நிஸ்ஸக்³கி³யகதா²

551. கோ²மம் கப்பாஸகோஸேய்யம், ஸாணம் ப⁴ங்க³ஞ்ச கம்ப³லம்;

சீவரம் ச²ப்³பி³த⁴ம் வுத்தம், ஜாதிதோ பன கப்பியம்.

552. து³கூலஞ்சேவ பத்துண்ணம், சினம் ஸோமாரபட்டகம்;

இத்³தி⁴ஜம் தே³வதி³ன்னஞ்ச, தஸ்ஸேதம் அனுலோமிகம்.

553. திசீவரம் பரிக்கா²ர-சோளஞ்ச முக²புஞ்ச²னம்;

நிஸீத³னமதி⁴ட்டே²ய்ய, பச்சத்த²ரணமேவ ச.

554. ஏகாஹம்பி வினா பி⁴க்கு², ந வஸேய்ய திசீவரம்;

ந வஸேய்ய ததா²தி⁴ட்டா², சாதுமாஸம் நிஸீத³னம்.

555. ரஜித்வா கப்பியம் பி³ந்து³ம், த³த்வா தத்த² திசீவரம்;

உபபன்னம் பமாணேன, அதி⁴ட்டா²தப்³ப³மேவ தம்.

556. பச்சி²மந்தேன ஸங்கா⁴டி, தீ³க⁴ஸோ முட்டி²பஞ்சகா;

முட்டி²த்திகா ச திரியம், உத்தமந்தேன ஸா பன.

557. ஸத்து²னோ சீவரூனாபி, வட்டதீதி பகாஸிதா;

இத³மேவுத்தராஸங்கே³, பமாணம் பரிதீ³பிதம்.

558. முட்டி²பஞ்சகம் தீ³க⁴ந்தம், பமாணம் திரியந்ததோ;

அட்³ட⁴தேய்யம் த்³விஹத்த²ம் வா, ஸேஸே அந்தரவாஸகே.

559. அஹதாஹதகப்பானம், ஸங்கா⁴டி தி³கு³ணா மதா;

ஏகபட்டுத்தராஸங்கோ³, ஏவமந்தரவாஸகோ.

560. உதுத்³த⁴டானம் பன சீவரானம்;

ஸங்கா⁴டி பி⁴க்கு²ஸ்ஸ சதுக்³கு³ணா வா;

து³வேபி ஸேஸா தி³கு³ணாவ வுத்தா;

யதா²ஸுக²ம் வட்டதி பம்ஸுகூலம்.

561. தீணிபி த்³வேபி சேகம் வா, சி²ந்தி³தப்³ப³ம் பஹோதி சே;

ஸப்³பே³ஸு அப்பஹோந்தேஸு, தே³ய்யமன்வாதி⁴கம்பி வா.

562. அச்சி²ன்னம் வா அனாதி³ன்னம், தா⁴ரேந்தஸ்ஸ திசீவரம்;

பி⁴க்கு²னோ து³க்கடம் வுத்தம், து³ப்³போ⁴கே³ன ச ஸேவதோ.

563. குஸிம் அட்³ட⁴குஸிஞ்சாபி, மண்ட³லம் அட்³ட⁴மண்ட³லம்;

விவட்டம் அனுவிவட்டம், பா³ஹந்தம்பி ச பி⁴க்கு²னோ.

564. த³ஸ்ஸேத்வாவ விதி⁴ம் ஸப்³ப³ம், பஞ்சகாதி³ப்பபே⁴த³கம்;

சி²ன்னம் ஸமணஸாருப்பம், காதப்³ப³ம் து திசீவரம்.

565. தா³னேனச்சி²ஜ்ஜகா³ஹேன, விஸ்ஸாஸக்³க³ஹணேன ச;

ஹீனாயாவத்தனேனாபி, ஸிக்கா²ய ச பஹானதோ.

566. பச்சுத்³தா⁴ரவினாஸேஹி, லிங்க³ஸ்ஸ பரிவத்தனா;

ஸப்³ப³ம் பி⁴ஜ்ஜதிதி⁴ட்டா²னம், சி²த்³த³பா⁴வே திசீவரம்.

567. கனிட்ட²ஸ்ஸங்கு³லஸ்ஸேவ, நக²பிட்டி²ப்பமாணகம்;

வினிவித்³த⁴ம் பனச்சி²த்³த³-மதி⁴ட்டா²னவினாஸனம்.

568. ஏகோ தந்துபி அச்சி²ன்னோ, அதி⁴ட்டா²னம் ந பி⁴ந்த³தி;

ஸேதபா⁴வம் கரோந்தேன, தோ⁴தம்பி ரஜகேன வா.

569. பட²மம் அக்³க³ளம் த³த்வா, பச்சா² சி²ந்த³தி ரக்க²தி;

க⁴டேத்வா கோடியோ த்³வே வா, பச்சா² சி²ந்த³தி ரக்க²தி.

570. சதுரட்ட²ங்கு³லா ஓரம், ஏகத்³வின்னம் திரீயதோ;

திண்ணம்பி தீ³க⁴தோ சி²த்³த³ம், பி⁴ந்த³தேவ வித³த்தி²யா.

571. நிஸீத³னஸ்ஸ தீ³கே⁴ன, ப⁴வந்தி த்³வே வித³த்தி²யோ;

வித்தா²ரேன தி³யட்³டா⁴ ச, ஸுக³தஸ்ஸ வித³த்தி²யா.

572. ஹோந்தி கண்டு³ப்படிச்சா²தி³, திரியம் த்³வே வித³த்தி²யோ;

தீ³க⁴தோபி சதஸ்ஸோவ, ஸுக³தஸ்ஸ வித³த்தி²யா.

573. தீ³க⁴தோ ஸுக³தஸ்ஸேவ, ப⁴வந்தி ச² வித³த்தி²யோ;

வித்தா²ரேனட்³ட⁴தேய்யாவ, ஸியா வஸ்ஸிகஸாடிகா.

574. முனினா தீஸு ஏதேஸு, கரோந்தஸ்ஸ தது³த்தரிம்;

அதி⁴கச்சே²த³னம் தஸ்ஸ, பாசித்தியமுதீ³ரிதம்.

575. முக²புஞ்ச²னசோளஸ்ஸ, பச்சத்த²ரணகஸ்ஸ வா;

பமாணம் அப்பமாணேன, ந சேவ பரிதீ³பிதம்.

576. ஸத³ஸம் அத³ஸம் ஸப்³ப³ம், பச்சத்த²ரணசீவரம்;

மஹந்தம் கு²த்³த³கம் ஏக-மனேகம்பி ச வட்டதி.

577. முக²புஞ்ச²னசோளேகம், த்³வேபி வட்டந்தி ஸப்³ப³தா²;

ஸத³ஸம் அத³ஸம் வாபி, ஸத³ஸம்வ நிஸீத³னம்.

578. அத³ஸா ரஜிதாயேவ, வட்டதாதி³ன்னகப்பகா;

வுத்தா கண்டு³ப்படிச்சா²தி³, ததா² வஸ்ஸிகஸாடிகா.

579. க³ணனம் வா பமாணம் வா, ந பரிக்கா²ரசோளகே;

பமாணக³ணனாதீதி, ப⁴ணந்தி பகதஞ்ஞுனோ.

580. ஸுக³தட்ட²ங்கு³லாயாமம், சதுரங்கு³லவித்த²தம்;

விகப்பனுபக³ம் ஹோதி, பச்சி²மம் நாம சீவரம்.

581. பரிஸ்ஸாவபடம் பத்த-போத்த²கத்த²விகாதி³கம்;

அதி⁴ட்டே²ய்ய பரிக்கா²ர-சோளம் பச்சி²மசீவரம்.

582. ப³ஹூனி ஏகதோ கத்வா, அதி⁴ட்டா²தும்பி வட்டதி;

மாதுஆதீ³னமத்தா²ய, ட²பிதே நத்தி² தோ³ஸதா.

583. வஸ்ஸமாஸே அதி⁴ட்டே²ய்ய, சதுரோ வஸ்ஸஸாடிகம்;

புன பச்சுத்³த⁴ரித்வா தம், விகப்பேய்ய ததோ பரம்.

584. தாவ கண்டு³ப்படிச்சா²தி³ம், யாவ ரோகோ³ ந ஸம்மதி;

அதி⁴ட்ட²ஹித்வா ததோ உத்³த⁴ம், உத்³த⁴ரித்வா விகப்பயே.

585. ‘‘இமம் கண்டு³ப்படிச்சா²தி³ம், இமமந்தரவாஸகம்;

அதி⁴ட்டா²மீ’’திதி⁴ட்டே²ய்ய, ஸேஸேஸுபி அயம் நயோ.

586. ‘‘இமம் கண்டு³ப்படிச்சா²தி³ம், ஏத’’ந்தி ச அஸம்முகே²;

வத்வா பச்சுத்³த⁴ரேய்யேவம், ஸேஸேஸுபி விசக்க²ணோ.

587. ஆபோ⁴க³ம் மனஸா கத்வா, காயேன பு²ஸனாகதம்;

வசஸாதி⁴ட்டி²தஞ்சாதி, அதி⁴ட்டா²னம் த்³விதா⁴ மதம்.

588. இதி ஸப்³ப³மித³ம் வுத்தம், தேசீவரிகபி⁴க்கு²னோ;

ததா² வத்வாவதி⁴ட்டே²ய்ய, தம் பரிக்கா²ரசோளிகோ.

589. திசீவரம் பரிக்கா²ர-சோளம் காதும்பி வட்டதி;

ஏவம் சுதோ³ஸிதே வுத்தோ, பரிஹாரோ நிரத்த²கோ.

590. ந, தேசீவரிகஸ்ஸேவ, வுத்தத்தா தத்த² ஸத்து²னா;

தம் பரிக்கா²ரசோளஸ்ஸ, தஸ்மா ஸப்³ப³ம்பி வட்டதி.

591. ‘‘அதி⁴ட்டே²தி விகப்பேதி, அனாபத்தீ’’தி ஏத்த² ச;

அதி⁴ட்டா²தப்³ப³கஸ்ஸேவ, விகப்பனவிதா⁴னதோ.

592. பி⁴க்கு²ஸ்ஸேவம் கரோந்தஸ்ஸ, ந தோ³ஸோ உபலப்³ப⁴தி;

ஏவஞ்ச ந ஸியா கஸ்மா, முக²புஞ்ச²னகாதி³கம்.

593. முக²புஞ்ச²னகாதீ³னம், தேஸம் கிச்சவிதா⁴னதோ;

அகிச்சஸ்ஸாமிகஸ்ஸஸ்ஸ, அதி⁴ட்டா²னம் து யுஜ்ஜதி.

594. நிதா⁴னமுக²மேதந்தி, மஹாபச்சரியம் பன;

வுத்தத்தா ச நிஸேதே⁴தும், ந ஸக்கா வினயஞ்ஞுனா.

595. சீவரம் பரிபுண்ணந்தி, நிதா³னுப்பத்திதோபி ச;

நிதா⁴னமுக²மேதந்தி, வேதி³தப்³ப³ம் விபா⁴வினா.

596. குஸவாகாதி³சீரானி, கம்ப³லம் கேஸவாலஜம்;

து²ல்லச்சயம் தா⁴ரயதோ-லூகபக்கா²ஜினக்கி²பே.

597. கத³லேரகது³ஸ்ஸேஸு, அக்கது³ஸ்ஸே ச போத்த²கே;

து³க்கடம் திரிடே வாபி, வேட²னே கஞ்சுகேபி ச.

598. ஸப்³ப³னீலகமஞ்ஜேட்ட²-கண்ஹலோஹிதபீதகே;

மஹானாமமஹாரங்க³-ரத்தேஸுபி ச து³க்கடம்.

599. அச்சி²ன்னத³ஸகே தீ³க⁴-ப²லபுப்ப²த³ஸேஸு ச;

அச்சி²ன்னசீவரஸ்ஸேத்த², நத்தி² கிஞ்சி அகப்பியம்.

600. அதி⁴ட்டே²தி விகப்பேதி, விஸ்ஸஜ்ஜேதி வினஸ்ஸதி;

அந்தோத³ஸாஹம் விஸ்ஸாஸே, அனாபத்தி பகாஸிதா.

601. கதி²னம் நாம நாமேன, ஸமுட்டா²னமித³ம் பன;

அசித்தமக்ரியம் வுத்தம், திசித்தஞ்ச திவேத³னம்.

பட²மகதி²னகதா².

602. கா³மாதீ³ஸு பதே³ஸேஸு, திபஞ்சஸு திசீவரம்;

ட²பேத்வா ஏகரத்தம்பி, ஸங்க⁴ஸம்முதியா வினா.

603. பி⁴க்கு²னோ பன தேனஸ்ஸ, விப்பவத்து²ம் ந வட்டதி;

ஹோதி நிஸ்ஸக்³கி³யம் விப்ப-வஸதோ அருணுக்³க³மே.

604. சீவரம் நிக்கி²பித்வான, ந்ஹாயந்தஸ்ஸேவ ரத்தியம்;

அருணே உட்டி²தே கிம் நு, காதப்³ப³ம் தேன பி⁴க்கு²னா.

605. து³க்கடம் முனினா வுத்தம், நிஸ்ஸக்³கி³யனிவாஸனே;

தப்³ப⁴யா பன ஸோ பி⁴க்கு², நக்³கோ³ க³ச்ச²தி து³க்கடம்.

606. அச்சி²ன்னசீவரட்டா²னே, டி²தத்தா பன பி⁴க்கு²னோ;

ந தஸ்ஸாகப்பியம் நாம, சீவரம் அத்தி² கிஞ்சிபி.

607. நிகா³ஸேத்வா க³ஹேத்வா ச, க³ந்த்வா பி⁴க்கு²ஸ்ஸ ஸந்திகம்;

நிஸ்ஸஜ்ஜித்வா பனாபத்தி, தே³ஸேதப்³பா³வ விஞ்ஞுனா.

608. பரஸ்ஸ நிஸ்ஸஜ்ஜித்வா தம், து³க்கடம் பரிபு⁴ஞ்ஜதோ;

பயோகே³ ச பயோகே³ ச, ஹோதி பாருபனாதி³ஸு.

609. அனாபத்தி தமஞ்ஞஸ்ஸ, பி⁴க்கு²னோ பரிபு⁴ஞ்ஜதோ;

அதே³ந்தஸ்ஸ ச நிஸ்ஸட்ட²ம், து³க்கடம் பரியாபுதம்.

610. தே²ரே ச த³ஹரே மக்³க³ம், க³ச்ச²ந்தேஸு உபோ⁴ஸுபி;

பத்தசீவரமாதா³ய, ஓஹீனே த³ஹரே பன.

611. அஸம்பத்தே க³ரும் தஸ்மிம், உக்³க³ச்ச²த்யருணோ யதி³;

ஹோதி நிஸ்ஸக்³கி³யம் வத்த²ம், ந பஸ்ஸம்ப⁴தி நிஸ்ஸயோ.

612. முஹுத்தம் விஸ்ஸமித்வான, க³ச்ச²ந்தே த³ஹரே பன;

ஹோதி நிஸ்ஸக்³கி³யம் வத்த²ம், பஸ்ஸம்ப⁴தி ச நிஸ்ஸயோ.

613. ஸுதா த⁴ம்மகதா² யஸ்மிம், உக்³க³ச்ச²த்யருணோ யதி³;

ஹோதி நிஸ்ஸக்³கி³யம் வத்த²ம், பஸ்ஸம்ப⁴தி ச நிஸ்ஸயோ.

614. பச்சுத்³தா⁴ரே அனாபத்தி, லத்³த⁴ஸம்முதிகஸ்ஸபி;

அந்தோயேவாருணே தம் வா, விஸ்ஸஜ்ஜேதி வினஸ்ஸதி.

615. பட²மேன ஸமானாவ, ஸமுட்டா²னாத³யோ நயா;

அபச்சுத்³த⁴ரணம் ஏத்த², அக்ரியாதி விஸேஸிதம்.

து³தியகதி²னகதா².

616. அகாலசீவரம் மாஸ-பரமம் நிக்கி²பே ஸதி;

பச்சாஸாய ததோ உத்³த⁴ம், ட²பேதும் ந ச வட்டதி.

617. த³ஸாஹாதிக்கமோயேவ;

பட²மே கதி²னே இத⁴;

மாஸஸ்ஸாதிக்கமோ வுத்தோ;

ஸேஸோ தேன ஸமோ மதோ.

ததியகதி²னகதா².

618. பி⁴க்கு² பி⁴க்கு²னியா பு⁴த்தம், வத்த²ம் அஞ்ஞாதிகாய யோ;

தோ⁴வாபேதி ரஜாபேதி, ஆகோடாபேதி சே ததோ.

619. தஸ்ஸ நிஸ்ஸக்³கி³யாபத்தி, பட²மேன பகாஸிதா;

ததா² ஸேஸேஹி ச த்³வீஹி, தீ³பிதம் து³க்கடத்³வயம்.

620. ஸிக்க²மானாய வா ஹத்தே², தோ⁴வனத்தா²ய தே³தி சே;

ஸா ஹுத்வா உபஸம்பன்னா, பச்சா² தோ⁴வதி ஸோ நயோ.

621. ஸாமணேரனித்³தே³ஸேபி, லிங்க³ம் சே பரிவத்ததி;

பி⁴க்கு²னீஸுபஸம்பஜ்ஜ, தோ⁴தே நிஸ்ஸக்³கி³யம் ஸியா.