7. ஸீலம்அசேதஸிகந்திகதா²வண்ணனா

590-594. டி²தேன அவினட்டே²ன. உபசயேனாதி ஸீலபூ⁴தேன கம்மூபசயேன. ‘‘தா³னம் அசேதஸிக’’ந்தி கதா²யம் வுத்தனயேனாதி யதா² ‘‘ந வத்தப்³ப³ம் சேதஸிகோ த⁴ம்மோ தா³னந்தி? ஆமந்தா. தா³னம் அனிட்ட²ப²லந்தி…பே… தேன ஹி சேதஸிகோ த⁴ம்மோ தா³ன’’ந்தி பாளி பவத்தா, ஏவம் தத³னுஸாரேன ‘‘ந வத்தப்³ப³ம் சேதஸிகம் ஸீலந்தி? ஆமந்தா. ஸீலம் அனிட்ட²ப²ல’’ந்திஆதி³னா ஸீலஸ்ஸ சேதஸிகபா⁴வஸாத⁴கானி ஸுத்தபதா³னி ச ஆனேத்வா தத³த்த²த³ஸ்ஸனவஸேன அசேதஸிகோ ரூபாதி³த⁴ம்மோ ஆயதிம் விபாகம் தே³தி. யதி³ ஸோ ஸீலம் ப⁴வேய்ய, வினா ஸம்வரஸமாதா³னேன வினா விரதியா ஸீலவா நாம ஸியா. யஸ்மா பன ஸமாதா³னசேதனா விரதி ஸம்வரோ ஸீலம், தஸ்மா ‘‘ஸீலம் இட்ட²ப²லம் கந்தப²ல’’ந்திஆதி³னா யோஜனா காதப்³பா³தி இமமத்த²ம் ஸந்தா⁴ய வுத்தம் ‘‘வுத்தனயேனா’’தி, வுத்தனயானுஸாரேனாதி அத்தோ². யஸ்மா பன பாளியம் யதா² ‘‘ஸீலம் அசேதஸிக’’ந்தி கதா² ஆக³தா, ததா² ‘‘தா³னம் அசேதஸிக’’ந்தி விஸும் ஆக³தா கதா² நத்தி², தஸ்மா ‘‘ஸா பன கதா² மக்³கி³தப்³பா³’’தி வுத்தம்.

ஸீலம்அசேதஸிகந்திகதா²வண்ணனா நிட்டி²தா.