2. உதோ³ஸிதஸிக்கா²பத³வண்ணனா

471-473. து³தியே அதா²னந்த³த்தே²ரோ கத²ம் ஓகாஸம் படிலப⁴தி, கிம் கரோந்தோ ச ஆஹிண்ட³தீதி ஆஹ ‘‘தே²ரோ கிரா’’திஆதி³. அவிப்பவாஸேதி நிமித்தத்தே² பு⁴ம்மம், அவிப்பவாஸத்த²ந்தி அத்தோ², விப்பவாஸபச்சயா யா ஆபத்தி, தத³பா⁴வத்த²ந்தி வுத்தம் ஹோதி.

475-476. ஏவம் சி²ன்னபலிபோ³தோ⁴தி ஏவம் இமேஹி சீவரனிட்டா²னகதி²னுப்³பா⁴ரேஹி சி²ன்னபலிபோ³தோ⁴. அதி⁴ட்டி²தேஸூதி திசீவராதி⁴ட்டா²னனயேன அதி⁴ட்டி²தேஸு. திசீவரேன விப்பவுத்தோ² ஹோதீதி ‘‘ருக்கோ² சி²ன்னோ, படோ த³ட்³டோ⁴’’திஆதீ³ஸு விய அவயவேபி ஸமுதா³யவோஹாரோ லப்³ப⁴தீதி வுத்தம்.

477-478. பரிகா²ய வா பரிக்கி²த்தோதி இமினா ச ஸமந்தா நதீ³தளாகாதி³உத³கேன பரிக்கி²த்தோபி பரிக்கி²த்தோயேவாதி த³ஸ்ஸேதி. ஏத்தாவதாதி ‘‘பரிக்கி²த்தோ’’தி இமினா வசனேன. ஆகாஸே அருணம் உட்டா²பேதீதி க⁴ரஸ்ஸ உபரி ஆகாஸே அட்³ட⁴தேய்யரதனப்பமாணம் அதிக்கமித்வா அருணம் உட்டா²பேதி. க⁴ரம் நிவேஸனுதோ³ஸிதாதி³லக்க²ணமேவ, ந பன பாடியேக்கம் க⁴ரம் நாம அத்தீ²தி ஆஹ ‘‘ஏத்த² சா’’திஆதி³.

479. பாளியம் வுத்தனயேன ‘‘ஸபா⁴யே’’தி அவத்வா ‘‘ஸபா⁴ய’’ந்தி பச்சத்தவசனம் ஸபா⁴ய-ஸத்³த³ஸ்ஸ நபும்ஸகலிங்க³தாவிபா⁴வனத்த²ம் வுத்தம். ஸபா⁴-ஸத்³த³பரியாயோபி ஹி ஸபா⁴ய-ஸத்³தோ³ நபும்ஸகலிங்க³யுத்தோ இத⁴ வுத்தோதி இமமத்த²ம் த³ஸ்ஸேந்தோ ‘‘லிங்க³ப்³யத்தயேன ஸபா⁴ வுத்தா’’தி ஆஹ. சீவரஹத்த²பாஸே வஸிதப்³ப³ம் நத்தீ²தி சீவரஹத்த²பாஸேயேவ வஸிதப்³ப³ந்தி நத்தி². யம் தஸ்ஸா…பே… ந விஜஹிதப்³ப³ந்தி ஏத்த² தஸ்ஸா வீதி²யா ஸம்முக²ட்டா²னே ஸபா⁴யத்³வாரானம் க³ஹணேனேவ தத்த² ஸப்³பா³னிபி கே³ஹானி ஸா ச அந்தரவீதி² க³ஹிதாயேவ ஹோதி. அதிஹரித்வா க⁴ரே நிக்கி²பதீதி தம் வீதி²ம் முஞ்சித்வா டி²தே அஞ்ஞஸ்மிம் க⁴ரே நிக்கி²பதி. புரதோ வா பச்ச²தோ வா ஹத்த²பாஸேதி க⁴ரஸ்ஸ ஹத்த²பாஸம் ஸந்தா⁴ய வத³தி.

நிவேஸனாதீ³ஸு பரிக்கி²த்ததாய ஏகூபசாரதா, அபரிக்கி²த்ததாய நானூபசாரதா ச வேதி³தப்³பா³தி த³ஸ்ஸேந்தோ ‘‘ஏதேனேவுபாயேனா’’திஆதி³மாஹ. நிவேஸனாதீ³னி கா³மதோ ப³ஹி ஸன்னிவிட்டா²னி க³ஹிதானீதி வேதி³தப்³ப³ம். அந்தோகா³மே டி²தானஞ்ஹி கா³மக்³க³ஹணேன க³ஹிதத்தா கா³மபரிஹாரோயேவாதி. ஸப்³ப³த்தா²பீதி கா³மாதீ³ஸு அஜ்ஜோ²காஸபரியந்தேஸு பன்னரஸஸு. பரிக்கே²பாதி³வஸேனாதி ஏத்த² ஆதி³-ஸத்³தே³ன அபரிக்கே²பஸ்ஸேவ க³ஹணம் வேதி³தப்³ப³ம், ந ஏககுலாதீ³னம்பி.

480-487. ஓவரகோ நாம க³ப்³ப⁴ஸ்ஸ அப்³ப⁴ந்தரே அஞ்ஞோ க³ப்³போ⁴திபி வத³ந்தி. முண்ட³ச்ச²த³னபாஸாதோ³தி சந்தி³கங்க³ணயுத்தோ பாஸாதோ³.

489. ஸத்தோ²தி ஜங்க⁴ஸத்தோ² ஸகடஸத்தோ² வா. பரியாதி³யித்வாதி வினிவிஜ்ஜி²த்வா. வுத்தமேவத்த²ம் விபா⁴வேதி ‘‘அந்தோபவிட்டே²ன…பே… டி²தோ ஹோதீ’’தி. தத்த² அந்தோபவிட்டே²னாதி கா³மஸ்ஸ நதி³யா வா அந்தோபவிட்டே²ன. நதீ³பரிஹாரோ ச லப்³ப⁴தீதி ஏத்த² ‘‘விஸும் நதீ³பரிஹாரஸ்ஸ அவுத்தத்தா கா³மாதீ³ஹி அஞ்ஞத்த² விய சீவரஹத்த²பாஸோயேவ நதீ³பரிஹாரோ’’தி தீஸுபி க³ண்டி²பதே³ஸு வுத்தம். விஹாரஸீமந்தி அவிப்பவாஸஸீமம் ஸந்தா⁴யாஹ. விஹாரம் க³ந்த்வா வஸிதப்³ப³ந்தி அந்தோஸீமாய யத்த² கத்த²சி வஸிதப்³ப³ம். ஸத்த²ஸமீபேயேவாதி இத³ம் யதா²வுத்தஅப்³ப⁴ந்தரபரிச்சே²த³வஸேன வுத்தம். பாளியம் நானாகுலஸ்ஸ ஸத்தோ² ஹோதி, ஸத்தே² சீவரம் நிக்கி²பித்வா ஹத்த²பாஸா ந விஜஹிதப்³ப³ந்தி ஏத்த² ஹத்த²பாஸோ நாம ஸத்த²ஸ்ஸ ஹத்த²பாஸோதி வேதி³தப்³ப³ம்.

490. ஏககுலஸ்ஸ கே²த்தேதி அபரிக்கி²த்தம் ஸந்தா⁴ய வத³தி. யஸ்மா ‘‘நானாகுலஸ்ஸ பரிக்கி²த்தே கே²த்தே சீவரம் நிக்கி²பித்வா கே²த்தத்³வாரமூலே வா தஸ்ஸ ஹத்த²பாஸே வா வத்த²ப்³ப³’’ந்தி வுத்தம், தஸ்மா த்³வாரமூலதோ அஞ்ஞத்த² அந்தோகே²த்தேபி வஸந்தேன சீவரம் ஹத்த²பாஸே கத்வாயேவ வஸிதப்³ப³ம்.

491-494. ‘‘விஹாரோ நாம ஸபரிக்கி²த்தோ வா அபரிக்கி²த்தோ வா ஸகலோ ஆவாஸோ’’தி வத³ந்தி. யஸ்மிம் விஹாரேதி ஏத்த² பன ஏகம் கே³ஹமேவ வுத்தம். ஏககுலனானாகுலஸந்தகதா சேத்த² காராபகானம் வஸேன வேதி³தப்³பா³. சா²யாய பு²ட்டோ²காஸஸ்ஸ அந்தோ ஏவாதி யதா³ மஹாவீதி²யம் உஜுகமேவ க³ச்ச²ந்தம் ஸூரியமண்ட³லம் மஜ்ஜ²ன்ஹிகம் பாபுணாதி, ததா³ யம் ஓகாஸம் சா²யா ப²ரதி, தம் ஸந்தா⁴ய வுத்தம். அக³மனபதே²தி யம் தத³ஹேவ க³ந்த்வா புன ஆக³ந்தும் ஸக்கா ந ஹோதி, தாதி³ஸம் ஸந்தா⁴ய வுத்தம்.

495. நதி³ம் ஓதரதீதி ஹத்த²பாஸம் முஞ்சித்வா ஓதரதி. ந ஆபஜ்ஜதீதி பரிபோ⁴க³பச்சயா து³க்கடம் நாபஜ்ஜதி. தேனாஹ ‘‘ஸோ ஹீ’’திஆதி³. அபரிபோ⁴கா³ரஹத்தாதி இமினாவ நிஸ்ஸக்³கி³யசீவரம் அனிஸ்ஸஜ்ஜேத்வா பரிபு⁴ஞ்ஜந்தஸ்ஸ து³க்கடம் அசித்தகந்தி ஸித்³த⁴ம். ஏகம் பாருபித்வா ஏகம் அம்ஸகூடே ட²பேத்வா க³ந்தப்³ப³ந்தி இத³ம் ப³ஹூனம் ஸஞ்சாரட்டா²னே ஏவம் அகத்வா க³மனம் ந ஸாருப்பந்தி கத்வா வுத்தம். ப³ஹிகா³மே ட²பேத்வா…பே… வினயகம்மம் காதப்³ப³ந்தி வுத்தத்தா அதி⁴ட்டா²னே விய பரம்முகா² டி²தம்பி நிஸ்ஸக்³கி³யம் சீவரம் நிஸ்ஸஜ்ஜிதும் நிஸ்ஸட்ட²சீவரஞ்ச தா³தும் வட்டதீதி வேதி³தப்³ப³ம்.

க³மனே ஸஉஸ்ஸாஹத்தா ‘‘நிஸ்ஸயோ பன ந படிப்பஸ்ஸம்ப⁴தீ’’தி வுத்தம். முஹுத்தம் ஸயித்வா…பே… நிஸ்ஸயோ ச படிப்பஸ்ஸம்ப⁴தீதி ஏத்த² ‘‘உஸ்ஸாஹே அபரிச்சத்தேபி க³மனஸ்ஸ உபச்சி²ன்னத்தா புன உட்டா²ய ஸஉஸ்ஸாஹம் க³ச்ச²ந்தானம்பி அந்தரா அருணே உட்டி²தே நிஸ்ஸயோ படிப்பஸ்ஸம்ப⁴தியேவா’’தி வத³ந்தி. பரதோ முஹுத்தம் ட²த்வாதி ஏத்தா²பி ஏஸேவ நயோ. அஞ்ஞமஞ்ஞஸ்ஸ வசனம் அக்³க³ஹேத்வா க³தாதி ஏத்த² ஸசே ஏவம் க³ச்ச²ந்தா ‘‘புராருணா அஞ்ஞமஞ்ஞம் பஸ்ஸிஸ்ஸாமா’’தி உஸ்ஸாஹம் வினாவ க³தா ஹோந்தி, அருணுக்³க³மனே நிஸ்ஸயபடிப்பஸ்ஸத்³தி⁴ ந வத்தப்³பா³ பட²மதரம்யேவ படிப்பஸ்ஸம்ப⁴னதோ. அத² ‘‘புராருணா பஸ்ஸிஸ்ஸாமா’’தி ஸஉஸ்ஸாஹாவ க³ச்ச²ந்தி, நிஸ்ஸயபடிப்பஸ்ஸத்³தி⁴யேவ ந வத்தப்³பா³. ஏவஞ்ச ஸதி ‘‘ஸஹ அருணுக்³க³மனா நிஸ்ஸயோ படிப்பஸ்ஸம்ப⁴தீ’’தி கஸ்மா வுத்தம்? வுச்சதே – ஸஉஸ்ஸஹத்தா பட²மதரம் படிப்பஸ்ஸத்³தி⁴ ந வுத்தா. ஸதிபி ச உஸ்ஸாஹபா⁴வே ஏகதோ க³மனஸ்ஸ உபச்சி²ன்னத்தா ‘‘முஹுத்தம் ட²த்வா’’தி ஏத்த² விய ஸஹ அருணுக்³க³மனா படிப்பஸ்ஸத்³தி⁴யேவ வுத்தா.

அந்தோஸீமாயம் கா³மந்தி அவிப்பவாஸஸீமாஸம்முதியா பச்சா² பதிட்டா²பிதகா³மம் ஸந்தா⁴ய வத³தி கா³மம் அந்தோ கத்வா அவிப்பவாஸஸீமாஸம்முதியா அபா⁴வதோ. நேவ சீவரானி நிஸ்ஸக்³கி³யானி ஹோந்தீதி அவிப்பவாஸஸீமாபா⁴வதோ வுத்தம், ந நிஸ்ஸயோ படிப்பஸ்ஸம்ப⁴தீதி ஸஉஸ்ஸாஹபா⁴வதோ. அந்தராமக்³கே³யேவ ச நேஸம் அருணம் உக்³க³ச்ச²தீதி த⁴ம்மம் ஸுத்வா ஆக³ச்ச²ந்தானம் அருணம் உக்³க³ச்ச²தி. அஸ்ஸதியா க³ச்ச²தீதி அஸ்ஸதியா அத்தனோ சீவரம் அபச்சுத்³த⁴ரித்வா தே²ரஸ்ஸ சீவரம் அபச்சுத்³த⁴ராபேத்வா க³ச்ச²தி. ஏவம் க³தே தஸ்மிம் பச்சா² தே²ரேன ஸரித்வா படிபஜ்ஜிதப்³ப³விதி⁴ம் த³ஸ்ஸேதி ‘‘அத்தனோ சீவரம் பச்சுத்³த⁴ரித்வா த³ஹரஸ்ஸ சீவரம் விஸ்ஸாஸேன க³ஹேத்வா ட²பேதப்³ப³’’ந்தி. க³ந்த்வா வத்தப்³போ³தி ஆக³தகிச்சம் நிட்ட²பேத்வா விஹாரம் க³தேன படிபஜ்ஜிதப்³ப³விதி⁴ம் த³ஸ்ஸேதி. அனதி⁴ட்டி²தசீவரதா, அனத்த²தகதி²னதா, அலத்³த⁴ஸம்முதிதா, ரத்திவிப்பவாஸோதி இமானேத்த² சத்தாரி அங்கா³னி.

உதோ³ஸிதஸிக்கா²பத³வண்ணனா நிட்டி²தா.