7. தி³ப்³ப³சக்கு²கதா²வண்ணனா

373. விஸினோதி விஸேஸேன ப³ந்த⁴தி விஸயீனம் அத்தபடிப³ந்த⁴ம் கரோதீதி விஸயோ, ஆரம்மணம், அனுப⁴வதி ஏதேனாதி ஆனுபா⁴வோ, ஸாமத்தி²யம், ப³லந்தி அத்தோ², கோ³சரகரணம் கோ³சரோ, விஸயே ஆனுபா⁴வகோ³சரா விஸய…பே… சராதி. தேஹி யதா² விஸிட்ட²ம் விஸேஸம் ஹோதி, ததா² பச்சயபூ⁴தேன ஜா²னத⁴ம்மேன ஆஹிதப³லம் கதப³லாதா⁴னம். விஸயக்³க³ஹணஞ்சேத்த² ஆனுபா⁴வகோ³சரகரணானம் பவத்திட்டா²னத³ஸ்ஸனம் யத்த²ஸ்ஸ தேஹி உபத்த²த்³த⁴த்தா ப³லாதா⁴னம் பாகடம் ஹோதி. தேனாஹ ‘‘யாதி³ஸே விஸயே’’திஆதி³. ப³லாதா⁴னஞ்ச உத்தரிமனுஸ்ஸத⁴ம்மதோ மஹக்³க³தத⁴ம்மவிஸேஸதோ உப்பன்னேஹி பணீதேஹி சித்தஜரூபேஹி விஸேஸாபத்தி. யம் நிஸ்ஸாய பராவுத்தீதி ஏகே வத³ந்தி. புரிமம் மம்ஸசக்கு²மத்தமேவாதி யதா²வுத்தப³லாதா⁴னதோ புரிமம் மம்ஸசக்கு²மத்தமேவ. வத³ந்தோ ஸங்க³ஹகாரோ. விஸயக்³க³ஹணம் பாளியம் கதம். ந விஸயவிஸேஸத³ஸ்ஸனத்த²ந்தி ந விஸயஸ்ஸ விஸேஸத³ஸ்ஸனத்த²ம். யதோ உபி⁴ன்னம்பி ரூபாயதனமேவ விஸயோதி விஸயஸ்ஸ ஸதி³ஸதம் அவிஸேஸம் ஆஹ, ஸதி³ஸஸ்ஸ வா விஸேஸம் தீ³பேதீதி யோஜனா.

த⁴ம்முபத்த²த்³த⁴ …பே… அதி⁴ப்பாயோ, அஞ்ஞதா² லத்³தி⁴யேவ ந ஸியாதி பா⁴வோ. மக்³கோ³தி உபாயோ, காரணந்தி அத்தோ². பகதிசக்கு²மதோ ஏவ ஹி தி³ப்³ப³சக்கு² உப்பஜ்ஜதி. கஸ்மா? கஸிணாலோகம் வட்³டே⁴த்வா தி³ப்³ப³சக்கு²ஞாணஸ்ஸ உப்பாத³னம், ஸோ ச கஸிணமண்ட³லே உக்³க³ஹனிமித்தேன வினா நத்தி², தஸ்மா வுத்தம் ‘‘மம்ஸசக்கு²பச்சயதாத³ஸ்ஸனத்த²மேவ வுத்த’’ந்தி. தேனாதி ‘‘மக்³கோ³’’தி வசனேன. ரூபாவசரஜ்ஜா²னபச்சயேனாதி ரூபாவசரஜ்ஜா²னேன பச்சயபூ⁴தேன உப்பன்னானி ரூபாவசரஜ்ஜா²னசித்தஸமுட்டி²தானி. ஜா²னகம்மஸமுட்டி²தேஸு வத்தப்³ப³மேவ நத்தி². தஸ்ஸ ஹேஸா லத்³தி⁴.

374. யேன தி³ப்³ப³சக்கு²னோ பஞ்ஞாசக்கு²பா⁴வஸ்ஸ இச்ச²னேன படிஜானனேன. தீணி சக்கூ²னி மம்ஸதி³ப்³ப³பஞ்ஞாசக்கூ²னி சக்கு²ந்தரபா⁴வம் வத³தோ ப⁴வேய்யும், தஸ்மா தம் ந இச்ச²தீதி அத்தோ².

தி³ப்³ப³சக்கு²கதா²வண்ணனா நிட்டி²தா.