6. ஸஹஜாதபச்சயனித்³தே³ஸவண்ணனா

6. போராணபாடோ²தி புராதனோ அட்ட²கதா²பாடோ². இமஸ்ஸாதி இமஸ்ஸ பத³ஸ்ஸ. அவுத்தஸ்ஸாதி பாளியம் அவுத்தஸ்ஸ. யதி³பி ஸஹக³தஸத்³த³ஸ்ஸ அத்த²ஸம்வண்ணனாயம் ஸம்ஸட்ட²ஸத்³த³ஸ்ஸ விய ஸமானத்த²ஸ்ஸபி கத்த²சி ஸத்³த³ந்தரஸ்ஸ அத்தோ² வுச்சதி பரியாயவிஸேஸபோ³த⁴னத்த²ம், ததா²பி ந மூலஸத்³த³ஸ்ஸ அத்தோ² விபா⁴விதோ ஹோதீதி த³ஸ்ஸேந்தோ ஆஹ ‘‘ந ச…பே… ஹோதீ’’தி. ‘‘அஞ்ஞமஞ்ஞ’’ந்தி ச ‘‘அஞ்ஞஅஞ்ஞ’’ந்தி வத்தப்³பே³ ம-காராக³மம் கத்வா நித்³தே³ஸோ, கம்மப்³யதிஹாரே சேதம் பத³ம், தஸ்மா இதரேதரந்தி வுத்தம் ஹோதி. பச்சயபச்சயுப்பன்னானம் ஏகஸ்மிம்யேவ க²ணே பச்சயுப்பன்னபச்சயபா⁴வஸ்ஸ இச்சி²தத்தா யோ ஹி யஸ்ஸ பச்சயோ யஸ்மிம் க²ணே, தஸ்மிம்யேவ க²ணே ஸோபி தஸ்ஸ பச்சயோதி அயமேத்த² அஞ்ஞமஞ்ஞபச்சயதா. ததா² ஹி அட்ட²கதா²யம் ‘‘அஞ்ஞோ அஞ்ஞஸ்ஸா’’தி வத்வா ‘‘இமினா…பே… தீ³பேதீ’’தி வுத்தம். ஓக்கமனம் பவிஸனந்தி அத்தோ². ஆஸனக்க²ணே ஹி த⁴ம்மா புரிமப⁴வதோ இமம் ப⁴வம் பவிஸந்தா விய ஹோந்தி. தேன வுத்தம் ‘‘பரலோகதோ இமம் லோகம் ஆக³ந்த்வா பவிஸந்தம் விய உப்பஜ்ஜதீ’’தி. தஸ்மா அவிஸேஸேன படிஸந்தி⁴ ஓக்கந்திஸத்³தா³பி⁴தே⁴ய்யாதி அதி⁴ப்பாயேன வுத்தம் ‘‘ஓக்கந்தி…பே… அதி⁴ப்பாயேனாஹா’’தி. தம்னிவாரணத்த²ந்தி தஸ்ஸ க²ணந்தரே ரூபீனம் ஸஹஜாதபச்சயபா⁴வஸ்ஸ ‘‘கஞ்சி காலே ந ஸஹஜாதபச்சயேன பச்சயோ’’தி நிவாரணத்த²ம். தேன பத³த்³வயேன ஸமானேஸு பச்சயபச்சயுப்பன்னத⁴ம்மேஸு புரிமதோ பச்சி²மஸ்ஸ விஸேஸமத்த²ம் த³ஸ்ஸேதி.

ஏவஞ்ச ‘‘கஞ்சி காலே’’தி பத³ஸ்ஸ ‘‘கேசி காலேதி வா, கிஸ்மிஞ்சி காலே’’தி வா விப⁴த்திவிபல்லாஸேன அத்தோ² க³ஹேதப்³போ³தி அதி⁴ப்பாயேன பட²மவிகப்பம் த³ஸ்ஸேத்வா இதா³னி பகாரந்தரேன த³ஸ்ஸேதும் ‘‘கஞ்சி காலேதி கேசி கிஸ்மிஞ்சி காலேதி வா அத்தோ²’’தி ஆஹ. தேன ‘‘கஞ்சீ’’தி அயம் ஸாமஞ்ஞனித்³தே³ஸோதி த³ஸ்ஸேதி. யோ ஹி அயம் ‘‘கேசீ’’தி பச்சத்தப³ஹுவசனாபி⁴தே⁴ய்யோ அத்தோ², யோ ச ‘‘கிஸ்மிஞ்சீ’’தி பு⁴ம்மேகவசனாபி⁴தே⁴ய்யோ, தது³ப⁴யம் ஸதி காலவந்தகாலதாவிபா⁴கே³ கிம்-ஸத்³த³ஸ்ஸ வசனீயதாஸாமஞ்ஞேன பன ஏகஜ்ஜ²ம் கத்வா ‘‘கஞ்சீ’’தி பாளியம் வுத்தந்தி தம் விப⁴ஜித்வா த³ஸ்ஸேதும் ‘‘கேசி கிஸ்மிஞ்சீ’’தி வுத்தம். அட்ட²கதா²யம் பன ‘‘கிஸ்மிஞ்சீ’’தி பு⁴ம்மவஸேனேவ வுத்தம். தேன யதா²வுத்தஅத்த²விபா⁴கே³ன பதே³ன. வத்து²பூ⁴தாதி வத்து²ஸபா⁴வா. ஹத³யரூபமேவ ஸந்தா⁴ய வத³தி. ரூபந்தரானந்தி ஹத³யவத்து²தோ அஞ்ஞரூபானம். அரூபீனம் ஸஹஜாதபச்சயதம் புப்³பே³ ‘‘ஓக்கந்திக்க²ணே நாமரூப’’ந்தி ஏத்த² அனிவாரிதம் நிவாரேதீதி யோஜனா, ததா² வத்து²ஸ்ஸ ச காலந்தரே படிஸந்தி⁴காலதோ அஞ்ஞஸ்மிம் காலே அரூபீனம் நிவாரேதீதி. ஏவஞ்ச கத்வாதிஆதி³னா யதா²வுத்தஅத்த²வண்ணனாய பாளியம் விப⁴த்தினித்³தே³ஸஸ்ஸ ரூபகபா⁴வமாஹ. புனபி புரிமதோ பச்சி²மஸ்ஸ உபசயேன விஸேஸம் த³ஸ்ஸேதும் ‘‘புரிமேன சா’’திஆதி³ வுத்தம். தத்த² புரிமேனாதி ‘‘ஓக்கந்திக்க²ணே நாமரூப’’ந்தி இமினா பச்சயனித்³தே³ஸவசனேன. ‘‘ஏகோ க²ந்தோ⁴ வத்து² ச திண்ணம் க²ந்தா⁴ன’’ந்திஆதி³னா படிச்சவாராதி³பாடே²ன. அத்த²விவரணஞ்ஹி பச்சயனித்³தே³ஸபாளியா ஸப்³பே³பி ஸத்த மஹாவாரா. வத்து²ஸ்ஸ வத்தப்³ப³த்தே ஆபன்னே கிந்தி பச்சயோதி தஸ்ஸ நாமஸ்ஸாதி யோஜனா. ஏதேனாதி ‘‘ரூபினோ த⁴ம்மா அரூபீனம் த⁴ம்மான’’ந்தி ஏதேன வசனேன. கேவலஸ்ஸாதி நாமரஹிதஸ்ஸ வத்து²ஸ்ஸ. ததா²தி நாமஸ்ஸ பச்சயபா⁴வேன.

கத்த²சீதி ‘‘ரூபினோ த⁴ம்மா அரூபீனம் த⁴ம்மானம் கஞ்சி காலம் ஸஹஜாதபச்சயேன பச்சயோ’’தி ஏதஸ்மிம் நித்³தே³ஸே. ஏத்த² ஹி அஞ்ஞமஞ்ஞஸஹஜாதபச்சயபா⁴வோ லப்³ப⁴தி. வசனேனாதி ‘‘அஞ்ஞமஞ்ஞ’’ந்தி இமினா வசனேன பாளியம் ஸஹஜாதபச்சயபா⁴வஸ்ஸ அஸங்க³ஹிதத்தா, அத்த²தோ பன லப்³ப⁴தேவாதி. தேனாஹ ‘‘லப்³ப⁴மானேபீ’’தி. தஸ்ஸாதி அஞ்ஞமஞ்ஞபச்சயத்தஸ்ஸ. ஏவந்தி ‘‘ந அஞ்ஞமஞ்ஞவஸேனா’’தி இமினா பகாரேன. ஸமுதா³யேகதே³ஸவஸேன ஸாமிவசனந்தி அவயவாவயவிஸம்ப³ந்தே⁴ அவயவினி ஸாமிவசனந்தி அத்தோ², நித்³தா⁴ரணே வா ‘‘கண்ஹா கா³வீன’’ந்திஆதீ³ஸு விய.

ஸஹஜாதபச்சயனித்³தே³ஸவண்ணனா நிட்டி²தா.