2. து³தியஅனியதஸிக்கா²பத³வண்ணனா

452. ‘‘ஏகோ’’தி வுத்தத்தா ‘‘நிஸஜ்ஜம் கப்பேதும் படிக்கி²த்த’’ந்தி இமினா ஸம்ப³ந்தோ⁴ ந க⁴டதீதி ஆஹ ‘‘யம் ஏகோ…பே… ஸம்ப³ந்தோ⁴ வேதி³தப்³போ³’’தி. ஏதம் பச்சத்தவசனந்தி ‘‘ஏகோ’’தி இத³ம் பச்சத்தவசனம்.

453. ப³ஹி பரிக்கி²த்தந்தி ப³ஹி பாகாராதி³னா பரிக்கி²த்தம். பரிவேணங்க³ணந்தி பரிவேணமாளகம் ஸந்தா⁴ய வுத்தம். இத்தீ²பி புரிஸோபீதி ஏத்த² பட²மே கஸ்மா இத்தி²ஸதம்பி அனாபத்திம் ந கரோதி, இத⁴ ஏகாபி கஸ்மா அனாபத்திம் கரோதீதி? வுச்சதே – பட²மஸிக்கா²பத³ம் ‘‘ஸக்கா ஹோதி மேது²னம் த⁴ம்மம் படிஸேவிது’’ந்தி வுத்தத்தா மேது²னத⁴ம்மவஸேன ஆக³தம், ந ச மேது²னஸ்ஸ மாதுகா³மோ து³தியோ ஹோதி. இத்தி²யோ ஹி அஞ்ஞமஞ்ஞிஸ்ஸா வஜ்ஜம் படிச்சா²தே³ந்தி, தேனேவ வேஸாலியம் மஹாவனே த்³வாரம் விவரித்வா நிபன்னே பி⁴க்கு²ம்ஹி ஸம்ப³ஹுலா இத்தி²யோ யாவத³த்த²ம் கத்வா பக்கமிம்ஸு, தஸ்மா தத்த² ‘‘இத்தி²ஸதம்பி அனாபத்திம் ந கரோதீ’’தி வுத்தம். இத³ம் பன ஸிக்கா²பத³ம் து³ட்டு²ல்லவாசாவஸேன ஆக³தம் ‘‘அலஞ்ச கோ² ஹோதி மாதுகா³மம் து³ட்டு²ல்லாஹி வாசாஹி ஓபா⁴ஸிது’’ந்தி வுத்தத்தா. து³ட்டு²ல்லவாசஞ்ச ஸுத்வா மாதுகா³மோபி ந படிச்சா²தே³தி. தேனேவ து³ட்டு²ல்லவாசாஸிக்கா²பதே³ யா தா இத்தி²யோ ஹிரிமனா, தா நிக்க²மித்வா பி⁴க்கூ² உஜ்ஜா²பேஸும், தஸ்மா இத⁴ ‘‘இத்தீ²பி அனாபத்திம் கரோதீ’’தி வுத்தம். இத⁴ அப்படிச்ச²ன்னத்தா இத்தீ²பி அனாபத்திம் கரோதி, தத்த² படிச்ச²ன்னத்தா இத்தி²ஸதம்பி அனாபத்திம் ந கரோதீதி ச வத³ந்தி.

காயஸம்ஸக்³க³வஸேன அனந்தோ⁴ வுத்தோ, து³ட்டு²ல்லவாசாவஸேன அப³தி⁴ரோ. அந்தோத்³வாத³ஸஹத்தே² ஓகாஸேதி ஸோதஸ்ஸ ரஹாபா⁴வோ வுத்தோ, ஏதேன ‘‘ஸோதஸ்ஸ ரஹோ த்³வாத³ஸஹத்தே²ன பரிச்சி²ந்தி³தப்³போ³’’தி த³ஸ்ஸேதி. தஸ்மா த்³வாத³ஸஹத்த²தோ ப³ஹி நிஸின்னோ அனாபத்திம் ந கரோதி ஸதிபி சக்கு²ஸ்ஸ ரஹாபா⁴வே ஸோதஸ்ஸ ரஹஸப்³பா⁴வதோ. இமஸ்மிஞ்ஹி ஸிக்கா²பதே³ அப்படிச்ச²ன்னத்தா ஸோதஸ்ஸ ரஹோயேவ அதி⁴ப்பேதோ. பாளியம் பன ‘‘சக்கு²ஸ்ஸ ரஹோ’’தி அத்து²த்³தா⁴ரவஸேன வுத்தம். கேனசி பன ‘‘த்³வேபி ரஹா இத⁴ அதி⁴ப்பேதா’’தி வுத்தம், தம் ந க³ஹேதப்³ப³ம். ந ஹி அப்படிச்ச²ன்னே ஓகாஸே சக்கு²ஸ்ஸ ரஹோ ஸம்ப⁴வதி த்³வாத³ஸஹத்த²தோ ப³ஹி த³ஸ்ஸனவிஸயே தூ³ரதரே நிஸின்னஸ்ஸபி த³ட்டு²ம் ஸக்குணேய்யபா⁴வதோ. நித்³தா³யந்தோபீதி இமினா ‘‘நிபஜ்ஜித்வா நித்³தா³யந்தோபி க³ஹிதோயேவா’’தி தீஸுபி க³ண்டி²பதே³ஸு வுத்தம். ‘‘நிபஜ்ஜித்வா நித்³தா³யந்தேபி ஸதிபி சக்கு²ஸ்ஸ ரஹே அப³தி⁴ரத்தா ஸோதஸ்ஸ ரஹோ நத்தீ²’’தி க³ண்டி²பத³காரானம் அதி⁴ப்பாயோ. யதா² பன நிபஜ்ஜித்வா நித்³தா³யந்தோ அந்தோ⁴ விய கிஞ்சி ந பஸ்ஸதீதி சக்கு²ஸ்ஸ ரஹோ ஸம்ப⁴வதி, ததா² ப³தி⁴ரோ விய கிஞ்சி ஸத்³த³ம் ந ஸுணாதீதி ஸோதஸ்ஸ ரஹோபி ஸம்ப⁴வதீதி ஸக்கா வத்தும். அட்ட²கதா²யஞ்ச டி²தோ வா நிஸின்னோ வாதி ஏத்தகமேவ வுத்தம், பட²மஸிக்கா²பதே³ விய ‘‘நிபஜ்ஜித்வா நித்³தா³யந்தோபி அனாபத்திம் ந கரோதீ’’தி இத³ம் பன ந வுத்தம், தஸ்மா வீமம்ஸித்வா யதா² ந விருஜ்ஜ²தி, ததா² க³ஹேதப்³ப³ம்.

ஸோதஸ்ஸ ரஹஸ்ஸேவ இதா⁴தி⁴ப்பேதத்தா ‘‘ப³தி⁴ரோ பன சக்கு²மாபீ’’தி வுத்தம். அந்த⁴ஸ்ஸ அப்படிச்ச²ன்னம்பி படிச்ச²ன்னபக்க²ம் ப⁴ஜதீதி பட²மஸிக்கா²பத³ஸ்ஸ விஸயத்தா வுத்தம் ‘‘அந்தோ⁴ வா அப³தி⁴ரோபி ந கரோதீ’’தி. யதே²வ ஹி தத்த² அபிஹிதகவாடஸ்ஸ க³ப்³ப⁴ஸ்ஸ அந்தோ ஸமீபேபி டி²தோ அந்தோ⁴ அனாபத்திம் ந கரோதி, ஏவமயம்பீதி த³ட்ட²ப்³ப³ம். உப⁴யத்தா²பீதி த்³வீஸுபி அனியதேஸு. யஸ்மா த்³வீஹி ஸிக்கா²பதே³ஹி உதா³யித்தே²ரம் ஆரப்³ப⁴ விஸும் பஞ்ஞத்தா காசி ஆபத்தி நாம நத்தி², தஸ்மா தஸ்ஸ தஸ்ஸ ஸிக்கா²பத³ஸ்ஸ ஆதி³கம்மிகே ஸந்தா⁴ய ஆதி³கம்மிகானம் அனாபத்தி வுத்தா. உபனந்த³த்தே²ராத³யோ ஹி ரஹோ நிஸஜ்ஜாதீ³னம் ஆதி³கம்மிகா. ப⁴க³வதா பன பட²மம் பஞ்ஞத்தஸிக்கா²பதா³னியேவ க³ஹேத்வா உபனந்த³வத்து²ஸ்மிம் அனியதக்கமோ த³ஸ்ஸிதோ. யதி³ இமேஹி ஸிக்கா²பதே³ஹி விஸும் பஞ்ஞத்தா ஆபத்தி நாம நத்தி², அத² கஸ்மா ப⁴க³வதா அனியதத்³வயம் பஞ்ஞத்தந்தி? ஏவரூபாயபி உபாஸிகாய வுச்சமானோ படிஜானமானோயேவ ஆபத்தியா காரேதப்³போ³, ந அப்படிஜானமானோதி த³ஸ்ஸேந்தேன ப⁴க³வதா யாய காயசி ஆபத்தியா யேன கேனசி சோதி³தே படிஞ்ஞாதகரணம்யேவ த³ள்ஹம் கத்வா வினயவினிச்ச²யலக்க²ணம் ட²பிதம். அத² பி⁴க்கு²னீனம் அனியதம் கஸ்மா ந வுத்தந்தி? இத³மேவ லக்க²ணம் ஸப்³ப³த்த² அனுக³தந்தி ந வுத்தம்.

து³தியஅனியதஸிக்கா²பத³வண்ணனா நிட்டி²தா.

இதி ஸமந்தபாஸாதி³காய வினயட்ட²கதா²ய ஸாரத்த²தீ³பனியம்

அனியதவண்ணனா நிட்டி²தா.