3. காமகு³ணகதா²வண்ணனா

510. ஸப்³பே³பீதி குஸலாகுஸலக்க²ந்தா⁴த³யோபி. தேஸம்பி ஹி ஆலம்ப³னத்தி²கதாலக்க²ணஸ்ஸ கத்துகம்யதாச²ந்த³ஸ்ஸ வஸேன ஸியா கமனட்ட²தாதி அதி⁴ப்பாயோ. தா⁴துகதா²யம் ‘‘காமப⁴வோ பஞ்சஹி க²ந்தே⁴ஹி ஏகாத³ஸஹி ஆயதனேஹி ஸத்தரஸஹி தா⁴தூஹி ஸங்க³ஹிதோ. கதிஹி அஸங்க³ஹிதோ? ந கேஹிசி க²ந்தே⁴ஹி ஏகேனாயதனேன ஏகாய தா⁴துயா அஸங்க³ஹிதோ’’தி ஆக³தத்தா ஆஹ ‘‘உபாதி³ன்னக்க²ந்தா⁴னமேவ காமப⁴வபா⁴வோ தா⁴துகதா²யம் த³ஸ்ஸிதோ’’தி. பஞ்சாதி க³ணனபரிச்சே²தோ³, தத³ஞ்ஞக³ணனனிவத்தனத்தோ²தி ‘‘பஞ்ச காமகு³ணா’’தி வசனம் ததோ அஞ்ஞேஸம் தப்³பா⁴வம் நிவத்தேதீதி ஆஹ ‘‘பஞ்சேவ காமகோட்டா²ஸா காமோதி வுத்தா’’தி. ததோ ஏவ காமதா⁴தூதி வசனம் ந அஞ்ஞஸ்ஸ நாமம், தேஸம்யேவ நாமந்தி அத்தோ². தயித³ம் பரவாதி³னோ மதிமத்தந்தி வுத்தம் ‘‘இமினா அதி⁴ப்பாயேனா’’தி. ஏவம் வசனமத்தந்தி ஏவம் ‘‘பஞ்சிமே காமகு³ணா’’தி வசனமத்தம் நிஸ்ஸாய, ந பனத்த²ஸ்ஸ அவிபரீதம் அத்த²ந்தி அத்தோ².

காமகு³ணகதா²வண்ணனா நிட்டி²தா.