1. க²ந்த⁴பத³வண்ணனா

6. ‘‘அபி⁴ஞ்ஞேய்யத⁴ம்மபா⁴வேன வுத்தா சத்தாரோ க²ந்தா⁴ ஹோந்தீ’’திஆதி³னா, ‘‘ரூபக்க²ந்தோ⁴ அபி⁴ஞ்ஞேய்யோ’’திஆதி³னா ச அபி⁴ஞ்ஞாதலக்க²ணவிஸயாதி ஆஹ ‘‘ஸபா⁴வதோ அபி⁴ஞ்ஞாதான’’ந்தி. பரிஞ்ஞேய்யதாதீ³தி ஆதி³-ஸத்³தே³ன பஹாதப்³ப³ஸச்சி²காதப்³ப³பா⁴வேதப்³ப³தா ஸங்க³ய்ஹதி. அதி⁴பதியாதீ³தி அதி⁴பதிபச்சயபா⁴வஉபட்டா²னபத³ஹனாதீ³னி. ஸச்சாதி³விஸேஸோ வியாதி து³க்க²ஸச்சாதி³பரியாயோ அபி⁴ஞ்ஞேய்யபீளனட்டா²தி³விஸேஸோ விய. ஏவஞ்ச கத்வாதி நயமுக²மாதிகாய அபி⁴ஞ்ஞேய்யனிஸ்ஸயேன வுச்சமானத்தா ஏவ. தேஸம் ரூபத⁴ம்மானம் பஞ்சன்னம் க²ந்தா⁴னம் க²ந்த⁴பா⁴வேன விய ரூபக்க²ந்த⁴பா⁴வேன ஸபா⁴க³தா ஹோதி, ந வேத³னாக்க²ந்தா⁴தி³பா⁴வேனாதி ஸங்க³ஹலக்க²ணமாஹ. இதீதி தஸ்மா, யஸ்மா ரூபத⁴ம்மா அஞ்ஞமஞ்ஞம் ரூபக்க²ந்த⁴பா⁴வேன ஸபா⁴கா³, தஸ்மாதி அத்தோ². ரூபக்க²ந்த⁴பா⁴வஸங்கா²தேன ரூபக்க²ந்த⁴பா⁴வேன அத்த²முகே²னேவ க³ஹணே. ஸத்³த³த்³வாரேன பன க³ஹணே ரூபக்க²ந்த⁴வசனஸங்கா²தேன வா ரூபக்க²ந்த⁴வசனவசனீயதாஸங்கா²தேன. இதா³னி தமேவத்த²ம் பாகடதரம் காதும் ‘‘ரூபக்க²ந்தோ⁴தி ஹீ’’திஆதி³ வுத்தம்.

புரிமேனாதி ரூபக்க²ந்தே⁴ன. ஸஞ்ஞாக்க²ந்த⁴மூலகாதிஆதீ³ஸு ‘‘புரிமேன யோஜியமானே’’திஆதி³ம் ஆனேத்வா யதா²ரஹம் யோஜேதப்³ப³ம். அபே⁴த³தோ பஞ்சகபுச்சா²விஸ்ஸஜ்ஜனம் க²ந்த⁴பத³னித்³தே³ஸே ஸப்³ப³பச்சி²மமேவாதி ஆஹ ‘‘பே⁴த³தோ பஞ்சகபுச்சா²விஸ்ஸஜ்ஜனானந்தர’’ந்தி.

ஆயதனபதா³தி³வண்ணனா

40. யதி³பி ஏககேபி ஸதி³ஸம் விஸ்ஸஜ்ஜனம் விஸ்ஸஜ்ஜனம் ஸமுத³யமக்³க³ஸச்சானம் ‘‘ஸமுத³யஸச்சம் ஏகேன க²ந்தே⁴ன…பே… மக்³க³ஸச்சம் ஏகேன க²ந்தே⁴ன ஏகேனாயதனேன ஏகாய தா⁴துயா ஸங்க³ஹிதம், சதூஹி க²ந்தே⁴ஹி ஏகாத³ஸஹி ஆயதனேஹி ஸத்தரஸஹி தா⁴தூஹி அஸங்க³ஹித’’ந்தி (தா⁴து. 41) நித்³தி³ட்ட²த்தா. ஏத்தா²தி ஏதஸ்மிம் இந்த்³ரியபத³னித்³தே³ஸே. சக்கு²ஸோதசக்கு²ஸுகி²ந்த்³ரியது³கானந்தி சக்கு²ஸோதது³கம் சக்கு²ஸுகி²ந்த்³ரியது³கந்தி ஏதேஸம் து³கானம். சக்கு²ஸோதஸுகி²ந்த்³ரியானஞ்ஹி ‘‘ஏகேன க²ந்தே⁴ன ஏகேனாயதனேன ஏகாய தா⁴துயா ஸங்க³ஹிதம், சதூஹி க²ந்தே⁴ஹி ஏகாத³ஸஹி ஆயதனேஹி ஸத்தரஸஹி தா⁴தூஹி அஸங்க³ஹித’’ந்தி ஏககே ஸதி³ஸம் விஸ்ஸஜ்ஜனம். சக்கு²ஸோதிந்த்³ரியது³கஸ்ஸ பன ‘‘சக்கு²ந்த்³ரியஞ்ச ஸோதிந்த்³ரியஞ்ச ஏகேன க²ந்தே⁴ன த்³வீஹாயதனேஹி த்³வீஹி தா⁴தூஹி ஸங்க³ஹிதா, சதூஹி க²ந்தே⁴ஹி த³ஸஹாயதனேஹி ஸோளஸஹி தா⁴தூஹி அஸங்க³ஹிதா’’தி, ‘‘சக்கு²ந்த்³ரியஞ்ச ஸுகி²ந்த்³ரியஞ்ச த்³வீஹி க²ந்தே⁴ஹி த்³வீஹாயதனேஹி த்³வீஹி தா⁴தூஹி ஸங்க³ஹிதா, தீஹி க²ந்தே⁴ஹி த³ஸஹாயதனேஹி ஸோளஸஹி தா⁴தூஹி அஸங்க³ஹிதா’’தி சக்கு²ஸுகி²ந்த்³ரியது³கஸ்ஸ ச அஸதி³ஸம் விஸ்ஸஜ்ஜனம். நாபி து³கேஹி திகஸ்ஸாதி சக்கு²ஸோதசக்கு²ஸுகி²ந்த்³ரியாதி³து³கேஹி சக்கு²ஸோதஸுகி²ந்த்³ரியாதி³திகஸ்ஸ நாபி ஸதி³ஸம் விஸ்ஸஜ்ஜனம். இதா⁴தி ஸச்சபத³னித்³தே³ஸே. திகேன சாதி து³க்க²ஸமுத³யமக்³கா³தி³திகேன ச. ‘‘பஞ்சஹி க²ந்தே⁴ஹி த்³வாத³ஸஹாயதனேஹி அட்டா²ரஸஹி தா⁴தூஹி ஸங்க³ஹிதா, ந கேஹிசி க²ந்தே⁴ஹி ந கேஹிசி ஆயதனேஹி ந காஹிசி தா⁴தூஹி அஸங்க³ஹிதா’’தி ஸதி³ஸம் விஸ்ஸஜ்ஜனம்.