6. அஞ்ஞாதகவிஞ்ஞத்திஸிக்கா²பத³வண்ணனா

515. ச²ட்டே² பதிகிட்டோ²தி நிஹீனோ, லாமகோதி அத்தோ². லோலஜாதிகோதி லோலஸபா⁴வோ. படுயேவ பட்டோ. தேனாஹ ‘‘சே²கோ’’திஆதி³. கிஸ்மிம் வியாதி ஏத்த² ‘‘கிஸ்மிம் வியா’’தி நிபாதவஸேன ஸமானத்த²ம் ‘‘கிம்ஸு வியா’’தி நிபாதபத³ந்தி ஆஹ ‘‘கிம்ஸு வியா’’தி, கிம் வியாதி அத்தோ², து³க்க²ம் வியாதி அதி⁴ப்பாயோ. தேனாஹ ‘‘கிலேஸோ வியா’’திஆதி³. த⁴ம்மவஸேன உபசாரவஸேன நிமந்தனா த⁴ம்மனிமந்தனாதி பாளிபத³ஸ்ஸ அத்தோ² வேதி³தப்³போ³. ஸசே பன ‘‘வதே³ய்யாத², ப⁴ந்தே, யேனத்தோ²’’தி இத³ம் ஸச்சமேவ வுத்தம் ஸியா, பவாரிதோயேவ ஹோதி. யஸ்மா பன பவாரேத்வாபி அதா³துகாமோ அப்பவாரிதட்டா²னேயேவ திட்ட²தி, தஸ்மா ப⁴க³வா பவாரிதாபவாரிதபா⁴வம் அவிசாரேத்வா ‘‘ஞாதகோ தே, உபனந்த³, அஞ்ஞாதகோ’’தி ஞாதகஅஞ்ஞாதகபா⁴வம்யேவ விசாரேஸி. முஸிம்ஸூதி விலும்பிம்ஸு.

517. அனுபுப்³ப³கதா²தி அனுபுப்³பே³ன வினிச்ச²யகதா². ஸேஸபரிக்கா²ரானம் ஸத்³தி⁴விஹாரிகேஹி க³ஹிதத்தா நிவாஸனபாருபனமத்தமேவ அவஸிட்ட²ந்தி ஆஹ ‘‘நிவாஸனபாருபனமத்தம்யேவ ஹரித்வா’’தி. ஸத்³தி⁴விஹாரிகானம் தாவ ஆக³மனஸ்ஸ வா அனாக³மனஸ்ஸ வா அஜானனதாய வுத்தம் ‘‘தே²ரேஹி நேவ தாவ…பே… ப⁴ஞ்ஜிதப்³ப³’’ந்தி. பரேஸம்பி அத்தா²ய லப⁴ந்தீதி அத்தனோ சீவரம் த³த³மானா ஸயம் ஸாகா²ப⁴ங்கே³ன படிச்சா²தே³ந்தீதி தேஸம் அத்தா²யபி ப⁴ஞ்ஜிதும் லப⁴ந்தி. ‘‘திணேன வா பண்ணேன வா படிச்சா²தே³த்வா ஆக³ந்தப்³ப³’’ந்தி வசனதோ ஈதி³ஸேஸு பூ⁴தகா³மபாதப்³யதாபி அனுஞ்ஞாதாயேவ ஹோதீதி ஆஹ – ‘‘நேவ பூ⁴தகா³மபாதப்³யதாய பாசித்தியம் ஹோதீ’’தி. ந தேஸம் தா⁴ரணே து³க்கடந்தி தேஸம் தித்தி²யத்³த⁴ஜானம் தா⁴ரணேபி து³க்கடம் நத்தி².

யானி ச நேஸம் வத்தா²னி தே³ந்தீதி ஸம்ப³ந்தோ⁴. தே²ரானம் ஸயமேவ தி³ன்னத்தா வுத்தம் ‘‘அச்சி²ன்னசீவரட்டா²னே டி²தத்தா’’தி. யதி³ லத்³தி⁴ம் க³ண்ஹாதி, தித்தி²யபக்கந்தகோ நாம ஹோதி, தஸ்மா வுத்தம் ‘‘லத்³தி⁴ம் அக்³க³ஹேத்வா’’தி. ‘‘நோ சே ஹோதி ஸங்க⁴ஸ்ஸ விஹாரசீவரம் வா…பே… ஆபத்தி து³க்கடஸ்ஸா’’தி இமினா அந்தராமக்³கே³ பவிட்ட²விஹாரதோ நிக்க²மித்வா அஞ்ஞத்த² அத்தனோ அபி⁴ருசிதட்டா²னம் க³ச்ச²ந்தஸ்ஸ து³க்கடம் வுத்தம். இமினா ச ‘‘யம் ஆவாஸம் பட²மம் உபக³ச்ச²தீ’’தி வுத்தம் அந்தராமக்³கே³ டி²தவிஹாரம்பி ஸசே நக்³கோ³ ஹுத்வா க³ச்ச²தி, து³க்கடமேவாதி வேதி³தப்³ப³ம். யதி³ ஏவம் தத்த² கஸ்மா ந வுத்தந்தி சே? அனோகாஸத்தா. தத்த² ஹி ‘‘அனுஜானாமி, பி⁴க்க²வே, அச்சி²ன்னசீவரஸ்ஸ வா…பே… சீவரம் விஞ்ஞாபேது’’ந்தி இமினா ஸம்ப³ந்தே⁴ன ஸங்கி⁴கம்பி சீவரம் நிவாஸேதும் பாருபிதுஞ்ச அனுஜானந்தோ ‘‘யம் ஆவாஸம் பட²மம்…பே… க³ஹேத்வா பாருபிது’’ந்தி ஆஹ, தஸ்மா தத்த² அனோகாஸத்தா து³க்கடம் ந வுத்தம்.

விஹாரசீவரந்தி ஸேனாஸனசீவரம். சிமிலிகாஹீதி படபிலோதிகாஹி. தஸ்ஸ உபரீதி பூ⁴மத்த²ரணஸ்ஸ உபரி. விதே³ஸக³தேனாதி அஞ்ஞம் சீவரம் அலபி⁴த்வா விதே³ஸக³தேன. ஏகஸ்மிம்…பே… ட²பேதப்³ப³ந்தி ஏத்த² ‘‘லேஸேன க³ஹேத்வா அக³தத்தா ட²பேந்தேன ச ஸங்கி⁴கபரிபோ⁴கே³னேவ ட²பிதத்தா அஞ்ஞஸ்மிம் ஸேனாஸனே நியமிதம்பி அஞ்ஞத்த² ட²பேதும் வட்டதீ’’தி வத³ந்தி. பரிபோ⁴கே³னேவாதி அஞ்ஞம் சீவரம் அலபி⁴த்வா பரிபு⁴ஞ்ஜனேன.

519-521. பரிபோ⁴க³ஜிண்ணந்தி யதா² தேன சீவரேன ஸரீரம் படிச்சா²தே³தும் ந ஸக்கா, ஏவம் ஜிண்ணம். கப்பியவோஹாரேனாதி கயவிக்கயாபத்திதோ மோசனத்த²ம் வுத்தம். ‘‘விஞ்ஞாபேந்தஸ்ஸா’’தி இமஸ்ஸேவ அத்த²ம் விபா⁴வேதி ‘‘சேதாபேந்தஸ்ஸ பரிவத்தாபேந்தஸ்ஸா’’தி. அத்தனோ த⁴னேன ஹி விஞ்ஞாபனம் நாம பரிவத்தனமேவாதி அதி⁴ப்பாயோ. ஸங்க⁴வஸேன பவாரிதானம் விஞ்ஞாபனே வத்தம் த³ஸ்ஸேதி ‘‘பமாணமேவ வட்டதீ’’தி. ஸங்க⁴வஸேன ஹி பவாரிதே ஸப்³பே³ஸம் ஸாதா⁴ரணத்தா அதி⁴கம் விஞ்ஞாபேதும் ந வட்டதி. யம் யம் பவாரேதீதி யம் யம் சீவராதி³ம் த³ஸ்ஸாமீதி பவாரேதி. விஞ்ஞாபனகிச்சம் நத்தீ²தி வினா விஞ்ஞத்தியா தீ³யமானத்தா விஞ்ஞாபேத்வா கிம் கரிஸ்ஸதீதி அதி⁴ப்பாயோ. அஞ்ஞஸ்ஸத்தா²யாதி ஏத்தா²பி ‘‘ஞாதகானம் பவாரிதான’’ந்தி இத³ம் அனுவத்ததியேவாதி ஆஹ ‘‘அத்தனோ ஞாதகபவாரிதே’’திஆதி³. விகப்பனுபக³சீவரதா, ஸமயாபா⁴வோ, அஞ்ஞாதகவிஞ்ஞத்தி, தாய ச படிலாபோ⁴தி இமானேத்த² சத்தாரி அங்கா³னி.

அஞ்ஞாதகவிஞ்ஞத்திஸிக்கா²பத³வண்ணனா நிட்டி²தா.