5. சீவரபடிக்³க³ஹணஸிக்கா²பத³வண்ணனா

508. பஞ்சமே அபஞ்ஞத்தே ஸிக்கா²பதே³தி க³ணம்ஹா ஓஹீயனஸிக்கா²பதே³ அபஞ்ஞத்தே. விஹாரவாரந்தி விஹாரபடிஜக்³க³னவாரம். கோட்டா²ஸஸம்பத்தீதி ஸகலா அங்க³பச்சங்க³ஸம்பத்தி. ஸப்³ப³பரியந்தந்தி ச²ட்ட²ஸ்ஸ அஞ்ஞசீவரஸ்ஸ அபா⁴வா பஞ்சன்னம் சீவரானம் ஏகமேகம் ஸப்³பே³ஸம் பரியந்தந்தி ஸப்³ப³பரியந்தம். அந்தரவாஸகாதீ³ஸு ஹி பஞ்சஸு ஏகமேகம் அஞ்ஞஸ்ஸ ச²ட்ட²ஸ்ஸ அபா⁴வா பஞ்சன்னம் அந்தமேவ ஹோதி. அத²வா பஞ்சஸு சீவரேஸு ஏகமேகம் அத்தனோ அஞ்ஞஸ்ஸ து³தியஸ்ஸ அபா⁴வா அந்தமேவ ஹோதீதி ஸப்³ப³மேவ பரியந்தந்தி ஸப்³ப³பரியந்தம், ஸப்³ப³ஸோ வா பரியந்தந்தி ஸப்³ப³பரியந்தம். தேனாஹ – ‘‘அஞ்ஞம்…பே… நத்தீ²’’தி. யதா² தஸ்ஸ மனோரதோ² ந பூரதீதி ‘‘ஸரீரபாரிபூரிம் பஸ்ஸிஸ்ஸாமீ’’தி தஸ்ஸ உப்பன்னோ மனோரதோ² யதா² ந பூரதி. ஏவம் ஹத்த²தலேயேவ த³ஸ்ஸேத்வாதி ஸரீரம் அத³ஸ்ஸேத்வாவ தா³தப்³ப³சீவரம் ஹத்த²தலே ‘‘ஹந்தா³’’தி த³ஸ்ஸேத்வா.

510. விஹத்த²தாயாதி விஹதஹத்த²தாய, அக³ணதாய அப்பச்சயதாய அப்படிஸரணதாயாதி வுத்தம் ஹோதி. ஸமபி⁴துன்னத்தாதி பீளிதத்தா. பரிவத்தேதப்³ப³ம் பரிவத்தம், பரிவத்தமேவ பாரிவத்தகம், பரிவத்தேத்வா தீ³யமானந்தி அத்தோ².

512. உபசாரேதி த்³வாத³ஸஹத்தூ²பசாரம் ஸந்தா⁴ய வத³தி. உபசாரம் வா முஞ்சித்வா கி²பந்தீதி த்³வாத³ஸஹத்த²ம் முஞ்சித்வா ஓரதோ ட²பேந்தி, ந புரிமஸிக்கா²பதே³ விய த்³வாத³ஸஹத்த²ப்³ப⁴ந்தரேயேவாதி அதி⁴ப்பாயோ. அஞ்ஞத்ர பாரிவத்தகாதி யம் அந்தமஸோ ஹரீதகக²ண்ட³ம்பி த³த்வா வா த³ஸ்ஸாமீதி ஆபோ⁴க³ம் கத்வா வா பாரிவத்தகம் க³ண்ஹாதி, தம் ட²பேத்வா. அசித்தகபா⁴வேன ந ஸமேதீதி யதா² அஞ்ஞாதிகாய ஞாதிகஸஞ்ஞிஸ்ஸ வேமதிகஸ்ஸ ச க³ண்ஹதோ அசித்தகத்தா ஆபத்தி, ஏவமிதா⁴பி ‘‘பி⁴க்கு²னியா ஸந்தகம் இத³’’ந்தி அஜானித்வா க³ண்ஹதோபி ஆபத்தியேவாதி அதி⁴ப்பாயோ. வஸ்ஸாவாஸிகம் தே³தீதி புக்³க³லிகம் கத்வா தே³தி. பம்ஸுகூலம் அத்தனோ அத்தா²ய ட²பிதபா⁴வம் ஜானித்வா க³ண்ஹந்தேனபி அஞ்ஞஸ்ஸ ஸந்தகம் க³ஹிதம் நாம ந ஹோதீதி ஆஹ – ‘‘ஸசே பன ஸங்காரகூடாதீ³ஸூ’’திஆதி³. அஸாமிகஞ்ஹி பம்ஸுகூலந்தி வுச்சதி. பம்ஸுகூலம் அதி⁴ட்ட²ஹித்வாதி ‘‘அஸாமிகம் இத³’’ந்தி ஸஞ்ஞம் உப்பாதே³த்வா. ஏவம் பன பம்ஸுகூலஸஞ்ஞம் அனுப்பாதே³த்வா க³ண்ஹிதும் ந வட்டதி.

513. அஞ்ஞாதிகாய அஞ்ஞாதிகஸஞ்ஞீதி திகபாசித்தியந்தி ஏத்த² இதி-ஸத்³தோ³ ஆதி³அத்தோ². தீணி பரிமாணமஸ்ஸாதி திகம், திகஞ்ச தம் பாசித்தியஞ்சாதி திகபாசித்தியம், தீணி பாசித்தியானீதி அத்தோ².

514. பத்தத்த²விகாதி³ம் யம்கிஞ்சீதி அனதி⁴ட்டா²னுபக³ம் ஸந்தா⁴ய வத³தி. ‘‘சீவரம் நாம ச²ன்னம் சீவரானம் அஞ்ஞதரம் சீவரம் விகப்பனுபக³ம் பச்சி²ம’’ந்தி ஹி வுத்தத்தா அதி⁴ட்டா²னுபக³ம் யம்கிஞ்சி ந வட்டதி. தேனேவாஹ – ‘‘விகப்பனுபக³பச்சி²மசீவரப்பமாண’’ந்திஆதி³. யஸ்மா பி⁴ஸிச்ச²வி மஹந்தாபி ஸேனாஸனஸங்க³ஹிதத்தா சீவரஸங்க்²யம் ந க³ச்ச²தீதி நேவ அதி⁴ட்டா²னுபகா³ ந விகப்பனுபகா³ ச, தஸ்மா அனதி⁴ட்டா²னுபக³ஸாமஞ்ஞதோ வுத்தம். ஸசேபி மஞ்சப்பமாணா பி⁴ஸிச்ச²வி ஹோதி, வட்டதியேவாதி. கோ பன வாதோ³ பத்தத்த²விகாதீ³ஸூதி மஹதியாபி தாவ பி⁴ஸிச்ச²வியா அனதி⁴ட்டா²னுபக³த்தா அனாபத்தி, ததோ கு²த்³த³கதரேஸு அனதி⁴ட்டா²னுபகே³ஸு பத்தத்த²விகாதீ³ஸு கிமேவ வத்தப்³ப³ந்தி அதி⁴ப்பாயோ. படிக்³க³ஹணம் கிரியா, அபரிவத்தனம் அகிரியா. விகப்பனுபக³சீவரதா, பாரிவத்தகாபா⁴வோ, அஞ்ஞாதிகாய ஹத்த²தோ க³ஹணந்தி இமானேத்த² தீணி அங்கா³னி.

சீவரபடிக்³க³ஹணஸிக்கா²பத³வண்ணனா நிட்டி²தா.