5. ஸத்தக்க²த்துபரமகதா²வண்ணனா

641-645. அஸ்ஸாதி இமஸ்ஸ ஸத்தக்க²த்துபரமஸ்ஸ. தேனாஹ ‘‘ஸத்தக்க²த்துபரமபா⁴வே ச நியாமம் இச்ச²ஸீ’’தி. யேன ஆனந்தரியகம்மேன. அந்தராதி ஸத்த ப⁴வே அனிப்³ப³த்தேத்வா தேஸம் அந்தரேயேவ. கேசீதி அப⁴யகி³ரிவாஸினோ. அபரேதி பத³காரா. தஸ்ஸாதி யோ ஸத்தக்க²த்துபரமோதி வா, கோலம்கோலோதி வா, ஏகபீ³ஜீதி வா ப⁴க³வதா ஞாணேன பரிச்சி²ந்தி³த்வா ப்³யாகதோ, தஸ்ஸ யதா²வுத்தபரிச்சே²தா³ அந்தரா உபரிமக்³கா³தி⁴க³மோ நத்தி² அவிதத²தே³ஸனத்தா. யதா²பரிச்சே²த³மேவ தஸ்ஸ அபி⁴ஸமயோ, ஸ்வாயம் விபா⁴கோ³ தேஸம்யேவ புக்³க³லானம் இந்த்³ரியபரோபரியத்தேன வேதி³தப்³போ³ ப⁴வனியாமேன தாதி³ஸஸ்ஸ கஸ்ஸசி அபா⁴வதோ. யஸ்மா கஸ்ஸசி முது³கானிபி இந்த்³ரியானி பச்சயவிஸேஸேன திக்க²பா⁴வம் ஆபஜ்ஜேய்யும், தஸ்மா தாதி³ஸம் ஸந்தா⁴ய ‘‘ப⁴ப்³போ³தி வுச்சதி, ந ஸோ அப⁴ப்³போ³ நாமா’’தி ச வுத்தம். யஸ்மா பன ப⁴க³வா ந தாதி³ஸம் ‘‘ஸத்தக்க²த்துபரமோ’’திஆதி³னா நியமேத்வா ப்³யாகரோதி, தஸ்மா ஆஹ ‘‘ந பன அந்தரா அபி⁴ஸமேதும் ப⁴ப்³ப³தா வுத்தா’’தி. அயஞ்ச நயோ ஏகந்தேன இச்சி²தப்³போ³. அஞ்ஞதா² புக்³க³லஸ்ஸ ஸங்கரோ ஸியாதி த³ஸ்ஸேந்தோ ‘‘யதி³ சா’’திஆதி³மாஹ.

ஸத்தக்க²த்துபரமகதா²வண்ணனா நிட்டி²தா.

த்³வாத³ஸமவக்³க³வண்ணனா நிட்டி²தா.