பி⁴க்கு²னீவிப⁴ங்கோ³

1964. பி⁴க்கு²னீனம் ஹிதத்தா²ய, விப⁴ங்க³ம் யம் ஜினோப்³ரவி;

தஸ்மிம் அபி ஸமாஸேன, கிஞ்சிமத்தம் ப⁴ணாமஹம்.

பாராஜிககதா²

1965. ச²ந்த³ஸோ மேது²னம் த⁴ம்மம், படிஸேவேய்ய யா பன;

ஹோதி பாராஜிகா நாம, ஸமணீ ஸா பவுச்சதி.

1966. மனுஸ்ஸபுரிஸாதீ³னம், நவன்னம் யஸ்ஸ கஸ்ஸசி;

ஸஜீவஸ்ஸாப்யஜீவஸ்ஸ, ஸந்த²தம் வா அஸந்த²தம்.

1967. அத்தனோ திவிதே⁴ மக்³கே³, யேபு⁴ய்யக்கா²யிதாதி³கம்;

அங்க³ஜாதம் பவேஸேந்தீ, அல்லோகாஸே பராஜிதா.

1968. இதோ பரமவத்வாவ, ஸாதா⁴ரணவினிச்ச²யம்;

அஸாதா⁴ரணமேவாஹம், ப⁴ணிஸ்ஸாமி ஸமாஸதோ.

1969. அத⁴க்க²கம் ஸரீரகம், யது³ப்³ப⁴ஜாணுமண்ட³லம்;

ஸரீரகேன சே தேன, பு²ஸேய்ய பி⁴க்கு²னீ பன.

1970. அவஸ்ஸுதஸ்ஸாவஸ்ஸுதா, மனுஸ்ஸபுக்³க³லஸ்ஸ யா;

ஸரீரமஸ்ஸ தேன வா, பு²ட்டா² பாராஜிகா ஸியா.

1971. கப்பரஸ்ஸ பனுத்³த⁴ம்பி, க³ஹிதம் உப்³ப⁴ஜாணுனா;

யதா²வுத்தப்பகாரேன, காயேனானேன அத்தனோ.

1972. புரிஸஸ்ஸ ததா² காய- படிப³த்³த⁴ம் பு²ஸந்தியா;

ததா² யதா²பரிச்சி²ன்ன- காயப³த்³தே⁴ன அத்தனோ.

1973. அவஸேஸேன வா தஸ்ஸ, காயம் காயேன அத்தனோ;

ஹோதி து²ல்லச்சயம் தஸ்ஸா, பயோகே³ புரிஸஸ்ஸ ச.

1974. யக்க²பேததிரச்சா²ன- பண்ட³கானம் அத⁴க்க²கம்;

உப்³ப⁴ஜாணும் ததே²வஸ்ஸா, உப⁴தோவஸ்ஸவே ஸதி.

1975. ஏகதோவஸ்ஸவே சாபி, து²ல்லச்சயமுதீ³ரிதம்;

அவஸேஸே ச ஸப்³ப³த்த², ஹோதி ஆபத்தி து³க்கடம்.

1976. உப்³ப⁴க்க²கமதோ⁴ஜாணு-மண்ட³லம் பன யம் இத⁴;

கப்பரஸ்ஸ ச ஹேட்டா²பி, க³தம் ஏத்தே²வ ஸங்க³ஹம்.

1977. கேலாயதி ஸசே பி⁴க்கு², ஸத்³தி⁴ம் பி⁴க்கு²னியா பன;

உபி⁴ன்னம் காயஸம்ஸக்³க³-ராகே³ ஸதி ஹி பி⁴க்கு²னோ.

1978. ஹோதி ஸங்கா⁴தி³ஸேஸோவ, நாஸோ பி⁴க்கு²னியா ஸியா;

காயஸம்ஸக்³க³ராகோ³ ச, ஸசே பி⁴க்கு²னியா ஸியா.

1979. பி⁴க்கு²னோ மேது²னோ ராகோ³, கே³ஹபேமம்பி வா ப⁴வே;

தஸ்ஸா து²ல்லச்சயம் வுத்தம், பி⁴க்கு²னோ ஹோதி து³க்கடம்.

1980. உபி⁴ன்னம் மேது²னே ராகே³, கே³ஹபேமேபி வா ஸதி;

அவிஸேஸேன நித்³தி³ட்ட²ம், உபி⁴ன்னம் து³க்கடம் பன.

1981. யஸ்ஸ யத்த² மனோஸுத்³த⁴ம், தஸ்ஸ தத்த² ந தோ³ஸதா;

உபி⁴ன்னம்பி அனாபத்தி, உபி⁴ன்னம் சித்தஸுத்³தி⁴யா.

1982. காயஸம்ஸக்³க³ராகே³ன, பி⁴ந்தி³த்வா பட²மம் பன;

பச்சா² தூ³ஸேதி சே நேவ, ஹோதி பி⁴க்கு²னிதூ³ஸகோ.

1983. அத² பி⁴க்கு²னியா பு²ட்டோ², ஸாதி³யந்தோவ சேதஸா;

நிச்சலோ ஹோதி சே பி⁴க்கு², ந ஹோதாபத்தி பி⁴க்கு²னோ.

1984. பி⁴க்கு²னீ பி⁴க்கு²னா பு²ட்டா², ஸசே ஹோதிபி நிச்சலா;

அதி⁴வாஸேதி ஸம்ப²ஸ்ஸம், தஸ்ஸா பாராஜிகம் ஸியா.

1985. ததா² து²ல்லச்சயம் கே²த்தே, து³க்கடஞ்ச வினித்³தி³ஸே;

வுத்தத்தா ‘‘காயஸம்ஸக்³க³ம், ஸாதி³யேய்யா’’தி ஸத்து²னா.

1986. தஸ்ஸா க்ரியஸமுட்டா²னம், ஏவம் ஸதி ந தி³ஸ்ஸதி;

இத³ம் தப்³ப³ஹுலேனேவ, நயேன பரிதீ³பிதம்.

1987. அனாபத்தி அஸஞ்சிச்ச, அஜானித்வாமஸந்தியா;

ஸதி ஆமஸனே தஸ்ஸா, ப²ஸ்ஸம் வாஸாதி³யந்தியா.

1988. வேத³னட்டாய வா கி²த்த-சித்தாயும்மத்திகாய வா;

ஸமுட்டா²னாத³யோ துல்யா, பட²மந்திமவத்து²னா.

உப்³ப⁴ஜாணுமண்ட³லகதா².

1989. பாராஜிகத்தம் ஜானந்தி, ஸலிங்கே³ து டி²தாய ஹி;

‘‘ந கஸ்ஸசி பரஸ்ஸாஹம், ஆரோசேஸ்ஸாமி தா³னி’’தி.

1990. து⁴ரே நிக்கி²த்தமத்தஸ்மிம், ஸா ச பாராஜிகா ஸியா;

அயம் வஜ்ஜபடிச்சா²தி³- நாமிகா பன நாமதோ.

1991. ஸேஸம் ஸப்பாணவக்³க³ஸ்மிம், து³ட்டு²ல்லேன ஸமம் நயே;

விஸேஸோ தத்ர பாசித்தி, இத⁴ பாராஜிகம் ஸியா.

வஜ்ஜபடிச்சா²தி³கதா².

1992. ஸங்கே⁴னுக்கி²த்தகோ பி⁴க்கு², டி²தோ உக்கே²பனே பன;

யம்தி³ட்டி²கோ ச ஸோ தஸ்ஸா, தி³ட்டி²யா க³ஹணேன தம்.

1993. அனுவத்தேய்ய யா பி⁴க்கு²ம், பி⁴க்கு²னீ ஸா விஸும்பி ச;

ஸங்க⁴மஜ்ஜே²பி அஞ்ஞாஹி, வுச்சமானா ததே²வ ச.

1994. அசஜந்தீவ தம் வத்து²ம், க³ஹேத்வா யதி³ திட்ட²தி;

தஸ்ஸ கம்மஸ்ஸ ஓஸானே, உக்கி²த்தஸ்ஸானுவத்திகா.

1995. ஹோதி பாராஜிகாபன்னா, ஹோதாஸாகியதீ⁴தரா;

புன அப்படிஸந்தே⁴யா, த்³விதா⁴ பி⁴ன்னா ஸிலா விய.

1996. அத⁴ம்மே பன கம்மஸ்மிம், நித்³தி³ட்ட²ம் திகது³க்கடம்;

ஸமுட்டா²னாத³யோ ஸப்³பே³, வுத்தா ஸமனுபா⁴ஸனே.

உக்கி²த்தானுவத்திககதா².

1997. அபாராஜிககே²த்தஸ்ஸ, க³ஹணம் யஸ்ஸ கஸ்ஸசி;

அங்க³ஸ்ஸ பன தம் ஹத்த²-க்³க³ஹணந்தி பவுச்சதி.

1998. பாருதஸ்ஸ நிவத்த²ஸ்ஸ, க³ஹணம் யஸ்ஸ கஸ்ஸசி;

ஏதம் ஸங்கா⁴டியா கண்ண-க்³க³ஹணந்தி பவுச்சதி.

1999. காயஸம்ஸக்³க³ஸங்கா²த-அஸத்³த⁴ம்மஸ்ஸ காரணா;

பி⁴க்கு²னீ ஹத்த²பாஸஸ்மிம், திட்டே²ய்ய புரிஸஸ்ஸ வா.

2000. ஸல்லபேய்ய ததா² தத்த², ட²த்வா து புரிஸேன வா;

ஸங்கேதம் வாபி க³ச்சே²ய்ய, இச்சே²ய்யா க³மனஸ்ஸ வா.

2001. தத³த்தா²ய படிச்ச²ன்ன-ட்டா²னஞ்ச பவிஸேய்ய வா;

உபஸம்ஹரேய்ய காயம் வா, ஹத்த²பாஸே டி²தா பன.

2002. அயமஸ்ஸமணீ ஹோதி, வினட்டா² அட்ட²வத்து²கா;

அப⁴ப்³பா³ புனருள்ஹாய, சி²ன்னோ தாலோவ மத்த²கே.

2003. அனுலோமேன வா வத்து²ம், படிலோமேன வா சுதா;

அட்ட²மம் பரிபூரேந்தீ, ததே²கந்தரிகாய வா.

2004. அதா²தி³தோ பனேகம் வா, த்³வே வா தீணிபி ஸத்த வா;

ஸதக்க²த்தும்பி பூரேந்தீ, நேவ பாராஜிகா ஸியா.

2005. ஆபத்தியோ பனாபன்னா, தே³ஸேத்வா தாஹி முச்சதி;

து⁴ரனிக்கே²பனம் கத்வா, தே³ஸிதா க³ணனூபிகா.

2006. ந ஹோதாபத்தியா அங்க³ம், ஸஉஸ்ஸாஹாய தே³ஸிதா;

தே³ஸனாக³ணனம் நேதி, தே³ஸிதாபி அதே³ஸிதா.

2007. அனாபத்தி அஸஞ்சிச்ச, அஜானித்வா கரோந்தியா;

ஸமுட்டா²னாத³யோ ஸப்³பே³, அனந்தரஸமா மதா.

2008. ‘‘அஸத்³த⁴ம்மோ’’தி நாமேத்த², காயஸம்ஸக்³க³னாமகோ;

அயமுத்³தி³ஸிதோ அத்தோ², ஸப்³ப³அட்ட²கதா²ஸுபி.

2009. விஞ்ஞூ படிப³லோ காய-ஸம்ஸக்³க³ம் படிபஜ்ஜிதும்;

காயஸம்ஸக்³க³பா⁴வே து, ஸாத⁴கம் வசனம் இத³ம்.

அட்ட²வத்து²ககதா².

2010. அவஸ்ஸுதா படிச்சா²தீ³, உக்கி²த்தா அட்ட²வத்து²கா;

அஸாதா⁴ரணபஞ்ஞத்தா, சதஸ்ஸோவ மஹேஸினா.

பாராஜிககதா² நிட்டி²தா.

ஸங்கா⁴தி³ஸேஸகதா²

2011. யா பன பி⁴க்கு²னீ உஸ்ஸயவாதா³;

அட்டகரீ முக²ரீ விஹரேய்ய;

யேன கேனசி நரேனித⁴ ஸத்³தி⁴ம்;

ஸா க³ருகம் கிர தோ³ஸமுபேதி.

2012. ஸக்கி²ம் வாபி ஸஹாயம் வா, பரியேஸதி து³க்கடம்;

பதே³ பதே³ ததா² அட்டம், காதும் க³ச்ச²ந்தியாபி ச.

2013. ஆரோசேதி ஸசே புப்³ப³ம், பி⁴க்கு²னீ அத்தனோ கத²ம்;

தி³ஸ்வா வோஹாரிகம் தஸ்ஸா, ஹோதி ஆபத்தி து³க்கடம்.

2014. ஆரோசேதி ஸசே பச்சா², இதரோ அத்தனோ கத²ம்;

ஹோதி பி⁴க்கு²னியா தஸ்ஸா, து²ல்லச்சயமனந்தரம்.

2015. ஆரோசேதிதரோ புப்³ப³ம், ஸசே ஸோ அத்தனோ கத²ம்;

பச்சா² பி⁴க்கு²னீ சே புப்³ப³-ஸதி³ஸோவ வினிச்ச²யோ.

2016. ‘‘ஆரோசேஹீ’’தி வுத்தா சே, ‘‘கத²ம் தவ மமாபி ச’’;

ஆரோசேது யதா²காமம், பட²மே து³க்கடம் ஸியா.

2017. து³தியாரோசனே தஸ்ஸா, து²ல்லச்சயமுதீ³ரிதம்;

உபாஸகேன வுத்தேபி, அயமேவ வினிச்ச²யோ.

2018. ஆரோசிதகத²ம் ஸுத்வா, உபி⁴ன்னம்பி யதா² ததா²;

வினிச்ச²யே கதே தேஹி, அட்டே பன ச நிட்டி²தே.

2019. அட்டஸ்ஸ பரியோஸானே, ஜயே பி⁴க்கு²னியா பன;

பராஜயேபி வா தஸ்ஸா, ஹோதி ஸங்கா⁴தி³ஸேஸதா.

2020. தூ³தம் வாபி பஹிணித்வா, ஆக³ந்த்வான ஸயம்பி வா;

பச்சத்தி²கமனுஸ்ஸேஹி, ஆகட்³டீ⁴யதி யா பன.

2021. ஆராமே பன அஞ்ஞேஹி, அனாசாரம் கதம் ஸசே;

அனோதி³ஸ்ஸ பரம் கிஞ்சி, ரக்க²ம் யாசதி தத்த² யா.

2022. யாய கிஞ்சி அவுத்தாவ, த⁴ம்மட்டா² ஸயமேவ து;

ஸுத்வா தம் அஞ்ஞதோ அட்டம், நிட்டா²பேந்தி ஸசே பன.

2023. தஸ்ஸா, உம்மத்திகாதீ³ன-மனாபத்தி பகாஸிதா;

கதி²னேன ஸமுட்டா²னம், துல்யம் ஸகிரியம் இத³ம்.

அட்டகாரிகதா².

2024. ஜானந்தீ பி⁴க்கு²னீ சோரிம், வஜ்ஜ²ம் விதி³தமேவ யா;

ஸங்க⁴ம் அனபலோகேத்வா, ராஜானம் க³ணமேவ வா.

2025. வுட்டா²பேய்ய வினா கப்பம், சோரிவுட்டா²பனம் பன;

ஸங்கா⁴தி³ஸேஸமாபத்தி-மாபன்னா நாம ஹோதி ஸா.

2026. பஞ்சமாஸக்³க⁴னம் யாய, ஹரிதம் பரஸந்தகம்;

அதிரேகக்³க⁴னம் வாபி, அயம் ‘‘சோரீ’’தி வுச்சதி.

2027. பி⁴க்கு²னீஸு பனஞ்ஞாஸு, தித்தி²யேஸுபி வா ததா²;

யா பப்³ப³ஜிதபுப்³பா³ ஸா, அயம் ‘‘கப்பா’’தி வுச்சதி.

2028. வுட்டா²பேதி ச யா சோரிம், ட²பேத்வா கப்பமேவித³ம்;

ஸசே ஆசரினிம் பத்தம், சீவரம் பரியேஸதி.

2029. ஸம்மன்னதி ச ஸீமம் வா, தஸ்ஸா ஆபத்தி து³க்கடம்;

ஞத்தியா து³க்கடம் த்³வீஹி, கம்மவாசாஹி ச த்³வயம்.

2030. து²ல்லச்சயஸ்ஸ, கம்மந்தே, க³ருகம் நித்³தி³ஸே பு³தோ⁴;

க³ணோ ஆசரினீ சேவ, ந ச முச்சதி து³க்கடம்.

2031. அனாபத்தி அஜானந்தீ, வுட்டா²பேதி, ததே²வ ச;

கப்பம் வா அபலோகேத்வா, தஸ்ஸா உம்மத்திகாய வா.

2032. சோரிவுட்டா²பனம் நாம, ஜாயதே வாசசித்ததோ;

காயவாசாதி³தோ சேவ, ஸசித்தஞ்ச க்ரியாக்ரியம்.

சோரிவுட்டா²பனகதா².