4. அனந்தரபச்சயனித்³தே³ஸவண்ணனா

4. யதா²வுத்தா நிரோதா⁴னந்தரஸுஞ்ஞதா நிரோத⁴ப்பத்ததா ஓகாஸதா³னவிஸேஸோ, அத்தனோ அனுரூபசித்துப்பாத³னஸமத்த²தா சித்தனியமஹேதுதா, தத்த² அனந்தருப்பாத³னஸமத்த²தா ச ஸண்டா²னாபா⁴வதோ ஸுட்டு²தரம் நிரந்தருப்பாத³னஸமத்த²தா ச சித்தனியமஹேதுவிஸேஸோ த³ட்ட²ப்³போ³. தா⁴துவஸேனாதி விஞ்ஞாணதா⁴துமனோதா⁴துமனோவிஞ்ஞாணதா⁴துவஸேன. ஏத்தகா ஏவ ஹி தா⁴துயோ பி⁴ன்னஸபா⁴வா அனந்தரபச்சயதாய நியமேத்வா வத்தப்³பா³, அபி⁴ன்னஸபா⁴வா பன விஸேஸாபா⁴வதோ புரிமதாமத்தம்யேவ விஸேஸம் புரக்க²த்வா வத்தப்³பா³தி தா குஸலாதி³பே⁴தே³ன ததா² வுத்தா. தேனாஹ ‘‘குஸலாதி³வஸேன சா’’தி. யா பன மனோதா⁴துமனோவிஞ்ஞாணதா⁴துவஸேன அனந்தரபச்சயதா வத்தப்³பா³, தத்த² மனோவிஞ்ஞாணதா⁴து மனோதா⁴துயா அனந்தரபச்சயேன பச்சயோதி வுச்சமானோ ஸம்மோஹோ ஸியா, புரே மனோதா⁴துயா அனந்தரபச்சயபா⁴வேன வுத்தா, இதா³னி மனோவிஞ்ஞாணதா⁴து மனோதா⁴துயாதி பச்சயபச்சயுப்பன்னவிஸேஸா ந விஞ்ஞாயேய்ய, மனோதா⁴துயா பன சக்கு²விஞ்ஞாணாதி³தா⁴தூனம் அனந்தரபச்சயபா⁴வே வுச்சமானே நியமோ நத்தி². தேனாஹ ‘‘மனோதா⁴து சக்கு²விஞ்ஞாணதா⁴துயாதி சா’’தி. ததே²வாதி நியமாபா⁴வதோ ஏவாதி அத்தோ². தஸ்மாதி யஸ்மா இதோ அஞ்ஞதா² தே³ஸனாய பச்சயபச்சயுப்பன்னானம் விஸேஸாபா⁴வோ சித்தவிஸேஸத³ஸ்ஸனவிச்சே²தோ³ நியமாபா⁴வோ சாதி இமே தோ³ஸா ஆபஜ்ஜந்தி, தஸ்மா. நித³ஸ்ஸனேனாதி தா⁴துவஸேன நித³ஸ்ஸனேன. நயம் த³ஸ்ஸேத்வாதி ‘‘மனோவிஞ்ஞாணதா⁴து தம்ஸம்பயுத்தகா ச த⁴ம்மா மனோதா⁴துயா தம்ஸம்பயுத்தகானஞ்ச த⁴ம்மானம் அனந்தரபச்சயேன பச்சயோ’’தி ஏவமாதி³கஸ்ஸ அனந்தரபச்சயதாக்³க³ஹணஸ்ஸ நயம் த³ஸ்ஸேத்வா. நிரவஸேஸத³ஸ்ஸனத்த²ந்தி நிரவஸேஸஸ்ஸ அனந்தரபச்சயபா⁴வினோ சித்துப்பாத³ஸ்ஸ த³ஸ்ஸனத்த²ம்.

ஸதி³ஸகுஸலானந்தி ஸமானகுஸலானம், ஸமானதா சேத்த² ஏகவீதி²பரியாபன்னதாய வேதி³தப்³பா³. தேனேவாஹ ‘‘பூ⁴மிபி⁴ன்னானம்பி பச்சயபா⁴வோ வுத்தோ ஹோதீ’’தி. ஸமானவீதி²தா ச யஸ்மா ஸமானவேத³னா ஸமானஹேதுகா ச ஹோந்தி, தஸ்மா ‘‘வேத³னாய வா ஹேதூஹி வா ஸதி³ஸகுஸலான’’ந்தி ஆஹ. வா-ஸத்³தோ³ சேத்த² அனியமத்தோ². தேன ஞாணஸங்கா²ராதி³பே⁴த³ஸ்ஸபி விகப்பனவஸேன ஸங்க³ஹோ த³ட்ட²ப்³போ³. சுதிபி க³ஹிதா தம்ஸபா⁴வத்தா. ப⁴வங்க³சித்தமேவ ஹி பரியோஸானே ‘‘சுதீ’’தி வுச்சதி. குஸலாகுஸலானந்தரஞ்ச கதா³சி ஸா உப்பஜ்ஜதீதி ததா³ரம்மணம்பி க³ஹிதந்தி த³ட்ட²ப்³ப³ம், கிரியஜவனானந்தரம் ததா³ரம்மணுப்பத்தியந்தி அதி⁴ப்பாயோ.

காமாவசரகிரியாய ஆவஜ்ஜனஸ்ஸாதி அயமேத்த² அத்தோ² அதி⁴ப்பேதோதி த³ஸ்ஸேந்தோ ‘‘ஆவஜ்ஜனக்³க³ஹணேன காமாவசரகிரியம் விஸேஸேதீ’’தி ஆஹ. தமேவ ஹி அத்த²ம் பாகடதரம் காதும் ‘‘காமாவசரவிபாகோ’’திஆதி³ வுத்தம். வோட்ட²ப்³ப³னம்பி க³ஹிதம் ஸந்தீரணானந்தரத்தாதி அதி⁴ப்பாயோ.

அனந்தரபச்சயனித்³தே³ஸவண்ணனா நிட்டி²தா.