சூளவக்³கோ³

பாரிவாஸிகக்க²ந்த⁴ககதா²

2748. தஜ்ஜனீயம் நியஸ்ஸஞ்ச, பப்³பா³ஜம் படிஸாரணம்;

திவிது⁴க்கே²பனஞ்சாதி, ஸத்த கம்மானி தீ³பயே.

2749. தேசத்தாலீஸ வத்தானி, க²ந்த⁴கே கம்மஸஞ்ஞிதே;

நவாதி⁴கானி திம்ஸேவ, க²ந்த⁴கே தத³னந்தரே.

2750. ஏவம் ஸப்³பா³னி வத்தானி, த்³வாஸீதேவ மஹேஸினா;

ஹோந்தி க²ந்த⁴கவத்தானி, க³ஹிதாக³ஹணேன து.

2751. பாரிவாஸஞ்ச வத்தஞ்ச, ஸமாதி³ன்னஸ்ஸ பி⁴க்கு²னோ;

ரத்திச்சே²தோ³ கத²ம் வுத்தோ, வத்தபே⁴தோ³ கத²ம் ப⁴வே?

2752. ஸஹவாஸோ வினாவாஸோ, அனாரோசனமேவ ச;

பாரிவாஸிகபி⁴க்கு²ஸ்ஸ, ரத்திச்சே²தோ³ ச து³க்கடம்.

2753. ஏகச்ச²ன்னே பனாவாஸே, பகதத்தேன பி⁴க்கு²னா;

நிவாஸோ த³கபாதேன, உக்கி²த்தஸ்ஸ நிவாரிதோ.

2754. பாரிவாஸிகபி⁴க்கு²ஸ்ஸ, அந்தோயேவ ந லப்³ப⁴தி;

இச்சேவம் பன நித்³தி³ட்ட²ம், மஹாபச்சரியம் பன.

2755. ‘‘அவிஸேஸேன நித்³தி³ட்ட²ம், மஹாஅட்ட²கதா²தி³ஸு;

உபி⁴ன்னம் த³கபாதேன, நிவாஸோ வாரிதோ’’தி ஹி.

2756. அபி⁴க்கு²கே பனாவாஸே, அனாவாஸேபி கத்த²சி;

விப்பவாஸம் வஸந்தஸ்ஸ, ரத்திச்சே²தோ³ ச து³க்கடம்.

2757. பாரிவாஸிகபி⁴க்கு²ஸ்ஸ, பி⁴க்கு²ம் தி³ஸ்வான தங்க²ணே;

நாரோசேந்தஸ்ஸ சேதஸ்ஸ, ரத்திச்சே²தோ³ ச து³க்கடம்.

2758. பஞ்சேவ ச யதா²வுட்³ட⁴ம், லப⁴தே பாரிவாஸிகோ;

காதும் தத்தே²வ ச ட²த்வா, உபோஸத²பவாரணம்.

2759. வஸ்ஸஸாடிம் யதா²வுட்³ட⁴ம், தே³ந்தி சே ஸங்க⁴தா³யகா;

ஓணோஜனம் ததா² ப⁴த்தம், லப⁴தே பஞ்சிமே பன.

பாரிவாஸிகக்க²ந்த⁴ககதா².

ஸமத²க்க²ந்த⁴ககதா²

2760. விவாதா³தா⁴ரதா சானு-வாதா³தி⁴கரணம்பி ச;

ஆபத்தாதா⁴ரதா சேவ, கிச்சாதி⁴கரணம்பி ச.

2761. ஏதானி பன சத்தாரி, வுத்தானி ச மஹேஸினா;

பே⁴த³காரகவத்தூ²னி, விவாதோ³ தத்த² நிஸ்ஸிதோ.

2762. விபத்தியோ சதஸ்ஸோவ, அனுவாதோ³ உபாக³தோ;

ஆபத்தாதா⁴ரதா நாம, ஸத்த ஆபத்தியோ மதா.

2763. ஸங்க⁴கிச்சானி நிஸ்ஸாய, கிச்சாதி⁴கரணம் ஸியா;

ஏதேஸம் து சதுன்னம்பி, ஸமத்தா ஸமதா² மதா.

2764. ஸம்முகா² ஸதி சாமூள்ஹோ, படிஞ்ஞாவினயோபி ச;

தஸ்ஸபாபியஸீ சேவ, ததா² யேபு⁴ய்யஸீபி ச.

2765. திணவத்தா²ரகோ சேவ, ஸத்தமோ வினயோ மதோ;

ஸத்திமே ஸமதா² வுத்தா, பு³த்³தே⁴னாதி³ச்சப³ந்து⁴னா.

2766. விவாதோ³ ஸம்மதி த்³வீஹி, அனுவாதோ³ சதூஹி ச;

ஆபத்தி பன தீஹேவ, கிச்சமேகேன ஸம்மதி.

2767. ச²ட்டே²ன பட²மேனாபி, விவாதோ³ ஏத்த² ஸம்மதி;

ஸம்முகா²வினயாதீ³ஹி, அனுபுப்³பே³ன தீஹிபி.

2768. ததே²வ பஞ்சமேனாபி, அனுவாதோ³ ஹி ஸம்மதி;

ஸம்முகே²ன படிஞ்ஞாய, திணவத்தா²ரகேன ச.

2769. ஆபத்தூபஸமம் யாதி, தீஹேவ ஸமதே²ஹி ஸா;

ஸம்முகா²வினயேனேவ, கிச்சமேகேன ஸம்மதி.

2770. யேபு⁴ய்யஸிககம்மே து, ஸலாகம் கா³ஹயே பு³தோ⁴;

கூ³ள்ஹேன விவடேனாபி, கண்ணஜப்பேன வா பன.

2771. அலஜ்ஜுஸ்ஸதே³ கூ³ள்ஹேன, விவடேனேவ லஜ்ஜிஸு;

பா³லேஸு கண்ணஜப்பேன, ஸலாகம் கா³ஹயே பு³தோ⁴.

2772. லஜ்ஜீ அலஜ்ஜீ பா³லோதி, கேன ஸக்கா விஜானிதும்?

ஸகேன கம்முனாயேவ, தேன ஸக்கா விஜானிதும்.

2773. ஆபஜ்ஜதி ச ஸஞ்சிச்ச, ஆபத்திம் பரிகூ³ஹதி;

ச²ந்தா³தி³அக³திம் யாதி, அலஜ்ஜீ ஏதி³ஸோ ஸியா.

2774. நாபஜ்ஜதி ச ஸஞ்சிச்ச, ஆபத்திம் ந ச கூ³ஹதி;

ந க³ச்ச²திக³திஞ்சாபி, ஏதி³ஸோ லஜ்ஜி புக்³க³லோ.

2775. து³ச்சிந்திதோ ச து³ப்³பா⁴ஸீ, ததா² து³க்கடகாரிகோ;

ஏதி³ஸோ பன ‘‘பா³லோ’’தி, லக்க²ணேனேவ ஞாயதி.

2776. திதா⁴ ஸலாககா³ஹேன, ப³ஹுகா த⁴ம்மவாதி³னோ;

யேபு⁴ய்யஸிககம்மேன, கத்தப்³ப³ந்தி ஜினோப்³ரவி.

2777. அலஜ்ஜீ ஸானுவாதோ³ ச, அஸுசீ கம்மதோ ச யோ;

தஸ்ஸபாபியஸீகம்ம-யோக்³கோ³ ஸோ ஹோதி புக்³க³லோ.

2778. ப⁴ண்ட³னே கலஹே ஜாதே, விவாத³ஸ்மிம் அனப்பகே;

ப³ஹுஅஸ்ஸாமணே சிண்ணே, அனக்³கே³பி ச ப⁴ஸ்ஸகே.

2779. மூலமூலம் க³வேஸந்தம், ஹோதி வாளஞ்ச கக்க²ளம்;

திணவத்தா²ரகேனேவ, காதப்³ப³ந்தி பகாஸிதம்.

2780. யதா² ச திணபண்ணேன, ச²ன்னம் கூ³த²ஞ்ச முத்தகம்;

ந ச வாயதி து³க்³க³ந்த⁴ம், வூபஸம்மதி தங்க²ணே.

2781. ட²பேத்வா து²ல்லவஜ்ஜஞ்ச, கி³ஹீஹி படிஸம்யுதம்;

தி³ட்டா²விகம்மிகஞ்சேவ, யோ ச தத்த² ந ஹோதி தம்.

2782. ஸேஸாயாபத்தியா யாவ, உபஸம்பத³மாளதோ;

ஸுத்³தோ⁴ ஹோதி நிராபத்தி, திணவத்தா²ரகே ததா².

ஸமத²க்க²ந்த⁴ககதா².

கு²த்³த³கவத்து²க்க²ந்த⁴ககதா²

2783. ருக்கே² வா பன குட்டேவா, அட்டானே த²ம்ப⁴கேஸு வா;

ந்ஹாயமானோ ஸகம் காயம், உக்³க⁴ம்ஸேய்யஸ்ஸ து³க்கடம்.

2784. காயம் க³ந்த⁴ப்³ப³ஹத்தே²ன, குருவிந்த³கஸுத்தியா;

மல்லகேன ந க⁴ம்ஸேய்ய, நாஞ்ஞமஞ்ஞஞ்ச காயதோ.

2785. அகதம் மல்லகம் நாம, கி³லானஸ்ஸேவ வட்டதி;

கதம் தம் மல்லகம் நாம, ஸப்³பே³ஸம்பி ந வட்டதி.

2786. கபாலிட்ட²கக²ண்டா³னி, ஸப்³ப³ஸ்ஸ புது²பாணிகம்;

கி³லானஸ்ஸாகி³லானஸ்ஸ, வத்த²வட்டி ச வட்டதி.

2787. வுத்தா பே²ணகபாஸாண-கத²லா பாத³க⁴ம்ஸனே;

வட்டம் வா சதுரஸ்ஸம் வா, கதகம் ந ச வட்டதி.

2788. யம் கிஞ்சிபி அலங்காரம், தா⁴ரேந்தஸ்ஸபி து³க்கடம்;

ஹோதி அந்தமஸோ தால-பண்ணமத்தம்பி பி⁴க்கு²னோ.

2789. ஓஸண்ஹேய்ய ஸகே கேஸே, யோ ஹத்த²ப²ணகேன வா;

ப²ணகேனபி கோச்சே²ன, து³க்கடம் தஸ்ஸ நித்³தி³ஸே.

2790. ஸித்த²தேலோத³தேலேஹி, மண்ட³னத்த²ம் ந வட்டதி;

அனுலோமனிபாதத்த²ம், உத்³த⁴ம்லோமேன பி⁴க்கு²னா.

2791. ஹத்த²ம் தேலேன தேமேத்வா, புஞ்சி²தப்³பா³ ஸிரோருஹா;

வட்டதுண்ஹாபி⁴தத்தஸ்ஸ, அல்லஹத்தே²ன புஞ்சி²தும்.

2792. ஆதா³ஸே உத³பத்தே வா, யத்த² கத்த²சி அத்தனோ;

முக²பி³ம்ப³ம் வினா ஹேதும், ஓலோகேந்தஸ்ஸ து³க்கடம்.

2793. ‘‘ஸஞ்ச²விம் து முக²ம், நோ’’தி, த³ட்டு²மாபா³த⁴பச்சயா;

‘‘ஜிண்ணோ நோ’’தாயுஸங்கா²ர-ஜானனத்த²ஞ்ச வட்டதி.

2794. நச்சம் வா பன கீ³தம் வா, வாதி³தம் வாபி பி⁴க்கு²னோ;

த³ட்டு²ம் வா பன ஸோதும் வா, க³ச்ச²தோ ஹோதி து³க்கடம்.

2795. த³ட்டு²மந்தமஸோ மோர-நச்சம்பி ச ந வட்டதி;

ஸோதுமந்தமஸோ த³ந்த-கீ³தம்பி ச ந வட்டதி.

2796. நச்சந்தஸ்ஸ ஸயம் வாபி, நச்சாபேந்தஸ்ஸ து³க்கடம்;

அனாபத்தந்தராராமே, ட²த்வா ஸுணாதி பஸ்ஸதி.

2797. ‘‘பஸ்ஸிஸ்ஸாமீ’’தி நச்சம் வா, கீ³தம் வா பன வாதி³தம்;

விஹாரதோ விஹாரம் வா, க³ச்ச²தோ ஹோதி து³க்கடம்.

2798. ஆபத்தந்தோவிஹாரேபி, உட்ட²ஹித்வான க³ச்ச²தோ;

ட²த்வா கீ³வம் பஸாரேத்வா, பஸ்ஸதோபி ச வீதி²யம்.

2799. கேஸா தீ³கா⁴ ந தா⁴ரேய்யா, யோ தா⁴ரேய்யஸ்ஸ து³க்கடம்;

த்³வங்கு³லம் வா து³மாஸம் வா, ததோ உத்³த⁴ம் ந வட்டதி.

2800. நகே² நாஸிகலோமானி, தீ³கா⁴னி ந து தா⁴ரயே;

ந ச வீஸதிமட்ட²ம் வா, காதும் வட்டதி பி⁴க்கு²னோ.

2801. கப்பாபேய்ய விஸும் மஸ்ஸும், தா³டி²கம் வா ட²பேய்ய யோ;

ஸம்ஹராபேய்ய வா லோமம், ஸம்பா³தே⁴ தஸ்ஸ து³க்கடம்.

2802. சி²ந்த³தோ து³க்கடம் வுத்தம், கேஸே கத்தரிகாய வா;

அகி³லானஸ்ஸ அஞ்ஞேன, சி²ந்தா³பேந்தஸ்ஸ வா ததா².

2803. சி²ந்த³தோ அத்தனோ அங்க³-ஜாதம் து²ல்லச்சயம் ஸியா;

ஸேஸங்க³சே²த³னே அத்த-வதே⁴ ஆபத்தி து³க்கடம்.

2804. அஹிகீடாதி³த³ட்ட²ஸ்ஸ, தாதி³ஸாபா³த⁴பச்சயா;

ந தோ³ஸோ சி²ந்த³தோ அங்க³ம், மோசேந்தஸ்ஸ ச லோஹிதம்.

2805. அபரிஸ்ஸாவனோ மக்³க³ம், ஸசே க³ச்ச²தி து³க்கடம்;

யாசமானஸ்ஸ வா மக்³கே³, ததே²வாத³த³தோபி தம்.

2806. ந பு⁴ஞ்ஜே ந பிவே நக்³கோ³, ந கா²தே³ ந ச ஸாயயே;

ந த³தே³ ந ச க³ண்ஹேய்ய, ந க³ச்சே²ய்யபி அஞ்ஜஸம்.

2807. வந்தி³தப்³ப³ம் ந நக்³கே³ன, வந்தா³பேதப்³ப³மேவ வா;

பரிகம்மம் ந காதப்³ப³ம், ந நக்³கே³ன ச காரயே.

2808. பரிகம்மே படிச்சா²தீ³, திஸ்ஸோ ஜந்தாக⁴ராதி³கா;

வுத்தா, வத்த²படிச்சா²தீ³, ஸப்³ப³த்த² பன வட்டதி.

2809. யத்த² கத்த²சி பேளாயம், பு⁴ஞ்ஜிதும் ந ச வட்டதி;

ஏகதோ பு⁴ஞ்ஜதோ ஹோதி, து³க்கடம் ஏகபா⁴ஜனே.

2810. ஏகபாவுரணா ஏக-த்த²ரணா வா நிபஜ்ஜரே;

ஏகமஞ்சேபி வா தேஸம், ஹோதி ஆபத்தி து³க்கடம்.

2811. ந நிஸீதே³ய்ய ஸங்கா⁴டி-பல்லத்தி²கமுபாக³தோ;

கிஞ்சி கீளம் ந கீளேய்ய, பலிதம் ந ச கா³ஹயே.

2812. ப⁴முகாய நலாடே வா, தா³டி²காயபி உக்³க³தம்;

தாதி³ஸம் பலிதம் சஞ்ஞம், கா³ஹாபேதும்பி வட்டதி.

2813. அகி³லானோ ஸசே பி⁴க்கு², ச²த்தம் தா⁴ரேய்ய து³க்கடம்;

அத்தனோ சீவராதீ³னம், கு³த்தத்த²ம் பன வட்டதி.

2814. ஹத்தி²ஸோண்ட³ம் சதுக்கண்ணம், வஸனம் மச்ச²வாளகம்;

வேல்லியம் தாலவண்டஞ்ச, நிவாஸேந்தஸ்ஸ து³க்கடம்.

2815. க³ஹிபாருபனம் வாபி, பாருபந்தஸ்ஸ து³க்கடம்;

நிவாஸனே பாருபனே, பரிமண்ட³லதா மதா.

2816. லோகாயதம் ந வாசேய்ய, ந ச தம் பரியாபுணே;

ந திரச்சா²னவிஜ்ஜா வா, வாசேதப்³பா³வ பி⁴க்கு²னா.

2817. ந ச வட்டதி தா⁴ரேதும், ஸப்³பா³ சாமரிபீ³ஜனீ;

ந சாலிம்பேய்ய தா³யம் வா, ந ச லஞ்ஜே முக²ம்பி ச.

2818. ந வஹே உப⁴தோகாஜம், வட்டதந்தரகாஜகம்;

ஸீஸக்க²ந்த⁴கடோலம்ப³-பா⁴ரே தோ³ஸோ ந விஜ்ஜதி.

2819. அட்ட²ங்கு³லாதி³கம் பி⁴க்கு², பச்சி²மம் சதுரங்கு³லா;

கா²த³தோ த³ந்தகட்ட²ஞ்ச, ஹோதி ஆபத்தி து³க்கடம்.