1. ஸுக்கவிஸ்ஸட்டி²ஸிக்கா²பத³வண்ணனா

இதா³னி பாராஜிகஸம்வண்ணனாஸமனந்தரா யா தேரஸகாதி³ஸம்வண்ணனா ஸமாரத்³தா⁴, தஸ்ஸாபி –

அனாகுலா அஸந்தே³ஹா, பரிபுண்ணவினிச்ச²யா;

அத்த²ப்³யஞ்ஜனஸம்பன்னா, ஹோதி ஸாரத்த²தீ³பனீ.

தேரஸகஸ்ஸாதி தேரஸ ஸிக்கா²பதா³னி பரிமாணானி அஸ்ஸ கண்ட³ஸ்ஸாதி தேரஸகம், தஸ்ஸ தேரஸகஸ்ஸ கண்ட³ஸ்ஸாதி அத்தோ².

234. அனபி⁴ரதோதி அஞ்ஞத்த² கி³ஹிபா⁴வம் பத்த²யமானோ வுச்சதி, இத⁴ பன காமராக³வஸேன உக்கண்டி²ததாய விக்கி²த்தசித்ததாய ஸமன்னாக³தோ அதி⁴ப்பேதோதி ஆஹ விக்கி²த்தசித்தோதிஆதி³.

236-237. ஸஞ்சேதனிகாதி ஏத்த² ஸம்-ஸத்³தோ³ விஜ்ஜமானத்த²தாய ஸாத்த²கோதி த³ஸ்ஸேந்தோ ஆஹ ஸம்விஜ்ஜதி சேதனா அஸ்ஸாதி. தத்த² சேதனாதி வீதிக்கமவஸப்பவத்தா புப்³ப³பா⁴க³சேதனா. அஸ்ஸாதி ஸுக்கவிஸ்ஸட்டி²யா. இமஸ்மிம் விகப்பே இக-ஸத்³த³ஸ்ஸ விஸும் அத்தோ² நத்தீ²தி ஆஹ ஸஞ்சேதனாவ ஸஞ்சேதனிகாதி. இதா³னி ஸம்-ஸத்³த³ஸ்ஸ அத்த²ம் அனபேக்கி²த்வா இக-ஸத்³தோ³வ அஸ்ஸத்தி²அத்த²ம் பகாஸேதீதி த³ஸ்ஸேந்தோ ஸஞ்சேதனா வா அஸ்ஸா அத்தீ²தி ஸஞ்சேதனிகாதி து³தியவிகப்பமாஹ. ஸம்விஜ்ஜதி சேதனா அஸ்ஸாதி பத³பா⁴ஜனே வத்தப்³பே³ ப்³யஞ்ஜனே ஆத³ரம் அகத்வா ஜானந்தோதிஆதி³ வுத்தம். உபக்கமாமீதி ஜானந்தோதி மோசனத்த²ம் உபக்கமாமீதி ஜானந்தோ.

ஆஸயபே⁴த³தோதி பித்தாதி³ஆஸயபே⁴த³தோ. பு³த்³த⁴பச்சேகபு³த்³தா⁴னம்பி ஹி ரஞ்ஞோபி சக்கவத்திஸ்ஸ பித்தஸேம்ஹபுப்³ப³லோஹிதாஸயேஸு சதூஸு அஞ்ஞதரோ ஆஸயோ ஹோதியேவ, மந்த³பஞ்ஞானம் பன சத்தாரோபி ஆஸயா ஹோந்தி. தா⁴துனானத்ததோதி பத²வீதா⁴துஆதீ³னம் சதுன்னம் தா⁴தூனம், சக்கா²தீ³னம் வா அட்டா²ரஸன்னம் தா⁴தூனம், ரஸஸோணிதாதீ³னம் வா தா⁴தூனம் நானத்ததோ.

வத்தி²ஸீஸந்தி வத்தி²புடஸ்ஸ அப்³ப⁴ந்தரே மத்த²கபஸ்ஸம். ‘‘ராக³…பே… அஸக்கோந்தோ’’தி ராக³பரியுட்டா²னம் ஸந்தா⁴ய வுத்தம். ராஜா பன ‘‘ஸம்ப⁴வஸ்ஸ ஸகலகாயோ டா²ன’’ந்தி ஸுதபுப்³ப³த்தா வீமம்ஸனத்த²ம் ஏவமகாஸீதி வத³ந்தி. த³கஸோதந்தி முத்தமக்³க³ம், அங்க³ஜாதப்பதே³ஸந்தி வுத்தம் ஹோதி. த³கஸோதோரோஹணதோ பட்டா²ய பன உபாதி³ன்னதோ வினிமுத்ததாய ஸம்ப⁴வே உதுஸமுட்டா²னமேவ ரூபம் அவஸிஸ்ஸதி, ஸேஸம் திஸமுட்டா²னம் நத்தீ²தி வேதி³தப்³ப³ம். ஆபோதா⁴துயா ஸந்தானவஸேன பவத்தமானாய அவத்தா²விஸேஸோ ஸம்ப⁴வோ, ஸோ சதுஸமுட்டா²னிகோ அட்ட²கதா²யம் சதுஸமுட்டா²னிகேஸு ஸம்ப⁴வஸ்ஸ வுத்தத்தா. ஸோ பன ஸோளஸவஸ்ஸகாலே உப்பஜ்ஜதி, தஸ்ஸ ராக³வஸேன டா²னாசாவனம் ஹோதீதி வத³ந்தி, தஸ்மா யம் வுத்தம் கதா²வத்து²அட்ட²கதா²யம் ‘‘ஸுக்கவிஸ்ஸட்டி² நாம ராக³ஸமுட்டா²னா ஹோதீ’’தி, தம் ஸம்ப⁴வஸ்ஸ டா²னாசாவனம் ஸந்தா⁴ய வுத்தந்தி வேதி³தப்³ப³ம், ந பன ஸம்ப⁴வோ சித்தஸமுட்டா²னோயேவாதி தீ³பேதும், தேனேவ தத்த² விஸ்ஸட்டி²க்³க³ஹணம் கதம். ‘‘கீ²ணாஸவானம் பன ப்³ரஹ்மானஞ்ச ஸம்ப⁴வோ நத்தீ²’’தி ஆசரியத⁴ம்மபாலத்தே²ரேன வுத்தம், தஸ்மா யம் வுத்தம் கதா²வத்து²அட்ட²கதா²யம் (கதா². அட்ட². 307) ‘‘தாஸம் தே³வதானம் ஸுக்கவிஸ்ஸட்டி² நாம நத்தீ²’’தி, தம்பி டா²னாசாவனம் ஸந்தா⁴ய வுத்தந்தி க³ஹேதப்³ப³ம், ந பன தே³வதானம் ஸப்³ப³ஸோ ஸம்ப⁴வஸ்ஸ அபா⁴வம் ஸந்தா⁴ய. ச²ன்னம்பி பன காமாவசரதே³வதானம் காமா பாகதிகாயேவ. மனுஸ்ஸா விய ஹி தே த்³வயம்த்³வயஸமாபத்திவஸேனேவ மேது²னம் படிஸேவந்தி, கேவலம் பன நிஸ்ஸந்தா³பா⁴வோ தேஸம் வத்தப்³போ³. தங்க²ணிகபரிளாஹவூபஸமாவஹம் ஸம்ப²ஸ்ஸஸுக²மேவ ஹி தேஸம் காமகிச்சம். கேசி பன ‘‘சாதுமஹாராஜிகதாவதிம்ஸானம்யேவ த்³வயம்த்³வயஸமாபத்தியா காமகிச்சம் இஜ்ஜ²தி, யாமானம் அஞ்ஞமஞ்ஞம் ஆலிங்க³னமத்தேன, துஸிதானம் ஹத்தா²மஸனமத்தேன, நிம்மானரதீனம் ஹஸிதமத்தேன, பரனிம்மிதவஸவத்தீனம் ஓலோகிதமத்தேன காமகிச்சம் இஜ்ஜ²தீ’’தி வத³ந்தி, தம் அட்ட²கதா²யம் படிக்கி²த்தம் தாதி³ஸஸ்ஸ காமேஸு விரஜ்ஜனஸ்ஸ தேஸு அபா⁴வதோ காமானஞ்ச உத்தருத்தரி பணீததரபணீததமபா⁴வதோ.

ததே²வாதி ‘‘மோசனஸ்ஸாதே³ன நிமித்தே உபக்கமதோ’’திஆதி³ம் அதிதி³ஸதி. ‘‘விஸ்ஸட்டீ²தி டா²னதோ சாவனா வுச்சதீ’’தி வுத்தத்தா த³கஸோதம் ஓதிண்ணமத்தேதி கஸ்மா வுத்தந்தி ஆஹ த³கஸோதோரோஹணஞ்சேத்தா²திஆதி³. ஏத்தா²தி தீஸுபி வாதே³ஸு. அதி⁴வாஸேத்வாதி நிமித்தே உபக்கமித்வா புன விப்படிஸாரே உப்பன்னே அதி⁴வாஸேத்வா. அந்தரா நிவாரேதுந்தி டா²னதோ சுதம் த³கஸோதம் ஓதரிதும் அத³த்வா அந்தரா நிவாரேதும். தேனாஹ – டா²னா சுதஞ்ஹி அவஸ்ஸம் த³கஸோதம் ஓதரதீதி. டா²னாசாவனமத்தேனேவாதி த³கஸோதம் அனோதிண்ணேபீதி அதி⁴ப்பாயோ. ஏத்த² ச ‘‘ஸகலோ காயோ டா²ன’’ந்தி வாதே³ டா²னாசாவனம் வத³ந்தேன ஸகலஸரீரதோ சுதஸ்ஸபி த³கஸோதோரோஹணதோ புப்³பே³ அப்பமத்தகஸ்ஸ அந்தராளஸ்ஸ ஸம்ப⁴வதோ வுத்தம். ஸகலஸரீரே வா தஸ்மிம் தஸ்மிம் பதே³ஸே டி²தஸ்ஸ டா²னா சுதம் ஸந்தா⁴ய ‘‘டா²னாசாவனமத்தேனேவா’’தி வுத்தம். நிமித்தே உபக்கமந்தஸ்ஸேவாதி மோசனஸ்ஸாதே³ன உபக்கமந்தஸ்ஸ. ஹத்த²பரிகம்மாதீ³ஸு ஸதிபி மோசனஸ்ஸாதே³ நிமித்தே உபக்கமாபா⁴வதோ நத்தி² ஆபத்தீதி ஆஹ ‘‘ஹத்தபரிகம்ம…பே… அனாபத்தீ’’தி. அயம் ஸப்³பா³சரியஸாதா⁴ரணவினிச்ச²யோதி ‘‘த³கஸோதோரோஹணஞ்சேத்தா²’’திஆதி³னா வுத்தோ திண்ணம்பி ஆசரியானம் ஸாதா⁴ரணோ வினிச்ச²யோ.

கோ²ப⁴கரணபச்சயோ நாம விஸபா⁴க³பே⁴ஸஜ்ஜஸேனாஸனாஹாராதி³பச்சயோ. அத்த²காமதாய வா அனத்த²காமதாய வாதி பஸன்னா அத்த²காமதாய, குத்³தா⁴ அனத்த²காமதாய. அத்தா²ய வா அனத்தா²ய வாதி ஸபா⁴வதோ ப⁴விதப்³பா³ய அத்தா²ய வா அனத்தா²ய வா. உபஸம்ஹரந்தீதி அத்தனோ தே³வானுபா⁴வேன உபனேந்தி. போ³தி⁴ஸத்தமாதா விய புத்தபடிலாப⁴னிமித்தந்தி ததா³ கிர புரே புண்ணமாய ஸத்தமதி³வஸதோ பட்டா²ய விக³தஸுராபானம் மாலாக³ந்தா⁴தி³விபூ⁴திஸம்பன்னம் நக்க²த்தகீளம் அனுப⁴வமானா போ³தி⁴ஸத்தமாதா ஸத்தமே தி³வஸே பாதோவ உட்டா²ய க³ந்தோ⁴த³கேன ந்ஹாயித்வா ஸப்³பா³லங்காரவிபூ⁴ஸிதா வரபோ⁴ஜனம் பு⁴ஞ்ஜித்வா உபோஸத²ங்கா³னி அதி⁴ட்டா²ய ஸிரிக³ப்³ப⁴ம் பவிஸித்வா ஸிரிஸயனே நிபன்னா நித்³த³ம் ஓக்கமமானா இமம் ஸுபினம் அத்³த³ஸ – சத்தாரோ கிர நம் மஹாராஜானோ ஸயனேனேவ ஸத்³தி⁴ம் உக்கி²பித்வா அனோதத்தத³ஹம் நேத்வா ந்ஹாபேத்வா தி³ப்³ப³வத்த²ம் நிவாஸேத்வா தி³ப்³ப³க³ந்தே⁴ஹி விலிம்பேத்வா தி³ப்³ப³புப்பா²னி பிளந்தி⁴த்வா ததோ அவிதூ³ரே ரஜதபப்³ப³தோ, தஸ்ஸ அந்தோ கனகவிமானம் அத்தி², தஸ்மிம் பாசீனதோ ஸீஸம் கத்வா நிபஜ்ஜாபேஸும். அத² போ³தி⁴ஸத்தோ ஸேதவரவாரணோ ஹுத்வா ததோ அவிதூ³ரே ஏகோ ஸுவண்ணபப்³ப³தோ, தத்த² சரித்வா ததோ ஓருய்ஹ ரஜதபப்³ப³தம் அபி⁴ருஹித்வா கனகவிமானம் பவிஸித்வா மாதரம் பத³க்கி²ணம் கத்வா த³க்கி²ணபஸ்ஸம் பா²லேத்வா குச்சி²ம் பவிட்ட²ஸதி³ஸோ அஹோஸி. இமம் ஸுபினம் ஸந்தா⁴ய ஏதம் வுத்தம் ‘‘போ³தி⁴ஸத்தமாதா விய புத்தபடிலாப⁴னிமித்த’’ந்தி.

பஞ்ச மஹாஸுபினேதி (அ. நி. அட்ட². 3.5.196) மஹந்தேஹி புரிஸேஹி பஸ்ஸிதப்³ப³தோ மஹந்தானஞ்ச அத்தா²னம் நிமித்தபா⁴வதோ மஹாஸுபினே. தே பன பஞ்ச மஹாஸுபினே நேவ லோகியமஹாஜனோ பஸ்ஸதி, ந மஹாராஜானோ, ந சக்கவத்திராஜானோ, ந அக்³க³ஸாவகா, ந பச்சேகபு³த்³தா⁴, ந ஸம்மாஸம்பு³த்³தா⁴, ஏகோ ஸப்³ப³ஞ்ஞுபோ³தி⁴ஸத்தோயேவ பஸ்ஸதி. தேன வுத்தம் ‘‘போ³தி⁴ஸத்தோ விய பஞ்ச மஹாஸுபினே’’தி. அம்ஹாகஞ்ச பன போ³தி⁴ஸத்தோ கதா³ தே ஸுபினே பஸ்ஸீதி? ‘‘ஸ்வே பு³த்³தோ⁴ ப⁴விஸ்ஸாமீ’’தி சாதுத்³த³ஸியம் பக்க²ஸ்ஸ ரத்திவிபா⁴யனகாலே பஸ்ஸி. காலவஸேன ஹி தி³வா தி³ட்டோ² ஸுபினோ ந ஸமேதி, ததா² பட²மயாமே மஜ்ஜி²மயாமே ச. பச்சி²மயாமே ப³லவபச்சூஸே பன அஸிதபீதஸாயிதே ஸம்மாபரிணாமக³தே காயஸ்மிம் ஓஜாய பதிட்டி²தாய அருணே உக்³க³ச்ச²மானே தி³ட்ட²ஸுபினோ ஸமேதி. இட்ட²னிமித்தம் ஸுபினம் பஸ்ஸந்தோ இட்ட²ம் படிலப⁴தி, அனிட்ட²னிமித்தம் பஸ்ஸந்தோ அனிட்ட²ம், தஸ்மா போ³தி⁴ஸத்தோபி ஸுபினம் பஸ்ஸந்தோ ரத்திவிபா⁴யனகாலே பஸ்ஸி.

கே பன தே பஞ்ச மஹாஸுபினாதி? ததா²க³தஸ்ஸ அரஹதோ ஸம்மாஸம்பு³த்³த⁴ஸ்ஸ புப்³பே³வ ஸம்போ³தா⁴ அனபி⁴ஸம்பு³த்³த⁴ஸ்ஸ போ³தி⁴ஸத்தஸ்ஸேவ ஸதோ பஞ்ச மஹாஸுபினா பாதுரஹேஸும் (அ. நி. 5.196) – அயம் மஹாபத²வீ மஹாஸயனம் அஹோஸி, ஹிமவா பப்³ப³தராஜா பி³ம்போ³ஹனம் அஹோஸி, புரத்தி²மே ஸமுத்³தே³ வாமஹத்தோ² ஓஹிதோ அஹோஸி, பச்சி²மே ஸமுத்³தே³ த³க்கி²ணஹத்தோ² ஓஹிதோ அஹோஸி, த³க்கி²ணஸமுத்³தே³ உபோ⁴ பாதா³ ஓஹிதா அஹேஸும், அயம் பட²மோ மஹாஸுபினோ பாதுரஹோஸி.

புன சபரம் த³ப்³ப³திணஸங்கா²தா திரியா நாம திணஜாதி நங்க³லமத்தேன ரத்தத³ண்டே³ன நாபி⁴தோ உக்³க³ந்த்வா தஸ்ஸ பஸ்ஸந்தஸ்ஸேவ வித³த்தி²மத்தம் ரதனமத்தம் ப்³யாமமத்தம் யட்டி²மத்தம் கா³வுதமத்தம் அட்³ட⁴யோஜனமத்தம் யோஜனமத்தந்தி ஏவம் உக்³க³ந்த்வா அனேகயோஜனஸஹஸ்ஸம் நப⁴ம் ஆஹச்ச டி²தா அஹோஸி, அயம் து³தியோ மஹாஸுபினோ பாதுரஹோஸி.

புன சபரம் ஸேதா கிமீ கண்ஹஸீஸா பாதே³ஹி உஸ்ஸக்கித்வா யாவ ஜாணுமண்ட³லா படிச்சா²தே³ஸும், அயம் ததியோ மஹாஸுபினோ பாதுரஹோஸி.

புன சபரம் சத்தாரோ ஸகுணா நானாவண்ணா சதூஹி தி³ஸாஹி ஆக³ந்த்வா பாத³மூலே நிபதித்வா ஸப்³ப³ஸேதா ஸம்பஜ்ஜிம்ஸு, அயம் சதுத்தோ² மஹாஸுபினோ பாதுரஹோஸி.

புன சபரம் போ³தி⁴ஸத்தோ மஹதோ மீள்ஹபப்³ப³தஸ்ஸ உபரூபரி சங்கமதி அலிப்பமானோ மீள்ஹேன, அயம் பஞ்சமோ மஹாஸுபினோ பாதுரஹோஸி. இமே பஞ்ச மஹாஸுபினா.

தத்த² பட²மோ அனுத்தராய ஸம்மாஸம்போ³தி⁴யா புப்³ப³னிமித்தம், து³தியோ அரியஸ்ஸ அட்ட²ங்கி³கஸ்ஸ மக்³க³ஸ்ஸ தே³வமனுஸ்ஸேஸு ஸுப்பகாஸிதபா⁴வஸ்ஸ புப்³ப³னிமித்தம், ததியோ ப³ஹூனம் ஓதா³தவஸனானம் கி³ஹீனம் ப⁴க³வந்தம் உபஸங்கமித்வா ஸரணக³மனஸ்ஸ புப்³ப³னிமித்தம், சதுத்தோ² க²த்தியாதீ³னம் சதுன்னம் வண்ணானம் ததா²க³தப்பவேதி³தே த⁴ம்மவினயே அகா³ரஸ்மா அனகா³ரியம் பப்³ப³ஜித்வா அனுத்தரவிமுத்திஸச்சி²கிரியாய புப்³ப³னிமித்தம், பஞ்சமோ சதுன்னம் பச்சயானம் லாபி⁴தாய தேஸு ச அனுபலித்தபா⁴வஸ்ஸ புப்³ப³னிமித்தம்.

அபிச யம் ஸோ சக்கவாளமஹாபத²விம் ஸிரிஸயனபூ⁴தம் அத்³த³ஸ, தம் பு³த்³த⁴பா⁴வஸ்ஸ புப்³ப³னிமித்தம். யம் ஹிமவந்தம் பப்³ப³தராஜானம் பி³ம்போ³ஹனம் அத்³த³ஸ, தம் ஸப்³ப³ஞ்ஞுதஞ்ஞாணபி³ம்போ³ஹனஸ்ஸ புப்³ப³னிமித்தம். யம் சத்தாரோ ஹத்த²பாதே³ ஸமுத்³த³ஸ்ஸ உபரூபரிபா⁴கே³ன க³ந்த்வா சக்கவாளமத்த²கே டி²தே அத்³த³ஸ, தம் த⁴ம்மசக்கஸ்ஸ அப்படிவத்தியபா⁴வே புப்³ப³னிமித்தம். யம் அத்தானம் உத்தானகம் நிபன்னம் அத்³த³ஸ, தம் தீஸு ப⁴வேஸு அவகுஜ்ஜானம் ஸத்தானம் உத்தானமுக²பா⁴வஸ்ஸ புப்³ப³னிமித்தம். யம் அக்கீ²னி உம்மீலேத்வா பஸ்ஸந்தோ விய அஹோஸி, தம் தி³ப்³ப³சக்கு²படிலாப⁴ஸ்ஸ புப்³ப³னிமித்தம். யம் யாவ ப⁴வக்³கா³ ஏகாலோகம் அஹோஸி, தம் அனாவரணஞாணஸ்ஸ புப்³ப³னிமித்தம். ஸேஸம் வுத்தனயமேவ. இதி தம்தம்விஸேஸாதி⁴க³மனிமித்தபூ⁴தே பஞ்ச மஹாஸுபினே பஸ்ஸி. தேன வுத்தம் ‘‘போ³தி⁴ஸத்தோ விய பஞ்ச மஹாஸுபினே’’தி.

கோஸலராஜா விய ஸோளஸ ஸுபினேதி –

‘‘உஸபா⁴ ருக்கா² கா³வியோ க³வா ச,

அஸ்ஸோ கம்ஸோ ஸிங்கா³லீ ச கும்போ⁴;

போக்க²ரணீ ச அபாகசந்த³னம்,

லாபூ³னி ஸீத³ந்தி ஸிலா ப்லவந்தி.

‘‘மண்டூ³கியோ கண்ஹஸப்பே கி³லந்தி,

காகம் ஸுவண்ணா பரிவாரயந்தி;

தஸா வகா ஏளகானம் ப⁴யா ஹீ’’தி. (ஜா. 1.1.77) –

இமே ஸோளஸ ஸுபினே பஸ்ஸந்தோ கோஸலராஜா விய.

1. ஏகதி³வஸம் கிர கோஸலராஜா ரத்திம் நித்³தூ³பக³தோ பச்சி²மயாமே ஸோளஸ ஸுபினே பஸ்ஸி (ஜா. அட்ட². 1.1.மஹாஸுபினஜாதகவண்ணனா). தத்த² சத்தாரோ அஞ்ஜனவண்ணா காளஉஸபா⁴ ‘‘யுஜ்ஜி²ஸ்ஸாமா’’தி சதூஹி தி³ஸாஹி ராஜங்க³ணம் ஆக³ந்த்வா ‘‘உஸப⁴யுத்³த⁴ம் பஸ்ஸிஸ்ஸாமா’’தி மஹாஜனே ஸன்னிபதிதே யுஜ்ஜ²னாகாரம் த³ஸ்ஸேத்வா நதி³த்வா க³ஜ்ஜித்வா அயுஜ்ஜி²த்வாவ படிக்கந்தா. இமம் பட²மம் ஸுபினம் அத்³த³ஸ.

2. கு²த்³த³கா ருக்கா² சேவ க³ச்சா² ச பத²விம் பி⁴ந்தி³த்வா வித³த்தி²மத்தம்பி ரதனமத்தம்பி அனுக்³க³ந்த்வாவ புப்ப²ந்தி சேவ ப²லந்தி ச. இமம் து³தியம் அத்³த³ஸ.

3. கா³வியோ தத³ஹுஜாதானம் வச்சா²னம் கீ²ரம் பிவந்தியோ அத்³த³ஸ. அயம் ததியோ ஸுபினோ.

4. து⁴ரவாஹே ஆரோஹபரிணாஹஸம்பன்னே மஹாகோ³ணே யுக³பரம்பராய அயோஜேத்வா தருணே கோ³த³ம்மே து⁴ரே யோஜேந்தே அத்³த³ஸ, தே து⁴ரம் வஹிதும் அஸக்கோந்தா ச²ட்³டே³த்வா அட்ட²ம்ஸு, ஸகடானி நப்பவத்திம்ஸு. அயம் சதுத்தோ² ஸுபினோ.

5. ஏகம் உப⁴தோமுக²ம் அஸ்ஸம் அத்³த³ஸ, தஸ்ஸ உபோ⁴ஸு பஸ்ஸேஸு யவஸீஸம் தே³ந்தி, ஸோ த்³வீஹிபி முகே²ஹி கா²த³தி. அயம் பஞ்சமோ ஸுபினோ.

6. மஹாஜனோ ஸதஸஹஸ்ஸக்³க⁴னகம் ஸுவண்ணபாதிம் ஸம்மஜ்ஜித்வா ‘‘இத⁴ பஸ்ஸாவம் கரோஹீ’’தி ஏகஸ்ஸ ஜரஸிங்கா³லஸ்ஸ உபனாமேஸி, தம் தத்த² பஸ்ஸாவம் கரோந்தம் அத்³த³ஸ. அயம் ச²ட்டோ² ஸுபினோ.

7. ஏகோ புரிஸோ ரஜ்ஜும் வட்டேத்வா பாத³மூலே நிக்கி²பதி, தேன நிஸின்னபீட²ஸ்ஸ ஹேட்டா² ஸயிதா சா²தஸிங்கா³லீ தஸ்ஸ அஜானந்தஸ்ஸேவ தம் கா²த³தி. இமம் ஸத்தமம் ஸுபினம் அத்³த³ஸ.

8. ராஜத்³வாரே ப³ஹூஹி துச்ச²கும்பே⁴ஹி பரிவாரேத்வா ட²பிதம் ஏகம் மஹந்தம் பூரிதகும்ப⁴ம் அத்³த³ஸ, சத்தாரோபி பன வண்ணா சதூஹி தி³ஸாஹி சதூஹி அனுதி³ஸாஹி ச க⁴டேஹி உத³கம் ஆஹரித்வா பூரிதகும்ப⁴மேவ பூரேந்தி, பூரிதபூரிதம் உத³கம் உத்தரித்வா பலாயதி, தேபி புனப்புனம் தத்தே²வ உத³கம் ஆஸிஞ்சந்தி, துச்ச²கும்பே⁴ ஓலோகேந்தாபி நத்தி². அயம் அட்ட²மோ ஸுபினோ.

9. ஏகம் பஞ்சபது³மஸஞ்ச²ன்னம் க³ம்பீ⁴ரம் ஸப்³ப³தோதித்த²ம் போக்க²ரணிம் அத்³த³ஸ, ஸமந்ததோ த்³விபத³சதுப்பதா³ ஓதரித்வா தத்த² பானீயம் பிவந்தி, தஸ்ஸா மஜ்ஜே² க³ம்பீ⁴ரட்டா²னே உத³கம் ஆவிலம், தீரப்பதே³ஸே த்³விபத³சதுப்பதா³னம் அக்கமனட்டா²னே அச்ச²ம் விப்பஸன்னம் அனாவிலம். அயம் நவமோ ஸுபினோ.

10. ஏகிஸ்ஸாயேவ ச கும்பி⁴யா பச்சமானம் ஓத³னம் அபாகம் அத்³த³ஸ, ‘‘அபாக’’ந்தி விசாரேத்வா விப⁴ஜித்வா ட²பிதம் விய தீஹாகாரேஹி பச்சமானம் ஏகஸ்மிம் பஸ்ஸே அதிகிலின்னோ ஹோதி, ஏகஸ்மிம் உத்தண்டு³லோ, ஏகஸ்மிம் ஸுபக்கோதி. அயம் த³ஸமோ ஸுபினோ.

11. ஸதஸஹஸ்ஸக்³க⁴னகம் சந்த³னஸாரம் பூதிதக்கேன விக்கிணந்தே அத்³த³ஸ. அயம் ஏகாத³ஸமோ ஸுபினோ.

12. துச்ச²லாபூ³னி உத³கே ஸீத³ந்தானி அத்³த³ஸ. அயம் த்³வாத³ஸமோ ஸுபினோ.

13. மஹந்தமஹந்தா கூடாகா³ரப்பமாணா க⁴னஸிலா நாவா விய உத³கே ப்லவமானா அத்³த³ஸ. அயம் தேரஸமோ ஸுபினோ.

14. கு²த்³த³கமது⁴கபுப்ப²ப்பமாணா மண்டூ³கியோ மஹந்தே கண்ஹஸப்பே வேகே³ன அனுப³ந்தி⁴த்வா உப்பலனாளே விய சி²ந்தி³த்வா மம்ஸம் கா²தி³த்வா கி³லந்தியோ அத்³த³ஸ. அயம் சுத்³த³ஸமோ ஸுபினோ.

15. த³ஸஹி அஸத்³த⁴ம்மேஹி ஸமன்னாக³தம் கா³மகோ³சரம் காகம் கஞ்சனவண்ணவண்ணதாய ‘‘ஸுவண்ணா’’தி லத்³த⁴னாமே ஸுவண்ணராஜஹம்ஸே பரிவாரேந்தே அத்³த³ஸ. அயம் பன்னரஸமோ ஸுபினோ.

16. புப்³பே³ தீ³பினோ ஏளகே கா²த³ந்தி, தே பன ஏளகே தீ³பினோ அனுப³ந்தி⁴த்வா முராமுராதி கா²த³ந்தே அத்³த³ஸ, அத²ஞ்ஞே தஸா வகா ஏளகே தூ³ரதோவ தி³ஸ்வா தஸிதா தாஸப்பத்தா ஹுத்வா ஏளகானம் ப⁴யா பலாயித்வா கு³ம்ப³க³ஹனானி பவிஸித்வா நிலீயிம்ஸு. அயம் ஸோளஸமோ ஸுபினோ.

1. தத்த² அத⁴ம்மிகானம் ராஜூனம் அத⁴ம்மிகானஞ்ச மனுஸ்ஸானம் காலே லோகே விபரிவத்தமானே குஸலே ஓஸன்னே அகுஸலே உஸ்ஸன்னே லோகஸ்ஸ பரிஹீனகாலே தே³வோ ந ஸம்மா வஸ்ஸிஸ்ஸதி, மேக⁴பாதா³ சி²ஜ்ஜிஸ்ஸந்தி, ஸஸ்ஸானி மிலாயிஸ்ஸந்தி, து³ப்³பி⁴க்க²ம் ப⁴விஸ்ஸதி, வஸ்ஸிதுகாமா விய சதூஹி தி³ஸாஹி மேகா⁴ உட்ட²ஹித்வா இத்தி²காஹி ஆதபே பத்த²டானம் வீஹிஆதீ³னம் தேமனப⁴யேன அந்தோ பவேஸிதகாலே புரிஸேஸு குதா³லபிடகே ஆதா³ய ஆளிப³ந்த⁴னத்தா²ய நிக்க²ந்தேஸு வஸ்ஸனாகாரம் த³ஸ்ஸேத்வா க³ஜ்ஜித்வா விஜ்ஜுலதா நிச்சா²ரேத்வா உஸபா⁴ விய அயுஜ்ஜி²த்வா அவஸ்ஸித்வாவ பலாயிஸ்ஸந்தி. அயம் பட²மஸ்ஸ விபாகோ.

2. லோகஸ்ஸ பரிஹீனகாலே மனுஸ்ஸானம் பரித்தாயுககாலே ஸத்தா திப்³ப³ராகா³ ப⁴விஸ்ஸந்தி, அஸம்பத்தவயாவ குமாரியோ புரிஸந்தரம் க³ந்த்வா உதுனியோ சேவ க³ப்³பி⁴னியோ ச ஹுத்வா புத்ததீ⁴தாஹி வட்³டி⁴ஸ்ஸந்தி. கு²த்³த³கருக்கா²னம் புப்ப²ம் விய ஹி தாஸம் உதுனிபா⁴வோ, ப²லம் விய ச புத்ததீ⁴தரோ ப⁴விஸ்ஸந்தி. அயம் து³தியஸ்ஸ விபாகோ.

3. மனுஸ்ஸானம் ஜேட்டா²பசாயிககம்மஸ்ஸ நட்ட²காலே ஸத்தா மாதாபிதூஸு வா ஸஸ்ஸுஸஸுரேஸு வா லஜ்ஜம் அனுபட்ட²பேத்வா ஸயமேவ குடும்ப³ம் ஸம்வித³ஹந்தாவ கா⁴ஸச்சா²த³னமத்தம்பி மஹல்லகானம் தா³துகாமா த³ஸ்ஸந்தி, அதா³துகாமா ந த³ஸ்ஸந்தி, மஹல்லகா அனாதா² ஹுத்வா அஸயம்வஸீ தா³ரகே ஆராதே⁴த்வா ஜீவிஸ்ஸந்தி தத³ஹுஜாதானம் வச்சா²னம் கீ²ரம் பிவந்தியோ மஹாகா³வியோ விய. அயம் ததியஸ்ஸ விபாகோ.

4. அத⁴ம்மிகராஜூனம் காலே அத⁴ம்மிகராஜானோ பண்டி³தானம் பவேணிகுஸலானம் கம்மனித்த²ரணஸமத்தா²னம் மஹாமத்தானம் யஸம் ந த³ஸ்ஸந்தி, த⁴ம்மஸபா⁴யம் வினிச்ச²யட்டா²னேபி பண்டி³தே வோஹாரகுஸலே மஹல்லகே அமச்சே ந ட²பேஸ்ஸந்தி. தப்³பி³பரீதானம் பன தருணதருணானம் யஸம் த³ஸ்ஸந்தி, ததா²ரூபே ஏவ ச வினிச்ச²யட்டா²னே ட²பேஸ்ஸந்தி, தே ராஜகம்மானி சேவ யுத்தாயுத்தஞ்ச அஜானந்தா நேவ தம் யஸம் உக்கி²பிதும் ஸக்கி²ஸ்ஸந்தி, ந ராஜகம்மானி நித்த²ரிதும், தே அஸக்கோந்தா கம்மது⁴ரம் ச²ட்³டே³ஸ்ஸந்தி, மஹல்லகாபி பண்டி³தா அமச்சா யஸம் அலப⁴ந்தா கிச்சானி நித்த²ரிதும் ஸமத்தா²பி ‘‘கிம் அம்ஹாகம் ஏதேஹி, மயம் பா³ஹிரகா ஜாதா, அப்³ப⁴ந்தரிகா தருணதா³ரகா ஜானிஸ்ஸந்தீ’’தி உப்பன்னானி கம்மானி ந கரிஸ்ஸந்தி, ஏவம் ஸப்³ப³தா²பி தேஸம் ராஜூனம் ஹானியேவ ப⁴விஸ்ஸதி, து⁴ரம் வஹிதும் அஸமத்தா²னம் வச்ச²த³ம்மானம் து⁴ரே யோஜிதகாலோ விய, து⁴ரவாஹானஞ்ச மஹாகோ³ணானம் யுக³பரம்பராய அயோஜிதகாலோ விய ப⁴விஸ்ஸதி. அயம் சதுத்த²ஸ்ஸ விபாகோ.

5. அத⁴ம்மிகராஜகாலேயேவ அத⁴ம்மிகபா³லராஜானோ அத⁴ம்மிகே லோலமனுஸ்ஸே வினிச்ச²யே ட²பேஸ்ஸந்தி, தே பாபபுஞ்ஞேஸு அனாத³ரா பா³லா ஸபா⁴யம் நிஸீதி³த்வா வினிச்ச²யம் தே³ந்தா உபி⁴ன்னம்பி அத்த²பச்சத்தி²கானம் ஹத்த²தோ லஞ்ஜம் க³ஹேத்வா கா²தி³ஸ்ஸந்தி அஸ்ஸோ விய த்³வீஹி முகே²ஹி யவஸீஸம். அயம் பஞ்சமஸ்ஸ விபாகோ.

6. அத⁴ம்மிகாயேவ விஜாதிராஜானோ ஜாதிஸம்பன்னானம் குலபுத்தானம் ஆஸங்காய யஸம் ந த³ஸ்ஸந்தி, அகுலீனே வட்³டே⁴ஸ்ஸந்தி, ஏவம் மஹாகுலானி து³க்³க³தானி ப⁴விஸ்ஸந்தி, லாமககுலானி இஸ்ஸரானி. தே ச குலீனா புரிஸா ஜீவிதும் அஸக்கோந்தா ‘‘இமே நிஸ்ஸாய ஜீவிஸ்ஸாமா’’தி அகுலீனானம் தீ⁴தரோ த³ஸ்ஸந்தி, இதி தாஸம் குலதீ⁴தானம் அகுலீனேஹி ஸத்³தி⁴ம் ஸம்வாஸோ ஜரஸிங்கா³லஸ்ஸ ஸுவண்ணபாதியம் பஸ்ஸாவகரணஸதி³ஸோ ப⁴விஸ்ஸதி. அயம் ச²ட்ட²ஸ்ஸ விபாகோ.

7. க³ச்ச²ந்தே க³ச்ச²ந்தே காலே இத்தி²யோ புரிஸலோலா ஸுராலோலா அலங்காரலோலா விஸிகா²லோலா ஆமிஸலோலா ப⁴விஸ்ஸந்தி து³ஸ்ஸீலா து³ராசாரா. தா ஸாமிகேஹி கஸிகோ³ரக்கா²தீ³னி கம்மானி கத்வா கிச்சே²ன கஸிரேன ஸம்ப⁴தம் த⁴னம் ஜாரேஹி ஸத்³தி⁴ம் ஸுரம் பிவந்தியோ மாலாக³ந்த⁴விலேபனம் தா⁴ரயமானா அந்தோகே³ஹே அச்சாயிகம்பி கிச்சம் அனோலோகேத்வா கே³ஹபரிக்கே²பஸ்ஸ உபரிபா⁴கே³னபி சி²த்³த³ட்டா²னேஹிபி ஜாரே உபதா⁴ரயமானா ஸ்வே வபிதப்³ப³யுத்தகம் பீ³ஜம்பி கோட்டேத்வா யாகு³ப⁴த்தக²ஜ்ஜகானி ஸஜ்ஜேத்வா கா²த³மானா விலும்பிஸ்ஸந்தி ஹேட்டா²பீட²கனிபன்னகசா²தகஸிங்கா³லீ விய வட்டேத்வா வட்டேத்வா பாத³மூலே நிக்கி²த்தரஜ்ஜும். அயம் ஸத்தமஸ்ஸ விபாகோ.

8. க³ச்ச²ந்தே க³ச்ச²ந்தே காலே லோகோ பரிஹாயிஸ்ஸதி, ரட்ட²ம் நிரோஜம் ப⁴விஸ்ஸதி, ராஜானோ து³க்³க³தா கபணா ப⁴விஸ்ஸந்தி. யோ இஸ்ஸரோ ப⁴விஸ்ஸதி, தஸ்ஸ ப⁴ண்டா³கா³ரே ஸதஸஹஸ்ஸமத்தா கஹாபணா ப⁴விஸ்ஸந்தி, தே ஏவம் து³க்³க³தா ஸப்³பே³ ஜனபதே³ அத்தனோ கம்மம் காரயிஸ்ஸந்தி, உபத்³து³தா மனுஸ்ஸா ஸகே கம்மந்தே ச²ட்³டே³த்வா ராஜூனம்யேவ அத்தா²ய புப்³ப³ண்ணாபரண்ணானி வபந்தா ரக்க²ந்தா லாயந்தா மத்³த³ந்தா பவேஸேந்தா உச்சு²கே²த்தானி கரோந்தா யந்தானி வாஹேந்தா பா²ணிதாதீ³னி பசந்தா புப்பா²ராமே ப²லாராமே ச கரோந்தா தத்த² தத்த² நிப்ப²ன்னானி புப்ப²ப²லாதீ³னி ஆஹரித்வா ரஞ்ஞோ கோட்டா²கா³ரமேவ பூரேஸ்ஸந்தி, அத்தனோ கே³ஹேஸு துச்ச²கோட்டே² ஓலோகேந்தாபி ந ப⁴விஸ்ஸந்தி, துச்ச²துச்ச²கும்பே⁴ அனோலோகேத்வா பூரிதகும்ப⁴பூரணஸதி³ஸமேவ ப⁴விஸ்ஸதி. அயம் அட்ட²மஸ்ஸ விபாகோ.

9. க³ச்ச²ந்தே க³ச்ச²ந்தே காலே ராஜானோ அத⁴ம்மிகா ப⁴விஸ்ஸந்தி, ச²ந்தா³தி³வஸேன அக³திம் க³ச்ச²ந்தா ரஜ்ஜம் காரேஸ்ஸந்தி, த⁴ம்மேன வினிச்ச²யம் நாம ந த³ஸ்ஸந்தி, லஞ்ஜவித்தகா ப⁴விஸ்ஸந்தி த⁴னலோலா, ரட்ட²வாஸிகேஸு தேஸம் க²ந்திமேத்தானுத்³த³யம் நாம ந ப⁴விஸ்ஸதி, கக்க²ளா ப²ருஸா உச்சு²யந்தே உச்சு²க³ண்டி²கா விய மனுஸ்ஸே பீளேந்தா நானப்பகாரம் ப³லிம் உப்பாதே³த்வா த⁴னம் க³ண்ஹிஸ்ஸந்தி, மனுஸ்ஸா ப³லிபீளிதா கிஞ்சி தா³தும் அஸக்கோந்தா கா³மனிக³மாத³யோ ச²ட்³டே³த்வா பச்சந்தம் க³ந்த்வா வாஸம் கப்பேஸ்ஸந்தி, மஜ்ஜி²மஜனபதோ³ ஸுஞ்ஞோ ப⁴விஸ்ஸதி, பச்சந்தோ க⁴னவாஸோ ஸேய்யதா²பி போக்க²ரணியா மஜ்ஜே² உத³கம் ஆவிலம் பரியந்தே விப்பஸன்னம். அயம் நவமஸ்ஸ விபாகோ.

10. க³ச்ச²ந்தே க³ச்ச²ந்தே காலே ராஜானோ அத⁴ம்மிகா ப⁴விஸ்ஸந்தி, தேஸு அத⁴ம்மிகேஸு ராஜயுத்தாபி ப்³ராஹ்மணக³ஹபதிகாபி நேக³மஜானபதா³பீதி ஸமணப்³ராஹ்மணே உபாதா³ய ஸப்³பே³ மனுஸ்ஸா அத⁴ம்மிகா ப⁴விஸ்ஸந்தி, ததோ தேஸம் ஆரக்க²தே³வதா ப³லிபடிக்³கா³ஹிகதே³வதா ருக்க²தே³வதா ஆகாஸட்ட²கதே³வதாதி ஏவம் தே³வதாபி அத⁴ம்மிகா ப⁴விஸ்ஸந்தி, அத⁴ம்மிகராஜூனம் ரஜ்ஜே வாதா விஸமா க²ரா வாயிஸ்ஸந்தி, தே ஆகாஸட்ட²கவிமானானி கம்பேஸ்ஸந்தி, தேஸு கம்பிதேஸு தே³வதா குபிதா தே³வம் வஸ்ஸிதும் ந த³ஸ்ஸந்தி, வஸ்ஸமானோபி ஸகலரட்டே² ஏகப்பஹாரேனேவ ந வஸ்ஸிஸ்ஸதி, வஸ்ஸமானோபி ஸப்³ப³த்த² கஸிகம்மஸ்ஸ வா வப்பகம்மஸ்ஸ வா உபகாரோ ஹுத்வா ந வஸ்ஸிஸ்ஸதி. யதா² ச ரட்டே², ஏவம் ஜனபதே³பி கா³மேபி ஏகதளாகஸ்ஸரேபி ஏகப்பஹாரேனேவ ந வஸ்ஸிஸ்ஸதி, தளாகஸ்ஸ உபரிபா⁴கே³ வஸ்ஸந்தோ ஹேட்டா²பா⁴கே³ ந வஸ்ஸிஸ்ஸதி, ஹேட்டா² வஸ்ஸந்தோ உபரி ந வஸ்ஸிஸ்ஸதி, ஏகஸ்மிம் பா⁴கே³ ஸஸ்ஸம் அதிவஸ்ஸேன நஸ்ஸிஸ்ஸதி, ஏகஸ்மிம் அவஸ்ஸந்தோ மிலாயிஸ்ஸதி, ஏகஸ்மிம் ஸம்மா வஸ்ஸமானோ ஸம்பாதே³ஸ்ஸதி, ஏவம் ஏகஸ்ஸ ரஞ்ஞோ ரஜ்ஜே வுத்தா ஸஸ்ஸா திப்பகாரா ப⁴விஸ்ஸந்தி ஏககும்பி⁴யா ஓத³னோ விய. அயம் த³ஸமஸ்ஸ விபாகோ.

11. க³ச்ச²ந்தே க³ச்ச²ந்தே காலே ஸாஸனே பரிஹாயந்தே பச்சயலோலா அலஜ்ஜிகா ப³ஹூ பி⁴க்கூ² ப⁴விஸ்ஸந்தி, தே ப⁴க³வதா பச்சயலோலுப்பம் நிம்மதே²த்வா கதி²தத⁴ம்மதே³ஸனம் சீவராதி³சதுபச்சயஹேது பரேஸம் தே³ஸேஸ்ஸந்தி, பச்சயேஹி முச்சி²த்வா நிரத்த²கபக்கே² டி²தா நிப்³பா³னாபி⁴முக²ம் கத்வா தே³ஸேதும் ந ஸக்கி²ஸ்ஸந்தி, கேவலம் ‘‘பத³ப்³யஞ்ஜனஸம்பத்திஞ்சேவ மது⁴ரஸத்³த³ஞ்ச ஸுத்வா மஹக்³கா⁴னி சீவரானி த³ஸ்ஸந்தி’’இச்சேவம் தே³ஸேஸ்ஸந்தி. அபரே அந்தரவீதி²சதுக்கராஜத்³வாராதீ³ஸு நிஸீதி³த்வா கஹாபணஅட்³ட⁴கஹாபணபாத³மாஸகரூபாதீ³னிபி நிஸ்ஸாய தே³ஸேஸ்ஸந்தி. இதி ப⁴க³வதா நிப்³பா³னக்³க⁴னகம் கத்வா தே³ஸிதம் த⁴ம்மம் சதுபச்சயத்தா²ய சேவ கஹாபணஅட்³ட⁴கஹாபணாதி³அத்தா²ய ச விக்கிணித்வா தே³ஸேந்தா ஸதஸஹஸ்ஸக்³க⁴னகம் சந்த³னஸாரம் பூதிதக்கேன விக்கிணந்தா விய ப⁴விஸ்ஸந்தி. அயம் ஏகாத³ஸமஸ்ஸ விபாகோ.

12. அத⁴ம்மிகராஜகாலே லோகே விபரிவத்தந்தேயேவ ராஜானோ ஜாதிஸம்பன்னானம் குலபுத்தானம் யஸம் ந த³ஸ்ஸந்தி, அகுலீனானஞ்ஞேவ த³ஸ்ஸந்தி, தே இஸ்ஸரா ப⁴விஸ்ஸந்தி, இதரே த³லித்³தா³. ராஜஸம்முகே²பி ராஜத்³வாரேபி அமச்சஸம்முகே²பி வினிச்ச²யட்டா²னேபி துச்ச²லாபு³ஸதி³ஸானம் அகுலீனானம்யேவ கதா² ஓஸீதி³த்வா டி²தா விய நிச்சலா ஸுப்பதிட்டி²தா ப⁴விஸ்ஸதி, ஸங்க⁴ஸன்னிபாதேபி ஸங்க⁴கம்மக³ணகம்மட்டா²னேஸு சேவ பத்தசீவரபரிவேணாதி³வினிச்ச²யட்டா²னேஸு ச து³ஸ்ஸீலானம் பாபபுக்³க³லானம்யேவ கதா² நிய்யானிகா ப⁴விஸ்ஸதி, ந லஜ்ஜிபி⁴க்கூ²னந்தி ஏவம் ஸப்³ப³தா²பி துச்ச²லாபூ³னம் ஸீத³னகாலோ விய ப⁴விஸ்ஸதி. அயம் த்³வாத³ஸமஸ்ஸ விபாகோ.

13. தாதி³ஸேயேவ காலே அத⁴ம்மிகராஜானோ அகுலீனானம் யஸம் த³ஸ்ஸந்தி, தே இஸ்ஸரா ப⁴விஸ்ஸந்தி, குலீனா து³க்³க³தா. தேஸு ந கேசி கா³ரவம் கரிஸ்ஸந்தி, இதரேஸுயேவ கரிஸ்ஸந்தி, ராஜஸம்முகே² வா அமச்சஸம்முகே² வா வினிச்ச²யட்டா²னே வா வினிச்ச²யகுஸலானம் க⁴னஸிலாஸதி³ஸானம் குலபுத்தானம் கதா² ந ஓகா³ஹித்வா பதிட்ட²ஹிஸ்ஸதி. தேஸு கதே²ந்தேஸு ‘‘கிம் இமே கதே²ந்தீ’’தி இதரே பரிஹாஸமேவ கரிஸ்ஸந்தி, பி⁴க்கு²ஸன்னிபாதேபி வுத்தப்பகாரேஸு டா²னேஸு நேவ பேஸலே பி⁴க்கூ² க³ருகாதப்³பே³ மஞ்ஞிஸ்ஸந்தி, நாபி நேஸம் கதா² பரியோகா³ஹித்வா பதிட்ட²ஹிஸ்ஸதி, ஸிலானம் ப்லவகாலோ விய ப⁴விஸ்ஸதி. அயம் தேரஸமஸ்ஸ விபாகோ.

14. லோகே பரிஹாயந்தேயேவ மனுஸ்ஸா திப்³ப³ராகா³தி³ஜாதிகா கிலேஸானுவத்தகா ஹுத்வா தருணதருணானம் அத்தனோ ப⁴ரியானம் வஸே வத்திஸ்ஸந்தி, கே³ஹே தா³ஸகம்மகராத³யோபி கோ³மஹிம்ஸாத³யோபி ஹிரஞ்ஞஸுவண்ணம்பி ஸப்³ப³ம் தாஸம்யேவ ஆயத்தம் ப⁴விஸ்ஸதி, ‘‘அஸுகஹிரஞ்ஞஸுவண்ணம் வா பரிச்சே²தா³தி³ஜாதம் வா கஹ’’ந்தி வுத்தே ‘‘யத்த² வா தத்த² வா ஹோது, கிம் துய்ஹிமினா ப்³யாபாரேன, த்வம் மய்ஹம் க⁴ரே ஸந்தம் வா அஸந்தம் வா ஜானிதுகாமோ ஜாதோ’’தி வத்வா நானப்பகாரேஹி அக்கோஸித்வா முக²ஸத்தீஹி கோட்டேத்வா தா³ஸசேடகம் விய வஸே கத்வா அத்தனோ இஸ்ஸரியம் பவத்தேஸ்ஸந்தி, ஏவம் மது⁴கபுப்ப²ப்பமாணமண்டூ³கபோதிகானம் ஆஸீவிஸே கண்ஹஸப்பே கி³லனகாலோ விய ப⁴விஸ்ஸதி. அயம் சுத்³த³ஸமஸ்ஸ விபாகோ.

15. து³ப்³ப³லராஜகாலே ராஜானோ ஹத்தி²ஸிப்பாதீ³ஸு அகுஸலா யுத்³தே⁴ஸு அவிஸாரதா³ ப⁴விஸ்ஸந்தி, தே அத்தனோ ராஜாதி⁴பச்சம் ஆஸங்கமானா ஸமானஜாதிகானம் குலபுத்தானம் இஸ்ஸரியம் அத³த்வா அத்தனோ பாத³மூலிகன்ஹாபககப்பகாதீ³னம் த³ஸ்ஸந்தி, ஜாதிகோ³த்தஸம்பன்னா குலபுத்தா ராஜகுலே பதிட்ட²ம் அலப⁴மானா ஜீவிகம் கப்பேதும் அஸமத்தா² ஹுத்வா இஸ்ஸரியட்டா²னே ஜாதிகோ³த்தஹீனே அகுலீனே உபட்ட²ஹந்தா விசரிஸ்ஸந்தி, ஸுவண்ணராஜஹம்ஸேஹி காகஸ்ஸ பரிவாரிதகாலோ விய ப⁴விஸ்ஸதி. அயம் பன்னரஸமஸ்ஸ விபாகோ.

16. அத⁴ம்மிகராஜகாலேயேவ ச அகுலீனாவ ராஜவல்லபா⁴ இஸ்ஸரா ப⁴விஸ்ஸந்தி, குலீனா அப்பஞ்ஞாதா து³க்³க³தா. தே ராஜவல்லபா⁴ ராஜானம் அத்தனோ கத²ம் கா³ஹாபேத்வா வினிச்ச²யட்டா²னாதீ³ஸு ப³லவந்தோ ஹுத்வா து³ப்³ப³லானம் பவேணிஆக³தானி கே²த்தவத்து²ஆதீ³னி ‘‘அம்ஹாகம் ஸந்தகானி ஏதானீ’’தி அபி⁴யுஞ்ஜித்வா தே ‘‘ந தும்ஹாகம், அம்ஹாக’’ந்தி ஆக³ந்த்வா வினிச்ச²யட்டா²னாதீ³ஸு விவத³ந்தே வேத்தலதாதீ³ஹி பஹாராபேத்வா கீ³வாயம் க³ஹேத்வா அபகட்³டா⁴பேத்வா ‘‘அத்தனோ பமாணம் ந ஜானாத², அம்ஹேஹி ஸத்³தி⁴ம் விவத³த², இதா³னி வோ ரஞ்ஞோ கதே²த்வா ஹத்த²பாத³ச்சே²தா³தீ³னி காரேஸ்ஸாமா’’தி ஸந்தஜ்ஜேஸ்ஸந்தி, தே தேஸம் ப⁴யேன அத்தனோ ஸந்தகானி கே²த்தவத்தூ²னி ‘‘தும்ஹாகம்யேவ தானி, க³ண்ஹதா²’’தி நிய்யாதேத்வா அத்தனோ கே³ஹானி பவிஸித்வா பீ⁴தா நிபஜ்ஜிஸ்ஸந்தி. பாபபி⁴க்கூ²பி பேஸலே பி⁴க்கூ² யதா²ருசி விஹேடே²ஸ்ஸந்தி, பேஸலா பி⁴க்கூ² படிஸரணம் அலப⁴மானா அரஞ்ஞம் பவிஸித்வா க³ஹனட்டா²னேஸு நிலீயிஸ்ஸந்தி, ஏவம் ஹீனஜச்சேஹி சேவ பாபபி⁴க்கூ²ஹி ச உபத்³து³தானம் ஜாதிமந்தகுலபுத்தானஞ்சேவ பேஸலபி⁴க்கூ²னஞ்ச ஏளகானம் ப⁴யேன தஸவகானம் பலாயனகாலோ விய ப⁴விஸ்ஸதி. அயம் ஸோளஸமஸ்ஸ விபாகோ. ஏவம் தஸ்ஸ தஸ்ஸ அத்த²ஸ்ஸ புப்³ப³னிமித்தபூ⁴தே ஸோளஸ ஸுபினே பஸ்ஸி. தேன வுத்தம் – ‘‘கோஸலராஜா விய ஸோளஸ ஸுபினே’’தி. ஏத்த² ச புப்³ப³னிமித்ததோ அத்தனோ அத்தா²னத்த²னிமித்தம் ஸுபினம் பஸ்ஸந்தோ அத்தனோ கம்மானுபா⁴வேன பஸ்ஸதி, கோஸலராஜா விய லோகஸ்ஸ அத்தா²னத்த²னிமித்தம் ஸுபினம் பஸ்ஸந்தோ பன ஸப்³ப³ஸத்தஸாதா⁴ரணகம்மானுபா⁴வேன பஸ்ஸதீதி வேதி³தப்³ப³ம்.

குத்³தா⁴ ஹி தே³வதாதி நாக³மஹாவிஹாரே மஹாதே²ரஸ்ஸ குத்³தா⁴ தே³வதா விய. ரோஹணே கிர நாக³மஹாவிஹாரே மஹாதே²ரோ பி⁴க்கு²ஸங்க⁴ம் அனபலோகேத்வாவ ஏகம் நாக³ருக்க²ம் சி²ந்தா³பேஸி. ருக்கே² அதி⁴வத்தா² தே³வதா தே²ரஸ்ஸ குத்³தா⁴ பட²மமேவ நம் ஸச்சஸுபினேன பலோபே⁴த்வா பச்சா² ‘‘இதோ தே ஸத்ததி³வஸமத்த²கே உபட்டா²கோ ராஜா மரிஸ்ஸதீ’’தி ஸுபினே ஆரோசேஸி. தே²ரோ தம் கத²ம் ஆஹரித்வா ராஜோரோதா⁴னம் ஆசிக்கி². தா ஏகப்பஹாரேனேவ மஹாவிரவம் விரவிம்ஸு. ராஜா ‘‘கிம் ஏத’’ந்தி புச்சி². தா ‘ஏவம் தே²ரேன வுத்த’’ந்தி ஆரோசயிம்ஸு. ராஜா தி³வஸே க³ணாபேத்வா ஸத்தாஹே வீதிவத்தே தே²ரஸ்ஸ ஹத்த²பாதே³ சி²ந்தா³பேஸி. ஏகந்தஸச்சமேவ ஹோதீதி ப²லஸ்ஸ ஸச்சபா⁴வதோ வுத்தம், த³ஸ்ஸனம் பன விபல்லத்த²மேவ. தேனேவ பஹீனவிபல்லாஸா புப்³ப³னிமித்தபூ⁴தம்பி ஸுபினம் ந பஸ்ஸந்தி, த்³வீஹி தீஹி வா காரணேஹி கதா³சி ஸுபினம் பஸ்ஸந்தீதி ஆஹ ‘‘ஸம்ஸக்³க³பே⁴த³தோ’’தி. ‘‘அஸேக்கா² ந பஸ்ஸந்தி பஹீனவிபல்லாஸத்தா’’தி வசனதோ சதுன்னம்பி காரணானம் விபல்லாஸோ ஏவ மூலகாரணந்தி த³ட்ட²ப்³ப³ம்.

தந்தி ஸுபினகாலே பவத்தம் ப⁴வங்க³சித்தம். ரூபனிமித்தாதி³ஆரம்மணந்தி கம்மனிமித்தக³தினிமித்ததோ அஞ்ஞம் ரூபனிமித்தாதி³ஆரம்மணம் ந ஹோதி. ஈதி³ஸானீதி பச்சக்க²தோ அனுபூ⁴தபுப்³ப³பரிகப்பிதரூபாதி³ஆரம்மணானி சேவ ராகா³தி³ஸம்பயுத்தானி ச. ஸப்³போ³ஹாரிகசித்தேனாதி பகதிசித்தேன. த்³வீஹி அந்தேஹி முத்தோதி குஸலாகுஸலஸங்கா²தேஹி த்³வீஹி அந்தேஹி முத்தோ. ஆவஜ்ஜனததா³ரம்மணக்க²ணேதி இத³ம் யாவ ததா³ரம்மணுப்பத்தி, தாவ பவத்தம் சித்தவாரம் ஸந்தா⁴ய வுத்தம். ‘‘ஸுபினேனேவ தி³ட்ட²ம் விய மே, ஸுதம் விய மேதி கத²னகாலே பன அப்³யாகதோயேவ ஆவஜ்ஜனமத்தஸ்ஸேவ உப்பஜ்ஜனதோ’’தி வத³ந்தி. ஏவம் வத³ந்தேஹி பஞ்சத்³வாரே து³தியமோக⁴வாரே விய மனோத்³வாரேபி ஆவஜ்ஜனம் த்³வத்திக்க²த்தும் உப்பஜ்ஜித்வா ஜவனட்டா²னே ட²த்வா ப⁴வங்க³ம் ஓதரதீதி அதி⁴ப்பேதந்தி த³ட்ட²ப்³ப³ம் ஏகசித்தக்க²ணிகஸ்ஸ ஆவஜ்ஜனஸ்ஸ உப்பத்தியம் ‘‘தி³ட்ட²ம் விய மே, ஸுதம் விய மே’’தி கப்பனாய அஸம்ப⁴வதோ.

ஏத்த² ச ‘‘ஸுபினந்தேபி ததா³ரம்மணவசனதோ பச்சுப்பன்னவஸேன வா அதீதவஸேன வா ஸபா⁴வத⁴ம்மாபி ஸுபினந்தே ஆரம்மணம் ஹோந்தீ’’தி வத³ந்தி. ‘‘யதி³பி ஸுபினந்தே விபூ⁴தம் ஹுத்வா உபட்டி²தே ரூபாதி³வத்து²ம்ஹி ததா³ரம்மணம் வுத்தம், ததா²பி ஸுபினந்தே உபட்டி²தனிமித்தஸ்ஸ பரிகப்பவஸேன க³ஹேதப்³ப³தாய து³ப்³ப³லபா⁴வதோ து³ப்³ப³லவத்து²கத்தாதி வுத்த’’ந்தி தீஸுபி க³ண்டி²பதே³ஸு வுத்தம். கேசி பன ‘‘கரஜகாயஸ்ஸ நிருஸ்ஸாஹஸந்தபா⁴வப்பத்திதோ தன்னிஸ்ஸிதம் ஹத³யவத்து² ந ஸுப்பஸன்னம் ஹோதி, ததோ தன்னிஸ்ஸிதாபி சித்துப்பத்தி ந ஸுப்பஸன்னா அஸுப்பஸன்னவட்டினிஸ்ஸிததீ³பப்பபா⁴ விய, தஸ்மா து³ப்³ப³லவத்து²கத்தாதி ஏத்த² து³ப்³ப³லஹத³யவத்து²கத்தா’’தி அத்த²ம் வத³ந்தி, வீமம்ஸித்வா யுத்ததரம் க³ஹேதப்³ப³ம்.

ஸுபினந்தசேதனாதி மனோத்³வாரிகஜவனவஸேன பவத்தா ஸுபினந்தே சேதனா. ஸுபினஞ்ஹி பஸ்ஸந்தோ மனோத்³வாரிகேனேவ ஜவனேன பஸ்ஸதி, ந பஞ்சத்³வாரிகேன. படிபு³ஜ்ஜ²ந்தோ ச மனோத்³வாரிகேனேவ படிபு³ஜ்ஜ²தி, ந பஞ்சத்³வாரிகேன. நித்³தா³யந்தஸ்ஸ ஹி மஹாவட்டிம் ஜாலேத்வா தீ³பே சக்கு²ஸமீபம் உபனீதே பட²மம் சக்கு²த்³வாரிகம் ஆவஜ்ஜனம் ப⁴வங்க³ம் ந ஆவட்டேதி, மனோத்³வாரிகமேவ ஆவட்டேதி, அத² ஜவனம் ஜவித்வா ப⁴வங்க³ம் ஓதரதி. து³தியவாரே சக்கு²த்³வாரிகம் ஆவஜ்ஜனம் ப⁴வங்க³ம் ஆவட்டேதி, ததோ சக்கு²விஞ்ஞாணாதீ³னி ஜவனபரியோஸானானி பவத்தந்தி, தத³னந்தரம் ப⁴வங்க³ம் பவத்ததி. ததியவாரே மனோத்³வாரிகஆவஜ்ஜனேன ப⁴வங்கே³ ஆவட்டிதே மனோத்³வாரிகஜவனம் ஜவதி, தேன சித்தேன ‘‘கிம் அயம் இமஸ்மிம் டா²னே ஆலோகோ’’தி ஜானாதி. ததா² நித்³தா³யந்தஸ்ஸ கண்ணஸமீபே தூரியேஸு பக்³க³ஹிதேஸு கா⁴னஸமீபே ஸுக³ந்தே⁴ஸு வா து³க்³க³ந்தே⁴ஸு வா புப்பே²ஸு உபனீதேஸு முகே² ஸப்பிம்ஹி வா பா²ணிதே வா பக்கி²த்தே பிட்டி²யம் பாணினா பஹாரே தி³ன்னே பட²மம் ஸோதத்³வாரிகாதீ³னி ஆவஜ்ஜனானி ப⁴வங்க³ம் ந ஆவட்டேந்தி, மனோத்³வாரிகமேவ ஆவட்டேதி, அத² ஜவனம் ஜவித்வா ப⁴வங்க³ம் ஓதரதி. து³தியவாரே ஸோதத்³வாரிகாதீ³னி ஆவஜ்ஜனானி ப⁴வங்க³ம் ஆவட்டேந்தி, ததோ ஸோதகா⁴னஜிவ்ஹாகாயவிஞ்ஞாணாதீ³னி ஜவனபரியோஸானானி பவத்தந்தி, தத³னந்தரம் ப⁴வங்க³ம் பவத்ததி. ததியவாரே மனோத்³வாரிகஆவஜ்ஜனேன ப⁴வங்கே³ ஆவட்டிதே மனோத்³வாரிகஜவனம் ஜவதி, தேன சித்தேன ஞத்வா ‘‘கிம் அயம் இமஸ்மிம் டா²னே ஸத்³தோ³, ஸங்க²ஸத்³தோ³ பே⁴ரிஸத்³தோ³’’தி வா ‘‘கிம் அயம் இமஸ்மிம் டா²னே க³ந்தோ⁴, மூலக³ந்தோ⁴ ஸாரக³ந்தோ⁴’’தி வா ‘‘கிம் இத³ம் மய்ஹம் முகே² பக்கி²த்தம், ஸப்பி பா²ணித’’ந்தி வா ‘‘கேனம்ஹி பிட்டி²யம் பஹடோ, அதித²த்³தோ⁴ மே பஹாரோ’’தி வா வத்தா ஹோதி, ஏவம் மனோத்³வாரிகஜவனேனேவ படிபு³ஜ்ஜ²தி, ந பஞ்சத்³வாரிகேன. ஸுபினம்பி தேனேவ பஸ்ஸதி, ந பஞ்சத்³வாரிகேன.

அஸ்ஸாதி அஸ்ஸ ஆபத்தினிகாயஸ்ஸ. நனு ச அயுத்தோயம் நித்³தே³ஸோ ‘‘ஸங்கோ⁴ ஆதி³ம்ஹி சேவ ஸேஸே ச இச்சி²தப்³போ³ அஸ்ஸா’’தி. ந ஹி ஆபத்தினிகாயஸ்ஸ ஆதி³ம்ஹி சேவ ஸேஸே ச ஸங்கோ⁴ இச்சி²தோ, கிஞ்சரஹி வுட்டா²னஸ்ஸாதி இமம் சோத³னம் மனஸி ஸன்னிதா⁴ய யதா² ந விருஜ்ஜ²தி, ததா² அதி⁴ப்பாயம் விவரந்தோ ‘‘கிம் வுத்தம் ஹோதீ’’திஆதி³மாஹ. ஆபத்திதோ வுட்டா²னஸ்ஸ ஆதி³ம்ஹி சேவ ஸேஸே ச இச்சி²தோ ஸங்கோ⁴ ஆபத்தியாவ இச்சி²தோ நாம ஹோதீதி அயமேத்த² அதி⁴ப்பாயோ. ஆபத்திவுட்டா²னந்தி ஆபத்திதோ வுட்டா²னம், அனாபத்திகபா⁴வூபக³மனந்தி அத்தோ². வசனகாரணந்தி ‘‘ஸங்கா⁴தி³ஸேஸோ’’தி ஏவம் வசனே காரணம். ஸமுதா³யே நிருள்ஹோ நிகாய-ஸத்³தோ³ ததே³கதே³ஸே பவத்தமானோபி தாய ஏவ ருள்ஹியா பவத்ததீதி ஆஹ ருளீஸத்³தே³னாதி. அத² வா கிஞ்சி நிமித்தம் க³ஹேத்வா ஸதிபி அஞ்ஞஸ்மிம் தம்னிமித்தயுத்தே கிஸ்மிஞ்சிதே³வ விஸயே ஸம்முதியா சிரகாலதாவஸேன நிமித்தவிரஹேபி பவத்தனிருள்ஹோ ருள்ஹீ நாம. யதா² மஹியம் ஸேதீதி மஹிம்ஸோ, க³ச்ச²தீதி கோ³தி, ஏவம் நிகாய-ஸத்³த³ஸ்ஸபி ருள்ஹிபா⁴வோ வேதி³தப்³போ³. ஏகஸ்மிம்பி விஸிட்டே² ஸதிபி ஸாமஞ்ஞா விய ஸமுதா³யே பவத்தவோஹாரோ அவயவேபி பவத்ததீதி ஆஹ அவயவே ஸமூஹவோஹாரேன வாதி. நவமஸ்ஸ அதி⁴ப்பாயஸ்ஸாதி வீமம்ஸாதி⁴ப்பாயஸ்ஸ.

238-239. லோமா ஏதேஸம் ஸந்தீதி லோமஸா, ப³ஹுலோமாதி வுத்தம் ஹோதி. அரோகோ³ ப⁴விஸ்ஸாமீதி ராக³பரிளாஹவூபஸமதோ நிரோகோ³ ப⁴விஸ்ஸாமி. மோசனேனாதி மோசனத்தா²ய உபக்கமகரணேன. உபக்கமகரணஞ்ஹேத்த² மோசனந்தி அதி⁴ப்பேதம் மோசேதி ஏதேனாதி கத்வா. பீ³ஜம் ப⁴விஸ்ஸதீதி சோளக்³க³ஹணாதி³கம்மம் ஸந்தா⁴ய வுத்தம்.

240. த்³வே ஆபத்திஸஹஸ்ஸானீதி க²ண்ட³சக்காதி³பே⁴த³ம் அனாமஸித்வா வுத்தம், இச்ச²ந்தேன பன க²ண்ட³சக்காதி³பே⁴தே³னபி ஆபத்திக³ணனா காதப்³பா³. மிஸ்ஸகசக்கந்தி உப⁴தோவட்³ட⁴னகம் ஸந்தா⁴ய வுத்தம். ஏத்த² ச நீலஞ்ச பீதகஞ்சாதிஆதி³னா ஏகக்க²ணே அனேகவண்ணானம் மோசனாதி⁴ப்பாயவசனம் யதா²தி⁴ப்பாயேன மோசனம் ப⁴வது வா மா வா, இமினாபி அதி⁴ப்பாயேன உபக்கமித்வா மோசேந்தஸ்ஸ ஆபத்தி ஹோதீதி த³ஸ்ஸனத்த²ம். ந ஹி ஏகஸ்மிம் க²ணே நீலாதீ³னம் ஸப்³பே³ஸம்பி முத்தி ஸம்ப⁴வதி. அஞ்ஞம் வத³தீதி அத்தனோ தோ³ஸம் உஜும் வத்தும் அஸக்கோந்தோ புன புட்டோ² அஞ்ஞம் ப⁴ணதி.

மோசனஸ்ஸாதோ³தி மோசனஸ்ஸ புப்³ப³பா⁴கே³ பவத்தஅஸ்ஸாதோ³. தேனேவ ‘‘மோசேதும் அஸ்ஸாதோ³ மோசனஸ்ஸாதோ³’’தி வுத்தம். கே³ஹஸ்ஸிதபேமந்தி ஏத்த² கே³ஹ-ஸத்³தே³ன கே³ஹே டி²தா மாதுப⁴கி³னீஆத³யோ அஜ்ஜ²த்திகஞாதகா க³ஹிதா. தேஸு மாதுபேமாதி³வஸேன உப்பன்னோ ஸினேஹோ கே³ஹஸ்ஸிதபேமம், அஞ்ஞத்த² பன கே³ஹஸ்ஸிதபேமந்தி பஞ்சகாமகு³ணிகராகோ³ வுச்சதி. ஸம்பயுத்தஅஸ்ஸாத³ஸீஸேனாதி ராக³ஸம்பயுத்தஸுக²வேத³னாமுகே²ன. ஏகேன பதே³னாதி கே³ஹஸ்ஸிதபேம-பதே³ன.

ததே²வாதி மோசனஸ்ஸாத³சேதனாய ஏவ. புப்³ப³பா⁴கே³ மோசனஸ்ஸாத³வஸேன கதப்பயோக³ம் அவிஜஹித்வாவ ஸயிதத்தா ‘‘ஸசே பன…பே… ஸங்கா⁴தி³ஸேஸோ’’தி வுத்தம். புன ஸுத்³த⁴சித்தே உப்பன்னே தஸ்ஸ பயோக³ஸ்ஸ படிப்பஸ்ஸத்³த⁴த்தா ‘‘ஸுத்³த⁴சித்தோ…பே… அனாபத்தீ’’தி வுத்தம். ஜக்³க³னத்தா²யாதி தோ⁴வனத்தா²ய. அனோகாஸந்தி அங்க³ஜாதப்பதே³ஸம்.

263-264. கே³ஹஸ்ஸிதகாமவிதக்கந்தி பஞ்சகாமகு³ணஸன்னிஸ்ஸிதம் காமவிதக்கம். வத்தி²ம் த³ள்ஹம் க³ஹேத்வாதி அங்க³ஜாதஸ்ஸ அக்³கே³ பஸ்ஸாவனிக்³க³மனட்டா²னே சம்மம் த³ள்ஹம் க³ஹேத்வா. நிமித்தே உபக்கமாபா⁴வதோ ‘‘மோசனஸ்ஸாதா³தி⁴ப்பாயஸ்ஸபி முத்தே அனாபத்தீ’’தி வுத்தம்.

265. ‘‘ஏஹி மே த்வம், ஆவுஸோ, ஸாமணேராதி ஆணத்தியா அஞ்ஞேன கதோபி பயோகோ³ அத்தனாவ கதோ நாம ஹோதீதி கத்வா ஆபத்தி வுத்தா. யதி³ பன அனாணத்தோ ஸயமேவ கரோதி, அங்க³பாரிபூரியா அபா⁴வதோ அனாபத்தீ’’தி வத³ந்தி. ஸுத்தஸாமணேரவத்து²ஸ்மிம் அஸுசிம்ஹி முத்தேபி அங்க³ஜாதஸ்ஸ க³ஹணபச்சயா து³க்கடம் வுத்தம், ந பன முத்தபச்சயா.

266. காயத்த²ம்ப⁴னவத்து²ஸ்மிம் சலனவஸேன யதா² அங்க³ஜாதேபி உபக்கமோ ஸம்ப⁴வதி, ததா²பி விஜம்பி⁴தத்தா ஆபத்தி வுத்தா. ‘‘பச்ச²தோ வா’’தி வசனதோ உபோ⁴ஸு பஸ்ஸேஸு கடியம் ஊருப்பதே³ஸோபி க³ஹிதோயேவாதி த³ட்ட²ப்³ப³ம், தஸ்மா உபோ⁴ஸுபி பஸ்ஸேஸு ட²த்வா இமஸ்மிம் ஓகாஸே நிமித்தந்தி உபனிஜ்ஜா²யந்தஸ்ஸபி ஆபத்தியேவ. ‘‘அங்க³ஜாத’’ந்தி வசனதோ நிமித்தந்தி பஸ்ஸாவமக்³கோ³வ வுத்தோ. உம்மீலனனிமீலனவஸேன பன ந காரேதப்³போ³தி உம்மீலனனிமீலனப்பயோக³வஸஏன ஆபத்திபே⁴தோ³ ந காரேதப்³போ³தி அத்தோ². அனேகக்க²த்தும்பி உம்மீலேத்வா நிமீலேத்வா உபனிஜ்ஜா²யந்தஸ்ஸ ஏகமேவ து³க்கடந்தி வுத்தம் ஹோதி. அக்கீ²னி அவிப்ப²ந்தே³த்வா அபி⁴முக²ம் ஸம்பத்தஸ்ஸ மாதுகா³மஸ்ஸ நிமித்தோலோகனேபி ஆபத்தியேவாதி த³ட்ட²ப்³ப³ம். ‘‘தா³ருதீ⁴தலிகலேபசித்தானம் அங்க³ஜாதுபனிஜ்ஜா²னேபி து³க்கட’’ந்தி வத³ந்தி.

267. புப்பா²வலீதி கீளாவிஸேஸஸ்ஸாதி⁴வசனம். தம் கீளந்தா நதீ³ஆதீ³ஸு சி²ன்னதடம் உத³கேன சிக்க²ல்லம் கத்வா தத்த² உபோ⁴ பாதே³ பஸாரேத்வா நிஸின்னா பபதந்தி. ‘‘புப்பா²வலிய’’ந்திபி பாடோ². பவேஸேந்தஸ்ஸாதி த்³விகம்மகத்தா வாலிகம் அங்க³ஜாதந்தி உப⁴யத்தா²பி உபயோக³வசனம் கதம். வாலிகந்தி வாலிகாயாதி அத்தோ². சேதனா, உபக்கமோ, முச்சனந்தி இமானேத்த² தீணி அங்கா³னி வேதி³தப்³பா³னி.

ஸுக்கவிஸ்ஸட்டி²ஸிக்கா²பத³வண்ணனா நிட்டி²தா.