6. குடிகாரஸிக்கா²பத³வண்ணனா

342. ச²ட்டே² ஏத்தகேனாதி ஏத்தகேன தா³ருஆதி³னா. அபரிச்சி²ன்னப்பமாணாயோதி அபரிச்சி²ன்னதா³ருஆதி³ப்பமாணாயோ. மூலச்சே²ஜ்ஜாய புரிஸம் யாசிதும் ந வட்டதீதி பரஸந்தகபா⁴வதோ மோசேத்வா அத்தனோயேவ ஸந்தகம் கத்வா யாசிதும் ந வட்டதி. ஏவம் மூலச்சே²ஜ்ஜாய அஞ்ஞாதகஅப்பவாரிதட்டா²னதோ யாசந்தஸ்ஸ அஞ்ஞாதகவிஞ்ஞத்தியா து³க்கடம். தா³ஸம் அத்தனோ அத்தா²ய ஸாதி³யந்தஸ்ஸபி து³க்கடமேவ ‘‘தா³ஸிதா³ஸபடிக்³க³ஹணா படிவிரதோ ஹோதீ’’தி (தீ³. நி. 1.10, 194) வசனதோ. ஞாதகபவாரிதட்டா²னதோ பன தா³ஸம் மூலச்சே²ஜ்ஜாய யாசந்தஸ்ஸ ஸாதி³யனவஸேன து³க்கடம். ஸககம்மம் ந யாசிதப்³பா³தி பாணாதிபாதஸிக்கா²பத³ரக்க²ணத்த²ம் வுத்தம். அனியமேத்வாபி ந யாசிதப்³பா³தி மனுஸ்ஸானம் அஞ்ஞதா² கா³ஹஸ்ஸபி ஸம்ப⁴வதோ வுத்தம், ஸுத்³த⁴சித்தேன பன ஹத்த²கம்மம் யாசந்தஸ்ஸ ஆபத்தி நாம நத்தி².

ஸப்³ப³கப்பியபா⁴வதீ³பனத்த²ந்தி ஸப்³ப³ஸோ கப்பியபா⁴வதீ³பனத்த²ம். மூலம் தே³தா²தி வத்தும் வட்டதீதி யஸ்மா மூலம் த³ஸ்ஸாமாதி தேஹி பட²மம் வுத்தத்தா விஞ்ஞத்தி ந ஹோதி, யஸ்மா ச மூலந்தி ப⁴ணிதம் ஸாமஞ்ஞவசனதோ அகப்பியவசனம் ந ஹோதி, தஸ்மா மூலம் தே³தா²தி வத்தும் வட்டதி. அனஜ்ஜா²வுத்த²கந்தி அபரிக்³க³ஹிதம். அகப்பியகஹாபணாதி³ ந தா³தப்³ப³ந்தி கிஞ்சாபி அகப்பியகஹாபணாதி³ம் அஸாதி³யந்தேன கப்பியவோஹாரதோ தா³தும் வட்டதி, ததா²பி ஸாருப்பம் ந ஹோதி. மனுஸ்ஸா ச ஏதஸ்ஸ ஸந்தகம் கிஞ்சி அத்தீ²தி விஹேடே²தப்³ப³ம் மஞ்ஞந்தீதி அகப்பியகஹாபணாதி³தா³னம் படிக்கி²த்தம். ததே²வ பாசேத்வாதி ஹத்த²கம்மவஸேனேவ பாசேத்வா. ‘‘கிம், ப⁴ந்தே’’தி ஏத்தகேபி புச்சி²தே யத³த்தா²ய பவிட்டோ², தம் கதே²தும் வட்டதி புச்சி²தபஞ்ஹத்தா.

வத்தந்தி சாரித்தம், ஆபத்தி பன ந ஹோதீதி அதி⁴ப்பாயோ. கப்பியம் காராபேத்வா படிக்³க³ஹேதப்³பா³னீதி ஸாகா²ய லக்³க³ரஜஸ்மிம் பத்தே பதிதேபி ஸாக²ம் சி²ந்தி³த்வா கா²தி³துகாமதாயபி ஸதி ஸுக²பரிபோ⁴க³த்த²ம் வுத்தம். ‘‘நதி³ம் வா…பே… ஆஹரா’’தி வத்து²ம் வட்டதீதி அபரிக்³க³ஹிதத்தா வுத்தம். கே³ஹதோ…பே… பரிபு⁴ஞ்ஜிதப்³ப³ந்தி பரிக்³க³ஹிதஉத³கத்தா விஞ்ஞத்தியா து³க்கடம் ஹோதீதி அதி⁴ப்பாயோ. அலஜ்ஜீஹி…பே… ந காரேதப்³ப³ந்தி இத³ம் உத்தரிப⁴ங்கா³தி⁴காரத்தா அஜ்ஜோ²ஹரணீயம் ஸந்தா⁴ய வுத்தம். பா³ஹிரபரிபோ⁴கே³ஸு பன அலஜ்ஜீஹிபி ஹத்த²கம்மம் காரேதும் வட்டதீதி.

கோ³ணம் பன…பே… ஆஹராபேதும் ந வட்டதீதி அத்தனோ அத்தா²ய மூலச்சே²ஜ்ஜவஸேன ஆஹராபேதும் ந வட்டதி. ஆஹராபேந்தஸ்ஸ து³க்கடந்தி அஞ்ஞாதகவிஞ்ஞத்தியா து³க்கடம். அத்தனோ அத்தா²ய ஸாதி³யனேபி து³க்கடமேவ ‘‘ஹத்தி²க³வாஸ்ஸவளவபடிக்³க³ஹணா படிவிரதோ ஹோதீ’’தி (தீ³. நி. 1.10, 194) வுத்தத்தா. தேனேவாஹ ‘‘ஞாதகபவாரிதட்டா²னதோபி மூலச்சே²ஜ்ஜாய யாசிதும் ந வட்டதீ’’தி. ரக்கி²த்வாதி யதா² சோரா ந ஹரந்தி, ஏவம் ரக்கி²த்வா. ஜக்³கி³த்வாதி திணதா³னாதீ³ஹி ஜக்³கி³த்வா. ந ஸம்படிச்சி²தப்³ப³ந்தி அத்தனோ அத்தா²ய கோ³ணே ஸாதி³யனஸ்ஸ படிக்கி²த்தத்தா வுத்தம்.

ஸகடம் தே³தா²தி…பே… வட்டதீதி மூலச்சே²ஜ்ஜவஸேன ஸகடம் தே³தா²தி வத்தும் ந வட்டதி. தாவகாலிகம் வட்டதீதி தாவகாலிகம் கத்வா ஸப்³ப³த்த² யாசிதும் வட்டதி. வல்லிஆதீ³ஸு ச பரபரிக்³க³ஹிதேஸு ஏஸேவ நயோதி யோஜேதப்³ப³ம். க³ருப⁴ண்ட³ப்பஹோனகேஸுயேவ ச வல்லிஆதீ³ஸூதி ஏத்த² ஆதி³-ஸத்³தே³ன வேளுமுஞ்ஜபப்³ப³ஜதிணமத்திகானம் ஸங்க³ஹோ த³ட்ட²ப்³போ³. யம் பன வத்து²வஸேன அப்பம் ஹுத்வா அக்³க⁴வஸேன மஹந்தம் ஹரிதாலஹிங்கு³லகாதி³, தம் க³ருப⁴ண்ட³ம் அப்பஹோந்தம்பி யாசிதும் ந வட்டதீதி வத³ந்தி.

ஸாதி விஞ்ஞத்திம் பராமஸதி. ஸா ச இத⁴ பரிகதா²தி³னா யேன கேனசி அதி⁴ப்பாயவிஞ்ஞாபனம் விஞ்ஞத்தீதி க³ஹேதப்³பா³. தேனாஹ ‘‘ஸப்³பே³ன ஸப்³ப³’’ந்தி, ஸப்³ப³ப்பகாரேனாதி அத்தோ². தேன ‘‘பரிகதா²தி³வஸேனபி விஞ்ஞாபனம் ந வட்டதீ’’தி தீ³பேதி. பரிகதோ²பா⁴ஸனிமித்தகம்மம்பி ஹி சீவரபிண்ட³பாதேஸு த்³வீஸு பச்சயேஸு ந வட்டதி. இதா³னி ஸேனாஸனபச்சயே அதி⁴ப்பேதம் விஞ்ஞத்திம் பரிகதா²தீ³ஹி விஸேஸேத்வா த³ஸ்ஸேந்தோ ‘‘ஆஹர தே³ஹீதி விஞ்ஞத்திமத்தமேவ ந வட்டதீ’’தி ஆஹ. பரிகதோ²பா⁴ஸனிமித்தகம்மானி வட்டந்தீதி ஏத்த² பரிகதா² நாம பரியாயேன கத²னம் பி⁴க்கு²ஸங்க⁴ஸ்ஸ ஸேனாஸனம் ஸம்பா³த⁴ந்திஆதி³வசனம். ஓபா⁴ஸோ நாம உஜுகமேவ அகதே²த்வா யதா² அதி⁴ப்பாயோ விபூ⁴தோ ஹோதி, ஏவம் ஓபா⁴ஸனம், உபாஸகா, தும்ஹே குஹிம் வஸதா²தி? பாஸாதே³, ப⁴ந்தேதி. பி⁴க்கூ²னம் பன, உபாஸகா, பாஸாதோ³ ந வட்டதீதிஆதி³வசனம். நிமித்தகம்மம் நாம பச்சயே உத்³தி³ஸ்ஸ யதா² அதி⁴ப்பாயோ விஞ்ஞாயதி, ஏவம் நிமித்தகம்மம், ஸேனாஸனத்த²ம் பூ⁴மிபரிகம்மாதீ³னி கரோந்தஸ்ஸ ‘‘கிம், ப⁴ந்தே, கரோஸி, கோ காராபேதீ’’தி வுத்தே ‘‘ந கோசீ’’திஆதி³வசனம்.

இதா³னி கி³லானபச்சயே விஞ்ஞத்திஆதி³கம் ஸப்³ப³ம்பி வட்டதீதி த³ஸ்ஸேந்தோ ஆஹ ‘‘கி³லானபச்சயே பனா’’திஆதி³. ததா² உப்பன்னம் பன பே⁴ஸஜ்ஜம் ரோகே³ வூபஸந்தே பரிபு⁴ஞ்ஜிதும் வட்டதி, ந வட்டதீதி? தத்த² வினயத⁴ரா ‘‘ப⁴க³வதா ரோக³ஸீஸேன பரிபோ⁴க³ஸ்ஸ த்³வாரம் தி³ன்னம், தஸ்மா அரோக³காலேபி பரிபு⁴ஞ்ஜிதும் வட்டதி, ஆபத்தி ந ஹோதீ’’தி வத³ந்தி. ஸுத்தந்திகா பன ‘‘கிஞ்சாபி ஆபத்தி ந ஹோதி, ஆஜீவம் பன கோபேதி, தஸ்மா ஸல்லேக²ப்படிபத்தியம் டி²தஸ்ஸ ந வட்டதி, ஸல்லேக²ம் கோபேதீ’’தி வத³ந்தி. உக்கமந்தீதி அபக³ச்ச²ந்தி.

344. மணி கண்டே² அஸ்ஸாதி மணிகண்டோ², மணினா உபலக்கி²தோ வா கண்டோ² அஸ்ஸாதி மணிகண்டோ²தி மஜ்ஜ²பத³லோபீஸமாஸோ த³ட்ட²ப்³போ³. தே³வவண்ணந்தி தே³வத்தபா⁴வம். பஸன்னாகாரந்தி பஸன்னேஹி காதப்³ப³கிச்சம், காயவேய்யாவச்சஸங்கா²தம் உபட்டா²னந்தி வுத்தம் ஹோதி. மணியாசனாய தஸ்ஸ அனாக³மனேன அத்தனோ வட்³டி⁴ ஹோதீதி வுத்தம் ‘‘மணினா மே அத்தோ²’’தி, மந்தபத³னீஹாரேன வா ததா² வுத்தந்தி த³ட்ட²ப்³ப³ம்.

345. வத்தமானஸமீபேதி வத்தமானஸ்ஸ ஸமீபே அதீதே. ஏவம் வத்தும் லப்³ப⁴தீதி ‘‘ஆக³தோஸீ’’தி வத்தப்³பே³ வத்தமானஸமீபத்தா ‘‘ஆக³ச்ச²ஸீ’’தி ஏவம் வத்தமானவோஹாரேன வத்தும் லப்³ப⁴தி. லக்க²ணம் பனேத்த² ஸத்³த³ஸத்தா²னுஸாரதோ வேதி³தப்³ப³ம். ஸோ ஏவ நயோதி ‘‘ஆக³தோம்ஹீ’’தி வத்தப்³பே³ ‘‘ஆக³ச்சா²மீ’’தி அயம்பி வத்தமானஸமீபே வத்தமானவோஹாரோதி த³ஸ்ஸேதி.

348-349. யஸ்மா பன ந ஸக்கா கேவலம் யாசனாய கிஞ்சி காதும், தஸ்மா ‘‘ஸயம் யாசிதகேஹி உபகரணேஹீ’’தி அதி⁴ப்பாயத்தோ² வுத்தோ. உத்³த⁴ம்முக²ம் லித்தா உல்லித்தா, அதோ⁴முக²ம் லித்தா அவலித்தா. யஸ்மா பன உத்³த⁴ம்முக²ம் லிம்பந்தா யேபு⁴ய்யேன அந்தோ லிம்பந்தி, அதோ⁴முக²ம் லிம்பந்தா ச ப³ஹி, தஸ்மா வுத்தம் ‘‘உல்லித்தாதி அந்தோலித்தா, அவலித்தாதி ப³ஹிலித்தா’’தி. தத்த² உல்லித்தா நாம ட²பேத்வா துலாபிட்ட²ஸங்கா⁴தவாதபானதூ⁴மசி²த்³தா³தி³பே⁴த³ம் அலேபோகாஸம் அவஸேஸே லேபோகாஸே குட்டேஹி ஸத்³தி⁴ம் க⁴டேத்வா ச²த³னஸ்ஸ அந்தோ ஸுதா⁴ய வா மத்திகாய வா லித்தா. அவலித்தா நாம வுத்தனயேனேவ ச²த³னஸ்ஸ ப³ஹி லித்தா. உல்லித்தாவலித்தா நாம ததே²வ ச²த³னஸ்ஸ அந்தோ ச ப³ஹி ச லித்தா.

ப்³யஞ்ஜனம் ஸமேதீதி ‘‘காரயமானேனா’’தி ஹேதுகத்துவஸேன உத்³தி³ட்ட²பத³ஸ்ஸ ‘‘காராபேந்தேனா’’தி ஹேதுகத்துவஸேனேவ நித்³தே³ஸஸ்ஸ கதத்தா ப்³யஞ்ஜனம் ஸமேதி. யதி³ ஏவம் ‘‘கரோந்தோ வா காராபேந்தோ வா’’தி கஸ்மா தஸ்ஸ பத³பா⁴ஜனம் வுத்தந்தி ஆஹ ‘‘யஸ்மா பனா’’திஆதி³. ‘‘அத்தனா விப்பகதம் பரேஹி பரியோஸாபேதீ’’திஆதி³வசனதோ ‘‘கரோந்தேனபி இத⁴ வுத்தனயேனேவ படிபஜ்ஜிதப்³ப³’’ந்தி வுத்தம். தத்த² இத⁴ வுத்தனயேனேவாதி இமஸ்மிம் ஸிக்கா²பதே³ வுத்தனயேனேவ. உபோ⁴பேதேதி காரககாராபகா. காரயமானேனாதி இமினாவ பதே³ன ஸங்க³ஹிதாதி கத²ம் ஸங்க³ஹிதா. ந ஹி காரயமானோ கரோந்தோ நாம ஹோதி, ஏவம் பனேத்த² அதி⁴ப்பாயோ வேதி³தப்³போ³ – யஸ்மா கரோந்தேனபி காரயமானேனபி இத⁴ வுத்தனயேனேவ படிபஜ்ஜிதப்³ப³ம், தஸ்மா காரயமானேன ஏவம் படிபஜ்ஜிதப்³ப³ந்தி வுத்தே பகே³வ கரோந்தேனாதி இத³ம் அத்த²தோ ஆக³தமேவாதி ‘‘காரயமானேனா’’தி ப⁴க³வதா வுத்தம். ததோ ‘‘காரயமானேனா’’தி வுத்தே ஸாமத்தி²யதோ லப்³ப⁴மானோபி அத்தோ² தேனேவ ஸங்க³ஹிதோ நாம ஹோதீதி. ப்³யஞ்ஜனம் விலோமிதம் ப⁴வேய்யாதி யஸ்மா ‘‘காரயமானேனா’’தி இமஸ்ஸ ‘‘கரோந்தேனா’’தி இத³ம் பரியாயவசனம் ந ஹோதி, தஸ்மா கரோந்தேன வா காராபேந்தேன வாதி பத³த்த²வஸேன நித்³தே³ஸே கதே ப்³யஞ்ஜனம் விருத்³த⁴ம் ப⁴வேய்யாதி அதி⁴ப்பாயோ. அத்த²மத்தமேவாதி பத³த்த²தோ ஸாமத்தி²யதோ ச லப்³ப⁴மானம் அத்த²மத்தமேவ.

உத்³தே³ஸோதி உத்³தி³ஸிதப்³போ³. அப்³போ³ஹாரிகந்தி அப்பமாணம். ‘‘ஆயாமதோ ச வித்தா²ரதோ சா’’தி அவத்வா விகப்பத்த²ஸ்ஸ வா-ஸத்³த³ஸ்ஸ வுத்தத்தா ஏகதோபா⁴கே³ன வட்³டி⁴தேபி ஆபத்தியேவாதி த³ஸ்ஸேந்தோ ‘‘யோ பனா’’திஆதி³மாஹ. திஹத்தா²தி வட்³ட⁴கீஹத்தே²ன திஹத்தா². பமாணயுத்தோ மஞ்சோதி பகதிவித³த்தி²யா நவவித³த்தி²ப்பமாணோ மஞ்சோ. பமாணிகா காரேதப்³பா³தி உக்கட்ட²ப்பமாணம் ஸந்தா⁴ய வுத்தத்தா உக்கட்ட²ப்பமாணயுத்தாவ குடி அதே³ஸிதவத்து²கா ந வட்டதி, பமாணதோ பன ஊனதரா அதே³ஸிதவத்து²காபி வட்டதீதி கஸ்ஸசி ஸந்தே³ஹோ ஸியாதி தம்னிவத்தனத்த²ம் ‘‘பமாணதோ ஊனதரம்பீ’’திஆதி³ வுத்தம். தத்த² பமாணதோ ஊனதரந்தி பாளியம் வுத்தப்பமாணதோ ஊனதரம். பச்சி²மேன பமாணேன சதுஹத்த²தோ ஊனதரா குடி நாம ந ஹோதீதி சதுஹத்த²தோ பட்டா²ய குடிலக்க²ணப்பத்தம் குடிம் த³ஸ்ஸேதும் ‘‘சதுஹத்த²ம் பஞ்சஹத்த²ம்பீ’’தி வுத்தம். கலலலேபோதி கேனசி ஸிலேஸேன கதலேபோ, தம்ப³மத்திகாதி³கலலலேபோ வா. அலேபோ ஏவாதி அப்³போ³ஹாரிகாயேவாதி அதி⁴ப்பாயோ. பிட்ட²ஸங்கா⁴டோ த்³வாரபா³ஹா. ஓலோகேத்வாபீதி அபலோகேத்வாபி, அபலோகனகம்மவஸேனபி காதும் வட்டதீதி அதி⁴ப்பாயோ.

353. யதா² ஸீஹாதீ³னம் கோ³சராய பக்கமந்தானம் நிப³த்³த⁴க³மனமக்³கோ³ ந வட்டதி, ஏவம் ஹத்தீ²னம்பி நிப³த்³த⁴க³மனமக்³கோ³ ந வட்டதி. ஏதேஸந்தி ஸீஹாதீ³னம். சாரிபூ⁴மீதி கோ³சரபூ⁴மி. ந க³ஹிதாதி ந வாரிதாதி அதி⁴ப்பாயோ. ஆரோக்³யத்தா²யாதி நிருபத்³த³வத்தா²ய. ஸேஸானீதி புப்³ப³ண்ணனிஸ்ஸிதாதீ³னி. புப்³ப³ண்ணனிஸ்ஸிதந்தி ஏத்த² புப்³ப³ண்ணவிருஹனட்டா²னம் புப்³ப³ண்ண-ஸத்³தே³ன க³ஹிதம். தேனாஹ – ‘‘ஸத்தன்னம் த⁴ஞ்ஞானம்…பே… டி²த’’ந்தி. அபி⁴ஹனந்தி ஏத்தா²தி அப்³பா⁴கா⁴தம். ‘‘வேரிக⁴ர’’ந்தி வுத்தமேவத்த²ம் விபா⁴வேதும் ‘‘சோரானம் மாரணத்தா²ய கத’’ந்தி வுத்தம். த⁴ம்மக³ந்தி⁴காதி ஹத்த²பாதா³தி³சி²ந்த³னக³ந்தி⁴கா.

ஆவிஜ்ஜிதும் ந ஸக்கா ஹோதீதி சி²ந்த³தடாதி³ஸம்ப⁴வதோ ந ஸக்கா ஹோதி ஆவிஜ்ஜிதும். பாசினந்தி குடிவத்து²ஸாமந்தா சினிதப்³ப³அதி⁴ட்டா²னம். கிஞ்சாபி இத⁴ புப்³ப³பயோக³ஸஹபயோகா³னம் அதி³ன்னாதா³னே விய விஸேஸோ நத்தி², ததா²பி தேஸம் விபா⁴கே³ன த³ஸ்ஸனம் சி²ந்தி³த்வா புன காதப்³பா³தி ஏத்த² குடியா பே⁴த³னபரிச்சே²த³த³ஸ்ஸனத்த²ம் கதம். தத³த்தா²யாதி தச்ச²னத்தா²ய. ஏவம் கதந்தி அதே³ஸிதவத்து²ம் பமாணாதிக்கந்தம் வா கதம். தா³ருனா கதம் குட்டம் ஏத்தா²தி தா³ருகுட்டிகா, குடி. ஸிலாகுட்டிகந்திஆதீ³ஸுபி ஏஸேவ நயோ. பண்ணஸாலந்தி ப³ஹி பண்ணேஹி சா²தே³தப்³ப³ம் உல்லித்தாவலித்தம் குடிமேவ வத³தி. தேனேவாஹ ‘‘ஸபி⁴த்திச்ச²த³னம் லிம்பிஸ்ஸாமீ’’தி.

அந்தோலேபேனேவ நிட்டா²பேதுகாமம் ஸந்தா⁴ய ‘‘அந்தோலேபே வா’’திஆதி³ வுத்தம். ப³ஹிலேபே வாதி ஏத்தா²பி ஏஸேவ நயோ. தஸ்மிம் த்³வாரப³த்³தே⁴ வா வாதபானே வா ட²பிதேதி யோஜேதப்³ப³ம். தஸ்ஸோகாஸந்தி தஸ்ஸ த்³வாரப³த்³த⁴ஸ்ஸ வா வாதபானஸ்ஸ வா ஓகாஸம். புன வட்³டே⁴த்வா வாதி புப்³பே³வ ட²பிதோகாஸம் கு²த்³த³கம் சே, பே⁴த³னேன புன வட்³டே⁴த்வா. லேபோ ந க⁴டியதீதி புப்³பே³ தி³ன்னலேபோ த்³வாரப³த்³தே⁴ன வா வாதபானேன வா ஸத்³தி⁴ம் ந க⁴டியதி, ஏகாப³த்³த⁴ம் ஹுத்வா ந திட்ட²தீதி வுத்தம் ஹோதி. தந்தி த்³வாரப³த்³த⁴ம் வா வாதபானம் வா. பட²மமேவ ஸங்கா⁴தி³ஸேஸோதி லேபகிச்சஸ்ஸ நிட்டி²தத்தா த்³வாரப³த்³த⁴ம் வா வாதபானம் வா ட²பனதோ புப்³பே³யேவ ஸங்கா⁴தி³ஸேஸோ. அட்ட²ங்கு³லமத்தேன அப்பத்தச்ச²த³னம் கத்வாதி ஏத்த² ஏவம் மே ஆபத்தி ந ஸியாதி பி⁴த்தியம் வா ச²த³னே வா ஏகங்கு³லமத்தம்பி ஓகாஸம் லேபேன அக⁴டேத்வா ட²பேதி, வட்டதீதி வத³ந்தி. மத்திகாகுட்டமேவ மத்திகாலேபஸங்க்²யம் க³ச்ச²தீதி ஆஹ – ‘‘ஸசே மத்திகாய குட்டம் கரோதி, ச²த³னலேபேன ஸத்³தி⁴ம் க⁴டனே ஆபத்தீ’’தி. உபி⁴ன்னம் அனாபத்தீதி புரிமஸ்ஸ லேபஸ்ஸ அக⁴டிதத்தா து³தியஸ்ஸ அத்துத்³தே³ஸிகதாஸம்ப⁴வதோ உபி⁴ன்னம் அனாபத்தி, தஸ்மா வினாபி வத்தஸீஸேன தேன அனாணத்தோ தஸ்ஸ கரோமீதி கரோதி, உபி⁴ன்னம் அனாபத்தியேவ. ஸசே தேன ஆணத்தோ கரோதி, மூலட்ட²ஸ்ஸேவ ஆபத்தி.

354. ச²த்திம்ஸ சதுக்கானி நாம ‘‘பி⁴க்கு² குடிம் கரோதீ’’திஆதி³ம்ஹி பட²மவாரே அதே³ஸிதவத்து²கசதுக்கம் தே³ஸிதவத்து²கசதுக்கம் பமாணாதிக்கந்தசதுக்கம் பமாணிகசதுக்கம் அதே³ஸிதவத்து²கப்பமாணாதிக்கந்தசதுக்கம் தே³ஸிதவத்து²கப்பமாணிகசதுக்கந்தி ச² சதுக்கானி, ஏவம் ஸமாதி³ஸதிவாராதீ³ஸுபி பஞ்சஸூதி ச²த்திம்ஸ. ஆபத்திபே⁴த³த³ஸ்ஸனத்த²ம் வுத்தானீதி ‘‘ஸாரம்பே⁴ சே பி⁴க்கு² வத்து²ஸ்மிம் அபரிக்கமனே’’தி அவிஸேஸேன மாதிகாய வுத்தத்தா ஸாரம்ப⁴அபரிக்கமனேஸுபி ஸங்கா⁴தி³ஸேஸோவ ஸியாதி மிச்சா²கா³ஹனிவத்தனத்த²ம் ஸாரம்பே⁴ அபரிக்கமனே ச து³க்கடம், அதே³ஸிதவத்து²கதாய பமாணாதிக்கந்ததாய ச ஸங்கா⁴தி³ஸேஸோதி ஏவம் ஆபத்திபே⁴த³த³ஸ்ஸனத்த²ம் வுத்தானி.

355-361. ‘‘த்³வீஹி ஸங்கா⁴தி³ஸேஸேஹீ’’தி வத்தப்³பே³ விப⁴த்திப்³யத்தயேன ச வசனப்³யத்தயேன ச த்³வின்னம் ஸங்கா⁴தி³ஸேஸேனாதி வுத்தந்தி ஆஹ ‘‘த்³வீஹி ஸங்கா⁴தி³ஸேஸேஹி…பே… அத்தோ² வேதி³தப்³போ³’’தி. ‘‘அஞ்ஞஸ்ஸ வா தா³தப்³பா³’’தி வுத்தத்தா விப்பகதம் குடிம் லபி⁴த்வா அத்தனோ அத்தா²ய கரோந்தஸ்ஸபி ஆதி³தோ பட்டா²ய அகதத்தா அனாபத்தியேவாதி வத³ந்தி. அபசினிதப்³பா³தி வித்³த⁴ம்ஸேதப்³பா³. பூ⁴மிஸமம் கத்வாதி குடிவத்து²ஸமம் கத்வா.

364. ந ஹேத்த² லேபோ க⁴டியதீதி ச²த³னலேபஸ்ஸ அபா⁴வதோ வுத்தம், விஸும்யேவ அனுஞ்ஞாதத்தா பன ஸசேபி லேணஸ்ஸ அந்தோ உபரிபா⁴கே³ சித்தகம்மாதி³கரணத்த²ம் லேபம் தே³ந்தி, வட்டதியேவ. லேபதா³னவஸேன அகதா இட்ட²காதி³கு³ஹா கு³ஹா நாமாதி க³ண்டி²பதே³ஸு வுத்தம். திணேஹி வா பண்ணேஹி வா சா²தி³தகுடிகாவ வுத்தாதி ‘‘குக்குடச்சி²ககே³ஹம் வட்டதீ’’தி வத்வா ‘‘ச²த³னம் த³ண்ட³கேஹீ’’திஆதி³னா புன தம் த³ஸ்ஸேந்தேஹி திணபண்ணச்ச²த³னா குடிகாவ வுத்தா. ச²த³னம் த³ண்ட³கேஹி ஜாலப³ந்த⁴ம் கத்வாதி ச²த³னம் தீ³க⁴தோ திரியதோ ச ட²பிதத³ண்ட³கேஹி ஜாலம் விய ப³ந்தி⁴த்வா. ஓகு³ம்பே²த்வாதி திணாதி³ம் வித்³த⁴ம்ஸேத்வா. பி⁴த்திலேபேன ஸத்³தி⁴ம் லேபே க⁴டிதேதி ஏத்த² உல்லித்தாவலித்தபா⁴வஸ்ஸ ச²த³னம் ஸந்தா⁴ய வுத்தத்தா ஸசேபி பி⁴த்திலேபேன அனத்தி²கோ ஹோதி, ச²த³னலேபே ஸமந்ததோ பி⁴த்தியா அப்பமத்தகேனபி க⁴டிதே பி⁴த்திலேபேன வினாபி ஆபத்தியேவாதி வத³ந்தி. உபசிகாமோசனத்த²மேவ ஹேட்டா² பாஸாணகுட்டம் கத்வா தம் அலிம்பித்வா உபரி லிம்பதி, லேபோ ந க⁴டியதி நாம, அனாபத்தியேவாதி இமினா அட்ட²கதா²வசனேன தம் ந ஸமேதி. தத்த² கேசி வத³ந்தி ‘‘பி⁴த்திம் அலிம்பிதுகாமதாய அபா⁴வதோ ச²த³னலேபே பாஸாணகுட்டேன ஸத்³தி⁴ம் க⁴டிதேபி தத்த² அனாபத்தி வுத்தா’’தி, தம்பி ந யுத்தம். ‘‘உபசிகாமோசனத்த²மேவா’’தி ஹி வுத்தத்தா பாஸாணகுட்டே புன லிம்பிதுகாமதாய அபா⁴வோயேவ விஞ்ஞாயதி, தேனேவ ‘‘தம் அலிம்பித்வா’’தி வுத்தம். தஸ்மா ‘‘உல்லித்தாதி³பா⁴வோ…பே… ச²த³னமேவ ஸந்தா⁴ய வுத்தோ’’தி இத³ம் ஸதிபி பி⁴த்திலேபே ச²த³னலேபேன வினா ஆபத்தி ந ஹோதீதி ச²த³னலேபஸ்ஸ பதா⁴னபா⁴வத³ஸ்ஸனத்த²ம் வுத்தம், ந பன பி⁴த்திலேபேன வினாபி ஆபத்தி ஹோதீதி த³ஸ்ஸனத்த²ந்தி வத³ந்தி, இத³மேவ சேத்த² யுத்ததரந்தி அம்ஹாகம் க²ந்தி. ஏத்தா²தி திணகுடிகாய.

ஏத்த² ச திணகுடிகாய ஏவ ஸப்³ப³தா² அனாபத்திபா⁴வஸ்ஸ த³ஸ்ஸனம் பரிவாரபாளிம் ஆனேத்வா திணகுடிகாய ஸாரம்பா⁴தி³பச்சயாபி அனாபத்திபா⁴வோ ஸுகே²ன ஸக்கா ஸாதே⁴துந்தி கதம். திணகுடிகாய ச ஸப்³ப³தா² அனாபத்திபா⁴வே ஸாதி⁴தே தேனேவ நயேன லேணகு³ஹாதீ³ஸுபி ஸாரம்பா⁴தி³பச்சயாபி அனாபத்திபா⁴வோ ஸக்கா விஞ்ஞாதுந்தி. தேனேவ ‘‘யம் பனா’’திஆதி³ வுத்தம். ததா² ஹி திணகுடிகாய ஸாரம்பா⁴தி³பச்சயாபி அனாபத்திபா⁴வே ஸாதி⁴தே தேனேவ நயேன அஞ்ஞஸ்ஸத்தா²ய கரோந்தஸ்ஸபி ஸாரம்பா⁴தி³பச்சயாபி அனாபத்திபா⁴வோ அத்த²தோ த³ஸ்ஸிதோயேவ ஹோதி. ஏவஞ்ச ஸதி பி⁴க்கு² ஸமாதி³ஸித்வா பக்கமதி ‘‘குடிம் மே கரோதா²’’தி, ஸமாதி³ஸதி ச தே³ஸிதவத்து²கா ச ஹோது அனாரம்பா⁴ ச ஸபரிக்கமனா சாதி, தஸ்ஸ குடிம் கரோந்தி அதே³ஸிதவத்து²கம் ஸாரம்ப⁴ம் அபரிக்கமனம். ‘‘ஆபத்தி காருகானம் திண்ணம் து³க்கடான’’ந்தி பாளியம் அஞ்ஞஸ்ஸத்தா²ய கரோந்தஸ்ஸபி ஸாரம்பா⁴தி³பச்சயாபி து³க்கடம் கஸ்மா வுத்தந்தி இமம் சோத³னம் மனஸி நிதா⁴ய ‘‘யம் பன…பே… அகரணபச்சயா வுத்த’’ந்தி இத³ம் வுத்தம். அயஞ்ஹேத்த² அதி⁴ப்பாயோ – அஞ்ஞஸ்ஸத்தா²ய கரோந்தஸ்ஸபி ஸாரம்பா⁴தி³பச்சயாபி அனாபத்தியேவ. ‘‘ஆபத்தி காருகானம் திண்ணம் து³க்கடான’’ந்தி இத³ம் பன அஞ்ஞஸ்ஸத்தா²ய கரோந்தஸ்ஸ ந ஸாரம்பா⁴தி³பச்சயா ஆபத்தித³ஸ்ஸனத்த²ம் வுத்தம், கிஞ்சரஹி யதா²ஸமாதி³ட்டா²ய அகரணபச்சயா ஆபத்தித³ஸ்ஸனத்த²ந்தி. யஸ்மா ப³ஹூஸு போத்த²கேஸு ஸதஸோதி⁴தஸம்மதே ச புராணபோத்த²கே அயமேவ பாட²க்கமோ தி³ஸ்ஸதி, தஸ்மா யதா²தி³ட்ட²பாடா²னுக்கமேனேவேத்த² அத்தோ² பகாஸிதோ. கத்த²சி போத்த²கே பன ‘‘குடிலக்க²ணப்பத்தம்பி குடிம்…பே… அனாபத்தீ’’தி இமஸ்ஸானந்தரம் ‘‘யம் பனா’’திஆதி³பாட²ம் லிக²ந்தி, ஏவஞ்ச ஸதி தத்த² அதி⁴ப்பாயோ பாகடோயேவ. அனாபத்தீதி வத்வாதி உபோஸதா²கா³ரஞ்ச ப⁴விஸ்ஸதி, அஹஞ்ச வஸிஸ்ஸாமீதிஆதீ³ஸு வாஸாகா³ரத்தா²ய ஏவ அனியமிதத்தா அனாபத்தீதி வத்வா.

பமாணாதிக்கந்தகுடிகரணலக்க²ணா கிரியாயேவ, அதே³ஸிதவத்து²மூலிகாயபி ஆபத்தியா அங்க³ம் ஹோதி பமாணாதிக்கந்தமூலிகாயபி, தது³ப⁴யம் ஏகதோ கத்வா ‘‘கிரியாகிரியதோ’’தி வுத்தம். வத்து²ம் அதே³ஸாபேத்வா பமாணயுத்தம் குடிம் கரோந்தஸ்ஸபி வத்து²ம் தே³ஸாபேத்வா அகிரியாய குடிகரணகிரியாய ச ஸமுட்டா²னதோ கிரியாகிரியதோவ ஸமுட்டா²தீதி வேதி³தப்³ப³ம். அசித்தகந்தி பண்ணத்திஅஜானனசித்தேன அசித்தகம். உல்லித்தாதீ³னம் அஞ்ஞதரதா, ஹேட்டி²மப்பமாணஸம்ப⁴வோ, அதே³ஸிதவத்து²தா, பமாணாதிக்கந்ததா, அத்துத்³தே³ஸிகதா, வாஸாகா³ரதா, லேபக⁴ட்டனாதி இமானேத்த² ச² வா ஸத்த வா அங்கா³னி.

குடிகாரஸிக்கா²பத³வண்ணனா நிட்டி²தா.