21. அத்தி²பச்சயனித்³தே³ஸவண்ணனா

21. யஸ்மிம் ஸதி யம் ஹோதி, அஸதி ச ந ஹோதி, ஸோ தஸ்ஸ பச்சயோதி யதி³த³ம் ஸமாஸதோ பச்சயலக்க²ணம் யம் ஸந்தா⁴ய ஸுத்தே வுத்தம் ‘‘இமஸ்மிம் ஸதி இத³ம் ஹோதி, இமஸ்மிம் அஸதி இத³ம் ந ஹோதீ’’தி, தயித³ம் அத்தி²பச்சயே யோஜேத்வா த³ஸ்ஸேந்தோ ‘‘யோ ஹீ’’திஆதி³ம் வத்வா அயஞ்ச நயோ நிப்³பா³னே ந லப்³ப⁴தி, தஸ்மா நிப்³பா³னம் அத்தி²பச்சயபா⁴வேன ந உத்³த⁴டந்தி த³ஸ்ஸேதும் ‘‘நிப்³பா³னஞ்ச…பே… உபகாரகம் ஹோதீ’’தி ஆஹ. தேன பச்சயத⁴ம்மானம் பச்சயபா⁴வோ விஸேஸதோ ப்³யதிரேகமுகே²ன பாகடோ ஹோதீதி த³ஸ்ஸேதி. நத்தி²பா⁴வோபகாரகதாவிருத்³தோ⁴தி நத்தி²பச்சயபா⁴வவிருத்³தோ⁴. விக³தாவிக³தபச்சயா விய ஹி அஞ்ஞமஞ்ஞம் உஜுபச்சனீகபா⁴வேன டி²தா நத்தி²அத்தி²பச்சயா. ந நிப்³பா³னம் அத்தி²பச்சயோ நத்தி²பா⁴வோபகாரகதாஅவிரோத⁴தோ. யே ஹி அத்தி²பச்சயத⁴ம்மா, தே நத்தி²பா⁴வோபகாரகதாவிருத்³தா⁴ ஏவ தி³ட்டா²தி அதி⁴ப்பாயோ.

ஸதி ச உப்பன்னத்தேதி ஸம்ப³ந்தோ⁴. யேஸம் பச்சயா ஹோந்தி ஆஹாரிந்த்³ரியாதி யோஜனா. ஏகதோதி ஸஹ. ஸஹஜாதாதி³பச்சயத்தாபா⁴வதோதி ஸஹஜாதபுரேஜாதபச்சா²ஜாதபச்சயத்தாபா⁴வதோ. தத³பா⁴வோதி ஸஹஜாதாதி³பச்சயத்தாபா⁴வோ. ஏதேஸந்தி அத்தி²பச்சயதாவஸேன பவத்தமானானம் ஆஹாரிந்த்³ரியானம். த⁴ம்மஸபா⁴வவஸேனாதி த⁴ம்மதாவஸேன. த⁴ம்மதா ஹேஸா, யதி³த³ம் பச்சயுப்பன்னேஹி ஸஹ புரேதரம் பச்சா² ச லப்³ப⁴மானா ஆஹாரிந்த்³ரியா தேஸம் அத்தி²பச்சயா ஹோந்தி, ந ஸஹஜாதாதி³பச்சயாதி. யதா² வா சக்கா²தி³த்³வாரானம் ரூபாதி³ஆரம்மணானம் ஸதிபி நியதவுத்திதாய த்³வாராரம்மணதோ விஞ்ஞாணஸ்ஸ ச²ப்³பி³த⁴பா⁴வே ஆரம்மணமனாமஸித்வா, த்³வாரதோ த்³வாரமனாமஸித்வா ஆரம்மணதோ ச²ப்³பி³த⁴தா வுச்சதி, ஏவமிதா⁴பி ஆஹாரிந்த்³ரியானம் பச்சயுப்பன்னேஹி ஸதிபி ஸஹஜாதாதி³பா⁴வே அரூபக்க²ந்தா⁴தி³வஸேன ஸஹஜாதாதி³பே⁴த³பி⁴ன்னஸ்ஸ அத்தி²பச்சயஸ்ஸ த³ஸ்ஸிதத்தா பஞ்ஹாவாரே ஆஹாரிந்த்³ரியானம் வஸேன ஆக³தே சதுத்த²பஞ்சமகோட்டா²ஸபூ⁴தே அத்தி²பச்சயவிஸேஸே ஸஹஜாதாதி³பே⁴த³ம் ஆமஸிதும் ந லப்³ப⁴தீதி த³ஸ்ஸேதும் அட்ட²கதா²யம் ‘‘ஆஹாரோ இந்த்³ரியஞ்ச ஸஹஜாதாதி³பே⁴த³ம் ந லப⁴தீ’’தி வுத்தம், ந பன ஆஹாரிந்த்³ரியேஸு ஸஹஜாதாதி³பா⁴வஸ்ஸ அபா⁴வதோ. ஏவம்பேத்த² அத்தோ² த³ட்ட²ப்³போ³.

அத்தி²பச்சயனித்³தே³ஸவண்ணனா நிட்டி²தா.