2. து³தியபாராஜிகம்

அது³தியேன ஜினேன யம் து³தியம் பாராஜிகம் பகாஸிதம், தஸ்ஸ இதா³னி யஸ்மா ஸம்வண்ணனாக்கமோ பத்தோ, தஸ்மா யம் ஸுவிஞ்ஞேய்யம், யஞ்ச புப்³பே³ பகாஸிதம், தம் ஸப்³ப³ம் வஜ்ஜயித்வா அஸ்ஸ து³தியஸ்ஸ அயம் ஸம்வண்ணனா ஹோதீதி ஸம்ப³ந்தோ⁴.

த⁴னியவத்து²வண்ணனா

84. ராஜக³ஹேதி ஏத்த² து³க்³க³ஜனபத³ட்டா²னவிஸேஸஸம்பதா³தி³யோக³தோ பதா⁴னபா⁴வேன ராஜூஹி க³ஹிதம் பரிக்³க³ஹிதந்தி ராஜக³ஹந்தி ஆஹ ‘‘மந்தா⁴து…பே… வுச்சதீ’’தி. தத்த² மஹாகோ³விந்தே³ன மஹாஸத்தேன பரிக்³க³ஹிதம் ரேணுனா பரிக்³க³ஹிதமேவ ஹோதீதி மஹாகோ³விந்த³க்³க³ஹணம். மஹாகோ³விந்த³பஅக்³க³ஹிததாகித்தனஞ்ஹி ததா³ ரேணுனா மக³த⁴ராஜேன பரிக்³க³ஹிதபா⁴வூபலக்க²ணம். தஸ்ஸ ஹி ஸோ புரோஹிதோ. ‘‘மஹாகோ³விந்தோ³தி மஹானுபா⁴வோ புராதனோ ஏகோ மக³த⁴ராஜா’’தி கேசி. பரிக்³க³ஹிதத்தாதி ராஜதா⁴னீபா⁴வேன பரிக்³க³ஹிதத்தா. க³ய்ஹதீதி க³ஹோ, ராஜூனம் க³ஹோதி ராஜக³ஹம், நக³ரஸத்³தா³பேக்கா²ய நபும்ஸகனித்³தே³ஸோ. அஞ்ஞேபேத்த² பகாரேதி ‘‘நக³ரமாபனேன ரஞ்ஞா காரிதஸப்³ப³க³ஹத்தா ராஜக³ஹம், கி³ஜ்ஜ²கூடாதீ³ஹி பரிக்கி²த்தத்தா பப்³ப³தராஜேஹி பரிக்கி²த்தகே³ஹஸதி³ஸந்திபி ராஜக³ஹம், ஸம்பன்னப⁴வனதாய ராஜமானம் கே³ஹந்திபி ராஜக³ஹம், ஸுவிஹிதாரக்க²தாய அனத்தா²வஹபா⁴வேன உபக³தானம் படிராஜூனம் க³ஹம் கே³ஹபூ⁴தந்திபி ராஜக³ஹம், ராஜூஹி தி³ஸ்வா ஸம்மா பதிட்டா²பிதத்தா தேஸம் க³ஹம் கே³ஹபூ⁴தந்திபி ராஜக³ஹம். ஆராமராமணேய்யகாதீ³ஹி ராஜதே, நிவாஸஸுக²தாதி³னா ஸத்தேஹி மமத்தவஸேன க³ய்ஹதி பரிக்³க³ய்ஹதீதி வா ராஜக³ஹ’’ந்தி ஏதி³ஸே பகாரே. ஸோ பதே³ஸோ டா²னவிஸேஸபா⁴வேன உளாரஸத்தபரிபோ⁴கோ³தி ஆஹ ‘‘தம் பனேத’’ந்திஆதி³. தத்த² பு³த்³த⁴காலே சக்கவத்திகாலே சாதி இத³ம் யேபு⁴ய்யவஸேன வுத்தம். தேஸந்தி யக்கா²னம். வஸனவனந்தி ஆபானபூ⁴மிபூ⁴தம் உபவனம். கி³ஜ்ஜா² ஏத்த² ஸந்தீதி கி³ஜ்ஜ²ம், கூடம். தம் ஏதஸ்ஸாதி கி³ஜ்ஜ²கூடோ. கி³ஜ்ஜோ² வியாதி வா கி³ஜ்ஜ²ம், கூடம். தம் ஏதஸ்ஸாதி கி³ஜ்ஜ²கூடோ, பப்³ப³தோ. கி³ஜ்ஜ²ஸதி³ஸகூடோதி கி³ஜ்ஜ²கூடோதி வா மஜ்ஜே²பத³லோபீஸமாஸோ யதா² ‘‘ஸாகபத்த²வோ’’தி, தஸ்மிம் கி³ஜ்ஜ²கூடே. தேனாஹ ‘‘கி³ஜ்ஜா²’’திஆதி³.

ததோ பரம் ஸங்கோ⁴தி திண்ணம் ஜனானம் உபரி ஸங்கோ⁴ சதுவக்³க³கரணீயாதி³கம்மப்பத்தத்தா. தஸ்மிம் பப்³ப³தே ஸன்னிபதித்வா ஸமாபத்தியா வீதினாமேந்தீதி யதா²பா²ஸுகட்டா²னே பிண்டா³ய சரித்வா கதப⁴த்தகிச்சா ஆக³ந்த்வா சேதியக³ப்³பே⁴ யமகமஹாத்³வாரம் விவரந்தா விய தம் பப்³ப³தம் த்³விதா⁴ கத்வா அந்தோ பவிஸித்வா ரத்திட்டா²னதி³வாட்டா²னானி மாபேத்வா தத்த² ஸமாபத்தியா வீதினாமேந்தி.

கதா³ பனேதே தத்த² வஸிம்ஸு? அதீதே கிர அனுப்பன்னே ததா²க³தே பா³ராணஸிம் உபனிஸ்ஸாய ஏகஸ்மிம் கா³மகே ஏகா குலதீ⁴தா கே²த்தம் ரக்க²தி, தஸ்ஸா கே²த்தகுடியா வீஹயோ ப⁴ஜ்ஜந்தியா தத்த² மஹாகரஞ்ஜபுப்ப²ப்பமாணா மஹந்தமஹந்தா மனோஹரா பஞ்சஸதமத்தா லாஜா ஜாயிம்ஸு. ஸா தே க³ஹேத்வா மஹதி பது³மினிபத்தே ட²பேஸி. தஸ்மிஞ்ச ஸமயே ஏகோ பச்சேகஸம்பு³த்³தோ⁴ தஸ்ஸா அனுக்³க³ஹத்த²ம் அவிதூ³ரே கே²த்தபாளியா க³ச்ச²தி. ஸா தம் தி³ஸ்வா பஸன்னமானஸா ஸுபுப்பி²தம் மஹந்தம் ஏகம் பது³மம் க³ஹேத்வா தத்த² லாஜே பக்கி²பித்வா பச்சேகபு³த்³த⁴ம் உபஸங்கமித்வா பஞ்சஹி லாஜஸதேஹி ஸத்³தி⁴ம் தம் பது³மபுப்ப²ம் த³த்வா பஞ்சபதிட்டி²தேன வந்தி³த்வா ‘‘இமஸ்ஸ, ப⁴ந்தே, புஞ்ஞஸ்ஸ ஆனுபா⁴வேன ஆனுபா⁴வஸம்பன்னே பஞ்சஸதபுத்தே லபே⁴ய்ய’’ந்தி பஞ்ச புத்தஸதானி பத்தே²ஸி. தஸ்மிம்யேவ க²ணே பஞ்சஸதா மிக³லுத்³த³கா ஸம்ப⁴தஸம்பா⁴ரா பரிபக்கபச்சேகபோ³தி⁴ஞாணா தஸ்ஸேவ பச்சேகபு³த்³த⁴ஸ்ஸ மது⁴ரமம்ஸம் த³த்வா ‘‘ஏதிஸ்ஸா புத்தா ப⁴வேய்யாமா’’தி பத்த²யிம்ஸு. அதீதாஸு அனேகாஸு ஜாதீஸு தஸ்ஸா புத்தபா⁴வேன ஆக³தத்தா ததா² தேஸம் அஹோஸி. ஸா யாவதாயுகம் ட²த்வா தே³வலோகே நிப்³ப³த்தி, ததோ சுதா ஜாதஸ்ஸரே பது³மக³ப்³பே⁴ நிப்³ப³த்தி. தமேகோ தாபஸோ தி³ஸ்வா படிஜக்³கி³. தஸ்ஸா பத³ஸா விசரந்தியா பது³த்³தா⁴ரே பது³த்³தா⁴ரே பூ⁴மிதோ பது³மானி உட்ட²ஹந்தி. ஏகோ வனசரகோ தி³ஸ்வா பா³ராணஸிரஞ்ஞோ ஆரோசேஸி. ராஜா தம் ஆனேத்வா அக்³க³மஹேஸிம் அகாஸி, தஸ்ஸா க³ப்³போ⁴ ஸண்டா²தி. மஹாபது³மகுமாரோ மாதுகுச்சி²யம் வஸி, ஸேஸா ப³ஹி நிக்க²ந்தம் க³ப்³ப⁴மலம் நிஸ்ஸாய ஸம்ஸேத³ஜபா⁴வேன நிப்³ப³த்தா. ‘‘ஓபபாதிகபா⁴வேனா’’தி கேசி. தே வயப்பத்தா உய்யானே பது³மஸ்ஸரே கீளந்தா ஏகேகஸ்மிம் பது³மே நிஸீதி³த்வா க²யவயம் பட்ட²பேத்வா பச்சேகபோ³தி⁴ஞாணம் நிப்³ப³த்தயிம்ஸு. அயம் தேஸம் ப்³யாகரணகா³தா² அஹோஸி –

‘‘ஸரோருஹம் பது³மபலாஸமத்ரஜம், ஸுபுப்பி²தம் ப⁴மரக³ணானுசிண்ணம்;

அனிச்சதாயம் வயதம் விதி³த்வா, ஏகோ சரே க²க்³க³விஸாணகப்போ’’தி. –

தஸ்மிம் காலே தே தத்த² வஸிம்ஸு. ததா³ சஸ்ஸ பப்³ப³தஸ்ஸ ‘‘இஸிகி³லீ’’தி ஸமஞ்ஞா உத³பாதி³. இமே இஸயோதி இமே பச்சேகபு³த்³த⁴இஸீ. ஸமா ஞாயதி ஏதாயாதி ஸமஞ்ஞா, நாமந்தி அத்தோ².

திணச்ச²த³னா குடியோ மஜ்ஜே²பத³லோபீஸமாஸம் கத்வா, ஏகதே³ஸே வா ஸமுதா³யவோஹாரவஸேன ‘‘திணகுடியோ’’தி வுத்தா. ‘‘வஸ்ஸம் உபக³ச்சி²ம்ஸூ’’தி வசனதோ வஸ்ஸூபக³மனாரஹா ஸத்³வாரப³ந்தா⁴ ஏவ வேதி³தப்³பா³தி ஆஹ ‘‘திணச்ச²த³னா ஸத்³வாரப³ந்தா⁴ குடியோ’’தி. வஸ்ஸம் உபக³ச்ச²ந்தேனாதி வஸ்ஸாவாஸம் உபக³ச்ச²ந்தேன. நாலகபடிபத³ந்தி ‘‘மோனேய்யம் தே உபஞ்ஞிஸ்ஸ’’ந்திஆதி³னா (ஸு. நி. 721) ஸத்தா²ரா நாலகத்தே²ரஸ்ஸ தே³ஸிதம் புது²ஜ்ஜனகாலதோ பபு⁴தி கிலேஸசித்தம் அனுப்பாதே³த்வா படிபஜ்ஜிதப்³ப³ம் மோனேய்யபடிபத³ம். தம் பன படிபத³ம் ஸுத்வா நாலகத்தே²ரோ தீஸு டா²னேஸு அப்பிச்சோ² அஹோஸி த³ஸ்ஸனே ஸவனே புச்சா²யாதி. ஸோ ஹி தே³ஸனாபரியோஸானே பஸன்னசித்தோ ப⁴க³வந்தம் வந்தி³த்வா வனம் பவிட்டோ². புன ‘‘அஹோ வதாஹம் ப⁴க³வந்தம் பஸ்ஸேய்ய’’ந்தி லோலபா⁴வம் ந ஜனேஸி, அயமஸ்ஸ த³ஸ்ஸனே அப்பிச்ச²தா. ததா² ‘‘அஹோ வதாஹம் புன த⁴ம்மதே³ஸனம் ஸுணேய்ய’’ந்தி லோலபா⁴வம் ந ஜனேஸி, அயமஸ்ஸ ஸவனே அப்பிச்ச²தா. ததா² ‘‘அஹோ வதாஹம் புன மோனேய்யபடிபத³ம் புச்சே²ய்ய’’ந்தி லோலபா⁴வம் ந ஜனேஸி, அயமஸ்ஸ புச்சா²ய அப்பிச்ச²தா.

ஸோ ஏவம் அப்பிச்சோ² ஸமானோ பப்³ப³தபாத³ம் பவிஸித்வா ஏகவனஸண்டே³ த்³வே தி³வஸானி ந வஸி, ஏகருக்க²மூலே த்³வே தி³வஸானி ந நிஸீதி³, ஏகஸ்மிம் கா³மே த்³வே தி³வஸானி பிண்டா³ய ந பாவிஸி. இதி வனதோ வனம், ருக்க²தோ ருக்க²ம், கா³மதோ கா³மம் ஆஹிண்ட³ந்தோ அனுரூபபடிபத³ம் படிபஜ்ஜித்வா அக்³க³ப²லே பதிட்டா²ஸி. ஏகஸ்ஸ ப⁴க³வதோ காலே ஏகோயேவ நம் பூரேதி. இமஞ்ஹி மோனேய்யபடிபத³ம் உக்கட்ட²ம் கத்வா பூரேந்தோ பி⁴க்கு² ஸத்தேவ மாஸானி ஜீவதி, மஜ்ஜி²மம் கத்வா பூரேந்தோ ஸத்த வஸ்ஸானி, முது³கம் கத்வா பூரேந்தோ ஸோளஸ வஸ்ஸானி. அயம் பன தே²ரோ உக்கட்ட²ம் கத்வா பூரேஸி, தஸ்மா ஸத்த மாஸே ட²த்வா அத்தனோ ஆயுஸங்கா²ரஸ்ஸ பரிக்க²யம் ஞத்வா நஹாயித்வா நிவாஸேத்வா காயப³ந்த⁴னம் ப³ந்தி⁴த்வா தி³கு³ணம் ஸங்கா⁴டிம் பாருபித்வா த³ஸப³லாபி⁴முகோ² பஞ்சபதிட்டி²தேன தம் வந்தி³த்வா அஞ்ஜலிம் பக்³க³ஹேத்வா ஹிங்கு³லகபப்³ப³தம் நிஸ்ஸாய டி²தகோவ அனுபாதி³ஸேஸாய நிப்³பா³னதா⁴துயா பரினிப்³பா³யி. தஸ்ஸ பரினிப்³பு³தபா⁴வம் ஞத்வா ப⁴க³வா பி⁴க்கு²ஸங்கே⁴ன ஸத்³தி⁴ம் தத்த² க³ந்த்வா ஸரீரகிச்சம் கத்வா தா⁴துயோ கா³ஹாபேத்வா சேதியம் பதிட்டா²பேத்வா அக³மாஸி. ஏவரூபம் படிபத³ம் படிபன்னேனபி வஸ்ஸம் உபக³ச்ச²ந்தேன ச²ன்னே ஸத்³வாரப³ந்தே⁴யேவ டா²னே உபக³ந்தப்³ப³ம். அப்பிச்ச²தம் நிஸ்ஸாயபி ஸிக்கா²பத³ஸ்ஸ அனதிக்கமனீயத்தம் த³ஸ்ஸேதும் ‘‘நாலகபடிபத³ம் படிபன்னேனபீ’’தி வுத்தம்.

பஞ்சன்னம் ச²த³னானந்தி திணபண்ணஇட்ட²கஸிலாஸுதா⁴ஸங்கா²தானம் பஞ்சன்னம் ச²த³னானம். ‘‘ந, பி⁴க்க²வே, அஸேனாஸனிகேன வஸ்ஸம் உபக³ந்தப்³ப³ந்தி (மஹாவ. 204) வசீபே⁴த³ம் கத்வா வஸ்ஸூபக³மனம் ஸந்தா⁴யேவ படிக்கே²போ, ந ஆலயகரணவஸேன உபக³மனம் ஸந்தா⁴யா’’தி வத³ந்தி. பாளியம் பன அவிஸேஸத்தா அட்ட²கதா²யஞ்ச ‘‘நாலகபடிபத³ம் படிபன்னேனபீ’’திஆதி³னா அவிஸேஸேனேவ த³ள்ஹம் கத்வா வுத்தத்தா அஸேனாஸனிகஸ்ஸ நாவாதி³ம் வினா அஞ்ஞத்த² ஆலயோ ந வட்டதீதி அம்ஹாகம் க²ந்தி. நாவாஸத்த²வஜேஸுயேவ ஹி ‘‘அனுஜானாமி, பி⁴க்க²வே, நாவாயம் வஸ்ஸம் உபக³ந்து’’ந்திஆதி³னா (மஹாவ. 203) ஸதி அஸதி வா ஸேனாஸனே வஸ்ஸூபக³மனஸ்ஸ விஸும் அனுஞ்ஞாதத்தா ‘‘ந, பி⁴க்க²வே, அஸேனாஸனிகேன வஸ்ஸம் உபக³ந்தப்³ப³’’ந்தி அயம் படிக்கே²போ தத்த² ந லப்³ப⁴தீதி அஸதி ஸேனாஸனே ஆலயவஸேனபி நாவாதீ³ஸு உபக³மனம் வுத்தம். அனுத⁴ம்மதாதி வத்தம். ரத்திட்டா²னதி³வாட்டா²னாதீ³னீதி ஆதி³-ஸத்³தே³ன வச்சகுடிபஸ்ஸாவட்டா²னாதி³ம் ஸங்க³ண்ஹாதி.

கதிகவத்தானி ச க²ந்த⁴கவத்தானி ச அதி⁴ட்டா²யாதி பரியத்தித⁴ம்மோ நாம திவித⁴ம்பி ஸத்³த⁴ம்மம் பதிட்டா²பேதி, தஸ்மா ஸக்கச்சம் உத்³தி³ஸத² உத்³தி³ஸாபேத², ஸஜ்ஜா²யம் கரோத², பதா⁴னக⁴ரே வஸந்தானம் ஸங்க⁴ட்டனம் அகத்வா அந்தோவிஹாரே நிஸீதி³த்வா உத்³தி³ஸத² உத்³தி³ஸாபேத², ஸஜ்ஜா²யம் கரோத², த⁴ம்மஸ்ஸவனம் ஸமித்³த⁴ம் கரோத², பப்³பா³ஜேந்தா ஸோதே⁴த்வா பப்³பா³ஜேத², ஸோதே⁴த்வா உபஸம்பாதே³த², ஸோதே⁴த்வா நிஸ்ஸயம் தே³த². ஏகோபி ஹி குலபுத்தோ பப்³ப³ஜ்ஜஞ்ச உபஸம்பத³ஞ்ச லபி⁴த்வா ஸகலம் ஸாஸனம் பதிட்டா²பேதி. அத்தனோ தா²மேன யத்தகானி ஸக்கோத², தத்தகானி து⁴தங்கா³னி ஸமாதி³யத², அந்தோவஸ்ஸம் நாமேதம் ஸகலதி³வஸம் ரத்தியா ச பட²மபச்சி²மயாமேஸு அப்பமத்தேஹி ப⁴விதப்³ப³ம், வீரியம் ஆரபி⁴தப்³ப³ம். போராணகமஹஆதே²ராபி ஸப்³ப³பலிபோ³தே⁴ சி²ந்தி³த்வா அந்தோவஸ்ஸே ஏகசரியவத்தம் பூரயிம்ஸு. ப⁴ஸ்ஸே மத்தம் ஜானித்வா த³ஸவத்து²ககத²ம் த³ஸஅஸுப⁴த³ஸானுஸ்ஸதிஅட்ட²திம்ஸாரம்மணகத²ம் காதும் வட்டதி. ஆக³ந்துகானம் வத்தம் காதும், ஸத்தாஹகரணீயேன க³தானம் அபலோகேத்வா தா³தும் வட்டதி. விக்³கா³ஹிகபிஸுணப²ருஸவசனானி மா வத³த², தி³வஸே தி³வஸே ஸீலானி ஆவஜ்ஜேந்தா சதுராரக்க²ம் அஹாபேந்தா மனஸிகாரப³ஹுலா விஹரத², சேதியம் வா போ³தி⁴ம் வா வந்த³ந்தேன க³ந்த⁴மாலம் வா பூஜேந்தேன பத்தம் வா த²விகாய பக்கி²பந்தேன ந கதே²தப்³ப³ம், அந்தோகா³மே மனுஸ்ஸேஹி ஸத்³தி⁴ம் பச்சயஸம்யுத்தகதா² வா விஸபா⁴க³கதா² வா ந கதே²தப்³பா³, ரக்கி²திந்த்³ரியேஹி ப⁴விதப்³ப³ம், க²ந்த⁴கவத்தஞ்ச ஸேகி²யவத்தஞ்ச பூரேதப்³ப³ந்தி ஏவமாதி³னா கதிகவத்தானி க²ந்த⁴கவத்தானி ச அதி⁴ட்ட²ஹித்வா.

‘‘அனுஜானாமி, பி⁴க்க²வே, வஸ்ஸம்வுட்டா²னம் தீஹி டா²னேஹி பவாரேது’’ந்தி (மஹாவ. 209) வுட்ட²வஸ்ஸானம் பவாரணாய அனுஞ்ஞாதத்தா இமஸ்ஸ ஸுத்தஸ்ஸ வஸேன பவாரணாதி³வஸஸ்ஸ அருணுக்³க³மனதோ பட்டா²ய அப்பவாரிதாபி ‘‘வுட்ட²வஸ்ஸா’’தி வுச்சந்தி. கிஞ்சாபி ‘‘இமம் தேமாஸம் வஸ்ஸம் உபேமீ’’தி (மஹாவ. அட்ட². 184) வசனதோ பவாரணாதி³வஸஸ்ஸ தேமாஸந்தோக³த⁴த்தா தம் தி³வஸம் யாவ ந பவாரேந்தி, தாவ வஸ்ஸம் வஸந்தா நாம ஹோந்தி, ததா²பி ஏகதே³ஸேன அவுட்ட²ம்பி தம் தி³வஸம் வுட்ட²பா⁴கா³பேக்கா²ய வுட்ட²மேவ ஹோதீதி கத்வா ஏவம் வுத்தம் கதாகதபா⁴கா³பேக்கா²ய ஸமுதா³யே பவத்தகதாகதவோஹாரோ விய. விப்பகதஞ்ஹி யம் கிஞ்சி ‘‘கதாகத’’ந்தி வுச்சதி. ‘‘அனுஜானாமி, பி⁴க்க²வே, வஸ்ஸம்வுட்டா²னம் கதி²னம் அத்த²ரிது’’ந்தி (மஹாவ. 306) இமஸ்ஸ பன ஸுத்தஸ்ஸ வஸேன நிப்பரியாயதோ மஹாபவாரணாய பவாரிதா பாடிபத³தி³வஸதோ பட்டா²ய ‘‘வுட்ட²வஸ்ஸா’’தி வுச்சந்தீதி த³ஸ்ஸேதும் ‘‘மஹாபவாரணாய பவாரிதா’’திஆதி³ வுத்தம். பாடிபத³தி³வஸதோ பட்டா²ய ஹி வஸ்ஸானஸ்ஸ பச்சி²மே மாஸே கதி²னத்தா²ரோ அனுஞ்ஞாதோ பரிவாரே ‘‘கதி²னஸ்ஸ அத்தா²ரமாஸோ ஜானிதப்³போ³தி வஸ்ஸானஸ்ஸ பச்சி²மோ மாஸோ ஜானிதப்³போ³’’தி (பரி. 412) வுத்தத்தா. ‘‘மஹாபவாரணாய பவாரிதா’’தி இத³ஞ்ச புரிமிகாய வஸ்ஸூபக³தானம் ஸபா⁴வத³ஸ்ஸனமத்தம், கேனசி அந்தராயேன அப்பவாரிதாபி ‘‘வுட்ட²வஸ்ஸா’’இச்சேவ வுச்சந்தி.

‘‘ஆபுச்சி²தப்³பா³’’தி வத்வா இதா³னி ஆபுச்ச²னவிதி⁴ம் த³ஸ்ஸேந்தோ ‘‘ஸசே இமம் குடி’’ந்திஆதி³மாஹ. படிஜக்³க³னகம் வா ந லப⁴தீதி விஹாரபச்சந்தே கதே படிஜக்³க³னகம் ந லப⁴தி. தே பன பி⁴க்கூ² ஜனபத³சாரிகம் பக்கமிம்ஸூதி ஸம்ப³ந்தோ⁴. அத்³தா⁴னக³மனே சாரிகாவோஹாரோ ஸாஸனே நிருள்ஹோ. கிஞ்சாபி அயம் சாரிகா நாம மஹாஜனஸங்க³ஹத்த²ம் பு³த்³தா⁴னம்யேவ லப்³ப⁴தி, பு³த்³தே⁴ உபாதா³ய பன ருள்ஹீஸத்³த³வஸேன ஸாவகானம்பி வுச்சதி கிலஞ்ஜாதீ³ஹி கதபீ³ஜனீனம்பி தாலவண்டவோஹாரோ விய. ஸங்கோ³பேத்வாதி ஏகஸ்மிம் பதே³ஸே ராஸிம் கத்வா. இதா³னி தமேவ ஸங்கோ³பனவிதி⁴ம் த³ஸ்ஸேந்தோ ‘‘யதா² ச ட²பித’’ந்திஆதி³மாஹ. ந ஓவஸ்ஸீயதீதி அனோவஸ்ஸகம், கம்மனி அக-ஸத்³தோ³ த³ட்ட²ப்³போ³. யதா² ச ட²பிதம் ந ஓவஸ்ஸீயதி ந தேமீயதீதி அத்தோ².

அனவயோதி ஏத்த² வயோதி ஹானி ‘‘ஆயவயோ’’திஆதீ³ஸு விய. நத்தி² ஏதஸ்ஸ அத்தனோ ஸிப்பே வயோ ஊனதாதி அவயோதி ஆஹ ‘‘அனூனோ பரிபுண்ணஸிப்போ’’தி. ஆசரியஸ்ஸ கம்மம் ஆசரியகந்தி ஆஹ ‘‘ஆசரியகம்மே’’தி. பிட்ட²ஸங்கா⁴டோ த்³வாரபா³ஹா, கட்ட²கம்மம் த²ம்பா⁴தி³. தேலதம்ப³மத்திகாயாதி தேலமிஸ்ஸதம்ப³மத்திகாய.

85. குடிகாய கரணபா⁴வந்தி குடியா கதபா⁴வம். ஸத்³த³ஸத்த²விதூ³ஹி கிம்-ஸத்³த³யோகே³ அனாக³தவசனஸ்ஸ இச்சி²தத்தா வுத்தம் ‘‘தஸ்ஸ லக்க²ணம் ஸத்³த³ஸத்த²தோ பரியேஸிதப்³ப³’’ந்தி. மேத்தாபுப்³ப³பா⁴க³ந்தி மேத்தாஜா²னஸ்ஸ புப்³ப³பா⁴க³பூ⁴தம் ஸப்³ப³ஸத்தேஸு ஹிதப²ரணமத்தம். கஸ்மா பனேதம் வுத்தம், நனு அனுத்³த³யா-ஸத்³தோ³ கருணாய பவத்ததீதி? ஸச்சமேதம், அயம் பன அனுத்³த³யாஸத்³தோ³ அனுரக்க²ணமத்த²ம் அந்தோனீதம் கத்வா பவத்தமானோ மேத்தாய கருணாய ச பவத்ததீதி இத⁴ மேத்தாய பவத்தமானோ வுத்தோ, தஸ்மா ஸுவுத்தமேதம் ‘‘ஏதேன மேத்தாபுப்³ப³பா⁴க³ம் த³ஸ்ஸேதீ’’தி. கருணாபுப்³ப³பா⁴க³ந்தி கருணாஜா²னஸ்ஸ புப்³ப³பா⁴க³பூ⁴தம் ஸத்தேஸு அனுகம்பமத்தம். சிக்க²ல்லம் மத்திகா, தஸ்ஸ மத்³த³னம் உத³கம் ஆஸிஞ்சித்வா ஹத்தா²தீ³ஹி பரிமத்³த³னம். மேத்தாகருணானந்தி அப்பனாப்பத்தமேத்தாகருணானம். கிஞ்சாபி தே²ரேன ஸஞ்சிச்ச கு²த்³தா³னுகு²த்³த³கா பாணா மரணாதி⁴ப்பாயேன ந ப்³யாபா³தி⁴தா, ததா²பி கருணாய அபா⁴வேன ‘‘ஏவம் கதே இமே பாணா வினஸ்ஸிஸ்ஸந்தீ’’தி அனுபபரிக்கி²த்வா கதத்தா தே²ரம் விக³ரஹி. ஜனானம் ஸமூஹோ ஜனதாதி ஆஹ ‘‘பச்சி²மோ ஜனஸமூஹோ’’தி. பாதப்³யபா⁴வந்தி வினாஸேதப்³ப³தம். பாணாதிபாதம் கரோந்தானந்தி தே²ரேன அகதேபி பாணாதிபாதே பரேஹி ஸல்லக்க²ணாகாரம் த³ஸ்ஸேதி. இமஸ்ஸ தி³ட்டா²னுக³திந்தி இமஸ்ஸ தி³ட்டி²யா அனுக³மனம். க⁴ம்ஸிதப்³பே³தி க⁴ட்டயிதப்³பே³, வினாஸிதப்³பே³தி அத்தோ². ஏவம் மஞ்ஞீதி யதா² தே²ரேன கதம், ஏவம் மா மஞ்ஞி. ‘‘மா பச்சி²மா ஜனதா பாணேஸு பாதப்³யதம் ஆபஜ்ஜீ’’தி வசனதோ யோ பி⁴க்கு² இட்ட²கபசனபத்தபசனகுடிகரணவிஹாரகாராபனவிஹாரஸம்மஜ்ஜனபடக்³கி³தா³னகூபபோக்க²ரணீக²ணாபனாதீ³ஸு யத்த² ‘‘கு²த்³தா³னுகு²த்³த³கானம் பாணானம் விஹிம்ஸா ப⁴விஸ்ஸதீ’’தி ஜானாதி, தேன தாதி³ஸே பதே³ஸே கப்பியவசனம் வத்வாபி ந தம் கம்மம் காரேதப்³ப³ந்தி த³ஸ்ஸேதி.

தத்த² தத்த² வுத்தமேவ ஆபத்திந்தி பத²வீக²ணனபூ⁴தகா³மபாதப்³யதாதீ³ஸு வுத்தபாசித்தியாதி³ஆபத்திம். ஆதி³கம்மிகத்தா அனாபத்தீதி குடிகரணபச்சயா அனாபத்தி. ஸிக்கா²பத³ம் அதிக்கமித்வாதி ‘‘ந ச, பி⁴க்க²வே, ஸப்³ப³மத்திகாமயா குடிகா காதப்³பா³, யோ கரேய்ய, ஆபத்தி து³க்கடஸ்ஸா’’தி வுத்தஸிக்கா²பத³ம் அதிக்கமித்வா. யதி³ அஞ்ஞேன கதம் லபி⁴த்வா வஸந்தஸ்ஸ அனாபத்தி ஸியா, ந ப⁴க³வா தம் குடிகம் பி⁴ந்தா³பேய்யாதி ஆஹ – ‘‘கதம் லபி⁴த்வா தத்த² வஸந்தானம்பி து³க்கடமேவா’’தி. யதா² வா ததா² வா மிஸ்ஸா ஹோதூதி ஹேட்டா² மத்திகா உபரி த³ப்³ப³ஸம்பா⁴ராதிஆதி³னா யேன கேனசி ஆகாரேன மிஸ்ஸா ஹோது. கி³ஞ்ஜகாவஸத²ஸங்கே²பேனாதி ஏத்த² கி³ஞ்ஜகா வுச்சந்தி இட்ட²கா, கி³ஞ்ஜகாஹி ஏவ கதோ ஆவஸதோ² கி³ஞ்ஜகாவஸதோ². இட்ட²காமயஸ்ஸ ஆவஸத²ஸ்ஸேதம் அதி⁴வசனம். தம் கிர ஆவஸத²ம் யதா² ஸுதா⁴பரிகம்மேன பயோஜனம் நத்தி², ஏவம் இட்ட²காஹி ஏவ சினித்வா சா²தே³த்வா கரோந்தி, துலாத³ண்ட³கவாடப²லகானி பன தா³ருமயானேவ. விகிரந்தாதி சுண்ணவிசுண்ணம் கரோந்தா.

கிஸ்ஸாதி கேன காரணேன. வயகம்மம்பி அத்தீ²தி த்³வாரகவாடாதி³அபி⁴ஸங்க²ரணாதீ³ஸு கதவயகம்மம்பி அத்தி². பி⁴க்கூ²னம் அகப்பியத்தா ஏவ தித்தி²யவதானுரூபத்தா தித்தி²யத⁴ஜோ. மஹாஅட்ட²கதா²யம் வுத்தகாரணேஸு அத்தனோ அதி⁴ப்பேதகாரணத்³வயம் பதிட்டா²பேத்வா அபரானிபி தத்த² வுத்தகாரணானி த³ஸ்ஸேந்தோ ஆஹ – ‘‘அட்ட²கதா²யம் பன அஞ்ஞானிபி காரணானி வுத்தானீ’’திஆதி³. தத்த² ஸத்தானுத்³த³யாயாதி தாதி³ஸாய குடிகாய கரணபச்சயா வினஸ்ஸமானஸத்தேஸு அனுத்³த³யாய. யஸ்மா ஸப்³ப³மத்திகாமயா குடி ஸுகரா பி⁴ந்தி³தும், தஸ்மா தத்த² ட²பிதம் பத்தசீவராதி³ அகு³த்தம் ஹோதி, சோராதீ³ஹி அவஹரிதும் ஸக்கா. தேன வுத்தம் ‘‘பத்தசீவரகு³த்தத்தா²யா’’தி. ஸேனாஸனபா³ஹுல்லபடிஸேத⁴னத்தா²யாதி ஸேனாஸனானம் ப³ஹுபா⁴வனிஸேத⁴னத்தா²ய, தாதி³ஸஸ்ஸ வா ஸேனாஸனஸ்ஸ அபி⁴ஸங்க²ரணே பி⁴க்கூ²னம் உத்³தே³ஸபரிபுச்சா²தீ³னி ஸேஸகம்மானி பரிச்சஜித்வா நிச்சப்³யாவடதானிஸேத⁴னத்த²ம். அனுபவஜ்ஜோதி தோ³ஸம் ஆரோபேத்வா ந வத்தப்³போ³.

பாளிமுத்தகவினிச்ச²யவண்ணனா

பாளிமுத்தகவினிச்ச²யேஸு தஞ்ச கோ²…பே… ந வண்ணமட்ட²த்தா²யாதி இத³ம் ச²த்தத³ண்ட³க்³கா³ஹகஸலாகபஞ்ஜரவினந்த⁴னம் ஸந்தா⁴யாதி வத³ந்தி. ஸப்³ப³த்தா²தி ச²த்தத³ண்டே³ ஸப்³ப³த்த². ஆரக்³கே³னாதி நிகா²த³னமுகே²ன. க⁴டகம்பி வாளரூபம்பி பி⁴ந்தி³த்வா தா⁴ரேதப்³ப³ந்தி ஸசே தாதி³ஸம் அகப்பியச²த்தம் லப⁴தி, க⁴டகம்பி வாளரூபம்பி பி⁴ந்தி³த்வா தச்சே²த்வா தா⁴ரேதப்³ப³ம். ஸுத்தகேன வா த³ண்டோ³ வேடே²தப்³போ³தி யதா² ச²த்தத³ண்டே³ லேகா² ந பஞ்ஞாயதி, ததா² வேடே²தப்³போ³. த³ண்ட³பு³ந்தே³தி த³ண்ட³மூலே, ச²த்தத³ண்ட³ஸ்ஸ ஹேட்டி²மதலேதி அத்தோ². ச²த்தமண்ட³லிகந்தி ச²த்தஸ்ஸ அந்தோ கு²த்³த³கமண்ட³லம். உக்கிரித்வாதி உட்ட²பேத்வா. ஸா வட்டதீதி யதி³பி ரஜ்ஜுகேஹி ந ப³ந்த⁴ந்தி, ப³ந்தி⁴தும் பன யுத்தட்டா²னத்தா வட்டதி.

நானாஸுத்தகேஹீதி நானாவண்ணேஹி ஸுத்தேஹி. இத³ஞ்ச ததா² கரோந்தானம் கரணப்பகாரத³ஸ்ஸனத்த²ம் வுத்தம், ஏகவண்ணஸுத்தகேனபி வுத்தப்பகாரேன ஸிப்³பி³தும் ந வட்டதியேவ. பட்டமுகே²தி பட்டகோடியம். த்³வின்னம் பட்டானம் ஸங்க⁴ட்டிதட்டா²னம் ஸந்தா⁴யேதம் வுத்தம். பரியந்தேதி சீவரபரியந்தே. சீவரஅனுவாதம் ஸந்தா⁴யேதம் வுத்தம். வேணிந்தி வரகஸீஸாகாரேன ஸிப்³ப³னம். ஸங்க²லிகந்தி பி³ளாலப³ந்த⁴னாகாரேன ஸிப்³ப³னம். ‘‘வேணிம் ஸங்க²லிக’’ந்தி சேத்த² உபயோக³வசனம் ‘‘கரோந்தீ’’தி கரணகிரியாபேக்க²ம். அக்³கி⁴யக³யமுக்³க³ராதீ³னீதி ஏத்த² அக்³கி⁴யம் நாம சேதியஸண்டா²னேன ஸிப்³ப³னம், மூலே தனுகம் அக்³கே³ மஹந்தம் கத்வா க³தா³காரேன ஸிப்³ப³னம் க³யா, மூலே ச அக்³கே³ ச ஏகஸதி³ஸம் கத்வா முக்³க³ராகாரேன ஸிப்³ப³னம் முக்³க³ரோ. கக்கடக்கீ²னி உக்கிரந்தீதி க³ண்டி²கபட்டபாஸகபட்டானம் அந்தே பாளிப³த்³த⁴ம் கத்வா கக்கடகானம் அக்கி²ஸண்டா²னம் உட்ட²பேந்தி, கரோந்தீதி அத்தோ². ‘‘கோணஸுத்தபிளகாதி க³ண்டி²கபாஸகபட்டானம் கோணேஹி நீஹடஸுத்தானம் கோடியோ’’தி தீஸுபி க³ண்டி²பதே³ஸு வுத்தம். கத²ம் பன தா பிளகா து³விஞ்ஞேய்யரூபா காதப்³பா³தி? கோணேஹி நீஹடஸுத்தானம் அந்தேஸு ஏகவாரம் க³ண்டி²ககரணேன வா புன நிவத்தேத்வா ஸிப்³ப³னேன வா து³விஞ்ஞேய்யஸபா⁴வம் கத்வா ஸுத்தகோடியோ ரஸ்ஸம் கத்வா சி²ந்தி³தப்³பா³. த⁴ம்மஸிரித்தே²ரேன பன –

‘‘கோணஸுத்தா ச பிளகா, து³விஞ்ஞேய்யாவ கப்பரே’’தி –

வுத்தம். ததா² ஆசரியபு³த்³த⁴த³த்தத்தே²ரேனபி –

‘‘ஸுத்தா ச பிளகா தத்த², து³விஞ்ஞேய்யாவ தீ³பிதா’’தி –

வுத்தம். தஸ்மா தேஸம் மதேன கோணஸுத்தா ச பிளகா ச கோணஸுத்தபிளகாதி ஏவமேத்த² அத்தோ² த³ட்ட²ப்³போ³.

மணினாதி மஸாரக³ல்லாதி³பாஸாணேன. ந க⁴ட்டேதப்³ப³ந்தி ந க⁴ம்ஸிதப்³ப³ம், அம்ஸப³த்³த⁴ககாயப³ந்த⁴னானி பன ஸங்கா²தீ³ஹி க⁴ம்ஸிதும் வட்டதி. பாஸகம் கத்வா ப³ந்தி⁴தப்³ப³ந்தி ரஜனகாலே ப³ந்தி⁴தப்³ப³ம், ஸேஸகாலே மோசேத்வா ட²பேதப்³ப³ம். க³ண்டி²கேதி த³ந்தமயாதி³க³ண்டி²கே. பிளகாதி பி³ந்து³ம் பி³ந்து³ம் கத்வா உட்டா²பேதப்³ப³பிளகா.

‘‘தேலவண்ணோதி ஸமணஸாருப்பவண்ணம் ஸந்தா⁴ய வுத்தம், மணிவண்ணம் பன பத்தம் அஞ்ஞேன கதம் லபி⁴த்வா பரிபு⁴ஞ்ஜிதும் வட்டதீ’’தி வத³ந்தி. பத்தமண்ட³லேதி திபுஸீஸாதி³மயே பத்தமண்ட³லே. ‘‘ந, பி⁴க்க²வே, சித்ரானி பத்தமண்ட³லானி தா⁴ரேதப்³பா³னி ரூபகாகிண்ணானி பி⁴த்திகம்மகதானீ’’தி (சூளவ. 253) வுத்தத்தா ‘‘பி⁴த்திகம்மம் ந வட்டதீ’’தி வுத்தம். ‘‘அனுஜானாமி, பி⁴க்க²வே, மகரத³ந்தகம் சி²ந்தி³து’’ந்தி வசனதோ ‘‘மகரத³ந்தகம் பன வட்டதீ’’தி வுத்தம்.

மகரமுக²ந்தி மகரமுக²ஸண்டா²னம். தே³ட்³டு⁴ப⁴ஸீஸந்தி உத³கஸப்பஸீஸஸண்டா²னம். அச்சீ²னீதி குஞ்ஜரச்சி²ஸண்டா²னானி. ரஜ்ஜுககாயப³ந்த⁴னம் ஏகமேவ வட்டதீதி ரஜ்ஜுகம் ப³ந்த⁴ந்தேன ஏககு³ணமேவ கத்வா ப³ந்தி⁴தும் வட்டதி, மஜ்ஜே² பி⁴ந்தி³த்வா தி³கு³ணம் கத்வா ப³ந்தி⁴தும் ந வட்டதி, தி³கு³ணம் பன அகத்வா ஏகரஜ்ஜுகமேவ ஸதவாரம்பி புனப்புனம் ஆவிஜ்ஜித்வா ப³ந்தி⁴தும் வட்டதி. ஏகம்பி ந வட்டதீதி ஏககு³ணம்பி கத்வா ப³ந்தி⁴தும் ந வட்டதி. ப³ஹுரஜ்ஜுகே…பே... வட்டதீதி இத³ம் காயப³ந்த⁴னம் ஸந்தா⁴ய வுத்தம், ந த³ஸா ஸந்தா⁴ய. ஈதி³ஸஞ்ஹி காயப³ந்த⁴னம் ப³ந்தி⁴தும் வட்டதி. தேனேவ ஆசரியபு³த்³த⁴த³த்தத்தே²ரேன வுத்தம் –

‘‘ஏகரஜ்ஜுமயம் வுத்தம், முனினா காயப³ந்த⁴னம்;

பஞ்சபாமங்க³ஸண்டா²னம், ஏகம்பி ச ந வட்டதி.

‘‘ரஜ்ஜுகே ஏகதோ கத்வா, ப³ஹூ ஏகாய ரஜ்ஜுயா;

நிரந்தரஞ்ஹி வேடே²த்வா, கதம் வட்டதி ப³ந்தி⁴து’’ந்தி.

முரஜம் பன காயப³ந்த⁴னம் ந வட்டதி ‘‘ந, பி⁴க்க²வே, உச்சாவசானி காயப³ந்த⁴னானி தா⁴ரேதப்³பா³னி கலாபு³கம் தே³ட்³டு⁴ப⁴கம் முரஜம் மத்³த³வீணம், யோ தா⁴ரேய்ய, ஆபத்தி து³க்கடஸ்ஸா’’தி (சூளவ. 278) வுத்தத்தா. கிம் பன ப³ஹுரஜ்ஜுகே ஏகதோ கத்வா ஏகேன நிரந்தரம் வேடே²த்வா கதம் முரஜஸங்க்²யம் ந க³ச்ச²தீதி? ஆம ந க³ச்ச²தி. முரஜஞ்ஹி நாம நானாவண்ணேஹி ஸுத்தேஹி முரஜவட்டிஸண்டா²னம் வேடே²த்வா கதம். கேசி பன ‘‘முரஜந்தி ப³ஹுரஜ்ஜுகே ஏகதோ ஸங்கட்³டி⁴த்வா ஏகாய ரஜ்ஜுயா பலிவேடே²த்வா கதரஜ்ஜூ’’தி வத³ந்தி, தம் ந க³ஹேதப்³ப³ம். யதி³ சேதம் முரஜம் ஸியா, ‘‘ப³ஹுரஜ்ஜுகே ஏகதோ கத்வா ஏகேன நிரந்தரம் வேடே²த்வா கதம் ப³ஹுரஜ்ஜுக’’ந்தி ந வத்தப்³ப³ம், ‘‘தம் வட்டதீ’’தி இத³ம் விருஜ்ஜே²ய்ய. முரஜம் பன பாமங்க³ஸண்டா²னஞ்ச த³ஸாஸு வட்டதி ‘‘காயப³ந்த⁴னஸ்ஸ த³ஸா ஜீரந்தி. அனுஜானாமி, பி⁴க்க²வே, முரஜம் மத்³த³வீண’’ந்தி (சூளவ. 278) வுத்தத்தா. தேனேவ வக்க²தி ‘‘அனுஜானாமி, பி⁴க்க²வே, முரஜம் மத்³த³வீணந்தி இத³ம் த³ஸாஸுயேவ அனுஞ்ஞாத’’ந்தி.

காயப³ந்த⁴னவிதே⁴தி ‘‘காயப³ந்த⁴னஸ்ஸ பவனந்தோ ஜீரதி. அனுஜானாமி, பி⁴க்க²வே, வித⁴’’ந்தி வுத்தத்தா காயப³ந்த⁴னஸ்ஸ பாஸந்தே த³ஸாமூலே தஸ்ஸ தி²ரபா⁴வத்த²ம் கத்தப்³பே³ த³ந்தவிஸாணாதி³மயே விதே⁴. ‘‘அட்ட² மங்க³லானி நாம ஸங்கோ² சக்கம் புண்ணகும்போ⁴ க³யா ஸிரீவச்சோ² அங்குஸோ த⁴ஜம் ஸோவத்தி²க’’ந்தி வத³ந்தி. பரிச்சே²த³லேகா²மத்தந்தி உபோ⁴ஸு கோடீஸு காதப்³ப³பரிச்சே²த³ராஜிமத்தம். ‘‘உஜுகமேவா’’தி வுத்தத்தா சதுரஸ்ஸாதி³வங்கக³திகம் ந வட்டதி. ‘‘ச²த்தத³ண்ட³த⁴ம்மகரணஅஞ்ஜனனாளிகா நானாவண்ணலேகா²பஅகம்மகதா ந வட்டந்தீ’’தி வத³ந்தி.

ஆரகண்டகேதி போத்த²காதி³அபி⁴ஸங்க²ரணத்த²ம் கதே தீ³க⁴முக²ஸத்த²கே. வட்டமணிகந்தி வட்டம் கத்வா அக்³க³கோடியம் உட்டா²பேதப்³ப³புப்³பு³ளம். அஞ்ஞம் வா வண்ணமட்ட²ந்தி இமினா பிளகாதி³ம் ஸங்க³ண்ஹாதி. மணிகந்தி ஏகாவட்டமணி. பிளகந்தி ஸாஸபமத்திகா முத்தராஜிஸதி³ஸா ப³ஹுவட்டலேகா². ‘‘இமஸ்மிம் அதி⁴காரே அவுத்தத்தா லேக²னியம் யம் கிஞ்சி வண்ணமட்ட²ம் வட்டதீ’’தி வத³ந்தி. வலிதகந்தி மஜ்ஜே² வலிம் உட்டா²பேத்வா. மண்ட³லம் ஹோதீதி உத்தராரணியா பவேஸனத்த²ம் ஆஹடமண்ட³லம் ஹோதி.

கிஞ்சாபி ஏத்த² த³ந்தகட்ட²ச்சே²த³னவாஸியேவ வுத்தா, மஹாவாஸியம்பி பன ந வட்டதியேவ. உஜுகமேவ ப³ந்தி⁴துந்தி ஸம்ப³ந்தோ⁴. ‘‘உபோ⁴ஸு வா பஸ்ஸேஸு ஏகபஸ்ஸேவா’’தி வசனஸேஸோ. கத்தரயட்டி²கோடியம் கதஅயோவலயானிபி வட்டந்தி, யேஸம் அஞ்ஞமஞ்ஞஸங்க⁴ட்டனேன ஸத்³தோ³ நிச்ச²ரதி.

ஆமண்ட³ஸாரகேதி ஆமலகேஹி கதபா⁴ஜனே. பூ⁴மத்த²ரணேதி சித்தகடஸாரகசித்தத்த²ரணாதி³கே பரிகம்மகதாய பூ⁴மியா அத்த²ரிதப்³ப³அத்த²ரணே. பானீயக⁴டேதி இமினா குண்டி³கஸரகேபி ஸங்க³ண்ஹாதி. பீ³ஜனேதி சதுரஸ்ஸபீ³ஜனே. ஸப்³ப³ம்…பே… வட்டதீதி யதா²வுத்தேஸு மஞ்சபீடா²தீ³ஸு இத்தி²ரூபம் வினா ஸப்³ப³ம் மாலாகம்மலதாகம்மாதி³ வண்ணமட்ட²ம் பி⁴க்கு²னோ வட்டதி. ஸேனாஸனே கிஞ்சி படிஸேதே⁴தப்³ப³ம் நத்தி² அஞ்ஞத்ர விருத்³த⁴ஸேனாஸனாதி ஏத்தா²யமதி⁴ப்பாயோ – ஸேனாஸனபரிக்கா²ரேஸு படிஸேதே⁴தப்³ப³ம் நாம கிஞ்சி நத்தி², விருத்³த⁴ஸேனாஸனம் பன ஸயமேவ படிக்கி²பிதப்³ப³ந்தி. அஞ்ஞேஸந்தி ஸீமஸாமினோ வுத்தா. ராஜவல்லபா⁴ பரனிகாயிகாபி ஏகனிகாயிகாபி உபோஸத²பவாரணானம் அந்தராயகரா அலஜ்ஜினோ ராஜகுலூபகா³ வுச்சந்தி. தேஸம் லஜ்ஜிபரிஸாதி தேஸம் ஸீமஸாமிகானம் பக்கா² ஹுத்வா அனுப³லம் தா³தும் ஸமத்தா² லஜ்ஜிபரிஸா. ஸுகதமேவாதி அஞ்ஞேஸம் ஸந்தகேபி அத்தனோ ஸீமாய அந்தோவுத்தவிதி⁴னா கதம் ஸுகதமேவ.

பாளிமுத்தகவினிச்ச²யவண்ணனா நிட்டி²தா.

86. தே³வேன க³ஹிததா³ரூனீதி ரஞ்ஞா பரிக்³க³ஹிததா³ரூனி, ரஞ்ஞோ ஸந்தகானீதி வுத்தம் ஹோதி. க²ண்டா³க²ண்ட³ம் கரோந்தோதி கு²த்³த³கம் மஹந்தஞ்ச க²ண்ட³ம் கரோந்தோ.

87. குலபோ⁴க³இஸ்ஸரியாதீ³ஹி மஹதீ மத்தா பமாணம் ஏதஸ்ஸாதி மஹாமத்தோ. தேனாஹ – ‘‘மஹதியா இஸ்ஸரியமத்தாய ஸமன்னாக³தோ’’தி.

88. அவஜ்ஜா²யந்தீதி ஹேட்டா² கத்வா ஓலோகேந்தி, சிந்தேந்தி வா. தேனாஹ ‘‘அவஜானந்தா’’திஆதி³. லாமகதோ வா சிந்தேந்தீதி நிஹீனதோ சிந்தேந்தி. கதே²ந்தீதி ‘‘கிம் நாமேதம் கிம் நாமேத’’ந்தி அஞ்ஞமஞ்ஞம் கதே²ந்தி.

கத²ம் பனேத்த² ‘‘தா³ரூனீ’’தி ப³ஹுவசனம் ‘‘அதி³ன்ன’’ந்தி ஏகவசனேன ஸத்³தி⁴ம் ஸம்ப³ந்த⁴முபக³ச்ச²தீதி ஆஹ – ‘‘அதி³ன்னம் ஆதி³யிஸ்ஸதீதி அயம் உஜ்ஜா²யனத்தோ²’’திஆதி³. உஜ்ஜா²யனஸ்ஸ அதி³ன்னாதா³னவிஸயத்தா அதி³ன்னாதா³னம் உஜ்ஜா²யனத்தோ²தி வுத்தம். ஸதிபி பனேத்த² கோ³பகேன தி³ன்னதா³ரூனம் க³ஹணே உஜுகம் அவத்வா லேஸேன க³ஹிதத்தா தே²ரோ ‘‘அதி³ன்னம் ஆதி³யீ’’தி வேதி³தப்³போ³. வசனபே⁴தே³தி ஏகவசனப³ஹுவசனானம் பே⁴தே³.

ஸப்³பா³வந்தம் பரிஸந்தி பி⁴க்கு²பி⁴க்கு²னீஆதி³ஸப்³பா³வயவவந்தம் பரிஸம். ஸப்³பா³ சதுபரிஸஸங்க²ஆதா பஜா ஏத்த² அத்தீ²தி ஸப்³பா³வந்தா, பரிஸா. ஸேனா ஏதஸ்ஸ அத்தீ²தி ஸேனிகோ, ஸேனிகோ ஏவ ஸேனியோ. பி³ம்பி³ஸாரோதி தஸ்ஸ நாமந்தி ஏத்த² பி³ம்பீ³தி ஸுவண்ணம், தஸ்மா ஸாரஸுவண்ணஸதி³ஸவண்ணதாய பி³ம்பி³ஸாரோதி வுச்சதீதி வேதி³தப்³போ³. சதுத்தோ² பா⁴கோ³ பாதோ³தி வேதி³தப்³போ³தி இமினாவ ஸப்³ப³ஜனபதே³ஸு கஹாபணஸ்ஸ வீஸதிமோ பா⁴கோ³ மாஸகோதி இத³ஞ்ச வுத்தமேவ ஹோதீதி த³ட்ட²ப்³ப³ம். போராணஸத்தா²னுரூபம் லக்க²ணஸம்பன்னா உப்பாதி³தா நீலகஹாபணாதி வேதி³தப்³பா³. ருத்³ரதா³மேன உப்பாதி³தோ ருத்³ரதா³மகோ. ஸோ கிர நீலகஹாபணஸ்ஸ திபா⁴க³ம் அக்³க⁴தி. யஸ்மிம் பதே³ஸே நீலகஹாபணா ந ஸந்தி, தத்தா²பி நீலகஹாபணானம் வளஞ்ஜனட்டா²னே ச அவளஞ்ஜனட்டா²னே ச ஸமானஅக்³க⁴வஸேன பவத்தமானம் ப⁴ண்ட³ம் க³ஹேத்வா நீலகஹாபணவஸேனேவ பரிச்சே²தோ³ காதப்³போ³தி வத³ந்தி.

த⁴னியவத்து²வண்ணனா நிட்டி²தா.

தஸ்ஸத்தோ²…பே… வுத்தனயேனேவ வேதி³தப்³போ³தி இமினா ‘‘ப⁴க³வதா பி⁴க்கூ²னம் இத³ம் ஸிக்கா²பத³ம் ஏவம் பஞ்ஞத்தம் ஹோதி ச, இத³ஞ்ச அஞ்ஞம் வத்து² உத³பாதீ³’’தி ஏவம் பட²மபாராஜிகவண்ணனாயம் (பாரா. அட்ட². 1.39) வுத்தனயேன தஸ்ஸத்தோ² வேதி³தப்³போ³. ‘‘இதா³னி யம் தம் அஞ்ஞம் வத்து² உப்பன்னம், தம் த³ஸ்ஸேதும் ‘தேன கோ² பன ஸமயேனா’திஆதி³மாஹா’’தி ஏவம் அனுபஞ்ஞத்திஸம்ப³ந்தோ⁴ ச தத்த² வுத்தனயேனேவ வேதி³தப்³போ³தி த³ஸ்ஸேதி.

90-91. ரஜகா அத்த²ரந்தி ஏத்தா²தி ரஜகத்த²ரணம், ரஜகத்த²ரணந்தி ரஜகதித்த²ம் வுச்சதீதி ஆஹ ‘‘ரஜகதித்த²ம் க³ந்த்வா’’தி. வுத்தமேவத்த²ம் விபா⁴வேந்தோ ஆஹ ‘‘தஞ்ஹீ’’திஆதி³.

பத³பா⁴ஜனீயவண்ணனா

92. ‘‘அபி⁴னவனிவிட்டோ² ஏககுடிகாதி³கா³மோ யாவ மனுஸ்ஸா பவிஸித்வா வாஸம் ந கப்பேந்தி, தாவ கா³மஸங்க்²யம் ந க³ச்ச²தீ’’தி வத³ந்தி, தஸ்மா தத்த² கா³மப்பவேஸனாபுச்சா²தி³கிச்சம்பி நத்தி². யக்க²பரிக்³க³ஹபூ⁴தோதி ஸஉபத்³த³வவஸேன வுத்தம், யக்க²னக³ராதி³ம் வா ஸங்க³ண்ஹாதி. யக்க²னக³ரம்பி ஆபணாதீ³ஸு தி³ஸ்ஸமானேஸு கா³மஸங்க்²யம் க³ச்ச²தி, அதி³ஸ்ஸமானேஸு ந க³ச்ச²தி, தஸ்மா யக்க²னக³ரம்பி பவிஸந்தேன ஆபணாதீ³ஸு தி³ஸ்ஸமானேஸு ஸப்³ப³ம் கா³மப்பவேஸனவத்தம் காதப்³ப³ம், அதி³ஸ்ஸமானேஸு ந காதப்³ப³ந்தி வத³ந்தி. புனபி ஆக³ந்துகாமாதி இமினா தேஸம் தத்த² ஸாபேக்க²பா⁴வம் த³ஸ்ஸேதி. யதோ பன நிரபேக்கா²வ ஹுத்வா பக்கமந்தி, ஸோ கா³மஸங்க்²யம் ந க³ச்ச²தி, தஸ்மா தத்த² கா³மப்பவேஸனாபுச்சா²தி³கிச்சம்பி நத்தி².

நனு ச ‘‘கா³மா வா அரஞ்ஞா வா’’தி ஏத்தகமேவ மாதிகாயம் வுத்தம், தஸ்மா கா³மலக்க²ணம் த³ஸ்ஸேத்வா அரஞ்ஞமேவ த³ஸ்ஸேதப்³ப³ம் ஸியா, கா³மூபசாரோ நாமாதிஆதி³ பன கஸ்மா வுத்தந்தி ஆஹ – ‘‘கா³மூபசாரோதிஆதி³ அரஞ்ஞபரிச்சே²த³த³ஸ்ஸனத்த²ம் வுத்த’’ந்தி. கா³மூபசாரே ஹி த³ஸ்ஸிதே ட²பேத்வா கா³மஞ்ச கா³மூபசாரஞ்ச அவஸேஸம் அரஞ்ஞம் நாமாதி அரஞ்ஞபரிச்சே²தோ³ ஸக்கா த³ஸ்ஸேதும், இத³ஞ்ச கா³மகா³மூபசாரே அஸங்கரதோ த³ஸ்ஸேதும் வுத்தம். மாதிகாயம் பன கா³மக்³க³ஹணேனேவ கா³மூபசாரோபி ஸங்க³ஹிதோதி த³ட்ட²ப்³ப³ம். கா³மூபசாரோ ஹி லோகே கா³மஸங்க்²யமேவ க³ச்ச²தி. ஏவஞ்ச கத்வா மாதிகாய அனவஸேஸஅவஹரணட்டா²னபரிக்³க³ஹோ ஸித்³தோ⁴ ஹோதி. இந்த³கீ²லேதி உம்மாரே. அரஞ்ஞஸங்கே²பம் க³ச்ச²தீதி ‘‘நிக்க²மித்வா ப³ஹி இந்த³கீ²லா ஸப்³ப³மேதம் அரஞ்ஞ’’ந்தி (விப⁴. 529) அபி⁴த⁴ம்மே வுத்தத்தா. வேமஜ்ஜ²மேவ இந்த³கீ²லோதி வுச்சதீதி இந்த³கீ²லட்டா²னியத்தா அஸதிபி இந்த³கீ²லே வேமஜ்ஜ²மேவ ததா² வுச்சதி. யத்த² பன த்³வாரபா³ஹாபி நத்தி², தத்த² உபோ⁴ஸு பஸ்ஸேஸு வதியா வா பாகாரஸ்ஸ வா கோடிவேமஜ்ஜ²மேவ இந்த³கீ²லட்டா²னியத்தா ‘‘இந்த³கீ²லோ’’தி க³ஹேதப்³ப³ம். உட்³டா³பேந்தோதி பலாபேந்தோ. லுடி²த்வாதி பரிவத்தேத்வா.

மஜ்ஜி²மஸ்ஸ புரிஸஸ்ஸாதி தா²மமஜ்ஜி²மஸ்ஸ புரிஸஸ்ஸ. இமினா பன வசனேன ஸுப்பமுஸலபாதோபி ப³லத³ஸ்ஸனவஸேனேவ கதோதி த³ட்ட²ப்³ப³ம். குருந்த³ட்ட²கதா²யம் மஹாபச்சரியஞ்ச க⁴ரூபசாரோ கா³மோதி அதி⁴ப்பாயேன ‘‘க⁴ரூபசாரே டி²தஸ்ஸ லேட்³டு³பாதோ கா³மூபசாரோ’’தி வுத்தம். த்³வாரேதி நிப்³ப³கோஸஸ்ஸ உத³கபதனட்டா²னதோ அப்³ப⁴ந்தரம் ஸந்தா⁴ய வுத்தம். அந்தோகே³ஹேதி ச பமுக²ஸ்ஸ அப்³ப⁴ந்தரமேவ ஸந்தா⁴ய வுத்தம். கதபரிக்கே²போதி இமினாவ க⁴ரஸ்ஸ ஸமந்ததோ தத்தகோ பரிச்சே²தோ³ க⁴ரூபசாரோ நாமாதி வுத்தம் ஹோதி. யஸ்ஸ பன க⁴ரஸ்ஸ ஸமந்ததோ கோ³ரூபானம் பவேஸனனிவாரணத்த²ம் பாகாரவதிஆதீ³ஹி பரிக்கே²போ கதோ ஹோதி, தத்த² ஸோவ பரிக்கே²போ க⁴ரூபசாரோ, ஸுப்பபாதாதி³பரிச்சே²தோ³ பன அபரிக்கி²த்தக⁴ரம் ஸந்தா⁴ய வுத்தோதி த³ட்ட²ப்³ப³ம். இத³மேத்த² பமாணந்தி விகாலகா³மப்பவேஸனாதீ³ஸு கா³மகா³மூபசாரானம் அஸங்கரதோ வினிச்ச²யஸ்ஸ வேதி³தப்³ப³த்தா. குருந்தீ³ஆதீ³ஸு வுத்தனயேன ஹி க⁴ரூபசாரஸ்ஸ கா³மோதி ஆபன்னத்தா க⁴ரக⁴ரூபசாரகா³மகா³மூபசாரானம் ஸங்கரோ ஸியா. ஏவம் ஸப்³ப³த்தா²தி இமினா இதோ புப்³பே³பி பச்சி²மஸ்ஸேவ வாத³ஸ்ஸ பமாணபா⁴வம் த³ஸ்ஸேதி. கேசி பன ‘‘இதோ பட்டா²ய வக்க²மானவாத³ம் ஸந்தா⁴ய வுத்த’’ந்தி வத³ந்தி, தம் ந க³ஹேதப்³ப³ம்.

ஸேஸம்பீதி கா³மூபசாரலக்க²ணம் ஸந்தா⁴ய வத³தி. தத்ராதி தஸ்மிம் கா³மூபசாரக்³க³ஹணே. தஸ்ஸ கா³மபரிச்சே²த³த³ஸ்ஸனத்த²ந்தி தஸ்ஸ அபரிச்சே²த³ஸ்ஸ கா³மஸ்ஸ கா³மபரிச்சே²த³ம் த³ஸ்ஸேதுந்தி அத்தோ². யதி³ ஏவம் ‘‘கா³மோ நாமா’’தி பத³ம் உத்³த⁴ரித்வா ‘‘அபரிக்கி²த்தஸ்ஸ கா³மஸ்ஸ க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’’தி கஸ்மா ந வுத்தந்தி? ‘‘கா³மோ நாமாதி இத⁴ அவுத்தம்பி அதி⁴காரவஸேன லப்³ப⁴தியேவா’’தி வத³ந்தி. அபரே பன ப⁴ணந்தி ‘‘கா³மூபசாரோ நாமாதி இமினாவ கா³மஸ்ஸ ச கா³மூபசாரஸ்ஸ ச ஸங்க³ஹோ த³ட்ட²ப்³போ³. கத²ம்? ‘கா³மஸ்ஸ உபசாரோ கா³மூபசாரோ’தி ஏவம் விக்³க³ஹே கரியமானே ‘பரிக்கி²த்தஸ்ஸ கா³மஸ்ஸ இந்த³கீ²லே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’தி இமினா பரிக்கி²த்தஸ்ஸ கா³மஸ்ஸ கா³மூபசாரலக்க²ணம் த³ஸ்ஸிதம் ஹோதி, ‘கா³மஸங்கா²தோ உபசாரோ கா³மூபசாரோ’தி ஏவம் பன க³ய்ஹமானே ‘அபரிக்கி²த்தஸ்ஸ கா³மஸ்ஸ க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’தி இமினா அபரிக்கி²த்தஸ்ஸ கா³மஸ்ஸ கா³மபரிச்சே²தோ³ த³ஸ்ஸிதோதி ஸக்கா விஞ்ஞாது’’ந்தி. ‘‘க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’’தி இமினா பரிக்கி²த்தஸ்ஸபி கா³மஸ்ஸ ஸசே லேட்³டு³பாததோ தூ³ரே பரிக்கே²போ ஹோதி, லேட்³டு³பாதோயேவ கா³மபரிச்சே²தோ³தி க³ஹேதப்³ப³ந்தி வத³ந்தி. புப்³பே³ வுத்தனயேனேவாதி பரிக்கி²த்தகா³மே வுத்தனயேனேவ.

ஸங்கரீயதீதி மிஸ்ஸீயதி. ஏத்தா²தி க⁴ரக⁴ரூபசாரகா³மகா³மூபசாரேஸு. ‘‘விகாலே கா³மப்பவேஸனே பரிக்கி²த்தஸ்ஸ கா³மஸ்ஸ பரிக்கே²பம் அதிக்கமந்தஸ்ஸ ஆபத்தி பாசித்தியஸ்ஸ, அபரிக்கி²த்தஸ்ஸ கா³மஸ்ஸ உபசாரம் ஓக்கமந்தஸ்ஸ ஆபத்தி பாசித்தியஸ்ஸா’’தி (பாசி. 513) வுத்தத்தா கா³மகா³மூபசாரானம் அஸங்கரதா இச்சி²தப்³பா³தி ஆஹ – ‘‘அஸங்கரதோ சேத்த² வினிச்ச²யோ வேதி³தப்³போ³ விகாலே கா³மப்பவேஸனாதீ³ஸூ’’தி. ஏத்த² ச ‘‘பரிக்கி²த்தஸ்ஸ கா³மஸ்ஸ பரிக்கே²பம், அபரிக்கி²த்தஸ்ஸ பரிக்கே²பாரஹட்டா²னம் அதிக்கமந்தஸ்ஸ விகாலகா³மப்பவேஸனாபத்தி ஹோதீ’’தி கேசி வத³ந்தி, தம் ந க³ஹேதப்³ப³ம் பத³பா⁴ஜனியம் பன ‘‘பரிக்கி²த்தஸ்ஸ கா³மஸ்ஸ பரிக்கே²பம் அதிக்கமந்தஸ்ஸ ஆபத்தி பாசித்தியஸ்ஸ, அபரிக்கி²த்தஸ்ஸ கா³மஸ்ஸ உபசாரம் ஓக்கமந்தஸ்ஸ ஆபத்தி பாசித்தியஸ்ஸா’’தி (பாசி. 513) வுத்தத்தா. அபரிக்கி²த்தஸ்ஸ கா³மஸ்ஸ க⁴ரூபசாரதோ பட்டா²ய து³தியலேட்³டு³பாதஸங்கா²தஸ்ஸ கா³மூபசாரஸ்ஸ ஓக்கமனே ஆபத்தி வேதி³தப்³பா³. தேனேவ விகாலகா³மப்பவேஸனஸிக்கா²பத³ட்ட²கதா²யம் (பாசி. அட்ட². 512) ‘‘அபரிக்கி²த்தஸ்ஸ கா³மஸ்ஸ உபசாரோ அதி³ன்னாதா³னே வுத்தனயேனேவ வேதி³தப்³போ³’’தி வுத்தம். மாதிகாட்ட²கதா²யம்பி (கங்கா². அட்ட². து³தியபாராஜிகவண்ணனா) வுத்தம் ‘‘ய்வாயம் அபரிக்கி²த்தஸ்ஸ கா³மஸ்ஸ உபசாரோ த³ஸ்ஸிதோ, தஸ்ஸ வஸேன விகாலகா³மப்பவேஸனாதீ³ஸு ஆபத்தி பரிச்சி²ந்தி³தப்³பா³’’தி. யதி³ ஏவம் ‘‘விகாலே கா³மம் பவிஸேய்யா’’தி இமினா விருஜ்ஜ²தீதி? ந விருஜ்ஜ²தி கா³மூபசாரஸ்ஸபி கா³மக்³க³ஹணேன க³ஹிதத்தா. தஸ்மா பரிக்கி²த்தஸ்ஸ கா³மஸ்ஸ பரிக்கே²பம் அதிக்கமந்தஸ்ஸ, அபரிக்கி²த்தஸ்ஸ உபசாரம் ஓக்கமந்தஸ்ஸ விகாலகா³மப்பவேஸனாபத்தி ஹோதீதி நிட்ட²மேத்த² க³ந்தப்³ப³ம். விகாலே கா³மப்பவேஸனாதீ³ஸூதி ஆதி³-ஸத்³தே³ன க⁴ரக⁴ரூபசாராதீ³ஸு டி²தானம் உப்பன்னலாப⁴பா⁴ஜனாதி³ம் ஸங்க³ண்ஹாதி.

நிக்க²மித்வா ப³ஹி இந்த³கீ²லாதி இந்த³கீ²லதோ ப³ஹி நிக்க²மித்வாதி அத்தோ². ஏத்த² ச வினயபரியாயேன தாவ ‘‘ட²பேத்வா கா³மஞ்ச கா³மூபசாரஞ்ச அவஸேஸம் அரஞ்ஞ’’ந்தி (பாரா. 92) ஆக³தம், ஸுத்தந்தபரியாயேன ஆரஞ்ஞிகம் பி⁴க்கு²ம் ஸந்தா⁴ய ‘‘ஆரஞ்ஞகம் நாம ஸேனாஸனம் பஞ்சத⁴னுஸதிகம் பச்சி²ம’’ந்தி (பாரா. 654) ஆக³தம். வினயஸுத்தந்தா உபோ⁴பி பரியாயதே³ஸனா நாம, அபி⁴த⁴ம்மோ பன நிப்பரியாயதே³ஸனா. நிப்பரியாயதோ ச கா³மவினிமுத்தம் டா²னம் அரஞ்ஞமேவ ஹோதீதி அபி⁴த⁴ம்மபரியாயேன அரஞ்ஞம் த³ஸ்ஸேதும் ‘‘நிக்க²மித்வா ப³ஹி இந்த³கீ²லா’’தி (விப⁴. 529) வுத்தம். ‘‘ஆசரியத⁴னு நாம பகதிஹத்தே²ன நவவித³த்தி²ப்பமாணம், ஜியாய பன ஆரோபிதாய சதுஹத்த²ப்பமாண’’ந்தி வத³ந்தி. லேஸோகாஸனிஸேத⁴னத்த²ந்தி ‘‘மயா நேவ கா³மே, ந அரஞ்ஞே ஹடம், க⁴ரே வா க⁴ரூபசாரேஸு வா கா³மூபசாரேஸு வா அஞ்ஞதரஸ்மி’’ந்தி வத்தும் மா லப⁴தூதி வுத்தம் ஹோதி.

கப்பியந்தி அனுரூபவஸேன வுத்தம். அகப்பியம்பி பன அப்படிக்³க³ஹிதஞ்சே, அதி³ன்னஸங்க்²யமேவ க³ச்ச²தி. பரிச்சாகா³தி³ம்ஹி அகதே ‘‘இத³ம் மய்ஹம் ஸந்தக’’ந்தி அவிதி³தம்பி பரபரிக்³க³ஹிதமேவ மாதாபிதூனம் அச்சயேன மந்தா³னம் உத்தானஸேய்யகானம் தா³ரகானம் ஸந்தகமிவ.

யஸ்ஸ வஸேன புரிஸோ தே²னோதி வுச்சதி, தம் தே²ய்யந்தி ஆஹ ‘‘அவஹரணசித்தஸ்ஸேதம் அதி⁴வசன’’ந்தி. ஸங்கா²-ஸத்³தோ³ ஞாணகோட்டா²ஸபஞ்ஞத்திக³ணனாதீ³ஸு தி³ஸ்ஸதி. ‘‘ஸங்கா²யேகம் படிஸேவதீ’’திஆதீ³ஸு (ம. நி. 2.168) ஹி ஞாணே தி³ஸ்ஸதி. ‘‘பபஞ்சஸஞ்ஞாஸங்கா² ஸமுதா³சரந்தீ’’திஆதீ³ஸு (ம. நி. 1.204) கோட்டா²ஸே. ‘‘தேஸம் தேஸம் த⁴ம்மானம் ஸங்கா² ஸமஞ்ஞா’’திஆதீ³ஸு (த⁴. ஸ. 1313) பஞ்ஞத்தியம். ‘‘ந ஸுகரம் ஸங்கா²து’’ந்திஆதீ³ஸு (த⁴. ப. 196; அப. தே²ர. 1.10.2) க³ணனாயம். தத்த² கோட்டா²ஸவசனம் ஸங்கா²-ஸத்³த³ம் ஸந்தா⁴யாஹ ‘‘ஸங்கா²ஸங்கா²தந்தி அத்த²தோ ஏக’’ந்தி. தேனாஹ ‘‘கோட்டா²ஸஸ்ஸேதம் அதி⁴வசன’’ந்தி. பபஞ்சஸங்கா²தி தண்ஹாமானதி³ட்டி²ஸங்கா²தா பபஞ்சகோட்டா²ஸா. ‘‘ஏகோ சித்தகோட்டா²ஸோதி யஞ்ச புப்³ப³பா⁴கே³ அவஹரிஸ்ஸாமீதி பவத்தம் சித்தம், யஞ்ச க³மனாதி³ஸாத⁴கம் பராமஸனாதி³ஸாத⁴கம் வா மஜ்ஜே² பவத்தம், யஞ்ச டா²னாசாவனப்பயோக³ஸாத⁴கம், தேஸு அயமேவேகோ பச்சி²மோ சித்தகோட்டா²ஸோ இதா⁴தி⁴ப்பேதோ’’தி கேசி வத³ந்தி. சூளக³ண்டி²பதே³ பன ‘‘ஊனமாஸகமாஸகஊனபஞ்சமாஸகபஞ்சமாஸகாவஹரணசித்தேஸு ஏகோ சித்தகோட்டா²ஸோ’’தி வுத்தம். ‘‘அனேகப்பபே⁴த³த்தா சித்தஸ்ஸ ஏகோ சித்தகோட்டா²ஸோதி வுத்த’’ந்தி மஹாக³ண்டி²பதே³ மஜ்ஜி²மக³ண்டி²பதே³ ச வுத்தம். இத³மேவேத்த² ஸுந்த³ரதரம் ‘‘தே²ய்யசித்தஸங்கா²தோ ஏகோ சித்தகோட்டா²ஸோ’’தி வுத்தத்தா. தே²ய்யஸங்கா²தேனாதி தே²ய்யசித்தகோட்டா²ஸேன கரணபூ⁴தேன, ந விஸ்ஸாஸதாவகாலிகாதி³கா³ஹவஸப்பவத்தசித்தகோட்டா²ஸேனாதி வுத்தம் ஹோதி.

அபி⁴யோக³வஸேனாதி அட்³ட³கரணவஸேன. அபி⁴யுஞ்ஜதீதி சோதே³தி, அட்³ட³ம் கரோதீதி அத்தோ². பரிகப்பிதட்டா²னந்தி ஓகாஸபரிகப்பனவஸேன பரிகப்பிதப்பதே³ஸம். ஸுங்ககா⁴தந்தி ஏத்த² ராஜூனம் தே³ய்யபா⁴க³ஸ்ஸ ஏதம் அதி⁴வசனம் ஸுங்கோதி, ஸோ ஏத்த² ஹஞ்ஞதி அத³த்வா க³ச்ச²ந்தேஹீதி ஸுங்ககா⁴தோ. ‘‘ஏத்த² பவிட்டே²ஹி ஸுங்கோ தா³தப்³போ³’’தி ருக்க²பப்³ப³தாதி³ஸஞ்ஞாணேன நியமிதப்பதே³ஸஸ்ஸேதம் அதி⁴வசனம்.

பஞ்சவீஸதிஅவஹாரகதா²வண்ணனா

ஆகுலாதி ஸங்குலா. லுளிதாதி விலோளிதா. கத்த²சீதி ஏகிஸ்ஸாய அட்ட²கதா²யம். ஏகம் பஞ்சகம் த³ஸ்ஸிதந்தி ‘‘பரபரிக்³க³ஹிதஞ்ச ஹோதி, பரபரிக்³க³ஹிதஸஞ்ஞீ ச, க³ருகோ ச ஹோதி பரிக்கா²ரோ பஞ்சமாஸகோ வா அதிரேகபஞ்சமாஸகோ வா, தே²ய்யசித்தஞ்ச பச்சுபட்டி²தம் ஹோதி, ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸா’’தி (பாரா. 122) ஏவம் வுத்தபஞ்சஅவஹாரங்கா³னி ஏகம் பஞ்சகந்தி த³ஸ்ஸிதம். த்³வே பஞ்சகானி த³ஸ்ஸிதானீதி ‘‘ச²ஹாகாரேஹி அதி³ன்னம் ஆதி³யந்தஸ்ஸ ஆபத்தி பாராஜிகஸ்ஸ. ந ச ஸகஸஞ்ஞீ, ந ச விஸ்ஸாஸக்³கா³ஹீ, ந ச தாவகாலிகம், க³ருகோ ச ஹோதி பரிக்கா²ரோ பஞ்சமாஸகோ வா அதிரேகபஞ்சமாஸகோ வா, தே²ய்யசித்தஞ்ச பச்சுபட்டி²தம் ஹோதி, ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸா’’தி ஏவம் வுத்தேஸு ச²ஸு பதே³ஸு ஏகம் அபனேத்வா அவஸேஸானி பஞ்ச பதா³னி ஏகம் பஞ்சகந்தி த³ஸ்ஸேத்வா ஹேட்டா² வுத்தபஞ்சகஞ்ச க³ஹேத்வா த்³வே பஞ்சகானி த³ஸ்ஸிதானி. ஏத்த² பனாதி ‘‘பஞ்சஹாகாரேஹி அதி³ன்னம் ஆதி³யந்தஸ்ஸா’’திஆதீ³ஸு. ஸப்³பே³ஹிபி பதே³ஹீதி ‘‘பரபரிக்³க³ஹிதஞ்ச ஹோதீ’’திஆதீ³ஹி பதே³ஹி. லப்³ப⁴மானானியேவ பஞ்சகானீதி பஞ்சவீஸதியா அவஹாரேஸு லப்³ப⁴மானபஞ்சகானி.

பஞ்சன்னம் அவஹாரானம் ஸமூஹோ பஞ்சகம், ஸகோ ஹத்தோ² ஸஹத்தோ², தேன நிப்³ப³த்தோ, தஸ்ஸ வா ஸம்ப³ந்தீ⁴தி ஸாஹத்தி²கோ, அவஹாரோ. ஸாஹத்தி²காதி³ பஞ்சகம் ஸாஹத்தி²கபஞ்சகந்தி ஆதி³பத³வஸேன நாமலாபோ⁴ த³ட்ட²ப்³போ³ குஸலாதி³த்திகஸ்ஸ குஸலத்திகவோஹாரோ விய. இமினாவ நயேன புப்³ப³பயோகா³தி³ பஞ்சகம் புப்³ப³பயோக³பஞ்சகம், தே²ய்யாவஹாராதி³ பஞ்சகம் தே²ய்யாவஹாரபஞ்சகந்தி நாமலாபோ⁴ த³ட்ட²ப்³போ³தி. ததியபஞ்சமேஸு பஞ்சகேஸூதி ஸாஹத்தி²கபஞ்சகதே²ய்யாவஹாரபஞ்சகேஸு. லப்³ப⁴மானபத³வஸேனாதி ஸாஹத்தி²கபஞ்சகே லப்³ப⁴மானஸ்ஸ நிஸ்ஸக்³கி³யாவஹாரபத³ஸ்ஸ வஸேன தே²ய்யாவஹாரபஞ்சகே லப்³ப⁴மானஸ்ஸ பரிகப்பாவஹாரபத³ஸ்ஸ ச வஸேன யோஜேதப்³ப³ந்தி அத்தோ².

ஆணத்தியா நிப்³ப³த்தோ அவஹாரோ ஆணத்திகோ. நிஸ்ஸஜ்ஜனம் நிஸ்ஸக்³கோ³, ஸுங்ககா⁴தட்டா²னே பரிகப்பிதோகாஸே வா ட²த்வா ப⁴ண்ட³ஸ்ஸ ப³ஹி பாதனம். நிஸ்ஸக்³கோ³வ நிஸ்ஸக்³கி³யோ. கிரியாஸித்³தி⁴தோ புரேதரமேவ பாராஜிகாபத்திஸங்கா²தம் அத்த²ம் ஸாதே⁴தீதி அத்த²ஸாத⁴கோ. ‘‘அஸுகஸ்ஸ ப⁴ண்ட³ம் யதா³ ஸக்கோஸி, ததா³ அவஹரா’’தி ஏவரூபோ ஹி ஆணாபனபயோகோ³ பரஸ்ஸ தேலகும்பி⁴யா பாத³க்³க⁴னகம் தேலம் அவஸ்ஸம் பிவனகானம் உபாஹனாதீ³னம் நிக்கே²பபயோகோ³ ச ஆணத்தஸ்ஸ ப⁴ண்ட³க்³க³ஹணதோ உபாஹனாதீ³னம் தேலபாதனதோ ச புரேதரமேவ பாராஜிகாபத்திஸங்கா²தம் அத்த²ம் ஸாதே⁴தி. ஸாஹத்தி²கபயோகோ³பி ஹி ஏவரூபோ அத்த²ஸாத⁴கோதி வுச்சதி. வுத்தஞ்ஹேதம் மாதிகாட்ட²கதா²யம் (கங்கா². அட்ட². து³தியபாராஜிகவண்ணனா) –

‘‘அத்த²ஸாத⁴கோ நாம ‘அஸுகஸ்ஸ ப⁴ண்ட³ம் யதா³ ஸக்கோஸி, ததா³ தம் அவஹரா’தி ஆணாபேதி. தத்த² ஸசே பரோ அனந்தராயிகோ ஹுத்வா தம் அவஹரதி, ஆணாபகஸ்ஸ ஆணத்திக்க²ணேயேவ பாராஜிகம். பரஸ்ஸ வா பன தேலகும்பி⁴யா பாத³க்³க⁴னகம் தேலம் அவஸ்ஸம் பிவனகானி உபாஹனாதீ³னி பக்கி²பதி, ஹத்த²தோ முத்தமத்தேயேவ பாராஜிக’’ந்தி.

து⁴ரஸ்ஸ நிக்கி²பனம் து⁴ரனிக்கே²போ. ஆராமாபி⁴யுஞ்ஜனாதீ³ஸு அத்தனோ ச பரஸ்ஸ ச தா³னக்³க³ஹணேஸு நிருஸ்ஸாஹபா⁴வாபஜ்ஜனம். ஸஹத்தா² அவஹரதீதி ஸஹத்தே²ன க³ண்ஹாதி. ‘‘அஸுகஸ்ஸ ப⁴ண்ட³ம் அவஹரா’’தி அஞ்ஞம் ஆணாபேதீதி ஏத்தா²பி ஆணாபகஸ்ஸ ஆணத்திக்க²ணேயேவ ஆபத்தி த³ட்ட²ப்³பா³. யதி³ ஏவம் இமஸ்ஸ, அத்த²ஸாத⁴கஸ்ஸ ச கோ விஸேஸோதி? தங்க²ணஞ்ஞேவ க³ஹணே நியுஞ்ஜனம் ஆணத்திகபயோகோ³, காலந்தரேன க³ஹணத்த²ம் நியோகோ³ அத்த²ஸாத⁴கோதி அயமேதேஸம் விஸேஸோ. தேனேவாஹ – ‘‘அஸுகஸ்ஸ ப⁴ண்ட³ம் யதா³ ஸக்கோஸி, ததா³ அவஹராதி ஆணாபேதீ’’தி. ஏத்த² ச ஆணாபனபயோகோ³வ அத்த²ஸாத⁴கோதி த³ஸ்ஸிதோ, ஸாஹத்தி²கவஸேனபி அத்த²ஸாத⁴கபயோகோ³ பன உபரி ஆவி ப⁴விஸ்ஸதி. து⁴ரனிக்கே²போ பன உபனிக்கி²த்தப⁴ண்ட³வஸேன வேதி³தப்³போ³தி இத³ம் நித³ஸ்ஸனமத்தம். ஆராமாபி⁴யுஞ்ஜனாதீ³ஸுபி தாவகாலிகப⁴ண்ட³தே³ய்யானம் அதா³னேபி ஏஸேவ நயோ.

‘‘ஆணத்திவஸேன புப்³ப³பயோகோ³ வேதி³தப்³போ³’’தி வுத்தத்தா அனந்தராயேன க³ண்ஹந்தஸ்ஸ ‘அஸுகஸ்ஸ ப⁴ண்ட³ம் அவஹரா’தி ஆணாபனம் ப⁴ண்ட³க்³க³ஹணதோ புப்³ப³த்தா புப்³ப³பயோகோ³, பயோகே³ன ஸஹ வத்தமானோ அவஹாரோ ஸஹபயோகோ³, ‘‘அஸுகம் நாம ப⁴ண்ட³ம் ஹரிஸ்ஸாமா’’தி ஸம்வித³ஹித்வா ஸம்மந்தயித்வா அவஹரணம் ஸம்விதா³வஹாரோ. ஸங்கேதகம்மம் நாம புப்³ப³ண்ஹாதி³காலபரிச்சே²த³வஸேன ஸஞ்ஜானனகம்மம், நிமித்தகம்மம் நாம ஸஞ்ஞுப்பாத³னத்த²ம் அக்கி²னிக²ணனாதி³னிமித்தகரணம். டா²னாசாவனவஸேன ஸஹபயோகோ³தி இத³ம் பன நித³ஸ்ஸனமத்தம் த³ட்ட²ப்³ப³ம், கி²லஸங்கமனாதீ³ஸுபி அஸதி ச டா²னாசாவனே ஸஹபயோகோ³ த³ட்ட²ப்³போ³. வுத்தஞ்ஹேதம் மாதிகாட்ட²கதா²யம் (கங்கா². அட்ட². து³தியபாராஜிகவண்ணனா) ‘‘டா²னாசாவனவஸேன கி²லாதீ³னி ஸங்காமேத்வா கே²த்தாதி³க்³க³ஹணவஸேன ச ஸஹபயோகோ³ வேதி³தப்³போ³’’தி.

தே²னோ வுச்சதி சோரோ, தஸ்ஸ பா⁴வோ தே²ய்யம், தேன அவஹரணம் தே²ய்யாவஹாரோ. யோ ஹி ஸந்தி⁴ச்சே²தா³தீ³னி கத்வா அதி³ஸ்ஸமானோ அவஹரதி, துலாகூடமானகூடகூடகஹாபணாதீ³ஹி வா வஞ்சேத்வா க³ண்ஹாதி, தஸ்ஸேவம் க³ண்ஹதோ அவஹாரோ தே²ய்யாவஹாரோ. பஸய்ஹ அபி⁴ப⁴வித்வா அவஹரணம் பஸய்ஹாவஹாரோ. யோ ஹி பஸய்ஹ ப³லக்காரேன பரேஸம் ஸந்தகம் க³ண்ஹாதி கா³மகா⁴தகாத³யோ விய, அத்தனோ பத்தப³லிதோ வா வுத்தனயேன அதி⁴கம் க³ண்ஹாதி ராஜப⁴டாத³யோ விய, தஸ்ஸேவம் க³ண்ஹதோ அவஹாரோ பஸய்ஹாவஹாரோ. ப⁴ண்ட³வஸேன ச ஓகாஸவஸேன ச பரிகப்பேத்வா அவஹரணம் பரிகப்பாவஹாரோ. திணபண்ணாதீ³ஹி அங்கு³லிமுத்³தி³காதி³ம் படிச்சா²தே³த்வா பச்சா² தஸ்ஸ படிச்ச²ன்னஸ்ஸ அவஹரணம் படிச்ச²ன்னாவஹாரோ. குஸம் ஸங்காமேத்வா அவஹரணம் குஸாவஹாரோ.

துலயித்வாதி உபபரிக்கி²த்வா. ஸாமீசீதி வத்தம், ஆபத்தி பன நத்தீ²தி அதி⁴ப்பாயோ. மஹாஜனஸம்மத்³தோ³தி மஹாஜனஸங்கோ²போ⁴. ப⁴ட்டே² ஜனகாயேதி அபக³தே ஜனகாயே. ‘‘இத³ஞ்ச காஸாவம் அத்தனோ ஸந்தகம் கத்வா ஏதஸ்ஸேவ பி⁴க்கு²னோ தே³ஹீ’’தி கிம்காரணா ஏவமாஹ? சீவரஸாமிகேன யஸ்மா து⁴ரனிக்கே²போ கதோ, தஸ்மா தஸ்ஸ அதி³ன்னம் க³ஹேதும் ந வட்டதி. அவஹாரகோபி விப்படிஸாரஸ்ஸ உப்பன்னகாலதோ பட்டா²ய சீவரஸாமிகம் பரியேஸந்தோ விசரதி ‘‘த³ஸ்ஸாமீ’’தி, சீவரஸாமிகேன ச ‘‘மமேத’’ந்தி வுத்தே ஏதேனபி அவஹாரகேன ஆலயோ பரிச்சத்தோ, தஸ்மா ஏவமாஹ. யதி³ ஏவம் சீவரஸாமிகோயேவ ‘‘அத்தனோ ஸந்தகம் க³ண்ஹாஹீ’’தி கஸ்மா ந வுத்தோதி? உபி⁴ன்னம்பி குக்குச்சவினோத³னத்த²ம். கத²ம்? அவஹாரகஸ்ஸ ‘‘மயா ஸஹத்தே²ன ந தி³ன்னம், ப⁴ண்ட³தே³ய்யமேத’’ந்தி குக்குச்சம் உப்பஜ்ஜேய்ய, இதரஸ்ஸ ‘‘மயா பட²மம் து⁴ரனிக்கே²பம் கத்வா பச்சா² அதி³ன்னம் க³ஹித’’ந்தி குக்குச்சம் உப்பஜ்ஜேய்யாதி.

ஸமக்³க⁴ந்தி அப்பக்³க⁴ம். தா³ருஅத்த²ம் ப²ரதீதி தா³ரூஹி கத்தப்³ப³கிச்சம் ஸாதே⁴தி. மயி ஸந்தேதிஆதி³ ஸப்³ப³ம் ரஞ்ஞா பஸாதே³ன வுத்தம், ‘‘தே²ரேன பன அனனுச்ச²விகம் கத’’ந்தி ந மஞ்ஞிதப்³ப³ம்.

ஏகதி³வஸம் த³ந்தகட்ட²ச்சே²த³னாதி³னா யா அயம் அக்³க⁴ஹானி வுத்தா, ஸா ஸப்³பா³ ப⁴ண்ட³ஸாமினா

கிணித்வா க³ஹிதமேவ ஸந்தா⁴ய வுத்தா, ஸப்³ப³ம் பனேதம் அட்ட²கதா²சரியப்பமாணேன க³ஹேதப்³ப³ம். பாஸாணஞ்ச ஸக்க²ரஞ்ச பாஸாணஸக்க²ரம். தா⁴ரேய்யத்த²ம் விசக்க²ணோதி இமஸ்ஸேவ விவரணம் ‘‘ஆபத்திம் வா அனாபத்திம் வா’’திஆதி³.

பஞ்சவீஸதிஅவஹாரகதா²வண்ணனா நிட்டி²தா.

அக்க²த³ஸ்ஸாதி ஏத்த² அக்க²-ஸத்³தே³ன கிர வினிச்ச²யஸாலா வுச்சதி. தத்த² நிஸீதி³த்வா வஜ்ஜாவஜ்ஜம் பஸ்ஸந்தீதி அக்க²த³ஸ்ஸா வுச்சந்தி த⁴ம்மவினிச்ச²னகா. ஹனேய்யுந்தி ஏத்த² ஹனனம் நாம ஹத்த²பாதா³தீ³ஹி போத²னஞ்சேவ ஸீஸாதி³ச்சே²த³னஞ்ச ஹோதீதி ஆஹ – ‘‘ஹனேய்யுந்தி போதே²ய்யுஞ்சேவ சி²ந்தே³ய்யுஞ்சா’’தி. தேனேவ பத³பா⁴ஜனியஞ்ச ‘‘ஹத்தே²ன வா பாதே³ன வா கஸாய வா வேத்தேன வா அட்³ட⁴த³ண்ட³கேன வா சே²ஜ்ஜாய வா ஹனேய்யு’’ந்தி வுத்தம். தத்த² அட்³ட⁴த³ண்ட³கேனாதி த்³விஹத்த²ப்பமாணேன ரஸ்ஸமுக்³க³ரேன வேளுபேஸிகாய வா. சே²ஜ்ஜாயாதி ஹத்த²பாத³ஸீஸாதீ³னம் சே²த³னேன. நீஹரேய்யுந்தி கா³மனிக³மாதி³தோ நீஹரேய்யும். சோரோஸி…பே… தே²னோஸீதி ஏத்த² ‘‘பரிபா⁴ஸேய்யு’’ந்தி பத³ம் அஜ்ஜா²ஹரித்வா அத்தோ² வேதி³தப்³போ³தி ஆஹ ‘‘சோரோஸீதி ஏவமாதீ³னி ச வத்வா பரிபா⁴ஸேய்யு’’ந்தி.

93. யம் தம் ப⁴ண்ட³ம் த³ஸ்ஸிதந்தி ஸம்ப³ந்தோ⁴. யத்த² யத்த² டி²தந்தி பூ⁴மிஆதீ³ஸு யத்த² யத்த² டி²தம். யதா² யதா² ஆதா³னம் க³ச்ச²தீதி பூ⁴மிஆதீ³ஸு டி²தம் ப⁴ண்ட³ம் ஸப்³ப³ஸோ அக்³க³ஹணேபி யேன யேன ஆகாரேன க³ஹணம் உபக³ச்ச²தி.

பூ⁴மட்ட²கதா²வண்ணனா

94. ப²ந்தா³பேதி, ஸப்³ப³த்த² து³க்கடமேவாதி ஏத்த² ‘‘உட்ட²ஹிஸ்ஸாமீ’’தி ப²ந்தா³பேத்வா புன அனுட்ட²ஹித்வா தத்தே²வ ஸயந்தஸ்ஸபி அங்க³பச்சங்க³ம் அப²ந்தா³பேத்வா ஏகபயோகே³ன உட்ட²ஹந்தஸ்ஸபி து³க்கடமேவாதி த³ட்ட²ப்³ப³ம். அஞ்ஞஸ்மிம் வா க³மனஸ்ஸ அனுபகாரேதி யதா² த்³வாரபித³ஹனே கும்பி⁴ட்டா²னக³மனஸ்ஸ அனுபகாரத்தா அனாபத்தி, ஏவம் அஞ்ஞஸ்மிம் வா க³மனஸ்ஸ அனுபகாரே காயவசீகம்மே அனாபத்தி. வாசாய வாசாயாதி ஏகேகத்த²தீ³பிகாய வாசாய வாசாய. உபலத்³தோ⁴தி ஞாதோ. புஞ்ஞானி ச கரிஸ்ஸாமாதி ஏத்த² ‘‘முஸாவாத³ம் கத்வா புஞ்ஞானி கரிஸ்ஸாமாதி வத³ந்தஸ்ஸ து³க்கடமேவா’’தி தீஸுபி க³ண்டி²பதே³ஸு வுத்தம், தம் இமஸ்மிம்யேவ பதே³ஸே அட்ட²கதா²வசனேன விருஜ்ஜ²தி. ததா² ஹி ‘‘யம் யம் வசனம் முஸா, தத்த² தத்த² பாசித்திய’’ந்தி ச ‘‘ந ஹி அதி³ன்னாதா³னஸ்ஸ புப்³ப³பயோகே³ பாசித்தியட்டா²னே து³க்கடம் நாம அத்தீ²’’தி ச வக்க²தி. ஏவம் பன வுத்தே ந விருஜ்ஜ²தி ‘‘முஸாவாத³ம் கத்வா புஞ்ஞானி ச கரிஸ்ஸாமாதி வத³ந்தஸ்ஸ பாசித்தியேன ஸத்³தி⁴ம் து³க்கட’’ந்தி. ததா² ஹி ‘‘அகப்பியபத²விம் க²ணந்தானம் து³க்கடேஹி ஸத்³தி⁴ம் பாசித்தியானீதி மஹாபச்சரியம் வுத்த’’ந்தி ச ‘‘யதா² ச இத⁴, ஏவம் ஸப்³ப³த்த² பாசித்தியட்டா²னே து³க்கடா ந முச்சதீ’’தி ச வக்க²தி. ஸசே பன குஸலசித்தோ ‘‘புஞ்ஞானி கரிஸ்ஸாமா’’தி வத³தி, அனாபத்தி ‘‘பு³த்³த⁴பூஜம் வா த⁴ம்மபூஜம் வா ஸங்க⁴ப⁴த்தம் வா கரிஸ்ஸாமாதி குஸலம் உப்பாதே³தி, குஸலசித்தேன க³மனே அனாபத்தீ’’தி ச ‘‘யதா² ச இத⁴, ஏவம் ஸப்³ப³த்த² அதே²ய்யசித்தஸ்ஸ அனாபத்தீ’’தி ச வக்க²மானத்தா.

பமாத³லிகி²தந்தி வேதி³தப்³ப³ந்தி அபரபா⁴கே³ போத்த²காருள்ஹகாலே பமஜ்ஜித்வா லிகி²தந்தி வேதி³தப்³ப³ம். பாளியம் ஸேஸஅட்ட²கதா²ஸு ச ‘‘குதா³லம் வா பிடகம் வா’’தி இத³மேவ த்³வயம் வத்வா வாஸிப²ரஸூனம் அவுத்தத்தா தேஸம்பி ஸங்கே²பட்ட²கதா²தீ³ஸு ஆக³தபா⁴வம் த³ஸ்ஸேதும் ‘‘ஸங்கே²பட்ட²கதா²யம் பன மஹாபச்சரியஞ்சா’’திஆதி³ வுத்தம். தே²ய்யசித்தேன கதத்தா ‘‘து³க்கடேஹி ஸத்³தி⁴ம் பாசித்தியானீ’’தி வுத்தம். ததோ பரம் ஸப்³ப³கிரியாஸூதி பீ³ஜக்³க³ஹணதோ பரம் கத்தப்³ப³கிரியாஸு. ஸப்³ப³ம் புரிமனயேனேவாதி யாவ பிடகபரியோஸானா ஹத்த²வாரபத³வாரேஸு து³க்கடம்.

தே²ரேஹி த³ஸ்ஸிதந்தி புப்³ப³பயோக³ஸஹபயோக³து³க்கடேஸு அஸம்மோஹத்த²ம் ஸமோதா⁴னேத்வா த⁴ம்மஸங்கா³ஹகத்தே²ரேஹி த³ஸ்ஸிதம். ‘‘ஸப்³பே³ஸம்பி து³க்கடானம் இமேஸுயேவ அட்ட²ஸு ஸங்க³ஹேதப்³ப³பா⁴வதோ இதரேஹி ஸத்தஹி து³க்கடேஹி வினிமுத்தம் வினயது³க்கடேயேவ ஸங்க³ஹேதப்³ப³’’ந்தி வத³ந்தி. த³ஸவித⁴ம் ரதனந்தி ‘‘முத்தா மணி வேளுரியோ ஸங்கோ² ஸிலா பவாளம் ரஜதம் ஜாதரூபம் லோஹிதங்கோ³ மஸாரக³ல்ல’’ந்தி ஏவமாக³தம் த³ஸவித⁴ம் ரதனம்.

‘‘மணி முத்தா வேளுரியோ ச ஸங்கோ²,

ஸிலா பவாளம் ரஜதஞ்ச ஹேமம்;

ஸலோஹிதங்க³ஞ்ச மஸாரக³ல்லம்,

த³ஸேதி தீ⁴ரோ ரதனானி ஜஞ்ஞா’’தி. –

ஹி வுத்தம்.

ஸத்தவித⁴ம் த⁴ஞ்ஞந்தி ஸாலி வீஹி யவோ கங்கு³ குத்³ரூஸோ வரகோ கோ³து⁴மோதி இத³ம் ஸத்தவித⁴ம் த⁴ஞ்ஞம். ஆவுத⁴ப⁴ண்டா³தி³ந்தி ஆதி³-ஸத்³தே³ன தூரியப⁴ண்ட³இத்தி²ரூபாதி³ம் ஸங்க³ண்ஹாதி. அனாமஸிதப்³பே³ வத்து²ம்ஹி து³க்கடம் அனாமாஸது³க்கடம். து³ருபசிண்ணது³க்கடந்தி ‘‘ந கத்தப்³ப³’’ந்தி வாரிதஸ்ஸ கதத்தா து³ட்டு² ஆசிண்ணம் சரிதந்தி து³ருபசிண்ணம், தஸ்மிம் து³க்கடம் து³ருபசிண்ணது³க்கடம். வினயே பஞ்ஞத்தம் து³க்கடம் வினயது³க்கடம். ‘‘ஸங்க⁴பே⁴தா³ய பரக்கமதீ’’தி ஸுத்வா தம்னிவாரணத்தா²ய ஞாதே அத்தே² அவத³ந்தஸ்ஸ ஞாதது³க்கடம். ஏகாத³ஸ ஸமனுபா⁴ஸனா நாம பி⁴க்கு²பாதிமோக்கே² சத்தாரோ யாவததியகா ஸங்கா⁴தி³ஸேஸா, அரிட்ட²ஸிக்கா²பத³ந்தி பஞ்ச, பி⁴க்கு²னீபாதிமோக்கே² ஏகம் யாவததியகம் பாராஜிகம், சத்தாரோ ஸங்கா⁴தி³ஸேஸா, சண்ட³காளீஸிக்கா²பத³ந்தி ச². வஸ்ஸாவாஸாதி³ம் படிஸ்ஸுணித்வா ந ஸம்பாதே³ந்தஸ்ஸ படிஸ்ஸவனிமித்தம் து³க்கடம் படிஸ்ஸவது³க்கடம்.

புப்³ப³ஸஹபயோகே³ ச, அனாமாஸது³ருபசிண்ணே;

வினயே சேவ ஞாதே ச, ஞத்தியா ச படிஸ்ஸவே;

அட்டே²தே து³க்கடா வுத்தா, வினயே வினயஞ்ஞுனா.

ஸஹபயோக³தோ பட்டா²ய சேத்த² புரிமா புரிமா ஆபத்தியோ படிப்பஸ்ஸம்ப⁴ந்தீதி ஆஹ ‘‘அத² து⁴ரனிக்கே²பம் அகத்வா’’திஆதி³. தத்த² ‘‘து⁴ரனிக்கே²பம் அகத்வா’’தி வுத்தத்தா து⁴ரனிக்கே²பம் கத்வா க²ணந்தஸ்ஸ புரிமாபத்தியோ ந படிப்பஸ்ஸம்ப⁴ந்தீதி த³ட்ட²ப்³ப³ம். வியூஹனது³க்கடம் படிப்பஸ்ஸம்ப⁴தி, உத்³த⁴ரணது³க்கடே பதிட்டா²தீதி இத³ம் பாளியம் ஆக³தானுக்கமேன த³ஸ்ஸேதும் வுத்தம். யதி³ பன பம்ஸும் உத்³த⁴ரித்வா ஸஉஸ்ஸாஹோவ புன க²ணதி, உத்³த⁴ரணது³க்கடம் படிப்பஸ்ஸம்ப⁴தி, க²ணனது³க்கடே பதிட்டா²தி.

கதம் கரணம் கிரியாதி அத்த²தோ ஏகந்தி ஆஹ ‘‘விரூபா ஸா கிரியா’’தி. இதா³னி வுத்தமேவத்த²ம் பரிவாரபாளியா நித³ஸ்ஸேந்தோ ‘‘வுத்தம்பி சேத’’ந்திஆதி³மாஹ. தத்த² அபரத்³த⁴ம் விரத்³த⁴ம் க²லிதந்தி ஸப்³ப³மேதம் யஞ்ச து³க்கடந்தி ஏத்த² வுத்தஸ்ஸ து³க்கடஸ்ஸ பரியாயவசனம். யஞ்ஹி து³ட்டு² கதம், விரூபம் வா கதம், தம் து³க்கடம். தம் பனேதம் யதா² ஸத்தா²ரா வுத்தம், ஏவம் அகதத்தா அபரத்³த⁴ம், குஸலம் விரஜ்ஜி²த்வா பவத்தத்தா விரத்³த⁴ம், அரியவம்ஸப்படிபத³ம் அனாருள்ஹத்தா க²லிதம். யம் மனுஸ்ஸோ கரேதி இத³ம் பனேத்த² ஓபம்மனித³ஸ்ஸனம். தஸ்ஸத்தோ² – யதா² யம் லோகே மனுஸ்ஸோ ஆவி வா யதி³ வா ரஹோ பாபம் கரோதி, தம் து³க்கடந்தி பவேதே³ந்தி, ஏவமித³ம்பி பு³த்³த⁴படிகுட்டே²ன லாமகபா⁴வேன பாபம், தஸ்மா து³க்கடந்தி வேதி³தப்³ப³ந்தி.

யதா² து³க்கா², குச்சி²தா வா க³தி து³க³தீதி வத்தப்³பே³ ‘‘து³க்³க³தீ’’தி வுத்தம், யதா² ச கடுகம் ப²லமேதஸ்ஸாதி கடுகப²லந்தி வத்தப்³பே³ ‘‘கடுகப்ப²ல’’ந்தி வுத்தம், ஏவமிதா⁴பி தூ²லத்தா அச்சயத்தா ச தூ²லச்சயந்தி வத்தப்³பே³ ‘‘து²ல்லச்சய’’ந்தி வுத்தந்தி த³ஸ்ஸேதும் ‘‘ஸம்பராயே ச து³க்³க³தீ’’திஆதி³மாஹ. ஸம்யோகே³ பன கதே ஸம்யோக³பரஸ்ஸ ரஸ்ஸத்தம் ஸித்³த⁴மேவாதி மனஸி கத்வா ‘‘ஸம்யோக³பா⁴வோ வேதி³தப்³போ³’’தி ஏத்தகமேவ வுத்தம். ஏகஸ்ஸ மூலேதி ஏகஸ்ஸ ஸந்திகே. அச்சயோ தேன ஸமோ நத்தீ²தி தே³ஸனாகா³மீஸு அச்சயேஸு தேன ஸமோ தூ²லோ அச்சயோ நத்தி². தேனேதம் இதி வுச்சதீதி தூ²லத்தா அச்சயஸ்ஸ ஏதம் து²ல்லச்சயந்தி வுச்சதீதி அத்தோ².

‘‘ஸப்³ப³த்தா²பி ஆமஸனே து³க்கடம் ப²ந்தா³பனே து²ல்லச்சயஞ்ச விஸும் விஸும் தே²ய்யசித்தேன ஆமஸனப²ந்தா³பனபயோக³ம் கரோந்தஸ்ஸேவ ஹோதி, ஏகபயோகே³ன க³ண்ஹந்தஸ்ஸ பன உத்³தா⁴ரே பாராஜிகமேவ, ந து³க்கடது²ல்லச்சயானீ’’தி வத³ந்தி. ஸஹபயோக³ம் பன அகத்வாதி ஏத்த² ‘‘புப்³ப³பயோகே³ ஆபன்னாபத்தீனம் படிப்பஸ்ஸத்³தி⁴யா அபா⁴வதோ ஸஹபயோக³ம் கத்வாபி லஜ்ஜித⁴ம்மம் ஓக்கந்தேன புப்³ப³பயோகே³ ஆபன்னாபத்தியோ தே³ஸேதப்³பா³’’தி தீஸுபி க³ண்டி²பதே³ஸு வுத்தம். அட்ட²கதா²வசனம் பன கதே ஸஹபயோகே³ புப்³ப³பயோகே³ ஆபன்னாபத்தீனம்பி படிப்பஸ்ஸத்³தி⁴ம் தீ³பேதி, அஞ்ஞதா² ‘‘ஸஹபயோக³ம் பன அகத்வா’’தி இத³ம் விஸேஸனமேவ நிரத்த²கம் ஸியா. யஞ்ச ஹேட்டா² வுத்தம் ‘‘ஸசே பனஸ்ஸ தத்த²ஜாதகே திணருக்க²லதாதி³ம்ஹி சி²ன்னேபி லஜ்ஜித⁴ம்மோ ஓக்கமதி, ஸம்வரோ உப்பஜ்ஜதி, சே²த³னபச்சயா து³க்கடம் தே³ஸேத்வா முச்சதீ’’தி, தம்பி ஸஹபயோகே³ கதே புப்³ப³பயோகே³ ஆபன்னாபத்தீனம் படிப்பஸ்ஸத்³தி⁴மேவ தீ³பேதி ஸஹபயோகே³ சே²த³னபச்சயா ஆபன்னது³க்கடஸ்ஸேவ தே³ஸனாய வுத்தத்தா. ஸஹபயோக³தோ பட்டா²யேவாதி ச இத³ம் ஸஹபயோக³ம் பத்தஸ்ஸ ததோ புப்³பே³ ஆபன்னானம் புப்³ப³பயோகா³பத்தீனம்பி படிப்பஸ்ஸத்³தி⁴ம் தீ³பேதி. தேன ஹி அயமத்தோ² விஞ்ஞாயதி ‘‘யாவ ஸஹபயோக³ம் ந பாபுணாதி, தாவ புப்³பே³ ஆபன்னாபத்தீனம் படிப்பஸ்ஸத்³தி⁴ ந ஹோதி, ஸஹபயோக³ம் பத்தகாலதோ பன பட்டா²ய தாஸம்பி படிப்பஸ்ஸத்³தி⁴ ஹோதீ’’தி, தஸ்மா ஸுட்டு² உபபரிக்கி²த்வா யுத்ததரம் க³ஹேதப்³ப³ம்.

ப³ஹுகாபி ஆபத்தியோ ஹோந்து, ஏகமேவ தே³ஸேத்வா முச்சதீதி ஏத்தா²யமதி⁴ப்பாயோ – ஸசே க²ணனவியூஹனுத்³த⁴ரணேஸு த³ஸ த³ஸ கத்வா ஆபத்தியோ ஆபன்னா, தாஸு உத்³த⁴ரணே த³ஸ ஆபத்தியோ தே³ஸேத்வா முச்சதி விஸபா⁴க³கிரியம் பத்வா புரிமாபுரிமாபத்தீனம் படிப்பஸ்ஸத்³த⁴த்தாதி. ஜாதிவஸேன பன ஸமானகிரியாய ஆபன்னாபத்தியோ ஏகத்தேன க³ஹேத்வா ‘‘ஏகமேவ தே³ஸேத்வா’’தி வுத்தம், தஸ்மா இமினாபி குருந்த³ட்ட²கதா²வசனேன பட²மம் மஹாஅட்ட²கதா²யம் வுத்தபுரிமாபத்திபடிப்பஸ்ஸத்³தி⁴மேவ ஸமத்த²யதி, ந பன உபி⁴ன்னம் அட்ட²கதா²னம் அத்த²தோ நானாகரணம் அத்தி². அபரம்பேத்த² பகாரம் வண்ணயந்தி ‘‘ஸமானகிரியாஸுபி புரிமபுரிமக²ணனபச்சயா ஆபன்னாபத்தியோ பச்சி²மபச்சி²மக²ணனம் பத்வா படிப்பஸ்ஸம்ப⁴ந்தீதி இமினா அதி⁴ப்பாயேன ‘பம்ஸுக²ணனாதீ³ஸு ச லஜ்ஜித⁴ம்மே உப்பன்னே ப³ஹுகாபி ஆபத்தியோ ஹோந்து, ஏகமேவ தே³ஸேத்வா முச்சதீதி குருந்த³ட்ட²கதா²யம் வுத்த’’’ந்தி. ‘‘ஏவஞ்ச ஸதி ‘ப³ஹுகாபி ஆபத்தியோ ஹோந்தூ’தி ந வத்தப்³ப³ம் ப⁴வேய்ய, வுத்தஞ்ச, தஸ்மா விஸபா⁴க³கிரியமேவ பத்வா புரிமாபத்தீனம் படிப்பஸ்ஸத்³தி⁴ம் இச்ச²ந்தேனேவ ப³ஹுகாஸுபி ஆபத்தீஸு ஏகமேவ தே³ஸேத்வா முச்சதீதி இமஸ்மிம் டா²னே விஸும்யேவேகோ தே³ஸனாக்கமோ த³ஸ்ஸிதோ’’திபி வத³ந்தி. அயமேதேஸம் அதி⁴ப்பாயோ – யதா² இத⁴ புரிமாபத்தீனம் படிப்பஸ்ஸத்³தி⁴ அட்ட²கதா²சரியப்பமாணேன க³ஹிதா, ஏவம் ப³ஹுகாஸுபி ஆபத்தீஸு ஏகமேவ தே³ஸேத்வா முச்சதீதி இத³ம்பி இத⁴ அட்ட²கதா²சரியப்பமாணதோயேவ வேதி³தப்³ப³ம். யதா² ச பாளியம் பாசித்தியட்டா²னேபி து³க்கடமேவ ஹோதீதி இத⁴ ஆவேணிகம் கத்வா ஆபத்திவிஸேஸோ த³ஸ்ஸிதோ, ஏவம் புரிமாபத்தீனம் படிப்பஸ்ஸத்³தி⁴விஸேஸோ ச தே³ஸனாவிஸேஸோ ச அட்ட²கதா²சரியேஹி த³ஸ்ஸிதோதி.

ஹேட்ட²தோ ஓஸீதே³ந்தோதி ‘‘ஸாமிகேஸு ஆக³ந்த்வா அபஸ்ஸித்வா க³தேஸு க³ண்ஹிஸ்ஸாமீ’’தி தே²ய்யசித்தேன ஹேட்டா²பூ⁴மியம் ஓஸீதே³ந்தோ. பு³ந்தே³னாதி கும்பி⁴யா ஹேட்டி²மதலேன. ஏவம் ஏகட்டா²னே டி²தாய கும்பி⁴யா டா²னாசாவனம் ச²ஹி ஆகாரேஹி வேதி³தப்³ப³ந்தி ஸம்ப³ந்தோ⁴. வலயம் நீஹரதி, பாராஜிகந்தி ஆகாஸக³தம் அகத்வா க⁴ம்ஸித்வா நீஹரந்தஸ்ஸ சி²ன்னகோடிதோ நீஹடமத்தே பாராஜிகம். இதோ சிதோ ச ஸாரேதீதி க⁴ம்ஸந்தோயேவ ஆகாஸக³தம் அகத்வா ஸாரேதி.

சி²ன்னமத்தே பாராஜிகந்தி அவஸ்ஸம் சே பததி, சி²ன்னமத்தே பாராஜிகம். பரிச்சே²தோ³தி ‘‘பஞ்சமாஸகம் வா அதிரேகபஞ்சமாஸகம் வா’’தி வுத்தக³ணனபரிச்சே²தோ³. அபப்³யூஹந்தோதி ‘‘ஹேட்டா² டி²தம் க³ண்ஹிஸ்ஸாமீ’’தி ஹத்தே²ன த்³விதா⁴ கரோந்தோ. உபட்³ட⁴கும்பி⁴யந்தி உபட்³ட⁴புண்ணாய கும்பி⁴யா. நனு ச அட்ட²கதா²சரியப்பமாணேன ஸங்கே²பட்ட²கதா²தீ³ஸு வுத்தம்பி கஸ்மா ந க³ஹேதப்³ப³ந்தி ஆஹ – ‘‘வினயவினிச்ச²யே ஹி ஆக³தே க³ருகே டா²தப்³ப³’’ந்தி. வினயத⁴ம்மதாதி வினயக³ருகானம் த⁴ம்மதா. வினயக³ருகா ஹி வினயவினிச்ச²யே ஆக³தே க³ருகே திட்ட²ந்தி. வினயக³ருகதாப்³யாபனத்த²ஞ்ஹி வினயக³ருகோயேவேத்த² வினய-ஸத்³தே³ன வுத்தோ, வினயஸ்ஸ வா ஏஸா த⁴ம்மதா தேஸம் க³ருகா³ரவட்டா²னஸ்ஸ வினயவிஸயத்தா.

இதா³னி ஸங்கே²பட்ட²கதா²தீ³ஸு வுத்தம் பாளியாபி ந ஸமேதீதி த³ஸ்ஸேந்தோ ஆஹ ‘‘அபிசா’’திஆதி³. பா⁴ஜனந்தி பத்தாதி³பா⁴ஜனம். பத்தாதி³ம் அபூரேத்வா க³ண்ஹந்தஸ்ஸ அனுத்³த⁴டேபி முக²வட்டிபரிச்சே²தோ³ ஹோதி, பூரேத்வா க³ண்ஹந்தஸ்ஸ பன உத்³த⁴ரணகாலே ஹோதீதி ஆஹ ‘‘முக²வட்டிபரிச்சே²தே³ன வா உத்³தா⁴ரேன வா’’தி. யதா³ பன தேலகும்பீ⁴ஆதீ³ஸு தேலாதீ³னம் அப³ஹுபா⁴வதோ பா⁴ஜனம் நிமுஜ்ஜாபேத்வா க³ண்ஹிதும் ந ஸக்கா ஹோதி, ததா³ முக²வட்டிபரிச்சே²தே³னேவ ஹோதி. சிக்கனந்தி த²த்³த⁴ம். ஆகட்³ட⁴னவிகட்³ட⁴னயோக்³க³ந்தி ஏத்த² அபி⁴முக²ம் கட்³ட⁴னம் ஆகட்³ட⁴னம், பரதோ கட்³ட⁴னம் விகட்³ட⁴னம். படினீஹரிதுந்தி அத்தனோ பா⁴ஜனதோ படினீஹரிதும். ஹத்த²தோ முத்தமத்தே பாராஜிகந்தி தே²ய்யசித்தேன பரஸந்தகக்³க³ஹணபயோக³ஸ்ஸ கதத்தா. மஹாஅட்ட²கதா²யமேவ ‘‘ஸசேபி மரியாத³ம் து³ப்³ப³லம் கத்வா ஸுக்க²தளாகஸ்ஸ உத³கனிப்³ப³ஹனட்டா²னம் உத³கனித்³த⁴மனதும்ப³ம் வா பித³ஹதி, அஞ்ஞதோ ச க³மனமக்³கே³ வா பாளிம் ப³ந்த⁴தி, ஸுக்க²மாதிகம் வா உஜும் கரோதி, பச்சா² தே³வே வுட்டே² உத³கம் ஆக³ந்த்வா மரியாத³ம் பி⁴ந்த³தி, ஸப்³ப³த்த² ப⁴ண்ட³தே³ய்ய’’ந்தி வுத்தத்தா ‘‘தம் பன தத்தே²வ ஸுக்க²தளாகே ஸுக்க²மாதிகாய உஜுகரணவினிச்ச²யேன விருஜ்ஜ²தீ’’தி வுத்தம்.

அவஹாரலக்க²ணந்தி பஞ்சவீஸதியா அவஹாரேஸு ஏகம்பி அவஹாரலக்க²ணம், டா²னாசாவனபயோகோ³ ஏவ வா. உத்³தா⁴ரேதி கும்பி⁴யா பு²ட்ட²ட்டா²னதோ கேஸக்³க³மத்தேபி உத்³த⁴டே. யுத்தந்தி டா²னாசாவனபயோக³ஸப்³பா⁴வதோ யுத்தம். ஸங்கோ³பனத்தா²யாதி இமினா ஸுத்³த⁴சித்ததம் த³ஸ்ஸேதி. பலிபு³ஜ்ஜி²ஸ்ஸதீதி நிவாரேஸ்ஸதி. வுத்தனயேனேவ பாராஜிகந்தி ஹத்த²தோ முத்தமத்தேயேவ பாராஜிகம். ஸுத்³த⁴சித்தோவ உத்³த⁴ரதீதி கும்பி⁴யம் தேலஸ்ஸ ஆகிரணதோ புரேதரமேவ ஸுத்³த⁴சித்தோ நிக்கி²பித்வா பச்சா² ஸுத்³த⁴சித்தோவ உத்³த⁴ரதி. நேவ அவஹாரோதி தே²ய்யசித்தேன அவஹரணபயோக³ஸ்ஸ அகதத்தா. அத்தனோ பா⁴ஜனத்தா பன ‘‘ந கீ³வா’’தி வுத்தம், அனாபத்திமத்தமேவ வுத்தம், ந பன ஏவம் விசாரிதந்தி அதி⁴ப்பாயோ. அத² வா அனாபத்திமத்தமேவ வுத்தந்தி இமினாபி தத்த² ‘‘கீ³வா’’தி வசனாபா⁴வதோ ‘‘ந கீ³வா’’தி புப்³பே³ வுத்தமஹாஅட்ட²கதா²வாத³மேவ பதிட்டா²பேதி, பச்சா² த³ஸ்ஸிதேன குருந்தி³வாதே³னபி மஹாஅட்ட²கதா²வாதோ³வ ஸமத்தி²தோ. அத்தனோ ப⁴ண்ட³ந்தி தேலாகிரணதோ புரேதரமேவ அத்தனோ கும்பி⁴யம் ஸுத்³த⁴சித்தேன ட²பிதம் பீததேலம் அத்தனோ பரிக்கா²ரம். ஸம்மோஹட்டா²னந்தி ஆபத்திவினிச்ச²யவஸேன ஸம்மோஹட்டா²னம்.

ப³ஹிக³தம் நாம ஹோதீதி ததோ பட்டா²ய தேலஸ்ஸ அட்டா²னபா⁴வதோ அதோ⁴முக²பா⁴வதோ ச ப³ஹிக³தம் நாம ஹோதி. அந்தோ பட்டா²ய சி²த்³தே³ கரியமானே தேலஸ்ஸ நிக்க²மித்வா க³தக³தட்டா²னம் பா⁴ஜனஸங்க்²யமேவ க³ச்ச²தீதி ஆஹ – ‘‘பா³ஹிரந்ததோ பாத³க்³க⁴னகே க³ளிதே பாராஜிக’’ந்தி. யதா² ததா² வா கதஸ்ஸாதி பா³ஹிரந்ததோ அப்³ப⁴ந்தரதோ வா பட்டா²ய கதஸ்ஸ. மஜ்ஜே² ட²பேத்வா கதசி²த்³தே³தி மஜ்ஜே² தோ²கம் கபாலம் ட²பேத்வா பச்சா² தம் சி²ந்த³ந்தேன கதசி²த்³தே³. ‘‘மரியாத³ச்சே²த³னே அந்தோ ட²த்வா ப³ஹிமுகோ² சி²ந்த³ந்தோ ப³ஹி அந்தேன காரேதப்³போ³, ப³ஹி ட²த்வா அந்தோமுகோ² சி²ந்த³ந்தோ அந்தோ அந்தேன காரேதப்³போ³, அந்தோ ச ப³ஹி ச சி²ந்தி³த்வா மஜ்ஜே² ட²பேத்வா தம் சி²ந்த³ந்தோ மஜ்ஜே²ன காரேதப்³போ³’’தி (பாரா. அட்ட². 1.108) வுத்தத்தா ‘‘தளாகஸ்ஸ ச மரியாத³பே⁴தே³ன ஸமேதீ’’தி வுத்தம். இத³மேத்த² யுத்தந்தி அந்தோ ச ப³ஹி ச பட்டா²ய கதசி²த்³தே³ மஜ்ஜே²ன காரேதப்³போ³. அந்தோ பட்டா²ய கதே பன பா³ஹிரந்தேன, ப³ஹி பட்டா²ய கதே அப்³ப⁴ந்தரேன காரேதப்³போ³தி அயம் திப்பகாரோபி ஏத்த² வேமட்ட²சி²த்³தே³ யுத்தோ. உத³கே கதபயோக³ஸ்ஸ அபா⁴வதோ ‘‘டா²னாசாவனபயோக³ஸ்ஸ அபா⁴வா’’தி வுத்தம்.

அட்ட²கதா²யம் தாவ வுத்தந்தி மஹாஅட்ட²கதா²யம் வுத்தம். பத்தி²ன்னஸ்ஸ கா²த³னம் இதரஸ்ஸ பானஞ்ச ஸப்பிஆதீ³னம் பரிபோ⁴கோ³தி ஆஹ – ‘‘அகா²தி³தப்³ப³ம் வா அபாதப்³ப³ம் வா கரோதீ’’தி. கத²ம் பன ததா² கரோதீதி ஆஹ ‘‘உச்சாரம் வா பஸ்ஸாவம் வா’’திஆதி³. கஸ்மா பனேத்த² து³க்கடம் வுத்தந்தி ஆஹ ‘‘டா²னாசாவனஸ்ஸ நத்தி²தாய து³க்கட’’ந்தி. புரிமத்³வயந்தி பே⁴த³னம் ச²ட்³ட³னஞ்ச. கஸ்மா ந ஸமேதீதி ஆஹ ‘‘தஞ்ஹீ’’திஆதி³. கும்பி⁴ஜஜ்ஜரகரணேனாதி புண்ணகும்பி⁴யா ஜஜ்ஜரகரணேன. மாதிகாஉஜஉகரணேனாதி உத³கபுண்ணாய மாதிகாய உஜுகரணேன. ஏகலக்க²ணந்தி பே⁴த³னம் கும்பி⁴ஜஜ்ஜரகரணேன ச²ட்³ட³னம் மாதிகாய உஜுகரணேன ஸத்³தி⁴ம் ஏகஸபா⁴வம் டா²னாசாவனபயோக³ஸப்³பா⁴வதோ. பச்சி²மம் பன த்³வயந்தி ஜா²பனம் அபரிபோ⁴க³கரணஞ்ச.

ஏத்த² ஏவம் வினிச்ச²யம் வத³ந்தீதி ஏத்த² மஹாஅட்ட²கதா²யம் வுத்தே ஏகே ஆசரியா ஏவம் வினிச்ச²யம் வத³ந்தி. பச்சி²மத்³வயம் ஸந்தா⁴ய வுத்தந்தி ஏத்த² புரிமத்³வயே வினிச்ச²யோ ஹேட்டா² வுத்தானுஸாரேன ஸக்கா விஞ்ஞாதுந்தி தத்த² கிஞ்சி அவத்வா பச்சி²மத்³வயம் ஸந்தா⁴ய டா²னாசாவனஸ்ஸ நத்தி²தாய து³க்கடந்தி இத³ம் வுத்தந்தி அதி⁴ப்பாயோ. தே²ய்யசித்தேனாதி அத்தனோ வா பரஸ்ஸ வா காதுகாமதாவஸேன உப்பன்னதே²ய்யசித்தேன. வினாஸேதுகாமதாயாதி ஹத்த²பாதா³தி³ம் சி²ந்த³ந்தோ விய கேவலம் வினாஸேதுகாமதாய. புரிமத்³வயே கிம் ஹோதி, கிம் அதி⁴ப்பாயேன ந கிஞ்சி வுத்தந்தி ஆஹ – ‘‘புரிமத்³வயே பன…பே… பாராஜிக’’ந்தி. தத்த² வுத்தனயேன பி⁴ந்த³ந்தஸ்ஸ வா ச²ட்³டே³ந்தஸ்ஸ வாதி முக்³க³ரேன போதே²த்வா பி⁴ந்த³ந்தஸ்ஸ உத³கம் வா வாலிகம் வா ஆகிரித்வா உத்தராபேந்தஸ்ஸாதி அத்தோ². அயுத்தந்தி சேதி பாளியம் புரிமபத³த்³வயேபி து³க்கடஸ்ஸேவ வுத்தத்தா ‘‘புரிமத்³வயே…பே… பாராஜிகந்தி இத³ம் அயுத்த’’ந்தி யதி³ தும்ஹாகம் ஸியாதி அத்தோ². நாதி அயுத்தபா⁴வப்பஸங்க³ம் நிஸேதே⁴த்வா தத்த² காரணமாஹ ‘‘அஞ்ஞதா² க³ஹேதப்³ப³த்த²தோ’’தி. கத²ம் பனேத்த² அத்தோ² க³ஹேதப்³போ³தி ஆஹ ‘‘பாளியம் ஹீ’’திஆதி³. நாஸேதுகாமதாபக்கே² ஹேட்டா² வுத்தனயேனேவ அத்த²ஸ்ஸ அவிருஜ்ஜ²னதோ ‘‘தே²ய்யசித்தபக்கே²’’தி வுத்தம். ‘‘ஏவம் வினிச்ச²யம் வத³ந்தீ’’தி இதோ பட்டா²ய வுத்தஸ்ஸ ஸப்³ப³ஸ்ஸபி ஏகஸ்ஸேவ வசனத்தா ‘‘ஏவமேகே வத³ந்தீ’’தி நிக³மனவஸேன வுத்தம்.

இதா³னி யதா²வுத்தவஸேன பாளியா அத்தே² க³ய்ஹமானே மஹாஅட்ட²கதா²யம் சதுன்னம்பி ஸாமஞ்ஞதோ வுத்தஸ்ஸ பச்சி²மத்³வயம் ஸந்தா⁴ய வுத்தந்தி வசனே விஸேஸாபா⁴வதோ பாளியம் வுத்தேஸு சதூஸு பதே³ஸு ‘‘ச²ட்³டே³தி வா அபரிபோ⁴க³ம் வா கரோதீ’’தி இமேஸம் பதா³னம் விஸேஸாபா⁴வப்பஸங்க³தோ ச ஸயம் அஞ்ஞதா² பாளிம் அட்ட²கத²ஞ்ச ஸம்ஸந்தி³த்வா அத்த²ம் த³ஸ்ஸேதுகாமோ ‘‘அயம் பனேத்த² ஸாரோ’’திஆதி³மாஹ. வினீதவத்து²ம்ஹி ‘‘ஸங்க⁴ஸ்ஸ புஞ்ஜகிதம் திணம் தே²ய்யசித்தோ ஜா²பேஸீ’’ஸி (பாரா. 156) வுத்தத்தா வினீதவத்து²ம்ஹி திணஜ்ஜா²பகோ வியாதி இமினாவ டா²னா அசாவேதுகாமோவாதி ஏத்தா²பி தே²ய்யசித்தேன டா²னா அசாவேதுகாமோதி இத³ம் வுத்தமேவ ஹோதீதி த³ட்ட²ப்³ப³ம். அச²ட்³டே³துகாமோயேவாதி ஏத்தா²பி தே²ய்யசித்தேனாதி ஸம்ப³ந்தி⁴தப்³ப³ம். இத³ஞ்ஹி தே²ய்யசித்தபக்க²ம் ஸந்தா⁴ய வுத்தம் நாஸேதுகாமதாபக்க²ஸ்ஸ வக்க²மானத்தா. தேனேவாஹ ‘‘நாஸேதுகாமதாபக்கே² பனா’’திஆதி³. இதரதா²பி யுஜ்ஜதீதி தே²ய்யசித்தாபா⁴வா டா²னா சாவேதுகாமஸ்ஸபி து³க்கடம் யுஜ்ஜதீதி வுத்தம் ஹோதி.

பூ⁴மட்ட²கதா²வண்ணனா நிட்டி²தா.

ஆகாஸட்ட²கதா²வண்ணனா

96. ஆகாஸட்ட²கதா²யம் முக²துண்ட³கேனாதி முக²க்³கே³ன. கலாபக்³கே³னாதி பிஞ்ச²கலாபஸ்ஸ அக்³கே³ன. பஸாரேதீதி க³ஹணத்த²ம் பஸாரேதி. அக்³க³ஹேத்வா வாதி லேட்³டு³ஆதீ³ஹி பஹரித்வா நயனவஸேன அக்³க³ஹேத்வா வா. ஆகாஸட்ட²வினிச்ச²யே வுச்சமானேபி தப்பஸங்கே³ன ஆகாஸட்ட²ஸ்ஸ வேஹாஸட்டா²தி³பா⁴வமுபக³தேபி அஸம்மோஹத்த²ம் ‘‘யஸ்மிம் அங்கே³ நிலீயதீ’’திஆதி³ வுத்தம். அந்தோவத்து²ம்ஹீதி பரிக்கி²த்தவத்து²ஸ்ஸ அந்தோ. அந்தோகா³மேதி பரிக்கி²த்தஸ்ஸ கா³மஸ்ஸ அந்தோ. அபரிக்கி²த்தே பன வத்து²ம்ஹி, கா³மே வா டி²தட்டா²னமேவ டா²னம். அடவிமுக²ம் கரோதீதி அரஞ்ஞாபி⁴முக²ம் கரோதி. ரக்க²தீதி தேன பயோகே³ன தஸ்ஸ இச்சி²தட்டா²னம் அக³தத்தா ரக்க²தி. பூ⁴மியா க³ச்ச²ந்தம் ஸந்தா⁴ய ‘‘து³தியபத³வாரே வா’’தி வுத்தம். கா³மதோ நிக்க²ந்தஸ்ஸாதி பரிக்கி²த்தகா³மதோ நிக்க²ந்தஸ்ஸ. கபிஞ்ஜரோ நாம ஏகா பக்கி²ஜாதி.

ஆகாஸட்ட²கதா²வண்ணனா நிட்டி²தா.

வேஹாஸட்ட²கதா²வண்ணனா

97. வேஹாஸட்ட²கதா²யம் பன சீவரவம்ஸே ட²பிதஸ்ஸ சீவரஸ்ஸ ஆகட்³ட⁴னே யதா²வுத்தப்பதே³ஸாதிக்கமோ ஏகத்³வங்கு³லமத்தாகட்³ட⁴னேன ஸியாதி அதி⁴ப்பாயேன வுத்தம் ‘‘ஏகத்³வங்கு³லமத்தாகட்³ட⁴னேனேவ பாராஜிக’’ந்தி. இத³ஞ்ச தாதி³ஸம் நாதிமஹந்தம் சீவரவம்ஸத³ண்ட³கம் ஸந்தா⁴ய வுத்தம், மஹந்தே பன ததோ அதி⁴கமத்தாகட்³ட⁴னேனேவ ஸியா. ரஜ்ஜுகேன ப³ந்தி⁴த்வாதி ஏகாய ரஜ்ஜுகோடியா சீவரம் ப³ந்தி⁴த்வா அபராய கோடியா சீவரவம்ஸம் ப³ந்தி⁴த்வா ட²பிதசீவரம். முத்தமத்தே அட்ட²த்வா பதனகஸபா⁴வத்தா ‘‘முத்தே பாராஜிக’’ந்தி வுத்தம்.

ஏகமேகஸ்ஸ பு²ட்டோ²காஸமத்தே அதிக்கந்தே பாராஜிகந்தி பி⁴த்திம் அபு²ஸாபேத்வா ட²பிதத்தா வுத்தம். பி⁴த்திம் நிஸ்ஸாய ட²பிதந்தி படிபாடியா ட²பிதேஸு நாக³த³ந்தாதீ³ஸுயேவ ஆரோபேத்வா பி⁴த்திம் பு²ஸாபேத்வா ட²பிதம். பண்ணந்தரம் ஆரோபேத்வா ட²பிதாதி அஞ்ஞேஹி ட²பிதம் ஸந்தா⁴ய வுத்தம்.

வேஹாஸட்ட²கதா²வண்ணனா நிட்டி²தா.

உத³கட்ட²கதா²வண்ணனா

98. உத³கட்ட²கதா²யம் ஸந்த³மானஉத³கே நிக்கி²த்தம் ந திட்ட²தீதி ஆஹ ‘‘அஸந்த³னகே உத³கே’’தி. அனாபத்தீதி ஹத்த²வாரபத³வாரேஸு து³க்கடாபத்தியா அபா⁴வம் ஸந்தா⁴ய வுத்தம். கட்³ட⁴தீதி ஹேட்ட²தோ ஓஸாரேதி. உப்பலாதீ³ஸூதி ஆதி³-ஸத்³தே³ன பது³மபுண்ட³ரீகாதி³ம் ஸங்க³ண்ஹாதி. ரத்தம் பது³மம், ஸேதம் புண்ட³ரீகம். ஸேதம் வா பது³மம், ரத்தம் புண்ட³ரீகம். அத² வா ரத்தம் வா ஹோது ஸேதம் வா ஸதபத்தம் பது³மம், ஊனஸதபத்தம் புண்ட³ரீகம். வத்து² பூரதீதி பாராஜிகவத்து² பஹோதி. தஸ்மிம் சி²ன்னமத்தே பாராஜிகந்தி உத³கதோ அச்சுக்³க³தஸ்ஸ உத³கவினிமுத்தட்டா²னதோ சே²த³னம் ஸந்தா⁴ய வுத்தம். யம் வத்து²ம் பூரேதீதி யம் புப்ப²ம் பாராஜிகவத்து²ம் பூரேதி. த³ஸஹி புப்பே²ஹி கதகலாபோ ஹத்த²கோ, மஹந்தம் கலாபம் கத்வா ப³த்³த⁴ம் பா⁴ரப³த்³த⁴ம். ரஜ்ஜுகேஸு திணானி ஸந்த²ரித்வாதி ஏத்த² ‘‘த்³வே ரஜ்ஜுகானி உத³கபிட்டே² ட²பேத்வா தேஸம் உபரி திரியதோ திணானி ஸந்த²ரித்வா தேஸம் உபரி ப³ந்தி⁴த்வா வா அப³ந்தி⁴த்வா வா திரியதோயேவ புப்பா²னி ட²பேத்வா ஹேட்ட²தோ க³தானி த்³வே ரஜ்ஜுகானி உக்கி²பித்வா புப்ப²மத்த²கே ட²பேந்தீ’’தி வத³ந்தி.

கேஸக்³க³மத்தம்பி யதா²டி²தட்டா²னதோ சாவேதீதி பாரிமந்தேன பு²ட்டோ²காஸம், ஓரிமந்தேன கேஸக்³க³மத்தம் சாவேதி. ஸகலமுத³கந்தி த³ண்டே³ன பு²ட்டோ²காஸக³தம் ஸகலமுத³கம். ந உத³கம் டா²னந்தி அத்தனா கதட்டா²னஸ்ஸ அட்டா²னத்தா. இத³ம் உப⁴யந்தி ஏத்த² ‘‘ப³ந்த⁴னம் அமோசேத்வா…பே… பாராஜிக’’ந்தி இத³மேவேகம், ‘‘பட²மம் ப³ந்த⁴னம்…பே… டா²னபரிச்சே²தோ³’’தி இத³ம் து³தியம். பது³மினியந்தி பது³மக³ச்சே². உப்பாடிதாயாதி பரேஹி அத்தனோ அத்தா²ய உப்பாடிதாய.

ப³ஹி ட²பிதேதி உத³கதோ ப³ஹி ட²பிதே. ஹத்த²கவஸேன கு²த்³த³கம் கத்வா

ப³த்³த⁴ம் கலாபப³த்³த⁴ம். முளாலந்தி கந்த³ம். பத்தம் வா புப்ப²ம் வாதி இத³ம் கத்³த³மஸ்ஸ அந்தோ பவிஸித்வா டி²தம் ஸந்தா⁴ய வுத்தம். ஸகலமுத³கந்தி வாபிஆதீ³ஸு பரியாபன்னம் ஸகலமுத³கம். நித்³த⁴மனதும்ப³ந்தி வாபியா உத³கஸ்ஸ நிக்க²மனமக்³க³ம். உத³கவாஹகந்தி மஹாமாதிகம். ந அவஹாரோதி இத³ம் புப்³ப³ஸதி³ஸம் ந ஹோதீதி ஆஹ – ‘‘கஸ்மா…பே… ஏவரூபா ஹி தத்த² கதிகா’’தி. அவஹாரோ நத்தீ²தி ஸப்³ப³ஸாதா⁴ரணே அபரிக்³க³ஹட்டா²னே க³ஹிதத்தா. மாதிகம் ஆரோபேத்வாதி கு²த்³த³கமாதிகம் ஆரோபேத்வா. மரித்வா…பே… திட்ட²ந்தீதி ஏத்த² ‘‘மதமச்சா²னம்யேவ தேஸம் ஸந்தகத்தா அமதே க³ண்ஹந்தஸ்ஸ நத்தி² அவஹாரோ’’தி வத³ந்தி.

உத³கட்ட²கதா²வண்ணனா நிட்டி²தா.

நாவட்ட²கதா²வண்ணனா

99. நாவட்ட²கதா²யம் பன யா ப³ந்த⁴னா முத்தமத்தே டா²னா ந சவதீதி இமினா சண்ட³ஸோதே ப³த்³த⁴னாவம் படிக்கி²பதி. தாவ து³க்கடந்தி ‘‘ப³ந்த⁴னம் மோசேதி, ஆபத்தி து³க்கடஸ்ஸா’’தி ஏவம் மோசேந்தஸ்ஸ பஞ்ஞத்தம் து³க்கடம் ஸந்தா⁴ய வுத்தம். து²ல்லச்சயம்பி பாராஜிகம்பி ஹோதீதி ஏத்த² பட²மம் டா²னா அசாவேத்வா முத்தே து²ல்லச்சயம், பட²மம் டா²னா சாவேத்வா முத்தே பாராஜிகந்தி வேதி³தப்³ப³ம்.

‘‘பாஸே ப³த்³த⁴ஸூகரோ வியா’’திஆதி³னா வுத்தம் ஸந்தா⁴யாஹ ‘‘தத்த² யுத்தி புப்³பே³ வுத்தா ஏவா’’தி. விப்பனட்டா² நாவாதி விஸமவாதாதீ³ஹி வினாஸம் பத்வா உத³கே நிமுஜ்ஜித்வா ஹேட்டா² பூ⁴மிதலம் அப்பத்வா மஜ்ஜே² டி²தம் ஸந்தா⁴ய வத³தி. தேனேவ ‘‘அதோ⁴ வா ஓபிலாபேந்தஸ்ஸ…பே… நாவாதலேன பு²ட்டோ²காஸம் முக²வட்டிம் அதிக்கந்தமத்தே பாராஜிக’’ந்தி வுத்தம். ஓபிலாபேந்தஸ்ஸாதி ஓஸீதா³பேந்தஸ்ஸ. அதிக்கந்தமத்தேதி பு²ட்டோ²காஸம் அதிக்கந்தமத்தே. ஏஸேவ நயோதி முத்தமத்தே பாராஜிகந்தி த³ஸ்ஸேதி.

நாவாகட்³ட⁴னயோக்³க³மஹாயோத்ததாய யோத்தகோடிதோ பட்டா²ய ஸகலம்பி ‘‘டா²ன’’ந்தி வுத்தம்.

அஸதிபி வாதே யதா² வாதம் க³ண்ஹாதி, ததா² ட²பிதத்தா ‘‘வாதம் க³ண்ஹாபேதீ’’தி வுத்தம். ப³லவா ச வாதோ ஆக³ம்மாதி இமினா அஸதி வாதே அயம் பயோகோ³ கதோதி த³ஸ்ஸேதி. தேனேவ ‘‘புக்³க³லஸ்ஸ நத்தி² அவஹாரோ’’தி வுத்தம். ஸதி பன வாதே கதோ பயோகோ³ டா²னாசாவனபயோகோ³யேவாதி மாதிகாஉஜுகரணே விய அத்தே²வ அவஹாரோதி த³ட்ட²ப்³ப³ம். டா²னாசாவனபயோகோ³ ந ஹோதீதி ஸுக்க²மாதிகாஉஜுகரணே விய அஸதி வாதே கதபயோக³த்தா. ப⁴ண்ட³தே³ய்யம் பன ஹோதீதி நாவாஸாமிகஸ்ஸ ப⁴ண்ட³தே³ய்யம் ஹோதி.

நாவட்ட²கதா²வண்ணனா நிட்டி²தா.

யானட்ட²கதா²வண்ணனா

100. யானட்ட²கதா²யம் து³கயுத்தஸ்ஸாதி த்³வீஹி கோ³ணேஹி யுத்தஸ்ஸ. அயுத்தகந்தி கோ³ணேஹி அயுத்தம். கப்பகதாதி யதா² த்³வீஹி பா⁴கே³ஹி ஹேட்டா² பதிட்டா²தி, ஏவம் கதா. தீணி வா சத்தாரி வா டா²னானீதி அகப்பகதாய உபத்த²ம்ப⁴னியா வஸேன தீணி டா²னானி, கப்பகதாய வஸேன சத்தாரி டா²னானீதி. ததா² பத²வியம் ட²பிதஸ்ஸ தீணி டா²னானீதி ஸம்ப³ந்தோ⁴. தந்தி ப²லகஸ்ஸ வா தா³ருகஸ்ஸ வா உபரி ட²பிதம் பத²வியம் ட²பிதஞ்ச. த்³வீஹி அக்க²ஸீஸேஹீதி த்³வீஹி அக்க²கோடீஹி. தா³ரூனம் உபரி ட²பிதஸ்ஸாதி த்³வின்னம் தா³ரூனம் உபரி த்³வீஹி அக்க²கோடீஹி ஓலம்பே³த்வா ஸகடஸாலாயம் ட²பிதஸ்ஸ. ஹேட்டி²மதலஸ்ஸாதி ஸகடபா³ஹாய பூ⁴மிம் பு²ஸித்வா டி²தஸ்ஸ ஹேட்டி²மபா⁴க³ஸ்ஸ. ஸேஸம் நாவாயம் வுத்தஸதி³ஸந்தி இமினா ‘‘யதி³ பன தம் ஏவம் க³ச்ச²ந்தம் பகதிக³மனம் உபச்சி²ந்தி³த்வா அஞ்ஞம் தி³ஸாபா⁴க³ம் நேதி, பாராஜிகம். ஸயமேவ யம் கஞ்சி கா³மம் ஸம்பத்தம் டா²னா அசாவேந்தோவ விக்கிணித்வா க³ச்ச²தி, நேவத்தி² அவஹாரோ, ப⁴ண்ட³தே³ய்யம் பன ஹோதீ’’தி இமம் நயம் அதிதி³ஸ்ஸதி.

யானட்ட²கதா²வண்ணனா நிட்டி²தா.

பா⁴ரட்ட²கதா²வண்ணனா

101. பா⁴ரட்ட²கதா²யம் புரிமக³லே க³லவாடகோதி புரிமக³லே உபரிமக³லவாடகோ. உரபரிச்சே²த³மஜ்ஜே²தி உரபரியந்தஸ்ஸ மஜ்ஜே². அனாணத்தத்தாதி ‘‘அஸுகட்டா²னம் நேஹீ’’தி அனாணத்தத்தா. யோ சாயம் ஸீஸபா⁴ரே வுத்தோதி யோ சாயம் வினிச்ச²யோ ஸீஸபா⁴ரே வுத்தோ. ஸீஸாதீ³ஹி வா க³ஹிதோ ஹோதூதி ஸம்ப³ந்தோ⁴. தாதி³ஸந்தி தப்படிச்சா²த³னஸமத்த²ம்.

பா⁴ரட்ட²கதா²வண்ணனா நிட்டி²தா.

ஆராமட்ட²கதா²வண்ணனா

102. ஆராமட்ட²கதா²யம் ப³ந்த⁴னந்தி புப்பா²னம் வண்டே பதிட்டி²தட்டா²னம். அபி⁴யுஞ்ஜதீதி சோதே³தி அட்³ட³ம் கரோதி. அதி³ன்னாதா³னஸ்ஸ பயோக³த்தாதி ஸஹபயோக³மாஹ வத்து²ம்ஹியேவ கதபயோக³த்தா. ஸஹபயோக³வஸேன ஹேதம் து³க்கடம். வினிச்ச²யப்பஸுதந்தி வினிச்ச²யே நியுத்தம். கக்க²ளோதி தா³ருணோ. து⁴ரம் நிக்கி²பதீதி உஸ்ஸாஹம் ட²பேதி, அத்தனோ ஸந்தககரணே நிருஸ்ஸாஹோ ஹோதீதி அத்தோ². கூடட்³ட³காரகோபி ஸசே து⁴ரம் ந நிக்கி²பதி, நத்தி² அவஹாரோதி ஆஹ ‘‘ஸசே ஸயம்பி கதது⁴ரனிக்கே²போ ஹோதீ’’தி. ஸயம்பீதி அபி⁴யுஞ்ஜகோபி. கதது⁴ரனிக்கே²போதி ‘‘ந தா³னி நம் இமஸ்ஸ த³ஸ்ஸாமீ’’தி ஏவம் தஸ்ஸ தா³னே கதது⁴ரனிக்கே²போ. கிங்காரப்படிஸ்ஸாவிபா⁴வேதி ‘‘கிம் கரோமி கிம் கரோமீ’’தி ஏவம் கிங்காரமேவ படிஸ்ஸுணந்தோ விசரதீதி கிங்காரபடிஸ்ஸாவீ, தஸ்ஸ பா⁴வோ கிங்காரபடிஸ்ஸாவிபா⁴வோ, தஸ்மிம், அத்தனோ வஸவத்திபா⁴வேதி வுத்தம் ஹோதி.

உக்கோசம் த³த்வாதி லஞ்ஜம் த³த்வா. கூடவினிச்ச²யிகானந்தி கூடவினிச்ச²யே நியுத்தானம் வினயத⁴ரானம். ‘‘க³ண்ஹா’’தி அவத்வா ‘‘அஸாமிகஸ்ஸ ஸாமிகோ அய’’ந்திஆதி³னா பரியாயேன வுத்தேபி தஸ்ஸ ஸந்தகபா⁴வம் பரிச்சி²ந்தி³த்வா பவத்தவசனத்தா கூடவினிச்ச²யம் கரோந்தானம் கூடஸக்கீ²னஞ்ச பாராஜிகமேவ. அஸதிபி சேத்த² டா²னாசாவனே உபி⁴ன்னம் து⁴ரனிக்கே²போயேவ டா²னாசாவனட்டா²னே திட்ட²தி. இமஸ்மிம் து⁴ரனிக்கே²பே பாராஜிகே ஸாமிகஸ்ஸ விமதுப்பாத³னபயோகே³ கதே து²ல்லச்சயம், தஸ்ஸேவ து⁴ரனிக்கே²பபயோகே³ நிப்பா²தி³தே பாராஜிகம். ஸயம் பராஜயம் பாபுணாதீதி கூடட்³ட³காரகோ பராஜயம் பாபுணாதி.

ஆராமட்ட²கதா²வண்ணனா நிட்டி²தா.

விஹாரட்ட²கதா²வண்ணனா

103. விஹாரட்ட²கதா²யம் விஹாரோபி பரிவேணம்பி ஆவாஸோபி விஹாரோத்வேவ ஸங்க²ம் க³ச்ச²தீதி ஆஹ ‘‘விஹாரம் வா’’திஆதி³. தத்த² விஹாரந்தி மஹாவிஹாரம். பரிவேணந்தி மஹாவிஹாரஸ்ஸ அப்³ப⁴ந்தரே விஸும் விஸும் பாகாரபரிச்சி²ன்னட்டா²னம். ஆவாஸந்தி ஏகம் ஆவஸத²ம். அபி⁴யோகே³ கதேபி அவஹாரஸ்ஸ அஸிஜ்ஜ²னதோ வுத்தம் ‘‘அபி⁴யோகோ³ ந ருஹதீ’’தி. க³ணஸந்தகே பன பரிச்சி²ன்னஸாமிகத்தா ஸக்கா து⁴ரம் நிக்கி²பாபேதுந்தி ஆஹ ‘‘தீ³க⁴பா⁴ணகாதி³பே⁴த³ஸ்ஸ பன க³ணஸ்ஸா’’தி. இதா⁴பி ஸசே ஏகோபி து⁴ரம் ந நிக்கி²பதி, ரக்க²தியேவ. ஸப்³பே³ஸம் து⁴ரனிக்கே²பேனேவ ஹி பாராஜிகம்.

விஹாரட்ட²கதா²வண்ணனா நிட்டி²தா.

கே²த்தட்ட²கதா²வண்ணனா

104. கே²த்தட்ட²கதா²யம் ஸத்த த⁴ஞ்ஞானீதி ஸாலிவீஹியவகங்கு³குத்³ரூஸவரககோ³து⁴மானம் வஸேன ஸத்த த⁴ஞ்ஞானி. நிரும்பி⁴த்வா வாதிஆதீ³ஸு ‘‘க³ண்ஹந்தஸ்ஸா’’தி பச்சேகம் யோஜேதப்³ப³ம். தத்த² நிரும்பி⁴த்வா க³ஹணம் நாம வீஹிஸீஸம் அச்சி²ந்தி³த்வா யதா²டி²தமேவ ஹத்தே²ன க³ஹேத்வா ஆகட்³டி⁴த்வா பீ³ஜமத்தஸ்ஸேவ க³ஹணம். ஏகமேகந்தி ஏகமேகம் வீஹிஸீஸம். உப்பாடேத்வா வாதி முக்³க³மாஸாதீ³னி உத்³த⁴ரித்வா வா. யஸ்மிம் பீ³ஜே வாதிஆதி³ நிரும்பி⁴த்வா க³ஹணாதீ³ஸு யதா²க்கமம் யோஜேதப்³ப³ம். ஸாலிஸீஸாதீ³னி நிரும்பி⁴த்வா க³ண்ஹந்தஸ்ஸ யஸ்மிம் பீ³ஜே வத்து² பூரதி, ஏகமேகம் ஹத்தே²னேவ சி²ந்தி³த்வா க³ண்ஹந்தஸ்ஸ யஸ்மிம் ஸீஸே வத்து² பூரதி, அஸிதேன லாயித்வா க³ண்ஹந்தஸ்ஸ யஸ்ஸம் முட்டி²யம் வத்து² பூரதி, ப³ஹூனி ஏகதோ உப்பாடேத்வா க³ண்ஹந்தஸ்ஸ யஸ்மிம் முக்³க³மாஸாதி³ப²லே வத்து² பூரதீதி ஏவமேத்த² யதா²க்கமோ வேதி³தப்³போ³. ‘‘தஸ்மிம் ப³ந்த⁴னா மோசிதமத்தே’’தி வசனதோ தஸ்மிம் பீ³ஜாதி³ம்ஹி ப³ந்த⁴னா மோசிதே ஸதி ததோ அனபனீதேபி பாராஜிகமேவாதி த³ட்ட²ப்³ப³ம். அச்சி²ஜ்ஜமானோதி அச்சி²ன்னோ ஹுத்வா டி²தோ. ஜடிதானீதி சி²ந்தி³தானி அச்சி²ன்னேஹி ஸத்³தி⁴ம் ஜடிதானி ஹோந்தீதி அத்தோ². ஸபு⁴ஸந்தி பலாலஸஹிதம். அபு⁴ஸந்தி பலாலரஹிதம்.

கீ²லேனாதி கா²ணுகேன. ஏத்த² ச கீ²லஸங்கமனாதீ³ஸு உப⁴யம் ஸம்ப⁴வதி ஸஹபயோகோ³ து⁴ரனிக்கே²போ ச. யதா³ ஹி பரஸ்ஸ கே²த்தாதீ³ஸு ஏகதே³ஸம் கீ²லஸங்கமனாதி³வஸேன அத்தனோ ஸந்தகம் கரோதி, ததா³ ஸதிபி பட²மதரம் ஸாமிகானம் து⁴ரனிக்கே²பே கீ²லஸங்கமனாதி³ஸஹபயோக³ம் வினா ந ஹோதீதி ஸஹபயோகே³னேவ பாராஜிகம். தேனேவ மாதிகாட்ட²கதா²யம் (கங்கா². அட்ட². து³தியபாராஜிகவண்ணனா) வுத்தம் ‘‘டா²னாசாவனவஸேன கீ²லாதீ³னி ஸங்காமேத்வா கே²த்தாதி³க்³க³ஹணவஸேன ச ஸஹபயோகோ³ வேதி³தப்³போ³’’தி. யதா³ பன அஸதி து⁴ரனிக்கே²பே கீ²லஸங்கமனாதி³மத்தம் கதம், ததா³ வினா து⁴ரனிக்கே²பேன ந ஹோதீதி து⁴ரனிக்கே²பேனேவ பாராஜிகம். தேனேவேத்த² ‘‘தஞ்ச கோ² ஸாமிகானம் து⁴ரனிக்கே²பேனா’’தி வுத்தம். ஏவம் ஸப்³ப³த்தா²தி யதா²வுத்தமத்த²ம் ரஜ்ஜுஸங்கமனாதீ³ஸுபி அதிதி³ஸதி.

யட்டி²ந்தி மானத³ண்ட³ம். ஏகஸ்மிம் அனாக³தே து²ல்லச்சயம், தஸ்மிம் ஆக³தே பாராஜிகந்தி ஏத்த² ஸசே தா³ரூனி நிக²ணித்வா தத்தகேனேவ க³ண்ஹிதுகாமோ ஹோதி, அவஸானே தா³ரும்ஹி பாராஜிகம். ஸசே தத்த² ஸாகா²யோபி கத்வா க³ஹேதுகாமோ ஹோதி, அவஸானஸாகா²ய பாராஜிகந்தி வேதி³தப்³ப³ம். தத்தகேன அஸக்கோந்தோதி தா³ரூனி நிக²ணித்வா வதிம் காதும் அஸக்கோந்தோ. கே²த்தமரியாத³ந்தி வுத்தமேவத்த²ம் விபா⁴வேதும் ‘‘கேதா³ரபாளி’’ந்தி வுத்தம். வித்த²தம் கரோதீதி புப்³பே³ விஜ்ஜமானமேவ மரியாத³ம் வித்தி²ண்ணம் கரோதி. அகதம் வா பன பதிட்ட²பேதீதி புப்³பே³ அகதம் வா மரியாத³ம் ட²பேதி.

கே²த்தட்ட²கதா²வண்ணனா நிட்டி²தா.

வத்து²ட்ட²கதா²வண்ணனா

105. வத்து²ட்ட²கதா²யம் திண்ணம் பாகாரானந்தி இட்ட²கஸிலாதா³ரூனம் வஸேன திண்ணம் பாகாரானம். ஏதேனேவ நயேனாதி இமினா ‘‘கேவலம் பூ⁴மிம் ஸோதே⁴த்வா…பே… அபரிக்கி²பித்வா வா’’தி வுத்தமத்த²ம் நித³ஸ்ஸேதி.

கா³மட்ட²கதா²வண்ணனா

106. கா³மட்ட²கதா²யம் கா³மோ நாமாதி பாளியம் ந வுத்தம் ஸப்³ப³ஸோ கா³மலக்க²ணஸ்ஸ புப்³பே³ வுத்தத்தா.

அரஞ்ஞட்ட²கதா²வண்ணனா

107. அரஞ்ஞட்ட²கதா²யம் அரஞ்ஞம் நாமாதி இத³ம் பன ந கேவலம் புப்³பே³ வுத்தஅரஞ்ஞலக்க²ணப்பத்திமத்தேன அரஞ்ஞம் இதா⁴தி⁴ப்பேதம், கிந்து யம் அத்தனோ அரஞ்ஞலக்க²ணேன அரஞ்ஞம் பரபரிக்³க³ஹிதஞ்ச ஹோதி, தம் அரஞ்ஞம் இதா⁴தி⁴ப்பேதந்தி த³ஸ்ஸேதும் வுத்தம். தேனாதி புன அரஞ்ஞவசனேன. ந பரிக்³க³ஹிதபா⁴வோ அரஞ்ஞஸ்ஸ லக்க²ணந்தி யதி³ ஹி பரிக்³க³ஹிதபா⁴வோ அரஞ்ஞலக்க²ணம் ஸியா, ‘‘அரஞ்ஞம் நாம யம் மனுஸ்ஸானம் பரிக்³க³ஹித’’ந்தி ஏத்தகமேவ வதே³ய்யாதி அதி⁴ப்பாயோ. யந்தி இமினா புப்³பே³ வுத்தலக்க²ணமேவ அரஞ்ஞம் பராமட்ட²ந்தி ஆஹ ‘‘யம் பன அத்தனோ அரஞ்ஞலக்க²ணேன அரஞ்ஞ’’ந்தி.

வினிவிஜ்ஜி²த்வாதி உஜுகமேவ வினிவிஜ்ஜி²த்வா. பண்ணம் வாதி தாலபண்ணாதி³ பண்ணம் வா. அத்³த⁴க³தோபீதி சிரகாலம் தத்தே²வ டி²தோபி. ந க³ஹேதப்³போ³தி ஏத்த² பன யோ பரேஹி அரஞ்ஞஸாமிகானம் ஹத்த²தோ கிணித்வா தச்சே²த்வா தத்தே²வ ட²பிதோ, ஸோ அரஞ்ஞஸாமிகேன அனுஞ்ஞாதோபி ந க³ஹேதப்³போ³. ஸாமிகேஹி ச²ட்³டி³தோதி க³ஹேதும் வட்டதீதி பம்ஸுகூலஸஞ்ஞாய க³ஹணம் வுத்தம். லக்க²ணச்சி²ன்னஸ்ஸாபீதி அரஞ்ஞஸாமிகானம் ஹத்த²தோ கிணித்வா க³ண்ஹந்தேஹி கதஸஞ்ஞாணஸ்ஸ. ச²ல்லியா பரியோனத்³த⁴ம் ஹோதீதி இமினா ஸாமிகானம் நிரபேக்க²தம் தீ³பேதி. தேன வுத்தம் ‘‘க³ஹேதும் வட்டதீ’’தி. யதி³ ஸாமிகானம் ஸாபேக்க²தா அத்தி², ந வட்டதி. தானி கதானி அஜ்ஜா²வுத்தா²னி ச ஹோந்தீதி தானி கே³ஹாதீ³னி கதானி பரினிட்டி²தானி மனுஸ்ஸேஹி ச அஜ்ஜா²வுத்தா²னி ஹோந்தி. தா³ரூனிபீதி கே³ஹாதீ³னம் கதத்தா ததோ அவஸிட்ட²தா³ரூனிபி. ஏதேஸந்தி ஏதேஸம் யதா²வுத்ததா³ரூனம்.

தேஸம் ஆரக்க²ட்டா²னந்தி தேஸம் அரஞ்ஞபாலானம் டி²தட்டா²னம். தே³ஹீதி வுத்தே தா³தப்³ப³மேவாதி ஏத்த² ‘‘தே³ஹீ’’தி வுத்தே ‘‘த³ஸ்ஸாமீ’’தி ஆபோ⁴க³ஸப்³பா⁴வதோ ‘‘தே³ஹீ’’தி அவுத்தே அத³த்வாபி க³ந்தும் வட்டதியேவ. க³ந்தும் தே³தா²தி க³மனம் தே³த². அதி³ஸ்வா க³ச்ச²தி, ப⁴ண்ட³தே³ய்யந்தி பரிஸுத்³த⁴சித்தேன க³ச்ச²தி, ப⁴ண்ட³தே³ய்யம். யத்த² கத்த²சி நீதானம்பி தா³ரூனம் அரஞ்ஞஸாமிகானம்யேவ ஸந்தகத்தா ஸுத்³த⁴சித்தேன நிக்க²ந்தோபி புன தே²ய்யசித்தம் உப்பாதே³த்வா க³ச்ச²தி, பாராஜிகமேவாதி வத³ந்தி.

அரஞ்ஞட்ட²கதா²வண்ணனா நிட்டி²தா.

உத³ககதா²வண்ணனா

108. உத³ககதா²யம் மஹாகுச்சி²கா உத³கசாடி உத³கமணிகோ. ‘‘ஸமேக²லா சாடி உத³கமணிகோ’’திபி வத³ந்தி. தத்தா²தி தேஸு பா⁴ஜனேஸு. நிப்³ப³ஹனஉத³கந்தி ‘‘மஹோத³கம் ஆக³ந்த்வா தளாகமரியாத³ம் மா சி²ந்தீ³’’தி தளாகரக்க²ணத்த²ம் தஸ்ஸ ஏகபஸ்ஸேன விஸ்ஸஜ்ஜிதஉத³கம். நித்³த⁴மனதும்ப³ந்தி ஸஸ்ஸாதீ³னம் அத்தா²ய உத³கனிக்க²மனமக்³க³ம். மரியாத³ம் து³ப்³ப³லம் கத்வாதி இத³ம் அவஸ்ஸம் சி²ன்னஸபா⁴வத³ஸ்ஸனத்த²ம் ப⁴ண்ட³தே³ய்யவிஸயத³ஸ்ஸனத்த²ஞ்ச வுத்தம். மரியாத³ம் து³ப்³ப³லம் அகத்வாபி யதா²வுத்தப்பயோகே³ கதே மரியாத³ம் சி²ந்தி³த்வா நிக்க²ந்தஉத³கக்³கா⁴னுரூபேன அவஹாரேன காரேதப்³ப³மேவ.

அனிக்³க³தேதி அனிக்க²மித்வா தளாகஸ்மிம்யேவ உத³கே டி²தே. அஸம்பத்தேவாதி தளாகதோ நிக்க²மித்வா மஹாமாதிகாய ஏவ டி²தே. அனிக்க²ந்தேதி தளாகதோ அனிக்க²ந்தே உத³கே. ஸுப³த்³தா⁴தி ப⁴ண்ட³தே³ய்யம்பி ந ஹோதீதி அதி⁴ப்பாயோ. தேனாஹ ‘‘நிக்க²ந்தே ப³த்³தா⁴ ப⁴ண்ட³தே³ய்ய’’ந்தி, தளாகதோ நிக்க²மித்வா பரேஸம் கு²த்³த³கமாதிகாமுக²ம் அபாபுணித்வா மஹாமாதிகாயம்யேவ டி²தே ப³த்³தா⁴ சே, ப⁴ண்ட³தே³ய்யந்தி அத்தோ². ‘‘அனிக்க²ந்தே ப³த்³தா⁴ ஸுப³த்³தா⁴, நிக்க²ந்தே ப³த்³தா⁴ ப⁴ண்ட³தே³ய்ய’’ந்தி ஹி இத³ம் த்³வயம் ஹேட்டா² வுத்தவிகப்பத்³வயஸ்ஸ யதா²க்கமேன வுத்தம். நத்தி² அவஹாரோதி ஏத்த² ‘‘அவஹாரோ நத்தி², ப⁴ண்ட³தே³ய்யம் பன ஹோதீ’’தி கேசி வத³ந்தி, தளாகக³தஉத³கஸ்ஸ ஸப்³ப³ஸாதா⁴ரணத்தா தம் அயுத்தம் விய தி³ஸ்ஸதி, ‘‘அனிக்க²ந்தே ப³த்³தா⁴ ஸுப³த்³தா⁴’’தி இமினா ச அட்ட²கதா²வசனேன ந ஸமேதி. வத்து²ம்…பே… ந ஸமேதீதி ஏத்த² தளாகக³தஉத³கஸ்ஸ ஸப்³ப³ஸாதா⁴ரணத்தா அபரிக்³க³ஹிதம் இத⁴ வத்து²ந்தி அதி⁴ப்பாயோ.

உத³ககதா²வண்ணனா நிட்டி²தா.

த³ந்தபோனகதா²வண்ணனா