2. காலஸம்ஸந்த³னகதா²வண்ணனா

285. அதீதா …பே… கரித்வாதி ஏத்தா²யம் ஸங்கே²பத்தோ² – அதீதம் அனாக³தந்தி ரூபஸ்ஸ இமம் விஸேஸம், ஏவம் விஸேஸம் வா ரூபம் அக்³க³ஹேத்வா பச்சுப்பன்னதாவிஸேஸவிஸிட்ட²ரூபமேவ அப்பியம் பச்சுப்பன்னரூபபா⁴வானம் ஸமானாதி⁴கரணத்தா ஏதஸ்மிம்யேவ விஸயே அப்பேதப்³ப³ம், வசீகோ³சரம் பாபேதப்³ப³ம் ஸதிபி நேஸம் விஸேஸனவிஸேஸிதப்³ப³தாஸங்கா²தே விபா⁴கே³ ததா²பி அவிப⁴ஜிதப்³ப³ம் கத்வாதி. யஸ்மா பன பாளியம் ‘‘பச்சுப்பன்னந்தி வா ரூபந்தி வா’’தி பச்சுப்பன்னரூபஸத்³தே³ஹி தத³த்த²ஸ்ஸ வத்தப்³பா³காரோ இதிஸத்³தே³ஹி த³ஸ்ஸிதோ, தஸ்மா ‘‘பச்சுப்பன்னஸத்³தே³ன…பே… வுத்தம் ஹோதீ’’தி ஆஹ. ரூபபஞ்ஞத்தீதி ரூபாயதனபஞ்ஞத்தி. ஸா ஹி ஸபா⁴வத⁴ம்முபாதா³னா தஜ்ஜாபஞ்ஞத்தி. தேனேவாஹ ‘‘ஸபா⁴வபரிச்சி²ன்னே பவத்தா விஜ்ஜமானபஞ்ஞத்தீ’’தி. ரூபஸமூஹம் உபாதா³யாதி தம்தம்அத்தபஞ்ஞத்தியா உபாதா³னபூ⁴தானம் அபா⁴வவிபா⁴வனாகாரேன பவத்தமானானம் ரூபத⁴ம்மானம் ஸமூஹம் உபாதா³ய. உபாதா³னுபாதா³னம்பி ஹி உபாதா³னமேவாதி. தஸ்மாதி ஸமூஹுபாதா³யாதீ⁴னதாய அவிஜ்ஜமானபஞ்ஞத்திபா⁴வதோ. விக³மாவத்தப்³ப³தாதி விக³மஸ்ஸ வத்த²பா⁴வாபக³மஸ்ஸ அவத்தப்³ப³தா. ந ஹி ஓதா³ததாவிக³மேன அவத்த²ம் ஹோதி. ந பன யுத்தா ரூபபா⁴வஸ்ஸ விக³மாவத்தப்³ப³தாதி யோஜனா. ரூபபா⁴வோதி ச ரூபாயதனஸபா⁴வோ சக்கு²விஞ்ஞாணஸ்ஸ கோ³சரபா⁴வோ. ந ஹி தஸ்ஸ பச்சுப்பன்னபா⁴வவிக³மே விக³மாவத்தப்³ப³தா யுத்தா.

காலஸம்ஸந்த³னகதா²வண்ணனா நிட்டி²தா.

வசனஸோத⁴னவண்ணனா

288. அனாக³தம் வா பச்சுப்பன்னம் வாதி ஏத்த² வா-ஸத்³தோ³ அனியமத்தோ² யதா² ‘‘க²தி³ரே வா ப³ந்தி⁴தப்³ப³ம் பலாஸே வா’’தி. தஸ்மா ‘‘ஹுத்வா ஹோதீ’’தி ஏத்த² ஹோதி-ஸத்³தோ³ அனாக³தபச்சுப்பன்னேஸு யம் கிஞ்சி பதா⁴னம் கத்வா ஸம்ப³ந்த⁴ம் லப⁴தீதி த³ஸ்ஸேந்தோ ‘‘அனாக³தம்…பே… த³ட்ட²ப்³ப³’’ந்தி ஆஹ. தத்த² பச்சுப்பன்னம் ஹோந்தந்தி பச்சுப்பன்னம் ஜாயமானம் பச்சுப்பன்னபா⁴வம் லப⁴ந்தம். தேனாஹ ‘‘தஞ்ஞேவ அனாக³தம் தம் பச்சுப்பன்னந்தி லத்³தி⁴வஸேனா’’தி. தம்பி ஹுத்வா ஹோதீதி யம் அனாக³தம் ஹுத்வா பச்சுப்பன்னபா⁴வப்பத்தியா ‘‘ஹுத்வா ஹோதீ’’தி வுத்தம், கிம் தத³பி புன ஹுத்வா ஹோதீதி புச்ச²தி. தப்³பா⁴வாவிக³மதோதி பச்சுப்பன்னபா⁴வதோ ஹுத்வாஹோதிபா⁴வானுபக³மதோ. பச்சுப்பன்னாபா⁴வதோதி பச்சுப்பன்னதாய அபா⁴வதோ.

வசனம் அரஹதீதி இமினா வசனமத்தே ந கோசி தோ³ஸோதி த³ஸ்ஸேதி. இத³ம் வுத்தம் ஹோதி – யதி³பி தஸ்ஸ புன ஹுத்வா பூ⁴தஸ்ஸ புன ஹுத்வாஹோதிபா⁴வோ நத்தி², புனப்புனம் ஞாபேதப்³ப³தாய பன து³தியம் ததோ பரம்பி ததா² வத்தப்³ப³தம் அரஹதீதி ‘‘ஆமந்தா’’தி படிஜானாதீதி. த⁴ம்மேதி ஸபா⁴வத⁴ம்மே. தப்படிக்கே²பதோ அத⁴ம்மே அபா⁴வத⁴ம்மே. தேனாஹ ‘‘ஸஸவிஸாணே’’தி.

படிக்கி²த்தனயேனாதி ‘‘ஹுத்வா ஹோதி, ஹுத்வா ஹோதீ’’தி ஏத்த² புப்³பே³ யதே³தம் தயா ‘‘அனாக³தம் ஹுத்வா பச்சுப்பன்னம் ஹோதீ’’தி வத³தா ‘‘தம்யேவ அனாக³தம் தம் பச்சுப்பன்ன’’ந்தி லத்³தி⁴வஸேன ‘‘அனாக³தம் வா பச்சுப்பன்னம் வா ஹுத்வா ஹோதீ’’தி வுத்தம், ‘‘கிம் தே தம்பி ஹுத்வா ஹோதீ’’தி புச்சி²தே யோ பரவாதி³னா ஹுத்வா பூ⁴தஸ்ஸ புன ஹுத்வாஅபா⁴வதோ ‘‘ந ஹேவா’’தி படிக்கே²போ கதோ, தேன படிக்கி²த்தனயேன. ஸ்வாயம் யதே³வ ரூபாதி³ அனாக³தம், ததே³வ பச்சுப்பன்னந்தி ஸதிபி அத்தா²பே⁴தே³ அனாக³தபச்சுப்பன்னந்தி பன அத்தே²வ காலபே⁴தோ³தி தம்காலபே⁴த³விரோதா⁴ய படிக்கே²போ பவத்தோதி ஆஹ ‘‘படிக்கி²த்தனயேனாதி காலனானத்தேனா’’தி. தேன ஹி ஸோ அயஞ்ச படிக்கே²போ நீதோ பவத்திதோதி. படிஞ்ஞாதனயேனாதி இத³ம்பி யதா²வுத்தபடிக்கே²பானந்தரம் யம் படிஞ்ஞாதம், தம் ஸந்தா⁴யாஹ. யதா² ஹி ஸா படிஞ்ஞா அத்தா²பே⁴தே³ன நீதா பவத்திதா, ததா²யம்பி. தேனேவாஹ ‘‘அத்தா²னானத்தேனா’’தி, அனாக³தாதி³ப்பபே⁴தா³ய காலபஞ்ஞத்தியா உபாதா³னபூ⁴தஸ்ஸ அத்த²ஸ்ஸ அபே⁴தே³னாதி அத்தோ². யதா² உபாதா³னபூ⁴தரூபாதி³அத்தா²பே⁴தே³பி தேஸம் க²ணத்தயானாவத்தி தம்ஸமங்கி³தா அனாக³தபச்சுப்பன்னபா⁴வாவத்திதா, ததா² தத்த² வுச்சமானா ஹுத்வாஹோதிபா⁴வா யதா²க்கமம் புரிமபச்சி²மேஸு பவத்திதா புரிமபச்சி²மகிரியாதி கத்வாதி இமமத்த²ம் த³ஸ்ஸேந்தோ ‘‘அத்தா²னானத்தம்…பே… படிஜானாதீ’’தி வத்வா புன ‘‘அத்தா²னானத்தமேவ ஹீ’’திஆதி³னா தமேவ அத்த²ம் ஸமத்தே²தி. யதா² பன ‘‘தம் ஜீவம் தம் ஸரீர’’ந்தி படிஜானந்தஸ்ஸ ஜீவோவ ஸரீரம், ஸரீரமேவ ஜீவோதி ஜீவஸரீரானம் அனஞ்ஞத்தம் ஆபஜ்ஜதி, ஏவம் ‘‘தஞ்ஞேவ அனாக³தம் தம் பச்சுப்பன்ன’’ந்தி ச படிஜானந்தஸ்ஸ அனாக³தபச்சுப்பன்னானம் அனஞ்ஞத்தம் ஆபன்னந்தி பச்சுப்பன்னானாக³தேஸு வுத்தா ஹோதிபா⁴வஹுத்வாபா⁴வா அனாக³தபச்சுப்பன்னேஸுபி ஆபஜ்ஜேய்யுந்தி வுத்தம் அட்ட²கதா²யம் ‘‘ஏவம் ஸந்தே அனாக³தம்பி ஹுத்வாஹோதி நாம, பச்சுப்பன்னம்பி ஹுத்வாஹோதியேவ நாமா’’தி.

அனுஞ்ஞாதபஞ்ஹஸ்ஸாதி ‘‘தஞ்ஞேவ அனாக³தம் தம் பச்சுப்பன்னந்தி? ஆமந்தா’’தி ஏவம் அத்தா²னானத்தம் ஸந்தா⁴ய அனுஞ்ஞாதஸ்ஸ அத்த²ஸ்ஸ. ஞாதும் இச்சி²தோ ஹி அத்தோ² பஞ்ஹோ. தோ³ஸோ வுத்தோதி அனாக³தம் ஹுத்வா பச்சுப்பன்னபூ⁴தஸ்ஸ புன அனாக³தம் ஹுத்வா பச்சுப்பன்னபா⁴வாபத்திஸங்கா²தோ தோ³ஸோ வுத்தோ புரிமனயே. பச்சி²மனயே பன அனாக³தபச்சுப்பன்னேஸு ஏகேகஸ்ஸ ஹுத்வாஹோதிபா⁴வாபத்திஸங்கா²தோ தோ³ஸோ வுத்தோதி அத்தோ². படிக்கி²த்தபஞ்ஹந்தி ‘‘தம்யேவ அனாக³தம் தம் பச்சுப்பன்னந்தி? ந ஹேவம் வத்தப்³பே³’’தி ஏவம் காலனானத்தம் ஸந்தா⁴ய படிக்கி²த்தபஞ்ஹம். தேனாதி அனாக³தபச்சுப்பன்னானம் ஹோதிஹுத்வாபா⁴வபடிக்கே²பேன. சோதே³தீதி அனாக³தம் தேன ஹோதி நாம, பச்சுப்பன்னம் தேன ஹுத்வா நாம, உப⁴யம்பி அனஞ்ஞத்தா உப⁴யஸபா⁴வந்தி சோதே³தி. ஏத்தா²தி ‘‘ஹுத்வா ஹோதீ’’தி ஏதஸ்மிம் பஞ்ஹே கத²ம் ஹோதி தோ³ஸோதி சோதே³தீதி. ‘‘தஸ்ஸேவா’’தி பரிஹரதி. கத²ம் கத்வா சோத³னா, கத²ஞ்ச கத்வா பரிஹாரோ? அனுஜானனபடிக்கே²பானம் பி⁴ன்னவிஸயதாய சோத³னா, அத்தா²பே⁴த³காலபே⁴த³விஸயத்தா அபி⁴ன்னாதா⁴ரதாய தேஸம் பரிஹாரோ. தஸ்ஸேவாதி ஹி பரவாதி³னோ ஏவாதி அத்தோ².

தது³ப⁴யம் க³ஹேத்வாதி ‘‘தம் அனாக³தம் தம் பச்சுப்பன்ன’’ந்தி உப⁴யம் ஏகஜ்ஜ²ம் க³ஹேத்வா. ஏகேகந்தி தேஸு ஏகேகம். ஏகேகமேவாதி உப⁴யம் ஏகஜ்ஜ²ம் அக்³க³ஹேத்வா ஏகேகமேவ விஸும் விஸும் இமஸ்மிம் பக்கே² ததா² ந யுத்தந்தி அத்தோ². ஏஸ நயோதி அதிதே³ஸம் கத்வா ஸம்கி²த்தத்தா தம் து³ப்³பி³ஞ்ஞேய்யந்தி ‘‘அனாக³தஸ்ஸ ஹீ’’திஆதி³னா விவரதி. படிஜானிதப்³ப³ம் ஸியா அனாக³தபச்சுப்பன்னானம் யதா²க்கமம் ஹோதிஹுத்வாபா⁴வதோதி அதி⁴ப்பாயோ. ‘‘யதே³தம் தயா’’திஆதி³னா பவத்தோ ஸம்வண்ணனானயோ புரிமனயோ, தத்த² ஹி ‘‘யதி³ தே அனாக³தம் ஹுத்வா’’திஆதி³னா ஹுத்வாஹோதிபா⁴வோ சோதி³தோ. ‘‘அபரோ நயோ’’திஆதி³கோ து³தியனயோ. தத்த² ஹி ‘‘அனாக³தஸ்ஸ…பே… ஹுத்வாஹோதியேவ நாமா’’தி அனாக³தாதீ³ஸு ஏகேகஸ்ஸ ஹுத்வாஹோதினாமதா சோதி³தா.

வசனஸோத⁴னவண்ணனா நிட்டி²தா.

அதீதஞாணாதி³கதா²வண்ணனா

290. கத²ம் வுச்சதீதி கஸ்மா வுத்தம். தேனாதி ஹி இமினா து³தியபுச்சா²ய ‘‘அதீதம் ஞாண’’ந்தி இத³ம் பச்சாமட்ட²ம், தஞ்ச பச்சுப்பன்னம் ஞாணம், அதீதத⁴ம்மாரம்மணதாய அதீதந்தி வுத்தம். தேனாஹ அட்ட²கதா²யம் ‘‘புன புட்டோ² அதீதாரம்மணம் பச்சுப்பன்னம் ஞாண’’ந்திஆதி³.

அதீதஞாணாதி³கதா²வண்ணனா நிட்டி²தா.

அரஹந்தாதி³கதா²வண்ணனா

291. ‘‘அரஹம் கீ²ணாஸவோ’’திஆதி³னா ஸுத்தவிரோதோ⁴ பாகடோதி இத³மேவ த³ஸ்ஸேந்தோ ‘‘யுத்திவிரோதோ⁴…பே… த³ட்ட²ப்³போ³’’தி ஆஹ. தத்த² அனானத்தந்தி அவிஸேஸோ. ஏவமாதி³கோதி ஆதி³-ஸத்³தே³ன கதகிச்சதாபா⁴வோ அனோஹிதபா⁴ரதாதி ஏவமாதீ³னம் ஸங்க³ஹோ த³ட்ட²ப்³போ³.

அரஹந்தாதி³கதா²வண்ணனா நிட்டி²தா.

பத³ஸோத⁴னகதா²வண்ணனா

295. யோ அதீதஸத்³தா³பி⁴தே⁴ய்யோ அத்தோ², ஸோ அத்தி²ஸத்³தா³பி⁴தே⁴ய்யோதி த்³வேபி ஸமானாதி⁴கரணத்தா²தி கத்வா வுத்தம் ‘‘அதீதஅத்தி²ஸத்³தா³னம் ஏகத்த²த்தா’’தி, ந, அதீதஸத்³தா³பி⁴தே⁴ய்யஸ்ஸேவ அத்தி²ஸத்³தா³பி⁴தே⁴ய்யத்தா. தேனாஹ ‘‘அத்தி²ஸத்³த³த்த²ஸ்ஸ ச ந்வாதீதபா⁴வதோ’’தி. தேன கிம் ஸித்³த⁴ந்தி ஆஹ ‘‘அதீதம் ந்வாதீதம், ந்வாதீதஞ்ச அதீதம் ஹோதீ’’தி. இத³ம் வுத்தம் ஹோதி – யதி³ தவ மதேன அதீதம் அத்தி², அத்தி² ச ந்வாதீதந்தி அதீதஞ்ச நோ அதீதம் ஸியா, ததா² அத்தி² நோ அதீதம் அதீதஞ்ச நோ அதீதம் அதீதம் ஸியாதி, யதா² ‘‘அதீதம் அத்தீ²’’தி ஏத்த² அதீதமேவ அத்தீ²தி நாயம் நியமோ க³ஹேதப்³போ³ அனதீதஸ்ஸபி அத்தி²பா⁴வஸ்ஸ இச்சி²தத்தா. தேனேவாஹ ‘‘அத்தி² ஸியா அதீதம், ஸியா ந்வாதீத’’ந்தி. யேன ஹி ஆகாரேன அதீதஸ்ஸ அத்தி²பா⁴வோ பரவாதி³னா இச்சி²தோ, தேனாகாரேன அனதீதஸ்ஸ அனாக³தஸ்ஸ பச்சுப்பன்னஸ்ஸ ச ஸோ இச்சி²தோ. கேன பன ஆகாரேன இச்சி²தோதி? ஸங்க²தாகாரேன. தேன வுத்தம் ‘‘தேனாதீதம் ந்வாதீதம், ந்வாதீதம் அதீத’’ந்தி. தஸ்மா அதீதம் அத்தி²யேவாதி ஏவமேத்த² நியமோ க³ஹேதப்³போ³. அத்தி²பா⁴வே ஹி அதீதம் நியமிதம், ந அதீதே அத்தி²பா⁴வோ நியமிதோ, ‘‘ந பன நிப்³பா³னம் அத்தீ²’’தி ஏத்த² பன நிப்³பா³னமேவ அத்தீ²தி அயம்பி நியமோ ஸம்ப⁴வதீதி ஸோ ஏவ க³ஹேதப்³போ³. யதி³பி ஹி நிப்³பா³னம் பரமத்த²தோ அத்தி²பா⁴வம் உபாதா³ய உத்தரபதா³வதா⁴ரணம் லப்³ப⁴தி தத³ஞ்ஞஸ்ஸபி அபா⁴வதோ, ததா²பி அஸங்க²தாகாரேன அஞ்ஞஸ்ஸ அனுபலப்³ப⁴னதோ ததா² நிப்³பா³னமேவ அத்தீ²தி புரிமபதா³வதா⁴ரணே அத்தே² க³ய்ஹமானே ‘‘அத்தி² ஸியா நிப்³பா³னம், ஸியா நோ நிப்³பா³ன’’ந்தி சோத³னா அனோகாஸா. அதீதாதீ³ஸு பன புரிமபதா³வதா⁴ரணம் பரவாதி³னா ந க³ஹிதந்தி நத்தே²த்த² அதிப்பஸங்கோ³. அக்³க³ஹணஞ்சஸ்ஸ பாளிதோ ஏவ விஞ்ஞாயதி. ஏவமேத்த² அதீதாதீ³னம் அத்தி²தம் வத³ந்தஸ்ஸ பரவாதி³ஸ்ஸேவாயம் இட்ட²விகா⁴ததோ³ஸாபத்தி, ந பன நிப்³பா³னஸ்ஸ அத்தி²தம் வத³ந்தஸ்ஸ ஸகவாதி³ஸ்ஸாதி. படிபாத³னா பதிட்டா²பனா வேதி³தப்³பா³.

ஏத்தா²ஹ ‘‘அதீதம் அத்தீ²’’திஆதி³னா கிம் பனாயம் அதீதானாக³தானம் பரமத்த²தோ அத்தி²பா⁴வோ அதி⁴ப்பேதோ, உதா³ஹு ந பரமத்த²தோ. கிஞ்சேத்த² – யதி³ தாவ பரமத்த²தோ, ஸப்³ப³காலம் அத்தி²பா⁴வதோ ஸங்கா²ரானம் ஸஸ்ஸதபா⁴வோ ஆபஜ்ஜதி, ந ச தம் யுத்தம் ஆக³மவிரோத⁴தோ யுத்திவிரோத⁴தோ ச. அத² ந பரமத்த²தோ, ‘‘ஸப்³ப³மத்தீ²’’திஆதி³கா சோத³னா நிரத்தி²கா ஸியா, ந நிரத்தி²கா. ஸோ ஹி பரவாதீ³ ‘‘யம் கிஞ்சி ரூபம் அதீதானாக³த’’ந்திஆதி³னா அதீதானாக³தானம்பி க²ந்த⁴பா⁴வஸ்ஸ வுத்தத்தா அஸதி ச அதீதே குஸலாகுஸலஸ்ஸ கம்மஸ்ஸ ஆயதிம் ப²லம் கத²ம் ப⁴வேய்ய, தத்த² ச புப்³பே³னிவாஸஞாணாதி³ அனாக³தே ச அனாக³தம்ஸஞாணாதி³ கத²ம் பவத்தேய்ய, தஸ்மா அத்தே²வ பரமத்த²தோ அதீதானாக³தந்தி யம் படிஜானாதி, தம் ஸந்தா⁴ய அயம் கதாதி. ஏகந்தேன சேதம் ஸம்படிச்சி²தப்³ப³ம். யேபி ‘‘ஸப்³ப³ம் அத்தீ²’’தி வத³ந்தி அதீதம் அனாக³தம் பச்சுப்பன்னஞ்ச, தே ஸப்³ப³த்தி²வாதா³தி.

சதுப்³பி³தா⁴ சேதே தே ஸப்³ப³த்தி²வாதா³. தத்த² கேசி பா⁴வஞ்ஞத்திகா. தே ஹி ‘‘யதா² ஸுவண்ணபா⁴ஜனஸ்ஸ பி⁴ந்தி³த்வா அஞ்ஞதா² கரியமானஸ்ஸ ஸண்டா²னஸ்ஸேவ அஞ்ஞத²த்தம், ந வண்ணாதீ³னம், யதா² ச கீ²ரம் த³தி⁴பா⁴வேன பரிணமந்தம் ரஸவீரியவிபாகே பரிச்சஜதி, ந வண்ணம், ஏவம் த⁴ம்மாபி அனாக³தத்³து⁴னோ பச்சுப்பன்னத்³த⁴ம் ஸங்கமந்தா அனாக³தபா⁴வமேவ ஜஹந்தி, ந அத்தனோ ஸபா⁴வம். ததா² பச்சுப்பன்னத்³து⁴னோ அதீதத்³த⁴ம் ஸங்கமே’’தி வத³ந்தி. கேசி லக்க²ணஞ்ஞத்திகா, தே பன ‘‘தீஸு அத்³தா⁴ஸு பவத்தமானோ த⁴ம்மோ அதீதோ அதீதலக்க²ணயுத்தோ, இதரலக்க²ணேஹி அயுத்தோ. ததா² அனாக³தோ பச்சுப்பன்னோ ச. யதா² புரிஸோ ஏகிஸ்ஸா இத்தி²யா ரத்தோ அஞ்ஞாஸு அரத்தோ’’தி வத³ந்தி. அஞ்ஞே அவத்த²ஞ்ஞத்திகா, தே ‘‘தீஸு அத்³தா⁴ஸு பவத்தமானோ த⁴ம்மோ தம் தம் அவத்த²ம் பத்வா அஞ்ஞோ அஞ்ஞம் நித்³தி³ஸீயதி அவத்த²ந்தரதோ, ந ஸபா⁴வதோ. யதா² ஏகம் அக்க²ம் ஏகங்கே³ நிக்கி²த்தம் ஏகந்தி வுச்சதி, ஸதங்கே³ ஸதந்தி, ஸஹஸ்ஸங்கே³ ஸஹஸ்ஸந்தி, ஏவம்ஸம்பத³மித³’’ந்தி. அபரே அஞ்ஞத²ஞ்ஞத்திகா, தே பன ‘‘தீஸு அத்³தா⁴ஸு பவத்தமானோ த⁴ம்மோ தம் தம் அபேக்கி²த்வா தத³ஞ்ஞஸபா⁴வேன வுச்சதி. யதா² தம் ஏகா இத்தீ² மாதாதி ச வுச்சதி தீ⁴தா’’தி ச. ஏவமேதே சத்தாரோ ஸப்³ப³த்தி²வாதா³.

தேஸு பட²மோ பரிணாமவாதி³தாய காபிலபக்கி²கேஸு பக்கி²பிதப்³போ³தி. து³தியஸ்ஸபி காலஸங்கரோ ஆபஜ்ஜதி ஸப்³ப³ஸ்ஸ ஸப்³ப³லக்க²ணயோக³தோ. சதுத்த²ஸ்ஸபி ஸங்கரோவ. ஏகஸ்ஸேவ த⁴ம்மஸ்ஸ பவத்திக்க²ணே தயோபி காலா ஸமோதா⁴னம் க³ச்ச²ந்தி. புரிமபச்சி²மக்க²ணா ஹி அதீதானாக³தா, மஜ்ஜி²மோ பச்சுப்பன்னோதி. ததியஸ்ஸ பன அவத்த²ஞ்ஞத்திகஸ்ஸ நத்தி² ஸங்கரோ த⁴ம்மகிச்சேன காலவவத்தா²னதோ. த⁴ம்மோ ஹி ஸகிச்சக்க²ணே பச்சுப்பன்னோ, ததோ புப்³பே³ அனாக³தோ, பச்சா² அதீதோதி.

தத்த² யதி³ அதீதம்பி த⁴ரமானஸபா⁴வதாய அத்தி² அனாக³தம்பி, கஸ்மா தம் அதீதந்தி வுச்சதி அனாக³தந்தி வா, நனு வுத்தம் ‘‘த⁴ம்மகிச்சேன காலவவத்தா²னதோ’’தி. யதி³ ஏவம் பச்சுப்பன்னஸ்ஸ சக்கு²ஸ்ஸ கிம் கிச்சம், அனவஸேஸபச்சயஸமவாயே ப²லுப்பாத³னம். ஏவம் ஸதி அனாக³தஸ்ஸபி சஸ்ஸ தேன ப⁴விதப்³ப³ம் அத்தி²பா⁴வதோதி லக்க²ணஸங்கரோ ஸியா. இத³ஞ்சேத்த² வத்தப்³ப³ம், தேனேவ ஸபா⁴வேன ஸதோ த⁴ம்மஸ்ஸ கிச்சம், கிச்சகரணே கோ விப³ந்தோ⁴, யேன கதா³சி கரோதி கதா³சி ந கரோதி பச்சயஸமவாயபா⁴வதோ, கிச்சஸ்ஸ ஸமவாயாபா⁴வதோதி சே? தம் ந, நிச்சம் அத்தி²பா⁴வஸ்ஸ இச்சி²தத்தா. ததோ ஏவ ச அத்³து⁴னம் அவவத்தா²னம். த⁴ம்மோ ஹி தேனேவ ஸபா⁴வேன விஜ்ஜமானோ கஸ்மா கதா³சி அதீதோதி வுச்சதி கதா³சி அனாக³தோதி காலஸ்ஸ வவத்தா²னம் ந ஸியா. யோ ஹி த⁴ம்மோ அஜாதோ, ஸோ அனாக³தோ. யோ ஜாதோ ந ச நிருத்³தோ⁴, ஸோ பச்சுப்பன்னோ. யோ நிருத்³தோ⁴, ஸோ அதீதோ. இத³மேவேத்த² வத்தப்³ப³ம். யதி³ யதா² வத்தமானம் அத்தி², ததா² அதீதம் அனாக³தஞ்ச அத்தி², தஸ்ஸ ததா² ஸதோ அஜாததா நிருத்³த⁴தா ச கேன ஹோதீதி. தேனேவ ஹி ஸபா⁴வேன ஸதோ த⁴ம்மஸ்ஸ கத²மித³ம் ஸிஜ்ஜ²தி அஜாதோதி வா நிருத்³தோ⁴தி வா. கிம் தஸ்ஸ புப்³பே³ நாஹோஸி, யஸ்ஸ அபா⁴வதோ அஜாதோதி வுச்சதி, கிஞ்ச பச்சா² நத்தி², யஸ்ஸ அபா⁴வதோ நிருத்³தோ⁴தி வுச்சதி. தஸ்மா ஸப்³ப³தா²பி அத்³த⁴த்தயம் ந ஸிஜ்ஜ²தி, யதி³ அஹுத்வா ஸங்க³தி ஹுத்வா ச வினஸ்ஸதீதி ந ஸம்படிச்ச²ந்தி. யம் பன வுத்தம் ‘‘ஸங்க²தலக்க²ணயோக³தோ ந ஸஸ்ஸதபா⁴வப்பஸங்கோ³’’தி, தயித³ம் கேவலம் வாசாவத்து²மத்தம் உத³யவயாஸம்ப⁴வதோ, அத்தி² ச நாம ஸப்³ப³தா³ ஸோ த⁴ம்மோ, ந ச நிச்சோதி குதோயம் வாசாயுத்தி.

ஸபா⁴வோ ஸப்³ப³தா³ அத்தி², நிச்சோ த⁴ம்மோ ந வுச்சதி;

த⁴ம்மோ ஸபா⁴வதோ நாஞ்ஞோ, அஹோ த⁴ம்மேஸு கோஸலம்.

யஞ்ச வுத்தம் ‘‘யம் கிஞ்சி ரூபம் அதீதானாக³த’’ந்திஆதி³னா அதீதானாக³தானம் க²ந்த⁴பா⁴வஸ்ஸ வுத்தத்தா அத்தே²வாதி, வதா³ம. அதீதம் பூ⁴தபுப்³ப³ம், அனாக³தம் யம் ஸதி பச்சயே ப⁴விஸ்ஸதி, தது³ப⁴யஸ்ஸபி ருப்பனாதி³ஸபா⁴வானாதிவத்தனதோ ரூபக்க²ந்தா⁴தி³பா⁴வோ வுத்தோ. யதா²த⁴ம்மஸபா⁴வானாதிவத்தனதோ அதீதா த⁴ம்மா அனாக³தா த⁴ம்மாதி, ந த⁴ரமானஸபா⁴வதாய. கோ ச ஏவமாஹ ‘‘பச்சுப்பன்னம் விய தம் அத்தீ²’’தி. கத²ம் பனேதம் அத்தீ²தி? அதீதானாக³தஸபா⁴வேன. இத³ம் பன தவேவ உபட்டி²தம், கத²ம் தம் அதீதம் அனாக³தஞ்ச வுச்சதி, யதி³ நிச்சகாலம் அத்தீ²தி.

யம் பன ‘‘ந தாவ காலம் கரோதி, யாவ ந தம் பாபம் ப்³யந்தீ ஹோதீ’’தி (ம. நி. 3.250) ஸுத்தே வுத்தம், தம் யஸ்மிஞ்ச ஸந்தானே கம்மம் கதூபசிதம், தத்த² தேனாஹிதம் தம்ப²லுப்பாத³னஸமத்த²தம் ஸந்தா⁴ய வுத்தம், ந அதீதஸ்ஸ கம்மஸ்ஸ த⁴ரமானஸபா⁴வத்தா. ததா² ஸதி ஸகேன பா⁴வேன விஜ்ஜமானம் கத²ம் தம் அதீதம் நாம ஸியா. இத்த²ஞ்சேதம் ஏவம் ஸம்படிச்சி²தப்³ப³ம், யம் ஸங்கா²ரா அஹுத்வா ஸம்ப⁴வந்தி, ஹுத்வா பதிவேந்தி தேஸம் உத³யதோ புப்³பே³ வயதோ ச பச்சா² ந காசி டி²தி நாம அத்தி², யதோ அதீதானாக³தம் அத்தீ²தி வுச்சேய்ய. தேன வுத்தம் –

‘‘அனிதா⁴னக³தா ப⁴க்³கா³, புஞ்ஜோ நத்தி² அனாக³தே;

உப்பன்னா யேபி திட்ட²ந்தி, ஆரக்³கே³ ஸாஸபூபமா’’தி. (மஹானி. 10, 39);

யதி³ சானாக³தம் பரமத்த²தோ ஸியா, அஹுத்வா ஸம்ப⁴வந்தீதி வத்தும் ந ஸக்கா. பச்சுப்பன்னகாலே அஹுத்வா ஸம்ப⁴வந்தீதி சே? ந, த⁴ம்மப்பவத்திமத்தத்தா காலஸ்ஸ. அத² அத்தனோ ஸபா⁴வேன அஹுத்வா ஸம்ப⁴வந்தீதி, ஸித்³த⁴மேதம் அனாக³தம் பரமத்த²தோ நத்தீ²தி. யஞ்ச வுத்தம் ‘‘அஸதி அதீதே குஸலாகுஸலஸ்ஸ கம்மஸ்ஸ ஆயதிம் ப²லம் கத²ம் ப⁴வேய்யா’’தி, ந கோ² பனேத்த² அதீதகம்மதோ ப²லுப்பத்தி இச்சி²தா, அத² கோ² தஸ்ஸ கதத்தா ததா³ஹிதவிஸேஸதோ ஸந்தானதோ. வுத்தஞ்ஹேதம் ப⁴க³வதா ‘‘காமாவசரஸ்ஸ குஸலஸ்ஸ கம்மஸ்ஸ கதத்தா உபசிதத்தா விபாகம் சக்கு²விஞ்ஞாணம் உப்பன்னம் ஹோதீ’’தி (த⁴. ஸ. 431). யஸ்ஸ பன அதீதானாக³தம் பரமத்த²தோ அத்தி², தஸ்ஸ ப²லம் நிச்சமேவ அத்தீ²தி கிம் தத்த² கம்மஸ்ஸ ஸாமத்தி²யம். உப்பாத³னே சே, ஸித்³த⁴மித³ம் அஹுத்வா ப⁴வதீதி. யம் பன வுத்தம் ‘‘அஸதி அதீதானாக³தே கத²ம் தத்த² ஞாணம் பவத்தேய்யா’’தி, யதா² தம் ஆலம்ப³ணம், தம் ததா² அத்தி², கத²ஞ்ச தம் ஆலம்ப³ணம், அஹோஸி ப⁴விஸ்ஸதி சாதி. ந ஹி கோசி அதீதம் அனுஸ்ஸரந்தோ அத்தீ²தி அனுஸ்ஸரதி, அத² கோ² அஹோஸீதி. யதா² பன வத்தமானம் ஆரம்மணம் அனுபூ⁴தம், ததா² தம் அதீதம் அனுஸ்ஸரதி. யதா² ச வத்தமானம் ப⁴விஸ்ஸதி, ததா² பு³த்³தா⁴தீ³ஹி க³ய்ஹதி. யதி³ ச தம் ததே²வ அத்தி², வத்தமானமேவ தம் ஸியா. அத² நத்தி², ஸித்³த⁴ம் ‘‘அஸந்தம் ஞாணஸ்ஸ ஆரம்மணம் ஹோதீ’’தி. விஜ்ஜமானம் வா ஹி சித்தஸஞ்ஞாதம் அவிஜ்ஜமானம் வா ஆரம்மணம் ஏதேஸம் அத்தீ²தி ஆரம்மணா, சித்தசேதஸிகா, ந விஜ்ஜமானம்யேவ ஆரப்³ப⁴ பவத்தனதோ, தஸ்மா பச்சுப்பன்னமேவ த⁴ரமானஸபா⁴வம் ந அதீதானாக³தந்தி ந திட்ட²தி ஸப்³ப³த்தி²வாதோ³. கேசி பன ‘‘ந அதீதாதீ³னம் அத்தி²தாபடிஞ்ஞாய ஸப்³ப³த்தி²வாதா³, அத² கோ² ஆயதனஸப்³ப³ஸ்ஸ அத்தி²தாபடிஞ்ஞாயா’’தி வத³ந்தி, தேஸம் மதேன ஸப்³பே³வ ஸாஸனிகா ஸப்³ப³த்தி²வாதா³ ஸியுந்தி.

பத³ஸோத⁴னகதா²வண்ணனா நிட்டி²தா.

ஸப்³ப³மத்தீ²திகதா²வண்ணனா நிட்டி²தா.