16. இந்த்³ரியபச்சயனித்³தே³ஸவண்ணனா

16. ‘‘மிஸ்ஸகத்தா’’தி இத³ம் இந்த்³ரியதாய ரூபாரூபஜீவிதிந்த்³ரியானம் ஏகஜ்ஜ²ம் கத்வா தே³ஸிததம் ஸந்தா⁴ய வுத்தம், தஸ்மா மிஸ்ஸகத்தாதி ரூபஜீவிதிந்த்³ரியமிஸ்ஸகத்தாதி அத்தோ². ஜீவிதிந்த்³ரியந்தி அரூபஜீவிதிந்த்³ரியம். ந ஸப்³பே³ன ஸப்³ப³ம் வஜ்ஜிதப்³ப³ந்தி யதா² பஞ்ஹாபுச்ச²கே அரூபஜீவிதிந்த்³ரியம் மிஸ்ஸகத்தா ந க³ஹிதம், ந ஏவமித⁴ அரூபஜீவிதிந்த்³ரியம் அக்³க³ஹிதந்தி அத்தோ².

அரூபானம் சக்கு²விஞ்ஞாணாதீ³னம் பச்சயந்தராபேக்கா²னி ஆவஜ்ஜனாரம்மணாதி³அஞ்ஞபச்சயஸாபேக்கா²னி இந்த்³ரியபச்சயா ஸியும் சக்கா²தீ³னம் ரூபாரூபானம் அஞ்ஞமஞ்ஞம் கதா³சிபி அவினிப்³பு⁴த்தபா⁴வஸ்ஸ அபா⁴வதோ, பச்சயந்தரஸமோதா⁴னாபேக்க²தாய ச. யோ பன நிரபேக்கோ²தி யதா² சக்கா²தீ³னி பச்சயந்தரேஸு ஸாபேக்கா²னி, ஏவம் ஸாபேக்கோ² அஹுத்வா யோ தத்த² நிரபேக்கோ² இந்த்³ரியபச்சயோ ஹோதி அவினிப்³பு⁴த்தத⁴ம்மானம் யதா² து³வித⁴ம்பி ஜீவிதிந்த்³ரியம், ஸோ அத்தனோ…பே… நத்தீ²தி யோஜனா. அவினிப்³பு⁴த்தானம் தேஸம்பி லிங்கா³தீ³னம் ஸியும் வினிப்³பு⁴த்தானம் பச்சயுப்பன்னானம் இந்த்³ரியபச்சயதாபா⁴வஸ்ஸ அதி³ட்ட²த்தா. நனு சக்கா²தீ³னம் வினிப்³பு⁴த்தானம் இந்த்³ரியபச்சயபா⁴வோ தி³ட்டோ²தி? ஸச்சம் தி³ட்டோ², ந பன ஸோ ஸமானஜாதியாதி த³ஸ்ஸேந்தோ ‘‘ந ஹீ’’திஆதி³மாஹ. ஸதி சேவந்தி ஏவம் வுத்தப்பகாரே ஸமானஜாதியம்யேவ அவினிப்³பு⁴த்தஸ்ஸ இந்த்³ரியபச்சயபா⁴வே ஸதி இத்தி²புரிஸிந்த்³ரியேஹி ஸத்³தி⁴ம். ஸஹயோகே³ ஹி இத³ம் கரணவசனம். யதி³பி இத்தி²புரிஸிந்த்³ரியானி லிங்கா³தீ³னம் கலலாதி³காலே இந்த்³ரியபச்சயதம் ந ப²ரேய்யும் தேஸம் ததா³ அபா⁴வதோ. யே பன ரூபத⁴ம்மா ததா³ ஸந்தி, தேஹி அவினிப்³பு⁴த்தாவ, தேஸம் கஸ்மா ந ப²ரந்தீதி ஆஹ ‘‘அஞ்ஞேஸம் பனா’’திஆதி³. அபீ³ஜபா⁴வதோ அனிமித்தபா⁴வதோ. தத³னுரூபானந்தி கலலாதி³அவத்தா²னுரூபானம் அத்தி²தம் இச்ச²ந்தி, யதோ ‘‘இத்தீ², புரிஸோ’’தி பகதிவிபா⁴கோ³ விஞ்ஞாயதீதி தேஸம் அதி⁴ப்பாயோ.

குஸலஜாதியந்தி நித்³தா⁴ரணே பு⁴ம்மம். யே பன ‘‘குஸலஜாதிக’’ந்தி பட²ந்தி, தேஸம் பச்சத்தேகவசனம். விஸும் ஏகஜாதி வா பூ⁴மி வா ந ஹோதி ததே³கதே³ஸபா⁴வதோ. ஹேதுஆதீ³ஸுபீதி ஆதி³-ஸத்³தே³ன ‘‘அகுஸலாஹாரேஸுபி ஏஸேவ நயோ’’தி ஏவமாதி³கம் ஸங்க³ண்ஹாதி. ஏஸ நயோதி ய்வாயம் ‘‘பூ⁴மிவஸேன வுத்தேஸூ’’திஆதி³னா அரூபே அலப்³ப⁴மானஸ்ஸ இந்த்³ரியபச்சயஸ்ஸ அட்ட²பனே அத்த²னயோ வுத்தோ, ஏஸ நயோ யோஜேதப்³போ³தி. ததா² அபரியாபன்னகுஸலஹேது, ததா² அகுஸலஹேதூதி ஏத்தா²பி பட²மாபரியாபன்னகுஸலஹேது தோ³மனஸ்ஸஸஹக³தாகுஸலஹேது ச விஸும் ஏகஜாதி பூ⁴மி வா ந ஹோந்தீதி ஆருப்பே அலப்³ப⁴மானாபி விஸும் ந ட²பிதாதி யோஜேதப்³போ³. ஏஸ நயோ ‘‘அகுஸலாஹாரேஸுபி ஏஸேவ நயோ’’தி ஏவமாதீ³ஸு.

ஸதி ஸஹஜாதபச்சயத்தே உப்பாத³க்க²ணேபி இந்த்³ரியபச்சயதா ஸியாதி கத்வா வுத்தம் ‘‘ஸஹஜாதபச்சயத்தாபா⁴வம் ஸந்தா⁴யா’’தி. வுத்தஞ்ஹி ‘‘உப்பஜ்ஜமானோ ஸஹ உப்பஜ்ஜமானபா⁴வேன உபகாரகோ த⁴ம்மோ ஸஹஜாதபச்சயோ’’தி (பட்டா². அட்ட². பச்சயுத்³தே³ஸவண்ணனா). தஸ்ஸ பன ஸஹஜாதபச்சயத்தாபா⁴வோ யதி³பி அட்ட²கதா²யம் ‘‘ஸஹஜாதபச்சயதா பன தஸ்ஸ நத்தீ²’’தி ஸரூபேனேவ த³ஸ்ஸிதோ, ததா²பி தம் அனனுஜானந்தோ ‘‘உப்பாத³…பே… நிவாரேது’’ந்தி வத்வா ‘‘வக்க²தீ’’திஆதி³னா தமத்த²ம் ஸமத்தே²தி. கம்மபச்சயஸதி³ஸந்தி ஹி ஏதேன தஸ்ஸ உப்பாத³க்க²ணே பச்சயபா⁴வோ பகாஸிதோ. பவத்தேசாதி ச-ஸத்³தே³ன படிஸந்தி⁴யஞ்ச கடத்தாரூபஸ்ஸ ரூபஜீவிதிந்த்³ரியதோ அஞ்ஞோ இந்த்³ரியபச்சயோ ந ஹி அத்தீ²தி யோஜனா. படிச்சவாராத³யோ ஸம்பயுத்தவாரபரியோஸானா ச² வாரா உப்பாத³க்க²ணமேவ க³ஹேத்வா பவத்தா ‘‘குஸலம் த⁴ம்மம் படிச்ச குஸலோ த⁴ம்மோ உப்பஜ்ஜதி ஹேதுபச்சயா’’திஆதி³னா, ந டி²திக்க²ணந்தி அதி⁴ப்பாயோ. ஏவஞ்ச கத்வாதி உப்பாத³க்க²ணமேவ க³ஹேத்வா பவத்தத்தா. ஏதேஸூதி யதா²வுத்தேஸு ச²ஸு வாரேஸு. கேசி பன ‘‘ரூபஜீவிதிந்த்³ரியஸ்ஸ அனுபாலனம் உப்பாத³க்க²ணே ந பாகடம் ப³லவஞ்ச யதா² டி²திக்க²ணே பச்சா²ஜாதாதி³பச்சயலாப⁴தோ தி²ரபா⁴வப்பத்தியாஸ்ஸ தம் பாகடம் ப³லவஞ்ச, தஸ்மா ‘டி²திக்க²ணே’தி வுத்த’’ந்தி வத³ந்தி.

இந்த்³ரியபச்சயனித்³தே³ஸவண்ணனா நிட்டி²தா.