6. ஞாணகதா²வண்ணனா

876-877. ‘‘த்³வாத³ஸவத்து²கம் ஞாணம் லோகுத்தர’’ந்தி ஏத்த² த்³வாத³ஸவத்து²கஸ்ஸ ஞாணஸ்ஸ லோகுத்தரதா பதிட்டா²பீயதீதி த³ஸ்ஸேந்தோ பட²மவிகப்பம் வத்வா புன லோகுத்தரஞாணஸ்ஸ த்³வாத³ஸவத்து²கதா பதிட்டா²பீயதீதி த³ஸ்ஸேதும் ‘‘தம் வா…பே… அத்தோ²’’தி ஆஹ. பரிஞ்ஞேய்யந்தி ஏத்த² இதி-ஸத்³தோ³ ஆதி³அத்தோ², பகாரத்தோ² வா. தேன ‘‘பஹாதப்³ப³’’ந்தி ஏவமாதி³ம் ஸங்க³ண்ஹாதி. பரிஞ்ஞாதந்தி ஏத்தா²பி ஏஸேவ நயோ. ‘‘பரிஞ்ஞேய்யம் பரிஞ்ஞாத’’ந்திஆதி³னா பரிஜானனாதி³கிரியாய நிப்³ப³த்தேதப்³ப³தா நிப்³ப³த்திததா ச த³ஸ்ஸிதா, ந நிப்³ப³த்தியமானதாதி. யேன பன ஸா ஹோதி, தம் த³ஸ்ஸேதும் ‘‘ஸச்சஞாணம் பனா’’திஆதி³ வுத்தம். தத்த² ஸச்சஞாணந்தி து³க்கா²தி³ஸச்சஸபா⁴வாவபோ³த⁴கம் ஞாணம், யம் ஸந்தா⁴ய ‘‘இத³ம் து³க்க²’’ந்திஆதி³ வுத்தம். மக்³க³க்க²ணேபீதி அபி-ஸத்³தே³ன ததோ புப்³பா³பரபா⁴கே³பீதி த³ட்ட²ப்³ப³ம். பரிஜானனாதி³கிச்சஸாத⁴னவஸேன ஹோதி அஸம்மோஹதோ விஸயதோ சாதி அதி⁴ப்பாயோ.

ஞாணகதா²வண்ணனா நிட்டி²தா.

வீஸதிமவக்³க³வண்ணனா நிட்டி²தா.

சதுத்தோ² பண்ணாஸகோ ஸமத்தோ.