2. ஸஹஜாதவாரவண்ணனா

234-242. ஸஹஜாதபச்சயகரணந்தி ஸஹஜாதம் பச்சயத⁴ம்மம் பச்சயம் கத்வா பவத்தி. ஸஹஜாதாயத்தபா⁴வக³மனந்தி ஸஹஜாதே பச்சயத⁴ம்மே ஆயத்தபா⁴வஸ்ஸ க³மனம் பச்சயுப்பன்னஸ்ஸ அத்தனா ஸஹஜாதபச்சயாயத்தவுத்திதா. ஏத்த² ச ஸஹஜாதபச்சயஸங்கா²தம் ஸஹஜாதம் கரோதீதி ஸஹஜாதோ, ததா²பவத்தோ பச்சயுப்பன்னத⁴ம்மோ. தத்த² பவத்தமானோ ஸஹஜாதஸத்³தோ³ யஸ்மா தஸ்ஸ பச்சயுப்பன்னஸ்ஸ அத்தனா ஸஹஜாதம் பச்சயத⁴ம்மம் பச்சயம் கத்வா பவத்திம் ததா³யத்தபா⁴வூபக³மனஞ்ச வத³தீதி வுச்சதி, தஸ்மா வுத்தம் ‘‘ஸஹஜாதஸத்³தே³ன…பே… வுத்த’’ந்தி. தஸ்ஸ கரணஸ்ஸ க³மனஸ்ஸ வாதி தஸ்ஸ யதா²வுத்தஸ்ஸ ஸஹஜாதபச்சயகரணஸ்ஸ ஸஹஜாதாயத்தபா⁴வூபக³மனஸ்ஸ வா. ‘‘குஸலம் த⁴ம்மம் ஸஹஜாதோ’’தி இமஸ்ஸ குஸலம் த⁴ம்மம் ஸஹஜாதம் தம்ஸஹபா⁴விதஞ்ச பச்சயம் கத்வாதி அயமத்தோ²தி ஆஹ ‘‘குஸலாதீ³னம் கம்மபா⁴வதோ’’தி. ஸஹஜாதபச்சயஸஹபா⁴வீனம் பச்சயானம் ஸங்க³ண்ஹத்த²ஞ்ஹேத்த² ‘‘ஸஹஜாதாயத்தபா⁴வக³மனம் வா’’தி வுத்தம்.

தம்கம்மபா⁴வதோதி தேஸம் யதா²வுத்தபச்சயகரணததா³யத்தபா⁴வக³மனானம் கம்மபா⁴வதோ. அட்ட²கதா²யம் பன ‘‘குஸலம் த⁴ம்மம் ஸஹஜாதோதி குஸலம் த⁴ம்மம் படிச்ச தேன ஸஹஜாதோ ஹுத்வா’’தி படிச்சஸத்³த³ம் ஆஹரித்வா அத்தோ² வுத்தோ, தம் ‘‘படிச்சத்தோ² ஸஹஜாதத்தோ²’’தி கத்வா வுத்தம். ஸஹஜாதஸத்³த³யோகே³ குஸலம் த⁴ம்மந்தி உபயோக³வசனஸ்ஸ யுத்தி ந வுத்தா, ‘‘தேன ஸஹஜாதோ ஹுத்வா’’தி பன வுத்தத்தா கரணத்தே² உபயோக³வசனந்தி த³ஸ்ஸிதந்தி கேசி. நிஸ்ஸயவாரே பன குஸலம் த⁴ம்மம் நிஸ்ஸயத்தே²ன பச்சயம் கத்வாதி வத³ந்தேன இதா⁴பி ‘‘குஸலம் த⁴ம்மம் ஸஹஜாதத்தே²ன பச்சயம் கத்வா’’தி அயமத்தோ² வுத்தோயேவ ஹோதி, படிச்சஸத்³தா³ஹரணம்பி இமமேவத்த²ம் ஞாபேதீதி த³ட்ட²ப்³ப³ம். உபாதா³ரூபம் கிஞ்சி பூ⁴தரூபஸ்ஸ அனுபாலகம் உபத்த²ம்ப⁴கஞ்ச ஹோந்தம்பி ஸஹஜாதலக்க²ணேன ந ஹோதி, தஸ்மா படிச்சத்த²ம் ந ப²ரதீதி ஆஹ ‘‘படிச்சாதி இமினா வசனேன தீ³பிதோ பச்சயோ ந ஹோதீ’’தி. நித³ஸ்ஸனவஸேன வுத்தந்தி உதா³ஹரணவஸேன வுத்தம், ந அனவஸேஸதோதி அத்தோ². யதா²வுத்தோதி படிச்சத்த²ப²ரணவஸேன வுத்தோ. யதா² ச உபாதா³ரூபம் பூ⁴தரூபஸ்ஸ உபாதா³ரூபஸ்ஸ ச பச்சயோ ந ஹோதி, ஏவம் ட²பேத்வா ச² வத்தூ²னி ஸேஸரூபானி அரூபத⁴ம்மானம் பச்சயோ ந ஹோதீதி த³ஸ்ஸேந்தோ ‘‘வத்து²வஜ்ஜானி ரூபானி ச அரூபான’’ந்தி ஆஹ.

ஸஹஜாதவாரவண்ணனா நிட்டி²தா.