங்கி²த்தேன கதி²தந்தி ‘‘திண்ணம் கோ² மாணவ க²ந்தா⁴ன’’ந்தி ஏவம் க³ணனதோ, ஸாமஞ்ஞதோ ச ஸங்கே²பேனேவ கதி²தம். ‘‘கதமேஸம் திண்ண’’ந்தி அயம் அதி³ட்ட²ஜோதனாபுச்சா²யேவ, ந கதே²துகம்யதாபுச்சா². மாணவஸ்ஸேவ ஹி அயம் புச்சா², ந தே²ரஸ்ஸாதி ஆஹ ‘‘மாணவோ’’திஆதி³. அஞ்ஞத்த² பன ஈதி³ஸேஸு டா²னேஸு கதே²துகம்யதாபுச்சா²யேவ தி³ஸ்ஸதி, ந அதி³ட்ட²ஜோதனாபுச்சா². இத⁴ பன அட்ட²கதா²யம் ஏவம் வுத்தம், ததே³தம் அட்ட²கதா²பமாணதோ பச்சேதப்³ப³ம். ததா³ பவத்தமானஞ்ஹி பச்சக்க²ம் கத்வா அட்ட²கத²ம்பி ஸங்க³ஹமாரோபிம்ஸு. கதே²துகம்யதாபுச்சா²பா⁴வே பனஸ்ஸ தே²ரஸ்ஸேவ வசனதா ஸியா.

ஸீலக்க²ந்த⁴வண்ணனா

450-453. ஸீலக்க²ந்த⁴ஸ்ஸாதி ஏத்த² பத³த்த²விபல்லாஸகாரீ இதிஸத்³தோ³ லுத்தோ, அத்த²னித்³தே³ஸோ விய ஸத்³த³னித்³தே³ஸோ வா, யதா²ருதோ ச இதிஸத்³தோ³ ஆத்³யத்தோ², பகாரத்தோ² வா, தேன ‘‘அரியஸ்ஸ ஸமாதி⁴க்க²ந்த⁴ஸ்ஸ…பே… பதிட்ட²பேஸீ’’தி அயம் பாடோ² க³ஹிதோதி த³ட்ட²ப்³ப³ம். தேன வுத்தம் ‘‘தேஸு த³ஸ்ஸிதேஸூ’’தி, தேஸு தீஸு க²ந்தே⁴ஸு உத்³தே³ஸவஸேன த³ஸ்ஸிதேஸூதி அத்தோ². ப⁴க³வதா வுத்தனயேனேவாதி ஸாமஞ்ஞப²லாதீ³ஸு (தீ³. நி. 1.194) தே³ஸிதனயேனேவ, தேன இமஸ்ஸ ஸுத்தஸ்ஸ பு³த்³த⁴பா⁴ஸிதபா⁴வம் த³ஸ்ஸேதீதி வேதி³தப்³ப³ம். ஸாஸனே ந ஸீலமேவ ஸாரோதி அரியமக்³க³ஸாரே ப⁴க³வதோ ஸாஸனே யதா²த³ஸ்ஸிதம் ஸீலம் ஸாரோ ஏவ ந ஹோதி ஸாரவதோ மஹதோ ருக்க²ஸ்ஸ பபடிகட்டா²னிகத்தா. அட்டா²னபயுத்தோ ஹி ஏவஸத்³தோ³ யதா²டா²னே ந யோஜேதப்³போ³. யஜ்ஜேவம் கஸ்மா தமித⁴ க³ஹிதந்தி ஆஹ ‘‘கேவல’’ந்திஆதி³. ஜா²னாதி³உத்தரிமனுஸ்ஸத⁴ம்மே அதி⁴க³ந்துகாமஸ்ஸ அதி⁴ட்டா²னமத்தம் தத்த² அப்பதிட்டி²தஸ்ஸ தேஸமஸம்ப⁴வதோ. வுத்தஞ்ஹி ‘‘ஸீலே பதிட்டா²ய நரோ ஸபஞ்ஞோ’’திஆதி³ (ஸம். நி. 1.23, 192; பேடகோ. 22) அத² வா ஸாஸனே ந ஸீலமேவ ஸாரோதி காமஞ்சேத்த² ஸாஸனே மக்³க³ப²லஸீலஸங்கா²தம் லோகுத்தரஸீலம்பி ஸாரமேவ, ததா²பி ந ஸீலக்க²ந்தோ⁴ ஏவ ஸாரோ ஹோதி, அத² கோ² ஸமாதி⁴க்க²ந்தோ⁴பி பஞ்ஞாக்க²ந்தோ⁴பி ஸாரோ ஏவாதி ஏவம்பேத்த² யதா²பயுத்தேன ஏவஸத்³தே³ன அத்தோ² வேதி³தப்³போ³, புரிமோயேவ பனத்தோ² யுத்ததரோ. ததா² ஹி வுத்தம் ‘‘இதோ உத்தரீ’’திஆதி³. அஞ்ஞம்பி கத்தப்³ப³ந்தி ஸேஸக²ந்த⁴த்³வயம்.

ஸமாதி⁴க்க²ந்த⁴வண்ணனா

454. கஸ்மா பனேத்த² தே²ரோ ஸமாதி⁴க்க²ந்த⁴ம் புட்டோ²பி இந்த்³ரியஸம்வராதி³கே விஸ்ஸஜ்ஜேஸி, நனு ஏவம் ஸந்தே அஞ்ஞம் புட்டோ² அஞ்ஞம் ப்³யாகரோந்தோ அம்ப³ம் புட்டோ² லபு³ஜம் ப்³யாகரோந்தோ விய ஹோதீதி ஈதி³ஸீ சோத³னா இத⁴ அனோகாஸாதி த³ஸ்ஸேந்தோ ‘‘கத²ஞ்ச…பே… ஆரபீ⁴’’தி ஆஹ, தேனேத்த² இந்த்³ரியஸம்வராத³யோபி ஸமாதி⁴உபகாரகதம் உபாதா³ய ஸமாதி⁴க்க²ந்த⁴பக்கி²கபா⁴வேன உத்³தி³ட்டா²தி த³ஸ்ஸேதி. யே தே இந்த்³ரியஸம்வராத³யோதி ஸம்ப³ந்தோ⁴. ரூபாவசரசதுத்த²ஜ்ஜா²னதே³ஸனானந்தரம் அபி⁴ஞ்ஞாதே³ஸனாய அவஸரோதி கத்வா ரூபஜ்ஜா²னானேவ ஆக³தானி,ந அரூபஜ்ஜா²னானி. ரூபாவசரசதுத்த²ஜ்ஜா²னபாதி³கா ஹி ஸபரிப⁴ண்டா³ ச²பி அபி⁴ஞ்ஞாயோ. யஸ்மா பன லோகியாபி⁴ஞ்ஞாயோ இஜ்ஜ²மானா அட்ட²ஸு ஸமாபத்தீஸு சுத்³த³ஸவிதே⁴ன சித்தபரித³மனேன வினா ந இஜ்ஜ²ந்தி, தஸ்மா அபி⁴ஞ்ஞாஸு தே³ஸியமானாஸு அரூபஜ்ஜா²னானிபி தே³ஸிதானேவ ஹோந்தி நானந்தரிகபா⁴வதோ. தேனாஹ ‘‘ஆனேத்வா பன தீ³பேதப்³பா³னீ’’தி, வுத்தனயேன தே³ஸிதானேவ கத்வா ஸம்வண்ணகேஹி பகாஸேதப்³பா³னீதி அத்தோ². அட்ட²கதா²யம் பன ‘‘சதுத்த²ஜ்ஜா²னம் உபஸம்பஜ்ஜ விஹரதீ’’தி இமினாவ அரூபஜ்ஜா²னம்பி ஸங்க³ஹிதந்தி த³ஸ்ஸேதும் ‘‘சதுத்த²ஜ்ஜா²னேன ஹீ’’திஆதி³ வுத்தம். சதுத்த²ஜ்ஜா²னமேவ ஹி ரூபவிராக³பா⁴வனாவஸேன பவத்தம் ‘‘அரூபஜ்ஜா²ன’’ந்தி வுச்சதி.

471-480. ந சித்தேகக்³க³தாமத்தகேனேவாதி ஏத்த² ஹேட்டா² வுத்தனயானுஸாரேன டா²னாடா²னபயுத்தஸ்ஸ ஏவஸத்³த³ஸ்ஸானுரூபமத்தோ² வேதி³தப்³போ³. லோகியஸமாதி⁴க்க²ந்த⁴ஸ்ஸ பன அதி⁴ப்பேதத்தா ‘‘ந சித்தேகக்³க³தா…பே… அத்தீ²’’தி வுத்தம். அரியோ ஸமாதி⁴க்க²ந்தோ⁴தி ஏத்த² ஹி அரியஸத்³தோ³ ஸுத்³த⁴மத்தபரியாயோவ, ந லோகுத்தரபரியாயோ. யதா² சேத்த², ததா² அரியோ ஸீலக்க²ந்தோ⁴தி ஏத்தா²பி. இதோதி பஞ்ஞாக்க²ந்த⁴தோ, ஸோ ச உக்கட்ட²தோ அரஹத்தப²லபரியாபன்னோ ஏவாதி ஆஹ ‘‘அரஹத்தபரியோஸான’’ந்திஆதி³. லோகியாபி⁴ஞ்ஞாபடிஸம்பி⁴தா³ஹி வினாபி ஹி அரஹத்தே அதி⁴க³தே ‘‘நத்தே²வ உத்தரிகரணீய’’ந்தி ஸக்கா வத்தும் யத³த்த²ம் ப⁴க³வதி ப்³ரஹ்மசரியம் வுஸ்ஸதி, தஸ்ஸ ஸித்³த⁴த்தா. இத⁴ பன லோகியாபி⁴ஞ்ஞாயோபி ஆக³தாயேவ. ஸேஸமேத்த² ஸுவிஞ்ஞேய்யம்.

இதி ஸுமங்க³லவிலாஸினியா தீ³க⁴னிகாயட்ட²கதா²ய பரமஸுகு²மக³ம்பீ⁴ரது³ரனுபோ³த⁴த்த²பரிதீ³பனாய ஸுவிமலவிபுலபஞ்ஞாவேய்யத்தியஜனனாய ஸாது⁴விலாஸினியா நாம லீனத்த²பகாஸனியா ஸுப⁴ஸுத்தவண்ணனாய லீனத்த²பகாஸனா.

ஸுப⁴ஸுத்தவண்ணனா நிட்டி²தா.