2. ரூபகண்ட³ம்

உத்³தே³ஸவண்ணனா

கேனசீதி ரூபேன வா அரூபேன வா. சித்துப்பாதே³ன தாவ ரூபஸ்ஸ ஸமயவவத்தா²னம் ந ஸக்கா காதும் அப்³யாபிதாய அனேகந்திகதாய சாதி இமமத்த²ம் த³ஸ்ஸேந்தோ ‘‘அசித்தஸமுட்டா²னஸப்³பா⁴வதோ’’திஆதி³மாஹ. தத்த² அசித்தஸமுட்டா²னம் ரூபம் சித்தஸ்ஸ தீஸு க²ணேஸு உப்பஜ்ஜதீதி இமஸ்மிம் தாவ வாதே³ சித்துப்பத்திஸமயேன ரூபூபபத்திஸமயஸ்ஸ வவத்தா²னம் மா ஹோது, சித்தஸ்ஸ உப்பாத³க்க²ணேயேவ ஸப்³ப³ம்பி ரூபம் உப்பஜ்ஜதீதி இமஸ்மிம் பன வாதே³ கத²ந்தி? ஏத்தா²பி அசித்தஸமுட்டா²னம் ரூபம் சித்தேன ஸஹுப்பாதே³பி அனிந்த்³ரியப³த்³த⁴ரூபம் விய அசித்தபடி ப³ந்து⁴ப்பாத³தாய ந சித்தேன வவத்தா²பேதப்³ப³ஸமயந்தி வுத்தம் ‘‘அசித்தஸமுட்டா²னஸப்³பா⁴வதோ’’தி. தேன சித்துப்பாதே³ன ரூபஸ்ஸ ஸமயவவத்தா²னம் ந ப்³யாபீதி த³ஸ்ஸேதி. அனேகசித்தஸமுட்டா²னதாய வவத்தா²னாபா⁴வதோதி ஸம்ப³ந்தோ⁴. நியதே ஹி ஸமுட்டா²பகசித்தே சித்தஸமுட்டா²னரூபஸ்ஸ ஸியா வவத்தா²னந்தி.

கேஸஞ்சீதி காமாவசரகுஸலாதீ³னம். கத்த²சீதி ஆருப்பே. கேஸஞ்சீதி வா கேஸஞ்சி பஞ்சவோகாரவிபாகானம். கத்த²சீதி படிஸந்தி⁴க்க²ணே சரிமக்க²ணே ச. ‘‘தஸ்மிம் ஸமயே ப²ஸ்ஸோ ஹோதீ’’திஆதி³னா (த⁴. ஸ. 1) சித்தஸஹபா⁴வினம் ஏவ சித்தேன ஸமயவவத்தா²னம் கதந்தி வுத்தம் ‘‘அசித்தஸஹபு⁴பா⁴வதோ’’தி. தேஸந்தி உபாதா³ரூபானம். யோ யஸ்ஸ ஸஹபா⁴வேன உபகாரகோ, ஸோ ஏவ தஸ்ஸ ஸமயவவத்தா²பகபா⁴வேன வுத்தோதி ஆஹ ‘‘ஸஹஜாத…பே… த்தனதோ’’தி. நாபி மஹாபூ⁴தேஹீதிஆதி³னா வவத்தா²னாபா⁴வமேவ த³ஸ்ஸேதி. கேஸஞ்சீதி அகம்மஜாதீ³னம். கேஹிசீதி கம்மஜாதீ³ஹி. பவத்திதோதி பவத்தனதோ. ஸஹாதி ஏகஸ்மிம் காலே. அபா⁴வாதி நியோக³தோ அபா⁴வா.

விஞ்ஞத்தி …பே… ந ஸக்கா வத்தும் மஹாபூ⁴தேஹி ஸமயவவத்தா²னே கரியமானே தேஹி அயாவபா⁴விததாயாதி அதி⁴ப்பாயோ. ஏகஸ்மிம் காலேதிஆதி³னாபி மஹாபூ⁴தேஹி ஸமயனியமனே வவத்தா²னாபா⁴வமேவ விபா⁴வேதி. ‘‘ததா² விப⁴ஜனத்த²’’ந்தி, ‘‘அவிப⁴த்தம் அப்³யாகதம் அத்தீ²தி த³ஸ்ஸேது’’ந்தி ச இமேஸம் பதா³னம் ‘‘விப⁴த்தம் அவிப⁴த்தஞ்ச ஸப்³ப³ம் ஸங்க³ண்ஹந்தோ ஆஹா’’தி இமினா ஸம்ப³ந்தோ⁴. ஸமயவவத்தா²னம் கத்வா நித்³தி³ஸியமானஸ்ஸ நிப்பதே³ஸதாய அஸம்ப⁴வதோ ஏகதே³ஸம் நித்³தி³ஸித்வா ஸாமஞ்ஞேன நிக³மனம் யுத்தம், அகத்வா பன ஸமயவவத்தா²னம் ஸரூபதோ நித்³தி³ஸனேன ததா²தி இமமத்த²ம் ஆஹ ‘‘ஸமயவவத்தா²னேனா’’திஆதி³னா. அவிப⁴த்தேதி விபாககிரியாப்³யாகதம் விய ந புப்³பே³ விப⁴த்தே. விப⁴ஜிதப்³பே³தி பே⁴த³வந்ததாய விப⁴ஜனாரஹே. த³ஸ்ஸிதேதி உத்³தி³ஸனவஸேன த³ஸ்ஸிதே. வுத்தமேவத்த²ம் வித்தா²ரதரேன த³ஸ்ஸேதும் ‘‘ஏத்த² பனா’’திஆதி³மாஹ.

விபாகாதி³த⁴ம்மானம் நயனம் நயோ, ஸோவ த³ஸ்ஸனந்தி நயத³ஸ்ஸனம். ‘‘தே³ஸனா’’தி வுத்தம் ஹேட்டா² க³ஹணமேவ நயத³ஸ்ஸனந்தி. து³தியவிகப்பே பன காமாவசராதி³பா⁴வேன நீயதீதி நயோ, கிரியாப்³யாகதம். தஸ்ஸ த³ஸ்ஸனம் நயத³ஸ்ஸனந்தி யோஜேதப்³ப³ம். து³காதீ³ஸு நித்³தே³ஸவாரே ச ஹத³யவத்து²னோ அனாக³தத்தா தம் அக்³க³ஹேத்வா பட²மவிகப்போ வுத்தோ, ஏககே பன வத்து²பி க³ஹிதந்தி ‘‘ஹத³யவத்து²ஞ்சா’’தி து³தியவிகப்பே வுத்தம். கிம் பன காரணம் து³காதீ³ஸு நித்³தே³ஸவாரே ச ஹத³யவத்து² ந க³ஹிதந்தி? இதரவத்தூ²ஹி அஸமானக³திகத்தா தே³ஸனாபே⁴த³தோ ச. யதா² ஹி சக்கு²விஞ்ஞாணாதீ³னி ஏகந்ததோ சக்கா²தி³னிஸ்ஸயானி, ந ஏவம் மனோவிஞ்ஞாணம் ஏகந்ததோ ஹத³யவத்து²னிஸ்ஸயம், நிஸ்ஸிதமுகே²ன ச வத்து²து³காதி³தே³ஸனா பவத்தா. யம்பி ஏகந்ததோ ஹத³யவத்து²னிஸ்ஸயம், தஸ்ஸ வஸேன ‘‘அத்தி² ரூபம் மனோவிஞ்ஞாணஸ்ஸ வத்தூ²’’திஆதி³னா து³காதீ³ஸு வுச்சமானேஸுபி தத³னுகூலஆரம்மணது³காத³யோ ந ஸம்ப⁴வந்தி. ந ஹி ‘‘அத்தி² ரூபம் மனோவிஞ்ஞாணஸ்ஸ ஆரம்மணம், அத்தி² ரூபம் ந மனோவிஞ்ஞாணஸ்ஸ ஆரம்மண’’ந்திஆதி³னா ஸக்கா வத்துந்தி வத்தா²ரம்மணது³கதே³ஸனா பி⁴ன்னக³திகா ஸியும், ஸமானக³திகா ச தா தே³ஸேதும் ப⁴க³வதோ அஜ்ஜா²ஸயோ. ஏஸா ஹி ப⁴க³வதோ தே³ஸனா பகதி. தேனேவ ஹி நிக்கே²பகண்டே³ சித்துப்பாத³விபா⁴கே³ன அவுச்சமானத்தா அவிதக்காவிசாரபத³விஸ்ஸஜ்ஜனே விசாரோதி வத்தும் ந ஸக்காதி அவிதக்கவிசாரமத்தபத³விஸ்ஸஜ்ஜனே லப்³ப⁴மானோபி விதக்கோ ந உத்³த⁴டோ, அஞ்ஞதா² விதக்கோ சாதி வத்தப்³ப³ம் ஸியாதி. ஏவம் இதரவத்தூ²ஹி அஸமானக³திகத்தா தே³ஸனாபே⁴த³தோ ச து³காதீ³ஸு உத்³தே³ஸே ந க³ஹிதம். உத்³தி³ட்ட²ஸ்ஸேவ ஹி நித்³தி³ஸனதோ நித்³தே³ஸேபி ந க³ஹிதம் ஹத³யவத்தூ²தி வத³ந்தி.

சக்கா²தி³த³ஸகா ஸத்தாதி சக்கு²ஸோதகா⁴னஜிவ்ஹாகாயஇத்தி²பா⁴வபுரிஸபா⁴வத³ஸகா ஸத்த, ஏகஸந்தானவஸேன வா சக்கு²ஸோதகா⁴னஜிவ்ஹாகாயபா⁴வவத்து²த³ஸகா ஸத்த. நிப்³பா³னஸ்ஸ அஸதிபி பரமத்த²தோ பே⁴தே³ பரிகப்பிதபே⁴தோ³பி பே⁴தோ³யேவ வோஹாரவிஸயேதி கத்வா ஸோபாதி³ஸேஸாதி³பே⁴தோ³ வுத்தோ.

584. கிஞ்சாபி அஞ்ஞத்த² குக்குடண்ட³ஸண்டா²னே பரிமண்ட³ல-ஸத்³தோ³ தி³ஸ்ஸதி, சக்கஸண்டா²னதா பன வட்டஸண்டா²னே சக்கவாளே வுச்சமானோ பரிமண்ட³ல-ஸத்³தோ³ வட்டபரியாயோ ஸியா. அனேகத்தா² ஹி ஸத்³தா³தி அதி⁴ப்பாயேனாஹ ‘‘வட்டம் பரிமண்ட³ல’’ந்தி. ஏத்த² ச ஸினேருயுக³ந்த⁴ராதீ³னம் ஸமுத்³த³தோ உபரிஅதோ⁴பா⁴கா³னம் வஸேன உப்³பே³தோ⁴ வுத்தோ, ஆயாமவித்தா²ரேஹிபி ஸினேரு சதுராஸீதியோஜனஸஹஸ்ஸபரிமாணோவ. யதா²ஹ ‘‘ஸினேரு, பி⁴க்க²வே, பப்³ப³தராஜா சதுராஸீதி யோஜனஸஹஸ்ஸானி ஆயாமேன, சதுராஸீதி யோஜனஸஹஸ்ஸானி வித்தா²ரேனா’’தி (அ. நி. 7.66). ஸினேரும் பாகாரபரிக்கே²பவஸேன பரிக்கி²பித்வா டி²தா யுக³ந்த⁴ராத³யோ, ஸினேருயுக³ந்த⁴ராதீ³னம் அந்தரேபி ஸீதஸமுத்³தா³ நாம. ‘‘தே விஸாலதோ யதா²க்கமம் ஸினேருஆதீ³னம் அச்சுக்³க³மனஸமானபரிமாணா’’தி வத³ந்தி.

கோடிஸதஸஹஸ்ஸசக்கவாளஸ்ஸேவ ஆணாகே²த்தபா⁴வோ த³ஸஸஹஸ்ஸசக்கவாளஸ்ஸ ஜாதிகே²த்தபா⁴வோ விய த⁴ம்மதாவஸேனேவ வேதி³தப்³போ³. விகப்பஸமானஸமுச்சயவிபா⁴வனேஸு விய அவதா⁴ரணே அனியமே ச வா-ஸத்³தோ³ வத்ததீதி ததா² யோஜனா கதா. அனேகத்தா² ஹி நிபாதாதி. தத்த² அனேகந்திகத்தோ² அனியமத்தோ².

ஸீலாதி³விஸுத்³தி⁴ஸம்பாத³னேன, சதுதா⁴துவவத்தா²னவஸேனேவ வா மஹாகிச்சதாய மஹந்தேன வாயாமேன. ஸதிபி லக்க²ணாதி³பே⁴தே³ ஏகஸ்மிம் ஏவ காலே ஏகஸ்மிம் ஸந்தானே அனேகஸதஸஹஸ்ஸகலாபவுத்திதோ மஹந்தானி ப³ஹூனி பூ⁴தானி பரமத்த²தோ விஜ்ஜமானானீதி வா மஹாபூ⁴தானி யதா² ‘‘மஹாஜனோ’’தி. ஏவந்தி ‘‘உபாதா³ய பவத்த’’ந்தி அத்தே² ஸதி படிச்சஸமுப்பன்னதா வுத்தா ஹோதி பச்சயஸம்பூ⁴ததாதீ³பனதோ. உபாதா³யதீதி உபாதா³யதி ஏவாதி அதி⁴ப்பாயோ. தேனேவாஹ ‘‘ஏகந்தனிஸ்ஸிதஸ்ஸா’’தி. ‘‘ப⁴வதி ஹி நிஸ்ஸயரூபானம் ஸாமிபா⁴வோ’’தி ஆதா⁴ராதே⁴ய்யஸம்ப³ந்த⁴வசனிச்சா²ய அபா⁴வே ஆதா⁴ரபூ⁴தோபி அத்தோ² ஸம்ஸாமிஸம்ப³ந்த⁴வசனிச்சா²ய ஸாமிபா⁴வேன வுச்சதி யதா² ‘‘ருக்க²ஸ்ஸ ஸாகா²’’தி அதி⁴ப்பாயோ.

திவித⁴ரூபஸங்க³ஹவண்ணனா

585. விஞ்ஞத்திது³கோ சாதி ச-ஸத்³தே³ன சித்தஸஹபு⁴சித்தானுபரிவத்திது³காபி ஸங்க³ஹிதாதி வேதி³தப்³பா³. ஸக்கா ஹி ஏதேன நயேன…பே… விஞ்ஞாதுந்தி ஏத்த² பஞ்சவீஸாய தாவ வத்து²து³கேஸு பட²மது³கபஞ்சகாத³யோ சுத்³த³ஸஹிபி பகிண்ணகது³கேஹி அவஸிட்டே²ஹி வத்து²து³கேஹி பஞ்சவீஸாய ஆரம்மணது³கேஹி பஞ்சஹி பா³ஹிராயதனது³கேஹி ரூபதா⁴துது³காதீ³ஹி பஞ்சஹி தா⁴துது³கேஹி பச்சி²மகேஹி தீஹி இந்த்³ரியது³கேஹி த்³வாத³ஸஹிபி ஸுகு²மரூபது³கேஹி பட²மாதி³வஜ்ஜேஹி அவஸிட்டே²ஹி ஆயதனதா⁴துஇந்த்³ரியது³கேஹி ச யோஜனம் க³ச்ச²ந்தி. பஞ்சவீஸாய பன ஆரம்மணது³கேஸு புரிமகோ து³கபஞ்சகோ உபாதி³ன்னஉபாதி³ன்னுபாதா³னியஸனித³ஸ்ஸனசித்தஸமுட்டா²னசித்தஸஹபு⁴சித்தானுபரிவத்திது³கவஜ்ஜேஹி பகிண்ணகது³கேஹி ஸப்³பே³ஹிபி வத்து²து³கேஹி ரூபாயதனரூபதா⁴துது³கவஜ்ஜேஹி ஆயதனதா⁴துது³கேஹி ஸப்³பே³ஹிபி இந்த்³ரியது³கஸுகு²மரூபது³கேஹி யோஜனம் க³ச்ச²தி. து³தியது³கபஞ்சகாதீ³ஸு யதா²க்கமம் ஸத்³தா³யதனஸத்³த³தா⁴துது³காத³யோ யோஜனம் ந க³ச்ச²ந்தி, ரூபாயதனரூபதா⁴துது³காத³யோ க³ச்ச²ந்தி. பகிண்ணகது³கேஸு ஸனித³ஸ்ஸனது³கஞ்சாதி அயமேவ விஸேஸோ. யதா² ச வத்து²து³கேஸு, ஏவம் சக்கா²யதனசக்கு²தா⁴துசக்கு²ந்த்³ரியாதி³து³கபஞ்சகேஸு. யதா² ச ஆரம்மணது³கேஸு, ஏவம் ரூபாயதனரூபதா⁴துஆதி³து³கபஞ்சகேஸு திகயோஜனா. இத்தி²ந்த்³ரியபுரிஸிந்த்³ரியஜீவிதிந்த்³ரியது³கா ஸுகு²மரூபது³கா ச ஸப்³பே³ஹிபி து³கேஹி யோஜனம் க³ச்ச²ந்தீதி ஏவம் தாவ திகயோஜனா வேதி³தப்³பா³. நனு சாயம்பி யோஜனா ப⁴க³வதா ந தே³ஸிதாதி ந காதப்³பா³தி? நயித³ம் ஏகந்திகம். கஸ்மா? ப⁴க³வதா தி³ன்னனயேன யோஜனாபி ப⁴க³வதோயேவ தே³ஸனா. ததா² ஹி வுத்தம் மாதிகாவண்ணனாயம் (த⁴. ஸ. அட்ட². 1-6) ‘‘ஹேதூ சேவ த⁴ம்மா அஹேதுகா சாதி இத³ம்பி ஸம்ப⁴வதீ’’திஆதி³. ஸம்ப⁴வோ ஹி க³ஹணஸ்ஸ காரணந்தி ச.

திவித⁴ரூபஸங்க³ஹவண்ணனா நிட்டி²தா.

சதுப்³பி³தா⁴தி³ரூபஸங்க³ஹவண்ணனா

586. சித்ததோ ஏவ ஸமுட்டா²தீதி சித்தஸமுட்டா²னந்தி இமமேவ அத்த²ம் க³ஹேத்வா ‘‘விஞ்ஞத்திது³காதீ³ஹி ஸமானக³திகோ சித்தஸமுட்டா²னது³கோ’’தி வுத்தம். வினிவத்திதே ஹி ஸாமஞ்ஞே யம் ரூபம் ஜனகபச்சயேஸு சித்ததோ ஸமுட்டா²தி, தம் சித்ததோ ஏவ ஸமுட்டா²தீதி. விஞ்ஞத்திது³காதீ³ஹீதி ஆதி³-ஸத்³தே³ன சித்தஸஹபு⁴சித்தானுபரிவத்திது³கே ஸங்க³ண்ஹாதி. லப்³ப⁴மானோதி யம் தம் ரூபம் உபாதா³, தம் அத்தி² சித்தஸமுட்டா²னம், அத்தி² ந சித்தஸமுட்டா²னம். யம் தம் ரூபம் நுபாதா³, தம் அத்தி² சித்தஸமுட்டா²னம், அத்தி² ந சித்தஸமுட்டா²னந்தி ஏவம் லப்³ப⁴மானோ. ஸனித³ஸ்ஸனது³காதீ³னந்தி ஆதி³-ஸத்³தே³ன ஸப்படிக⁴மஹாபூ⁴தது³காத³யோ ஸங்க³ண்ஹாதி. தேனாதி சித்தஸமுட்டா²னது³கேன. தஸ்ஸாதி சித்தஸமுட்டா²னது³கஸ்ஸேவ. அஞ்ஞே பனாதி விஞ்ஞத்திசித்தஸமுட்டா²னசித்தஸஹபு⁴சித்தானுபரிவத்திது³கேஹி அஞ்ஞேபி பகிண்ணகது³கா.

ஸத்³தா³யதனஸ்ஸ ஏகந்ததோ அனுபாதி³ன்னத்தா ‘‘ஸோதஸம்ப²ஸ்ஸாரம்மணது³காத³யோ வஜ்ஜேத்வா’’தி வுத்தம். சதுக்கா லப்³ப⁴ந்தீதி யம் தம் ரூபம் உபாதி³ன்னம், தம் அத்தி² சக்கு²ஸம்ப²ஸ்ஸஸ்ஸ ஆரம்மணம், அத்தி² சக்கு²ஸம்ப²ஸ்ஸஸ்ஸ நாரம்மணம். யம் தம் ரூபம் அனுபாதி³ன்னம், தம் அத்தி² சக்கு²ஸம்ப²ஸ்ஸஸ்ஸ ஆரம்மணம், அத்தி² சக்கு²ஸம்ப²ஸ்ஸஸ்ஸ நாரம்மணந்தி ஏவமாத³யோ ஸப்³பா³ரம்மணபா³ஹிராயதனாதி³லப்³ப⁴மானது³கேஹி யோஜனாயம் சதுக்கா லப்³ப⁴ந்தீதி ஸம்ப³ந்தோ⁴. அவஸேஸேஹீதி ஆரம்மணபா³ஹிராயதனரூபதா⁴துது³காதி³தோ லப்³ப⁴மானது³கேஹீதி வுத்தது³கராஸிதோ அவஸேஸேஹி. தேஸந்தி உபாதி³ன்னஉபாதி³ன்னுபாதா³னியசித்தஸமுட்டா²னது³கானம். அஞ்ஞேஸந்தி உபாதி³ன்னது³காதி³தோ அஞ்ஞேஸம் உபாதா³து³காதீ³னம். வத்து²து³காதீ³ஹீதி ஆதி³-ஸத்³தே³ன சக்கா²யதனது³காத³யோ ஸங்க³ண்ஹாதி. ஏத்தா²பி அவஸேஸேஹி தேஸம் அஞ்ஞேஸஞ்ச யோஜனாய சதுக்கா ந லப்³ப⁴ந்தீதி ஸம்ப³ந்தோ⁴.

சதுப்³பி³தா⁴தி³ரூபஸங்க³ஹவண்ணனா நிட்டி²தா.

உத்³தே³ஸவண்ணனா நிட்டி²தா.

ரூபவிப⁴த்தி

ஏககனித்³தே³ஸவண்ணனா

594. பத²வீஆதீ³னம் த⁴ம்மானம் ருப்பனஸபா⁴வோ விய ந ஹேதுஆதி³பா⁴வோபி ஸாதா⁴ரணோதி ந ஹேதூஸு விப⁴ஜிதப்³போ³தி வுத்தம் ‘‘அவிஜ்ஜமானவிபா⁴க³ஸ்ஸா’’தி. தஸ்ஸ பன விபா⁴கா³பா⁴வத³ஸ்ஸனஸரூபத³ஸ்ஸனமேவ நித்³தே³ஸோ. ஏவஞ்ச கத்வா நிப்³பா³னஸ்ஸபி விபா⁴க³ரஹிதத்தா ‘‘அஸங்க²தா தா⁴தூ’’தி ஏத்தகமேவ நித்³தே³ஸவஸேன வுத்தம்.

யதி³பி ஹினோதி ஏதேன பதிட்டா²தி குஸலாதி³கோ த⁴ம்மோதி அலோபா⁴த³யோ கேவலம் ஹேதுபத³வசனீயா, காரணபா⁴வஸாமஞ்ஞதோ பன மஹாபூ⁴தாத³யோபி ஹேது-ஸத்³தா³பி⁴தே⁴ய்யாதி மூலட்ட²வாசினா து³தியேன ஹேது-ஸத்³தே³ன விஸேஸேத்வா ஆஹ ‘‘ஹேதுஹேதூ’’தி. ஸுப்பதிட்டி²தபா⁴வஸாத⁴னதோ குஸலாதி³த⁴ம்மானம் மூலத்தே²ன உபகாரகத⁴ம்மா ‘‘தயோ குஸலஹேதூ’’திஆதி³னா (த⁴. ஸ. 1059-1060) பட்டா²னே ச தேயேவ ‘‘ஹேதுபச்சயோ’’தி வுத்தாதி ஆஹ ‘‘மூலஹேது பச்சயஹேதூதி வா அயமத்தோ²’’தி. ஹினோதி ஏதேன, ஏதஸ்மா வா ப²லம் பவத்ததீதி ஹேது, படிச்ச ஏதஸ்மா ஏதி பவத்ததீதி பச்சயோதி ஏவம் ஹேதுபச்சய-ஸத்³தா³னம் அனானத்த²தம் ஸந்தா⁴ய ஹேதுஸத்³த³பரியாயபா⁴வேன பச்சய-ஸத்³தோ³ வுத்தோதி ஆஹ ‘‘ஹேதுபச்சயஸத்³தா³னம் ஸமானத்த²த்தா’’தி. பூ⁴தத்தயனிஸ்ஸிதானி ச மஹாபூ⁴தானி சதுமஹாபூ⁴தனிஸ்ஸிதம் உபாதா³ரூபந்தி ஸப்³ப³ம்பி ரூபம் ஸப்³ப³தா³ ஸப்³ப³த்த² ஸப்³பா³காரம் சதுமஹாபூ⁴தஹேதுகம் மஹாபூ⁴தானி ச அனாமட்ட²பே⁴தா³னி ஸாமஞ்ஞதோ க³ஹிதானீதி வுத்தம் ‘‘ரூபக்க²ந்த⁴ஸ்ஸ ஹேதூ’’தி.

கம்மஸமாதா³னானந்தி ஸமாதா³னானம் கம்மானம், ஸமாதி³யித்வா கதகம்மானம் வா. அஞ்ஞேஸு பச்சயேஸு விபாகஸ்ஸ தண்ஹாவிஜ்ஜாதீ³ஸு.

‘‘அட்டா²னமேதம், பி⁴க்க²வே, அனவகாஸோ, யம் காயது³ச்சரிதஸ்ஸ இட்டோ² கந்தோ மனாபோ விபாகோ நிப்³ப³த்தேய்ய, நேதம் டா²னம் விஜ்ஜதி. டா²னஞ்ச கோ² ஏதம், பி⁴க்க²வே, விஜ்ஜதி, யம் காயது³ச்சரிதஸ்ஸ அனிட்டோ² அகந்தோ அமனாபோ விபாகோ நிப்³ப³த்தேய்ய. டா²னமேதம் விஜ்ஜதி. வசீ…பே… மனோ…பே… விஜ்ஜதி…பே… அட்டா²னமேதம், பி⁴க்க²வே, அனவகாஸோ, யம் காயஸுசரிதஸ்ஸ அனிட்டோ² அகந்தோ அமனாபோ விபாகோ நிப்³ப³த்தேய்யா’’தி (ம. நி. 3.131; விப⁴. 809),

‘‘கம்மம் ஸத்தே விப⁴ஜதி, யதி³த³ம் ஹீனபணீததாயா’’தி (ம. நி. 3.289) – ஏவமாதி³வசனதோ கம்மம் விபாகஸ்ஸ இட்டா²னிட்ட²தம் நியமேதீதி ஆஹ ‘‘இட்டா²னிட்ட²விபாகனியாமகத்தா’’தி. க³திஉபதி⁴காலபயோக³ஸம்பத்திவிபத்தியோயேவ டா²னம் விபாகஸ்ஸ ஓகாஸபா⁴வதோ. ந ஹி தேஹி வினா கோசி விபாகோ நிப்³ப³த்ததீதி. யதா²வுத்தட்டா²னே ஸதி அதி⁴க³ந்தப்³ப³ம் இட்டா²னிட்டா²ரம்மணம் ‘‘க³தி…பே… நிப்பா²தி³த’’ந்தி வுத்தம். விபாகஸ்ஸ ஆரம்மணேன வினா அபா⁴வதோ ஆரம்மணம்பி தஸ்ஸ பதா⁴னம் காரணம். அனஞ்ஞஸபா⁴வதோதி ஹேதுஆதி³ஸபா⁴வாபா⁴வதோ.

ருப்பனம் ரூபம். தம் அஸ்ஸ அத்தீ²தி ஏத்த² ‘‘அஸ்ஸா’’தி வுச்சமானோ பத²வீஆதி³அத்தோ²யேவ ருப்பதீதிபி வுச்சதீதி ஆஹ ‘‘ருப்பனலக்க²ணயுத்தஸ்ஸேவ ரூபீரூபபா⁴வதோ’’தி. ஏதம் ஸபா⁴வந்தி ஏதம் உப்பன்னபா⁴வே ஸதி ச²ஹி விஞ்ஞாணேஹி விஞ்ஞேய்யஸபா⁴வம் ரூபே நியமேதி ரூபஸ்ஸேவ தம்ஸபா⁴வத்தா. ந ரூபம் ஏதஸ்மிந்தி காலபே⁴த³வஸேன அதம்ஸபா⁴வஸ்ஸபி ரூபஸ்ஸ அத்தி²தாய ந ரூபம் தத்த² நியந்தப்³ப³ந்தி த³ஸ்ஸேதி. அத்தி² ஹீதிஆதி³னா தத்த² ரூபஸ்ஸேவ நியந்தப்³ப³தாபா⁴வம்யேவ விவரதி. ஏதமேவாதிஆதி³னா உத்³தே³ஸேன நித்³தே³ஸம் ஸம்ஸந்தே³தி. ஏத்த² ஏதமேவ ரூபே யதா²வுத்தஸபா⁴வம் நியமேதப்³ப³ம் நித்³தே³ஸே ஏவ-ஸத்³தே³ன நியமேதி அவதா⁴ரேதீதி அத்தோ². யதா²வுத்தோ நியமோதி உப்பன்னபா⁴வே ஸதி ச²ஹி விஞ்ஞாணேஹி விஞ்ஞேய்யபா⁴வோ நியந்தப்³ப³தாய ‘‘நியமோ’’தி வுத்தோ, ஸோ ரூபே அத்தி² ஏவ ரூபஸ்ஸேவ தம்ஸபா⁴வத்தா. விஸிட்ட²காலஸ்ஸ வுத்தப்பகாரம் அவதா⁴ரணம்யேவ வா யதா²வுத்தோ நியமோ, ஸோ ரூபே அத்தி²யேவ ஸம்ப⁴வதியேவ, ந அரூபே விய ந ஸம்ப⁴வதீதி அத்தோ² த³ட்ட²ப்³போ³. காலபே⁴த³ந்தி காலவிஸேஸம். அனாமஸித்வாதி அக்³க³ஹேத்வா. தம் ஸப்³ப³ந்தி அனாமட்ட²காலபே⁴த³ம் ததோயேவ அரூபேஹி ஸமானவிஞ்ஞேய்யஸபா⁴வம் ஸப்³ப³ம் ரூபம். உப்பன்னந்தி ஏதேன காலபே⁴தா³மஸனேன விஸேஸேதி ‘‘உப்பன்னம்…பே… மேவா’’தி.

வத்தமானகாலிகம் ஸப்³ப³ம் ரூபம் தி³ட்ட²ஸுதமுதவிஞ்ஞாதஸபா⁴வம், தம் யதா²ஸகம் ச²ஹி விஞ்ஞாணேஹி விஞ்ஞேய்யஸபா⁴வமேவ, ந தேஹி அவிஞ்ஞேய்யம். நாபி உப்பன்னமேவ ச²ஹி விஞ்ஞாணேஹி விஞ்ஞேய்யஸபா⁴வம் ஏகந்தலக்க²ணனியமாபா⁴வாபத்திதோதி ஏவம் அவிபரீதே அத்தே² விபா⁴விதேபி சோத³கோ அதி⁴ப்பாயம் அஜானந்தோ ‘‘நனு ஏவ’’ந்திஆதி³னா ஸப்³ப³ஸ்ஸ ஸப்³பா³ரம்மணதாபத்திம் சோதே³தி. இதரோ ‘‘ரூபம் ஸப்³ப³ம் ஸம்பிண்டே³த்வா’’திஆதி³னா அத்தனோ அதி⁴ப்பாயம் விபா⁴வேதி. ஏத்த² ஏகீபா⁴வேன க³ஹேத்வாதி இத³ம் ‘‘ஸம்பிண்டே³த்வா’’தி ஏதஸ்ஸ அத்த²வசனம். ஏகந்தலக்க²ணம் ச²ஹி விஞ்ஞாணேஹி விஞ்ஞேய்யஸபா⁴வோயேவ. இத³ம் வுத்தம் ஹோதி – கிஞ்சாபி பஞ்சன்னம் விஞ்ஞாணானம் விஸயந்தரே அப்பவத்தனதோ ந ஸப்³ப³ஸ்ஸ ஸப்³பா³ரம்மணதா, ஸப்³ப³ஸ்ஸபி பன ரூபஸ்ஸ ச²விஞ்ஞாணாரம்மணபா⁴வதோ யதா²ஸகம் ச²ஹி விஞ்ஞாணேஹி விஞ்ஞேய்யதாய ச²ஹி விஞ்ஞாணேஹி விஞ்ஞேய்யதாவ அத்தி², தம் ஏகதோ ஸங்க³ஹணவஸேன க³ஹேத்வா ‘‘உப்பன்னம் ஸப்³ப³ம் ரூபம் ச²ஹி விஞ்ஞாணேஹி விஞ்ஞேய்ய’’ந்தி வுத்தம் யதா² ‘‘அபி⁴ஞ்ஞாப்பத்தம் பஞ்சமஜ்ஜா²னம் ச²ளாரம்மணம் ஹோதீ’’தி. யதா² ஹி தி³ப்³ப³சக்கு²தி³ப்³ப³ஸோதாதி³அபி⁴ஞ்ஞாப்பத்தஸ்ஸ பஞ்சமஜ்ஜா²னஸ்ஸ விஸும் அஸப்³பா³ரம்மணத்தேபி ஏகந்தலக்க²ணவஸேன ஏகீபா⁴வேன க³ஹேத்வா ஆரம்மணவஸேன பட²மஜ்ஜா²னாதி³தோ விஸேஸம் த³ஸ்ஸேதும் ‘‘அபி⁴ஞ்ஞாப்பத்தம் பஞ்சமஜ்ஜா²னம் ச²ளாரம்மணம் ஹோதீ’’தி வுச்சதி, ஏவம் அரூபதோ ரூபஸ்ஸ விஸயவஸேன விஸேஸம் த³ஸ்ஸேதும் ‘‘உப்ப …பே… விஞ்ஞேய்ய’’ந்தி வுத்தந்தி. ச²ஹி விஞ்ஞாணேஹி விஞ்ஞேய்யபா⁴வோ ரூபே நியமேதப்³போ³, ந பன ரூபம் தஸ்மிம் நியமேதப்³ப³ம், அனியததே³ஸோ ச ஏவ-ஸத்³தோ³தி அட்ட²கதா²யம் (த⁴. ஸ. அட்ட. 594) ‘‘பச்சுப்பன்னரூபமேவ சக்கு²விஞ்ஞாணாதீ³ஹி ச²ஹி வேதி³தப்³ப³’’ந்தி வுத்தம். ‘‘பச்சுப்பன்னரூபமேவா’’திஆதி³னா தத்த² தோ³ஸமாஹ. தஸ்மாதி யஸ்மா பாளியம் விஞ்ஞேய்யமேவாதி ஏவ-ஸத்³தோ³ வுத்தோ, ந ச தஸ்ஸ அட்டா²னயோஜனேன காசி இட்ட²ஸித்³தி⁴, அத² கோ² அனிட்ட²ஸித்³தி⁴யேவ ஸப்³ப³ரூபஸ்ஸ ஏகந்தலக்க²ணனியமாத³ஸ்ஸனதோ, தஸ்மா. யதா²ருதவஸேனேவ நியமே க³ய்ஹமானே உப்ப…பே… பத்தி நத்தி², ததோ ச ஸோதபதிததாயபி பயோஜனம் நத்தீ²தி. வுத்தனயேனாதி ‘‘அரூபதோ விது⁴ர’’ந்திஆதி³னா வுத்தனயேன.

ஞாணஸ்ஸ வா உத்தரஸ்ஸ புரிமஞாணம் வத்து²காரணந்தி ஞாணவத்து². ‘‘ஸஜாதீ’’தி ஏத்த² ஸ-காரோ ஸமானஸத்³த³த்தோ²தி த³ஸ்ஸேதும் ‘‘ஸமானஜாதிகான’’ந்தி வுத்தம். ஸமானஜாதிதா ச ஸம்மாவாசாதீ³னம் ஸீலனத்தோ² ஏவ. ஏதேன ஸமானஸபா⁴வதா ஸஜாதிஸங்க³ஹோதி வேதி³தப்³போ³. ஆரம்மணே சேதஸோ அவிக்கே²பப்பவத்தியா உபட்டா²னுஸ்ஸாஹனானி விய தேஸம் அவிக்கே²போபி அதிஸயேன உபகாரகோதி ‘‘அஞ்ஞமஞ்ஞோபகாரவஸேனா’’தி வுத்தம். தேனேவ விஜ்ஜமானேஸுபி அஞ்ஞேஸு ஸஹஜாதத⁴ம்மேஸு ஏதேஸம்யேவ ஸமாதி⁴க்க²ந்த⁴ஸங்க³ஹோ த³ஸ்ஸிதோ. யம் பன ஸச்சவிப⁴ங்க³வண்ணனாயம் (விப⁴. அட்ட². 189) விஸுத்³தி⁴மக்³கா³தீ³ஸு (விஸுத்³தி⁴. 2.568) ச ‘‘வாயாமஸதியோ கிரியதோ ஸங்க³ஹிதா’’தி வுத்தம், தம் அஸமாதி⁴ஸபா⁴வதம் தேஸம் ஸமாதி⁴ஸ்ஸ உபகாரகத்தஞ்ச ஸந்தா⁴ய வுத்தம். தேனேவ ச தத்த² ‘‘ஸமாதி⁴யேவேத்த² ஸஜாதிதோ ஸமாதி⁴க்க²ந்தே⁴ன ஸங்க³ஹிதோ’’தி (விஸுத்³தி⁴. 2.568; விப⁴. அட்ட². 189) வுத்தம். இத⁴ பன ஸஜாதிஸங்க³ஹோதி ஸமாதி⁴தது³பகாரகத⁴ம்மானம் உப்பத்திதே³ஸவஸேன ஸங்க³ஹோ வுத்தோதி. அவிராதே⁴த்வா விஸயஸபா⁴வாவக்³க³ஹணம் படிவேதோ⁴, அப்பனா ச ஆரம்மணே த³ள்ஹனிபாதோ தத³வகா³ஹோயேவாதி ‘‘படிவேத⁴ஸதி³ஸம் கிச்ச’’ந்தி வுத்தம். அத² வா ஆரம்மணபடிவேத⁴ஸ்ஸ ததா³ஹனனபரியாஹனனமனுகு³ணதாய ஸமானந்தி பஞ்ஞாவிதக்கானம் கிச்சஸரிக்க²தா வுத்தா.

ஏககனித்³தே³ஸவண்ணனா நிட்டி²தா.

து³கனித்³தே³ஸோ

உபாதா³பா⁴ஜனீயவண்ணனா

596. ஸமந்ததோ ஸப்³ப³ஸோ த³ஸ்ஸனட்டே²ன சக்கு² ஸமந்தசக்கூ²தி இமமத்த²ம் த³ஸ்ஸேதும் ‘‘ஸப்³ப³ஸங்க²தாஸங்க²தத³ஸ்ஸன’’ந்தி வுத்தம். ஏவமாதி³னாதி ஏத்த² ஆதி³-ஸத்³தோ³ ‘‘து³க்க²ம் பரிஞ்ஞேய்யம் பரிஞ்ஞாத’’ந்தி தீஸுபி பதே³ஸு பச்சேகம் யோஜேதப்³போ³. ‘‘இத³ம் து³க்க²ந்தி மே, பி⁴க்க²வே, புப்³பே³ அனனுஸ்ஸுதேஸு த⁴ம்மேஸு சக்கு²ம் உத³பாதி³, ஞாணம் உத³பாதீ³’’திஆதி³னா (மஹாவ. 15; படி. ம. 2.30) ஹி பாளி பவத்தாதி. ஆகாரேனாதி த்³வாத³ஸவிதே⁴ன ஆகாரேன. தம்பி காமாவசரம் விபஸ்ஸனாபச்சவேக்க²ணஞாணபா⁴வதோ. ‘‘ஞாணசக்கு² ஸஹஅரியமக்³க³ம் விபஸ்ஸனாஞாணந்திபி யுஜ்ஜதீ’’தி வத³ந்தி. அக்³க³மக்³கே³ன பன ஸஹ விபஸ்ஸனா பச்சவேக்க²ணஞாணந்தி யுத்தம் விய தி³ஸ்ஸதி.

யதா²வுத்தே மம்ஸபிண்டே³ ஸஸம்பா⁴ரே சக்கு²வோஹாரோ ஸந்தானவஸேன பவத்தமானே சதுஸமுட்டா²னிகரூபத⁴ம்மே உபாதா³ய பவத்தோதி ‘‘சது…பே… ஸம்பா⁴ரா’’தி வுத்தம். ஸண்டா²னந்தி வண்ணாயதனமேவாதி தேன தேன ஆகாரேன ஸன்னிவிட்டே²ஸு மஹாபூ⁴தேஸு தம்தம்ஸண்டா²னவஸேன வண்ணாயதனஸ்ஸ விஞ்ஞாயமானத்தா வுத்தம், ந வண்ணாயதனஸ்ஸேவ ஸண்டா²னபஞ்ஞத்தியா உபாதா³னத்தா. ததா² ஹி அந்த⁴காரே பு²ஸித்வாபி ஸண்டா²னம் விஞ்ஞாயதீதி. ததா² ச வக்க²தி ‘‘தீ³கா⁴தீ³னி பு²ஸித்வாபி ஸக்கா ஜானிது’’ந்தி, (த⁴. ஸ. அட்ட. 616) ‘‘தீ³கா⁴தி³ஸன்னிவேஸம் பூ⁴தஸமுதா³யம் நிஸ்ஸாயா’’தி (த⁴. ஸ. மூலடீ. 616) ச. தேஸம் ஸம்ப⁴வஸண்டா²னானம் ஆபோதா⁴துவண்ணாயதனேஹி அனத்த²ந்தரபா⁴வேபி தேஹி விஸும் வசனம் ததா²பூ⁴தானம் ஸம்ப⁴வபூ⁴தானம் ஸண்டா²னபூ⁴தானஞ்ச. ஏதேன ஆபோதா⁴துவண்ணாயதனானம் வஸேன வத்தமானஅவத்தா²விஸேஸோ ஸம்ப⁴வோ ஸண்டா²னஞ்சாதி அயமத்தோ² த³ஸ்ஸிதோ ஹோதி. தத்த² ஸம்ப⁴வோ சதுஸமுட்டா²னிகோ ஸோளஸவஸ்ஸகாலே உப்பஜ்ஜதி. தஸ்ஸ ராக³வஸேன டா²னா வசனம் ஹோதீதி வத³ந்தி. அததா²பூ⁴தானம் ததோ அஞ்ஞதா²பூ⁴தானம். யதா²வுத்தே ஸம்பா⁴ரவத்து²ஸங்கா²தே. விஜ்ஜமானத்தாதி பி⁴ய்யோவுத்திவஸேன வுத்தம். ததா² ஹி கீ²ணாஸவானம் ப்³ரஹ்மானஞ்ச ஸம்ப⁴வோ நத்தீ²தி. ஆபோதா⁴துவிஸேஸத்தா ஸம்ப⁴வோ ஆபோதா⁴துஸம்ப³ந்தீ⁴ ஆபோதா⁴துதன்னிஸ்ஸயனிஸ்ஸிதோபி ஹோதீதி தஸ்ஸ சதுதா⁴துனிஸ்ஸிததாய அவிரோதோ⁴ வுத்தோ.

உதுசித்தாஹாரேஹி உபத்த²ம்பி⁴யமானந்தி ஏத்த² ‘‘கலாபந்தரக³தா உதுஆஹாரா அதி⁴ப்பேதா’’தி வத³ந்தி. அனேககலாபக³தபா⁴வம் சக்கு²ஸ்ஸ த³ஸ்ஸேதி யதோ உபத்³து³தபடலே நிராகரணேபி சக்கு² விஜ்ஜதீதி. படிக⁴ட்டனம் விஸயாபி⁴முக²பா⁴வோ நிக⁴ம்ஸபச்சயத்தா. நிக⁴ம்ஸோ நிஸ்ஸயபா⁴வாபத்தி. யதோ சக்கா²தி³னிஸ்ஸிதா ஸஞ்ஞா ‘‘படிக⁴ஸஞ்ஞா’’தி வுச்சதி.

அனேகத்தாதி இத³ம் அவசனஸ்ஸ காரணம், ந ஹேதுகிரியாய விஞ்ஞாயமானபா⁴வஸ்ஸ. ஸோ பன அபேக்கா²ஸித்³தி⁴தோ ஏவ வேதி³தப்³போ³. ஹேதுகிரியாபேக்கா² ஹி ப²லகிரியாதி. சக்கு²ம் ஸங்க³ண்ஹாதீதி சக்கு²விஞ்ஞாணஸ்ஸ நிஸ்ஸயபா⁴வானுபக³மனேபி தம்ஸபா⁴வானதிவத்தனதோ தஸ்ஸா ஸமஞ்ஞாய தத்த² நிருள்ஹபா⁴வம் த³ஸ்ஸேதி. த³ஸ்ஸனபரிணாயகட்டோ² சக்கு²ஸ்ஸ இந்த³ட்டோ²யேவாதி ‘‘யதா² ஹி இஸ்ஸரோ’’திஆதி³னா இஸ்ஸரோபமா வுத்தா. சக்கு²விஞ்ஞாணம் த³ஸ்ஸனகிச்சே பரிணாயந்தம் சக்கு² தம்ஸஹஜாதே சக்கு²ஸம்ப²ஸ்ஸாத³யோபி தத்த² பரிணாயதீதி வுச்சதீதி ‘‘தே த⁴ம்மே…பே… பரிணாயதீ’’தி வுத்தம், ந பன சக்கு²ஸம்ப²ஸ்ஸாதீ³னம் த³ஸ்ஸனகிச்சத்தா. அத² வா சக்கு²ஸம்ப²ஸ்ஸாதீ³னம் இந்த்³ரியபச்சயபா⁴வேன உபகாரகம் சக்கு²விஞ்ஞாணம் த³ஸ்ஸனகிச்சே பரிணாயந்தம் சக்கு² தத்த² சக்கு²ஸம்ப²ஸ்ஸாத³யோபி தத³னுவத்தகே பரிணாயதீதி அத்தா²யம் பரியாயோதி த³ஸ்ஸேந்தோ ஆஹ ‘‘தே த⁴ம்மே…பே… ணாயதீ’’தி. அனேகத்த²த்தா தா⁴தூனம் சக்க²தீதி இமஸ்ஸ ‘‘பரிணாயதி பகாஸேதீ’’தி ச அத்தா² வுத்தா. ஸண்டா²னம்பி ரூபாயதனமேவாதி ‘‘ஸமவிஸமானி ரூபானி சக்க²தீதி சக்கூ²’’தி வுத்தம். தம்த்³வாரிகானம் ப²ஸ்ஸாதீ³னம் உபனிஸ்ஸயபச்சயபா⁴வோ ஏவ வளஞ்ஜனத்தோ².

599. தம்த்³வாரிகா…பே… உப்பத்தி வுத்தாதி சக்கு²விஞ்ஞாணே உப்பன்னே ஸம்படிச்ச²னாதீ³னி ப³லவாரம்மணே ஜவனம் ஏகந்தேன உப்பஜ்ஜதீதி கத்வா வுத்தம். ததா² சேவ ஹி அந்தரா சக்கு²விஞ்ஞாணே வா ஸம்படிச்ச²னே வா ஸந்தீரணே வா ட²த்வா நிவத்திஸ்ஸதீதி நேதம் டா²னம் விஜ்ஜதீதி நிச்சி²தம். தேன பச்சயேனாதி தம்பகாரேன பச்சயேன. தம்ஸதி³ஸானந்தி க³ரும் கத்வா அஸ்ஸாத³னாதி³ப்பவத்திவிஸேஸரஹிததாய த³ஸ்ஸனஸதி³ஸானம் மனோதா⁴துஸந்தீரணவோட்ட²ப்³ப³னானம். பஞ்சத்³வாரிகஜவனானம் அஸ்ஸாத³னாதி³தோ அஞ்ஞதா² க³ரும் கத்வா பவத்தி நத்தி² ரூபத⁴ம்மவிஸயத்தாதி ‘‘அஸ்ஸாத³னாபி⁴னந்த³னபூ⁴தானீ’’தி ஏத்தகமேவ வுத்தம். மனோத்³வாரிகஜவனபிட்டி²வட்டகானம்பி ஹி பஞ்சத்³வாரிகஜவனானம் அஸ்ஸாத³னாபி⁴னந்த³னபா⁴வேன ரூபம் க³ரும் கத்வா பவத்தி நத்தீ²தி ந ஸக்கா வத்துந்தி. ரூபம் ஆரம்மணாதி⁴பதி அகுஸலஸ்ஸேவ ஹோதி. ததா² ஹி பட்டா²னே ‘‘அப்³யாகதோ த⁴ம்மோ அகுஸலஸ்ஸ த⁴ம்மஸ்ஸ அதி⁴பதிபச்சயேன பச்சயோ. ஆரம்மணாதி⁴பதி சக்கு²ம் க³ரும் கத்வா அஸ்ஸாதே³தி அபி⁴னந்த³தீ’’திஆதி³னா (பட்டா². 1.1.416) ரூபத⁴ம்மோபி ஆரம்மணாதி⁴பதி விப⁴த்தோ. ‘‘அப்³யாகதோ த⁴ம்மோ அப்³யாகதஸ்ஸ த⁴ம்மஸ்ஸ அப்³யாகதோ த⁴ம்மோ குஸலஸ்ஸா’’தி ஏத்த² பன ப²லனிப்³பா³னானேவ ஆரம்மணாதி⁴பதிபா⁴வேன விப⁴த்தானீதி. க³ணனாய ச ‘‘ஆரம்மணஆரம்மணாதி⁴பதிஉபனிஸ்ஸயபுரேஜாதஅத்தி²அவிக³தந்தி ஏக’’ந்தி (பட்டா². 1.1.445) வுத்தம். யதி³ குஸலஸ்ஸபி ஸியா, த்³வேதி வத்தப்³ப³ம் ஸியாதி. தானீதி யதா²வுத்தஜவனானி படினித்³தி³ட்டா²னி. தம்ஸம்பயுத்தானி சாதி ஜவனஸம்பயுத்தானி. அஞ்ஞானி சக்கு²ஸம்ப²ஸ்ஸாதீ³னி. யதி³ ரூபஸ்ஸ ஆரம்மணபச்சயபா⁴வமத்தம் அதி⁴ப்பேதம், ‘‘தம் ரூபாரம்மணேதி ஏதேனேவ ஸிஜ்ஜே²ய்யா’’தி ஏத்தகமேவ வதே³ய்ய. யஸ்மா பன ரூபம் தம்த்³வாரிகஜவனானம் பச்சயவிஸேஸோபி ஹோதி, தஸ்மா தஸ்ஸ விஸேஸஸ்ஸ தீ³பனத்த²ம் ‘‘ஆரப்³பா⁴’’தி வசனம் வுத்தம் ஸியாதி ஆஹ ‘‘ஆரம்மணபச்சயதோ அஞ்ஞபச்சயபா⁴வஸ்ஸபி தீ³பக’’ந்தி.

600. ஸோதவிஞ்ஞாணப்பவத்தியம் ஸவனகிரியாவோஹாரோதி ஸோதஸ்ஸ ஸவனகிரியாய கத்துபா⁴வோ ஸோதவிஞ்ஞாணஸ்ஸ பச்சயபா⁴வேனாதி வுத்தம் ‘‘ஸோதவிஞ்ஞாணஸ்ஸ நிஸ்ஸயபா⁴வேன ஸுணாதீ’’தி. ஜீவிதனிமித்தமாஹாரரஸோ ஜீவிதம், தஸ்மிம் நின்னதாய தம் அவ்ஹாயதீதி ஜிவ்ஹாதி ஏவம் ஸித்³தே⁴ன ஜிவ்ஹா-ஸத்³தே³ன பகாஸியமானா ரஸாவ்ஹாயனஸங்கா²தா ஸாயனகிரியா லப்³ப⁴தீதி கத்வா வுத்தம் ‘‘ஜிவ்ஹாஸத்³தே³ன விஞ்ஞாயமானா கிரியாஸாயன’’ந்தி. ததா² ச வக்க²தி ‘‘ஜீவிதமவ்ஹாயதீதி ஜிவ்ஹா’’தி (விப⁴. அட்ட². 154). ஆயோதி உப்பத்திதே³ஸோ. பஸாத³காயஸ்ஸ காயிகானம் து³க்க²ஸுகா²னம் நிஸ்ஸயபா⁴வதோ இதரேஸம் உபனிஸ்ஸயபா⁴வதோ ‘‘து³க்க²து³க்க²விபரிணாமது³க்கா²னம் ஆயோ’’தி வுத்தம். ப்³யாபிதாயாதி ப்³யாபிபா⁴வே, ப்³யாபிபா⁴வேன வா. காயப்பஸாத³பா⁴வோதி காயப்பஸாத³ஸப்³பா⁴வோ. அனுவித்³த⁴த்தாதி அனுயுத்தபா⁴வதோ, ஸம்ஸட்ட²பா⁴வதோதி அத்தோ². தஸ்மாதி யஸ்மா யாவதா இமஸ்மிம் காயே உபாதி³ன்னகபவத்தம் நாம அத்தி², ஸப்³ப³த்த² காயாயதனம் கப்பாஸபடலே ஸ்னேஹோ வியாதி வுத்தம், தஸ்மா. பண்ட³ரஸபா⁴வா பஸாதா³ ஆபாத²க³தம் விஸயம் விஞ்ஞாணுப்பத்திஹேதுபா⁴வேன பகாஸேந்தா விய ஹோந்தீதி தேஸம் விஸயாவபா⁴ஸனகிச்சதா வுத்தா. ஸமானனிஸ்ஸயானந்தி ஏகனிஸ்ஸயானம். அவினிப்³பு⁴த்தேஸு ஹி ரூபரஸாதீ³ஸு யம்னிஸ்ஸயம் ரூபம், தம்னிஸ்ஸயோ ஏவ ரஸாதீ³தி. அஞ்ஞமஞ்ஞஸபா⁴வானுபக³மேனாதி லக்க²ணஸங்கராபா⁴வமாஹ.

யஸ்மா பச்சயந்தரஸஹிதோயேவ சக்கு²ப்பஸாதோ³ ரூபாபி⁴ஹனனவஸேன பவத்ததி, ந பச்சயந்தரரஹிதோ, தஸ்மா ரூபாபி⁴கா⁴தோ ஹோது வா மா வா ஹோது, ஏவம்ஸபா⁴வோ ஸோ ரூபத⁴ம்மோதி த³ஸ்ஸேதும் ‘‘ரூபாபி⁴கா⁴தாரஹோ’’தி வுத்தம் யதா² ‘‘விபாகாரஹஸபா⁴வா குஸலாகுஸலா’’தி. விஸயவிஸயீனம் அஞ்ஞமஞ்ஞம் அபி⁴முக²பா⁴வோ அபி⁴கா⁴தோ வியாதி அபி⁴கா⁴தோ, ஸோ ரூபே சக்கு²ஸ்ஸ, சக்கு²ம்ஹி வா ரூபஸ்ஸ ஹோதீதி வுத்தம் ‘‘ரூபே, ரூபஸ்ஸ வா அபி⁴கா⁴தோ’’தி. தேனேவாஹ ‘‘யம்ஹி சக்கு²ம்ஹி அனித³ஸ்ஸனம்ஹி ஸப்படிக⁴ம்ஹி ரூபம் ஸனித³ஸ்ஸனம் ஸப்படிக⁴ம் படிஹஞ்ஞி வா’’தி (த⁴. ஸ. 597), ‘‘சக்கு² அனித³ஸ்ஸனம் ஸப்படிக⁴ம் ரூபம்ஹி ஸனித³ஸ்ஸனம்ஹி ஸப்படிக⁴ம்ஹி படிஹஞ்ஞி வா’’தி (த⁴. ஸ. 598) ச ஆதி³. ஏத்த² ச தம்தம்ப⁴வபத்த²னாவஸேன சக்கா²தீ³ஸு அவிக³தராக³ஸ்ஸ அத்தபா⁴வனிப்பா²த³கஸாதா⁴ரணகம்மவஸேன புரிமம் சக்கு²லக்க²ணம் வுத்தம், ஸுதூ³ரஸுகு²மாதி³பே⁴த³ஸ்ஸபி ரூபஸ்ஸ க³ஹணஸமத்த²மேவ சக்கு² ஹோதூதி ஏவம் நிப்³ப³த்திதஆவேணிககம்மவஸேன து³தியம். ஏஸ நயோ ஸேஸேஸுபி. அத² வா ஸதிபி பஞ்சன்னம் பஸாத³பா⁴வஸாமஞ்ஞே ஸவிஸயாவபா⁴ஸனஸங்கா²தஸ்ஸ பஸாத³ப்³யாபாரஸ்ஸ த³ஸ்ஸனவஸேன புரிமம் வுத்தம், பஸாத³காரணஸ்ஸ ஸதிபி கம்மபா⁴வஸாமஞ்ஞே அத்தனோ காரணபே⁴தே³ன பே⁴த³த³ஸ்ஸனவஸேன து³தியம்.

காமதண்ஹாதி காமப⁴வே தண்ஹா. ததா² ரூபதண்ஹா த³ட்ட²ப்³பா³. தஸ்ஸ தஸ்ஸ ப⁴வஸ்ஸ மூலகாரணபூ⁴தா தண்ஹா தஸ்மிம் தஸ்மிம் ப⁴வே உப்பஜ்ஜனாரஹாயதனவிஸயாபி நாம ஹோதீதி காமதண்ஹாதீ³னம் த³ட்டு²காமதாதி³வோஹாராரஹதா வுத்தா. த³ட்டு²காமதாதி ஹி த³ட்டு²மிச்சா² ரூபதண்ஹாதி அத்தோ². ததா² ஸேஸாஸுபீதி. ஏத்த² ச த³ட்டு²காமதாதீ³னம் தம்தம்அத்தபா⁴வனிப்³ப³த்தககம்மாயூஹனக்க²ணதோ ஸதி புரிமனிப்³ப³த்தியம் வத்தப்³ப³ம் நத்தி². அஸதிபி தஸ்ஸ மக்³கே³ன அஸமுக்³கா⁴திதபா⁴வேனேவ காரணந்தி த³ட்ட²ப்³ப³ம். யதோ மக்³கே³ன அஸமுச்சி²ன்னம் காரணலாபே⁴ ஸதி உப்பஜ்ஜித்வா அத்தனோ ப²லஸ்ஸ காரணபா⁴வூபக³மனதோ விஜ்ஜமானமேவாதி உப்பன்னஅத்தி²தாபரியாயேஹி வுச்சதி ‘‘அரியம் அட்ட²ங்கி³கம் மக்³க³ம் பா⁴வேந்தோ அரியம் அட்ட²ங்கி³கம் மக்³க³ம் ப³ஹுலீகரோந்தோ உப்பன்னுப்பன்னே பாபகே அகுஸலே த⁴ம்மே அந்தராயேவ அந்தரதா⁴பேதி’’ (ஸம். நி. 5.157), ‘‘ஸந்தம் வா அஜ்ஜ²த்தம் காமச்ச²ந்த³ம் அத்தி² மே அஜ்ஜ²த்தம் காமச்ச²ந்தோ³தி பஜானாதீ’’தி (தீ³. நி. 2.382; ம. நி. 1.115) ச ஏவமாதீ³ஸு.

ஏத்தா²ஹ – சக்கா²தீ³னம் இந்த்³ரியானம் கிம் ஏககம்முனா உப்பத்தி, உதா³ஹு நானாகம்முனாதி? உப⁴யதா²பீதி போராணா. தத்த² நானாகம்முனா தாவ உப்பத்தியம் சக்கா²தீ³னம் விஸேஸே வத்தப்³ப³ம் நத்தி² காரணஸ்ஸ பி⁴ன்னத்தா. ஏககம்முனா பன உப்பத்தியம் தேஸம் கத²ம் விஸேஸோதி? காரணஸ்ஸ பி⁴ன்னத்தாயேவ. தம்தம்ப⁴வபத்த²னாபூ⁴தா ஹி தண்ஹா தம்தம்ப⁴வபரியாபன்னாயதனாபி⁴லாஸதாய ஸயம் விசித்தரூபா உபனிஸ்ஸயபா⁴வேன தம்தம்ப⁴வனிப்³ப³த்தககம்மஸ்ஸ விசித்தபே⁴த³தம் வித³ஹதி. யதோ ததா³ஹிதவிஸேஸம் தம் ததா²ரூபஸமத்த²தாயோகே³ன அனேகரூபாபன்னம் விய அனேகம் விஸிட்ட²ஸபா⁴வம் ப²லம் நிப்³ப³த்தேதி. ததா² ச வக்க²தி ‘‘கம்மமேவ நேஸம் விஸேஸகாரண’’ந்தி. ந சேத்த² ஸமத்த²தாபா⁴வதோ அஞ்ஞம் வேதி³தப்³ப³ம் காரணவிஸேஸேனாஹிதவிஸேஸஸ்ஸ விஸிட்ட²ப²லனிப்பா²த³னயோக்³யதாபா⁴வதோ. ததா² ஹி ஸதி ஏகஸ்ஸபி கம்மஸ்ஸ அனேகிந்த்³ரியஹேதுதாவிஸேஸயோக³ம் ஏகம்பி கம்மந்திஆதி³னா யுத்திதோ ஆக³மதோபி பரதோ ஸயமேவ வக்க²தி. ததா² ச ஏகஸ்ஸேவ குஸலசித்தஸ்ஸ ஸோளஸாதி³விபாகசித்தனிப்³ப³த்திஹேதுபா⁴வோ வுச்சதி. லோகேபி ஏகஸ்ஸேவ ஸாலிபீ³ஜஸ்ஸ பரிபுண்ணாபரிபுண்ணதண்டு³லப²லனிப்³ப³த்திஹேதுதா தி³ஸ்ஸதி. கிம் வா ஏதாய யுத்திசிந்தாய, ந சிந்திதப்³ப³மேவேதம். யதோ கம்மவிபாகோ சக்கா²தீ³னி கம்மவிபாகோ ச ஸப்³பா³காரதோ பு³த்³தா⁴னம்யேவ கம்மவிபாகஞாணப²லயுத்தானம் விஸயோ, ந அஞ்ஞேஸம் அதக்காவசரதாய. தேனேவ ச ப⁴க³வதா ‘‘கம்மவிபாகோ அசிந்தேய்யோ ந சிந்தேதப்³போ³, யோ சிந்தேய்ய உம்மாத³ஸ்ஸ விகா⁴தஸ்ஸ பா⁴கீ³ அஸ்ஸா’’தி (அ. நி. 4.77) ஆதீ³னவம் த³ஸ்ஸேத்வா படிக்கி²த்தம். ஆவிஞ்ச²னம் புக்³க³லஸ்ஸ விஞ்ஞாணஸ்ஸ வா தம்னின்னபா⁴வப்பத்தியா ஹேதுபா⁴வோ.

ஸப்³பே³ஸந்தி பத³ஸ்ஸ பகரணதோ பாரிஸேஸதோ வா லப்³ப⁴மானம் அத்த²விஸேஸம் அஜானந்தோ யதா²ருதவஸேனேவ அத்த²ம் க³ஹேத்வா ‘‘கோ ஏத்த² விஸேஸோ’’திஆதி³னா சோதே³தி. இதரோ தேஜாதீ³னம் பச்சேகம் அதி⁴கபா⁴வே விய த்³வின்னம் திண்ணம் வா அதி⁴கபா⁴வேபி யதா²வுத்தாதி⁴கபா⁴வேனேவ ஏககாதி³வஸேன லப்³ப⁴மானாய ஓமத்ததாயபி காயப்பஸாதோ³ ந ஹோதீதி விஞ்ஞாயமானத்தா பகரணதோ பாரிஸேஸதோ வா சதுன்னம்பி பூ⁴தானம் ஸமபா⁴வேன காயோ ஹோதீதி அயமத்தோ² ஸித்³தோ⁴தி ஸப்³ப³-ஸத்³தோ³ இத⁴ ஸமபா⁴வதீ³பகோதி த³ஸ்ஸேதும் ‘‘இத³ம் பனா’’திஆதி³மாஹ. இமமத்த²ம் தீ³பேதீதி ச யதா²வுத்தேன ஞாயேன ‘‘ஸப்³பே³ஸ’’ந்தி வசனதோ அயமத்தோ² லப்³ப⁴தி, ந தஸ்ஸ வாசகத்தாதி த³ஸ்ஸேதி. தேனேவாஹ ‘‘அனுவத்த…பே… வஸேன வுத்தத்தா’’தி. ஏகதே³ஸாதி⁴கபா⁴வனிவாரணேனேவ ஹி ஏகதே³ஸோமத்ததானிவாரணம்பி விஞ்ஞாயதீதி. ஏகதே³ஸோ அவயவோ. சதுதா⁴துஸமுதா³யனிஸ்ஸயஸ்ஸ ஹி பஸாத³ஸ்ஸ ததே³கதா⁴துஅதி⁴கதா அவயவாதி⁴கதா ஹோதீதி.

‘‘புரிமா சேத்த² த்³வேபி வாதி³னோ நிகாயந்தரியா’’தி வத³ந்தி. ஆலோகாதி³ஸஹகாரீகாரணஸஹிதானம்யேவ சக்கா²தீ³னம் ரூபாதி³அவபா⁴ஸனஸமத்த²தா விவரஸ்ஸ ச ஸோதவிஞ்ஞாணுபனிஸ்ஸயபா⁴வோ கு³ணோதி தேஸம் லத்³தீ⁴தி அதி⁴ப்பாயேன ‘‘தம்தம்பூ⁴தகு³ணேஹீ’’திஆதி³ வுத்தம். தேஜாதீ³னம் விய விவரஸ்ஸ பூ⁴தபா⁴வாபா⁴வதோ ‘‘யதா²யோக³’’ந்தி வுத்தம். அத² வா ரூபாத³யோ விய விவரம்பி பூ⁴தகு³ணோதி பராதி⁴ப்பாயம் த³ஸ்ஸேந்தோ ‘‘தம்தம்பூ⁴தகு³ணேஹீ’’தி ஆஹ. தேஜஸ்ஸ பன ஆலோகரூபேன, ஆகாஸஸங்கா²தஸ்ஸ விவரஸ்ஸ ஸத்³தே³ன, வாயுஸ்ஸ க³ந்தே⁴ன, உத³கஸ்ஸ ரஸேன, பத²வியா போ²ட்ட²ப்³பே³னாதி இமமத்த²ம் ஸந்தா⁴ய ‘‘யதா²யோக³ம் தம்தம்பூ⁴தகு³ணேஹீ’’தி வுத்தம் ஸியா. ரூபாதி³க்³க³ஹணேதி ரூபாதி³விஸயே சக்கு²விஞ்ஞாணாதி³கே நிப்பா²தே³தப்³பே³தி அத்தோ². உபகரிதப்³ப³தோதி ஸஹகாரீகாரணபூ⁴தேஹி யதா²வுத்தபூ⁴தகு³ணேஹி சக்கா²தீ³னம் ஸகிச்சகரணே உபகரிதப்³ப³தோ. ஸபா⁴வேன ஸுய்யமானஸ்ஸாதி கேனசி அனுச்சாரியமானஸ்ஸேவ லப்³ப⁴மானத்தா வுத்தம். க⁴ட்டனம் பன வினா வாயுஸத்³தோ³பி நத்தீ²தி. அத² வா வாயும்ஹி ஸத்³தோ³ ஸபா⁴வேன ஸுய்யதீதி ஆபே ரஸோ மது⁴ரோதி ச தஸ்ஸ லத்³தி⁴யேவாதி த³ட்ட²ப்³ப³ம். து³தியவாதி³ஸ்ஸபி நிக்³க³ஹோ ஹோதி தஸ்ஸபி தேஜாதி³கு³ணா ரூபாத³யோதி ஏவம்லத்³தி⁴கத்தா.

ரூபாதி³விஸேஸகு³ணேஹீதி ரூபாதி³விஸேஸகு³ணயுத்தேஹி. தேஜ…பே… வாயூஹீதி ஸஹாகாஸேஹி தேஜாதி³பரமாணூஹி. கப்பாஸதோ விஸதி³ஸாயாதி கப்பாஸபத²விதோ விஸேஸயுத்தாய ததோ அதி⁴கஸாமத்தி²யயுத்தாயாதி அதி⁴ப்பாயோ. தஸ்ஸாயேவாதி கப்பாஸபத²வியாயேவ. யஸ்மா ஸா விஜ்ஜமானானிபி அவிஸேஸபூ⁴தானி அத்தீ²தி க³ஹேதும் அஸக்குணேய்யபா⁴வேன அபி⁴ப⁴வித்வா டி²தா, தஸ்மா தஸ்ஸாயேவ க³ந்தோ⁴ அதி⁴கதரோ ப⁴வேய்யாதி அத்தோ². அயஞ்ச ஸப்³போ³ உத்தரோ ‘‘தஸ்ஸ தஸ்ஸ பூ⁴தஸ்ஸ அதி⁴கதாயா’’திஆதி³னா அட்ட²கதா²யம் (த⁴. ஸ. அட்ட². 600) வுத்தத்தா ததா²க³தானம் வாத³ம் ஸம்படிச்சி²த்வா வத³ந்தஸ்ஸ கணாத³ஸ்ஸ வஸேன வுத்தோ. ‘‘அத்தனோ பன மதேன கணாத³கபிலாத³யோ கேவலம் பத²வாதி³த்³ரப்³யமேவாதிஆதி³ லத்³தி⁴. கணாத³ஸாஸனாய அதி⁴முத்தானம் ஸாஸனே அனவகா³ள்ஹானம் கேஸஞ்சி அயம் வாதோ³’’தி ச வத³ந்தி. ஏதஸ்ஸுப⁴யஸ்ஸாதி ஆஸவக³ந்த⁴தோ கப்பாஸக³ந்தோ⁴ அதி⁴கோ ஸீதுத³கவண்ணதோ உண்ஹோத³கவண்ணோ ச அதி⁴கோதி ஏதஸ்ஸ உப⁴யஸ்ஸ. தேஜாதி³அதி⁴கேஸு ச ஸம்பா⁴ரேஸு ரூபாதீ³னம் விஸேஸஸ்ஸ அத³ஸ்ஸனதோ ந ரூபாத³யோ தேஜாதீ³னம் விஸேஸகு³ணோதி ஸித்³த⁴ந்தி ஆஹ ‘‘தத³பா⁴…பே… த்திதா’’தி. தேன ந ரூபம் தேஜஸ்ஸ விஸேஸகு³ணோ ஏகந்ததோ தேஜாதி³கே ஸம்பா⁴ரே விஸேஸேன அத³ஸ்ஸனதோ, யோ யஸ்ஸ விஸேஸகு³ணோ, ந ஸோ தத³தி⁴கே ஸம்பா⁴ரே ஏகந்ததோ விஸேஸேன தி³ஸ்ஸதி யதா² பத²வீஅதி⁴கே ஸம்பா⁴ரே ஆபோதா⁴தூதி த³ஸ்ஸேதி. ஏவம் ஸேஸேஸுபி யதா²யோக³ம் யோஜேதப்³ப³ம். கோ பன வாதோ³ நானாகலாபேதி ஸபா⁴வதோ நானத்தாபா⁴வேபி மூலகாரணனானத்தவஸேன அத்தி² கோசி விஸேஸோ அஸங்கா⁴தேதி த³ஸ்ஸேதி, யதோ பரமரணாதி³கிரியாஸமத்த²தா நேஸம் கேஸஞ்சியேவ தி³ஸ்ஸதீதி.

ஏகம்பீதி பி-ஸத்³தே³ன அனேகஸ்மிம் வத்தப்³ப³மேவ நத்தீ²தி த³ஸ்ஸேதி. பஞ்சாயதனிகத்தபா⁴வே பத்த²னா யா த³ட்டு²காமதாதி³பா⁴வேன வுத்தா, தாய நிப்ப²ன்னம். ஏதேன காரணவிஸேஸேன ப²லவிஸேஸமாஹ. ந ஹீதிஆதி³னா வுத்தமேவத்த²ம் ஸமத்த²யதி. தந்தி கம்மம். விஸேஸேனாதி அத்தனோ காரணேன ஆஹிதாதிஸயேன. தேனேவ ஸோதஸ்ஸ ந ஹோதி பச்சயோ, ததோ அஞ்ஞேனேவ பன ஹோதீதி அதி⁴ப்பாயோ. தேன அனேகஸபா⁴வேன காரணேன ஆஹிதவிஸேஸம் ஏகம்பி கம்மம் அனேகஸபா⁴வம் ப²லம் நிப்பா²தே³தும் ஸமத்த²ம் ஹோதீதி த³ஸ்ஸேதி. இதா³னி கம்மஸ்ஸ வுத்தப்பகாரவிஸேஸாபா⁴வே தோ³ஸமாஹ ‘‘இந்த்³ரியந்தராபா⁴வப்பத்திதோ’’தி. தஸ்ஸத்தோ² – காரணவிஸேஸாபா⁴வே ப²லவிஸேஸஸ்ஸ அஸம்ப⁴வதோ யம் விஸேஸயுத்தம் கம்மம் சக்கு²ஸ்ஸ காரணம், தஸ்ஸ ததோ அஞ்ஞவிஸேஸாபா⁴வே தத³ஞ்ஞிந்த்³ரியுப்பாத³கதாபி ந ஸியாதி ஸோதிந்த்³ரியாதீ³னம் ததோ அனுப்பத்தி ஏவ ஸியா. ஏவமிதரத்தா²பி. விஸேஸோதி சேத்த² கம்மஸ்ஸ தம்தம்இந்த்³ரியுப்பாத³னஸமத்த²தா அதி⁴ப்பேதா, ஸா ச புப்³பே³ த³ஸ்ஸிதஸபா⁴வோவ.

அனேகாஹி மஹக்³க³தசேதனாஹி ஏகாய வா பரித்தசேதனாஸஹிதாய படிஸந்தி⁴க்க²ணே கடத்தாரூபானம் நிப்³ப³த்தீதி ந ஸக்கா விஞ்ஞாதுந்தி ‘‘ஸப்³பே³ஸம்…பே… விஞ்ஞாயதீ’’தி வுத்தம். இதா³னி தமேவ அஸக்குணேய்யதம் வித்தா²ரதோ த³ஸ்ஸேதும் ‘‘நானாசேதனாயா’’திஆதி³ வுத்தம். தஸ்ஸாயம் ஸங்கே²பத்தோ² – ‘‘படிஸ…பே… பச்சயோ’’தி ஏத்த² யதி³ நானாகம்மவஸேன இந்த்³ரியானம் உப்பத்தி அதி⁴ப்பேதா, ஏவம் ஸதி மஹக்³க³தகம்மேன ச காமாவசரகம்மேன ச தம்தம்படிஸந்தி⁴க்க²ணே கடத்தாரூபம் உப்பன்னம் ஸியா, ந சேதம் யுத்தம் ‘‘மஹக்³க³தசேதனா கம்மபச்சயோ’’தி (பட்டா². 2.12.78) வுத்தத்தா. நாபி தம்தம்ப⁴வனியதரூபிந்த்³ரியேஹி விகலிந்த்³ரியதா க³திஸம்பத்தியா ஓபபாதிகயோனியம் படிஸந்தி⁴க்க²ணே யுத்தா. அத² மஹக்³க³தாஹி ஏவ நானாசேதனாஹி நிப்³ப³த்தம், ந சேகா படிஸந்தி⁴ அனேககம்மனிப்³ப³த்தா ஹோதி. நிச்சி²தஞ்ஹேதம் ஸாகேதபஞ்ஹேனாதி. ஏவம் ஏகேன மஹக்³க³தகம்முனா சக்கு²ந்த்³ரியஸோதிந்த்³ரியஹத³யவத்தூ²னம் உப்பத்திஞாபகேன இமினா வசனேன பரித்தகம்முனாபி ஏகேன யதா²ரஹம் அனேகேஸம் இந்த்³ரியானம் உப்பத்தி ஸித்³தா⁴வாதி வுத்தம் ‘‘ஸித்³த⁴மேகேன கம்மேன அனேகிந்த்³ரியுப்பத்தி ஹோதீ’’தி.

ஸம்பத்தோயேவ நாம ஸம்பத்திகிச்சகரணதோதி இமமத்த²ம் த³ஸ்ஸேதும் ‘‘படி…பே… நகதோ’’தி வுத்தம். அதிஸுகு²மபா⁴வதோ மம்ஸசக்கு²அகோ³சரேன ரூபாயதனேன ஸமன்னாக³தஸங்கா⁴தவுத்திதாய ச ‘‘வாயு வியா’’தி வுத்தம். சித்தஸமுட்டா²னம் ஸத்³தா³யதனம் ஸோதவிஞ்ஞாணஸ்ஸ கதா³சிபி ஆரம்மணபச்சயோ ந ஸியா தா⁴துபரம்பராய க⁴ட்டேந்தஸ்ஸ உதுஸமுட்டா²னத்தா. தேனாஹ ‘‘ந ஹி…பே… பஜ்ஜதீ’’தி. பட்டா²னே (பட்டா². 1.1.2) ச ‘‘ஸத்³தா³யதனம் ஸோதவிஞ்ஞாணஸ்ஸ ஆரம்மணபச்சயேன பச்சயோ’’தி அவிஸேஸேன வுத்தம்.

நனு சிரேன ஸுய்யந்தீதி தூ³ரே டி²தானம் லஹுகம் ஸவனம் நத்தி², தேஸம்பி வா லஹுகம் ஸவனேன தூ³ராஸன்னபா⁴வானம் விஸேஸோ ந ஸியாதி அதி⁴ப்பாயோ. ந, தூ³…பே… தோதி ந தூ³ரே டி²தேஹி ரஜகாதி³ஸத்³தா³ சிரேன ஸோதவிஞ்ஞாணேன ஸுய்யந்தி, ஸசே ஸவனூபசாரே ஸோ ஸத்³தோ³ தூ³ரே ஆஸன்னே ச டி²தானம் யதா²பூ⁴தே ஆபாத²க³தே ஸத்³தே³ மனோவிஞ்ஞாணஸங்கா²ததோ க³ஹணவிஸேஸதோ சிரேன ஸுதோ ஸீக⁴ம் ஸுதோதி அபி⁴மானோதி அத்தோ². ஏதமேவத்த²ம் வித்தா²ரதோ த³ஸ்ஸேந்தோ ‘‘யதா² ஹீ’’திஆதி³மாஹ. நிச்ச²ய…பே… அபி⁴மானோ ஹோதி, ஸோதவிஞ்ஞாணப்பவத்தி பன உப⁴யத்தா²பி ஸமானா, யஸ்மா ஸோ பன ஸத்³தோ³…பே… ஆக³ச்ச²தீதி. யதி³ தா⁴துபரம்பராய ஸத்³தோ³ நப்பவத்ததி, கத²ம் படிகோ⁴ஸாதீ³னம் உப்பத்தீதி ஆஹ ‘‘தூ³ரே…பே… பச்சயோ ஹோதீ’’தி. உப்பத்திவஸேன ஆக³தானீதி ஏதேன ரூபத⁴ம்மாபி யத்த² உப்பஜ்ஜந்தி, தத்தே²வ பி⁴ஜ்ஜந்தி, ந தே³ஸந்தரம் ஸங்கமந்தீதி த³ஸ்ஸேதி. க⁴ட்டனஸபா⁴வானேவாதி தேஸம் பூ⁴தானம் ஸத்³த³ஸமுப்பத்திஹேதுபா⁴வமாஹ. ஸோதபதே³ஸஸ்ஸாதி ஸோததே³ஸஸ்ஸ, ஸோததே³ஸே டி²தஸ்ஸாதி அத்தோ².

சக்கு²மதோ புக்³க³லஸ்ஸ அஜ்ஜா²ஸயவஸேனாதி சித்ரவிசித்ரரூபாயதனே யேபு⁴ய்யேன ஸத்தானம் சக்கு²த்³வாரிகஜவனஸ்ஸ அனுகட்³ட⁴னவஸேன பவத்திம் ஸந்தா⁴ய வுத்தம். கண்ணகூபச்சி²த்³தே³யேவ பவத்தனதோதி ஏதேன அதி⁴ட்டா²னதோ ப³ஹித்³தா⁴ இந்த்³ரியம் பவத்தீதி வாத³ம் படிஸேதே⁴தி. அதி⁴ட்டா²னதே³ஸே ஏவ ஹி இந்த்³ரியம் வத்ததி தத்த² கிச்சாதி³ப்பயோக³த³ஸ்ஸனதோ. ஸதிபி பனஸ்ஸ ப³ஹித்³தா⁴ வுத்தியம் ந விஸயக்³க³ஹணே ஸமத்த²தா, அஞ்ஞதா² அதி⁴ட்டா²னபித³ஹனேபி விஸயக்³க³ஹணம் ப⁴வேய்யாதி. ஆரம்மணக்³க³ஹணஹேதுதோ சாதி கண்ணகூபச்சி²த்³தே³யேவ ட²த்வா ஆரம்மணகரணஸ்ஸ விஞ்ஞாணஸ்ஸ வா ஹேதுபா⁴வதோ.

தப்³போ³ஹாரேனாதி க³ந்த⁴க³ந்த⁴க்³க³ஹணஸ்ஸ ஸஹசரிதாய க³ந்தோ⁴பி ததா² வுத்தோதி அதி⁴ப்பாயோ. க³ந்தோ⁴ பச்சயோதி க³ந்தோ⁴ ஸஹகாரீபச்சயோதி அத்தோ². கே²ளாதி³கோ பச்சயோதி யோஜேதப்³ப³ம். ததா² பத²வீதி ஸஹகாரீபச்சயந்தரபூ⁴தா அஜ்ஜ²த்திகபா³ஹிரா பத²வீ ஆரம்மணக்³க³ஹணே பச்சயோதி அத்தோ². ஆதா⁴ரபூ⁴தாதி தேஜோவாயோதா⁴தூனம் ஆதா⁴ரபூ⁴தா. நிஸ்ஸயபூ⁴தானந்தி நிஸ்ஸயமஹாபூ⁴தானம் ஆபோதேஜோவாயோதா⁴தூனம். ஸப்³ப³தா³தி உப்பீளனகாலே ச அனுப்பீளனகாலே ச. தத்தா²தி சதுராஸீதிபபே⁴தே³ உபரிமகாயஸங்கா²தே ரூபஸமூஹே. வினிப்³பு⁴ஜ்ஜிதும் அஸக்குணேய்யானந்தி இத³ம் சக்கு²த³ஸகம் இத³ம் காயத³ஸகம் இத³ம் பா⁴வத³ஸகந்தி ஏவம் கலாபதோபி வினிப்³பு⁴ஜ்ஜிதும் அஸக்குணேய்யானம்.

616. தீ³கா⁴தீ³னம் பு²ஸித்வா ஜானிதப்³ப³தோதி இத³ம் தீ³கா⁴தீ³னம் ந காயவிஞ்ஞாணகோ³சரத்தா வுத்தம், தீ³கா⁴தி³வோஹாரரூபாதீ³னம் பன போ²ட்ட²ப்³ப³ம் பு²ஸித்வா காயவிஞ்ஞாணவீதி²யா பரதோ பவத்தேன மனோவிஞ்ஞாணேனபி ஜானிதப்³ப³த்தா வுத்தம். தீ³கா⁴தி³ஸன்னிவேஸந்தி தீ³கா⁴தி³ஸன்னிவேஸவந்தம். ஏகஸ்மிம் இதரஸ்ஸ அபா⁴வாதி சா²யாதபானம் ஆலோகந்த⁴காரானஞ்ச அஸஹட்டா²யிதம் ஆஹ. கத²ம் பன ஆலோகோ அந்த⁴காரம் வித⁴மதீதி? ‘‘ஆலோகப்பவத்திஸமானகாலம் அந்த⁴காரஸபா⁴வேன பவத்தமானம் வண்ணாயதனம் பி⁴ஜ்ஜதி. அந்த⁴காரஸ்ஸ நிஸ்ஸயோ ஹுத்வா பவத்தமானானி பூ⁴தானி கமேன ததா²ரூபஸ்ஸ வண்ணாயதனஸ்ஸ நிஸ்ஸயபா⁴வம் க³ச்ச²ந்தீ’’தி கேசி. ஸஹ அந்த⁴காரேன தன்னிஸ்ஸயபூ⁴தானம் நிரோத⁴ஸமனந்தரம் தம்ஸந்ததியம் தாதி³ஸே பச்சயஸன்னிபாதே ஆலோகனிஸ்ஸயபூ⁴தானம் உப்பத்தீதி வேதி³தப்³ப³ம். ந ஹி நிஸ்ஸயமஹாபூ⁴தேஹி வினா ஆலோகப்பவத்தி அத்தி², நாபி அந்த⁴காரஸங்கா²தம் வண்ணாயதனமேவ நிருஜ்ஜ²தி தம்னிஸ்ஸயேஹி பயுஜ்ஜமானகஏககலாபபூ⁴தோபாதா³ரூபானம் ஸஹேவ நிருஜ்ஜ²னதோ. பதீ³பஸிகா²மணிரம்ஸியோ விய பத²வீபாகாரருக்கா²தீ³னி முஞ்சித்வாபி அந்த⁴காரோ பவத்ததீதி வத³ந்தி. மந்த³ம் பன பாகாராதி³ஆதா⁴ரரஹிதம் ந ஸுட்டு² பஞ்ஞாயதி, ப³ஹலம் ஆதா⁴ரம் நிஸ்ஸாய பவத்ததீதி யுத்தந்தி ச வத³ந்தி.

620. ‘‘அமனுஸ்ஸஸத்³தோ³’’தி ஏத்த² அ-காரோ ந மனுஸ்ஸதாமத்தனிவத்திஅத்தோ² ஸதி³ஸபா⁴வதீ³பனதாய அனதி⁴ப்பேதத்தா, மனுஸ்ஸதோ பன அனஞ்ஞதானிவத்திஅத்தோ²தி த³ஸ்ஸேதும் ‘‘அமனுஸ்ஸ…பே… ட்டா²த³யோபீ’’தி ஆஹ. ததா² கித்தேதப்³போ³தி ‘‘வம்ஸபா²லனஸத்³தோ³’’திஆதி³னா வத்து²வஸேன கித்தேதப்³போ³.

632. கம்மசித்தாதி³னாதி ஆதி³-ஸத்³தே³ன உதுஆஹாரே ஸங்க³ண்ஹாதி. தம்ததா³காரானீதி இத்தி²லிங்கா³தி³ஆகாரானி. இத்தி²ந்த்³ரியம் படிச்ச ஸமுட்ட²ஹந்தீதி அஞ்ஞமஞ்ஞபச்சயானிபி இத்தி²லிங்கா³தீ³னி யேபு⁴ய்யேன இத்தி²ந்த்³ரியஸஹிதே ஏவ ஸந்தானே ஸப்³பா⁴வா இதரத்த² ச அபா⁴வா இந்த்³ரியஹேதுகானி வுத்தானி. அஞ்ஞதா²தி இத்தி²லிங்கா³தி³ஆகாரதோ அஞ்ஞதா², இத்தி²ந்த்³ரியாபா⁴வே வா. இத்தி²க்³க³ஹணஸ்ஸ சாதி இத்தீ²தி சித்தப்பவத்தியா. தேஸம் ரூபானந்தி இத்தி²லிங்கா³தி³ஆகாரரூபானம். யதி³ இத்தி²ந்த்³ரியம் இத்தி²லிங்கா³தி³ஆகாரரூபானம் ஸஹகாரீகாரணம், அத² கஸ்மா தஸ்ஸ இந்த்³ரியாதி³பச்சயபா⁴வோ தேஸம் ந வுத்தோதி? நேவ தம் ஸஹகாரீகாரணம், அத² கோ² தேஸம் தப்³பா⁴வபா⁴விதாமத்தேன தம் காரணந்தி வுச்சதீதி த³ஸ்ஸேதும் ஆஹ ‘‘யஸ்மா பனா’’திஆதி³.

633. லிங்க³ம் பரிவத்தமானம் புரிமலிங்கா³தா⁴ரஜாதிஅனுரூபமேவ ஹுத்வா பரிவத்ததீதி கத்வா வுத்தம் ‘‘படிஸந்தி⁴யம் விய பவத்தேபீ’’தி. யஸ்ஸ…பே… நோதி ஆதி³வசனதோதி ஆதி³-ஸத்³தே³ன ‘‘யஸ்ஸ வா பன புரிஸிந்த்³ரியம் உப்பஜ்ஜதி, தஸ்ஸ இத்தி²ந்த்³ரியம் உப்பஜ்ஜதீதி நோ’’தி (யம. 3.இந்த்³ரியயமக.188) ஸங்க³ண்ஹாதி.

635. த்³வாரபா⁴வேன குச்சி²தானம் ஆஸவத⁴ம்மானம் பவத்திட்டா²னதாய பஸாத³விஸேஸே விய விஞ்ஞத்திவிஸேஸேபி காயவோஹாரப்பவத்தி த³ட்ட²ப்³பா³. வித்த²ம்ப⁴னஸபா⁴வதாய வாயோதா⁴துயா த²ம்ப⁴னம் ‘‘வாயோதா⁴துகிச்ச’’ந்தி வுத்தம். கிச்சம்பி ஹி த⁴ம்மானம் ஸபா⁴வோயேவாதி. பத²வீதா⁴துயா ஆகாரோ வசீவிஞ்ஞத்தீதி வத்தும் வட்டதீதி யோஜனா.

636. விதக்க…பே… க³ஹிதாதி யதா²தி⁴ப்பேதத்தா²பி⁴ப்³யஞ்ஜிகாய வாசாய ஸமுட்டா²பனாதி⁴ப்பாயப்பவத்திம் ஸந்தா⁴ய வுத்தம். ததா³ ஹி ஸா தேஹி பரிக்³க³ஹிதா நாம ஹோதீதி. ஏகஸ்ஸபி அக்க²ரஸ்ஸ அனேகேஹி ஜவனேஹி நிப்³ப³த்தேதப்³ப³த்தா ததா² நிப்³ப³த்தியமானதாய அஸமத்த²ஸபா⁴வத்தா ந விஞ்ஞாதவிஸேஸா ந பி⁴ன்னா ஏவாதி ஆஹ ‘‘ஸவ…பே… பி⁴ன்னா’’தி. அப்³போ³கிண்ணேதி அந்தரந்தரா உப்பஜ்ஜமானேஹி அஸம்ஸட்டே². ‘‘பச்சி²மசித்த’’ந்தி அவிஸேஸேன சுதிசித்தம் வுத்தந்தி அதி⁴ப்பாயேன ‘‘அஞ்ஞேஸம்பி சுதிசித்தம்…பே… ஞாயதீ’’தி வுத்தம்.

அத² வா ‘‘யே ச ரூபாவசரம் அரூபாவசரம் உபபஜ்ஜித்வா பரினிப்³பா³யிஸ்ஸந்தி, தேஸம் சவந்தானம் தேஸம் வசீஸங்கா²ரோ நிருஜ்ஜி²ஸ்ஸதி, நோ ச தேஸம் காயஸங்கா²ரோ நிருஜ்ஜி²ஸ்ஸதீ’’தி (யம. 2.ஸங்கா²ரயமக.88) ரூபாரூபப⁴வூபபஜ்ஜனகானம் காமாவசரசுதிசித்தஸ்ஸபி காயஸங்கா²ராஸமுட்டா²பனவசனேன கீ²ணாஸவேஹி அஞ்ஞேஸம்பி…பே… ஞாயதீ’’தி வுத்தம். யஸ்மா ச –

‘‘யஸ்ஸ காயஸங்கா²ரோ நிருஜ்ஜ²தி, தஸ்ஸ வசீஸங்கா²ரோ நிருஜ்ஜி²ஸ்ஸதீதி ஆமந்தா’’தி (யம. 2.ஸங்கா²ரயமக.108),

‘‘யஸ்ஸ காயஸங்கா²ரோ நிருஜ்ஜ²தி, தஸ்ஸ சித்தஸங்கா²ரோ நிருஜ்ஜி²ஸ்ஸதீதி ஆமந்தா’’தி (யம. 2.ஸங்கா²ரயமக.108) ச,

‘‘பச்சி²மசித்தஸ்ஸ ப⁴ங்க³க்க²ணே தேஸம் காயஸங்கா²ரோ ச ந நிருஜ்ஜ²தி சித்தஸங்கா²ரோ ச ந நிருஜ்ஜி²ஸ்ஸதீ’’தி (யம. 2.ஸங்கா²ரயமக.113) –

ஆதி³வசனதோ ச பச்சி²மசித்தஸ்ஸ புரதோ ஸோளஸமேன சித்தேன ததோ ஓரிமேன வா ஸத்³தி⁴ம் அஸ்ஸாஸபஸ்ஸாஸா ந உப்பஜ்ஜந்தீதி ஸித்³த⁴ம். யதி³ உப்பஜ்ஜேய்யும், ‘‘பச்சி²மசித்தஸ்ஸ ப⁴ங்க³க்க²ணே தேஸம் காயஸங்கா²ரோ ந நிருஜ்ஜ²தீ’’தி ந வதே³ய்ய, வுத்தஞ்சேதம், தஸ்மா ஹேட்டி²மகோடியா சுதிதோ புரிமேன ஸத்தரஸமேன உப்பன்னா அஸ்ஸாஸபஸ்ஸாஸா சுதியா ஹேட்டா² து³தியேன சித்தேன ஸத்³தி⁴ம் நிருஜ்ஜ²ந்தி. தேன ‘‘யஸ்ஸ சித்தஸ்ஸ அனந்தரா காமாவசரானம் பச்சி²மசித்தம் உப்பஜ்ஜிஸ்ஸதீ’’தி சுதிசித்தஸ்ஸானந்தரபச்சயபூ⁴தஸ்ஸபி சித்தஸ்ஸ காயஸங்கா²ராஸமுட்டா²பனதா வுத்தா.

அத² வா யஸ்ஸ சித்தஸ்ஸாதி யேன சித்தேன ஸப்³ப³பச்சி²மோ காயஸங்கா²ரோ உப்பஜ்ஜதி. தம் சித்தம் வுத்தந்தி க³ஹேதப்³ப³ம், ந பச்சி²மசித்தஸ்ஸ அனந்தரபச்சயபூ⁴தம். அனந்தராதி ஹி காயஸங்கா²ருப்பாத³னம் அந்தரம் வினா, யதோ பச்சா² காயஸங்கா²ருப்பாத³னேன அனந்தரிதம் ஹுத்வா பச்சி²மசித்தம் உப்பஜ்ஜிஸ்ஸதீதி அத்தோ². கஸ்மா? ‘‘இதரேஸம் வசீஸங்கா²ரோ ச நிருஜ்ஜி²ஸ்ஸதி காயஸங்கா²ரோ ச நிருஜ்ஜி²ஸ்ஸதீ’’தி (யம. 2.ஸங்கா²ரயமக.88) வுத்தத்தா. அஞ்ஞதா²பச்சி²மசித்ததோ புரிமததியசித்தஸமங்கீ³னம் காயஸங்கா²ரோ உப்பஜ்ஜதீதி ஆபஜ்ஜதீதி. ஏவம் ஸப்³பே³ஸம்பி சுதிசித்தஸ்ஸ ரூபஜனகதாபா⁴வே ஆக³மம் த³ஸ்ஸேத்வா இதா³னி யுத்திம் த³ஸ்ஸேதும் ‘‘ந ஹீ’’திஆதி³மாஹ. தத்த² க³ப்³ப⁴க³மனாதீ³தி ஆதி³-ஸத்³தே³ன உத³கனிமுக்³க³அஸஞ்ஞீபூ⁴தகாலகதசதுத்த²ஜ்ஜா²னஸமாபன்னரூபாரூபப⁴வஸமங்கீ³னிரோத⁴ஸமாபன்னபா⁴வே ஸங்க³ண்ஹாதி.

637. அனேகேஸம் கலாபானம் ஏகதோ ஹுத்வா ஏகக⁴னபிண்ட³பா⁴வேன பவத்தனதோ கலாபந்தரபூ⁴தானம் கலாபந்தரபூ⁴தேஹி ஸம்பு²ட்ட²பா⁴வோ வுத்தோ. யதோ தேஸம் து³விஞ்ஞேய்யனானத்தம், ந பன அவினிப்³பு⁴த்தபா⁴வதோ. தம்தம்பூ⁴தவிவித்ததாதி தேஸம் தேஸம் பூ⁴தானம் விப⁴த்தபா⁴வோ கலாபந்தரபூ⁴தேஹி விப⁴த்தஸபா⁴வதா அஸம்கிண்ணதாதி அத்தோ². யஸ்மா பன யதா²வுத்தா விவித்ததா ரூபானம் ஓஸானம் ஹோதி, தஸ்மா ‘‘ரூபபரியந்தோ’’தி வுத்தம். அத² வா தம்தம்பூ⁴தஸுஞ்ஞதா. யேஸஞ்ஹி பரிச்சே²தோ³ ஆகாஸோ, தேஸம் பரியந்ததாய தேஹி ஸுஞ்ஞபா⁴வோதி லக்கி²தப்³போ³. ததோயேவ ச ஸோ பூ⁴தந்தரேஹி விய தேஹி அஸம்பு²ட்டோ²தி வுச்சதீதி. அஞ்ஞதா²தி பரிச்சி²ந்தி³தப்³பே³ஹி அஸம்பு²ட்ட²பா⁴வாபா⁴வே.

638. தம்தம்விகாராதி⁴கரூபேஹீதி ஏத்த² கத²ம் சம்மஸுவண்ணேஸு முது³தாகம்மஞ்ஞதா லப்³ப⁴ந்தி, நனு லஹுதாதி³விகாரா ஏகந்ததோ இந்த்³ரியப³த்³த⁴ரூபே ஏவ பவத்தனதோ அனிந்த்³ரியப³த்³தே⁴ ந லப்³ப⁴ந்தீதி? ஸச்சமேதம், இத⁴ பன தம்ஸதி³ஸேஸு தப்³போ³ஹாரவஸேன வுத்தம். ததா² ஹி தூலபிசுஆதீ³ஸு க³ருபா⁴வாதி³ஹேதூனம் பூ⁴தானம் அதி⁴கபா⁴வாபா⁴வதோ லஹுஆதி³வோஹாரோ. நித்³தி³ஸிதப்³ப³த⁴ம்மனிஸ்ஸயரூபே ஏவ வா ஸந்தா⁴ய ‘‘தம்தம்விகாராதி⁴கரூபேஹீ’’தி வுத்தந்தி த³ட்ட²ப்³ப³ம். ஸப்³பே³ ஸப்³பே³ஸம் பச்சயா லஹுதாதீ³னம் அஞ்ஞமஞ்ஞாவிஜஹனதோதி அதி⁴ப்பாயோ.

641. ஆசயஸத்³தே³னேவாதி நித்³தே³ஸே வுத்தஆசயஸத்³தே³னேவ. யோ ஆயதனானம் ஆதி³சயத்தா ஆசயோ புனப்புனம் நிப்³ப³த்தமானானம், ஸோவ ரூபஸ்ஸ உபரிசயத்தா உபசயோதி அதி⁴ப்பேதம் அத்த²ம் பாளியம் யோஜேத்வா த³ஸ்ஸேதும் ‘‘பாளியம் பனா’’திஆதி³ வுத்தம். உப-ஸத்³தோ³ பட²மத்தோ² ‘‘தா³னம், பி⁴க்க²வே, பண்டி³துபஞ்ஞத்த’’ந்திஆதீ³ஸு (அ. நி. 3.45) விய. உபரிஅத்தோ²ச ‘‘ஸம்மட்டே² உபஸித்தே ச, தே நிஸீதி³ம்ஸு மண்ட³பே’’திஆதீ³ஸு விய. அஞ்ஞதா²தி உப-ஸத்³த³ஸ்ஸ உபரிஅத்த²ஸ்ஸேவ க³ஹணே.

643. ப²லவிபச்சனபகதியாதி ப²லவிபச்சனஸபா⁴வேன. ப²லமேவ வா பகதீதி ஆயுஸம்ஹானாதி³னா ப²லஸபா⁴வேன ஜரானித்³தே³ஸோதி அத்தோ². ததா² ஹி ‘‘ப²லூபசாரேன வுத்தா’’தி வுத்தம். ஸுபரிணதரூபபரிபாககாலே ஹானித³ஸகாதீ³ஸு.

645. கத்தப்³ப³ஸபா⁴வதோதி மூலப²லாதீ³னம் இதா⁴தி⁴ப்பேதஆஹாரவத்தூ²னம் முகே²ன அஸனாதி³கத்தப்³ப³ஸபா⁴வதோ. விஸபூ⁴தே ஸங்கா⁴தே ஓஜா மந்தா³ ஹோதீதி ஸவிஸத்தாபா⁴வதோ ஸுகு²மதா வுத்தா. அங்க³மங்கா³னுஸாரினோ ரஸஸ்ஸ ஸாரோதி ரஸஹரணீத⁴மனிஜாலானுஸாரேன ஸரீராவயவே அனுப்பவிட்ட²ஸ்ஸ ஆஹாரரஸஸ்ஸ அப்³ப⁴ந்தராஹாரபச்சயோ ஸ்னேஹோ, யோ லோகே ரஸதா⁴தூதி வுச்சதி.

உபாதா³பா⁴ஜனீயகதா²வண்ணனா நிட்டி²தா.

நோஉபாதா³பா⁴ஜனீயகதா²வண்ணனா

646. ‘‘ஏகம் மஹாபூ⁴தம் படிச்ச தயோ மஹாபூ⁴தா தயோ மஹாபூ⁴தே படிச்ச ஏகம் மஹாபூ⁴த’’ந்திஆதி³வசனதோ (பட்டா². 1.1.53) ஏகம் மஹாபூ⁴தம் அவஸேஸமஹாபூ⁴தே நிஸ்ஸயதி, தேஹி உபாதா³ரூபேன ச நிஸ்ஸீயதீதி ஆஹ ‘‘நிஸ்ஸயதி ச நிஸ்ஸீயதி சா’’தி.

647. மஹாபூ⁴தானம் அஞ்ஞமஞ்ஞாவிஜஹனதோ ஏகஸ்மிம்பி கலாபே அனேகம் போ²ட்ட²ப்³ப³ம் அத்தீ²தி போ²ட்ட²ப்³ப³ஸபா⁴வேஸுயேவ அனேகேஸுபி ஆரம்மணேஸு ஆபாத²க³தேஸு ஆபோ⁴கா³தி³வஸேன ஏகம்யேவ விஞ்ஞாணுப்பத்திஹேது ஹோதீதி அயம் விசாரோ த³ஸ்ஸிதோ. இதரேஸுபி பன யதா²யோக³ம் த³ஸ்ஸேதப்³போ³. தத்த² ரஸாரம்மணம் தாவ இந்த்³ரியனிஸ்ஸயம் அல்லீயித்வா விஞ்ஞாணுப்பத்திஹேதுபா⁴வதோ ஸதிபி அனேகேஸம் ரஸானம் ஆபாத²க³மனே ஏகஸ்மிம் க²ணே ஏகப்பகாரம்யேவ யதா²வுத்தனயேன ஜிவ்ஹாவிஞ்ஞாணுப்பத்திஹேது ஹோதி, ததா² க³ந்தா⁴ரம்மணம். ரூபஸத்³தா³ரம்மணானி பன இந்த்³ரியனிஸ்ஸயம் அஸம்பத்வாவ விஞ்ஞாணுப்பத்திஹேதுபா⁴வதோ யோக்³யதே³ஸே அவட்டி²தானி யத்தகானி ஸஹகாரீபச்சயந்தரக³தம் உபகாரம் லப⁴ந்தி, தத்தகானி ஏகஸ்மிம் க²ணே ஏகஜ்ஜ²ம் ஆரம்மணம் ந ஹோந்தீதி ந வத்தப்³பா³னி. ததா² ஹி ஸத்³தோ³ நிக்³கோ⁴ஸாதி³கோ அனேககலாபக³தோ ததா² வண்ணோபி ஸிவிகுப்³ப³ஹனனியாமேன ஏகஜ்ஜ²ம் ஆரம்மணம் ஹோதீதி. ஏத்தா²பி ச ஆபு⁴ஜிதவஸேன ஆரம்மணாதி⁴மத்ததாவஸேன அனேககலாபஸன்னிபாதேபி கத்த²சி விஞ்ஞாணுப்பத்தி ஹோதியேவ. பஸாதா³தி⁴மத்ததா பித்தாதி³விப³ந்தா⁴பா⁴வேன பஸாத³ஸ்ஸ திக்க²தா. கத²ம் பன சித்தஸ்ஸாதி சித்தஸாமஞ்ஞதோ ஏகத்தனயவஸேன புச்ச²தி.

651. தாதி³ஸாயாதி யா பசுரஜனஸ்ஸ அத்தீ²திபி ந க³ஹிதா. ஸந்தீ ஸமானா. ஏவந்தி யதா²ஸஸம்பா⁴ருத³கம் ஸஸம்பா⁴ரபத²வியா ஆப³ந்த⁴கம், ஏவம் பரமத்து²த³கம் பரமத்த²பத²வியாதி த³ஸ்ஸேதி. தத³னுரூபபச்சயேஹீதி அத்தனோ ஆப³ந்த⁴னானுகு³ணேஹி ஆப³ந்தி⁴யமானேஹி ஸந்தா⁴ரணாதி³கிச்சேஹி புரிமேஹி ச பத²வீஆதீ³ஹி. அபு²ஸித்வா பதிட்டா² ஹோதி, அபு²ஸித்வா ஆப³ந்த⁴தீதி இமினா பு²ஸிதப்³ப³பு²ஸனகபா⁴வோ ஆபோதா⁴துயம் நத்தீ²தி போ²ட்ட²ப்³ப³வஸேன உப⁴யத⁴ம்மதம் ஆஹ. அஞ்ஞமஞ்ஞம் நிஸ்ஸயதா அஞ்ஞமஞ்ஞனிஸ்ஸயதா. அத² வா அஞ்ஞமஞ்ஞதா ச நிஸ்ஸயதா ச அஞ்ஞமஞ்ஞனிஸ்ஸயதா. யதி³ போ²ட்ட²ப்³பா³போ²ட்ட²ப்³ப³தா⁴தூனம் போ²ட்ட²ப்³ப³பா⁴வேன வினா அஞ்ஞமஞ்ஞனிஸ்ஸயதா, பத²வீஆதீ³னம் கக்க²ளாதி³ஸபா⁴வோ ஏவ போ²ட்ட²ப்³ப³பா⁴வோதி தப்³பி³ரஹேன கத²ம் தேஸம் ஆபோதா⁴துயா நிஸ்ஸயாதி³பா⁴வோதி ஆஹ ‘‘அவினிப்³போ⁴க³வுத்தீஸூ’’திஆதி³. அஞ்ஞமஞ்ஞபச்சயபூ⁴தேஸூதி ஏதேன உபாதா³ரூபம் நிவத்தேதி. அத² வா புப்³பே³ அட்ட²கதா²தி⁴ப்பாயே ட²த்வா போ²ட்ட²ப்³பா³போ²ட்ட²ப்³ப³தா⁴தூனம் விஸிட்ட²ம் அஞ்ஞமஞ்ஞனிஸ்ஸயதம் வத்வா இதா³னி அத்தனோ அதி⁴ப்பாயே ட²த்வா அவிஸேஸேன தம் த³ஸ்ஸேந்தோ ஆஹ ‘‘அவினிப்³போ⁴க³வுத்தீஸூ’’திஆதி³. தம்யேவ அவிஸிட்ட²ம் அஞ்ஞமஞ்ஞனிஸ்ஸயதம் த³ள்ஹம் கத்வா த³ஸ்ஸேந்தோ ‘‘நாபி ஸஹஜாதேஸூ’’திஆதி³மாஹ. தத்த² அபு²ஸனம் தாவ ஏககலாபக³தத்தா ந விசாரேதப்³ப³ம், பு²ஸனம் பன கத²ந்தி? ஏககலாபக³தத்தா ஏவ. விஸும் ஸித்³தா⁴னம்யேவ ஹி விஸயமஹாபூ⁴தானம் காயப்பஸாத³னிஸ்ஸயபூ⁴தேஸு பு²ஸனம் தி³ஸ்ஸதி.

ஜா²யதீதி பரிபச்சதி. ந உண்ஹா ஹுத்வாதி ஏதஸ்ஸ உண்ஹஸபா⁴வா ஹுத்வாதி அயமத்தோ²தி கத்வா ‘‘தேஜோஸபா⁴வதம்யேவ படிக்கி²பதீ’’தி வுத்தம். உண்ஹபடிபக்க²த்தா ஸீதஸ்ஸ உண்ஹதாய படிக்கே²பே ஸீததாஸங்கா ஸியாதி ஆஹ ‘‘ந ஸீதத்தம் அனுஜானாதீ’’தி. தேஜோஸபா⁴க³தம்யேவ வா ஸீததாயபி த³ஸ்ஸேதும் ‘‘ந ஸீதத்தம் அனுஜானாதீ’’தி வுத்தம். தேனேவாஹ ‘‘தேஜோ ஏவ ஹி ஸீத’’ந்தி. மந்தே³ ஹி உண்ஹபா⁴வே ஸீதபு³த்³தீ⁴தி தேஜோ ஏவ ஹி ஸீதம். கத²ம் பனேதம் விஞ்ஞாயதீதி? ஸீதபு³த்³தி⁴யா அவவத்தி²தபா⁴வதோ பாராபாரம் விய. ததா² ஹி ஆதபே ட²த்வா சா²யம் பவிட்டா²னம் ஸீதபு³த்³தி⁴ ஹோதி, தத்தே²வ பத²வீக³ப்³ப⁴தோ நிக்³க³தானம் உண்ஹபு³த்³தீ⁴தி. யதி³ தேஜோயேவ ஸீதம், உண்ஹபா⁴வேன ஸத்³தி⁴ம் ஸீதபா⁴வோபி ஏகஸ்மிம் கலாபே உபலப்³பே⁴ய்யாதி ஆஹ ‘‘ஸீதுண்ஹானஞ்சா’’திஆதி³. உண்ஹஸீதகலாபேஸு ஸீதுண்ஹானம் அப்பவத்தி. த்³வின்னம்…பே… யுஜ்ஜதி, ந ஆபோதா⁴துவாயோதா⁴தூனம் ஸீதபா⁴வேதி அதி⁴ப்பாயோ. ஆபோதா⁴துயா ஹி வாயோதா⁴துயா ஸீதபா⁴வே உண்ஹபா⁴வேன ஸத்³தி⁴ம் ஏகஸ்மிம் கலாபே ஸீதபா⁴வோ லப்³பே⁴ய்ய, ந பன லப்³ப⁴தி. ந சேத்த² ஆபோதா⁴துஅதி⁴கே வாயோதா⁴துஅதி⁴கே வா கலாபே ஸீதபா⁴வோதி ஸக்கா விஞ்ஞாதும் தாதி³ஸேபி கத்த²சி கலாபே அலப்³ப⁴மானத்தா ஸீதபா⁴வஸ்ஸாதி. க²ரதாதி³ஸபா⁴வாதி⁴கஸ்ஸ பூ⁴தஸங்கா⁴தஸ்ஸ த³வதாதி³ஸபா⁴வாதி⁴கதாபத்தி பா⁴வஞ்ஞத²த்தம். தம் பன யதா² ஹோதி, தம் த³ஸ்ஸேதும் ‘‘பச்ச…பே… ப்பத்தீ’’தி ஆஹ.

652. ஏகந்தனசித்தஸமுட்டா²னாதீ³தி ஆதி³-ஸத்³தே³ன ஏகந்தஅனுபாதி³ன்னுபாதா³னியாதி³ம் ஸங்க³ண்ஹாதி. புரிமானம்பீதி ‘‘யம் வா பனஞ்ஞம்பீ’’தி ஏதஸ்மா வசனதோ புரிமானம் அனுபாதி³ன்னானம் ஸத்³தா³யதனகாயவிஞ்ஞத்திஆதீ³னம் நசித்தஸமுட்டா²னானஞ்ச சக்கா²யதனஸோதாயதனாதீ³னம். நகம்மஸ்ஸகதத்தாபா⁴வாதி³கந்தி நகம்மஸ்ஸகதத்தாபா⁴வம் நசித்தஸமுட்டா²னபா⁴வந்தி ஏவமாதி³கம். ஏகந்தாகம்மஜாதீ³ஸூதி ஆதி³-ஸத்³தே³ன ஏகந்தாசித்தஜம் க³ய்ஹதி. தா ஜரதாஅனிச்சதா. அனேகந்தேஸு ந க³ஹிதாதி ஏகந்ததோ அகம்மஜேஸு ஸத்³தா³யதனாதீ³ஸு அசித்தஜேஸு ச சக்கா²யதனாதீ³ஸு க³ஹேத்வா சதுஸமுட்டா²னிகத்தா அனேகந்தேஸு ரூபாயதனாதீ³ஸு ந க³ஹிதாதி அத்தோ².

666. அனிப்ப²ன்னத்தாதி அஞ்ஞம் அனபேக்கி²த்வா ஸபா⁴வதோ அஸித்³த⁴த்தம். தஸ்ஸாதி விஞ்ஞத்தித்³வயஸ்ஸ.

நோஉபாதா³பா⁴ஜனீயகதா²வண்ணனா நிட்டி²தா.

து³கனித்³தே³ஸவண்ணனா நிட்டி²தா.

சதுக்கனித்³தே³ஸவண்ணனா

966. ‘‘ஸப்³ப³ம் ரூபம் மனஸா விஞ்ஞாத’’ந்தி வசனதோ யதி³ விஞ்ஞாததோ அஞ்ஞம் தி³ட்டா²தி³ ந ஹோதீதி ‘‘கதமம் தம் ரூபம் தி³ட்ட²’’ந்திஆதி³னா புச்சா² ந கதா, ஏவம் ஸந்தே சதுக்கபா⁴வோ கத²ந்தி அனுயோக³ம் மனஸி கத்வா ஆஹ ‘‘த³ஸ்ஸனாதி³க்³க³ஹணவிஸேஸதோ’’தி. த³ஸ்ஸனம் ஸவனம் மினித்வா ஜானனம் விஜானனஞ்சாதி ஏதஸ்மா த³ஸ்ஸனாதி³க்³க³ஹணவிஸேஸதோ. ஏதேன கா³ஹகபே⁴தே³ன க³ஹேதப்³ப³பே⁴தோ³தி த³ஸ்ஸேதி. இதா³னி ஸமுகே²னபி க³ஹேதப்³ப³பே⁴தோ³ லப்³ப⁴தீதி த³ஸ்ஸேதும் ‘‘தி³ட்டா²…பே… பா⁴வதோ’’தி வுத்தம்.

பஞ்சகனித்³தே³ஸவண்ணனா

969. ததி³த³ம் நயகரணம் ச²ப்³பி³தா⁴தீ³ஸு தீஸு ஸங்க³ஹேஸு யோஜிதம்.

பகிண்ணககதா²வண்ணனா

975. ஏகந்ததோ நீவரணத்தா மித்³த⁴ஸ்ஸ ‘‘நத்தி² நீவரணா’’தி வசனேன க³ஹணந்தி த³ஸ்ஸேதும் ‘‘மித்³த⁴ஸ்ஸபி நீவரணஸ்ஸா’’தி வுத்தம். ந ச ரூபம் பஹாதப்³ப³ம் நிப்பரியாயப்பஹானஸ்ஸ இத⁴ அதி⁴ப்பேதத்தா. ஏத்த² கேசி ‘‘நாமகாயரூபகாயகே³லஞ்ஞஸபா⁴வதோ து³வித⁴ம் மித்³த⁴ம். தத்த² புரிமம் ‘நீவரணா’தி வசனேன வுத்தம், இதரம் ரூபஸபா⁴வ’’ந்தி வத³ந்தி. தத்த² யம் தம் அரூபதோ அஞ்ஞம் மித்³த⁴ம் பரிகப்பிதம், தம்பி நீவரணம் மித்³த⁴ஸபா⁴வதோ இதரம் மித்³த⁴ம் வியாதி பரிகப்பிதமித்³த⁴ஸ்ஸபி ந ஸக்கா நீவரணபா⁴வம் நிவத்தேதுந்தி தேஸம் வசனஸ்ஸ நீவரணப்பஹானவசனேன விரோத⁴ம் த³ஸ்ஸேந்தோ ‘‘ந ச ரூபகாய’’ந்திஆதி³மாஹ. அத² வா கீ²ணாஸவானம் ஸோப்பனஸபா⁴வதோ ஸோப்பஸ்ஸ ச மித்³த⁴ஹேதுகத்தா அத்தி² மித்³த⁴ரூபந்தி வாத³ம் ஸந்தா⁴ய உத்தரமாஹ ‘‘ந ச ரூபகாயகே³லஞ்ஞ’’ந்திஆதி³னா. தத்த² மித்³த⁴மேவ ஸோப்பஹேதூதி நாயம் அவதா⁴ரணா இச்சி²தா, ஸோப்பஹேது ஏவ மித்³த⁴ந்தி பன இச்சி²தாதி மித்³த⁴தோ அஞ்ஞோபி ஸோப்பஹேது அத்தி², கோ பன ஸோ? ரூபகாயகே³லஞ்ஞம். ந ச ரூப…பே… வசனதோதி யோஜனா த³ட்ட²ப்³பா³.

வசீகோ⁴ஸாதீ³தி ஆதி³-ஸத்³தே³ன ஹும்காராதி³ஸத்³தோ³ ஸங்க³ய்ஹதி. அங்கு³லிபோ²டாதி³ஸத்³தோ³ உதுஸமுட்டா²னோயேவ, சித்தபச்சயோ பன ஹோதி. ரூபபா⁴வமத்தானீதி ஜராமரணஸபா⁴வானம் ரூபானம் தம்த⁴ம்மமத்தானி, ததோ ஏவ ந ஜாதிஆதி³த⁴ம்மவந்தானீதி ஆஹ ‘‘ந ஸயம் ஸபா⁴வவந்தானீ’’தி. யதா² ஜரா அனிச்சதா ச ரூபபா⁴வமத்தம், ஏவம் ஜாதிபீதி ஜாதியா ரூபபா⁴வமத்ததாய உபஸம்ஹரணத்தோ² ததா²-ஸத்³தோ³.

தேஸம் ரூபத⁴ம்மானம். ஸங்கா²தாதி³-ஸத்³தோ³ விய அபி⁴னிப்³ப³த்தித-ஸத்³தோ³பி வத்தமானகாலிகோபி ஹோதீதி ‘‘அபி⁴னிப்³ப³த்தியமானத⁴ம்மக்க²ணஸ்மி’’ந்தி வுத்தம். ஏவமபீதி யதி³பி ஜிரணபி⁴ஜ்ஜனபா⁴வா ஜிரணாதி³ஸபா⁴வானம் த⁴ம்மானம் ஜனகபச்சயகிச்சானுபா⁴வக்க²ணே அபா⁴வதோ தப்பச்சயபா⁴வவோஹாரம் அபி⁴னிப்³ப³த்திவோஹாரஞ்ச ந லப⁴ந்தி, ஏவமபி தேஸம் உபாதி³ன்னதா வத்தப்³பா³தி ஸம்ப³ந்தோ⁴. ‘‘ஜராமரணம் படிச்சஸமுப்பன்ன’’ந்தி வசனதோ தஸ்ஸ பரியாயதம் விவரதி ‘‘தேஸம் உப்பாதே³ ஸதீ’’திஆதி³னா.

யதி³ ஏவந்தி யதி³ நிஸ்ஸயபடிப³த்³த⁴வுத்திகா ஜாதிஆத³யோ, ஏவம் ஸதி. ‘‘மஹாபூ⁴தானம் உபாதா³யரூப’’ந்தி வசனதோ பூ⁴தனிஸ்ஸிதேஸு கேவலோ உபாதா³யவோஹாரோதி உபாதா³யே நிஸ்ஸிதாபி அபரேன உபாதா³ய-ஸத்³தே³ன விஸேஸேத்வா வத்தப்³பா³தி அதி⁴ப்பாயேன ‘‘உபாதா³யுபாதா³யபா⁴வோ ஆபஜ்ஜதீ’’தி ஆஹ. காரணகாரணேபி காரணே விய வோஹாரோ ஹோதி ‘‘சோரேஹி கா³மோ த³ட்³டோ⁴’’தி யதா²தி த³ஸ்ஸேந்தோ ‘‘பூ⁴த…பே… த்தனதோ’’தி ஆஹ. இதா³னி பரம்பரா வினா நிப்பரியாயதோ உப்பாதா³தீ³னம் பூ⁴தபடிப³த்³த⁴பா⁴வம் ஸஹ நித³ஸ்ஸனேன த³ஸ்ஸேதும் ‘‘அபி சா’’திஆதி³மவோச. விகாரபரிச்சே²தா³பி உபாதா³யரூபவிகாராதி³பா⁴வே பூ⁴தபடிப³த்³த⁴பா⁴வாவினிவத்திதோ ஏகஸ்மிம் கலாபே ஏகேகாவ விகாராத³யோதி ஜீவிதிந்த்³ரியம் விய கலாபானுபாலகம் கலாபவிகாராதி³பா⁴வதோ ச ‘‘உபாதா³யரூபானி’’இச்சேவ வுச்சந்தீதி ஆஹ ‘‘ஏவம் விகா…பே… யோஜேதப்³பா³னீ’’தி.

அஸங்க²தபா⁴வனிவாரணத்த²ம் பரினிப்ப²ன்னதா வுத்தாதி இத³ம் அபரினிப்ப²ன்னஸபா⁴வவதோ அனுபலப்³ப⁴மானதாய ஸஸவிஸாணம் விய கேனசி ந ஸங்க²தந்தி அஸங்க²தம் நாம ஸியாதி இமிஸ்ஸா ஆஸங்காய நிவத்தனவஸேன வுத்தம். அத² வா ரூபவிகாராதி³பா⁴வதோ ரூபபா⁴வோ விய ரூபே ஸதி ஸந்தி, அஸதி ந ஸந்தீதி ஸித்³தா⁴ய படிச்சஸமுப்பன்னதாய ஸாதி⁴தா பரினிப்ப²ன்னதா தேஸம் ஸங்க²தபா⁴வம் ஸாதே⁴ந்தீ அஸங்க²தபா⁴வம் நிவாரணத்த²ம் ஜாயதீதி வுத்தம் ‘‘அஸங்க²தபா⁴வனிவாரணத்த²ம் பரினிப்ப²ன்னதா வுத்தா’’தி.

பகிண்ணககதா²வண்ணனா நிட்டி²தா.

ரூபகண்ட³வண்ணனா நிட்டி²தா.