பி⁴க்கு²னீவிப⁴ங்கோ³

170. பி⁴க்கூ²னம் பாடவத்தா²ய, வினயஸ்ஸ வினிச்ச²யே;

பி⁴க்கு²னீனம் விப⁴ங்கோ³பி, கிஞ்சிமத்தம் ப⁴ணாமஹம்.

171. அவஸ்ஸுதஸ்ஸ போஸஸ்ஸ, பி⁴க்கு²னீபி அவஸ்ஸுதா;

நந்த³ந்தீ காயஸம்ஸக்³க³ம், கதி ஆபத்தியோ பு²ஸே;

172. திஸ்ஸோ ஆபத்தியோ உப்³ப⁴-ஜாணுஸ்ஸாத⁴க்க²கஸ்ஸ ச;

ஹோதி பாராஜிகம் தஸ்ஸா, க³ஹணம் ஸாதி³யந்தியா.

173. உப்³ப⁴க்க²கம் அதோ⁴ஜாணு-க³ஹணம் ஸாதி³யந்தியா;

து²ல்லச்சயம் ஸியா, காய-படிப³த்³தே⁴ து து³க்கடம்.

174. சா²தே³ந்தீ பி⁴க்கு²னீ வஜ்ஜம், திஸ்ஸோ ஆபத்தியோ பு²ஸே;

ஜானம் பாராஜிகம் த⁴ம்மம், சா²தே³ந்தீ ஸா பராஜிகா.

175. து²ல்லச்சயம் வேமதிகா, படிச்சா²தே³தி சே பன;

அதா²சாரவிபத்திம் சே, படிச்சா²தே³தி து³க்கடம்.

176. நிஸ்ஸஜ்ஜந்தீ ந தம் லத்³தி⁴ம், உக்கி²த்தஸ்ஸானுவத்திகா;

ஸமனுபா⁴ஸனாயேவ, திஸ்ஸோ ஆபத்தியோ பு²ஸே.

177. ஞத்தியா து³க்கடம், த்³வீஹி, கம்மவாசாஹி து²ல்லதா;

கம்மவாசாய ஓஸானே, பாராஜிகமுதீ³ரிதம்.

178. பூரேந்தீ அட்ட²மம் வத்து²ம், திஸ்ஸோ ஆபத்தியோ பு²ஸே;

புரிஸேனிதா⁴க³ச்சா²தி, வுத்தாக³ச்ச²தி து³க்கடம்.

179. து²ல்லச்சயம் து போஸஸ்ஸ, ஹத்த²பாஸப்பவேஸனே;

பூரேந்தீ அட்ட²மம் வத்து²ம், ஸமணீ ஸா பராஜிதா.

பாராஜிககதா².

180. உஸ்ஸயவாதி³கா அட்டம், கரோந்தீ திவித⁴ம் பு²ஸே;

ஏகஸ்ஸாரோசனே தஸ்ஸா, ஹோதி ஆபத்தி து³க்கடம்.

181. து³தியாரோசனே தஸ்ஸா, து²ல்லச்சயமுதீ³ரிதம்;

அட்டஸ்ஸ பரியோஸானே, ஹோதி ஸங்கா⁴தி³ஸேஸதா.

182. சோரிவுட்டா²பிகா வாபி, ஞத்தியா து³க்கடம் பு²ஸே;

த்³வீஹி து²ல்லச்சயம் கம்ம-வாசோஸானே க³ரும் ஸியா.

183. ஏகா கா³மந்தரம் க³ச்சே², க³மனே து³க்கடம் ஸியா;

பரிக்கே²பே அதிக்கந்தே, பாதே³ன பட²மேன து.

184. ஹோதி து²ல்லச்சயாபத்தி, தஸ்ஸா ஸமணியா பன;

து³தியேன அதிக்கந்தே, க³ருகே பன திட்ட²தி.

185. சதுத்தே² து³தியே வுத்த-ஸதி³ஸோவ வினிச்ச²யோ;

ஆபத்தீனம் பபே⁴தே³ து, காசி நத்தி² விஸேஸதா.

186. அவஸ்ஸுதா ஸயம் ஹுத்வா, தாதி³ஸஸ்ஸேவ ஹத்த²தோ;

க³ஹேத்வா பன பு⁴ஞ்ஜந்தீ, போ⁴ஜனாதீ³ஸு கிஞ்சிபி.

187. பு²ஸே ஆபத்தியோ திஸ்ஸோ, போ⁴ஜனாதீ³ஸு கிஞ்சிபி;

படிக்³க³ண்ஹந்தியா தஸ்ஸா, ஹோதி து²ல்லச்சயம் பன.

188. அஜ்ஜோ²ஹாரேஸு ஸப்³பே³ஸு, ஹோதி ஸங்கா⁴தி³ஸேஸதா;

உத³கம் த³ந்தபோனம் வா, படிக்³க³ண்ஹாதி து³க்கடம்.

189. ‘‘ஸஹத்தே²ன க³ஹேத்வா த்வம், கா²த³ வா பு⁴ஞ்ஜ வா’’திபி;

உய்யோஜேந்தீ பனேவம் து, திஸ்ஸோ ஆபத்தியோ பு²ஸே.

190. து³க்கடம் வசனே தஸ்ஸா, ‘‘பு⁴ஞ்ஜிஸ்ஸாமீ’’தி க³ண்ஹதி;

அஜ்ஜோ²ஹாரேஸு ஸப்³பே³ஸு, தஸ்ஸா து²ல்லச்சயம் ஸியா.

191. போ⁴ஜனஸ்ஸ பனோஸானே, ஹோதி ஸங்கா⁴தி³ஸேஸதா;

உய்யோஜேதி ச யா தஸ்ஸா, இமா திஸ்ஸோதி தீ³பயே.

192. ஸத்தமே அட்ட²மே சாபி, நவமே த³ஸமேபி ச;

சோரிவுட்டா²பனேனேவ, ஸமானோவ வினிச்ச²யோ.

ஸங்கா⁴தி³ஸேஸகதா².

193. பத்தஸன்னிசயம் யிஹ, கரோந்தீ பி⁴க்கு²னீ பன;

ஏகம் நிஸ்ஸக்³கி³யம்யேவ, பு²ஸே பாசித்தியம் து ஸா.

194. அகாலசீவரம் கால-சீவரம் பா⁴ஜாபேந்தியா;

பயோகே³ து³க்கடம் வுத்தம், லாபே⁴ நிஸ்ஸக்³கி³யம் ஸியா.

195. சீவரம் பரிவத்தேத்வா, அச்சி²ந்த³தி ஸசே பன;

பயோகே³ து³க்கடம், சி²ன்னே, தஸ்ஸா நிஸ்ஸக்³கி³யம் ஸியா.

196. விஞ்ஞாபேத்வாவ அஞ்ஞம் சே, விஞ்ஞாபேதி ததோ பரம்;

பயோகே³ து³க்கடம், விஞ்ஞா-பிதே நிஸ்ஸக்³கி³யம் ஸியா.

197. சேதாபேத்வா ஹி அஞ்ஞம் சே, சேதாபேதி ததோ பரம்;

பயோகே³ து³க்கடம், சேதா-பிதே நிஸ்ஸக்³கி³யம் ஸியா.

198. ஏவமேவ ச ஸேஸேஸு, ச²ட்டா²தீ³ஸு ச ஸத்தஸு;

அனந்தரஸமானோவ, ஆபத்தீனம் வினிச்ச²யோ.

நிஸ்ஸக்³கி³யகதா².

199. லஸுணம் கா²த³தி த்³வே சே, து³க்கடம் க³ஹணே ஸியா;

அஜ்ஜோ²ஹாரபயோகே³ஸு, பாசித்தி பரியாபுதா.

200. ஸம்ஹராபேந்தியா லோமம், ஸம்பா³தே⁴ த்³வேவ ஹோந்தி ஹி;

பயோகே³ து³க்கடம் வுத்தம், ஹோதி பாசித்தி ஸம்ஹடே.

201. கரோந்தீ தலகா⁴தம் து, த்³வே பனாபத்தியோ பு²ஸே;

பயோகே³ து³க்கடம் ஹோதி, கதே பாசித்தியம் ஸியா.

202. ஜதுனா மட்ட²கம் கிஞ்சி, ஸாதி³யந்தீ து³வே பு²ஸே;

பயோகே³ து³க்கடாதி³ன்னே, தஸ்ஸா பாசித்தியம் ஸியா.

203. பஞ்சமம் து சதுத்தே²ன, ஸமானமிதி தீ³பயே;

ஆபத்தீனம் விபா⁴க³ஸ்மிம், விஸேஸோ நத்தி² கோசிபி.

204. பி⁴க்கு²ஸ்ஸ பு⁴ஞ்ஜமானஸ்ஸ, பானீயேனுபதிட்ட²தி;

ஹத்த²பாஸே து பாசித்தி, ஹித்வா திட்ட²தி து³க்கடம்.

205. விஞ்ஞாபேத்வாமகம் த⁴ஞ்ஞம், ‘‘பு⁴ஞ்ஜிஸ்ஸாமீ’’தி க³ண்ஹதி;

து³க்கடம் ஹோதி பாசித்தி, அஜ்ஜோ²ஹாரேஸு தீ³பயே.

206. உச்சாராதி³ம் திரோகுட்டே, ச²ட்³டே³ந்தீ த்³வே பு²ஸே ஹவே;

பயோகே³ து³க்கடம் வுத்தம், பாசித்தி ச²ட்³டி³தே ஸியா.

207. உச்சாராதி³சதுக்கம் து, ச²ட்³டே³தி ஹரிதே ஸசே;

பயோகே³ து³க்கடம் தஸ்ஸா, பாசித்தி ச²ட்³டி³தே ஸியா.

208. நச்சாதி³ம் த³ஸ்ஸனத்தா²ய, ஸசே க³ச்ச²தி து³க்கடம்;

பஸ்ஸந்தியாபி பாசித்தி, ததே²வ ச ஸுணந்தியா.

லஸுணவக்³கோ³ பட²மோ.

209. பட²மே து³தியே சேவ, ததியே ச சதுத்த²கே;

துல்யோ லஸுணவக்³க³ஸ்ஸ, ச²ட்டே²னித⁴ வினிச்ச²யோ.

210. குலானி உபஸங்கம்ம, நிஸீதி³த்வா பனாஸனே;

ஸாமிகே து அனாபுச்சா², பக்கமந்தீ து³வே பு²ஸே.

211. பட²மேன ச பாதே³ன, அனோவஸ்ஸமதிக்கமே;

து³க்கடம் ஹோதி, பாசித்தி, து³தியாதிக்கமே ஸியா.

212. ஸாமிகே து அனாபுச்சா², ஆஸனே சே நிஸீத³தி;

பயோகே³ து³க்கடம் ஹோதி, பாசித்தி ச நிஸீதி³தே.

213. ச²ட்டே²ன ஸத்தமம் ஸப்³ப³ம், ஸமானம் அட்ட²மே பன;

பயோகே³ து³க்கடம், உஜ்ஜா²-பிதே பாசித்தியம் ஸியா.

214. அத்தானம் சாபி⁴ஸப்பேந்தீ, த்³வே பு²ஸே நிரயாதி³னா;

பயோகே³ து³க்கடம் வுத்தம், பாசித்தி அபி⁴ஸப்பிதே.

215. வதி⁴த்வா பன அத்தானம், ரோத³ந்தீ து து³வே பு²ஸே;

வத⁴தி ரோத³தி பாசித்தி, கரோதேகம் து து³க்கடம்.

ரத்தந்த⁴காரவக்³கோ³ து³தியோ.

216. நக்³கா³ ந்ஹாயதி த்³வே சேவ, பயோகே³ து³க்கடம் ஸியா;

ந்ஹானஸ்ஸ பரியோஸானே, தஸ்ஸா பாசித்தியம் ஸியா.

217. காராபேதி பமாணாதி-க்கந்தம் உத³கஸாடிகம்;

பயோகே³ து³க்கடம், காரா-பிதே பாசித்தியம் ஸியா.

218. சீவரம் து விஸிப்³பே³த்வா, விஸிப்³பா³பேத்வ வா பன;

நேவ ஸிப்³ப³ந்தியா வுத்த-மேகம் பாசித்தியம் பன.

219. பஞ்சாஹிகம் து ஸங்கா⁴டி-சாரம் பன அதிக்கமே;

ஏகாவஸ்ஸா பனாபத்தி, பாசித்தி பரிதீ³பிதா.

220. ஸசே ஸங்கமனீயம் து, தா⁴ரேதி பன சீவரம்;

பயோகே³ து³க்கடம் வுத்தம், பாசித்தி பன தா⁴ரிதே.

221. க³ணசீவரலாப⁴ஸ்ஸ, அந்தராயம் கரோதி சே;

பயோகே³ து³க்கடம் ஹோதி, கதே பாசித்தியம் ஸியா.

222. விப⁴ங்க³ம் படிபா³ஹந்தீ, சீவரானம் து த⁴ம்மிகம்;

பயோகே³ து³க்கடம் வுத்தம், பாசித்தி படிபா³ஹிதே.

223. அகா³ரிகாதி³னோ தே³தி, ஸசே ஸமணசீவரம்;

பயோகே³ து³க்கடம், தி³ன்னே, பாசித்தி பரியாபுதா.

224. சீவரே து³ப்³ப³லாஸாய, காலம் சே ஸமதிக்கமே;

பயோகே³ து³க்கடம் வுத்தம், பாசித்தி ஸமதிக்கமே.

225. த⁴ம்மிகம் கதி²னுத்³தா⁴ரம், படிபா³ஹந்தியா து³வே;

பயோகே³ து³க்கடம் ஹோதி, பாசித்தி படிபா³ஹிதே.

ந்ஹானவக்³கோ³ ததியோ.

226. து³வே பி⁴க்கு²னியோ ஏக-மஞ்சஸ்மிம் சே துவட்டேய்யும்;

பயோகே³ து³க்கடம் தாஸம், நிபன்னே இதரம் ஸியா.

227. து³தியம் பட²மேனேவ, ஸதி³ஸம் ததியே பன;

பயோகே³ து³க்கடம் ஹோதி, கதே பாசித்தியம் ஸியா.

228. நுபட்டா²பேந்தியா வாபி, து³க்கி²தம் ஸஹஜீவினிம்;

ஏகாயேவ பனாபத்தி, பாசித்தி பரிதீ³பிதா.

229. ஸசே உபஸ்ஸயம் த³த்வா, நிக்கட்³ட⁴தி ச பி⁴க்கு²னிம்;

பயோகே³ து³க்கடம் தஸ்ஸா, ஹோதி பாசித்தி கட்³டி⁴தே.

230. ச²ட்டே² பன ச ஸம்ஸட்டா², ஞத்தியா து³க்கடம் பு²ஸே;

கம்மவாசாய ஓஸானே, பாசித்தி பரிதீ³பிதா.

231. அந்தோரட்டே² து ஸாஸங்கே, சாரிகம் து சரந்தியா;

பயோகே³ து³க்கடம் வுத்தம், படிபன்னாய ஸேஸகம்.

232. அட்ட²மம் நவமஞ்சேவ, ஸத்தமேன ஸமம் மதம்;

த³ஸமே பன ஏகாவ, பாசித்தி பரிதீ³பிதா.

துவட்டவக்³கோ³ சதுத்தோ².

233. ராஜாகா³ராதி³கம் ஸப்³ப³ம், த³ஸ்ஸனத்தா²ய க³ச்ச²தி;

பயோகே³ து³க்கடம் தஸ்ஸா, பாசித்தி யதி³ பஸ்ஸதி.

234. ஆஸந்தி³ம் வாபி பல்லங்கம், பரிபு⁴ஞ்ஜந்தியா து³வே;

பயோகே³ து³க்கடம் வுத்தம், பு⁴த்தே பாசித்தியம் ஸியா.

235. ஸுத்தம் கந்தந்தியா த்³வேவ, பயோகே³ து³க்கடம் மதம்;

உஜ்ஜவுஜ்ஜவனே தஸ்ஸா, பாசித்தி ஸமுதா³ஹரே.

236. வேய்யாவச்சம் கி³ஹீனம் து, த்³வேவ ஹோந்தி கரோந்தியா;

பயோகே³ து³க்கடம் வுத்தம், கதே பாசித்தியம் ஸியா.

237. பஞ்சமே பன ஏகாவ, பாசித்தி பரிதீ³பிதா;

பயோகே³ து³க்கடம் ச²ட்டே², தி³ன்னே பாசித்தியம் ஸியா.

238. ஸத்தமம் து³தியேனேவ, ஸமாபத்திபபே⁴த³தோ;

அட்ட²மம் து³தியே வக்³கே³, பஞ்சமேன ஸமம் மதம்.

239. திரச்சா²னக³தம் விஜ்ஜம், த்³வேவ ஹோந்தி பட²ந்தியா;

பயோகே³ து³க்கடம் ஹோதி, பாசித்தி ஹி பதே³ பதே³.

240. த³ஸமம் நவமேனேவ, ஸமானம் ஸப்³ப³தா² பன;

‘‘பரியாபுணாதி, வாசேதி’’, பத³மத்தம் விஸேஸகம்.