மஹாவக்³கோ³

மஹாக²ந்த⁴ககதா²

பப்³ப³ஜ்ஜாகதா²

2444. ஸீலக்க²ந்தா⁴தி³யுத்தேன, ஸுப⁴க்க²ந்தே⁴ன தே³ஸிதே;

க²ந்த⁴கேபி பவக்கா²மி, ஸமாஸேன வினிச்ச²யம்.

2445. மாதரா அனனுஞ்ஞாதம், பிதரா வாபி பி⁴க்கு²னோ;

ப⁴ண்டு³கம்மமபுச்சி²த்வா, பப்³பா³ஜேந்தஸ்ஸ து³க்கடம்.

2446. உத்³தே³ஸபரிபுச்சா²ய, ஸயம் சே ப்³யாவடோ ஸியா;

த³ஹரோ ஆணாபேதப்³போ³, பப்³பா³ஜேத்வானயாதி ச.

2447. உபஜ்ஜா²யமது²த்³தி³ஸ்ஸ, அவுத்தோ த³ஹரோ பன;

பப்³பா³ஜேதி ஸசே தம் ஸோ, ஸயமேவாபி வட்டதி.

2448. ஸாமணேரோபி வத்தப்³போ³, த³ஹரோ நத்தி² தத்த² சே;

‘‘க²ண்ட³ஸீமமிமம் நேத்வா, பப்³பா³ஜேத்வானயா’’தி ச.

2449. ஸரணானி பனேதஸ்ஸ, தா³தப்³பா³னேவ அத்தனா;

ஏவம்பி பி⁴க்கு²னாயேவ, ஹோதி பப்³பா³ஜிதோ நரோ.

2450. புரிஸம் பி⁴க்கு²தோ அஞ்ஞோ, பப்³பா³ஜேதி ந வட்டதி;

இத்தி²ம் பி⁴க்கு²னிதோ அஞ்ஞோ, பப்³பா³ஜேதி ந வட்டதி.

2451. ஸாமணேரோபி வா தா³தும், ஸாமணேரீபி வா ததா²;

ஆணத்தியா உபி⁴ன்னம்பி, காஸாயானி லப⁴ந்தி தே.

2452. ஸயமேவ ச யம் கிஞ்சி, பப்³பா³ஜேந்தேன பி⁴க்கு²னா;

கேஸாபனயனம் கத்வா, பட²மம் உத³கே புன.

2453. ந்ஹாபேதப்³போ³ ஸியா ஸுட்டு², க⁴ம்ஸித்வா கோ³மயாதி³னா;

ஸரீரே பீளகா வாபி, கச்சு² வா தஸ்ஸ ஹோந்தி சே.

2454. மாதா யதா² நியம்புத்தம், ந ஜிகு³ச்ச²தி ஸப்³ப³ஸோ;

ந்ஹாபேதப்³போ³வ யதினா, ததே²வ அஜிகு³ச்ச²தா.

2455. கஸ்மா? பனேத்தகேனாபி, உபகாரேன ஸாஸனே;

ஸோ ஸதா³ ப³லவஸ்னேஹோ, ஹோதுபஜ்ஜா²யகாதி³ஸு.

2456. வினோதே³த்வா பனுப்பன்னம், உக்கண்ட²ம் குலபுத்தகா;

ஸிக்கா²யோ பரிபூரேத்வா, நிப்³பா³னம் பாபுணந்தி ஹி.

2457. க³ந்த⁴சுண்ணேன வா பச்சா², சுண்ணேனபி ஹலித்³தி³யா;

ஸரீரம் தஸ்ஸ ஸீஸஞ்ச, உப்³ப³ட்டேத்வா புனப்புனம்.

2458. கி³ஹிக³ந்த⁴ம் வினோதே³த்வா, காஸாயானி பனேகதோ;

த்³வத்திக்க²த்தும் ஸகிம் வாபி, தா³தப்³பா³னிஸ்ஸ பி⁴க்கு²னா.

2459. அத² ஹத்தே²பி வா தஸ்ஸ, அத³த்வா ஸயமேவ தம்;

அச்சா²தே³தி உபஜ்ஜா²யோ, வட்டதாசரியோபி வா.

2460. நிவாஸேதி அனாணத்தோ, ஸோ பாருபதி வா ஸயம்;

அபனேத்வா ததோ ஸப்³ப³ம், புன தா³தப்³ப³மேவ தம்.

2461. பி⁴க்கு²னா து ஸஹத்தே²ன, ததா² ஆணத்தியாபி வா;

தி³ன்னம் வட்டதி காஸாவம், நாதி³ன்னம் பன வட்டதி.

2462. தஸ்ஸேவ ஸந்தகம் வாபி, கா கதா² அத்தஸந்தகே;

வந்தா³பேத்வா தத்த² பி⁴க்கூ², காராபேத்வான உக்குடிம்.

2463. அஞ்ஜலிம் பக்³க³ஹாபேத்வா, தா³தப்³ப³ம் ஸரணத்தயம்;

படிபாடிவஸேனேவ, ந ச உப்படிபாடியா.

2464. ஸசே ஏகபத³ம் வாபி, தே³தி ஏகக்க²ரம்பி வா;

படிபாடிம் விரஜ்ஜி²த்வா, க³ஹிதம் சே ந வட்டதி.

2465. திக்க²த்தும் யதி³ வா தே³தி, பு³த்³த⁴ம் ஸரணமேவ வா;

ததா² ஸேஸேஸு சேவம்பி, ந தி³ன்னானேவ ஹோந்தி ஹி.

2466. கத்வானுனாஸிகந்தானி, ஏகாப³த்³தா⁴னி வா பன;

விச்சி²ந்தி³த்வாத² ம-ந்தானி, தா³தப்³பா³னி விஜானதா.

2467. உபஸம்பத³கம்மம் து, ஏகதோஸுத்³தி⁴யா ஸியா;

ந ஹோதி பன பப்³ப³ஜ்ஜா, உப⁴தோஸுத்³தி⁴யா வினா.

2468. தஸ்மா ஆசரியேனாபி, ததா²ந்தேவாஸிகேனபி;

பு³-த்³த⁴-காராத³யோ வண்ணா, டா²னகரணஸம்பத³ம்.

2469. அஹாபேந்தேன வத்தப்³பா³, பப்³ப³ஜ்ஜாகு³ணமிச்ச²தா;

ஏகவண்ணவினாஸேன, பப்³ப³ஜ்ஜா ஹி ந ரூஹதி.

2470. யதி³ ஸித்³தா⁴பி பப்³ப³ஜ்ஜா, ஸரணாக³மனதோவ ஹி;

தா³தப்³பா³ த³ஸ ஸீலானி, பூரணத்தா²ய பி⁴க்கு²னா.

பப்³ப³ஜ்ஜாகதா².

2471. உபஜ்ஜா²யமதா²சரியம், நிஸ்ஸாய வஸதா பன;

கத்தப்³பா³னேவ வத்தானி, பியஸீலேன பி⁴க்கு²னா.

2472. ஆஸனம் பஞ்ஞபேதப்³ப³ம், த³ந்தகட்ட²ம் முகோ²த³கம்;

தா³தப்³ப³ம் தஸ்ஸ காலேன, ஸசே யாகு³ ப⁴விஸ்ஸதி.

2473. யாகு³ தஸ்ஸுபனேதப்³பா³, ஸங்க⁴தோ குலதோபி வா;

பத்தே வத்தஞ்ச காதப்³ப³ம், வத்தம் கா³மப்பவேஸனே.

2474. சீவரே யானி வத்தானி, வுத்தானி ஹி மஹேஸினா;

ஸேனாஸனே ததா² பாத³-பீட²கத²லிகாதி³ஸு.

2475. ஏவமாதீ³னி வத்தானி, ஸப்³பா³னி பன ரோக³தோ;

வுட்டா²னாக³மனந்தானி, ஸத்ததிம்ஸஸதம் ஸியும்.

2476. வத்தபே⁴தே³ன ஸப்³ப³த்த², து³க்கடம் து பகாஸிதம்;

அனாத³ரவஸேனேவ, அகரோந்தஸ்ஸ பி⁴க்கு²னோ.

உபஜ்ஜா²யாசரியவத்தகதா².

2477. உபஜ்ஜா²யஸ்ஸ வத்தானி, ததா² ஸத்³தி⁴விஹாரிகே;

ஸதம் தேரஸ ஹோந்தேவ, ததா²ந்தேவாஸிகேபி ச.

ஸத்³தி⁴விஹாரிகந்தேவாஸிகவத்தகதா².

2478. பக்கந்தே வாபி விப்³ப⁴ந்தே, பக்க²ஸங்கந்தகே மதே;

ஆணத்தியா உபஜ்ஜா²யா, பஸ்ஸம்ப⁴தி ச நிஸ்ஸயோ.

2479. ஹோதி ஆசரியம்ஹாபி, ச²தா⁴ நிஸ்ஸயபே⁴த³னம்;

பக்கந்தே வாபி விப்³ப⁴ந்தே, பக்க²ஸங்கந்தகே மதே.

2480. ஆணத்தியம் உபி⁴ன்னம்பி, து⁴ரனிக்கே²பனேபி ச;

ஏகேகஸ்ஸ உபி⁴ன்னம் வா, நாலயே ஸதி பி⁴ஜ்ஜதி.

2481. உபஜ்ஜா²யஸமோதா⁴ன-க³தஸ்ஸாபி ச பி⁴ஜ்ஜதி;

த³ஸ்ஸனம் ஸவனஞ்சாதி, ஸமோதா⁴னம் த்³விதா⁴ மதம்.

2482. அத்³தி⁴கஸ்ஸ கி³லானஸ்ஸ, கி³லானுபட்ட²கஸ்ஸ ச;

யாசிதஸ்ஸ ந தோ³ஸோவ, வஸிதும் நிஸ்ஸயம் வினா.

2483. ஜானதா அத்தனோ சேவ, வனே பா²ஸுவிஹாரதம்;

ஸபா⁴கே³ தா³யகேஸந்தே, வஸிதும்பி ச வட்டதி.

நிஸ்ஸயபடிப்பஸ்ஸம்ப⁴னகதா².

2484. குட்டி²ம் க³ண்டி³ம் கிலாஸிஞ்ச, ஸோஸிஞ்ச அபமாரிகம்;

ததா² ராஜப⁴டம் சோரம், லிகி²தம் காரபே⁴த³கம்.

2485. கஸாஹதம் நரஞ்சேவ, புரிஸம் லக்க²ணாஹதம்;

இணாயிகஞ்ச தா³ஸஞ்ச, பப்³பா³ஜேந்தஸ்ஸ து³க்கடம்.

2486. ஹத்த²ச்சி²ன்னமளச்சி²ன்னம், பாத³ச்சி²ன்னஞ்ச புக்³க³லம்;

கண்ணனாஸங்கு³லிச்சி²ன்னம், கண்ட³ரச்சி²ன்னமேவ ச.

2487. காணம் குணிஞ்ச கு²ஜ்ஜஞ்ச, வாமனம் ப²ணஹத்த²கம்;

க²ஞ்ஜம் பக்க²ஹதஞ்சேவ, ஸீபதி³ம் பாபரோகி³னம்.

2488. ஜராய து³ப்³ப³லம் அந்த⁴ம், ப³தி⁴ரஞ்சேவ மம்மனம்;

பீட²ஸப்பிம் ததா² மூக³ம், பப்³பா³ஜேந்தஸ்ஸ து³க்கடம்.

2489. அதிதீ³கோ⁴திரஸ்ஸோ வா, அதிகாலோபி வா ததா²;

அச்சோதா³தோபி வா மட்ட²-தம்ப³லோஹனித³ஸ்ஸனோ.

2490. அதிதூ²லோ அதிகிஸ்ஸோ, மஹாஸீஸோபி வா ததா²;

அதிகு²த்³த³கஸீஸேன, ஸஹிதேன யுத்தோபி வா.

2491. குடகுடகஸீஸோ வா, ததா² ஸிக²ரஸீஸகோ;

வேளுனாளிஸமானேன, ஸீஸேன ச யுதோ நரோ.

2492. கப்பஸீஸோபி பப்³பா⁴ர-ஸீஸோ வா வணஸீஸகோ;

ததா² கண்ணிககேஸோ வா, தூ²லகேஸோபி வா ததா².

2493. பூதினில்லோமஸீஸோ வா, ஜாதிபண்ட³ரகேஸகோ;

ஜாதியா தம்ப³கேஸோ வா, ததே²வாவட்டஸீஸகோ.

2494. ஸீஸலோமேகப³த்³தே⁴ஹி, ப⁴முகேஹி யுதோபி வா;

ஸம்ப³த்³த⁴ப⁴முகோ வாபி, நில்லோமப⁴முகோபி வா.

2495. மஹந்தகு²த்³த³னேத்தோ வா, ததா² விஸமலோசனோ;

கேகரோ வாபி க³ம்பீ⁴ர-நேத்தோ விஸமசக்கலோ.

2496. ஜதுமூஸிககண்ணோ வா, ஹத்தி²கண்ணோபி வா பன;

சி²த்³த³மத்தககண்ணோ வா, ததே²வாவித்³த⁴கண்ணகோ.

2497. ததா² டங்கிதகண்ணோ வா, பூதிகண்ணோபி வா பன;

யோனகாதி³ப்பபே⁴தோ³பி, நாயம் பரிஸதூ³ஸகோ.

2498. அதிபிங்க³லனேத்தோ வா, ததா² நிப்பகு²மக்கி² வா;

அஸ்ஸுபக்³க⁴ரனேத்தோ வா, பக்கபுப்பி²தலோசனோ.

2499. ததே²வ ச மஹானாஸோ, அதிகு²த்³த³கனாஸிகோ;

ததா² சிபிடனாஸோ வா, நரோ குடிலனாஸிகோ.

2500. நிச்சவிஸ்ஸவனாஸோ வா, யோ வா பன மஹாமுகோ²;

வங்கபி⁴ன்னமுகோ² வாபி, மஹாஓட்டோ²பி வா பன.

2501. ததா² தனுகஓட்டோ² வா, விபுலுத்தரஓட்ட²கோ;

ஓட்ட²சி²ன்னோபி உப்பக்க-முகோ² ஏளமுகோ²பி வா.

2502. ஸங்க²துண்டோ³பி து³க்³க³ந்த⁴-முகோ² வா பன புக்³க³லோ;

மஹாத³ந்தோபி அச்சந்தம், ததா² அஸுரத³ந்தகோ.

2503. ஹேட்டா² உபரிதோ வாபி, ப³ஹினிக்க²ந்தத³ந்தகோ;

அத³ந்தோ பூதித³ந்தோ வா, அதிகு²த்³த³கத³ந்தகோ.

2504. யஸ்ஸ த³ந்தந்தரே த³ந்தோ, காளகத³ந்தஸன்னிபோ⁴;

ஸுகு²மோவ டி²தோ, தம் சே, பப்³பா³ஜேதும்பி வட்டதி.

2505. யோ மஹாஹனுகோ போஸோ;

தீ³கே⁴ன ஹனுனா யுதோ;

சிபிடஹனுகோ வாபி;

ரஸ்ஸேன ஹனுனா யுதோ.

2506. நிம்மஸ்ஸுதா³டி²கோ வாபி, அதிதீ³க⁴க³லோபி வா;

அதிரஸ்ஸக³லோபி வா, பி⁴ன்னக³ண்டி²க³லோபி வா.

2507. ததா² ப⁴ட்ட²ம்ஸகூடோ வா, பி⁴ன்னபிட்டி²உரோபி வா;

ஸுதீ³க⁴ரஸ்ஸஹத்தோ² வா, கச்சு²கண்டு³ஸமாயுதோ.

2508. மஹானிஸத³மம்ஸோ வா, உத்³த⁴னக்³கு³பமாயுதோ;

வாதண்டி³கோ மஹாஊரு, ஸங்க⁴ட்டனகஜாணுகோ.

2509. பி⁴ன்னஜாணு மஹாஜாணு, தீ³க⁴ஜங்கோ⁴ விஜங்க⁴கோ;

விகடோ வாபி பண்ஹோ வா, ததா² உப்³ப³த்³த⁴பிண்டி³கோ.

2510. யட்டி²ஜங்கோ⁴ மஹாஜங்கோ⁴, மஹாபாதோ³பி யோ நரோ;

ததா² பிட்டி²கபாதோ³ வா, மஹாபண்ஹிபி வா பன.

2511. வங்கபாதோ³ நரோ யோ வா, க³ண்டி²கங்கு³லிகோபி வா;

யோ பனந்த⁴னகோ² வாபி, காளபூதினகோ²பி ச.

2512. இச்சேவமாதி³கம் கஞ்சி, நரம் பரிஸதூ³ஸகம்;

பப்³பா³ஜேந்தஸ்ஸ பி⁴க்கு²ஸ்ஸ, ஹோதி ஆபத்தி து³க்கடம்.

பரிஸதூ³ஸககதா².

2513. ‘‘ஸாமணேரஜ்ஜ மா கா²த³, மா பு⁴ஞ்ஜ ச பிவா’’தி ச;

நிவாரேந்தஸ்ஸ ஆஹாரம், ஹோதி ஆபத்தி து³க்கடம்.