1. நிரோத⁴கதா²வண்ணனா

571-572. ஸகஸமயே ‘‘புரிமசித்தஸ்ஸ நிரோதா⁴னந்தரம் பச்சி²மசித்தம் உப்பஜ்ஜதீ’’தி இச்சி²தம், பரவாதீ³ பன ‘‘யஸ்மிம் க²ணே ப⁴வங்க³சித்தம், தஸ்மிம்யேவ க²ணே கிரியமயசித்தம் உப்பஜ்ஜதீ’’தி வத³தி. ஏவம் ஸதி புரிமபச்சி²மசித்தானம் ஸஹபா⁴வோபி அனுஞ்ஞாதோ ஹோதி. தேனாஹ ‘‘ப⁴ங்க³க்க²ணேன ஸஹேவா’’தி. ததா² ச ஸதி விபாககிரியக்க²ந்தா⁴னம் விய கிரியவிபாகக்க²ந்தா⁴னம் விபாகவிபாகக்க²ந்தா⁴னம் கிரியகிரியக்க²ந்தா⁴னஞ்ச வுத்தனயேன ஸஹபா⁴வோ வத்தப்³போ³தி இமமத்த²ம் த³ஸ்ஸேந்தோ ‘‘ப⁴வங்க³சித்தஸ்ஸா’’திஆதி³மாஹ. தத்த² உபபத்திப⁴வபா⁴வேன ஏஸியா இச்சி²தப்³பா³தி உபபத்தேஸியா விபாகக்க²ந்தா⁴, தே ச யேபு⁴ய்யேன ப⁴வங்க³பரியாயகாதி அட்ட²கதா²யம் வுத்தம் ‘‘உபபத்தேஸியந்தி ஸங்க²ம் க³தஸ்ஸ ப⁴வங்க³சித்தஸ்ஸா’’தி. ஆதி³பரியோஸானமத்தஞ்ஹி தஸ்ஸ படிஸந்தி⁴சுதிசித்தம், ததா³ரம்மணம் ப⁴வங்க³ந்த்வேவ வுச்சதீதி. சக்கு²விஞ்ஞாணாதீ³னம் கிரியாவேமஜ்ஜே² பதிதத்தா கிரியாசதுக்க²ந்த⁴க்³க³ஹணேன க³ஹணம் யுத்தந்தி வுத்தம். சக்கு²விஞ்ஞாணாதீ³னந்தி ஹி ஆதி³-ஸத்³தே³ன ந ஸோதவிஞ்ஞாணாதீ³னம்யேவ க³ஹணம், அத² கோ² ஸம்படிச்ச²னஸந்தீரணானம்பீதி த³ட்ட²ப்³ப³ம்.

நிரோத⁴கதா²வண்ணனா நிட்டி²தா.