1. மாதிகாவண்ணனா

1. ‘‘தா⁴துகத²ம் தே³ஸயித்வா அனந்தரம் தஸ்ஸ ஆஹ புக்³க³லபஞ்ஞத்தி’’ந்தி வுத்தே தத்த² காரணம் ஸமுதா³க³மதோ பட்டா²ய விபா⁴வேந்தோ ‘‘த⁴ம்மஸங்க³ஹே’’திஆதி³மாஹ. தத்த² யதி³பி த⁴ம்மஸங்க³ஹே ப²ஸ்ஸாதீ³னம் பத²வீஆதீ³னஞ்ச த⁴ம்மானம் நானானயவிசித்தோ அனுபத³விபா⁴கோ³பி கதோ, ந ஸங்க³ஹோ ஏவ, ஸோ பன தேஸம் குஸலத்திகாதி³ஹேதுது³காதி³திகது³கேஹி ஸங்க³ஹஸந்த³ஸ்ஸனத்தோ²தி வுத்தம் ‘‘த⁴ம்மஸங்க³ஹே திகது³காதி³வஸேன ஸங்க³ஹிதானம் த⁴ம்மான’’ந்தி. தேனேவ ஹி தம் பகரணம் ‘‘த⁴ம்மஸங்க³ஹோ’’தி ஸமஞ்ஞம் லபி⁴. காமஞ்ச த⁴ம்மஸங்க³ஹேபி ‘‘தஸ்மிம் கோ² பன ஸமயே சத்தாரோ க²ந்தா⁴ ஹோந்தீ’’திஆதி³னா (த⁴. ஸ. 58) க²ந்தா⁴தி³விபா⁴கோ³ த³ஸ்ஸிதோ, ஸோ பன ந ததா² ஸாதிஸயோ, யதா² விப⁴ங்க³பகரணேதி ஸாதிஸயம் தம் க³ஹேத்வா ஆஹ ‘‘விப⁴ங்கே³ க²ந்தா⁴தி³விபா⁴க³ம் த³ஸ்ஸேத்வா’’தி, யதோ தம் ‘‘விப⁴ங்கோ³’’த்வேவ பஞ்ஞாயித்த². தா⁴துகதா²யாதி ஆதா⁴ரே பு⁴ம்மம், ததா² ‘‘த⁴ம்மஸங்க³ஹே விப⁴ங்கே³’’தி ஏத்தா²பி. ஆதா⁴ரோ ஹி ஸங்க³ஹணவிப⁴ஜனப்பபே⁴த³வசனஸங்கா²தானம் அவயவகிரியானம் தம்ஸமுதா³யபூ⁴தானி பகரணானி யதா² ‘‘ருக்கே² ஸாகா²’’தி. கரணவசனம் வா ஏதம், தா⁴துகதா²ய கரணபூ⁴தாயாதி அத்தோ².

ஏத்த² ச அபி⁴ஞ்ஞேய்யத⁴ம்மே தே³ஸேந்தோ தே³ஸனாகுஸலோ ப⁴க³வா திகது³கவஸேன தாவ நேஸம் ஸங்க³ஹம் த³ஸ்ஸேந்தோ த⁴ம்மஸங்க³ணிம் தே³ஸேத்வா ஸங்க³ஹபுப்³ப³கத்தா விபா⁴க³ஸ்ஸ தத³னந்தரம் க²ந்தா⁴தி³வஸேன விபா⁴க³ம் த³ஸ்ஸேந்தோ விப⁴ங்க³ம் தே³ஸேஸி. புன யதா²வுத்தவிபா⁴க³ஸங்க³ஹயுத்தே த⁴ம்மே ஸங்க³ஹாஸங்க³ஹாதி³னயப்பபே⁴த³தோ த³ஸ்ஸேந்தோ தா⁴துகத²ம் தே³ஸேஸி தஸ்ஸா அப்³ப⁴ந்தரபா³ஹிரமாதிகாஸரீரகத்தா. ந ஹி ஸக்கா க²ந்தா⁴தி³கே குஸலாதி³கே ச வினா ஸங்க³ஹாஸங்க³ஹாதி³னயம் நேதுந்தி. தேனாஹ ‘‘ததா²ஸங்க³ஹிதவிப⁴த்தான’’ந்தி. ஏவம் ஸங்க³ஹதோ விபா⁴க³தோ பபே⁴த³தோ ச த⁴ம்மானம் தே³ஸனா யஸ்ஸா பஞ்ஞத்தியா வஸேன ஹோதி, யோ சாயம் யதா²வுத்தத⁴ம்முபாதா³னோ புக்³க³லவோஹாரோ, தஸ்ஸ ச ஸமயவிமுத்தாதி³வஸேன விபா⁴கோ³, தம் ஸப்³ப³ம் விபா⁴வேதும் புக்³க³லபஞ்ஞத்தி தே³ஸிதாதி இத³மேதேஸம் சதுன்னம் பகரணானம் தே³ஸனானுக்கமகாரணம் த³ட்ட²ப்³ப³ம்.

தேஸந்தி த⁴ம்மானம். ஸபா⁴வதோதி ‘‘ப²ஸ்ஸோ வேத³னா’’திஆதி³ஸபா⁴வதோ. உபாதா³யாதி ‘‘புக்³க³லோ ஸத்தோ போஸோ’’திஆதி³னா க²ந்தே⁴ உபாதா³ய. பஞ்ஞாபனம் யாய தஜ்ஜாஉபாதா³தி³பே⁴தா³ய பஞ்ஞத்தியா ஹோதி, தம் பஞ்ஞத்திம். பபே⁴த³தோதி க²ந்தா⁴தி³ஸமயவிமுத்தாதி³விபா⁴க³தோ. யாய பஞ்ஞத்தியா ஸபா⁴வதோ உபாதா³ய ச பஞ்ஞாபனந்தி ஸங்கே²பதோ வுத்தமத்த²ம் விவரந்தோ ‘‘தத்த² யே த⁴ம்மே’’திஆதி³மாஹ. தத்த² அஸபா⁴வபஞ்ஞத்தியாபி மூலபூ⁴தம் உபாதா³னம் ஸபா⁴வத⁴ம்மோ ஏவ, கேவலம் பன தேஸம் பவத்திஆகாரபே⁴த³ஸன்னிஸ்ஸயதோ விஸேஸோதி த³ஸ்ஸேந்தோ ‘‘யே த⁴ம்மே…பே… ஹோதீ’’தி ஆஹ. தத்த² புப்³பா³பரியபா⁴வேன பவத்தமானேதி இமினா பப³ந்த⁴ஸன்னிஸ்ஸயதம் த³ஸ்ஸேந்தோ ஸந்தானபஞ்ஞத்திம் வத³தி, அஸபா⁴வஸமூஹவஸேனாதி இமினா ஸேஸபஞ்ஞத்திம். திஸ்ஸோ ஹி பஞ்ஞத்தியோ ஸந்தானபஞ்ஞத்தி ஸமூஹபஞ்ஞத்தி அவத்தா²விஸேஸபஞ்ஞத்தீதி. தத்த² பப³ந்தோ⁴ ஸந்தானோ. ஸமுதா³யோ ஸமூஹோ. உப்பாதா³தி³கோ த³ஹரபா⁴வாதி³கோ ச அவத்தா²விஸேஸோ. தேஸு அஸபா⁴வக்³க³ஹணேன வினா பப³ந்த⁴ஸமூஹானம் அஸபா⁴வத்தே ஸித்³தே⁴ அஸபா⁴வஸமூஹவஸேனாதி அஸபா⁴வக்³க³ஹணம் பப³ந்த⁴ஸமூஹவினிமுத்தபஞ்ஞத்திஸந்த³ஸ்ஸனத்த²ந்தி தேன அவத்தா²விஸேஸபஞ்ஞத்தியா பரிக்³க³ஹோ வுத்தோதி வேதி³தப்³போ³.

தேஸந்தி புப்³பே³ யம்-ஸத்³தே³ன பராமட்டா²னம் இந்த்³ரியப³த்³த⁴த⁴ம்மானம். தேனேவாஹ ‘‘அஞ்ஞேஸஞ்ச பா³ஹிரரூபனிப்³பா³னான’’ந்தி. ஸஸபா⁴வஸமூஹஸஸபா⁴வப்பபே⁴த³வஸேனாதி ரூபக்க²ந்தா⁴தி³ஸஸபா⁴வஸமூஹவஸேன சக்கா²யதனாதி³ஸஸபா⁴வவிஸேஸவஸேன ச. ‘‘ஸஸபா⁴வஸமூஹஸபா⁴வபே⁴த³வஸேனா’’தி ச பாடோ². தத்த² ஸமூஹஸபா⁴வோதி ஸபா⁴வஸந்தானம் அவத்தா²விஸேஸவிது⁴ரம் ஸமூஹவஸேன லக்க²ணமேவாஹ. ததா² ஹி க²ந்த⁴பஞ்ஞத்தியாபி ஸபா⁴வபஞ்ஞத்திதா வுத்தா. தாயாதி ஆயதனபஞ்ஞத்திஆதி³ப்பபே⁴தா³ய ஸபா⁴வபஞ்ஞத்தியா. விப⁴த்தா ஸபா⁴வபஞ்ஞத்தீதி ‘‘ப²ஸ்ஸோ பு²ஸனா’’திஆதி³னா (த⁴. ஸ. 2) விப⁴த்தா ப²ஸ்ஸாதி³ஸபா⁴வபஞ்ஞத்தி. ஸப்³பா³பீதி பி-ஸத்³தே³ன ஸபா⁴வத⁴ம்மேஸு ஸாமஞ்ஞவஸேன பவத்தம் குஸலாதி³பஞ்ஞத்திம் ஸங்க³ண்ஹாதி. ரூபாதி³த⁴ம்மானம் ஸமூஹோ ஸந்தானேன பவத்தமானோ அவத்தா²விஸேஸஸஹிதோ ஏகத்தக்³க³ஹணனிப³ந்த⁴னோ ஸத்தோதி வோஹரீயதீதி ஸோ ஸபா⁴வத⁴ம்மோ நாம பன ந ஹோதீதி ஆஹ ‘‘புக்³க³லபஞ்ஞத்தி பன அஸபா⁴வபஞ்ஞத்தீ’’தி. தாயாதி புக்³க³லபஞ்ஞத்தியா. யஸ்மா பன த⁴ம்மானம் பப³ந்தோ⁴ ஸமூஹோ ச த⁴ம்மஸன்னிஸ்ஸிதோதி வத்தப்³ப³தம் அரஹதி, தஸ்மா ‘‘பரிஞ்ஞேய்யாதி³ஸபா⁴வத⁴ம்மே உபாதா³ய பவத்திதோ’’தி வுத்தம்.

விஜ்ஜமானபஞ்ஞத்தி பன ‘‘ஸபா⁴வபஞ்ஞத்தீ’’தி வுத்தா, அவிஜ்ஜமானபஞ்ஞத்தி ‘‘அஸபா⁴வபஞ்ஞத்தீ’’தி வுத்தா. ஸப்³பா³ பஞ்ஞத்தியோதி உபாதா³யபஞ்ஞத்திகிச்சபஞ்ஞத்திஆத³யோ ஸப்³பா³ பஞ்ஞத்தியோ. யதி³ ஸப்³பா³ பஞ்ஞத்தியோ இத⁴ த³ஸ்ஸிதா ஹோந்தி, கத²ம் ‘‘புக்³க³லபஞ்ஞத்தீ’’தி நாமம் ஜாதந்தி ஆஹ ‘‘க²ந்தா⁴தி³பஞ்ஞத்தீஸூ’’திஆதி³. அஞ்ஞத்தா²தி த⁴ம்மஸங்க³ஹாதீ³ஸு. யே த⁴ம்மேதி யே க²ந்தா⁴தி³த⁴ம்மே. பஞ்ஞத்தியா வத்து²பா⁴வேனாதி பஞ்ஞாபனஸ்ஸ அதி⁴ட்டா²னபா⁴வேன. அதி⁴ட்டா²னஞ்ஹி பஞ்ஞாபேதப்³ப³த⁴ம்மா பஞ்ஞாபனஸ்ஸ. ஏவஞ்ச கத்வா க²ந்தா⁴தீ³ஹி ஸத்³தி⁴ம் புக்³க³லோ க³ஹிதோ. யே த⁴ம்மேதி வா யே பஞ்ஞத்தித⁴ம்மே. பஞ்ஞாபேதுகாமோதி நிக்கி²பிதுகாமோ வத்து²பே⁴த³தோ அஸங்கரதோ ட²பேதுகாமோ. பஞ்ஞத்திபரிச்சே²த³ந்தி ச வத்து²பே⁴த³பி⁴ன்னம் பஞ்ஞத்திபூ⁴தம் பரிச்சே²த³ம். ஏவமேத்த² அத்தோ² த³ட்ட²ப்³போ³.

ஸாமஞ்ஞப்பபே⁴த³பஞ்ஞாபனாதி ஸாமஞ்ஞபூ⁴தானம் விஸேஸபூ⁴தானஞ்ச அத்தா²னம் பஞ்ஞாபனா. தேஸந்தி அத்த²-ஸத்³தா³பேக்கா²ய புல்லிங்க³னித்³தே³ஸோ. தத்தா²தி பஞ்ஞாபனாய அத்த²த³ஸ்ஸனபூ⁴தேஸு த³ஸ்ஸனாதீ³ஸு. இத³மேவம்னாமகந்தி இத³ம் ருப்பனாதி³அத்த²ஜாதம் இத்த²ன்னாமகம் ரூபக்க²ந்த⁴வேத³னாக்க²ந்தா⁴தி³ஸமஞ்ஞம். தம்தம்கோட்டா²ஸிககரணந்தி ரூபவேத³னாதி³தம்தம்அத்த²விபா⁴க³பரியாபன்னதாபாத³னம். ததா² ஸஞ்ஞுப்பாதா³னமேவாதி ஆஹ ‘‘போ³த⁴னமேவ நிக்கி²பனா’’தி. போ³த⁴னஞ்ஹி போ³த⁴னேய்யஸந்தானே போ³தே⁴தப்³ப³ஸ்ஸ அத்த²ஸ்ஸ ட²பனந்தி கத்வா ‘‘நிக்கி²பனா’’தி வுத்தம். ‘‘பஞ்ஞாபனா’’திஆதி³னா பா⁴வஸாத⁴னேன வத்வா ஸாத⁴னந்தராமஸனேன அத்த²ந்தரபரிகப்பாஸங்கா ஸியாதி தம் நிவாரேதும் ‘‘யோ பனாயம்…பே… வேதி³தப்³போ³’’தி ஆஹ. தேஸம் தேஸம் த⁴ம்மானந்தி தம்தம்பஞ்ஞாபேதப்³ப³த⁴ம்மானம். த³ஸ்ஸனபூ⁴தாய நாமபஞ்ஞத்தியா தி³ட்ட²தாய, ட²பனபூ⁴தாய ட²பிததாய. தம்னிமித்ததந்தி தஸ்ஸ த³ஸ்ஸனஸ்ஸ ட²பனஸ்ஸ ச நிமித்தகாரணதம். நிமித்தஞ்ஹி கத்துபா⁴வேன வோஹரீயதி யதா² ‘‘பி⁴க்கா² வாஸேதீ’’தி, ‘‘அரியபா⁴வகரானி ஸச்சானி அரியஸச்சானீ’’தி ச.

பாளியம் அனாக³ததந்தி விஜ்ஜமானதாதி³விஸேஸவசனேன ஸஹ பாடா²னாருள்ஹதம். விஜ்ஜமானஸ்ஸ ஸதோதி விஜ்ஜமானஸ்ஸ ஸமானஸ்ஸாதி இமமத்த²ம் த³ஸ்ஸேந்தோ ‘‘விஜ்ஜமானபூ⁴தஸ்ஸாதி அத்தோ²’’தி ஆஹ. ததா²தி ஸச்சிகட்ட²பரமத்த²வஸேன அவிஜ்ஜமானஸ்ஸ அனுபலப்³ப⁴மானஸ்ஸ. தம் பன அனுபலப்³ப⁴மானதம் ததா²-ஸத்³தே³ன ப்³யதிரேகவஸேன தீ³பிதம் பாகடதரம் காதும் ‘‘யதா² குஸலாதீ³னீ’’திஆதி³மாஹ. தத்த² வினிவத்தஸபா⁴வானீதி விப⁴த்தஸபா⁴வானி. உபலத்³தீ⁴தி க³ஹணம். தேனாகாரேனாதி தேன ரூபவேத³னாதி³ஆகாரேன அவிஜ்ஜமானஸ்ஸ. அஞ்ஞேனாகாரேனாதி ததோ ரூபவேத³னாதி³தோ அஞ்ஞேன தப்³பி³னிமுத்தேன பஞ்ஞாபேதப்³ப³பஞ்ஞாபனாகாரேன விஜ்ஜமானஸ்ஸ. பஞ்ஞத்திது³கே வுத்தமேவ ‘‘அயஞ்ச வாதோ³ ஸேவத்தி²கதா²ய படிஸித்³தோ⁴’’திஆதி³னா. லோகனிருத்திமத்தஸித்³த⁴ஸ்ஸாதி ஏத்த² மத்தக்³க³ஹணம் தஸ்ஸ பஞ்ஞத்திவத்து²ஸ்ஸ ந கேவலம் விஜ்ஜமானஸபா⁴வதானிவத்தனத்த²மேவ, அத² கோ² விபரீதக்³கா³ஹனிவத்தனத்த²ம்பீதி த³ஸ்ஸேந்தோ ‘‘அனபி⁴னிவேஸேன சித்தேனா’’தி ஆஹ. சதுஸச்சபஞ்சக்க²ந்தா⁴தி³வினிமுத்தம் ஸச்சந்தரக²ந்த⁴ந்தராதி³கம் பஞ்சமஸச்சாதி³கம். ஸசே தம் கோசி அத்தீ²தி படிஜானேய்ய, அயாதா²வக³ஹிதஸ்ஸ தம் வாசாவத்து²மத்தமேவஸ்ஸாதி த³ஸ்ஸேந்தோ ஆஹ ‘‘ஸாபி⁴னிவேஸேன…பே… வுத்த’’ந்தி. உத்³தே³ஸே நித்³தே³ஸே ச ஸத்தவந்தம் பதா⁴னபா⁴வேன ஆக³மனம் ஸந்தா⁴யாஹ ‘‘ஸரூபதோ திஸ்ஸன்னம் ஆக³தத’’ந்தி. கு³ணபா⁴வேன பன உத்³த⁴ம்ஸோதபஞ்ஞாவிமுத்தபாஸாணலேகா²தி³க்³க³ஹணேஸு இதராபி திஸ்ஸோ பஞ்ஞத்தியோ இமஸ்மிம் பகரணே ஆக³தா ஏவ.

யதா²வுத்தஸ்ஸ…பே… அவிரோதே⁴னாதி ‘‘விஜ்ஜமானபஞ்ஞத்தி அவிஜ்ஜமானபஞ்ஞத்தீ’’தி ஏவம் வுத்தப்பகாரஸ்ஸ அவிலோமனேன. ஆசரியவாதா³தி சேத்த² அத்தனோமதியோ வேதி³தப்³பா³, அஞ்ஞத்த² பன அட்ட²கதா² ச. யதா² ச அவிரோதோ⁴ ஹோதி, தம் த³ஸ்ஸேந்தோ ‘‘தஸ்மா’’திஆதி³மாஹ. தத்த² அவிஜ்ஜமானத்தா பஞ்ஞாபேதப்³ப³மத்தத்தே²ன பஞ்ஞத்தீதி ஏதேன ‘‘அவிஜ்ஜமானா பஞ்ஞத்தி அவிஜ்ஜமானபஞ்ஞத்தீ’’தி இமம் ஸமாஸவிகப்பமாஹ. அவிஜ்ஜமானபஞ்ஞத்தீதி ஏத்த² ஹி த்³வே ஸமாஸா அவிஜ்ஜமானஸ்ஸ, அவிஜ்ஜமானா வா பஞ்ஞத்தீதி அவிஜ்ஜமானபஞ்ஞத்தி. தேஸு புரிமேன நாமபஞ்ஞத்தி வுத்தா, து³தியேன உபாதா³பஞ்ஞத்திஆதி³பே⁴தா³ இதராபி. ஸஸபா⁴வம் வேத³னாதி³கம். தஜ்ஜபரமத்த²னாமலாப⁴தோதி தஜ்ஜஸ்ஸ தத³னுரூபஸ்ஸ பரமத்த²ஸ்ஸ அன்வத்த²ஸ்ஸ நாமஸ்ஸ லப⁴னதோ, அனுப⁴வனாதி³ஸபா⁴வானம் த⁴ம்மானம் பரமத்தி²கஸ்ஸ வேத³னாதி³னாமஸ்ஸ லப⁴னத்தாதி அத்தோ². ஏதேன விஸேஸனிவத்திஅத்தோ² மத்த-ஸத்³தோ³, தேன சாயம் விஸேஸோ நிவத்திதோதி த³ஸ்ஸேதி. பரதோ லபி⁴தப்³ப³ந்தி பரம் உபாதா³ய லத்³த⁴ப்³ப³ம் யதா² ரூபாதி³கே உபாதா³ய ஸத்தோதி நிஸ்ஸபா⁴வஸமூஹஸந்தானாதி³ பஞ்ஞத்திவத்து². ஏகத்தேனாதி அனஞ்ஞத்தேன. அனுபலப்³ப⁴ஸபா⁴வதா ஞாணேன அக்³க³ஹேதப்³ப³ஸபா⁴வதா, யதோ தே நவத்தப்³பா³தி வுச்சந்தி.

ஸஸூகஸாலிராஸிஆதி³ஆகாரேன ஸம்குசிதக்³கோ³ வாஸவவாஸுதே³வாதீ³னம் விய மோலிவிஸேஸோ கிரீடம், ஸோ பன மகுடவிஸேஸோபி ஹோதியேவாதி ஆஹ ‘‘கிரீடம் மகுட’’ந்தி. ஸப்³ப³ஸமோரோதோ⁴தி ஸப்³பா³ஸம் விஜ்ஜமானபஞ்ஞத்திஆதீ³னம் ச²ன்னம் பஞ்ஞத்தீனம் அந்தோகரணம். ஸங்கா²தப்³ப³ப்பதா⁴னத்தாதி இத³ம் லக்க²ணவசனம். ந ஹி ஸப்³பா³பி உபனிதா⁴பஞ்ஞத்திஸங்கா²வஸேன பவத்தா, நாபி ஸப்³பா³ ஸங்கா²தப்³ப³ப்பதா⁴னா. து³தியம் ததியந்திஆதி³கம் பன உபனிதா⁴பஞ்ஞத்தியா, த்³வே தீணீதிஆதி³கம் உபனிக்கி²த்தபஞ்ஞத்தியா ஏகதே³ஸம் உபலக்க²ணவஸேன த³ஸ்ஸேந்தோ தஸ்ஸ ச ஸங்க்²யேய்யப்பதா⁴னதாயாஹ ‘‘ஸங்கா²தப்³ப³ப்பதா⁴னத்தா’’தி. பூரணத்தோ² ஹி ஸத்³தோ³ தத³த்த²தீ³பனமுகே²ன பூரேதப்³ப³மத்த²ம் தீ³பேதி. ஸோ ச ஸங்கா²விஸயோ பதா⁴னோவாதி து³தியாதீ³னம் பஞ்ஞத்தீனம் ஸங்கா²தப்³ப³ப்பதா⁴னதா வுத்தா. யாவ ஹி த³ஸஸங்கா² ஸங்க்²யேய்யப்பதா⁴னாதி. ததா² த்³வே தீணீதிஆதீ³னம்பி பஞ்ஞத்தீனம். ஸங்கா²தப்³போ³ பன அத்தோ² கோசி விஜ்ஜமானோ, கோசி அவிஜ்ஜமானோ, கோசி ஸஹ விஸுஞ்ச தது³ப⁴யம் மிஸ்ஸோதி ச²பி பஞ்ஞத்தியோ ப⁴ஜதீதி.

இதராதி உபாதா³ஸமோதா⁴னதஜ்ஜாஸந்ததிபஞ்ஞத்தியோ வுத்தாவஸேஸா உபனிதா⁴பஞ்ஞத்திஉபனிக்கி²த்தபஞ்ஞத்தியோ ச. ஸத்தரதா²தி³பே⁴தா³ உபாதா³பஞ்ஞத்தி, தீ³க⁴ரஸ்ஸாதி³பே⁴தா³ உபனிதா⁴பஞ்ஞத்தி ச அவிஜ்ஜமானபஞ்ஞத்தி. ஹத்த²க³தாதி³விஸிட்டா² உபனிதா⁴பஞ்ஞத்தி, ஸமோதா⁴னபஞ்ஞத்தி ச அவிஜ்ஜமானேனஅவிஜ்ஜமானபஞ்ஞத்தி. ததே²வ ‘‘ஸுவண்ணவண்ணோ ப்³ரஹ்மஸ்ஸரோ’’திஆதி³கா விஜ்ஜமானக³ப்³பா⁴ விஜ்ஜமானேனஅவிஜ்ஜமானபஞ்ஞத்திம் ப⁴ஜந்தீதி ஆஹ ‘‘யதா²யோக³ம் தம் தம் பஞ்ஞத்தி’’ந்தி. தேன வுத்தம் ‘‘து³தியம் ததியம்…பே… ப⁴ஜந்தீ’’தி. யஞ்ஹீதிஆதி³ யதா²வுத்தஉபனிதா⁴உபனிக்கி²த்தபஞ்ஞத்தீனம் அவிஜ்ஜமானேனஅவிஜ்ஜமானபஞ்ஞத்திபா⁴வஸமத்த²னம். தத்த² தஞ்ச ஸங்கா²னந்தி யம் ‘‘பட²மம் ஏக’’ந்திஆதி³கம் ஸங்கா²னம், தஞ்ச ஸங்கா²முகே²ன க³ஹேதப்³ப³ரூபம். ச-ஸத்³தே³ன ஸங்க்²யேய்யம் ஸங்க³ண்ஹாதி. தம்பி ஹி பஞ்ஞாபேதப்³ப³ம் பஞ்ஞத்தீதி. தஸ்ஸா பன பரமத்த²தோ அபா⁴வோ வுத்தோயேவ. கிஞ்சி நத்தீ²தி பரமத்த²தோ கிஞ்சி நத்தி². ததா²தி இமினா அவிஜ்ஜமானேனஅவிஜ்ஜமானபா⁴வந்தி ஏதம் ஆகட்³ட⁴தி. தேனாஹ ‘‘ந ஹி…பே… விஜ்ஜமானோ’’தி.

ஓகாஸேதி அவீசிபரனிம்மிதவஸவத்தீபரிச்சி²ன்னே பதே³ஸே. ஸோ ஹி காமாதி⁴ட்டா²னதோ ‘‘காமோ’’தி வுச்சதி. கம்மனிப்³ப³த்தக்க²ந்தே⁴ஸூதி இமினா உத்தரபத³லோபேன காமப⁴வம் ‘‘காமோ’’தி வத³தி. ப⁴ணனம் ஸத்³தோ³ சேதனா வா, தம்ஸமங்கி³தாய தப்³பி³ஸிட்டே² புக்³க³லே பா⁴ணகோதி பஞ்ஞத்தீதி ஆஹ ‘‘விஜ்ஜமானேனஅவிஜ்ஜமானபஞ்ஞத்திபக்க²ம் ப⁴ஜதீ’’தி. யேபு⁴ய்யேன ரூபாயதனக்³க³ஹணமுகே²ன ரூபஸங்கா²தேன ஸண்டா²னம் க³ய்ஹதீதி தஸ்ஸ தேன அபே⁴தோ³பசாரம் கத்வா வுத்தம் ‘‘ரூபாயதனஸங்கா²தேன ஸண்டா²னேனா’’தி. யம் அபே⁴தோ³பசாரம் பி⁴ந்தி³தும் அஜானந்தா நிகாயந்தரியா ரூபாயதனம் ஸண்டா²னஸபா⁴வம் படிஜானந்தி. ‘‘கிஸோ புக்³க³லோ, தூ²லோ புக்³க³லோ, கிஸோ த³ண்டோ³, தூ²லோ த³ண்டோ³’’திஆதி³னா புக்³க³லாதீ³னம் பஞ்ஞாபனா ததா²ததா²ஸன்னிவிட்டே² ரூபஸங்கா²தே கிஸாதி³ஸண்டா²னபஞ்ஞத்தி, ந ரூபாயதனமத்தேதி ஆஹ ‘‘ஸண்டா²னந்தி வா ரூபாயதனே அக்³க³ஹிதே’’தி. பச்சத்தத⁴ம்மனாமவஸேனாதி ‘‘பத²வீ ப²ஸ்ஸோ’’திஆதி³னா த⁴ம்மானம் தம்தம்னாமவஸேன. கிச்சபஞ்ஞத்திஆதி³விபா⁴கே³ன பவத்தோ அயம்பி ஆசரியவாதோ³ ‘‘கிச்சபஞ்ஞத்தி ஏகச்சா பூ⁴மிபஞ்ஞத்தி பச்சத்தபஞ்ஞத்தி அஸங்க²தபஞ்ஞத்தி ச விஜ்ஜமானபஞ்ஞத்தி, லிங்க³பஞ்ஞத்தி ஏகச்சா பச்சத்தபஞ்ஞத்தி ச அவிஜ்ஜமானபஞ்ஞத்தி, ஏகச்சா கிச்சபஞ்ஞத்தி விஜ்ஜமானேனஅவிஜ்ஜமானபஞ்ஞத்தி, ஏகச்சா பூ⁴மிஸண்டா²னபஞ்ஞத்தி விஜ்ஜமானேன வா அவிஜ்ஜமானேன வா அவிஜ்ஜமானபஞ்ஞத்தீ’’தி த³ஸ்ஸிதத்தா ‘‘த⁴ம்மகதா² இத்தி²லிங்க³’’ந்திஆதீ³னம் விஜ்ஜமானேனவிஜ்ஜமானபஞ்ஞத்திபா⁴வோ, அவிஜ்ஜமானேனஅவிஜ்ஜமானபஞ்ஞத்திபா⁴வோ ச த³ஸ்ஸிதனயோதி ஆஹ ‘‘ஸப்³ப³ஸங்கா³ஹகோதி த³ட்ட²ப்³போ³’’தி. உபாதா³பஞ்ஞத்திஆதி³பா⁴வோ சேத்த² கிச்சபஞ்ஞத்திஆதீ³னம் கிச்சபஞ்ஞத்திஆதி³பா⁴வோ ச தாஸம் யதா²ரஹம் விபா⁴வேதப்³போ³.

2. ஸங்கே²பப்பபே⁴த³வஸேனாதி ‘‘யாவதா பஞ்சக்க²ந்தா⁴’’தி ஸப்³பே³பி க²ந்தே⁴ க²ந்த⁴பா⁴வஸாமஞ்ஞேன ஸம்கி²பனவஸேன, ‘‘யாவதா ரூபக்க²ந்தோ⁴’’திஆதி³னா க²ந்தா⁴னம் ததோ ஸாமஞ்ஞதோ பகாரேஹி பி⁴ந்த³னவஸேன ச. அயம் அத்தோ²தி அயம் பஞ்ஞத்திஸங்கா²தோ அத்தோ². ஸாமஞ்ஞதோ வா ஹி த⁴ம்மானம் பஞ்ஞாபனம் ஹோதி விஸேஸதோ வா. விஸேஸோ சேத்த² அத்தனோ ஸாமஞ்ஞாபேக்கா²ய வேதி³தப்³போ³, விஸேஸாபேக்கா²ய பன ஸோபி ஸாமஞ்ஞம் ஸம்பஜ்ஜதீதி ‘‘கித்தாவதா க²ந்தா⁴னம் க²ந்த⁴பஞ்ஞத்தீ’’தி புச்சா²ய ஸங்கே²பதோ விஸ்ஸஜ்ஜனவஸேன ‘‘யாவதா பஞ்சக்க²ந்தா⁴’’தி வுத்தந்தி தத்தா²பி ‘‘க²ந்தா⁴னம் க²ந்த⁴பஞ்ஞத்தீ’’தி ஆனேத்வா யோஜேதப்³ப³ந்தி ஆஹ ‘‘யாவதா…பே… பஞ்ஞத்தீ’’தி. ‘‘யாவதா பஞ்சக்க²ந்தா⁴, ஏத்தாவதா க²ந்தா⁴னம் க²ந்த⁴பஞ்ஞத்தி. யாவதா ரூபக்க²ந்தோ⁴…பே… விஞ்ஞாணக்க²ந்தோ⁴, ஏத்தாவதா க²ந்தா⁴னம் க²ந்த⁴பஞ்ஞத்தீ’’தி ஏவமேத்த² பாளியோஜனா காதப்³பா³. ஏவஞ்ஹி ஸங்கே²பதோ பபே⁴த³தோ ச க²ந்த⁴பஞ்ஞத்தி விஸ்ஸஜ்ஜிதா ஹோதி. ததா² ஹி இமஸ்ஸேவ அத்த²ஸ்ஸ அட்ட²கதா²யம் வுத்தபா⁴வம் த³ஸ்ஸேந்தோ ‘‘யத்தகேன…பே… ஆதி³கேனா’’தி ஆஹ. தத்தா²தி தஸ்மிம் விஸ்ஸஜ்ஜனஸ்ஸ அத்த²வசனே, தஸ்மிம் வா விஸ்ஸஜ்ஜனபாடே² தத³த்த²வசனே ச. பபே⁴த³னித³ஸ்ஸனமத்தந்தி பபே⁴த³ஸ்ஸ உதா³ஹரணமத்தம். அவுத்தோபி ஸப்³போ³ பூ⁴துபாதி³கோ, ஸுகா²தி³கோ ச பபே⁴தோ³. தம் பன பூ⁴மிமுகே²ன த³ஸ்ஸேதும் ‘‘ரூபக்க²ந்தோ⁴ காமாவசரோ’’திஆதி³ வுத்தந்தி த³ட்ட²ப்³ப³ம்.

ஏவம் அட்ட²கதா²யம் ஆக³தனயேன பாளியா அத்த²யோஜனம் த³ஸ்ஸேத்வா இதா³னி தம் பகாரந்தரேன த³ஸ்ஸேதும் ‘‘அயம் வா’’திஆதி³ வுத்தம். தத்த² அயம் வாதி வுச்சமானம் ஸந்தா⁴யாஹ. ஏத்தா²தி ஏதஸ்மிம் க²ந்த⁴பஞ்ஞத்திவிஸ்ஸஜ்ஜனே. இத³ந்தி இத³ம் பத³ம். யத்தகோ…பே… க²ந்த⁴பஞ்ஞத்தியா பபே⁴தோ³தி இமினா ஸங்கே²பதோ வித்தா²ரதோ ச க²ந்தா⁴னம் பபே⁴த³ம் பதி பஞ்ஞத்திவிபா⁴கோ³தி த³ஸ்ஸிதம் ஹோதி. தேனாஹ ‘‘வத்து²பே⁴தே³ன…பே… த³ஸ்ஸேதீ’’தி. பகரணந்தரேதி விப⁴ங்க³பகரணே. தத்த² ஹி ஸாதிஸயம் க²ந்தா⁴னம் விபா⁴க³பஞ்ஞத்தி வுத்தா. தேனாஹ அட்ட²கதா²யம் ‘‘ஸம்மாஸம்பு³த்³தே⁴ன ஹி…பே… கதி²தா’’தி. ஏத்த² ச பட²மனயே ஸமுகே²ன, து³தியே வத்து²முகே²ன பஞ்ஞத்தியா விபா⁴கா³ த³ஸ்ஸிதாதி அயமேதேஸம் விஸேஸோ.

ஏஸ நயோதி இமினா க²ந்த⁴பஞ்ஞத்தியா வுத்தமத்த²ம் ஆயதனபஞ்ஞத்தியாதீ³ஸு அதிதி³ஸதி. தத்த² ‘‘யாவதா பஞ்சக்க²ந்தா⁴’’தி, ‘‘க²ந்தா⁴னம் க²ந்த⁴பஞ்ஞத்தீ’’தி இத³ம் பஞ்ஞத்தினித்³தே³ஸபாளியா ஆதி³பரியோஸானக்³க³ஹணமுகே²ன த³ஸ்ஸனம். ‘‘யாவதா த்³வாத³ஸாயதனானீ’’தி, ‘‘ஆயதனானம் ஆயதனபஞ்ஞத்தீ’’தி இமஸ்ஸ அத்தோ² ‘‘யத்தகேன பஞ்ஞாபனேன ஸங்கே²பதோ த்³வாத³ஸாயதனானீ’’தி ஏதேன த³ஸ்ஸிதோ, ‘‘யாவதா சக்கா²யதன’’ந்திஆதி³கஸ்ஸ பன ‘‘பபே⁴த³தோ சக்கா²யதன’’ந்திஆதி³கேனாதி. தத்த² ‘‘சக்கா²யதனம்…பே… த⁴ம்மாயதன’’ந்தி பபே⁴த³னித³ஸ்ஸனமத்தமேதம். ஏதேன அவுத்தோபி ஸப்³போ³ ஸங்க³ஹிதோ ஹோதீதி ‘‘தத்ராபி த³ஸாயதனா காமாவசரா’’திஆதி³ வுத்தம். அயம் வா ஏத்த² பாளியா அத்த²யோஜனா – ‘‘யாவதா’’தி இத³ம் ஸப்³பே³ஹி பதே³ஹி யோஜேத்வா ‘‘யத்தகானி த்³வாத³ஸாயதனானி…பே… யத்தகோ த்³வாத³ஸன்னம் ஆயதனானம், தப்பபே⁴தா³னஞ்ச சக்கா²யதனாதீ³னம் பபே⁴தோ³, தத்தகோ ஆயதனானம் ஆயதனபஞ்ஞத்தியா பபே⁴தோ³’’தி பகரணந்தரே வுத்தேன வத்து²பபே⁴தே³ன ஆயதனபஞ்ஞத்தியா பபே⁴த³ம் த³ஸ்ஸேதீதிஆதி³னா இதரபஞ்ஞத்தீஸுபி நயோ யோஜேதப்³போ³.

7. ‘‘ச² பஞ்ஞத்தியோ…பே… புக்³க³லபஞ்ஞத்தீ’’தி இமம் அபேக்கி²த்வா ‘‘கித்தாவதா…பே… ஏத்தாவதா இந்த்³ரியானம் இந்த்³ரியபஞ்ஞத்தீ’’தி அயம் பாளிபதே³ஸோ நித்³தே³ஸோபி ஸமானோ பகரணந்தரே வத்து²பே⁴தே³ன வுத்தம் க²ந்தா⁴தி³பஞ்ஞத்திப்பபே⁴த³ம் உபாதா³ய உத்³தே³ஸோயேவ ஹோதீதி ஆஹ ‘‘உத்³தே³ஸமத்தேனேவாதி அத்தோ²’’தி.

மாதிகாவண்ணனா நிட்டி²தா.