22-23-24. நத்தி²விக³தஅவிக³தபச்சயனித்³தே³ஸவண்ணனா

22-23. ஏத்தா²தி நத்தி²பச்சயே. நானந்தி நானத்தம். ஏதேனாதி அனந்தரபச்சயதோ நத்தி²பச்சயஸ்ஸ விஸேஸமத்ததீ³பனேன ‘‘பச்சயலக்க²ணமேவ ஹேத்த² நான’’ந்தி இமினா வசனேன. அத்தோ²தி த⁴ம்மோ. ப்³யஞ்ஜனஸங்க³ஹிதேதி ‘‘நத்தி²பச்சயோ விக³தபச்சயோ’’தி ஏவமாதி³ப்³யஞ்ஜனேன ஸங்க³ஹிதே. பச்சயலக்க²ணமத்தேதி ஏத்த² பவத்திஓகாஸதா³னேன உபகாரகா அரூபத⁴ம்மா, விக³தபா⁴வேன உபகாரகாதி ஏவமாதி³கே பச்சயானம் லக்க²ணமத்தே.

நத்தி²விக³தஅவிக³தபச்சயனித்³தே³ஸவண்ணனா நிட்டி²தா.

பச்சயனித்³தே³ஸவண்ணனா நிட்டி²தா.

பச்சயனித்³தே³ஸபகிண்ணகவினிச்ச²யகதா²வண்ணனா

ஆதி³மபாடோ²தி புரிமபாடோ². ததா² ச ஸதீதி தோ³ஸஸ்ஸபி ஸத்தரஸஹி பச்சயேஹி பச்சயபா⁴வே ஸதி. அதி⁴பதிபச்சயபா⁴வோபிஸ்ஸ அனுஞ்ஞாதோ ஹோதீதி ஆஹ ‘‘தோ³ஸஸ்ஸபி க³ருகரணம் பாளியம் வத்தப்³ப³ம் ஸியா’’தி. ‘‘ஸேஸான’’ந்தி வசனேனேவ நிவாரிதோதி கதா³சி ஆஸங்கேய்யாதி தம்னிவத்தனத்த²மாஹ ‘‘ந ச ஸேஸான’’ந்திஆதி³. புரேஜாதாதீ³ஹீதி புரேஜாதகம்மாஹாரஜா²னிந்த்³ரியமக்³க³விபாகபச்சயேஹி. தன்னிவாரணத்த²ந்தி தஸ்ஸ யதா²வுத்ததோ³ஸஸ்ஸ நிவாரணத்த²ம். விஸுஞ்ச அக்³க³ஹேத்வாதி லோப⁴மோஹா விபாகபச்சயாபி ந ஹோந்தி, ததா² தோ³ஸோதி ஏவம் விஸுஞ்ச அக்³க³ஹேத்வா. போ²ட்ட²ப்³பா³யதனம் காயவிஞ்ஞாணதா⁴துயா ஆரம்மணாதி³பச்சயோ ஹோந்தம்யேவ பத²வீஆதி³ஸபா⁴வத்தா அத்தனா ஸஹஜாதானம் ஸஹஜாதாதி³பச்சயா ஹோந்தியேவாதி வுத்தம் ‘‘போ²ட்ட²ப்³பா³யதனஸ்ஸ ஸஹஜாதாதி³பச்சயபா⁴வம் த³ஸ்ஸேதீ’’தி. ‘‘ஸப்³ப³த⁴ம்மான’’ந்தி ‘‘ஸப்³பே³ த⁴ம்மா மனோவிஞ்ஞாணதா⁴துயா தம்ஸம்பயுத்தகானஞ்ச த⁴ம்மானம் ஆரம்மணபச்சயேன பச்சயோ’’தி ஏத்த² வுத்தே ஸப்³ப³த⁴ம்மே ஸந்தா⁴யாஹ ‘‘ஸப்³ப³த⁴ம்மானம் யதா²யோக³ம் ஹேதாதி³பச்சயபா⁴வம் த³ஸ்ஸேதீ’’தி. ந ஹி ஏதம்…பே… பா⁴வத³ஸ்ஸனம், அத² கோ² ஏகத⁴ம்மஸ்ஸ அனேகபச்சயபா⁴வத³ஸ்ஸனம், தஸ்மா ‘‘ஏதேன போ²ட்ட²ப்³பா³யதனஸ்ஸா’’திஆதி³ வுத்தந்தி அதி⁴ப்பாயோ. ரூபாதீ³னந்தி ரூபாயதனாதீ³னம்.

பே⁴தா³தி விஸேஸா. பே⁴த³ம் அனாமஸித்வாதி சக்கு²விஞ்ஞாணதா⁴துஆதி³விஸேஸம் அக்³க³ஹேத்வா. தே ஏவாதி யதா²வுத்தவிஸேஸானம் ஸாமஞ்ஞபூ⁴தே க²ந்தே⁴ ஏவ. யம் ஸந்தா⁴ய ‘‘ஏவம் ந ஸக்கா வத்து’’ந்தி வுத்தம், தம் விபா⁴வேதும் ‘‘ந ஹீ’’திஆதி³ வுத்தம். பட்டா²னஸம்வண்ணனா ஹேஸாதி ஏதேன ஸுத்தே வுத்தபரியாயமக்³க³பா⁴வேனேத்த² ந ஸக்கா மிச்சா²வாசாதீ³னம் மக்³க³பச்சயம் வத்துந்தி த³ஸ்ஸேதி. ஸேஸபச்சயபா⁴வோதி மக்³க³பச்சயம் ட²பேத்வா யதா²வுத்தேஹி ஸேஸேஹி அட்டா²ரஸஹி பச்சயேஹி பச்சயபா⁴வோ. அதி⁴பதிபச்சயோ ந ஹோதீதி ஆரம்மணாதி⁴பதிபச்சயோ ந ஹோதி. தந்தி விசிகிச்ச²ம். தத்தா²தி யதா²வுத்தேஸு அஹிரிகாதீ³ஸு.

த³ஸதா⁴ பச்சயா ஹோந்தி, புன ததா² ஹத³யவத்து²ந்தி இத³ம் அத்த²மத்தவசனம். பாடோ² பன ‘‘ஹத³யவத்து² தேஸஞ்சேவ விப்பயுத்தஸ்ஸ ச வஸேன த³ஸதா⁴ பச்சயோ ஹோதீ’’தி வேதி³தப்³போ³. ரூபஸத்³த³க³ந்த⁴ரஸாயதனமத்தமேவாதி இத³ம் ரூபாதீ³னம் ஸஹஜாதபச்சயதாய விய நிஸ்ஸயபச்சயதாய ச அபா⁴வதோ, புரேஜாதபச்சயதாய ச பா⁴வதோ வுத்தம். ஏதானீதி யதா²வுத்தானி ரூபஸத்³த³க³ந்த⁴ரஸாரம்மணானி. ஸப்³பா³திக்கந்தபச்சயாபேக்கா²தி ‘‘ஏகத⁴ம்மஸ்ஸ அனேகபச்சயபா⁴வதோ’’தி ஏதஸ்மிம் விசாரே ஹேதுஆதி³அதிக்கந்தபச்சயாபேக்கா² ஏதேஸம் ரூபாதீ³னம் அபுப்³ப³தா நத்தி², அத² கோ² ஆரம்மணஆரம்மணாதி⁴பதிஆரம்மணூபனிஸ்ஸயபச்சயாபேக்கா². ந ஹி ரூபாதீ³னி ஹேதுஸஹஜாதாதி⁴பதிஆதி³வஸேன பச்சயா ஹோந்தீதி. தஸ்ஸாதி ரூபஜீவிதிந்த்³ரியஸ்ஸ புரேஜாதபச்சயபா⁴வதோ அபுப்³ப³தா, தஸ்மா தம் ஏகூனவீஸதிவிதோ⁴ பச்சயோ ஹோதீதி வுத்தம் ஹோதி. ஸத்ததா⁴ பச்சயபா⁴வோ யோஜேதப்³போ³, ந ஹி ஓஜா புரேஜாதபச்சயோ ந ஹோதீதி.

அத்தோ²தி வா ஹேதுஆதி³த⁴ம்மானம் ஸபா⁴வோ வேதி³தப்³போ³. ஸோ ஹி அத்தனோ பச்சயுப்பன்னேஹி அரணீயதோ உபக³ந்தப்³ப³தோ, ஞாணேன வா ஞாதப்³ப³தோ ‘‘அத்தோ²’’தி வுச்சதி. ஆகாரோதி தஸ்ஸேவ பவத்திஆகாரோ, யேன அத்தனோ பச்சயுப்பன்னானம் பச்சயபா⁴வம் உபக³ச்ச²தீதி ஏவமேத்த² அத்தோ² த³ட்ட²ப்³போ³. தம் பன விப்பயுத்தம். ‘‘ஸத்தஹாகாரேஹீ’’தி படா²னஸ்ஸ காரணமாஹ ‘‘உக்கட்ட²பரிச்சே²தோ³ ஹீ’’திஆதி³னா.

யம் கம்மபச்சயோ…பே… த³ட்ட²ப்³ப³ம் ஆஸேவனகம்மபச்சயானம் பச்சயுப்பன்னஸ்ஸ அனந்தரட்டா²னதாய. ஸஹஜாதம்பி ஹி அனந்தரமேவாதி. கோசி பனேத்தா²தி ஏத்த² ஏதஸ்மிம் பகதூபனிஸ்ஸயஸமுதா³யே கோசி ததே³கதே³ஸபூ⁴தோ கம்மஸபா⁴வோ பகதூபனிஸ்ஸயோதி அத்தோ². தத்தா²தி ‘‘யதி³த³ம் ஆரம்மணபுரேஜாதே பனேத்த² இந்த்³ரியவிப்பயுத்தபச்சயதா ந லப்³ப⁴தீ’’தி வுத்தம், தஸ்மிம், தஸ்மிம் வா ஆரம்மணபுரேஜாதக்³க³ஹணே. வத்து²ஸ்ஸ விப்பயுத்தபச்சயதா லப்³ப⁴தீதி ந வத்தப்³பா³. ந ஹி ஆரம்மணபூ⁴தம் வத்து² விப்பயுத்தபச்சயோ ஹோதி, அத² கோ² நிஸ்ஸயபூ⁴தமேவாதி. இதோ உத்தரீதி ஏத்த² ‘‘இதோ’’தி இத³ம் பச்சாமஸனம் புரேஜாதம் வா ஸந்தா⁴ய ஆரம்மணபுரேஜாதம் வா. தத்த² பட²மனயம் அபேக்கி²த்வா வுத்தம் ‘‘புரேஜாததோ பரதோபீ’’தி. தேன கம்மாதி³பச்சயேஸுபி வக்க²மானேஸு லப்³ப⁴மானாலப்³ப⁴மானம் வேதி³தப்³ப³ந்தி வுத்தம் ஹோதி. து³தியம் பன நயம் அனபேக்கி²த்வா அட்ட²கதா²யம் ஆக³தவஸேன வுத்தம் ‘‘இதோ வா இந்த்³ரியவிப்பயுத்ததோ’’தி, அத்தனா வுத்தனயேன பன ‘‘நிஸ்ஸயிந்த்³ரியவிப்பயுத்ததோ வா’’தி. தத்த² வத்தப்³ப³ம் ஸயமேவாஹ ‘‘ஆரம்மணாதி⁴பதீ’’திஆதி³. கம்மாதீ³ஸு லப்³ப⁴மானாலப்³ப⁴மானம் ந வக்க²தி ‘‘இதோ உத்தரீ’’திஆதி³னா பகே³வ அதிதே³ஸஸ்ஸ கதத்தா, தஸ்மா புரிமோயேவ புரேஜாததோபீதி வுத்தஅத்தோ²யேவ அதி⁴ப்பேதோ.

‘‘மக்³க³பச்சயதம் அவிஜஹந்தோவா’’தி இமினா ச மக்³க³பச்சயோ வுத்தோதி ‘‘மக்³க³வஜ்ஜானம் நவன்ன’’ந்தி வுத்தம் பச்சி²மபாடே², புரிமபாடே² பன ‘‘மக்³க³பச்சயதம் அவிஜஹந்தோவா’’தி வுத்தத்தா ஏவ மக்³க³பச்சயேன ஸத்³தி⁴ம் ஸஹஜாதாதி³பச்சயா க³ஹேதப்³பா³தி ‘‘த³ஸன்ன’’ந்தி வுத்தம். தத்த² பச்சி²மபாடே² ‘‘ஏகாத³ஸஹாகாரேஹீ’’தி வத்தப்³ப³ம், புரிமபாடே² ‘‘த்³வாத³ஸஹீ’’தி.

ஸமனந்தரனிருத்³த⁴தாய ஆரம்மணபா⁴வேன சாதி விஜ்ஜமானம்பி விஸேஸமனாமஸித்வா கேவலம் ஸமனந்தரனிருத்³த⁴தாய ஆரம்மணபா⁴வேன, ந ச ஸமனந்தரனிருத்³த⁴தாஆரம்மணபா⁴வஸாமஞ்ஞேனாதி அத்தோ². ‘‘இமினா உபாயேனா’’தி பச்சயஸபா⁴க³தாத³ஸ்ஸனேன பச்சயவிஸபா⁴க³தாத³ஸ்ஸனேன ச வுத்தம் பத³த்³வயம் ஏகஜ்ஜ²ம் கத்வா பது³த்³தா⁴ரோ கதோதி த³ஸ்ஸேந்தோ ‘‘ஹேதுஆதீ³னம் ஸஹஜாதானம்…பே… யோஜேதப்³பா³’’தி ஆஹ. ஹேதுஆரம்மணாதீ³னம் ஸஹஜாதாஸஹஜாதபா⁴வேன அஞ்ஞமஞ்ஞவிஸபா⁴க³தாதி யோஜனா. ஏவமாதி³னாதி ஆதி³-ஸத்³தே³ன புரேஜாதானம் சக்கா²தீ³னம் ரூபாதீ³னஞ்ச புரேஜாதபா⁴வேன ஸபா⁴க³தா, பவத்தியம் வத்து²க²ந்தா⁴தீ³னம் புரேஜாதபச்சா²ஜாதானம் புரேஜாதபச்சா²ஜாதபா⁴வேன விஸபா⁴க³தாதி ஏவமாதீ³னம்பி ஸங்க³ஹோ த³ட்ட²ப்³போ³. ஹேதுனஹேதுஆதி³பா⁴வதோபி சேத்த² யுக³ளகதோ விஞ்ஞாதப்³போ³ வினிச்ச²யோ. ஹேதுபச்சயோ ஹி ஹேதுபா⁴வேன பச்சயோ, இதரே தத³ஞ்ஞபா⁴வேன. ஏவமிதரேஸுபி யதா²ரஹம் யுக³ளகதோ வேதி³தப்³போ³.

உப⁴யப்பதா⁴னதாதி ஜனனோபத்த²ம்ப⁴னப்பதா⁴னதா. டா²னந்தி பத³ஸ்ஸ அத்த²வசனம் காரணபா⁴வோதி வினாபி பா⁴வபச்சயம் பா⁴வபச்சயஸ்ஸ அத்தோ² ஞாயதீதி. உபனிஸ்ஸயம் பி⁴ந்த³ந்தேனாதி அனந்தரூபனிஸ்ஸயபகதூபனிஸ்ஸயவிபா⁴கே³ன விப⁴ஜந்தேன. தயோபி உபனிஸ்ஸயா வத்தப்³பா³ உபனிஸ்ஸயவிபா⁴க³பா⁴வதோ. உபனிஸ்ஸயக்³க³ஹணமேவ காதப்³ப³ம் ஸாமஞ்ஞரூபேன. தத்தா²தி ஏவமவட்டி²தே அனந்தரூபனிஸ்ஸயபகதூபனிஸ்ஸயோதி பி⁴ந்த³னம் விபா⁴க³கரணம் யதி³ பகதூபனிஸ்ஸயஸ்ஸ ரூபானம் பச்சயத்தாபா⁴வத³ஸ்ஸனத்த²ம், நனு ஆரம்மணூபனிஸ்ஸயஅனந்தரூபனிஸ்ஸயாபி ரூபானம் பச்சயா ந ஹோந்தியேவாதி? ஸச்சம் ந ஹோந்தி, தே பன த³ஸ்ஸிதனயாதி ததே³கதே³ஸேன இதரம்பி த³ஸ்ஸிதமேவ ஹோதீதி இமமத்த²ம் த³ஸ்ஸேந்தோ ‘‘ஆரம்மணம்…பே… த³ட்ட²ப்³ப³’’ந்தி ஆஹ. தம்ஸமானக³திகத்தாதி தேஹி அனந்தராதீ³ஹி ஸமானக³திகத்தா அரூபானம்யேவ பச்சயபா⁴வதோ. தந்தி புரேஜாதபச்சயம். தத்தா²தி அனந்தராதீ³ஸு படி²த்வா.

பச்சயனித்³தே³ஸபகிண்ணகவினிச்ச²யகதா²வண்ணனா நிட்டி²தா.