4. சதுத்த²பாராஜிகம்

சதுஸச்சவிதூ³தி சத்தாரி ஸச்சானி ஸமாஹடானி சதுஸச்சம், தம் அவேதி³ படிவிஜ்ஜீ²தி சதுஸச்சவிதூ³. ஸதிபி ஸாவகானம் பச்சேகபு³த்³தா⁴னஞ்ச சதுஸச்சவிது³பா⁴வே அனஞ்ஞபுப்³ப³கத்தா ப⁴க³வதோ சதுஸச்சத³ஸ்ஸனஸ்ஸ தத்த² ச ஸப்³ப³ஞ்ஞுதாய ப³லேஸு ச வஸீபா⁴வஸ்ஸ பத்திதோ பரஸந்தானேஸு பஸாரிதபா⁴வேன பாகடத்தா ச ப⁴க³வாவ விஸேஸேன ‘‘சதுஸச்சவிதூ³’’தி தோ²மனம் அரஹதி.

வக்³கு³முதா³தீரியபி⁴க்கு²வத்து²வண்ணனா

193. அதி⁴ட்டே²மாதி ஸம்வித³ஹாம. தூ³தகம்மந்தி கி³ஹீனம் பண்ணம் வா ஸாஸனம் வா க³ஹேத்வா தத்த² தத்த² க³மனம். இரியாபத²ம் ஸண்ட²பேத்வாதி பதா⁴னானுரூபம் கத்வா. புச்ச²ந்தானம் வாதி ‘‘அய்யா ஸந்தஇரியாபதா² அதிவிய உபஸந்தா, கதரம் விஸேஸமதி⁴க³ச்சி²ம்ஸூ’’தி புச்ச²ந்தானம். அனாக³தஸம்ப³ந்தே⁴ பன அஸதீதி ‘‘பா⁴ஸிதோ ப⁴விஸ்ஸதீ’’தி பாட²ஸேஸம் கத்வா அனாக³தஸம்ப³ந்தே⁴ அஸதி. ‘‘பா⁴ஸிதோ’’தி அதீதவசனம் கத²ம் அனாக³தவசனேன ஸம்ப³ந்த⁴முபக³ச்ச²தீதி ஆஹ ‘‘லக்க²ணம் பன ஸத்³த³ஸத்த²தோ பரியேஸிதப்³ப³’’ந்தி. ஈதி³ஸே ஹி டா²னே ‘‘தா⁴துஸம்ப³ந்தே⁴ பச்சயா’’தி இமினா லக்க²ணேன தா⁴த்வத்த²ஸம்ப³ந்தே⁴ ஸதி அயதா²காலவிஹிதாபி பச்சயா ஸாத⁴வோ ப⁴வந்தீதி ஸத்³த³ஸத்த²விதூ³ வத³ந்தி.

194. வண்ணவாதி இமினா ஸகலஸரீரானுக³தவண்ணஸ்ஸ மனாபதா வுத்தா. பஸன்னமுக²வண்ணாதி இமினா ஸகலஸரீரவண்ணதோபி அதி⁴கதரம் முக²வண்ணஸ்ஸ மனாபதா வுத்தா. விப்பஸன்னச²விவண்ணாதி இமினா பன விஜ்ஜமானஸ்ஸேவ ஸரீரவண்ணஸ்ஸ அதிவிய பஸன்னதா வுத்தா. யஸ்மா இந்த்³ரியானம் ஊனத்தம் வா பூரணத்தம் வா நத்தி², தஸ்மா ‘‘அபி⁴னிவிட்டோ²காஸஸ்ஸ பரிபுண்ணத்தா’’தி வுத்தம். ச²ட்ட²ஸ்ஸ அபி⁴னிவிட்டோ²காஸோ ஹத³யவத்து², பஞ்சபஸாதா³னம் அபி⁴னிவிட்டோ²காஸஸ்ஸ பரிபுண்ணதாவசனேனேவ ஹத³யவத்து²ஆதி³ஸகலஸரீரஸ்ஸ பரிபுண்ணதா த³ஸ்ஸிதாயேவ ஹோதீதி ஆஹ – ‘‘மனச்ச²ட்டா²னம் இந்த்³ரியான’’ந்தி. யதா² தந்தி ஏத்த² தந்தி நிபாதமத்தம். ப⁴ந்தமிக³ப்படிபா⁴கா³தி கத்தப்³பா³கத்தப்³ப³ஸ்ஸ அஜானனதோ ப⁴ந்தமிக³ஸதி³ஸா. சதுசக்கந்தி சதுஇரியாபத²ம். இரியாபதோ² ஹி இத⁴ பவத்தனட்டே²ன ‘‘சக்க’’ந்தி அதி⁴ப்பேதோ. நவத்³வாரந்தி நவஹி வணமுகே²ஹி நவத்³வாரம். து³க்க²ந்தி ஸீஸரோகா³தி³து³க்க²ம். ஸப்³ப³கிச்சேஸூதி பத்தபசனசீவரரஜனயோக³ட்டா²னாதி³கிச்சேஸு. யாபேதுந்தி வஹிதும் பவத்தேதும். தேனாஹ ‘‘க³மேது’’ந்தி.

195. ஸந்தோதி இமினா தேஸம் விஜ்ஜமானதம் த³ஸ்ஸேதி, ஸம்விஜ்ஜமானாதி இமினா பன தேஸம் உபலப்³ப⁴மானதம் த³ஸ்ஸேதி. தேனாஹ – ‘‘அத்தி² சேவ உபலப்³ப⁴ந்தி சா’’தி. உபலப்³ப⁴ந்தீதி தி³ஸ்ஸந்தி, ஞாயந்தீதி அத்தோ². பந்த²தூ³ஹனகம்மந்தி பந்த²கா⁴தனகம்மம். ஹனந்தோதி மாரேந்தோ. கா⁴தேந்தோதி மாராபேந்தோ. அத² வா ஹனந்தோதி ப³ந்த⁴னதாளனாதீ³ஹி ஹிம்ஸந்தோ. கா⁴தேந்தோதி மாரேந்தோ. சி²ந்த³ந்தோதி பரேஸம் ஹத்தா²தீ³னி சி²ந்த³ந்தோ. பசந்தோதி த³ண்டே³ன உப்பீளேந்தோ. பசனஞ்ஹேத்த² த³ஹனம் விபா³த⁴னம் அதி⁴ப்பேதம். பசந்தோதி வா தஜ்ஜேந்தோ தாஸேந்தோ. அத² வா பசந்தோதி கா³மேஸு அக்³கி³பாதனவஸேன கே³ஹாதீ³னி ஜா²பேத்வா தத்த² அஜேளகாதீ³னி பசந்தோ.

யே ஸிக்கா²பதே³ஸு ப³ஹுலகா³ரவா ந ஹோந்தி ஆபத்திவீதிக்கமப³ஹுலா, தே ஸிக்கா²பதே³ஸு அதிப்³ப³கா³ரவா. உத்³த⁴தேதி அகப்பியே கப்பியஸஞ்ஞிதாய கப்பியே அகப்பியஸஞ்ஞிதாய அவஜ்ஜே வஜ்ஜஸஞ்ஞிதாய வஜ்ஜே அவஜ்ஜஸஞ்ஞிதாய ச உத்³த⁴ச்சபகதிகே. உன்னளேதி உக்³க³தனளே, உட்டி²ததுச்ச²மானேதி வுத்தம் ஹோதி. சபலேதி பத்தசீவரமண்ட³னாதி³னா சாபல்லேன யுத்தே. முக²ரேதி முக²க²ரே, க²ரவசனேதி வுத்தம் ஹோதி. விகிண்ணவாசேதி அஸம்யதவசனே தி³வஸம்பி நிரத்த²கவசனப்பலாபினே. முட்டா² நட்டா² ஸதி ஏதேஸந்தி முட்ட²ஸ்ஸதீ, ஸதிவிரஹிதேதி வுத்தம் ஹோதி. அஸம்பஜானேதி நிப்பஞ்ஞே. பாகதிந்த்³ரியேதி ஸம்வராபா⁴வேன கி³ஹிகாலே விய விவடஇந்த்³ரியே. ஆசரியுபஜ்ஜா²யேஹி பரிச்சத்தகேதி த⁴ம்மேன ஆமிஸேன ச அஸங்க³ஹேத்வா ஆசரியுபஜ்ஜா²யேஹி பரிச்சத்தே அனாதே² அப்பதிட்டே². லாப⁴க³ருகேதி பச்சயக³ருகே.

இரியாபத²ஸண்ட²பனாதீ³னீதி ஆதி³-ஸத்³தே³ன பச்சயபடிஸேவனஸாமந்தஜப்பானம் க³ஹணம் வேதி³தப்³ப³ம். மஹானித்³தே³ஸே (மஹானி. 87) ஹி இரியாபத²ஸண்ட²பனபச்சயபடிஸேவனஸாமந்தஜப்பனவஸேன திவித⁴ம் குஹகவத்து² ஆக³தம். தத்த² பாபிச்ச²ஸ்ஸேவ ஸதோ ஸம்பா⁴வனாதி⁴ப்பாயகதேன இரியாபதே²ன விம்ஹாபனம் இரியாபத²ஸண்ட²பனஸங்கா²தம் குஹகவத்து². ததா² சீவராதீ³ஹி நிமந்திதஸ்ஸ தத³த்தி²கஸ்ஸேவ ஸதோ பாபிச்ச²தம் நிஸ்ஸாய படிக்கே²பனேன தே ச க³ஹபதிகே அத்தனி ஸுப்பதிட்டி²தஸத்³தே⁴ ஞத்வா புன தேஸம் ‘‘அஹோ அய்யோ அப்பிச்சோ², ந கிஞ்சி படிக்³க³ண்ஹிதும் இச்ச²தி, ஸுலத்³த⁴ம் வத நோ அஸ்ஸ, ஸசே அப்பமத்தகம்பி கிஞ்சி படிக்³க³ண்ஹேய்யா’’தி நானாவிதே⁴ஹி உபாயேஹி பணீதானி சீவராதீ³னி உபனேந்தானம் தத³னுக்³க³ஹகாமதம்யேவ ஆவிகத்வா படிக்³க³ஹணேன ச ததோ பபு⁴தி அஸீதிஸகடபா⁴ரேஹி உபனாமனஹேதுபூ⁴தம் விம்ஹாபனம் பச்சயபடிஸேவனஸங்கா²தம் குஹகவத்தூ²தி வேதி³தப்³ப³ம். பாபிச்ச²ஸ்ஸேவ பன ஸதோ உத்தரிமனுஸ்ஸத⁴ம்மாதி⁴க³மபரிதீ³பனவாசாய ததா² ததா² விம்ஹாபனம் ஸாமந்தஜப்பனஸங்கா²தம் குஹகவத்தூ²தி வேதி³தப்³ப³ம். சித்தலபப்³ப³தாதி³விஹாரோ லோகஸம்மதஸேனாஸனம் நாம. லோகஸம்மத …பே… உபாயேஹி ஸம்வண்ணியமானகு³ணோதி ஸம்ப³ந்தோ⁴. பரிபாசேதுந்தி பரிணாமேதும். ஸுத்³த⁴சித்தேன அத்தனோ க³ந்த²து⁴ராதி³கம்மம் கத்வா விசரந்தானம் தம்மூலகபச்சயபரிபோ⁴கே³ தோ³ஸாபா⁴வம் த³ஸ்ஸேதும் ‘‘யே பனா’’திஆதி³ வுத்தம். பி⁴க்கா²சாரே அஸம்பஜ்ஜமானேதி கோ³சரகா³மே பி⁴க்கா²ய சரித்வா லபி⁴தப்³ப³பிண்ட³பாதே அஸம்பஜ்ஜந்தே. தே ச வத்தஸீஸேன ஸப்³ப³ம்பேதம் கரோந்தி, ந லாப⁴னிமித்தம். தேன வுத்தம் ‘‘தந்திபவேணிக⁴டனகா ஸாஸனஜோதகா’’தி.

கிச்சே²னாதி ந து³க்கா²ய படிபதா³ய. பு³த்³தா⁴னஞ்ஹி சத்தாரோபி மக்³கா³ ஸுகா²படிபதா³வ ஹோந்தி, பாரமீபூரணகாலே பன ஸராக³தோ³ஸமோஹஸ்ஸேவ ஸதோ ஆக³தானம் யாசகானம் அலங்கதப்படியத்தம் ஸீஸம் கந்தித்வா க³லலோஹிதம் நீஹரித்வா ஸுஅஞ்ஜிதானி அக்கீ²னி உப்பாடேத்வா குலவம்ஸப்பதிட்டா²பகம் புத்தம் மனாபசாரினிம் ப⁴ரியந்தி ஏவமாதீ³னி தே³ந்தஸ்ஸ அஞ்ஞானிபி க²ந்திவாதீ³ஸதி³ஸேஸு அத்தபா⁴வேஸு சே²ஜ்ஜபே⁴ஜ்ஜாதீ³னி பாபுணந்தஸ்ஸ ஆக³மனீயபடிபத³ம் ஸந்தா⁴யேதம் வுத்தம். கஸிரேனாதி தஸ்ஸேவ வேவசனம்.

ஏகஸ்ஸேவ தா³தும் அஸக்குணேய்யதாய க³ருபா⁴வதோ ‘‘க³ருப⁴ண்டா³னீ’’தி வுத்தம், ஸப்³பே³ஸம் பா⁴ஜேத்வாபி க³ஹேதும் அஸக்குணேய்யதாய ‘‘க³ருபரிக்கா²ரானீ’’தி வுத்தம். ஸாதா⁴ரணபரிக்கா²ரபா⁴வேனாதி ஸங்கி⁴கத்தா ஸப்³ப³பி⁴க்கு²ஸாதா⁴ரணபரிக்கா²ரபா⁴வேன. ஸங்க³ண்ஹாதி உபலாபேதீதி இத³ம் அதே²ய்யசித்தம் ஸந்தா⁴ய வுத்தம். தேனேவாஹ – ‘‘ததா²பா⁴வதோ தே²னேத்வா’’தி, அவிஸ்ஸஜ்ஜியஅவேப⁴ங்கி³யபா⁴வதோ தே²னேத்வாதி அத்தோ². க³ருப⁴ண்ட³ஞ்ஹி குலஸங்க³ஹத்தா²ய விஸ்ஸஜ்ஜேந்தோ விப⁴ஜந்தோ ச தஸ்ஸ அவிஸ்ஸஜ்ஜியஅவஏப⁴ங்கி³யபா⁴வம் தே²னேதி. குலதூ³ஸகது³க்கடம் ஆபஜ்ஜதீதி ஏத்த² ‘‘யோ விஸ்ஸஜ்ஜேய்ய, ஆபத்தி து²ல்லச்சயஸ்ஸா’’தி வுத்தத்தா விஸ்ஸஜ்ஜனபச்சயா து²ல்லச்சயேனபி ந முச்சதி.

அஸந்தந்தி அவிஜ்ஜமானம். அபூ⁴தந்தி அனுப்பன்னம். அனுப்பன்னத்தா ஹி தஸ்ஸ தம் அஸந்தந்தி. புரிமஸ்ஸ பச்சி²மம் காரணவசனம். உல்லபதீதி உக்³க³தாயுகோ லபதி. ஸீலஞ்ஹி பி⁴க்கு²னோ ஆயு, தம் தஸ்ஸ ததா²லபனஸமகாலமேவ விக³ச்ச²தி. அஸந்தஸம்பா⁴வனாயாதி அத்தனோ அவிஜ்ஜமானகு³ணேஹி ஸம்பா⁴வனாய. ஏவஞ்ஹி க³ண்ஹதா…பே… தே²னேத்வா க³ஹிதா ஹோந்தீதி ஏத்த² அஸந்தஸம்பா⁴வனாய ரட்ட²பிண்ட³ஸ்ஸ தே²னேத்வா க³ஹிதத்தா லோகுத்தரத⁴ம்மோபி தே²னிதோயேவ ஹோதி. கிதவஸ்ஸேவாதி கிதவஸ்ஸ ஸகுணக்³க³ஹணமிவ. கேராடிகஸ்ஸாதி ஸட²ஸ்ஸ. கோ³த்தம் வுச்சதி ஸாதா⁴ரணனாமம், மத்த-ஸத்³தோ³ லுத்தனித்³தி³ட்டோ², தஸ்மா ஸமணாதி கோ³த்தமத்தம் அனுப⁴வந்தி தா⁴ரேந்தீதி கோ³த்ரபு⁴னோ, நாமமத்தஸமணாதி வுத்தம் ஹோதி.

வக்³கு³முதா³தீரியபி⁴க்கு²வத்து²வண்ணனா நிட்டி²தா.

அதி⁴மானவத்து²வண்ணனா

196. ஹேட்டி²மமக்³கே³ஹி ஞாதமரியாதா³ய ஏவ ஜானனதோ அஞ்ஞா அக்³க³மக்³க³பஞ்ஞா, தஸ்ஸா ப²லபா⁴வதோ அக்³க³ப²லபஞ்ஞா தம்ஸஹக³தா ஸம்மாஸங்கப்பாத³யோ ச அஞ்ஞாதி வுத்தாதி ஆஹ ‘‘அஞ்ஞம் ப்³யாகரிம்ஸூதி அரஹத்தம் ப்³யாகரிம்ஸூ’’தி. அரியஸாவகஸ்ஸ தாவ நுப்பஜ்ஜதீதி பஹீனாதி⁴மானபச்சயத்தா நுப்பஜ்ஜதி. ஸீலவதோபி…பே… நுப்பஜ்ஜதி அகாரகபா⁴வதோ. திலக்க²ணம் ஆரோபேத்வாதி கலாபஸம்மஸனவஸேன திலக்க²ணம் ஆரோபேத்வா. ஆரத்³த⁴விபஸ்ஸகஸ்ஸாதி உத³யப்³ப³யானுபஸ்ஸனாய ஆரத்³த⁴விபஸ்ஸகஸ்ஸ. ஸுத்³த⁴ஸமத²லாபீ⁴ விபஸ்ஸனாய கம்மம் அகத்வாபி கிலேஸஸமுதா³சாரம் அபஸ்ஸந்தோ கேவலம் அஞ்ஞாணப³லேன ‘‘அரியோஹமஸ்மீ’’தி மஞ்ஞதீதி ஆஹ ‘‘ஸுத்³த⁴ஸமத²லாபி⁴ம் வா’’தி. ‘‘அரஹா அஹ’’ந்தி மஞ்ஞதி உச்சவாலங்கவாஸீ மஹானாக³த்தே²ரோ விய.

தலங்க³ரவாஸீ த⁴ம்மதி³ன்னத்தே²ரோ கிர நாம ஏகோ பபி⁴ன்னப்படிஸம்பி⁴தோ³ மஹாகீ²ணாஸவோ மஹதோ பி⁴க்கு²ஸங்க⁴ஸ்ஸ ஓவாத³தா³யகோ அஹோஸி. ஸோ ஏகதி³வஸம் அத்தனோ தி³வாட்டா²னே நிஸீதி³த்வா ‘‘கின்னு கோ² அம்ஹாகம் ஆசரியஸ்ஸ உச்சவாலங்கவாஸீமஹானாக³த்தே²ரஸ்ஸ ஸமணபா⁴வகிச்சம் மத்த²கப்பத்தம், நோ’’தி ஆவஜ்ஜேந்தோ புது²ஜ்ஜனபா⁴வமேவஸ்ஸ தி³ஸ்வா ‘‘மயி அக³ச்ச²ந்தே புது²ஜ்ஜனகாலகிரியமேவ கரிஸ்ஸதீ’’தி ச ஞத்வா இத்³தி⁴யா வேஹாஸம் உப்பதித்வா தி³வாட்டா²னே நிஸின்னஸ்ஸ தே²ரஸ்ஸ ஸமீபே ஓரோஹித்வா வந்தி³த்வா வத்தம் த³ஸ்ஸேத்வா ஏகமந்தம் நிஸீதி³. ‘‘கிம், ஆவுஸோ த⁴ம்மதி³ன்ன, அகாலே ஆக³தோஸீ’’தி ச வுத்தோ ‘‘பஞ்ஹம், ப⁴ந்தே, புச்சி²தும் ஆக³தோம்ஹீ’’தி ஆஹ. ததோ ‘‘புச்சா²வுஸோ, ஜானமானா கத²யிஸ்ஸாமா’’தி வுத்தோ பஞ்ஹஸஹஸ்ஸம் புச்சி². தே²ரோ புச்சி²தம் புச்சி²தம் பஞ்ஹம் அஸஜ்ஜமானோவ கதே²ஸி. ததோ ‘‘அதிதிக்க²ம் வோ, ப⁴ந்தே, ஞாணம், கதா³ தும்ஹேஹி அயம் த⁴ம்மோ அதி⁴க³தோ’’தி வுத்தோ ‘‘இதோ ஸட்டி²வஸ்ஸகாலே, ஆவுஸோ’’தி ஆஹ. ஸமாதி⁴ம்ஹி, ப⁴ந்தே, வளஞ்ஜேதா²தி. ந இத³ம், ஆவுஸோ, பா⁴ரியந்தி. தேன ஹி, ப⁴ந்தே, ஏகம் ஹத்தி²ம் மாபேதா²தி. தே²ரோ ஸப்³ப³ஸேதம் ஹத்தி²ம் மாபேஸி. இதா³னி, ப⁴ந்தே, யதா² அயம் ஹத்தீ² அஞ்ஜிதகண்ணோ பஸாரிதனங்கு³ட்டோ² ஸோண்ட³ம் முகே² பக்கி²பித்வா பே⁴ரவம் கோஞ்சனாத³ம் கரோந்தோ தும்ஹாகம் அபி⁴முக²ம் ஆக³ச்ச²தி, ததா² நம் கரோதா²தி. தே²ரோ ததா² கத்வா வேகே³ன ஆக³ச்ச²தோ ஹத்தி²ஸ்ஸ பே⁴ரவம் ஆகாரம் தி³ஸ்வா உட்டா²ய பலாயிதும் ஆரத்³தோ⁴. தமேனம் கீ²ணாஸவத்தே²ரோ ஹத்த²ம் பஸாரேத்வா சீவரகண்ணே க³ஹேத்வா ‘‘ப⁴ந்தே, கீ²ணாஸவஸ்ஸ ஸாரஜ்ஜம் நாம ஹோதீ’’தி ஆஹ. ஸோ தஸ்மிம் காலே அத்தனோ புது²ஜ்ஜனபா⁴வம் ஞத்வா ‘‘அவஸ்ஸயோ மே, ஆவுஸோ, த⁴ம்மதி³ன்ன ஹோஹீ’’தி வத்வா பாத³மூலே உக்குடிகம் நிஸீதி³. ‘‘ப⁴ந்தே, தும்ஹாகம் அவஸ்ஸயோ ப⁴விஸ்ஸாமிச்சேவாஹம் ஆக³தோ, மா சிந்தயித்தா²’’தி கம்மட்டா²னம் கதே²ஸி. தே²ரோ கம்மட்டா²னம் க³ஹேத்வா சங்கமம் ஓருய்ஹ ததியே பத³வாரே அக்³க³ப²லம் அரஹத்தம் பாபுணி. தே²ரோ கிர தோ³ஸசரிதோ அஹோஸி.

அதி⁴மானவத்து²வண்ணனா நிட்டி²தா.

ஸவிப⁴ங்க³ஸிக்கா²பத³வண்ணனா

197-198. யஸ்மா பனாதிஆதி³ ‘‘அஸந்தம் அபூ⁴தம் அஸம்விஜ்ஜமான’’ந்தி ஏதேஸம் காரணவசனம். தத்த² யந்தி யம் உத்தரிமனுஸ்ஸத⁴ம்மம். அனபி⁴ஜானந்தி அத்தனி அத்தி²பா⁴வம் அஜானந்தோ. ஸமுதா³சரதீதி ‘‘அத்தி² மய்ஹம் ஏஸ த⁴ம்மோ’’தி கதே²தி ஜானாபேதி வா. ‘‘அஸந்தம் அபூ⁴த’’ந்தி இமஸ்ஸ காரணவசனம் ஸந்தானே அனுப்பன்னோதி. ஞாணேன ச அஸச்சி²கதோதி இத³ம் பன ‘‘அஸம்விஜ்ஜமான’’ந்தி ஏதஸ்ஸ காரணவசனம். பகதிமனுஸ்ஸேஹி உத்தரிதரானம் பு³த்³தா⁴தி³உத்தமபுரிஸானம் அதி⁴க³மத⁴ம்மோ உத்தரிமனுஸ்ஸத⁴ம்மோதி ஆஹ ‘‘உத்தரிமனுஸ்ஸான’’ந்திஆதி³. தந்தி உத்தரிமனுஸ்ஸத⁴ம்மம். அத² பத³பா⁴ஜனே ப³ஹுவசனனித்³தே³ஸோ கஸ்மா கதோதி ஆஹ ‘‘பத³பா⁴ஜனே பனா’’திஆதி³. கிஞ்சாபி உத்தரிமனுஸ்ஸத⁴ம்மோ அப்³யாகதோபி ஹோதி, ஆரோக்³யட்டே²ன பன பா³ஹிதிகஸுத்தே விய ‘‘குஸலே த⁴ம்மே’’தி வுத்தம். அஸ்ஸாதி உத்தரிமனுஸ்ஸத⁴ம்மஸ்ஸ. க²ணலயமுஹுத்த-ஸத்³தா³ அஞ்ஞத்த² பி⁴ன்னத்தா²பி ஹோந்தி, இத⁴ பன க²ணபரியாயவஸேனேவ ‘‘தம் க²ணம் தம் லயம் தம் முஹுத்த’’ந்தி பாளியம் வுத்தம்.

அதி⁴க³ந்தப்³ப³தோ அதி⁴க³மோ, ஜா²னாதி³, அதி⁴க³மஸ்ஸ புச்சா² அதி⁴க³மபுச்சா². தேனாஹ ‘‘ஜா²னவிமோக்கா²தீ³ஸூ’’திஆதி³. உபாயபுச்சா²தி அதி⁴க³முபாயபுச்சா². கிந்தீதி கேன பகாரேன, கேன விதி⁴னாதி அத்தோ². கதமேஸம் த்வம் த⁴ம்மானம் லாபீ⁴தி இத³ம் பன புப்³பே³ ‘‘கிம் தே அதி⁴க³த’’ந்தி அனித்³தா⁴ரிதபே⁴தா³ ஜா²னாதி³விஸேஸா புச்சி²தாதி இதா³னி தேஸம் நித்³தா⁴ரேத்வா புச்ச²னாகாரத³ஸ்ஸனம்.

தஸ்மாதி யஸ்மா யதா²வுத்தேஹி ச²ஹாகாரேஹி அதி⁴க³மப்³யாகரணம் ஸோதே⁴தப்³ப³ம், தஸ்மா. ஏத்தாவதாவாதி ஏத்தகேன ப்³யாகரணமத்தேனேவ ந ஸக்காதப்³போ³. ப்³யாகரணஞ்ஹி ஏகச்சஸ்ஸ அயாதா²வதோபி ஹோதீதி. இமேஸு பன ச²ஸு டா²னேஸு ஸோத⁴னத்த²ம் வத்தப்³போ³தி யதா² நாம ஜாதரூபபதிரூபகம்பி ஜாதரூபம் விய கா²யதீதி ஜாதரூபம் நிக⁴ம்ஸனதாபனச்சே²த³னேஹி ஸோதே⁴தப்³ப³ம், ஏவமேவ இமேஸு இதா³னேவ வுத்தேஸு ச²ஸு டா²னேஸு பக்கி²பித்வா ஸோத⁴னத்த²ம் வத்தப்³போ³. விமோக்கா²தீ³ஸூதி ஆதி³-ஸத்³தே³ன ஸமாதி⁴ஸமாபத்திஞாணத³ஸ்ஸனமக்³க³பா⁴வனாப²லஸச்சி²கிரியாதி³ம் ஸங்க³ண்ஹாதி. பாகடோ ஹோதீதி அதி⁴க³தவிஸேஸஸ்ஸ ஸதிஸம்மோஸாபா⁴வதோ. ஸேஸபுச்சா²ஸுபி பாகடோ ஹோதீதி பதே³ ஏஸேவ நயோ.

ஸப்³பே³ஸஞ்ஹி அத்தனா அதி⁴க³தமக்³கே³ன பஹீனகிலேஸா பாகடா ஹோந்தீதி இத³ம் யேபு⁴ய்யவஸேன வுத்தம். கஸ்ஸசி ஹி அத்தனா அதி⁴க³தமக்³க³வஜ்ஜ²கிலேஸேஸு ஸந்தே³ஹோ உப்பஜ்ஜதியேவ மஹானாமஸ்ஸ ஸக்கஸ்ஸ விய. ஸோ ஹி ஸகதா³கா³மீ ஸமானோபி ‘‘தஸ்ஸ மய்ஹம், ப⁴ந்தே, ஏவம் ஹோதி ‘கோ ஸு நாம மே த⁴ம்மோ அஜ்ஜ²த்தம் அப்பஹீனோ, யேன மே ஏகதா³ லோப⁴த⁴ம்மாபி சித்தம் பரியாதா³ய திட்ட²ந்தி, தோ³ஸத⁴ம்மாபி சித்தம் பரியாதா³ய திட்ட²ந்தி, மோஹத⁴ம்மாபி சித்தம் பரியாதா³ய திட்ட²ந்தீ’’’தி (ம. நி. 1.175) ப⁴க³வந்தம் புச்சி². அயம் கிர ராஜா ஸகதா³கா³மிமக்³கே³ன லோப⁴தோ³ஸமோஹா நிரவஸேஸா பஹீயந்தீதி ஸஞ்ஞீ அஹோஸி. கிம் அரியஸாவகஸ்ஸ ஏவம் ஸந்தே³ஹோ உப்பஜ்ஜதீதி? ஆம உப்பஜ்ஜதி. கஸ்மா? பண்ணத்தியம் அகோவித³த்தா. ‘‘அயம் கிலேஸோ அஸுகமக்³க³வஜ்ஜோ²’’தி இமிஸ்ஸா பண்ணத்தியா அகோவித³ஸ்ஸ ஹி அரியஸாவகஸ்ஸ ஏவம் ஹோதி. கிம் தஸ்ஸ பச்சவேக்க²ணா நத்தீ²தி? அத்தி², ஸா பன ந ஸப்³பே³ஸம் பரிபுண்ணா ஹோதி. ஏகோ ஹி பஹீனகிலேஸமேவ பச்சவேக்க²தி, ஏகோ அவஸிட்ட²கிலேஸமேவ, ஏகோ மக்³க³மேவ, ஏகோ ப²லமேவ, ஏகோ நிப்³பா³னமேவ. இமாஸு பன பஞ்சஸு பச்சவேக்க²ணாஸு ஏகம் வா த்³வே வா நோ லத்³து⁴ம் ந வட்டதி. இதி யஸ்ஸ பச்சவேக்க²ணா ந பரிபுண்ணா, தஸ்ஸ மக்³க³வஜ்ஜ²கிலேஸபண்ணத்தியம் அகோவித³த்தா ஏவம் ஹோதி. உக்³க³ஹபரிபுச்சா²குஸலாதி ஸஜ்ஜா²யமக்³க³ஸம்வண்ணனாஸு நிபுணா.

யாய படிபதா³ய யஸ்ஸ அரியமக்³கோ³ ஆக³ச்ச²தி, ஸா புப்³ப³பா⁴க³படிபத்தி ஆக³மனபடிபதா³. ஸோதே⁴தப்³பா³தி ஸுத்³தா⁴ உதா³ஹு ந ஸுத்³தா⁴தி விசாரணவஸேன ஸோதே⁴தப்³பா³. ந ஸுஜ்ஜ²தீதி தத்த² தத்த² பமாத³படிபத்திஸப்³பா⁴வதோ. அபனேதப்³போ³தி அத்தனோ படிஞ்ஞாய அபனேதப்³போ³. ‘‘ஸுஜ்ஜ²தீ’’தி வத்வா ஸுஜ்ஜ²னாகாரம் த³ஸ்ஸேதும் ‘‘தீ³க⁴ரத்த’’ந்திஆதி³ வுத்தம். பஞ்ஞாயதீதி ஏத்தா²பி ‘‘யதீ³’’தி பத³ம் ஆனேத்வா யதி³ ஸோ பி⁴க்கு² தாய படிபதா³ய பஞ்ஞாயதீதி ஸம்ப³ந்தோ⁴. சதூஸு பச்சயேஸு அலக்³க³த்தா ‘‘ஆகாஸே பாணிஸமேன சேதஸா’’தி வுத்தம். வுத்தஸதி³ஸந்தி தஸ்ஸ பி⁴க்கு²னோ ப்³யாகரணம் இமஸ்மிம் ஸுத்தே வுத்தேன ஸதி³ஸம், ஸமந்தி அத்தோ².

கீ²ணாஸவபடிபத்திஸதி³ஸா படிபதா³ ஹோதீதி தீ³க⁴ரத்தம் ஸுவிக்க²ம்பி⁴தகிலேஸத்தா. கீ²ணாஸவஸ்ஸ நாம…பே… ந ஹோதீதி பஹீனவிபல்லாஸத்தா ஜீவிதனிகந்தியா ச அபா⁴வதோ ந ஹோதி. புது²ஜ்ஜனஸ்ஸ பன அப்பஹீனவிபல்லாஸத்தா ஜீவிதனிகந்திஸப்³பா⁴வதோ ச அப்பமத்தகேனபி ஹோதி.

தத்ரிமானி வத்தூ²னி – தீ³க⁴பா⁴ணகஅப⁴யத்தே²ரோ கிர ஏகம் பிண்ட³பாதிகம் பரிக்³க³ஹேதும் அஸக்கோந்தோ த³ஹரஸ்ஸ ஸஞ்ஞம் அதா³ஸி. ஸோ தம் நஹாயமானம் கல்யாணீனதீ³முக²த்³வாரே நிமுஜ்ஜித்வா பாதே³ அக்³க³ஹேஸி. பிண்ட³பாதிகோ ‘‘கும்பீ⁴லோ’’தி ஸஞ்ஞாய மஹாஸத்³த³ம் அகாஸி, ததா³ நம் ‘‘புது²ஜ்ஜனோ’’தி ஜானிம்ஸு. சந்த³முக²திஸ்ஸராஜகாலே பன மஹாவிஹாரே ஸங்க⁴த்தே²ரோ கீ²ணாஸவோ து³ப்³ப³லசக்கு²கோ விஹாரேயேவ அச்ச²தி. தம் ராஜா ‘‘தே²ரம் பரிக்³க³ண்ஹிஸ்ஸாமீ’’தி பி⁴க்கூ²ஸு பி⁴க்கா²சாரம் க³தேஸு அப்பஸத்³தோ³ உபஸங்கமித்வா ஸப்போ விய பாதே³ அக்³க³ஹேஸி. தே²ரோ ஸிலாத²ம்போ⁴ விய நிச்சலோ ஹுத்வா ‘‘கோ ஏத்தா²’’தி ஆஹ. அஹம், ப⁴ந்தே, திஸ்ஸோதி. ஸுக³ந்த⁴ம் வாயஸி நோ திஸ்ஸாதி. ஏவம் கீ²ணாஸவஸ்ஸ ப⁴யம் நாம நத்தி². ஏகச்சோ பன புது²ஜ்ஜனோபி அதிஸூரோ ஹோதி நிப்³ப⁴யோ, ஸோ ரஜனீயேன ஆரம்மணேன பரிக்³க³ண்ஹிதப்³போ³. வஸப⁴ராஜாபி ஹி ஏகம் தே²ரம் பரிக்³க³ண்ஹமானோ க⁴ரே நிஸீதா³பேத்வா தஸ்ஸ ஸந்திகே ப³த³ரஸாளவம் மத்³த³மானோ நிஸீதி³. மஹாதே²ரஸ்ஸ கே²ளோ சலிதோ, தே²ரஸ்ஸ புது²ஜ்ஜனபா⁴வோ ஆவிபூ⁴தோ. கீ²ணாஸவஸ்ஸ ஹி ரஸதண்ஹா நாம ஸுப்பஹீனா, தி³ப்³பே³ஸுபி ரஸேஸு நிகந்தி நாம ந ஹோதி. தஸ்மா இமேஹி உபாயேஹி பரிக்³க³ஹேத்வா ஸசஸ்ஸ ப⁴யம் வா ச²ம்பி⁴தத்தம் வா ரஸதண்ஹா வா உப்பஜ்ஜதி, ‘‘ந த்வம் அரஹா’’தி அபனேதப்³போ³.

அஸந்தகு³ணஸம்பா⁴வனலக்க²ணா பாபிச்சா²தி ஆஹ – ‘‘யா ஸா இதே⁴கச்சோ…பே… ஆதி³னா நயேனா’’தி. ஆதி³-ஸத்³தே³ன ‘‘அஸ்ஸத்³தோ⁴ ஸமானோ ‘ஸத்³தோ⁴தி மம் ஜனோ ஜானாதூ’தி இச்ச²தி, அப்பஸ்ஸுதோவ ஸமானோ ‘ப³ஹுஸ்ஸுதோதி மம் ஜனோ ஜானாதூ’தி இச்ச²தி, ஸங்க³ணிகாராமோவ ஸமானோ ‘பவிவித்தோதி மம் ஜனோ ஜானாதூ’தி இச்ச²தி, குஸீதோவ ஸமானோ ‘ஆரத்³த⁴வீரியோதி மம் ஜனோ ஜானாதூ’தி இச்ச²தி, முட்ட²ஸ்ஸதீவ ஸமானோ ‘உபட்டி²தஸ்ஸதீதி மம் ஜனோ ஜானாதூ’தி இச்ச²தி, அஸமாஹிதோவ ஸமானோ ‘ஸமாஹிதோதி மம் ஜனோ ஜானாதூ’தி இச்ச²தி, து³ப்பஞ்ஞோவ ஸமானோ ‘பஞ்ஞவாதி மம் ஜனோ ஜானாதூ’தி இச்ச²தி, அகீ²ணாஸவோவ ஸமானோ ‘கீ²ணாஸவோதி மம் ஜனோ ஜானாதூ’தி இச்ச²தி, யா ஏவரூபா இச்சா² இச்சா²க³தா பாபிச்ச²தா ராகோ³ ஸாராகோ³ சித்தஸ்ஸ ஸாராகோ³, அயம் வுச்சதி பாபிச்ச²தா’’தி (விப⁴. 851) ஏவம் வுத்தம் பாளிபதே³ஸம் ஸங்க³ண்ஹாதி. பாபிகாயாதி லாமிகாய இச்சா²ய. அபகதோதி பாபிகாய இச்சா²ய ஸம்மாஆஜீவதோ அபேதோ கதோதி இச்சா²ய அபகதோ. ததா²பூ⁴தோ ச மிச்சா²ஜீவேன அபி⁴பூ⁴தோ பராஜிதோ நாம ஹோதீதி ஆஹ ‘‘அபி⁴பூ⁴தோ பராஜிதோ’’தி.

ஸாமஞ்ஞம் து³ப்பராமட்ட²ம் நிரயாயுபகட்³ட⁴தீதி யதா² குஸோ யேன து³க்³க³ஹிதோ, தஸ்ஸ ஹத்த²ம் அனுகந்ததி பா²லேதி, ஏவமேவ ஸமணத⁴ம்மஸங்கா²தம் ஸாமஞ்ஞம்பி க²ண்ட³ஸீலாதி³தாய து³ப்பராமட்ட²ம் நிரயாய உபகட்³ட⁴தி, நிரயே நிப்³ப³த்தாபேதீதி அத்தோ². ஸிதி²லோதி ஓலீயித்வா கரணேன ஸிதி²லக்³கா³ஹேன கதோ. பரிப்³பா³ஜோதி க²ண்டா³தி³பா⁴வப்பத்தோ ஸமணத⁴ம்மோ. பி⁴ய்யோ ஆகிரதே ரஜந்தி அப்³ப⁴ந்தரே விஜ்ஜமானம் ராக³ரஜாதி³ம் ஏவரூபோ ஸமணத⁴ம்மோ அபனேதும் ந ஸக்கோதி, அத² கோ² தஸ்ஸ உபரி அபரம்பி ராக³ரஜாதி³ம் ஆகிரதீதி அத்தோ². பி⁴க்கு²பா⁴வோதி பாராஜிகம் ஆபஜ்ஜித்வா ‘‘ஸமணோ அஹ’’ந்தி படிஜானனதோ வோஹாரமத்தஸித்³தோ⁴ பி⁴க்கு²பா⁴வோ. அஜானமேவாதி பாடே² ஏவாதி அவதா⁴ரணத்தே² நிபாதோ. அஜானமேவந்தி பாடே² பன ஏவம் ஜானாமி ஏவம் பஸ்ஸாமீதி அவசந்தி யோஜேதப்³ப³ம்.

பத³பா⁴ஜனீயவண்ணனா

199. அஸுப⁴ஜ்ஜா²னாதீ³னீதி ஆதி³-ஸத்³தே³ன காயக³தாஸதிஜ்ஜா²னஞ்ச கஸிணஜ்ஜா²னஞ்ச ஸங்க³ண்ஹாதி. தேன ‘‘காயக³தாஸதிஜ்ஜா²னம் பத²வீகஸிணஜ்ஜா²னம் ஸமாபஜ்ஜி’’ந்திஆதி³ம் வத³ந்தோபி பாராஜிகோவ ஹோதீதி வேதி³தப்³ப³ம். விமோக்கோ²தி ஏத்த² வி-ஸத்³தோ³ விஸேஸத்தோ² விவித⁴த்தோ² வாதி த³ஸ்ஸேந்தோ ஆஹ ‘‘ஸுட்டு² முத்தோ’’திஆதி³. விமோக்கோ²தி சத்தாரோ அரியமக்³கா³. தஸ்ஸ ஸகு³ணதோ ஸுஞ்ஞதாதி³னாமலாப⁴ம் த³ஸ்ஸேந்தோ ஆஹ ‘‘ஸோ பனாய’’ ந்திஆதி³. மக்³கோ³ ஹி நாம பஞ்சஹி காரணேஹி நாமம் லப⁴தி ஸரஸேன வா பச்சனீகேன வா ஸகு³ணேன வா ஆரம்மணேன வா ஆக³மனேன வா. ஸசே ஹி ஸங்கா²ருபேக்கா² அனிச்சதோ ஸங்கா²ரே ஸம்மஸித்வா வுட்டா²தி, அனிமித்தவிமோக்கே²ன விமுச்சதி, ஸசே து³க்க²தோ ஸம்மஸித்வா வுட்டா²தி, அப்பணிஹிதவிமோக்கே²ன விமுச்சதி, ஸசே அனத்ததோ ஸம்மஸித்வா வுட்டா²தி, ஸுஞ்ஞதவிமோக்கே²ன விமுச்சதி, இத³ம் ஸரஸதோ நாமம் நாம. யஸ்மா பனேஸ அனிச்சானுபஸ்ஸனாய ஸங்கா²ரானம் க⁴னவினிப்³போ⁴க³ம் கத்வா நிச்சனிமித்தது⁴வனிமித்தஸஸ்ஸதனிமித்தானி பஜஹந்தோ ஆக³தோ, தஸ்மா அனிமித்தோ. து³க்கா²னுபஸ்ஸனாய பன ஸுக²ஸஞ்ஞம் பஹாய பணிதி⁴ம் பத்த²னம் ஸுக்கா²பேத்வா ஆக³தத்தா அப்பணிஹிதோ. அனத்தானுபஸ்ஸனாய அத்தஸத்தபுக்³க³லஸஞ்ஞம் பஹாய ஸங்கா²ரானம் ஸுஞ்ஞதோ தி³ட்ட²த்தா ஸுஞ்ஞதோதி இத³ம் பச்சனீகதோ நாமம் நாம.

ராகா³தீ³ஹி பனேஸ ஸுஞ்ஞதத்தா ஸுஞ்ஞதோ. ரூபனிமித்தாதீ³னம் ராக³னிமித்தாதீ³னம்யேவ வா அபா⁴வேன அனிமித்தோ. ராகா³தி³பணிதி⁴ஆதீ³னம் அபா⁴வதோ அப்பணிஹிதோதி இத³மஸ்ஸ ஸகு³ணதோ நாமம். ஸ்வாயம் ஸுஞ்ஞதம் அனிமித்தம் அப்பணிஹிதஞ்ச நிப்³பா³னம் ஆரம்மணம் கரோதீதி ஸுஞ்ஞதோ அனிமித்தோ அப்பணிஹிதோதி வுச்சதி, இத³மஸ்ஸ ஆரம்மணதோ நாமம். ஆக³மனம் பன து³வித⁴ம் விபஸ்ஸனாக³மனம் மக்³கா³க³மனஞ்ச. தத்த² மக்³கே³ விபஸ்ஸனாக³மனம் லப்³ப⁴தி, ப²லே மக்³கா³க³மனம். அனத்தானுபஸ்ஸனா ஹி ஸுஞ்ஞதா நாம, ஸுஞ்ஞதவிபஸ்ஸனாய மக்³கோ³ ஸுஞ்ஞதோ. அனிச்சானுபஸ்ஸனா அனிமித்தா நாம, அனிமித்தவிபஸ்ஸனாய மக்³கோ³ அனிமித்தோ. இத³ம் பன நாமம் ந அபி⁴த⁴ம்மபரியாயேன லப்³ப⁴தி. ததா² ஹி தம் ஸங்கா²ரனிமித்தஸ்ஸ அவிஜஹனதோ ந நிப்பரியாயேன அனிமித்தம், ஸுத்தந்தபரியாயேன பன லப்³ப⁴தி. தத்ர ஹி கோ³த்ரபு⁴ஞாணம் அனிமித்தம் நிப்³பா³னம் ஆரம்மணம் கத்வா அனிமித்தனாமகம் ஹுத்வா ஸயம் ஆக³மனியட்டா²னே ட²த்வா மக்³க³ஸ்ஸ நாமம் தே³தீதி வத³ந்தி, தேன மக்³கோ³ அனிமித்தோதி வுத்தோ. மக்³கா³க³மனேன பன ப²லம் அனிமித்தந்தி யுஜ்ஜதியேவ. து³க்கா²னுபஸ்ஸனா ஸங்கா²ரேஸு பணிதி⁴ம் ஸுக்கா²பேத்வா ஆக³தத்தா அப்பணிஹிதா நாம, அப்பணிஹிதவிபஸ்ஸனாய மக்³கோ³ அப்பணிஹிதோ, அப்பணிஹிதமக்³க³ஸ்ஸ ப²லம் அப்பணிஹிதம். ஏவம் விபஸ்ஸனா அத்தனோ நாமம் மக்³க³ஸ்ஸ தே³தி, மக்³கோ³ ப²லஸ்ஸாதி இத³ம் ஆக³மனதோ நாமம். ஸுஞ்ஞத்தாதி விவித்தத்தா. ந ஹி மக்³கே³ ராகா³த³யோ ஸந்தி, உபரூபரி உப்பஜ்ஜனகராகா³தீ³னம் காரணத்தா ராகா³த³யோ நிமித்தந்தி ஆஹ ‘‘ராக³தோ³ஸமோஹனிமித்தேஹீ’’தி. ஸவிக்³க³ஹானம் விய உபட்டா²னம்பேத்த² நிமித்தந்தி வத³ந்தி. ராகா³த³யோவ பவத்திட்டா²னட்டே²ன பணிதீ⁴தி ஆஹ ‘‘ராக³தோ³ஸமோஹபணிதீ⁴ன’’ந்தி.

வத்து²விஜ்ஜாதி³ம் ஸந்தா⁴ய அவசனதோ ‘‘விஜ்ஜானம் லாபீ⁴ம்ஹீ’’தி வுத்தேபி ஹோதி. ஏகேககோட்டா²ஸவஸேனாதி ஸதிபட்டா²னசதுக்காதி³ஏகேககோட்டா²ஸவஸேன. கிஞ்சாபி மஹாஅட்ட²கதா²யம்பி ஏகேககோட்டா²ஸவஸேனேவ த³ஸ்ஸிதம், தத்த² பன ‘‘லோகுத்தரானம் ஸதிபட்டா²னான’’ந்திஆதி³னா பச்சேகம் லோகுத்தர-ஸத்³த³ம் யோஜேத்வா ஏகேககோட்டா²ஸவஸேனேவ வுத்தம், இத⁴ லோகுத்தர-ஸத்³தே³ன வினாதி அயமேத்த² விஸேஸோ. தத்தா²தி தேஸு கோட்டா²ஸேஸு.

நனு ச ‘‘கிலேஸப்பஹானமேவா’’தி கஸ்மா வுத்தம். ந ஹி கிலேஸானம் பஹானமத்தம் உத்தரிமனுஸ்ஸத⁴ம்மோ ஹோதீதி யோ வதே³ய்ய, தம் ஸந்தா⁴ய கிலேஸப்பஹானஸ்ஸ மக்³க³கிச்சத்தா கிச்சவஸேன மக்³கோ³ தீ³பிதோதி த³ஸ்ஸேதும் ‘‘தம் பனா’’திஆதி³ வுத்தம். காமராக³ம் ஸந்தா⁴ய ‘‘ததியமக்³கே³ன ஹி ராக³தோ³ஸானம் பஹான’’ந்தி வுத்தம், ந பன ரூபராக³அரூபராகே³ ஸந்தா⁴ய. ந ஹி தே தேன பஹீயந்தி சதுத்த²மக்³கே³ன பஹாதப்³ப³த்தா.

ராகா³ சித்தம் வினீவரணதாதி ராகா³ சித்தஸ்ஸ வினீவரணதாதி வுத்தம் ஹோதி. ராகா³ விமுத்தஸ்ஸ சித்தஸ்ஸ தஸ்ஸேவ ராக³னீவரணஸ்ஸ அபா⁴வேன விக³தனீவரணத்தா வினீவரணதாதி அத்தோ² வேதி³தப்³போ³. ஏஸ நயோ ஸேஸேஸுபி.

யா ச பஞ்ச விஜ்ஜாதி யோஜேதப்³ப³ம். நிப்³ப³ட்டிதலோகுத்தரத்தாதி விஸும்யேவ லோகதோ அபக³தலோகுத்தரத்தா. யதா² வினா லோகுத்தர-ஸத்³தே³ன ‘‘ஸதிபட்டா²னாதீ³னம் லாபீ⁴ம்ஹீ’’தி வுத்தேபி பாராஜிகம் ஹோதி, ஏவமிதா⁴பி ‘‘அத்த²படிஸம்பி⁴தா³ய லாபீ⁴ம்ஹீதி வுத்தேபி ஹோதியேவா’’தி வத்தும் யுஜ்ஜதி. கிஞ்சாபி யுஜ்ஜதி, அத² கோ² மஹாஅட்ட²கதா²யம் விபா⁴கே³ன வுத்தத்தா ந ஸக்கா ஏவமித³ம் வத்துந்தி த³ஸ்ஸேதும் ‘‘மஹாஅட்ட²கதா²யம் பன…பே… ந ஸக்கா அஞ்ஞம் பமாணம் காது’’ந்தி வுத்தம். தம்பி தத்தே²வ படிக்கி²த்தந்தி ஸம்ப³ந்தோ⁴.

ஸுத்³தி⁴கவாரகதா²வண்ணனா

200. உல்லபனாகாரந்தி ஸமாபஜ்ஜிந்திஆதி³உல்லபனாகாரம். ஆபத்திபே⁴த³ந்தி ‘‘ந படிவிஜானந்தஸ்ஸ ஆபத்தி து²ல்லச்சயஸ்ஸா’’திஆதி³ஆபத்திபே⁴த³ம். புன ஆனேத்வா பட²மஜ்ஜா²னாதீ³ஹி ந யோஜிதந்தி ஏத்த² ‘‘பட²மஜ்ஜா²னேனா’’தி பாடோ²தி க³ண்டி²பதே³ வுத்தம், ததே³வ யுத்தம்.

கத்துஸாத⁴னோபி ப⁴ணித-ஸத்³தோ³ ஹோதீதி ஆஹ ‘‘அத² வா’’திஆதி³. யேன சித்தேன முஸா ப⁴ணதி, தேனேவ சித்தேன ந ஸக்கா ‘‘முஸா ப⁴ணாமீ’’தி ஜானிதும், அந்தரந்தரா பன அஞ்ஞேன சித்தேன ‘‘முஸா ப⁴ணாமீ’’தி ஜானாதீதி வுத்தம் ‘‘ப⁴ணந்தஸ்ஸ ஹோதி முஸா ப⁴ணாமீ’’தி. அயமேத்த² அத்தோ² த³ஸ்ஸிதோதி தீஹி அங்கே³ஹி ஸமன்னாக³தோ முஸாவாதோ³தி அயமேத்த² அத்தோ² த³ஸ்ஸிதோ. ந ஸக்கா ந ப⁴விதுந்தி புப்³ப³பா⁴க³தோ பட்டா²ய ஆபோ⁴க³ம் கத்வா ப⁴ணிதத்தா ந ஸக்கா ந ப⁴விதும். ஆபத்தியா ந காரேதப்³போ³தி புப்³ப³பா⁴க³க்க²ணே ‘‘முஸா ப⁴ணிஸ்ஸாமீ’’தி ஆபோ⁴க³ம் வினா ஸஹஸா ப⁴ணந்தஸ்ஸ வசனக்க²ணே ‘‘முஸா ஏத’’ந்தி உபட்டி²தேபி நிவத்தேதுமஸக்குணேய்யதாய அவிஸயபா⁴வதோ ஆபத்தியா ந காரேதப்³போ³. த³வாதி ஸஹஸா. ரவாதி அஞ்ஞம் வத்துகாமஸ்ஸ க²லித்வா அஞ்ஞப⁴ணனம்.

தம் ஜானாதீதி தம்ஞாணம், தஸ்ஸ பா⁴வோ தம்ஞாணதா, ஞாணஸ்ஸ அத்த²ஸம்வேத³னந்தி அத்தோ². ஞாணஸமோதா⁴னந்தி ஞாணஸ்ஸ ப³ஹுபா⁴வோ, ஏகசித்துப்பாதே³ அனேகஞாணதாதி அத்தோ². ந ஹி ஸக்கா…பே… ஜானிதுந்தி ஆரம்மணகரணஸ்ஸ அபா⁴வதோ வுத்தம். அஸம்மோஹாவபோ³தோ⁴ ச ஈதி³ஸஸ்ஸ ஞாணஸ்ஸ நத்தி², ‘‘ப⁴ணிஸ்ஸாமீ’’தி பவத்தசித்தம் ‘‘ப⁴ணாமீ’’தி பவத்தசித்தஸ்ஸ பச்சயோ ஹுத்வா நிருஜ்ஜ²தி, தஞ்ச ‘‘ப⁴ணித’’ந்தி பவத்தசித்தஸ்ஸ பச்சயோ ஹுத்வாதி ஆஹ – ‘‘புரிமம் புரிமம் பன…பே… நிருஜ்ஜ²தீ’’தி. தஸ்மிம் புப்³ப³பா⁴கே³ ஸதி ‘‘ஸேஸத்³வயம் ந ஹேஸ்ஸதீ’’தி ஏதம் நத்தி², அவஸ்ஸம் ஹோதியேவாதி வுத்தம் ஹோதி, ப⁴ணிஸ்ஸாமீதி புப்³ப³பா⁴கே³ ஸதி ‘‘ப⁴ணாமி ப⁴ணித’’ந்தி ஏதம் த்³வயம் ந ந ஹோதி, ஹோதியேவாதி அதி⁴ப்பாயோ. ஏகம் விய பகாஸதீதி அனேகக்க²ணே உப்பன்னம்பி சித்தம் ஏகக்க²ணே உப்பன்னஸதி³ஸம் ஹுத்வா பகாஸதி. ஸமாபஜ்ஜிந்திஆதீ³னீதி ஆதி³-ஸத்³தே³ன ஸமாபஜ்ஜாமி, ஸமாபன்னோதி இமானி த்³வே ஸங்க³ண்ஹாதி. தத்த² ஸமாபஜ்ஜிம், ஸமாபன்னோதி இமேஸம் அஸதிபி காலனானத்தே வசனவிஸேஸம் ஸந்தா⁴ய விஸும் க³ஹணம்.

207. ஸகபா⁴வபரிச்சஜனவஸேனாதி அத்தனோ ஸந்தகபா⁴வஸ்ஸ பரிச்சஜனவஸேன. மக்³கு³ப்பத்திதோ புப்³பே³ விய ‘‘ஸராகோ³ ஸதோ³ஸோ’’தி வத்தப்³ப³தாபா⁴வதோ சத்தம்பி கேசி க³ண்ஹந்தி, நயித³மேவந்தி த³ஸ்ஸனத்த²ம் ‘‘வந்தோ’’தி வுத்தம். ந ஹி யம் யேன வந்தம், ஸோ புன தம் ஆதி³யதி. தேனாஹ ‘‘அனாதி³யனபா⁴வத³ஸ்ஸனவஸேனா’’தி. வந்தம்பி கிஞ்சி ஸந்ததிலக்³க³ம் ஸியா, நயித³மேவந்தி த³ஸ்ஸனத்த²ம் ‘‘முத்தோ’’தி வுத்தம். தேனாஹ ‘‘ஸந்ததிதோ விமோசனவஸேனா’’தி. முத்தம்பி கிஞ்சி முத்தப³ந்த⁴னம் விய ப²லம் குஹிஞ்சி திட்ட²தி, ந ஏவமித³ந்தி த³ஸ்ஸனத்த²ம் ‘‘பஹீனோ’’தி வுத்தம். தேனாஹ ‘‘க்வசி அனவட்டா²னத³ஸ்ஸனவஸேனா’’தி. யதா² கிஞ்சி து³ன்னிஸ்ஸட்ட²ம் புன ஆதா³ய ஸம்மதே³வ நிஸ்ஸட்ட²ம் படினிஸ்ஸட்ட²ந்தி வுச்சதி, ஏவம் விபஸ்ஸனாய நிஸ்ஸட்ட²ம் ஆதி³ன்னஸதி³ஸம் மக்³கே³ன பஹீனம் படினிஸ்ஸட்ட²ம் நாம ஹோதீதி த³ஸ்ஸனத்த²ம் ‘‘படினிஸ்ஸட்டோ²’’தி வுத்தம். தேனாஹ ‘‘ஆதி³ன்னபுப்³ப³ஸ்ஸ படினிஸ்ஸக்³க³த³ஸ்ஸனவஸேனா’’தி. உக்கே²டிதோதி உத்தாஸிதோ, உத்தாஸேத்வா பலாபிதோதி வுத்தம் ஹோதி. யோ ச உத்தாஸேத்வா பலாபிதோ, ந புன ஸோ தம் டா²னம் ஆக³ச்ச²தீதி ஆஹ ‘‘புன அனல்லீயனபா⁴வத³ஸ்ஸனவஸேனா’’தி, புன ஆக³ந்த்வா ஸந்தானே அனுப்பத்திபா⁴வத³ஸ்ஸனவஸேனாதி அத்தோ². கி²ட-ஸத்³த³ம் ஸத்³த³ஸத்த²விதூ³ உத்தாஸத்தே² பட²ந்தீதி ஆஹ – ‘‘ஸ்வாயமத்தோ² ஸத்³த³ஸத்த²தோ பரியேஸிதப்³போ³’’தி. அணுயேவ அணுஸஹக³தம், அதிகு²த்³த³கந்தி வுத்தம் ஹோதி.

ஸுத்³தி⁴கவாரகதா²வண்ணனா நிட்டி²தா.

வத்துகாமவாரகதா²வண்ணனா

215. கேவலஞ்ஹியந்தி கேவலஞ்ஹி அயம். ‘‘வாரோ’’தி அஜ்ஜா²ஹரிதப்³ப³ம். தங்க²ணஞ்ஞேவ ஜானாதீதி ‘‘பட²மஜ்ஜா²னம் ஸமாபஜ்ஜி’’ந்திஆதி³ம்ஹி வுத்தே தத³த்த²ஸ்ஸ பகதியா விஜானனலக்க²ணம் ஸந்தா⁴ய வுத்தம். ஏவம் பன வசீபே⁴த³ம் அகத்வா பக்கமனாதீ³ஸு அஞ்ஞதரோ பி⁴க்கு² ‘‘மம் அரஹாதி ஜானாதூ’’தி தம்ஹா ஆவாஸா பட²மம் பக்கமதீதி ஆக³தவத்து²ம்ஹி விய தஸ்மிம் க²ணே அவிதி³தேபி நிக்க²ந்தமத்தே பாராஜிகம். ஜானனலக்க²ணந்தி ‘‘தங்க²ணே ஜானனம் நாம ஈதி³ஸ’’ந்தி வுத்தலக்க²ணம். விஞ்ஞத்திபதே²தி காயவசீவிஞ்ஞத்தீனம் க³ஹணயோக்³கே³ பதே³ஸே, பகதிசக்கு²னா பகதிஸோதேன ச த³ட்டு²ம் ஸோதுஞ்ச அரஹட்டா²னேதி வுத்தம் ஹோதி. தேன விஞ்ஞத்திபத²ம் அதிக்கமித்வா டி²தோ சே கோசி தி³ப்³பே³ன சக்கு²னா தி³ப்³பா³ய ச ஸோததா⁴துயா தி³ஸ்வா ஸுத்வா ச ஜானாதி, ந பாராஜிகந்தி தீ³பேதி. அஸ்ஸுதபுப்³ப³ஸ்ஸ ‘‘கிமித³ம் வுத்த’’ந்தி ஸம்ஸயுப்பத்திஸப்³பா⁴வதோ ‘‘ஸுதம் ஹோதீ’’தி வுத்தம். பட²மம் வசனமத்தம் அஸ்ஸுதபுப்³பே³னபி ‘‘பட²மஜ்ஜா²னம் ஸமாபஜ்ஜி’’ந்தி வுத்தே ‘‘கிமித³’’ந்தி ஸந்தே³ஹம் அனுப்பாதே³த்வா ‘‘ஜா²னம் நாம கிரேஸ ஸமாபஜ்ஜீ’’தி ஏத்தகமத்தேபி ஞாதே பாராஜிகம் ஹோதியேவ.

அனாபத்திபே⁴த³கதா²வண்ணனா

222. அனுல்லபனாதி⁴ப்பாயஸ்ஸாதி அதிக்கமித்வா அவத்துகாமஸ்ஸ, ‘‘உத்தரிமனுஸ்ஸத⁴ம்மோ அய’’ந்தி அஸல்லக்கே²ந்தஸ்ஸாதி அதி⁴ப்பாயோ. ஸரூபதோ பன ‘‘அனாபத்தி பி⁴க்கு² அனுல்லபனாதி⁴ப்பாயஸ்ஸா’’தி வினீதவத்தூ²ஸு தத்த² தத்த² ஆக³தவத்து²வஸேன வேதி³தப்³போ³. ‘‘உத்தரிமனுஸ்ஸத⁴ம்மோ அய’’ந்தி அஸல்லக்கே²த்வா வத³ந்தோபி வோஹாரதோ அஞ்ஞம் ப்³யாகரோந்தோ நாம ஹோதீதி வுத்தம் ‘‘அஞ்ஞம் ப்³யாகரோந்தஸ்ஸா’’தி.

பத³பா⁴ஜனீயவண்ணனா நிட்டி²தா.

பா⁴யந்தோபீதி ‘‘இமஸ்ஸ மயி நத்தி²பா⁴வம் அஞ்ஞேபி ஜானந்தா அத்தி² நு கோ²’’தி பா⁴யந்தோபி.

வினீதவத்து²வண்ணனா

223. ஸேக்க²பூ⁴மியந்தி இமினா ஜா²னபூ⁴மிம்பி ஸங்க³ண்ஹாதி. திண்ணம் விவேகானந்தி காயசித்தஉபதி⁴விவேகானம்.

பிண்டா³ய சரணஸ்ஸ போ⁴ஜனபரியோஸானத்தா வுத்தம் ‘‘யாவ போ⁴ஜனபரியோஸான’’ந்தி. பு⁴த்வா ஆக³ச்ச²ந்தஸ்ஸபி புன வுத்தனயேனேவ ஸம்பா⁴வனிச்சா²ய சீவரஸண்ட²பனாதீ³னி கரோந்தஸ்ஸ து³க்கடமேவ.

225. ஆராத⁴னீயோ, ஆவுஸோ, த⁴ம்மோ ஆரத்³த⁴வீரியேனாதி வத்து²த்³வயம் ஏகஸதி³ஸம்பி த்³வீஹி பி⁴க்கூ²ஹி விஸும் விஸும் ஆரோசிதத்தா ப⁴க³வதா வினிச்சி²னிதம் ஸப்³ப³ம்பி வினீதவத்தூ²ஸு ஆரோபேதப்³ப³ந்தி பாளியம் ஆரோபிதம்.

226. பஸாத³ப⁴ஞ்ஞந்தி கேவலம் பஸாத³மத்தேன ப⁴ணனம், ந பன ‘‘ஸபா⁴வதோ ஏதே அரஹந்தோயேவா’’தி சிந்தேத்வா. தேனேவேத்த² அனாபத்தி வுத்தா. யதி³ பன ‘‘ஏதே ஸபா⁴வதோ அரஹந்தோயேவா’’தி மஞ்ஞமானோ ‘‘ஆயந்து போ⁴ந்தோ அரஹந்தோ’’திஆதீ³னி வத³தி, ந ஸம்படிச்சி²தப்³ப³ம்.

227. பத³ஸா க³மனம் ஸந்தா⁴ய கதிகாய கதத்தா ‘‘யானேன வா’’திஆதி³மாஹ. தத்த² விஜ்ஜாமயித்³தி⁴ம் ஸந்தா⁴ய ‘‘இத்³தி⁴யா’’தி வுத்தம். அஞ்ஞமஞ்ஞம் ரக்க²ந்தீதி ‘‘யோ இமம்ஹா ஆவாஸா பட²மம் பக்கமிஸ்ஸதி, தம் மயம் ‘அரஹா’தி ஜானிஸ்ஸாமா’’தி ஏவம் கதிகாய கதத்தா அபுப்³பா³சரிமம் அஸுத்³த⁴சித்தேன க³ச்ச²ந்தாபி ஸஹ நிக்க²ந்தபா⁴வதோ அஞ்ஞமஞ்ஞம் ரக்க²ந்தி. கேசி பன ‘‘ஹத்த²பாஸம் அவிஜஹித்வா அஞ்ஞமஞ்ஞஸ்ஸ ஹத்த²ம் க³ண்ஹந்தோ விய க³ச்ச²ந்தோபி ‘உட்டே²த² க³ச்சா²ம, ஏத² க³ச்சா²மா’தி ஏவம் ஸம்வித³ஹித்வா க³மனே புப்³பா³பரம் க³ச்ச²ந்தோபி நாபஜ்ஜதீ’’தி வத³ந்தி. ஏதம் பன அத⁴ம்மிகம் கதிகவத்தந்தி ‘‘இத⁴ அரஹந்தோயேவ வஸந்தூதி யதி³ பி⁴க்கூ² கதிகம் கரோந்தி, ஏதம் அத⁴ம்மிகம் கதிகவத்த’’ந்தி சூளக³ண்டி²பதே³ வுத்தம். ஹேட்டா² வுத்தம் பன ஸப்³ப³ம்பி கதிகவத்தம் ஸந்தா⁴ய ஏதம் வுத்தந்தி அம்ஹாகம் க²ந்தி, வீமம்ஸித்வா க³ஹேதப்³ப³ம். நானாவேரஜ்ஜகாதி நானாஜனபத³வாஸினோ. ஸங்க⁴லாபோ⁴தி யதா²வுட்³ட⁴ம் அத்தனோ பாபுணனகோட்டா²ஸோ. அயஞ்ச படிக்கே²போ இமினாவ நீஹாரேன ப³ஹிஸீமட்டா²னம் அவிஸேஸேன ஸங்க⁴லாப⁴ஸ்ஸ ஸாமிபா⁴வாபாத³னம் ஸந்தா⁴ய கதோ. விஸேஸதோ பன ப³ஹிஸீமட்டா²னம்பி பரிச்சி²ந்தி³த்வா ஏகேககோட்டா²ஸதோ ‘‘ஏத்தகம் தா³தும், ஈதி³ஸம் வா தா³தும், ஏத்தகானம் வா தா³தும், ஈதி³ஸஸ்ஸ வா தா³தும் ருச்சதி ஸங்க⁴ஸ்ஸா’’தி அபலோகனகம்மம் கத்வா தா³தும் வட்டதி.

228. ஆயஸ்மா ச லக்க²ணோதிஆதீ³ஸு கோ பனாயஸ்மா லக்க²ணோ, கஸ்மா சஸ்ஸ லக்க²ணோதி நாமம் அஹோஸி, கோ சாயஸ்மா மஹாமோக்³க³ல்லானோ, கஸ்மா ச ஸிதம் பாத்வாகாஸீதி தம் ஸப்³ப³ம் பகாஸேதும் ‘‘ய்வாய’’ந்திஆதி³ ஆரத்³த⁴ம். லக்க²ணஸம்பன்னேனாதி புரிஸலக்க²ணஸம்பன்னேன. ப்³ரஹ்மஸமேனாதி ப்³ரஹ்மத்தபா⁴வஸமேன. ஈஸகம் ஹஸிதம் ஸிதந்தி வுச்சதீதி ஆஹ ‘‘மந்த³ஹஸித’’ந்தி. அட்டி²கஸங்க²லிகந்தி நயித³ம் அவிஞ்ஞாணகம் அட்டி²ஸங்க²லிகமத்தம், அத² கோ² ஏகோ பேதோதி ஆஹ ‘‘பேதலோகே நிப்³ப³த்தம் ஸத்த’’ந்தி. ஏதே அத்தபா⁴வாதி பேதத்தபா⁴வா. ந ஆபாத²ம் ஆக³ச்ச²ந்தீதி தே³வத்தபா⁴வா விய பகதியா ஆபாத²ம் ந ஆக³ச்ச²ந்தி. தேஸம் பன ருசியா ஆபாத²ம் ஆக³ச்சே²ய்யும். மனுஸ்ஸானம் து³க்கா²பி⁴பூ⁴தானம் அனாத²பா⁴வத³ஸ்ஸனபத³ட்டா²னா கருணாதி ஆஹ ‘‘காருஞ்ஞே கத்தப்³பே³’’தி. அத்தனோ ச ஸம்பத்திம் பு³த்³த⁴ஞாணஸ்ஸ ச ஸம்பத்திந்தி பச்சேகம் ஸம்பத்தி-ஸத்³தோ³ யோஜேதப்³போ³. தது³ப⁴யம் விபா⁴வேதும் ‘‘தஞ்ஹீ’’திஆதி³ வுத்தம். தத்த² ‘‘அத்தனோ ச ஸம்பத்திம் அனுஸ்ஸரித்வா ஸிதம் பாத்வாகாஸீ’’தி பத³ம் ஆனேத்வா ஸம்ப³ந்தி⁴தப்³ப³ம். த⁴ம்மதா⁴தூதி ஸப்³ப³ஞ்ஞுதஞ்ஞாணம் ஸந்தா⁴ய வத³தி, த⁴ம்மதா⁴தூதி வா த⁴ம்மானம் ஸபா⁴வோ. உபபத்தீதி ஜாதி. உபபத்திஸீஸேன ஹி ததா²ரூபம் அத்தபா⁴வம் வத³தி. து³ஸ்ஸத்³தா⁴பயா ஹோந்தி, தத³ஸ்ஸ தேஸம் தீ³க⁴ரத்தம் அஹிதாய து³க்கா²ய. து³ஸ்ஸத்³தா⁴பயாதி இத³ஞ்ச ந லக்க²ணத்தே²ரம் ஸந்தா⁴ய வுத்தம், யே பன ஸுணந்தி ‘‘ஏவம் கிர வுத்த’’ந்தி, தே ஸந்தா⁴ய. அத² லக்க²ணத்தே²ரோ கஸ்மா ந அத்³த³ஸ, கிமஸ்ஸ தி³ப்³ப³சக்கு² நத்தீ²தி? நோ நத்தி², மஹாமோக்³க³ல்லானோ பன ஆவஜ்ஜேந்தோ அத்³த³ஸ, இதரோ அனாவஜ்ஜனேன ந அத்³த³ஸ.

விதுடே³ந்தீதி வினிவிஜ்ஜி²த்வா டே³ந்தி, அஸிதா⁴ரூபமேஹி திகி²ணேஹி லோஹதுண்ட³கேஹி விஜ்ஜி²த்வா விஜ்ஜி²த்வா இதோ சிதோ ச க³ச்ச²ந்தீதி அத்தோ². தேனாஹ ‘‘வினிவிஜ்ஜி²த்வா க³ச்ச²ந்தீ’’தி. ‘‘விதுத³ந்தீ’’தி வா பாடோ². பா²ஸுளந்தரிகாஹீதி பு⁴ம்மத்தே² நிஸ்ஸக்கவசனம். லோஹதுண்ட³கேஹீதி லோஹஸலாகாஸதி³ஸேஹி, காளலோஹமயேஹேவ வா துண்ட³கேஹி. பஸாது³ஸ்ஸதா³தி இமினா அட்டி²ஸங்கா⁴தமத்தம் ஹுத்வா பஞ்ஞாயமானானம்பி காயப்பஸாத³ஸ்ஸ ப³லவபா⁴வம் த³ஸ்ஸேதி. பக்கக³ண்ட³ஸதி³ஸாதி இமினா பன அதிவிய முது³ஸபா⁴வதம் த³ஸ்ஸேதி. அச்ச²ரியம் வதாதி க³ரஹனச்ச²ரியம் நாமேதம்.

சக்கு²பூ⁴தாதி ஸம்பத்ததி³ப்³ப³சக்கு²கா, லோகஸ்ஸ சக்கு²பூ⁴தாதி ஏவம் வா ஏத்த² அத்தோ² த³ட்ட²ப்³போ³. யத்ராதி ஹேதுஅத்தே² நிபாதோதி ஆஹ ‘‘யத்ராதி காரணவசன’’ந்தி. அப்பமாணே ஸத்தனிகாயே, தே ச கோ² விபா⁴கே³ன காமப⁴வாதி³பே⁴தே³ ப⁴வே, நிரயாதி³பே⁴தா³ க³தியோ, நானத்தகாயனானத்தஸஞ்ஞீஆதி³விஞ்ஞாணட்டி²தியோ, ததா²ரூபே ஸத்தாவாஸே ச ஸப்³ப³ஞ்ஞுதஞ்ஞாணஞ்ச மே உபனேதும் பச்சக்க²ம் கரோந்தேன.

கோ³கா⁴தகோதி கு³ன்னம் அபி⁴ண்ஹம் ஹனனகோ. தேனாஹ ‘‘வதி⁴த்வா வதி⁴த்வா’’தி. தஸ்ஸாதி கு³ன்னம் ஹனனகம்மஸ்ஸ. அபராபரியகம்மஸ்ஸாதி அபராபரியவேத³னீயகம்மஸ்ஸ. ப³லவதா கோ³கா⁴தககம்மேன விபாகே தீ³யமானே அலத்³தோ⁴காஸம் அபராபரியவேத³னீயம், தஸ்மிம் விபக்கவிபாகே இதா³னி லத்³தோ⁴காஸம் ‘‘அவஸேஸகம்ம’’ந்தி வுத்தம். கம்மஸபா⁴க³தாயாதி கம்மஸ்ஸ ஸபா⁴க³பா⁴வேன ஸதி³ஸபா⁴வேன. ஆரம்மணஸபா⁴க³தாயாதி ஆரம்மணஸ்ஸ ஸபா⁴க³பா⁴வேன ஸதி³ஸபா⁴வேன. யாதி³ஸே ஹி ஆரம்மணே புப்³பே³ தம் கம்மம் தஸ்ஸ ச விபாகோ பவத்தோ, தாதி³ஸேயேவ ஆரம்மணே இத³ம் கம்மம் இமஸ்ஸ விபாகோ ச பவத்தோதி கத்வா வுத்தம் ‘‘தஸ்ஸேவ கம்மஸ்ஸ விபாகாவஸேஸேனா’’தி. ப⁴வதி ஹி தம்ஸதி³ஸேபி தப்³போ³ஹாரோ யதா² ஸோ ஏவ தித்திரோ, தானியேவ ஓஸதா⁴னீதி. யஸ்மா கம்மஸரிக்க²கவிஸயே ‘‘கம்மம் வா கம்மனிமித்தம் வா’’தி த்³வயமேவ வுத்தம், யஸ்மா ச க³தினிமித்தம் விய கம்மம் கம்மனிமித்தஞ்ச கம்மதோ பி⁴ன்னம் விஸும் ஹுத்வா ந திட்ட²தி, தஸ்மா ஸரிக்க²கவிபாகதா³னஸ்ஸ காரணபா⁴வதோ யத்த² கம்மஸரிக்க²கேன விபாகேன ப⁴விதப்³ப³ம், தத்த² கம்மம் வா கம்மனிமித்தம் வா க³ஹேத்வா படிஸந்தி⁴ ஹோதீதி வத³ந்தி. தேனேவாஹ – ‘‘தஸ்ஸ கிர…பே… நிமித்தம் அஹோஸீ’’தி. தத்த² நிமித்தம் அஹோஸீதி புப்³பே³ கதூபசிதஸ்ஸ பேதூபபத்தினிப்³ப³த்தனவஸேன கதோகாஸஸ்ஸ தஸ்ஸ கம்மஸ்ஸ நிமித்தபூ⁴தம் இதா³னி ததா² உபட்ட²ஹந்தம் தஸ்ஸ விபாகஸ்ஸ நிமித்தம் ஆரம்மணம் அஹோஸி. ஸோதி கோ³கா⁴தகோ. அட்டி²கஸங்க²லிகபேதோ ஜாதோ கம்மஸரிக்க²கவிபாகவஸேன.

229. பேஸியோ கத்வாதி கா³விம் வதி⁴த்வா வதி⁴த்வா கோ³மம்ஸம் பா²லேத்வா பேஸியோ கத்வா. ஸுக்கா²பேத்வாதி காலந்தரம் ட²பனத்த²ம் ஸுக்கா²பேத்வா. ஸுக்கா²பிதமம்ஸபேஸீனஞ்ஹி வல்லூரஸமஞ்ஞாதி. நிப்பக்க²சம்மேதி விக³தபக்க²சம்மே. உரப்³பே⁴ ஹந்தீதி ஓரப்³பி⁴கோ. ஏளகேதி அஜே. நிவாபபுட்டே²தி அத்தனா தி³ன்னனிவாபேன போஸிதே அஸினா வதி⁴த்வா வதி⁴த்வா விக்கிணந்தோ. ஏகம் மிக³ந்தி தீ³பகமிக³ம். காரணாஹீதி யாதனாஹி. ஞத்வாதி கம்மட்டா²னம் ஞத்வா. பேஸுஞ்ஞுபஸம்ஹாரவஸேன இதோ ஸுதம் அமுத்ர, அமுத்ர வா ஸுதம் இத⁴ ஸூசேதீதி ஸூசகோ. அனயப்³யஸனம் பாபேஸி மனுஸ்ஸேதி ஸம்ப³ந்தோ⁴.

வினிச்ச²யாமச்சோதி ரஞ்ஞா அட்³ட³கரணே ட²பிதோ வினிச்ச²யமஹாமத்தோ. ஸோ ஹி கா³மஜனகாயம் கூடட்டே²ன வஞ்சேதீதி ‘‘கா³மகூடோ’’தி வுச்சதி. கேசி ‘‘தாதி³ஸோயேவ கா³மஜேட்ட²கோ கா³மகூடோ’’தி வத³ந்தி. ஸமேன ப⁴விதப்³ப³ம் த⁴ம்மட்டோ²தி வத்தப்³ப³தோ. ரஹஸ்ஸங்கே³ நிஸீத³னவஸேன விஸமா நிஸஜ்ஜா அஹோஸி. பு²ஸந்தோதி தே²ய்யாய பு²ஸந்தோ.

230. அனிஸ்ஸரோதி மாதுகா³மோ ஸஸாமிகோ அத்தனோ ப²ஸ்ஸே அனிஸ்ஸரோ. த⁴ம்ஸித்வாதி ப⁴ஸ்ஸித்வா அபக³ந்த்வா. மங்க³னவஸேன உலதீதி மங்கு³லி, விரூபபீ³ப⁴ச்ச²பா⁴வேன பவத்ததீதி அத்தோ². தேனாஹ ‘‘விரூபம் து³த்³த³ஸிகம் பீ³ப⁴ச்ச²’’ந்தி.

உத்³த⁴ம் உத்³த⁴ம் அக்³கி³னா பக்கஸரீரதாய உப்பக்கம், ஹேட்ட²தோ பக்³க⁴ரணவஸேன கிலின்னஸரீரதாய ஓகிலினீ, இதோ சிதோ ச அங்கா³ரஸம்பரிகிண்ணதாய ஓகிரினீ. தேனாஹ ‘‘ஸா கிரா’’திஆதி³. அங்கா³ரசிதகேதி அங்கா³ரஸஞ்சயே. ஸரீரதோ பக்³க⁴ரந்தி அஸுசிது³க்³க³ந்த⁴ஜேகு³ச்சா²னி ஸேத³க³தானி. தஸ்ஸ கிர ரஞ்ஞோதி காலிங்க³ஸ்ஸ ரஞ்ஞோ. நாடகினீதி நச்சனகிச்சே அதி⁴க³தா இத்தீ². ஸேத³ந்தி ஸேத³னம், தாபனந்தி அத்தோ².

அஸீஸகம் கப³ந்த⁴ம் ஹுத்வா நிப்³ப³த்தி கம்மாயூஹனகாலே ததா² நிமித்தக்³க³ஹணபரிசயதோ. லாமகபி⁴க்கூ²தி ஹீனாசாரதாய லாமகோ, பி⁴க்கு²வேஸதாய பி⁴க்கா²ஹாரேன ஜீவனதோ ச பி⁴க்கு². சித்தகேளிந்தி சித்தருசியம் தம் தம் கீளந்தோ. அயமேவாதி பி⁴க்கு²வத்து²ஸ்மிம் வுத்தனயோ ஏவ.

231. நிஸ்ஸேவாலபணககத்³த³மோதி திலபீ³ஜகாதி³பே⁴தே³ன ஸேவாலேன நீலமண்டூ³கபிட்டி²வண்ணேன உத³கபிட்ட²ம் சா²தே³த்வா நிப்³ப³த்தபணகேன கத்³த³மேன ச விரஹிதோ. ஸுந்த³ரேஹி தித்தே²ஹீதி ஸுகா²வகா³ஹணட்டா²னதாய கத்³த³மாதி³தோ³ஸவிரஹதோ ச ஸுந்த³ரேஹி தித்தே²ஹி. ததோ உத³கத³ஹதோ தம்ஹேது, தம் உபனிஸ்ஸாயாதி அத்தோ². நாக³ப⁴வனக³தோபி ஹி ஸோ ரஹதோ³ ததோ உபரிமனுஸ்ஸலோகே ஜலாஸயேன ஸம்ப³ந்தோ⁴ ஹோதி. தேன வுத்தம் ‘‘ததோ அயம் தபோதா³ ஸந்த³தீ’’தி. அத² வா ததோதி நாக³ப⁴வனே உத³கத³ஹதோ அயம் தபோதா³ ஸந்த³தி. தஞ்ஹி உபரிபூ⁴மிதலம் ஆரோஹதி, உண்ஹபா⁴வேன தபனதோ தபம் உத³கம் ஏதிஸ்ஸாதி அன்வத்த²னாமவஸேன தபோதா³தி வுச்சதி. பேதலோகோதி பேதானம் ஆவாஸட்டா²னம். கேசி பன ‘‘பேதலோகோதி லோஹகும்பீ⁴னிரயா இதா⁴தி⁴ப்பேதா’’தி வத³ந்தி, நக³ரஸ்ஸ பன பரிதோ பப்³ப³தபாத³வனந்தரேஸு ப³ஹூ பேதாவாஸாபி ஸந்தேவ. ஸ்வாயமத்தோ² பேதவத்து²பாளியா லக்க²ணஸம்யுத்தேன இமாய ச வினீதவத்து²பாளியா தீ³பேதப்³போ³.

கதஹத்தா²தி தி²ரதரம் லக்கே²ஸு அவிரஜ்ஜ²னஸரக்கே²பா. ஈதி³ஸா பன தத்த² வஸீபூ⁴தா கதஹத்தா² நாம ஹோந்தி, தஸ்மா யோ ஸிப்பமேவ உக்³க³ண்ஹாதி, ஸோ கதஹத்தோ² நாம ந ஹோதி, இமே பன கதஹத்தா², சிண்ணவஸீபா⁴வாதி வுத்தம் ஹோதி. ஸிப்பத³ஸ்ஸனவஸேன கதம் ராஜகுலானி உபேச்ச அஸனம் ஸரக்கே²போ ஏதேஹீதி கதுபாஸனா, ராஜகுலாதீ³ஸு த³ஸ்ஸிதஸிப்பாதி வுத்தம் ஹோதி. பப⁴க்³கோ³தி பராஜிதோ.

232. தோ³ஸத³ஸ்ஸன புப்³ப³க ரூப விராக³ பா⁴வனா ஸங்கா²த படிபக்க² பா⁴வனாவஸேன படிக⁴ஸஞ்ஞானம் ஸுப்பஹீனத்தா மஹதாபி ஸத்³தே³ன அரூபஸமாபத்திதோ ந வுட்டா²தி, ததா² பன ந ஸுப்பஹீனத்தா ஸப்³ப³ரூபாவசரஸமாபத்திதோ வுட்டா²னம் ஸியாதி இத⁴ ஆனேஞ்ஜஸமாதீ⁴தி சதுத்த²ஜ்ஜா²னஸமாபத்தி அதி⁴ப்பேதாதி ஆஹ ‘‘அனேஜம் அசலம் காயவாசாவிப்ப²ந்த³விரஹிதம் சதுத்த²ஜ்ஜா²னஸமாதி⁴’’ந்தி. அஞ்ஞத்த² பன ஸமாதி⁴பச்சனீகானம் அதிதூ³ரதாய ந இஞ்ஜதீதி ஆனேஞ்ஜோதி அரூபாவசரஸமாதி⁴ வுச்சதி. ஸமாதி⁴பரிபந்த²கே த⁴ம்மேதி விதக்கவிசாராதி³கே ஸந்தா⁴ய வத³தி. விதக்காதீ³ஸு ஆதீ³னவஸல்லக்க²ணஸ்ஸ ந ஸுட்டு²கதபா⁴வம் ஸந்தா⁴யாஹ ‘‘ந ஸுட்டு² பரிஸோதே⁴த்வா’’தி.

நனு சாயமாயஸ்மா மஹாமோக்³க³ல்லானோ ப⁴க³வதோ பட²மவஸ்ஸேவ அபி⁴னவப்பத்தஅரஹத்தோ, இத³ஞ்ச உத்தரிமனுஸ்ஸத⁴ம்மபாராஜிகம் வீஸதிமவஸ்ஸதோ உபரி பஞ்ஞத்தம், கத²ம் இமஸ்ஸ வத்து²னோ இமஸ்மிம் பாராஜிகே ப⁴க³வதா வினிச்சி²தபா⁴வோ வுத்தோதி? நாயம் தோ³ஸோ. அயஞ்ஹேத்த² ஆசரியானம் கதா²மக்³கோ³ – அபஞ்ஞத்தேபி ஸிக்கா²பதே³ தே²ரஸ்ஸ வசனம் ஸுத்வா ‘‘அத்தனோ அப்பதிரூபம் உத்தரிமனுஸ்ஸத⁴ம்மம் ஏஸ வத³தீ’’தி மஞ்ஞமானா பி⁴க்கூ² தே²ரஸ்ஸ தோ³ஸம் ஆரோபேந்தா உஜ்ஜா²யிம்ஸு. ப⁴க³வா ச தே²ரஸ்ஸ ததா²வசனே காரணம் த³ஸ்ஸேத்வா நித்³தோ³ஸபா⁴வம் கரோந்தோ ‘‘அனாபத்தி, பி⁴க்க²வே, மோக்³க³ல்லானஸ்ஸா’’தி ஆஹ. ஸங்கீ³திகாரகா பன உத்தரிமனுஸ்ஸத⁴ம்மாதி⁴காரத்தா தம்பி வத்து²ம் ஆனேத்வா இத⁴ ஆரோபேஸுந்தி.

ஸாவகானம் உப்படிபாடியா அனுஸ்ஸரணம் நத்தீ²தி த³ஸ்ஸேதும் ‘‘ந உப்படிபாடியா’’தி ஆஹ. அஸஞ்ஞஸமாபத்திந்தி ஸஞ்ஞாவிராக³பா⁴வனாய வாயோகஸிணனிப்³ப³த்திதம் சதுத்த²ஜ்ஜா²னஸமாபத்திம் வத³தி. புப்³பே³னிவாஸஞாணம் சுதிபடிஸந்தி⁴ம் க³ண்ஹந்தம்பி அனந்தரபச்சயக்கமவந்தானம் அரூபத⁴ம்மானம் வஸேனேவ க³ண்ஹாதீதி ஆஹ – ‘‘ததியே அத்தபா⁴வே சுதிமேவ அத்³த³ஸா’’தி. நயதோ ஸல்லக்கே²ஸீதி வட்டே ஸம்ஸரணகஸத்தானம் க²ந்தா⁴னம் அபா⁴வகாலோ நாம நத்தி², அஸஞ்ஞப⁴வே பன அசித்தகா ஹுத்வா பஞ்ச கப்பஸதானி பவத்தந்தி, இமினா நயேன ஸல்லக்கே²ஸி. து³க்கரம் கதந்தி க²ந்த⁴விகலஸ்ஸ புப்³பே³னிவாஸஸ்ஸ அனுஸ்ஸரணம் ட²பேத்வா ஸம்மாஸம்பு³த்³த⁴ம் ந ஸக்கா அஞ்ஞேஹி காதுந்தி நயதோ ஸல்லக்கே²ந்தேனபி து³க்கரம் கதந்தி அதி⁴ப்பாயோ. படிவித்³தா⁴தி படிவித்³த⁴ஸதி³ஸா. யதா² நாம கோசி த⁴னுஸிப்பே கதஹத்தோ² ஏகம் கேஸஸங்கா²தம் வாலம் ஸதக்க²த்தும் விதா³லேத்வா ததோ ஏகம் அம்ஸும் க³ஹேத்வா வாதிங்க³ணப²லஸ்ஸ மஜ்ஜ²ட்டா²னே ப³ந்தி⁴த்வா அபரம் அம்ஸும் கண்ட³ஸ்ஸ அக்³க³கோடியம் யதா² தஸ்ஸ அம்ஸுஸ்ஸ ஊகாமத்தம் வா லிக்கா²மத்தம் வா கண்ட³ஸ்ஸ அக்³க³கோடிதோ அதி⁴கம் ஹுத்வா திட்ட²தி, ஏவம் ப³ந்தி⁴த்வா உஸப⁴மத்தே டா²னே டி²தோ கண்ட³ப³த்³தா⁴ய வாலகோடியா வாதிங்க³ணப³த்³த⁴ம் வாலஸ்ஸ கோடிம் படிவிஜ்ஜே²ய்ய, ஏவமேவ இமினாபி கதம் து³க்கரந்தி வுத்தம் ஹோதி. ஏதத³க்³க³ந்தி ஏஸோ அக்³கோ³. யதி³த³ந்தி யோ அயம். லிங்க³விபல்லாஸவஸேனேதம் வுத்தம்.

வினீதவத்து²வண்ணனா நிட்டி²தா.

நிக³மனவண்ணனா

233. இதா⁴தி இமஸ்மிம் பி⁴க்கு²விப⁴ங்கே³. உத்³தி³ட்டா²தி இத⁴ பாதிமோக்க²வஸேன அனோஸாரிதத்தா சத்தாரோ பாராஜிகாவ உத்³தி³ட்டா² கதி²தாதி அத்தோ² க³ஹேதப்³போ³. யதி³ ஏவம் ஹேட்டா² து²ல்லச்சயது³க்கடானம்பி வுத்தத்தா பாராஜிகாவ உத்³தி³ட்டா²தி கஸ்மா வுத்தாதி? பாராஜிகாதி⁴காரத்தா ஸந்தேஸுபி து²ல்லச்சயது³க்கடேஸு இத⁴ பாராஜிகாவ வுத்தா. யேஸம்…பே… அஸம்வாஸோதி இமமத்த²ம் வா தீ³பேதுகாமோ தம்ஸம்ப³ந்தே⁴ன ‘‘உத்³தி³ட்டா² சத்தாரோ பாராஜிகா’’தி ஆஹ. தத்தா²யஸ்மந்தேதிஆதி³கம் பன அனுஞ்ஞாதபாதிமோக்கு²த்³தே³ஸக்கமோபி அயமேவ, நாஞ்ஞோதி த³ஸ்ஸனத்த²ம் வுத்தம். பி⁴க்கு²னீனம் அஸாதா⁴ரணானி சத்தாரீதி உப்³ப⁴ஜாணுமண்ட³லிகா வஜ்ஜபடிச்சா²தி³கா உக்கி²த்தானுவத்திகா அட்ட²வத்து²காதி இமானி சத்தாரி பி⁴க்கு²னீனம் பி⁴க்கூ²ஹி அஸாதா⁴ரணானி நாம. ஏதேஸு உப்³ப⁴ஜாணுமண்ட³லிகா நாம யா காயஸம்ஸக்³க³ராகே³ன அவஸ்ஸுதா தேனேவ ராகே³ன அவஸ்ஸுதஸ்ஸ மனுஸ்ஸபுரிஸஸ்ஸ அக்க²கானம் அதோ⁴ ஜாணுமண்ட³லானம் கப்பரானஞ்ச உபரி யேன கேனசி ஸரீராவயவேன ஆமஸனாதி³ம் ஸாதி³யதி, தஸ்ஸா அதி⁴வசனம். யா பன பி⁴க்கு²னீ அஞ்ஞிஸ்ஸா பி⁴க்கு²னியா பாராஜிகஸங்கா²தம் வஜ்ஜம் ஜானம் படிச்சா²தே³தி, ஸா வஜ்ஜபடிச்சா²தி³கா நாம. ஸமக்³கே³ன பன ஸங்கே⁴ன உக்கி²த்தம் பி⁴க்கு²ம் யா பி⁴க்கு²னீ யம்தி³ட்டி²கோ ஸோ ஹோதி, தஸ்ஸா தி³ட்டி²யா க³ஹணவஸேன அனுவத்ததி, ஸா உக்கி²த்தானுவத்திகா நாம. யா பன காயஸம்ஸக்³க³ராகே³ன திந்தா ததா²வித⁴ஸ்ஸேவ புரிஸஸ்ஸ ஹத்த²க்³க³ஹணம் வா ஸங்கா⁴டிகண்ணக்³க³ஹணம் வா ஸாதி³யதி, காயஸம்ஸக்³க³ஸங்கா²தஸ்ஸ அஸத்³த⁴ம்மஸ்ஸ படிஸேவனத்தா²ய புரிஸஸ்ஸ ஹத்த²பாஸே ஸந்திட்ட²தி வா, தத்த² ட²த்வா ஸல்லபதி வா, ஸங்கேதம் வா க³ச்ச²தி, புரிஸஸ்ஸ ஆக³மனம் வா ஸாதி³யதி, கேனசி வா படிச்ச²ன்னோகாஸம் பவிஸதி, ஹத்த²பாஸே வா ட²த்வா காயம் உபஸம்ஹரதி, அயம் அட்ட²வத்து²கா நாமாதி வேதி³தப்³ப³ம்.

வத்து²விபன்னாதி பப்³ப³ஜ்ஜுபஸம்பதா³ய அவத்து²பா⁴வதோ வத்து²விபன்னா. நேஸஞ்ஹி ‘‘ந, பி⁴க்க²வே, பண்ட³கோ பப்³பா³ஜேதப்³போ³, யோ பப்³பா³ஜேய்ய, ஆபத்தி து³க்கடஸ்ஸா’’திஆதி³னா பப்³ப³ஜ்ஜா உபஸம்பதா³ ச படிக்கி²த்தா. தஸ்மா தே பி⁴க்கு²பா⁴வாய அப⁴ப்³ப³த்தா பாராஜிகாபன்னஸதி³ஸதாய ‘‘பாராஜிகா’’தி வுத்தா. தப்³பா⁴வபா⁴விதாய பி⁴க்கு²பா⁴வோ வஸதி ஏத்தா²தி வத்து², புக்³க³லானம் பி⁴க்கு²பா⁴வாரஹதா. ஸா பன பப்³ப³ஜ்ஜக்க²ந்த⁴காக³தஸப்³ப³தோ³ஸவிரஹிதஸம்பத்தியுத்ததா. தம் விபன்னம் பண்ட³கபா⁴வாதி³யோகே³ன யேஸம் தே வத்து²விபன்னா. அஹேதுகபடிஸந்தி⁴காதி இமினா தேஸம் விபாகாவரணேன ஸமன்னாக³தபா⁴வம் த³ஸ்ஸேந்தோ மக்³கா³வரணே காரணமாஹ. பாராஜிகாபன்னஸதி³ஸத்தா பாராஜிகா. தே²ய்யஸம்வாஸகாதி³கம்மம் மாதுகா⁴தாதி³கம் விய ஆனந்தரியம் ந ஹோதீதி ஆஹ ‘‘இமேஸம் திண்ணம் ஸக்³கோ³ அவாரிதோ’’தி.

தீ³க⁴தாய லம்ப³மானம் அங்க³ஜாதமேதஸ்ஸாதி லம்பீ³. ஸோ ஏத்தாவதா ந பாராஜிகோ, அத² கோ² யதா³ அனபி⁴ரதியா பீளிதோ அத்தனோ அங்க³ஜாதம் முகே² வா வச்சமக்³கே³ வா பவேஸேதி, ததா³ பாராஜிகோ ஹோதி. முது³ பிட்டி² ஏதஸ்ஸாதி முது³பிட்டி²கோ, கதபரிகம்மாய முது³காய பிட்டி²யா ஸமன்னாக³தோ. ஸோபி யதா³ அனபி⁴ரதியா பீளிதோ அத்தனோ அங்க³ஜாதம் அத்தனோ முக²வச்சமக்³கே³ஸு அஞ்ஞதரம் பவேஸேதி, ததா³ பாராஜிகோ ஹோதி. பரஸ்ஸ அங்க³ஜாதம் அத்தனோ முகே²ன க³ண்ஹாதீதி யோ அனபி⁴ரதியா பீளிதோ பரஸ்ஸ ஸுத்தஸ்ஸ வா பமத்தஸ்ஸ வா அங்க³ஜாதம் அத்தனோ முகே²ன க³ண்ஹாதி. பரஸ்ஸ அங்க³ஜாதே அபி⁴னிஸீத³தீதி யோ அனபி⁴ரதியா பீளிதோ பரஸ்ஸ அங்க³ஜாதம் கம்மனியம் தி³ஸ்வா அத்தனோ வச்சமக்³கே³ன தஸ்ஸூபரி நிஸீத³தி, தம் அத்தனோ வச்சமக்³க³ம் பவேஸேதீதி அத்தோ².

ஏத்தா²ஹ – மாதுகா⁴தகபிதுகா⁴தகஅரஹந்தகா⁴தகா ததியபாராஜிகம் ஆபன்னா, பி⁴க்கு²னீதூ³ஸகோ லம்பீ³ஆத³யோ சத்தாரோ பட²மபாராஜிகம் ஆபன்னா ஏவாதி கத²ம் சதுவீஸதீதி? வுச்சதே – மாதுகா⁴தகாத³யோ ஹி சத்தாரோ இத⁴ அனுபஸம்பன்னா ஏவ அதி⁴ப்பேதா, லம்பீ³ஆத³யோ சத்தாரோ கிஞ்சாபி பட²மபாராஜிகேன ஸங்க³ஹிதா, யஸ்மா பன ஏதேன பரியாயேன மேது²னம் த⁴ம்மம் அப்படிஸேவினோ ஹோந்தி, தஸ்மா விஸும் வுத்தாதி. ஏதேன பரியாயேனாதி உபி⁴ன்னம் ராக³பரியுட்டா²னஸங்கா²தேன பரியாயேன. து³தியவிகப்பே கச்சித்தா²தி ஏத்த² கச்சி அத்தா²தி பத³ச்சே²தோ³ வேதி³தப்³போ³.

நிக³மனவண்ணனா நிட்டி²தா.

இதி ஸமந்தபாஸாதி³காய வினயஸம்வண்ணனாய ஸாரத்த²தீ³பனியம்

சதுத்த²பாராஜிகவண்ணனா நிட்டி²தா.