3. பரிஞ்ஞாவாரவண்ணனா

206-208. தஸ்ஸாபீதி புக்³க³லோகாஸவாரஸ்ஸபி. ஓகாஸே புக்³க³லஸ்ஸேவாதி யதா²க³ஹிதே ஓகாஸே யோ புக்³க³லோ, தஸ்ஸேவ ஓகாஸவிஸிட்ட²புக்³க³லஸ்ஸேவாதி அத்தோ². யதா² பன புக்³க³லவாரே லப்³ப⁴மானே புக்³க³லோகாஸவாரோபி லப்³ப⁴தி, ஏவம் ஓகாஸவாரோபி லப்³பே⁴ய்யாதி சோத³னம் ஸந்தா⁴யாஹ ‘‘ஓகாஸவாரோபி சா’’தி. தஸ்மாதி யஸ்மா வுச்சமானோபி ஓகாஸோ புக்³க³லஸ்ஸ விஸேஸபா⁴வேனேவ வுச்சேய்ய, ந விஸும், தஸ்மா.

அஞ்ஞதா²தி பவத்திவாரே விய ஆதா³னனிக்கே²பபரிச்சி²ன்னம் கம்மஜஸந்தானம் ஏகத்தேன க³ஹேத்வா தஸ்ஸ உப்பாத³னிரோத⁴வஸேன பரிஞ்ஞாவசனே. ‘‘யோ ரூபக்க²ந்த⁴ம் பரிஜானாதீ’’தி ஸன்னிட்டா²னபத³ஸங்க³ஹிதத்தா²பா⁴வத³ஸ்ஸனமுகே²ன இதரஸ்ஸபி அபா⁴வம் த³ஸ்ஸேதும் ‘‘ருபக்க²ந்த⁴பரிஜானனஸ்ஸ அபா⁴வா’’தி வுத்தம். ‘‘ஆமந்தா’’தி ச கதம், தஸ்மா பவத்தே சித்தக்க²ணவஸேனேவேத்த² தயோ அத்³தோ⁴ லப்³ப⁴ந்தீதி அத்தோ². ‘‘அக்³க³மக்³க³ஸமங்கி³ஞ்ச அரஹந்தஞ்சா’’தி த்³வின்னம் பதா³னம் ‘‘ரூபக்க²ந்த⁴ஞ்ச ந பரிஜானந்தி வேத³னாக்க²ந்த⁴ஞ்ச ந பரிஜானித்தா²’’தி த்³வீஹி பதே³ஹி யதா²க்கமம் ஸம்ப³ந்தோ⁴. ‘‘ட²பேத்வா அவஸேஸா புக்³க³லா’’தி பன பச்சேகம் யோஜேதப்³ப³ம். அக்³க³மக்³க³…பே… நத்தீ²தி இமினா அரஹத்தமக்³க³ஞாணஸ்ஸேவ பரிஞ்ஞாமத்த²கப்பத்தியா பரிஞ்ஞாகிச்சம் ஸாதிஸயம், தத³பா⁴வா ந இதரேஸந்தி த³ஸ்ஸேதி. யதோ தஸ்ஸேவ வஜிரூபமதா வுத்தா, ஸேஸானஞ்ச விஜ்ஜூபமதா. தேனாதி தேன யதா²வுத்தேன வசனேன. தத³வஸேஸஸப்³ப³புக்³க³லேதி ததோ அக்³க³மக்³க³ஸமங்கி³தோ அவஸேஸஸப்³ப³புக்³க³லே. இமம் பன யதா²வுத்ததோ³ஸம் பரிஹரந்தா ‘‘புது²ஜ்ஜனாத³யோ ஸந்தா⁴யா’’தி வத³ந்தி.

பரிஞ்ஞாவாரவண்ணனா நிட்டி²தா.

க²ந்த⁴யமகவண்ணனா நிட்டி²தா.