17. ஜா²னபச்சயனித்³தே³ஸவண்ணனா

17. ஸோமனஸ்ஸதோ³மனஸ்ஸஸங்கா²தானீதி ஸோமனஸ்ஸதோ³மனஸ்ஸபரியாயேன வுத்தானி, ஜா²னங்க³பா⁴வவிஸேஸனதோ வா ஸோமனஸ்ஸதோ³மனஸ்ஸபூ⁴தானேவ ஸுக²து³க்கா²னி ஜா²னங்கா³னி, ந இதரஸுக²து³க்கா²னீதி ஜா²னங்க³பூ⁴தானம்யேவ ஸுக²து³க்கா²னம் ஜா²னங்க³பா⁴வத³ஸ்ஸனத்த²ம் ஸோமனஸ்ஸதோ³மனஸ்ஸக்³க³ஹணம் கதம். இதா³னி யதா²வுத்தமேவ ‘‘த்³விபஞ்சவிஞ்ஞாணேஸூ’’திஆதி³னா வித்தா²ரதோ விபா⁴வேதி, தம் ஸுவிஞ்ஞேய்யமேவ. தேனாதி விஸேஸனபூ⁴தேன ஸோமனஸ்ஸதோ³மனஸ்ஸக்³க³ஹணேன.

அபி⁴னிபாதமத்தத்தாதி ஆரம்மணகரணமத்தபா⁴வதோ. சிந்தனாபவத்தியா உபனிஜ்ஜா²யனபவத்தியா. யதா²வுத்தேனேவ காரணேனாதி ‘‘உபனிஜ்ஜா²னாகாரஸ்ஸ அபா⁴வதோ’’தி ஏதேன காரணேன. புப்³பே³திஆதி³தோ. சத்தாரி அங்கா³னி வஜ்ஜிதானீதி ஸத்தஸு அங்கே³ஸு த³ஸ்ஸியமானேஸு சத்தாரி அங்கா³னி வஜ்ஜிதானி. அட்ட²கதா² ஹேஸாதி லேஸேன அபகாஸேதப்³ப³தாய காரணமாஹ. தீஸுபி ஏகமேவ வத்தப்³ப³ம் ஸியா, தம்ஸமானலக்க²ணதாய இதரேஸம் திண்ணம்பி க³ஹணம் ஹோதீதி. திண்ணம் பன வசனேனாதி உபேக்கா²ஸுக²து³க்கா²னம் அஜா²னங்க³தாத³ஸ்ஸனத்தே²ன வசனேன. ததோ உபேக்கா²தி³தோ அஞ்ஞஸ்ஸ த⁴ம்மஸ்ஸ சித்தேகக்³க³தாய ஜா²னங்க³ந்தி உத்³த⁴டபா⁴வோ ஆபஜ்ஜதி அஜா²னங்கே³ஸு அக்³க³ஹிதத்தா. யதா²வுத்தகாரணதோதி ‘‘உபனிஜ்ஜா²னாகாரஸ்ஸ அபா⁴வதோ’’தி வுத்தகாரணதோ அஞ்ஞேன காரணேன அனுத்³த⁴டபா⁴வோ வா ஆபஜ்ஜதி அனுபனிஜ்ஜா²யனஸபா⁴வேஹி ஸத்³தி⁴ம் அக்³க³ஹிதத்தா உபனிஜ்ஜா²யனாகாரபா⁴வதோ அஞ்ஞேனேவ காரணேன சித்தேகக்³க³தாய பாளியம் அனுத்³த⁴டபா⁴வோ ஆபஜ்ஜதி. தம்தோ³ஸபரிஹரணத்த²ந்தி யதா²வுத்ததோ³ஸவினிமோசனத்த²ம்.

யே பனாதிஆதி³ பத³காரமத்தத³ஸ்ஸனம். ஸோமனஸ்ஸாதீ³ஹீதி ஸோமனஸ்ஸதோ³மனஸ்ஸஜா²னங்கு³பேக்கா²ஹி. அவிபூ⁴தபா⁴வோ உபேக்க²னம். உபேக்கா² ஹி அவிபூ⁴தகிச்சா வுத்தா. ஸமானானம் கேஸம்? ஸுகா²தீ³னம், கேஹி? ஸோமனஸ்ஸாதீ³ஹி, கத²ம்? ஸுக²…பே… யுத்ததாதி யோஜனா. ந சித்தேகக்³க³தாயாதி ஸுகா²தீ³ஹி, தத³ஞ்ஞேஹி அபி⁴னிரோபனாதீ³ஹி ச அனிந்த்³ரியகிச்சதாய ச அனுபனிஜ்ஜா²யனகிச்சதாய ச அஸமானதாய பஞ்சவிஞ்ஞாணேஸு சித்தேகக்³க³தாய ஜா²னங்க³ந்தி அனுத்³த⁴டபா⁴வே காரணம் ந வத்தப்³ப³ந்தி. ஸாதி சித்தேகக்³க³தா. ஏத்தா²தி ‘‘உபேக்கா²ஸுக²து³க்கா²னீ’’தி ஏதஸ்மிம் அட்ட²கதா²வசனே ந க³ஹிதா. விசிகிச்சா²யுத்தமனோதா⁴துஆதீ³ஸூதி விசிகிச்சா²ஸம்பயுத்தசித்தே மனோதா⁴துயா ஸம்படிச்ச²னாதீ³ஸு ச. தஸ்ஸாபி சித்தேகக்³க³தாயபி.

ஜா²னபச்சயனித்³தே³ஸவண்ணனா நிட்டி²தா.