ஸேத³மோசனகா³தா²

அவிப்பவாஸாதி³பஞ்ஹவண்ணனா

479. ஸேத³மோசனகா³தா²ஸு தஹிந்தி தஸ்மிம் புக்³க³லே. ‘‘அகப்பியஸம்போ⁴கோ³ நாம மேது²னத⁴ம்மாதீ³’’தி க³ண்டி²பதே³ஸு வுத்தம். ஏஸா பஞ்ஹா குஸலேஹி சிந்திதாதி லிங்க³விபல்லாஸவஸேனேதம் வுத்தம், ஏஸோ பஞ்ஹோ குஸலேஹி சிந்திதோதி அத்தோ².

த³ஸாதி அவந்தி³யே த³ஸ. ஏகாத³ஸாதி பண்ட³காத³யோ ஏகாத³ஸ. உப்³ப⁴க்க²கே ந வதா³மீதி இமினா முகே² மேது²னத⁴ம்மாபா⁴வம் தீ³பேதி. அதோ⁴னாபி⁴ம் விவஜ்ஜியாதி இமினா வச்சமக்³க³பஸ்ஸாவமக்³கே³ஸு.

கா³மந்தரபரியாபன்னம் நதீ³பாரம் ஓக்கந்தபி⁴க்கு²னிம் ஸந்தா⁴யாதி ஏத்த² நதீ³ பி⁴க்கு²னியா கா³மபரியாபன்னா, பரதீரம் கா³மந்தரபரியாபன்னம். தத்த² பரதீரே பட²மலேட்³டு³பாதப்பமாணோ கா³மூபசாரோ நதீ³பரியந்தேன பரிச்சி²ன்னோ, தஸ்மா பரதீரே ரதனமத்தம்பி அரஞ்ஞம் நத்தி², பரதீரஞ்ச திணாதீ³ஹி படிச்ச²ன்னத்தா த³ஸ்ஸனூபசாரவிரஹிதம் கரோதி. தத்த² அத்தனோ கா³மே ஆபத்தி நத்தி², பரதீரே பன பட²மலேட்³டு³பாதஸங்கா²தே கா³மூபசாரேயேவ பாத³ம் ட²பேதி. அந்தரே அபி⁴த⁴ம்மே வுத்தனயேன அரஞ்ஞபூ⁴தம் ஸககா³மம் அதிக்கமதி நாம, தஸ்மா க³ணம்ஹா ஓஹீயனா நாம ஹோதீதி வேதி³தப்³ப³ம்.

பி⁴க்கூ²னம் ஸந்திகே ஏகதோஉபஸம்பன்னா நாம மஹாபஜாபதிபமுகா² பஞ்சஸதஸாகினியோ பி⁴க்கு²னியோ. மஹாபஜாபதிபி ஹி ஆனந்த³த்தே²ரேன தி³ன்னஓவாத³ஸ்ஸ படிக்³க³ஹிதத்தா பி⁴க்கூ²னம் ஸந்திகே உபஸம்பன்னா நாம.

பாராஜிகாதி³பஞ்ஹவண்ணனா

480. ஸஹ து³ஸ்ஸேன மேது²னவீதிக்கமஸ்ஸ ஸக்குணேய்யதாய ‘‘து³ஸ்ஸகுடிஆதீ³னி ஸந்தா⁴யா’’தி வுத்தம். லிங்க³பரிவத்தம் ஸந்தா⁴ய வுத்தாதி ‘‘லிங்க³பரிவத்தே ஸதி படிக்³க³ஹணஸ்ஸ விஜஹனதோ ஸாமம் க³ஹேத்வா பு⁴ஞ்ஜிதும் ந வட்டதீ’’தி லிங்க³பரிவத்தனம் ஸந்தா⁴ய வுத்தா.

481. ஸுப்பதிட்டி²தனிக்³ரோத⁴ஸதி³ஸந்தி யோஜனத்³வியோஜனாதி³பரமம் மஹானிக்³ரோத⁴ம் ஸந்தா⁴ய வுத்தம்.

ஸேத³மோசனகா³தா²வண்ணனா நிட்டி²தா.