மஹாவிப⁴ங்க³ஸங்க³ஹகதா²

4. மேது²னம் படிஸேவந்தோ, கதி ஆபத்தியோ பு²ஸே;

மேது²னம் படிஸேவந்தோ, திஸ்ஸோ ஆபத்தியோ பு²ஸே.

5. ப⁴வே பாராஜிகம் கே²த்தே, யேபு⁴ய்யக்கா²யிதே பன;

து²ல்லச்சயம் முகே² வட்ட-கதே வுத்தம் து து³க்கடம்.

6. அதி³ன்னம் ஆதி³யந்தோ யோ;

கதி ஆபத்தியோ பு²ஸே;

அதி³ன்னம் ஆதி³யந்தோ ஸோ;

திஸ்ஸோ ஆபத்தியோ பு²ஸே.

7. பஞ்சமாஸக்³க⁴னே வாபி, அதி⁴கே வா பராஜயோ;

மாஸே வா து³க்கடம் ஊனே, மஜ்ஜே² து²ல்லச்சயம் ததோ.

8. மனுஸ்ஸஜாதிம் மாரேந்தோ;

கதி ஆபத்தியோ பு²ஸே;

மனுஸ்ஸஜாதிம் மாரேந்தோ;

திஸ்ஸோ ஆபத்தியோ பு²ஸே.

9. மனுஸ்ஸமுத்³தி³ஸ்ஸோபாதம், க²ணனே து³க்கடம் ஸியா;

து³க்கே² து²ல்லச்சயம் ஜாதே, மதே பாராஜிகம் ஸியா.

10. அஸந்தம் உத்தரிம் த⁴ம்மம், வத³மத்தூபனாயிகம்;

கதி ஆபஜ்ஜதாபத்தீ? திஸ்ஸோ ஆபத்தியோ பு²ஸே.

11. அஸந்தம் உத்தரிம் த⁴ம்மம், ப⁴ணந்தஸ்ஸ பராஜயோ;

து²ல்லச்சயம் பரியாயே, ஞாதே, நோ சே து து³க்கடம்.

பாராஜிககதா².

12. ப⁴ண ஸுக்கம் விமோசேந்தோ;

கதி ஆபத்தியோ பு²ஸே;

ஸுண ஸுக்கம் விமோசேந்தோ;

திஸ்ஸோ ஆபத்தியோ பு²ஸே.

13. க³ருகம் யதி³ சேதேதி, உபக்கமதி முச்சதி;

த்³வங்கே³ து²ல்லச்சயம் வுத்தம், பயோகே³ து³க்கடம் ஸியா.

14. இதோ பட்டா²ய முஞ்சித்வா, பஞ்ஹாபுச்ச²னமத்தகம்;

விஸ்ஸஜ்ஜனவஸேனேவ, ஹோதி அத்த²வினிச்ச²யோ.

15. இத்தி²யா காயஸம்ஸக்³கே³, திஸ்ஸோ ஆபத்தியோ பு²ஸே;

ஆமஸந்தஸ்ஸ காயேன, காயம் து க³ருகம் ஸியா.

16. காயேன காயப³த்³த⁴ம் து, பு²ஸம் து²ல்லச்சயம் பு²ஸே;

படிப³த்³தே⁴ன காயேன, படிப³த்³தே⁴ து து³க்கடம்.

17. இத்தி²ம் து³ட்டு²ல்லவாசாஹி, திஸ்ஸோ ஓபா⁴ஸதோ ஸியும்;

வண்ணாவண்ணம் வத³ம் த்³வின்னம், மக்³கா³னம் க³ருகம் பு²ஸே.

18. வண்ணாதி³ப⁴ஞ்ஞே ஆதி³ஸ்ஸ, உப்³ப⁴ஜாணுமத⁴க்க²கம்;

ஹோதி து²ல்லச்சயம், காய-படிப³த்³தே⁴ து து³க்கடம்.

19. அத்தகாமசரியாய, வத³தோ வண்ணமித்தி²யா;

ஸந்திகே க³ருகம் ஹோதி, ஸசே ஜானாதி ஸா பன.

20. ஸந்திகே பண்ட³கஸ்ஸாபி, தஸ்ஸ து²ல்லச்சயம் ஸியா;

திரச்சா²னக³தஸ்ஸாபி, ஸந்திகே து³க்கடம் மதம்.

21. படிக்³க³ண்ஹனவீமம்ஸா, பச்சாஹரணகத்திகே;

ஸஞ்சரித்தம் ஸமாபன்னே, க³ருகம் நித்³தி³ஸே பு³தோ⁴.

22. தஸ்ஸ த்³வங்க³ஸமாயோகே³, ஹோதி து²ல்லச்சயம் ததா²;

அங்கே³ ஸதி பனேகஸ்மிம், ஹோதி ஆபத்தி து³க்கடம்.

23. ஸம்யாசிகாய ச குடிம்;

விஹாரஞ்ச மஹல்லகம்;

காராபேதி ஸசே பி⁴க்கு²;

திஸ்ஸோ ஆபத்தியோ பு²ஸே.

24. பயோகே³ து³க்கடம் வுத்தம், ஏகபிண்டே³ அனாக³தே;

ஹோதி து²ல்லச்சயம், தஸ்மிம், பிண்டே³ க³ருகமாக³தே.

25. பாராஜிகேன த⁴ம்மேன, பி⁴க்கு²ம் அமூலகேனித⁴;

அனுத்³த⁴ம்ஸேதி யோ தஸ்ஸ, திஸ்ஸோ ஆபத்தியோ ஸியும்.

26. ஓகாஸம் ந ச காரேத்வா, ஹுத்வா சாவனசேதனோ;

ஸசே சோதே³தி ஸங்கா⁴தி³-ஸேஸேன ஸஹ து³க்கடம்.

27. ஓகாஸம் பன காரேத்வா, ஹுத்வா அக்கோஸசேதனோ;

சோதே³தி ஓமஸவாதே³, பாசித்திம் பரிதீ³பயே.

28. அனந்தரஸமானோவ, நவமே அஞ்ஞபா⁴கி³யே;

ஸப்³போ³ ஆபத்திபே⁴தோ³ ஹி, நத்தி² காசி விஸேஸதா.

29. ஸங்க⁴ஸ்ஸ பே⁴த³கோ பி⁴க்கு², யாவததியகம் பன;

ஸமனுபா⁴ஸனாயேவ, கா³ஹம் ந படினிஸ்ஸஜம்.

30. ஞத்தியா து³க்கடம், த்³வீஹி, கம்மவாசாஹி து²ல்லதம்;

கம்மவாசாய ஓஸானே, ஆபத்தி க³ருகம் ஸியா.

31. பே⁴தா³னுவத்தகே சேவ, து³ப்³ப³சே குலதூ³ஸகே;

ஸங்க⁴பே⁴த³கதுல்யோவ, ஹோதி ஆபத்தினிச்ச²யோ.

ஸங்கா⁴தி³ஸேஸகதா².

32. அதிக்கமந்தோ அதிரேகசீவரம்;

த³ஸாஹமாபஜ்ஜதி ஏகமேவ;

நிஸ்ஸக்³கி³பாசித்தியமேகரத்திம்;

திசீவரேனாபி வினா வஸந்தோ.

33. மாஸம் அதிக்கமந்தோ ஹி, க³ஹேத்வா காலசீவரம்;

ஏகம் ஆபஜ்ஜதாபத்திம், நிஸ்ஸக்³கி³யமுதீ³ரிதம்.

34. அஞ்ஞாதிகாய யம் கிஞ்சி;

புராணசீவரம் பன;

தோ⁴வாபேதி ஸசே தஸ்ஸ;

ஹோந்தி ஆபத்தியோ து³வே.

35. தோ⁴வாபேதி பயோக³ஸ்மிம், து³க்கடம் ஸமுதா³ஹடம்;

நிஸ்ஸக்³கி³யாவ பாசித்தி, ஹோதி தோ⁴வாபிதே பன.

36. அஞ்ஞாதிகாய ஹத்த²ம்ஹா, சீவரம் படிக³ண்ஹதோ;

க³ஹணே து³க்கடம் வுத்தம், பாசித்தி க³ஹிதே ஸியா.

37. அஞ்ஞாதகம் க³ஹபதிம், க³ஹபதானிமேவ வா;

சீவரம் விஞ்ஞாபேந்தோ த்³வே, பி⁴க்கு² ஆபத்தியோ பு²ஸே.

38. விஞ்ஞாபேதி பயோக³ஸ்மிம், து³க்கடம் பரிகித்திதம்;

விஞ்ஞாபிதே ச நிஸ்ஸக்³கி³, பாசித்தி பரியாபுதா.

39. பி⁴க்கு² சீவரமஞ்ஞாதிம், விஞ்ஞாபேந்தோ தது³த்தரிம்;

பயோகே³ து³க்கடம், விஞ்ஞா-பிதே நிஸ்ஸக்³கி³யம் பு²ஸே.

40. அஞ்ஞாதகம் கஞ்சி உபாஸகம் வா;

உபாஸிகம் வா உபஸங்கமித்வா;

புப்³பே³வ ஹுத்வா பன அப்பவாரிதோ;

வத்தே² விகப்பம் படிபஜ்ஜமானோ.

41. து³வே ஆபஜ்ஜதாபத்தீ, பயோகே³ து³க்கடம் ஸியா;

விகப்பம் பன ஆபன்னே, நிஸ்ஸக்³கி³யமுதீ³ரிதம்.

42. அஞ்ஞாதிம் உபஸங்கம்ம, புப்³பே³யேவப்பவாரிதோ;

விகப்பம் சீவரே பி⁴க்கு², ஆபஜ்ஜந்தோ து³வே பு²ஸே.

43. ததா²திரேகதிக்க²த்தும், சோத³னாய ச பி⁴க்கு² சே;

க³ந்த்வாதிரேகச²க்க²த்தும், டா²னேனபி ச சீவரம்.

44. நிப்பா²தே³தி ஸசே தஸ்ஸ, ஹோந்தி ஆபத்தியோ து³வே;

பயோகே³ து³க்கடம், தஸ்ஸ, லாபே⁴ நிஸ்ஸக்³கி³யம் ஸியா.

கதி²னவக்³கோ³ பட²மோ.

45. தோ³ஸா கோஸியவக்³க³ஸ்ஸ, த்³வேத்³வேஆதீ³ஸு பஞ்சஸு;

பயோகே³ து³க்கடம் வுத்தம், லாபே⁴ நிஸ்ஸக்³கி³யம் ஸியா.

46. க³ஹேத்வேளகலோமானி, தியோஜனமதிக்கமம்;

து³க்கடம் பட²மே பாதே³, நிஸ்ஸக்³கி³ம் து³தியே பு²ஸே.

47. பி⁴க்கு² பி⁴க்கு²னியஞ்ஞாய, தோ⁴வாபேதேளலோமகம்;

பயோகே³ து³க்கடம், தஸ்ஸ, தோ⁴தே நிஸ்ஸக்³கி³யம் ஸியா.

48. ரூபியம் படிக³ண்ஹந்தோ, த்³வே பனாபத்தியோ பு²ஸே;

பயோகே³ து³க்கடம் வுத்தம், நிஸ்ஸக்³கி³ க³ஹிதே ஸியா.

49. நானாகாரம் ஸமாபஜ்ஜம், ஸம்வோஹாரஞ்ச ரூபியே;

ஸமாபன்னே ச நிஸ்ஸக்³கி³ம், பயோகே³ து³க்கடம் பு²ஸே.

50. நானப்பகாரகம் பி⁴க்கு², ஆபஜ்ஜே கயவிக்கயம்;

பயோகே³ து³க்கடம், தஸ்மிம், கதே நிஸ்ஸக்³கி³யம் பு²ஸே.

கோஸியவக்³கோ³ து³தியோ.

51. பத்தம் அதிக்கமேந்தஸ்ஸ, த³ஸாஹமதிரேககம்;

தஸ்ஸ நிஸ்ஸக்³கி³யாபத்தி, ஹோதி ஏகாவ பி⁴க்கு²னோ.

52. அபஞ்சப³ந்த⁴னே பத்தே, விஜ்ஜமானேபி பி⁴க்கு²னோ;

அஞ்ஞம் பன நவம் பத்தம், சேதாபேதி ஸசே பன.

53. த்³வே பனாபத்தியோ பி⁴க்கு², ஆபஜ்ஜதி, ந ஸம்ஸயோ;

பயோகே³ து³க்கடம், தஸ்ஸ, லாபே⁴ நிஸ்ஸக்³கி³யம் பு²ஸே.

54. படிக்³க³ஹேத்வா பே⁴ஸஜ்ஜம், ஸத்தாஹம் யோ அதிக்கமே;

ஏகம் நிஸ்ஸக்³கி³யாபத்திம், ஆபஜ்ஜதி ஹி ஸோ பன.

55. அகாலே பரியேஸந்தோ, வஸ்ஸஸாடிகசீவரம்;

பயோகே³ து³க்கடம், தஸ்ஸ, லாபே⁴ நிஸ்ஸக்³கி³யம் பு²ஸே.

56. பி⁴க்கு²னோ சீவரம் த³த்வா, அச்சி²ந்த³ந்தோ து³வே பு²ஸே;

பயோகே³ து³க்கடம் வுத்தம், ஹடே நிஸ்ஸக்³கி³யம் ஸியா.

57. விஞ்ஞாபேத்வா ஸயம் ஸுத்தம், தந்தவாயேஹி சீவரம்;

வாயாபேதி ஸசே பி⁴க்கு², த்³வே பனாபத்தியோ பு²ஸே.

58. யோ பனஞ்ஞாதகஸ்ஸேவ, தந்தவாயே ஸமேச்ச சே;

விகப்பம் சீவரே பி⁴க்கு², ஆபஜ்ஜம் அப்பவாரிதோ.

59. த்³வே பனாபத்தியோ ஸோ ஹி, ஆபஜ்ஜதி, ந ஸம்ஸயோ;

பயோகே³ து³க்கடம், தஸ்ஸ, லாபே⁴ நிஸ்ஸக்³கி³யம் ஸியா.

60. படிக்³க³ஹேத்வா அச்சேக-ஸஞ்ஞிதம் பன சீவரம்;

காலம் அதிக்கமேந்தோ தம், ஏகம் நிஸ்ஸக்³கி³யம் பு²ஸே.

61. திண்ணமஞ்ஞதரம் வத்த²ம், நித³ஹித்வா க⁴ரேதி⁴கம்;

சா²ரத்ததோ வினா தேன, வஸம் நிஸ்ஸக்³கி³யம் பு²ஸே.

62. ஜானம் பரிணதம் லாப⁴ம், ஸங்கி⁴கம் அத்தனோ பன;

பரிணாமேதி சே பி⁴க்கு², த்³வே பனாபத்தியோ பு²ஸே.

63. பயோகே³ து³க்கடம் ஹோதி, நிஸ்ஸக்³கி³ பரிணாமிதே;

ஸப்³ப³த்த² அப்பனாவார-பரிஹானி கதா மயா.

பத்தவக்³கோ³ ததியோ.

திம்ஸனிஸ்ஸக்³கி³யகதா².

64. வத³ந்தஸ்ஸ முஸாவாத³ம், பஞ்ச ஆபத்தியோ ஸியும்;

மனுஸ்ஸுத்தரித⁴ம்மே து, அபூ⁴தஸ்மிம் பராஜயோ.

65. சோத³னாய க³ரும் பி⁴க்கு²ம், அமூலந்திமவத்து²னா;

பரியாயவசனே ஞாதே, து²ல்லச்சயமுதீ³ரிதம்.

66. நோ சே படிவிஜானாதி, து³க்கடம் ஸமுதா³ஹடம்;

ஸம்பஜானமுஸாவாதே³, பாசித்தி பரிதீ³பிதா.

67. ஆபத்தியோ து³வே வுத்தா, பி⁴க்கு²ஸ்ஸோமஸதோ பன;

பாசித்தி உபஸம்பன்னம், து³க்கடம் இதரம் ஸியா.

68. பேஸுஞ்ஞஹரணே த்³வேபி, ஹோந்தி, பாசித்தியம் பன;