பஞ்சவக்³கோ³

கம்மவக்³க³வண்ணனா

483. கம்மவக்³கே³ உம்மத்தகஸ்ஸ பி⁴க்கு²னோ உம்மத்தகஸம்முதி உம்மத்தகே யாசித்வா க³தே அஸம்முகா²பி தா³தும் வட்டதி, தத்த² நிஸின்னேபி ந குப்பதி நியமாபா⁴வதோ. அஸம்முகா² கதே பன தோ³ஸாபா⁴வம் த³ஸ்ஸேதும் ‘‘அஸம்முகா²கதம் ஸுகதம் ஹோதீ’’தி வுத்தம். தூ³தேன உபஸம்பதா³ பன ஸம்முகா² காதும் ந ஸக்கா கம்மவாசானானத்தஸம்ப⁴வதோ. பத்தனிக்குஜ்ஜனாத³யோ ஹத்த²பாஸதோ அபனீதமத்தேபி காதும் வட்டந்தி. ஸங்க⁴ஸம்முக²தாதிஆதீ³ஸு யாவதிகா பி⁴க்கூ² கம்மப்பத்தா, தே ஆக³தா ஹோந்தி, ச²ந்தா³ரஹானம் ச²ந்தோ³ ஆஹடோ ஹோதி, ஸம்முகீ²பூ⁴தா ந படிக்கோஸந்தி, அயம் ஸங்க⁴ஸம்முக²தா. யேன த⁴ம்மேன யேன வினயேன யேன ஸத்து²ஸாஸனேன ஸங்கோ⁴ கம்மம் கரோதி, அயம் த⁴ம்மஸம்முக²தா. தத்த² த⁴ம்மோதி பூ⁴தம் வத்து². வினயோதி சோத³னா சேவ ஸாரணா ச. ஸத்து²ஸாஸனம் நாம ஞத்திஸம்பதா³ சேவ அனுஸ்ஸாவனஸம்பதா³ ச. யஸ்ஸ ஸங்கோ⁴ கம்மம் கரோதி, தஸ்ஸ ஸம்முக²பா⁴வோ புக்³க³லஸம்முக²தா. கத்திகமாஸஸ்ஸ பவாரணமாஸத்தா ‘‘ட²பேத்வா கத்திகமாஸ’’ந்தி வுத்தம். பச்சுக்கட்³டி⁴த்வா ட²பிததி³வஸோ சாதி காளபக்கே² சாதுத்³த³ஸிம் வா பன்னரஸிம் வா ஸந்தா⁴ய வுத்தம். த்³வே ச புண்ணமாஸியோதி பட²மபச்சி²மவஸ்ஸூபக³தானம் வஸேன வுத்தம்.

485. டா²னகரணானி ஸிதி²லானி கத்வா உச்சாரேதப்³ப³ம் அக்க²ரம் ஸிதி²லம், தானியேவ த⁴னிதானி அஸிதி²லானி கத்வா உச்சாரேதப்³ப³ம் அக்க²ரம் த⁴னிதம். த்³விமத்தகாலம் தீ³க⁴ம், ஏகமத்தகாலம் ரஸ்ஸம். த³ஸதா⁴ ப்³யஞ்ஜனபு³த்³தி⁴யா பபே⁴தோ³தி ஏவம் ஸிதி²லாதி³வஸேன ப்³யஞ்ஜனபு³த்³தி⁴யா அக்க²ருப்பாத³கசித்தஸ்ஸ த³ஸப்பகாரேன பபே⁴தோ³. ஸப்³பா³னி ஹி அக்க²ரானி சித்தஸமுட்டா²னானி யதா²தி⁴ப்பேதத்த²ப்³யஞ்ஜனதோ ப்³யஞ்ஜனானி ச. ஸம்யோகோ³ பரோ ஏதஸ்மாதி ஸம்யோக³பரோ, ந ஸம்யோக³பரோ அஸம்யோக³பரோ. ஆயஸ்மதோ பு³த்³த⁴ரக்கி²ததே²ரஸ்ஸ யஸ்ஸ ந க²மதீதி ஏத்த² த-கார ந-காரஸஹிதாகாரோ அஸம்யோக³பரோ. கரணானீதி கண்டா²தீ³னி.

488. அனுக்கி²த்தா பாராஜிகம் அனாபன்னா ச பகதத்தாதி ஆஹ ‘‘பகதத்தா அனுக்கி²த்தா’’திஆதி³. தத்த² அனிஸ்ஸாரிதாதி புரிமபத³ஸ்ஸேவ வேவசனம். பரிஸுத்³த⁴ஸீலாதி பாராஜிகம் அனாபன்னா. ந தேஸம் ச²ந்தோ³ வா பாரிஸுத்³தி⁴ வா ஏதீதி தீஸு த்³வீஸு வா நிஸின்னேஸு ஏகஸ்ஸ வா த்³வின்னம் வா ச²ந்த³பாரிஸுத்³தி⁴ ஆஹடாபி அனாஹடாவ ஹோதீதி அதி⁴ப்பாயோ.

அபலோகனகம்மகதா²வண்ணனா

495-496. காயஸம்போ⁴க³ஸாமக்³கீ³தி ஸஹஸேய்யபடிக்³க³ஹணாதி³. ஸோ ரதோதி ஸுபே⁴ ரதோ. ஸுட்டு² ஓரதோதி வா ஸோரதோ. நிவாதவுத்தீதி நீசவுத்தி. படிஸங்கா²தி படிஸங்கா²ய ஞாணேன உபபரிக்கி²த்வா. யம் தம் அவந்தி³யகம்மம் அனுஞ்ஞாதந்தி ஸம்ப³ந்தோ⁴. இமஸ்ஸ அபலோகனகம்மஸ்ஸ டா²னம் ஹோதீதி ஏவம்பி அபலோகனகம்மம் பவத்ததீதி அத்தோ². கம்மமேவ லக்க²ணந்தி கம்மலக்க²ணம். ஓஸாரணனிஸ்ஸாரணப⁴ண்டு³கம்மாத³யோ விய கம்மஞ்ச ஹுத்வா அஞ்ஞஞ்ச நாமம் ந லப⁴தி, கம்மமேவ ஹுத்வா உபலக்கீ²யதீதி ‘‘கம்மலக்க²ண’’ந்தி வுச்சதி. ஏதம்பி கம்மலக்க²ணமேவாதி வுத்தகம்மலக்க²ணம் த³ஸ்ஸேதும் ‘‘அச்சி²ன்னசீவரஜிண்ணசீவரனட்ட²சீவரான’’ந்திஆதி³ வுத்தம். இணபலிபோ³த⁴ம்பீதி இணமேவ பலிபோ³தோ⁴ இணபலிபோ³தோ⁴, தம்பி தா³தும் வட்டதி. ஸசே தாதி³ஸம் பி⁴க்கு²ம் இணாயிகா பலிபு³ந்த⁴ந்தி, தத்ருப்பாத³தோபி தஸ்ஸ இணம் ஸோதே⁴தும் வட்டதீதி அதி⁴ப்பாயோ.

ச²த்தம் வா வேதி³கம் வாதி ஏத்த² வேதி³காதி சேதியஸ்ஸ உபரி சதுரஸ்ஸசயோ வுச்சதி. ச²த்தந்தி ததோ உத்³த⁴ம் வலயானி த³ஸ்ஸேத்வா கதோ அக்³க³சயோ வுச்சதி. சேதியஸ்ஸ உபனிக்கே²பதோதி சேதியே நவகம்மத்தாய உபனிக்கி²த்ததோ, சேதியஸந்தகதோதி வுத்தம் ஹோதி. அஞ்ஞா கதிகா காதப்³பா³தி புரிமகதிகாய அஸங்க³ஹிதத்தா வுத்தம். தேஹீதி யேஸம் புக்³க³லிகட்டா²னே திட்ட²ந்தி, தேஹி. த³ஸபா⁴க³ந்தி த³ஸமபா⁴க³ம். தத்தா²தி தஸ்மிம் விஹாரே. மூலேதி புப்³பே³. ‘‘இதோ பட்டா²ய பா⁴ஜேத்வா கா²த³ந்தூ’’தி வசனேனேவ யதா²ஸுக²ம் பரிபோ⁴கோ³ படிக்கி²த்தோ ஹோதீதி ஆஹ ‘‘புரிமகதிகா படிப்பஸ்ஸம்ப⁴தீ’’தி.

அனுவிசரித்வாதி பச்ச²தோ பச்ச²தோ க³ந்த்வா. அபச்சாஸீஸந்தேனாதி தேஸம் ஸந்திகா

பச்சயம் அபச்சாஸீஸந்தேன. மூலபா⁴க³ந்தி வுத்தமேவத்த²ம் விபா⁴வேதி ‘‘த³ஸபா⁴க³மத்த’’ந்தி. அகதாவாஸம் வா கத்வாதி ததோ உப்பன்னஆயேன கத்வா. ஜக்³கி³தகாலே ச ந வாரேதப்³பா³தி ஜக்³கி³தானம் புப்ப²ப²லப⁴ரிதகாலே ந வாரேதப்³பா³. ஜக்³க³னகாலேதி ஜக்³கி³தும் ஆரத்³த⁴காலே. ஞத்திகம்மட்டா²னபே⁴தே³தி ஞத்திகம்மஸ்ஸ டா²னபே⁴தே³.

கம்மவக்³க³வண்ணனா நிட்டி²தா.

அபஞ்ஞத்தே பஞ்ஞத்தவக்³க³வண்ணனா

500. ஸத்த ஆபத்திக்க²ந்தா⁴ பஞ்ஞத்தம் நாமாதி ஸம்ப³ந்தோ⁴. ககுஸந்த⁴கோணாக³மனகஸ்ஸபா ஏவ ஸத்த ஆபத்திக்க²ந்தே⁴ பஞ்ஞபேஸும், விபஸ்ஸீஆத³யோ பன ஓவாத³பாதிமோக்க²ம் உத்³தி³ஸிம்ஸு, ந ஸிக்கா²பத³ம் பஞ்ஞபேஸுந்தி ஆஹ ‘‘ககுஸந்த⁴ஞ்ச…பே… அந்தரா கேனசி அபஞ்ஞத்தே ஸிக்கா²பதே³’’தி. ஸேஸமேத்த² ஸுவிஞ்ஞேய்யமேவ.

இதி ஸமந்தபாஸாதி³காய வினயட்ட²கதா²ய ஸாரத்த²தீ³பனியம்

பரிவாரட்ட²கதா²வண்ணனா ஸமத்தா.

நிக³மனகதா²வண்ணனா

அவஸானகா³தா²ஸு பன அயமத்தோ². விப⁴த்ததே³ஸனந்தி உப⁴தோவிப⁴ங்க³க²ந்த⁴கபரிவாரேஹி விப⁴த்ததே³ஸனம் வினயபிடகந்தி யோஜேதப்³ப³ம். தஸ்ஸாதி தஸ்ஸ வினயஸ்ஸ.

தத்ரித³ந்திஆதி³ பட²மபாராஜிகவண்ணனாயம் வுத்தனயமேவ.

ஸத்து²மஹாபோ³தி⁴விபூ⁴ஸிதோதி ஸத்து²னா பரிபு⁴த்தமஹாபோ³தி⁴விபூ⁴ஸிதோ மண்டி³தோ, தஸ்ஸ மஹாவிஹாரஸ்ஸ த³க்கி²ணபா⁴கே³ உத்தமம் யம் பதா⁴னக⁴ரந்தி ஸம்ப³ந்தோ⁴. தத்த² பதா⁴னக⁴ரந்தி தம்னாமகம் பரிவேணம். ஸுசிசாரித்தஸீலேன, பி⁴க்கு²ஸங்கே⁴ன ஸேவிதந்தி இத³ம்பி பதா⁴னக⁴ரவிஸேஸனம்.

தத்தா²தி தஸ்மிம் பதா⁴னக⁴ரே. சாருபாகாரஸஞ்சிதந்தி மனாபேன பாகாரேன பரிக்கி²த்தம். ஸீதச்சா²யதரூபேதந்தி க⁴னனிசிதபத்தஸஞ்ச²ன்னஸாகா²பஸாக²தாய ஸீதச்சா²யேஹி ருக்கே²ஹி உபேதம். விகஸிதகமலகுவலயபுண்ட³ரீகஸோக³ந்தி⁴காதி³புப்ப²ஸஞ்ச²ன்னமது⁴ரஸீதலுத³கபுண்ணதாய ஸம்பன்னா ஸலிலாஸயா அஸ்ஸாதி ஸம்பன்னஸலிலாஸயோ. உத்³தி³ஸித்வாதி பு³த்³த⁴ஸிரிம் நாம தே²ரம் நிஸ்ஸாய, தஸ்ஸ அஜ்ஜே²ஸனம் நிஸ்ஸாயாதி வுத்தம் ஹோதி. இத்³தா⁴தி அத்த²வினிச்ச²யாதீ³ஹி இத்³தா⁴ பீ²தா பரிபுண்ணா.

ஸிரினிவாஸஸ்ஸாதி ஸிரியா நிவாஸட்டா²னபூ⁴தஸ்ஸ. ஜயஸம்வச்ச²ரேதி ஜயப்பத்தஸம்வச்ச²ரே. அயந்தி தே²ரம் பு³த்³த⁴ஸிரிம் உத்³தி³ஸ்ஸ யா வினயவண்ணனா ஆரத்³தா⁴, அயம். த⁴ம்மூபஸம்ஹிதாதி குஸலஸன்னிஸ்ஸிதா. இதா³னி ஸதே³வகஸ்ஸ லோகஸ்ஸ அச்சந்தஸுகா²தி⁴க³மாய அத்தனோ புஞ்ஞம் பரிணாமேந்தோ ‘‘சிரட்டி²தத்த² த⁴ம்மஸ்ஸா’’திஆதி³மாஹ. தத்த² ஸமாசிதந்தி உபசிதம். ஸப்³ப³ஸ்ஸ ஆனுபா⁴வேனாதி ஸப்³ப³ஸ்ஸ தஸ்ஸ புஞ்ஞஸ்ஸ தேஜேன. ஸப்³பே³பி பாணினோதி காமாவசராதி³பே⁴தா³ ஸப்³பே³ ஸத்தா. ஸத்³த⁴ம்மரஸஸேவினோதி யதா²ரஹம் போ³தி⁴த்தயாதி⁴க³மவஸேன ஸத்³த⁴ம்மரஸஸேவினோ ப⁴வந்து. ஸேஸமேத்த² ஸுவிஞ்ஞேய்யமேவ.

நிக³மனகதா²வண்ணனா நிட்டி²தா.

நிக³மனகதா²

ஏத்தாவதா ச –

வினயே பாடவத்தா²ய, ஸாஸனஸ்ஸ ச வுட்³டி⁴யா;

வண்ணனா யா ஸமாரத்³தா⁴, வினயட்ட²கதா²ய ஸா.

ஸாரத்த²தீ³பனீ நாம, ஸப்³ப³ஸோ பரினிட்டி²தா;

திம்ஸஸஹஸ்ஸமத்தேஹி, க³ந்தே²ஹி பரிமாணதோ.

அஜ்ஜே²ஸிதோ நரிந்தே³ன, ஸோஹம் பரக்கமபா³ஹுனா;

ஸத்³த⁴ம்மட்டி²திகாமேன, ஸாஸனுஜ்ஜோதகாரினா.

தேனேவ காரிதே ரம்மே, பாஸாத³ஸதமண்டி³தே;

நானாது³மக³ணாகிண்ணே, பா⁴வனாபி⁴ரதாலயே.

ஸீதலூத³கஸம்பன்னே, வஸம் ஜேதவனே இமம்;

அத்த²ப்³யஞ்ஜனஸம்பன்னம், அகாஸிம் ஸுவினிச்ச²யம்.

யம் ஸித்³த⁴ம் இமினா புஞ்ஞம், யம் சஞ்ஞம் பஸுதம் மயா;

ஏதேன புஞ்ஞகம்மேன, து³தியே அத்தஸம்ப⁴வே.

தாவதிம்ஸே பமோதே³ந்தோ, ஸீலாசாரகு³ணே ரதோ;

அலக்³கோ³ பஞ்சகாமேஸு, பத்வான பட²மம் ப²லம்.

அந்திமே அத்தபா⁴வம்ஹி, மேத்தேய்யம் முனிபுங்க³வம்;

லோகக்³க³புக்³க³லம் நாத²ம், ஸப்³ப³ஸத்தஹிதே ரதம்.

தி³ஸ்வான தஸ்ஸ தீ⁴ரஸ்ஸ, ஸுத்வா ஸத்³த⁴ம்மதே³ஸனம்;

அதி⁴க³ந்த்வா ப²லம் அக்³க³ம், ஸோபே⁴ய்யம் ஜினஸாஸனம்.

ஸதா³ ரக்க²ந்து ராஜானோ, த⁴ம்மேனேவ இமம் பஜம்;

நிரதா புஞ்ஞகம்மேஸு, ஜோதேந்து ஜினஸாஸனம்.

இமே ச பாணினோ ஸப்³பே³, ஸப்³ப³தா³ நிருபத்³த³வா;

நிச்சம் கல்யாணஸங்கப்பா, பப்போந்து அமதம் பத³ந்தி.

ஸாரத்த²தீ³பனீ நாம வினயடீகா நிட்டி²தா.