ஸேகி²யகதா²

1870. யோ அனாத³ரியேனேவ, புரதோ பச்ச²தோபி வா;

ஓலம்பே³த்வா நிவாஸேய்ய, தஸ்ஸ சாபத்தி து³க்கடம்.

1871. ஹத்தி²ஸோண்டா³தி³துல்யம் து, நிவாஸேந்தஸ்ஸ து³க்கடம்;

ஆபத்திபீ⁴ருனா நிச்சம், வத்த²ப்³ப³ம் பரிமண்ட³லம்.

1872. ஜாணுமண்ட³லதோ ஹேட்டா², அட்ட²ங்கு³லப்பமாணகம்;

ஓதாரேத்வா நிவத்த²ப்³ப³ம், ததோ ஊனம் ந வட்டதி.

1873. அஸஞ்சிச்சாஸதிஸ்ஸாபி, அஜானந்தஸ்ஸ கேவலம்;

அனாபத்தி கி³லானஸ்ஸா-பதா³ஸும்மத்தகாதி³னோ.

பரிமண்ட³லகதா².

1874. உபோ⁴ கோணே ஸமம் கத்வா, ஸாத³ரம் பரிமண்ட³லம்;

கத்வா பாருபிதப்³பே³வம், அகரோந்தஸ்ஸ து³க்கடம்.

1875. அவிஸேஸேன வுத்தம் து, இத³ம் ஸிக்கா²பத³த்³வயம்;

தஸ்மா க⁴ரே விஹாரே வா, கத்தப்³ப³ம் பரிமண்ட³லம்.

து³தியம்.

1876. க³ண்டி²கம் படிமுஞ்சித்வா, கத்வா கோணே உபோ⁴ ஸமம்;

சா²தே³த்வா மணிப³ந்த⁴ஞ்ச, க³ந்தப்³ப³ம் கீ³வமேவ ச.

1877. ததா² அகத்வா பி⁴க்கு²ஸ்ஸ, ஜத்தூனிபி உரம்பி ச;

விவரித்வா யதா²காமம், க³ச்ச²தோ ஹோதி து³க்கடம்.

ததியம்.

1878. க³லவாடகதோ உத்³த⁴ம், ஸீஸஞ்ச மணிப³ந்த⁴தோ;

ஹத்தே² பிண்டி³கமம்ஸம்ஹா, ஹேட்டா² பாதே³ உபோ⁴பி ச.

1879. விவரித்வாவஸேஸஞ்ச, சா²தே³த்வா சே நிஸீத³தி;

ஹோதி ஸோ ஸுப்படிச்ச²ன்னோ, தோ³ஸோ வாஸூபக³ஸ்ஸ ந.

சதுத்த²ம்.

1880. ஹத்த²ம் வா பன பாத³ம் வா, அசாலேந்தேன பி⁴க்கு²னா;

ஸுவினீதேன க³ந்தப்³ப³ம், ச²ட்டே² நத்தி² விஸேஸதா.

பஞ்சமச²ட்டா²னி.

1881. ஸதீமதாவிகாரேன, யுக³மத்தஞ்ச பேக்கி²னா;

ஸுஸம்வுதேன க³ந்தப்³ப³ம், பி⁴க்கு²னோக்கி²த்தசக்கு²னா.

1882. யத்த² கத்த²சி ஹி ட்டா²னே, ஏகஸ்மிம் அந்தரே க⁴ரே;

ட²த்வா பரிஸ்ஸயாபா⁴வம், ஓலோகேதும்பி வட்டதி.

1883. யோ அனாத³ரியம் கத்வா, ஓலோகேந்தோ தஹிம் தஹிம்;

ஸசேந்தரக⁴ரே யாதி, து³க்கடம் அட்ட²மம் ததா².

ஸத்தமட்ட²மானி.

1884. ஏகதோ உப⁴தோ வாபி, ஹுத்வா உக்கி²த்தசீவரோ;

இந்த³கீ²லகதோ அந்தோ, க³ச்ச²தோ ஹோதி து³க்கடம்.

நவமம்.

1885. ததா² நிஸின்னகாலேபி, நீஹரந்தேன குண்டி³கம்;

அனுக்கி²பித்வா தா³தப்³பா³, தோ³ஸோ வாஸூபக³ஸ்ஸ ந.

த³ஸமம்.

பட²மோ வக்³கோ³.

1886. ந வட்டதி ஹஸந்தேன, க³ந்துஞ்சேவ நிஸீதி³தும்;

வத்து²ஸ்மிம் ஹஸனீயஸ்மிம், ஸிதமத்தம் து வட்டதி.

பட²மது³தியானி.

1887. அப்பஸத்³தே³ன க³ந்தப்³ப³ம், சதுத்தே²பி அயம் நயோ;

மஹாஸத்³த³ம் கரோந்தஸ்ஸ, உப⁴யத்தா²பி து³க்கடம்.

ததியசதுத்தா²னி.

1888. காயப்பசாலகம் கத்வா, பா³ஹுஸீஸப்பசாலகம்;

க³ச்ச²தோ து³க்கடம் ஹோதி, ததே²வ ச நிஸீத³தோ.

1889. காயம் பா³ஹுஞ்ச ஸீஸஞ்ச, பக்³க³ஹேத்வா உஜும் பன;

க³ந்தப்³ப³மாஸிதப்³ப³ஞ்ச, ஸமேனிரியாபதே²ன து.

1890. நிஸீத³னேன யுத்தேஸு, தீஸு வாஸூபக³ஸ்ஸ ஹி;

அனாபத்தீதி ஞாதப்³ப³ம், விஞ்ஞுனா வினயஞ்ஞுனா.

து³தியோ வக்³கோ³.

1891. க²ம்ப⁴ம் கத்வா ஸஸீஸம் வா, பாருபித்வான க³ச்ச²தோ;

து³க்கடம் முனினா வுத்தம், ததா² உக்குடிகாய வா.

1892. ஹத்த²பல்லத்தி²காயாபி, து³ஸ்ஸபல்லத்தி²காய வா;

தஸ்ஸந்தரக⁴ரே ஹோதி, நிஸீத³ந்தஸ்ஸ து³க்கடம்.

1893. து³தியே ச சதுத்தே² ச, ச²ட்டே² வாஸூபக³ஸ்ஸ து;

அனாபத்தீதி ஸாருப்பா, ச²ப்³பீ³ஸதி பகாஸிதா.

ச²ட்ட²ம்.

1894. ஸக்கச்சம் ஸதியுத்தேன, பி⁴க்கு²னா பத்தஸஞ்ஞினா;

பிண்ட³பாதோ க³ஹேதப்³போ³, ஸமஸூபோவ விஞ்ஞுனா.

1895. ஸூபோ ப⁴த்தசதுப்³பா⁴கோ³, ‘‘ஸமஸூபோ’’தி வுச்சதி;

முக்³க³மாஸகுலத்தா²னம், ஸூபோ ‘‘ஸூபோ’’தி வுச்சதி.

1896. அனாபத்தி அஸஞ்சிச்ச, கி³லானஸ்ஸ ரஸேரஸே;

ததே²வ ஞாதகாதீ³னம், அஞ்ஞத்தா²ய த⁴னேன வா.

ஸத்தமட்ட²மனவமானி.

1897. அந்தோலேகா²பமாணேன, பத்தஸ்ஸ முக²வட்டியா;

பூரிதோவ க³ஹேதப்³போ³, அதி⁴ட்டா²னூபக³ஸ்ஸ து.

1898. தத்த² தூ²பீகதம் கத்வா, க³ண்ஹதோ யாவகாலிகம்;

யம் கிஞ்சி பன பி⁴க்கு²ஸ்ஸ, ஹோதி ஆபத்தி து³க்கடம்.

1899. அதி⁴ட்டா²னூபகே³ பத்தே, காலிகத்தயமேவ ச;

ஸேஸே தூ²பீகதம் ஸப்³ப³ம், வட்டதேவ ந ஸம்ஸயோ.

1900. த்³வீஸு பத்தேஸு ப⁴த்தம் து, க³ஹேத்வா பத்தமேககம்;

பூரேத்வா யதி³ பேஸேதி, பி⁴க்கூ²னம் பன வட்டதி.

1901. பத்தே பக்கி²ப்பமானம் யம், உச்சு²க²ண்ட³ப²லாதி³கம்;

ஓரோஹதி ஸசே ஹேட்டா², ந தம் தூ²பீகதம் ஸியா.

1902. புப்ப²தக்கோலகாதீ³னம், ட²பேத்வா சே வடம்ஸகம்;

தி³ன்னம் அயாவகாலித்தா, ந தம் தூ²பீகதம் ஸியா.

1903. வடம்ஸகம் து பூவஸ்ஸ, ட²பேத்வா ஓத³னோபரி;

பிண்ட³பாதம் ஸசே தே³ந்தி, இத³ம் தூ²பீகதம் ஸியா.

1904. ப⁴த்தஸ்ஸூபரி பண்ணம் வா, தா²லகம் வாபி கிஞ்சிபி;

ட²பேத்வா பரிபூரேத்வா, ஸசே க³ண்ஹாதி வட்டதி.

1905. படிக்³க³ஹேதுமேவஸ்ஸ, தம் து ஸப்³ப³ம் ந வட்டதி;

க³ஹிதம் ஸுக³ஹிதம், பச்சா², பு⁴ஞ்ஜிதப்³ப³ம் யதா²ஸுக²ம்.

ததியோ வக்³கோ³.

1906. பட²மம் து³தியம் வுத்த-நயம் து ததியே பன;

உபரோதி⁴மத³ஸ்ஸேத்வா, போ⁴த்தப்³ப³ம் படிபாடியா.

1907. அஞ்ஞேஸம் அத்தனோ ப⁴த்தம், ஆகிரம் பன பா⁴ஜனே;

நத்தோ²மஸதி சே தோ³ஸோ, ததா² உத்தரிப⁴ங்க³கம்.

ததியம்.

1908. சதுத்தே² யம் து வத்தப்³ப³ம், வுத்தம் புப்³பே³ அஸேஸதோ;

பஞ்சமே மத்த²கம் தோ³ஸோ, மத்³தி³த்வா பரிபு⁴ஞ்ஜதோ.

1909. அனாபத்தி கி³லானஸ்ஸ, பரித்தேபி ச ஸேஸகே;

ஏகதோ பன மத்³தி³த்வா, ஸம்கட்³டி⁴த்வான பு⁴ஞ்ஜதோ.

சதுத்த²பஞ்சமானி.

1910. யோ பி⁴ய்யோகம்யதாஹேது, ஸூபம் வா ப்³யஞ்ஜனம்பி வா;

படிச்சா²தே³ய்ய ப⁴த்தேன, தஸ்ஸ சாபத்தி து³க்கடம்.

ச²ட்ட²ம்.

1911. விஞ்ஞத்தியம் து வத்தப்³ப³ம், அபுப்³ப³ம் நத்தி² கிஞ்சிபி;

அட்ட²மே பன உஜ்ஜா²னே, கி³லானோபி ந முச்சதி.

1912. ‘‘த³ஸ்ஸாமி தா³பேஸ்ஸாமீ’’தி, ஓலோகேந்தஸ்ஸ பி⁴க்கு²னோ;

அனாபத்தீதி ஞாதப்³ப³ம், ந ச உஜ்ஜா²னஸஞ்ஞினோ.

அட்ட²மம்.

1913. மஹந்தம் பன மோரண்ட³ம், குக்குடண்ட³ஞ்ச கு²த்³த³கம்;

தேஸம் மஜ்ஜ²ப்பமாணேன, கத்தப்³போ³ கப³ளோ பன.

1914. க²ஜ்ஜகே பன ஸப்³ப³த்த², மூலகா²த³னியாதி³கே;

ப²லாப²லே அனாபத்தி, கி³லானும்மத்தகாதி³னோ.

நவமம்.

1915. அதீ³கோ⁴ பன காதப்³போ³, ஆலோபோ பரிமண்ட³லோ;

க²ஜ்ஜதுத்தரிப⁴ங்க³ஸ்மிம், அனாபத்தி ப²லாப²லே.

த³ஸமம்.

சதுத்தோ² வக்³கோ³.

1916. அனாஹடே முக²த்³வாரம், அப்பத்தே கப³ளே பன;

அத்தனோ ச முக²த்³வாரம், விவரந்தஸ்ஸ து³க்கடம்.

பட²மம்.

1917. முகே² ச ஸகலம் ஹத்த²ம், பக்கி²பந்தஸ்ஸ து³க்கடம்;

முகே² ச கப³ளம் கத்வா, கதே²தும் ந ச வட்டதி.

1918. வசனம் யத்தகேனஸ்ஸ, பரிபுண்ணம் ந ஹோதி ஹி;

முக²ஸ்மிம்தத்தகே ஸந்தே, ப்³யாஹரந்தஸ்ஸ து³க்கடம்.

1919. முகே² ஹரீதகாதீ³னி, பக்கி²பித்வா கதே²தி யோ;

வசனம் பரிபுண்ணம் சே, கதே²தும் பன வட்டதி.

து³தியததியானி.

1920. யோ பிண்டு³க்கே²பகம் பி⁴க்கு², கப³ளச்சே²த³கம்பி வா;

மக்கடோ விய க³ண்டே³ வா, கத்வா பு⁴ஞ்ஜேய்ய து³க்கடம்.

சதுத்த²பஞ்சமச²ட்டா²னி.

1921. நித்³து⁴னித்வான ஹத்த²ம் வா, ப⁴த்தம் ஸித்தா²வகாரகம்;

ஜிவ்ஹானிச்சா²ரகம் வாபி, ததா² ‘‘சபு சபூ’’தி வா.

1922. அனாத³ரவஸேனேவ, பு⁴ஞ்ஜதோ ஹோதி து³க்கடம்;

ஸத்தமே அட்ட²மே நத்தி², தோ³ஸோ கசவருஜ்ஜ²னே.

ஸத்தமத³ஸமானி.

பஞ்சமோ வக்³கோ³.

1923. கத்வா ஏவம் ந போ⁴த்தப்³ப³ம், ஸத்³த³ம் ‘‘ஸுரு ஸுரூ’’தி ச;

ஹத்த²னில்லேஹகம் வாபி, ந ச வட்டதி பு⁴ஞ்ஜிதும்.

1924. பா²ணிதம் க⁴னயாகு³ம் வா, க³ஹேத்வா அங்கு³லீஹி தம்;

முகே² அங்கு³லியோ போ⁴த்தும், பவேஸேத்வாபி வட்டதி.

1925. ந பத்தோ லேஹிதப்³போ³வ, ஏகாயங்கு³லிகாய வா;

ஏகஓட்டோ²பி ஜிவ்ஹாய, ந ச நில்லேஹிதப்³ப³கோ.

சதுத்த²ம்.

1926. ஸாமிஸேன து ஹத்தே²ன, ந ச பானீயதா²லகம்;

க³ஹேதப்³ப³ம், படிக்கி²த்தம், படிக்கூலவஸேன ஹி.

1927. புக்³க³லஸ்ஸ ச ஸங்க⁴ஸ்ஸ, க³ஹட்ட²ஸ்ஸத்தனோபி ச;

ஸந்தகோ பன ஸங்கோ² வா, ஸராவம் வாபி தா²லகம்.

1928. தஸ்மா ந ச க³ஹேதப்³ப³ம், க³ண்ஹதோ ஹோதி து³க்கடம்;

அனாமிஸேன ஹத்தே²ன, க³ஹணம் பன வட்டதி.

பஞ்சமம்.

1929. உத்³த⁴ரித்வாபி பி⁴ந்தி³த்வா, க³ஹேத்வா வா படிக்³க³ஹே;

நீஹரித்வா அனாபத்தி, ச²ட்³டே³ந்தஸ்ஸ க⁴ரா ப³ஹி.