4. புராணசீவரஸிக்கா²பத³வண்ணனா

503. சதுத்தே² ப⁴த்தவிஸ்ஸக்³க³ந்தி பாளிபத³ஸ்ஸ ப⁴த்தகிச்சந்தி அத்தோ² வேதி³தப்³போ³, ‘‘ப⁴த்தஸம்விதா⁴ன’’ந்திபி கேசி. தத்த² நாம த்வந்தி இமஸ்ஸபி ஸோ நாம த்வந்தி அத்தோ² வேதி³தப்³போ³, ‘‘தாய நாம த்வ’’ந்தி கேசி.

505. பிதா ச மாதா ச பிதரோ, பிதூனம் பிதரோ பிதாமஹா, தேஸம்யேவ யுகோ³ பிதாமஹயுகோ³, தஸ்மா யாவ ஸத்தமா பிதாமஹயுகா³ பிதாமஹத்³வந்தா³தி ஏவமேத்த² அத்தோ² த³ட்ட²ப்³போ³. ஏவஞ்ஹி பிதாமஹக்³க³ஹணேனேவ மாதாமஹோபி க³ஹிதோதி. ‘‘யாவ ஸத்தமா பிதாமஹயுகா³’’தி வசனதோ ஹேட்டா² ச உத்³த⁴ஞ்ச அட்ட²மயுகோ³ ஞாதி நாம ந ஹோதி. தே³ஸனாமுக²மேவ சேதந்தி பிதாமஹயுகா³தி பிதாமஹ-க்³க³ஹணம் தே³ஸனாமுக²ம் பிதாமஹீமாதாமஹீஆதீ³னம்பி அதி⁴ப்பேதத்தா. பிது மாதா பிதாமஹீ. மாது பிதா மாதாமஹோ. மாது மாதா மாதாமஹீ. ஏத்த² கிஞ்சாபி பஞ்சஸதஸாகியானீனம் வஸேன பி⁴க்கு²பா⁴வே ட²த்வா பரிவத்தலிங்கா³ய பி⁴க்கு²னியா ச வஸேன ஏகதோஉபஸம்பன்னா பி⁴க்கு²னீ லப்³ப⁴தி, ததா²பி பகதினியாமேனேவ த³ஸ்ஸேதும் ‘‘பி⁴க்கு²னீ நாம உப⁴தோஸங்கே⁴ உபஸம்பன்னா’’தி வுத்தம். ‘‘கப்பம் கத்வாதி வசனதோ தி³ன்னகப்பமேவ பாசித்தியம் ஜனேதீ’’தி வத³ந்தி. ‘‘புராணசீவரம் நாம ஸகிம் நிவத்த²ம்பி ஸகிம் பாருதம்பீ’’தி இத³ம் நித³ஸ்ஸனமத்தந்தி ஆஹ ‘‘அந்தமஸோ பரிபோ⁴க³ஸீஸேனா’’திஆதி³. ‘‘காயேன பு²ஸித்வா பரிபோ⁴கோ³யேவ பரிபோ⁴கோ³ நாமா’’தி குருந்தி³யம் அதி⁴ப்பாயோ.

506. காயவிகாரம் கத்வாதி இத³ம் யாவ ‘‘ஓரதோ ட²பேதீ’’தி பத³ம், தாவ ஸப்³ப³பதே³ஸு ஸம்ப³ந்தி⁴தப்³ப³ம். யதா² ஸா ‘‘தோ⁴வாபேதுகாமோ அய’’ந்தி ஜானாதி, ஏவம் காயவிகாரம் கத்வாதி அத்தோ². ‘‘காயவிகாரம் கத்வா’’தி வசனதோ காயவாசாஹி கஞ்சி விகாரம் அகத்வா ஹத்தே²ன ஹத்தே² தே³ந்தஸ்ஸபி அனாபத்தி. அந்தோத்³வாத³ஸஹத்தே² ஓகாஸேதி இத³ம் விஸேஸனம் யதா²ஸம்ப⁴வம் யோஜேதப்³ப³ம். ததா² ஹி ஹத்தே²ன ஹத்தே² தே³ந்தஸ்ஸ பாத³மூலே ச ட²பேத்வா தே³ந்தஸ்ஸ ‘‘அந்தோத்³வாத³ஸஹத்தே² ஓகாஸே’’தி இத³ம் வத்தப்³ப³ந்தி நத்தி² அஞ்ஞதா² அஸம்ப⁴வதோ. ஸதி ஹி ஸம்ப⁴வே ப்³யபி⁴சாரே ச விஸேஸனம் ஸாத்த²கம் ஹோதி. உபரி ‘‘கி²பதீ’’திஆதீ³னி பன ஸந்தா⁴ய இத³ம் விஸேஸனம் வுத்தம், தஸ்மா அந்தோத்³வாத³ஸஹத்தே² ஓகாஸே ட²த்வா உபரி கி²பந்தஸ்ஸ அஞ்ஞஸ்ஸ ஹத்தே² பேஸேந்தஸ்ஸ ச ஆபத்தி. உபசாரம் பன முஞ்சித்வா காயவாசாஹி விகாரம் கத்வா ஆணாபேந்தஸ்ஸபி அனாபத்தி. உபசாரேதி அந்தோத்³வாத³ஸஹத்த²மேவ ஓகாஸம் வத³தி. உபசாரம் முஞ்சித்வாதி த்³வாத³ஸஹத்தூ²பசாரம் முஞ்சித்வா.

ஏகேன வத்து²னாதி பட²மம் கத்வா நிட்டா²பிதம் ஸந்தா⁴ய வுத்தம். ரஜனே அனாபத்தீதி ரஜனம் பச்சாஸீஸந்தஸ்ஸபி ‘‘தோ⁴வித்வா ஆனேஹீ’’தி வுத்தத்தா அனாபத்தி அனாணத்தியா கதத்தா. ‘‘அவுத்தா தோ⁴வதீ’’தி இமினா ‘‘அவுத்தா ரஜதி, அவுத்தா ஆகோடேதீ’’தி இத³ம்பி வுத்தமேவ ஹோதீதி ஆஹ – ‘‘அவுத்தா தோ⁴வதீதி இமினா லக்க²ணேன அனாபத்தீ’’தி. ஸம்ப³ஹுலா ஆபத்தியோ ஆபஜ்ஜதீதி பாசித்தியேன ஸத்³தி⁴ம் த்³வே து³க்கடானி ஆபஜ்ஜதி. யதா²வத்து²கமேவாதி நிஸ்ஸக்³கி³யமேவாதி அத்தோ². பஞ்ச ஸதானி பரிமாணமேதாஸந்தி பஞ்சஸதா.

507. சீவரம் தோ⁴வாதி…பே… ஆணாபேந்தஸ்ஸாதி ஏத்த² தாய தோ⁴வனம் பச்சாஸீஸந்தஸ்ஸபி அனாபத்தி. புராணசீவரதா, உபசாரே ட²த்வா அஞ்ஞாதிகாய பி⁴க்கு²னியா ஆணாபனம், தஸ்ஸா தோ⁴வனாதீ³னி சாதி இமானேத்த² தீணி அங்கா³னி.

புராணசீவரஸிக்கா²பத³வண்ணனா நிட்டி²தா.