3. ததியகதி²னஸிக்கா²பத³வண்ணனா

497-499. ததியே பாளியம் சீவரபச்சாஸா நிக்கி²பிதுந்தி ஏத்த² சீவரபச்சாஸாய ஸதியா நிக்கி²பிதுந்தி ஏவமத்தோ² க³ஹேதப்³போ³. ப⁴ண்டி³காப³த்³தா⁴னி ப⁴ண்டி³கப³த்³தா⁴னீதிபி பட²ந்தி, ப⁴ண்டி³கம் கத்வா ப³த்³தா⁴னீதி அத்தோ². நிட்டி²தசீவரஸ்மிம் பி⁴க்கு²னாதி ஏத்த² புரிமஸிக்கா²பதே³ விய ஸாமிவஸேனேவ கரணவசனஸ்ஸ அத்தோ² வேதி³தப்³போ³.

500. அனத்த²தே கதி²னே சீவரமாஸே பி⁴க்கு²னோ உப்பன்னசீவரம் அனதி⁴ட்டி²தம் அவிகப்பிதம் தஸ்மிம் மாஸே ட²பேதும் வட்டதீதி ஆஹ ‘‘ஏகம் பச்சி²மகத்திகமாஸம் ட²பேத்வா’’தி. கேசி பன ‘‘காலேபி ஆதி³ஸ்ஸ தி³ன்னம், ஏதம் அகாலசீவரந்தி வசனதோ அனத்த²தே கதி²னே பச்சி²மகத்திகமாஸஸங்கா²தே சீவரமாஸே உப்பன்னசீவரஸ்ஸபி பச்சாஸாசீவரே அஸதி த³ஸாஹபரிஹாரோயேவ, ததோ பரம் ட²பேதும் ந வட்டதீ’’தி வத³ந்தி, தம் அட்ட²கதா²ய ந ஸமேதி. ததா² ஹி அச்சேகசீவரஸிக்கா²பத³ட்ட²கதா²யம் (பாரா. அட்ட². 2.646-649 ஆத³யோ) ‘‘பவாரணமாஸஸ்ஸ ஜுண்ஹபக்க²பஞ்சமியம் உப்பன்னஸ்ஸ அச்சேகசீவரஸ்ஸ அனத்த²தே கதி²னே ஏகாத³ஸதி³வஸாதி⁴கோ மாஸோ, அத்த²தே கதி²னே ஏகாத³ஸதி³வஸாதி⁴கா பஞ்ச மாஸா பரிஹாரோ’’தி வுத்தம். தமேவ ச பரிஹாரம் ஸந்தா⁴ய ‘‘ச²ட்டி²தோ பட்டா²ய பன உப்பன்னம் அனச்சேகசீவரம்பி பச்சுத்³த⁴ரித்வா ட²பிதசீவரம்பி ஏதம் பரிஹாரம் லப⁴தியேவா’’தி (பாரா. அட்ட². 2.646-649) வுத்தம். தஸ்மா சீவரமாஸே த³ஸாஹதோ பரம்பி அனதி⁴ட்டி²தம் அவிகப்பிதம்பி ட²பேதும் வட்டதி.

யதி³ ஏவம் ‘‘காலேபி ஆதி³ஸ்ஸ தி³ன்னம், ஏதம் அகாலசீவர’’ந்தி இத³ம் கஸ்மா வுத்தந்தி சே? அகாலசீவரஸாமஞ்ஞதோ அத்து²த்³தா⁴ரவஸேன வுத்தம் பட²மானியதே ஸோதஸ்ஸ ரஹோ விய. ஏகாத³ஸமாஸே ஸத்தமாஸே ச உப்பன்னஞ்ஹி சீவரம் வுத்த²வஸ்ஸேஹி ஸேஸேஹி ச ஸம்முகீ²பூ⁴தேஹி பா⁴ஜேதும் லப்³ப⁴தீதி அகாலசீவரம் நாம ஜாதம். காலே பன ‘‘ஸங்க⁴ஸ்ஸ இத³ம் அகாலசீவரம் த³ம்மீ’’தி அனுத்³தி³ஸித்வா ‘‘ஸங்க⁴ஸ்ஸ த³ம்மீ’’தி தி³ன்னம் வுத்த²வஸ்ஸேஹியேவ பா⁴ஜேதப்³ப³ம், ந அஞ்ஞேஹீதி காலசீவரந்தி வுச்சதி. ஆதி³ஸ்ஸ தி³ன்னம் பன ஸம்முகீ²பூ⁴தேஹி ஸப்³பே³ஹியேவ பா⁴ஜேதப்³ப³ந்தி அகாலசீவரம், தஸ்மா காலேபி ஆதி³ஸ்ஸ தி³ன்னஸ்ஸ வுத்த²வஸ்ஸேஹி ஸேஸேஹி ச ஸம்பத்தேஹி பா⁴ஜனீயத்தா அகாலசீவரஸாமஞ்ஞதோ ‘‘காலேபி ஆதி³ஸ்ஸ தி³ன்னம், ஏதம் அகாலசீவர’’ந்தி அத்து²த்³தா⁴ரவஸேன வுத்தம். யதி³ ஏவம் ‘‘ஏகபுக்³க³லஸ்ஸ வா இத³ம் துய்ஹம் த³ம்மீதி தி³ன்ன’’ந்தி கஸ்மா வுத்தம். ந ஹி புக்³க³லஸ்ஸ ஆதி³ஸ்ஸ தி³ன்னம் கேனசி பா⁴ஜனீயம் ஹோதீதி? நாயம் விரோதோ⁴ ஆதி³ஸ்ஸ வசனஸாமஞ்ஞதோ லப்³ப⁴மானமத்த²ம் த³ஸ்ஸேதும் ததா² வுத்தத்தா.

ஏவம் பன அவத்வாதி ‘‘ததோ சே உத்தரி’’ந்தி இமஸ்ஸ ‘‘மாஸபரமதோ உத்தரி’’ந்தி பத³பா⁴ஜனம் அவத்வா. தாவ உப்பன்னம் பச்சாஸாசீவரந்தி பச்சத்தவசனம் ‘‘அத்தனோ க³திகம் கரோதீ’’தி கரணகிரியாய கத்துபா⁴வதோ. அந்தரா உப்பன்னஞ்ஹி பச்சாஸாசீவரம் மாஸபரமம் மூலசீவரம் ட²பேதும் அத³த்வா அத்தனோ த³ஸாஹபரமதாய ஏவ பரிச்சி²ந்த³தீதி அத்தனோ க³திகம் கரோதி. ததோ உத்³த⁴ம் மூலசீவரந்தி ஏத்த² பன மூலசீவரந்தி பச்சத்தவசனம். வீஸதிமதி³வஸதோ உத்³த⁴ஞ்ஹி உப்பன்னம் பச்சாஸாசீவரம் த³ஸாஹபரமம் க³ந்தும் அத³த்வா மூலசீவரம் அத்தனா ஸத்³தி⁴ம் கரணஸம்ப³ந்த⁴தாமத்தேன ஸககாலவஸேன பரிச்சி²ந்த³தீதி அத்தனோ க³திகம் கரோதி. பச்சாஸாசீவரே பன லபி⁴த்வா விஸும் ட²பேந்தஸ்ஸ த³ஸாஹம் அனதிக்கந்தே நத்தி² தப்பச்சயா ஆபத்தி. பாளியம் த³ஸாஹா காரேதப்³ப³ந்தி ஏத்த² த³ஸாஹாதி கரணத்தே² நிஸ்ஸக்கவசனம், த³ஸாஹேனாதி அத்தோ². பஞ்சாஹுப்பன்னேதிஆதி³ம் ரஸ்ஸம் கத்வாபி பட²ந்தி. ஏகவீஸே உப்பன்னே…பே… நவாஹா காரேதப்³ப³ந்திஆதி³ பச்சாஸாசீவரஸ்ஸ உப்பன்னதி³வஸம் ட²பேத்வா வுத்தம்.

அஞ்ஞம் பச்சாஸாசீவரம்…பே… காரேதப்³ப³ந்தி இத³ம் ஸதியா ஏவ பச்சாஸாய வுத்தந்தி வேதி³தப்³ப³ம். ஸசே பன ‘‘இதோ பட்டா²ய சீவரம் ந லபி⁴ஸ்ஸாமீ’’தி பச்சாஸா உபச்சி²ன்னா, மூலசீவரம்பி த³ஸாஹம் சே ஸம்பத்தம், தத³ஹேவ அதி⁴ட்டா²தப்³ப³ம். பச்சாஸாசீவரம்பி பரிக்கா²ரசோளம் அதி⁴ட்டா²தப்³ப³ந்தி பட²மதரம் உப்பன்னம் விஸபா⁴க³பச்சாஸாசீவரம் ஸந்தா⁴ய வத³தி. அஞ்ஞமஞ்ஞந்தி அஞ்ஞம் அஞ்ஞம், அயமேவ வா பாடோ². அங்க³ம் பனேத்த² பட²மகதி²னே வுத்தஸதி³ஸமேவ. கேவலஞ்ஹி தத்த² த³ஸாஹாதிக்கமோ, இத⁴ மாஸாதிக்கமோதி அயம் விஸேஸோ.

ததியகதி²னஸிக்கா²பத³வண்ணனா நிட்டி²தா.