பாசித்தியகதா²

889. ஸம்பஜானமுஸாவாதே³, பாசித்தியமுதீ³ரிதம்;

த³வா ரவா ப⁴ணந்தஸ்ஸ, ந தோ³ஸும்மத்தகாதி³னோ.

890. அஞ்ஞத்தா²பத்தியோ பஞ்ச, முஸாவாத³ஸ்ஸ காரணா;

ஸமுட்டா²னாத³யோ ஸப்³பே³, அதி³ன்னாதா³னதுல்யகா.

ஸம்பஜானமுஸாவாத³கதா².

891. ஜாதிஆதீ³ஸு வுத்தேஸு, த³ஸஸ்வக்கோஸவத்து²ஸு;

பூ⁴தேன வா அபூ⁴தேன, யேன கேனசி வத்து²னா.

892. யாய காயசி பா⁴ஸாய, ஹத்த²முத்³தா³ய வா பன;

பாராஜிகமனாபன்னம், பி⁴க்கு²மாபன்னமேவ வா.

893. அஞ்ஞத்ரஞ்ஞாபதே³ஸேன, ஓமஸந்தஸ்ஸ பி⁴க்கு²னோ;

தத்த² பாசித்தியாபத்தி, ஸம்பு³த்³தே⁴ன பகாஸிதா.

894. தேஹேவஞ்ஞாபதே³ஸேன, பாளிமுத்தபதே³ஹிபி;

ஸப்³ப³த்தா²னுபஸம்பன்னம், அக்கோஸந்தஸ்ஸ து³க்கடம்.

895. அனக்கோஸிதுகாமஸ்ஸ, கேவலம் த³வகம்யதா;

வத³தோ பன ஸப்³ப³த்த², து³ப்³பா⁴ஸிதமுதீ³ரிதம்.

896. பவிட்டா²னுபஸம்பன்ன-ட்டா²னே இத⁴ ச பி⁴க்கு²னீ;

அனாபத்தி புரக்க²த்வா, அத்த²த⁴ம்மானுஸாஸனிம்.

897. வத³தோ பன பி⁴க்கு²ஸ்ஸ, ஸமுட்டா²னாத³யோ நயா;

அனந்தரஸமா வுத்தா, து³க்கா² ஹோதேத்த² வேத³னா.

ஓமஸவாத³கதா².

898. ஆபத்தி பி⁴க்கு²பேஸுஞ்ஞே, து³விதா⁴காரதோ ஸியா;

அத்தனோ பியகாமஸ்ஸ, பரபே⁴த³த்தி²னோபி வா.

899. அக்கோஸந்தஸ்ஸ பரியாய-பாளிமுத்தனயேஹி ச;

வசனஸ்ஸுபஸம்ஹாரே, ஹோதி ஆபத்தி து³க்கடம்.

900. ததா² அனுபஸம்பன்ன-அக்கோஸம் ஹரதோபி ச;

டி²தா அனுபஸம்பன்ன-ட்டா²னே இத⁴ ச பி⁴க்கு²னீ.

901. ந சேவ பியகாமஸ்ஸ, ந ச பே⁴த³த்தி²னோபி வா;

பாபானம் க³ரஹத்தா²ய, வத³ந்தஸ்ஸ ச பி⁴க்கு²னோ.

902. ததா² உம்மத்தகாதீ³னம், அனாபத்தீதி தீ³பிதா;

ஸமுட்டா²னாத³யோ ஸப்³பே³, அதி³ன்னாதா³னஸாதி³ஸா.

பேஸுஞ்ஞகதா².

903. ட²பேத்வா பி⁴க்கு²னிம் பி⁴க்கு²ம், அஞ்ஞேன பிடகத்தயம்;

த⁴ம்மம் ஸஹ ப⁴ணந்தஸ்ஸ, தஸ்ஸ பாசித்தியம் ஸியா.

904. ராஜோவாதா³த³யோ வுத்தா, மஹாபச்சரியாதி³ஸு;

அனாருள்ஹேஸு ஸங்கீ³திம், ஆபத்திஜனகாதி ஹி.

905. து³க்கடம் ஹோதி பி⁴க்கு²ஸ்மிம், ததா² பி⁴க்கு²னியாபி ச;

பி⁴க்கு²ஸ்ஸானுபஸம்பன்ன-ஸஞ்ஞினோ விமதிஸ்ஸ வா.

906. ஏகதோ உத்³தி³ஸாபேதி, ஸஜ்ஜா²யம் வா கரோதி யோ;

ப⁴ணந்தம் பகு³ணம் க³ந்த²ம், ஓபாதேதி ச யோ பன.

907. தஸ்ஸ சானுபஸம்பன்ன-ஸந்திகே க³ண்ஹதோபி ச;

உத்³தே³ஸம் து அனாபத்தி, ப⁴ணனே தேன ஏகதோ.

908. வாசதோ ச ஸமுட்டா²தி, வாசாசித்தத்³வயாபி ச;

ஸமுட்டா²னமித³ம் வுத்தம், பத³ஸோத⁴ம்மஸஞ்ஞிதம்.

பத³ஸோத⁴ம்மகதா².

909. ஸப்³ப³ச்ச²ன்னபரிச்ச²ன்னே, நிபஜ்ஜேய்ய ஸசே பன;

யேபு⁴ய்யேன பரிச்ச²ன்னே, ச²ன்னே ஸேனாஸனேபி வா.

910. திஸ்ஸன்னம் பன ரத்தீனம், உத்³த⁴ம் யோ பன ரத்தியம்;

ட²பேத்வா பி⁴க்கு²ம் அஞ்ஞேன, தஸ்ஸ பாசித்தியம் ஸியா.

911. வத்து²ம் யம் பன நித்³தி³ட்ட²ம், மேது²னஸ்ஸ பஹோனகம்;

ஆபத்யந்தமஸோ தேன, திரச்சா²னக³தேனபி.

912. நிபன்னே உபஸம்பன்னே, இதரோ சே நிபஜ்ஜதி;

இதரஸ்மிம் நிபன்னே வா, ஸசே பி⁴க்கு² நிபஜ்ஜதி.

913. உபி⁴ன்னம் உட்ட²ஹித்வா வா, நிபஜ்ஜனபயோக³தோ;

ஆபத்தானுபஸம்பன்ன-க³ணனாயபி வா ஸியா.

914. ஸசே பிதா⁴ய வா க³ப்³ப⁴ம், நிபஜ்ஜதிபிதா⁴ய வா;

ஆபத்தத்த²ங்க³தே ஸூரியே, சதுத்த²தி³வஸே ஸியா.

915. தி³யட்³ட⁴ஹத்து²ப்³பே³தே⁴ன, பாகாரசயனாதி³னா;

பரிக்கி²த்தம்பி தம் ஸப்³ப³ம், பரிக்கி²த்தந்தி வுச்சதி.

916. பி⁴க்கு²ஸ்ஸந்தமஸோ து³ஸ்ஸ-குடியம் வஸதோபி ச;

ஸஹஸேய்யாய ஆபத்தி, ஹோதீதி பரிதீ³பிதோ.

917. ஸப்³ப³ச்ச²ன்னபரிச்ச²ன்ன-யேபு⁴ய்யாதி³ப்பபே⁴த³தோ;

ஸத்த பாசித்தியானேத்த², த³ட்ட²ப்³பா³னி ஸுபு³த்³தி⁴னா.

918. அட்³ட⁴ச்ச²ன்னபரிச்ச²ன்னே, து³க்கடம் பரிதீ³பிதம்;

ஸப்³ப³சூளபரிச்ச²ன்ன-ச²ன்னாதீ³ஹிபி பஞ்சதா⁴.

919. அனாபத்தி தி³ரத்தம் வா, திரத்தம் வஸதோ ஸஹ;

அருணஸ்ஸ புரேயேவ, ததியாய ச ரத்தியா.

920. நிக்க²மித்வா வஸந்தஸ்ஸ, புன ஸத்³தி⁴ஞ்ச பி⁴க்கு²னோ;

ததா² ஸப்³ப³பரிச்ச²ன்ன-ஸப்³ப³ச்ச²ன்னாதி³கேபி ச.

921. ஏவம் அனுபஸம்பன்னே, நிபன்னேபி நிஸீத³தோ;

ஸேஸா ஏளகலோமேன, ஸமுட்டா²னாத³யோ ஸமா.

ஸஹஸேய்யகதா².

922. ஸசே தத³ஹுஜாதாய, அபி யோ மானுஸித்தி²யா;

ஸஹஸேய்யம் பகப்பேய்ய, தஸ்ஸ பாசித்தியம் ஸியா.

923. தி³ஸ்ஸமானகரூபாய, யக்கி²யா பேதியா ஸஹ;

ரத்தியம் யோ நிபஜ்ஜேய்ய, தே³வியா பண்ட³கேன வா.

924. மேது²னவத்து²பூ⁴தாய, திரச்சா²னக³தித்தி²யா;

வத்தூ²னம் க³ணனாயஸ்ஸ, ஹோதி ஆபத்தி து³க்கடம்.

925. இதே⁴கதி³வஸேனேவ, ஆபத்தி பரிதீ³பிதா;

ஸேஸோ அனந்தரே வுத்த-ஸதி³ஸோவ வினிச்ச²யோ.

து³தியஸஹஸேய்யகதா².

926. உத்³த⁴ம் ச²ப்பஞ்சவாசாஹி, விஞ்ஞும் புரிஸவிக்³க³ஹம்;

வினா த⁴ம்மம் ப⁴ணந்தஸ்ஸ, ஹோதி பாசித்தி இத்தி²யா.

927. கா³தா²பாதோ³ பனேகோவ, ஏகவாசாதி ஸஞ்ஞிதோ;

பத³ஸோத⁴ம்மம் நித்³தி³ட்ட²ம், த⁴ம்மமட்ட²கத²ம்பி வா.

928. ச²ன்னம் உபரி வாசானம், பதா³தீ³னம் வஸா பன;

தே³ஸேந்தஸ்ஸ ஸியாபத்தி, பதா³தி³க³ணனாய ச.

929. நிம்மினித்வா டி²தேனாபி, ஸத்³தி⁴ம் புரிஸவிக்³க³ஹம்;

யக்கே²னபி ச பேதேன, திரச்சா²னக³தேனபி.

930. டி²தஸ்ஸ மாதுகா³மஸ்ஸ, த⁴ம்மம் யோ பன பா⁴ஸதி;

ச²ன்னம் உபரி வாசானம், தஸ்ஸ பாசித்தியம் ஸியா.

931. புரிஸே இத்தி²ஸஞ்ஞிஸ்ஸ, விமதிஸ்ஸ ச பண்ட³கே;

உத்தரி ச²ஹி வாசாஹி, வத³தோ ஹோதி து³க்கடம்.

932. இத்தி²ரூபம் க³ஹேத்வான, டி²தானம் பா⁴ஸதோபி ச;

து³க்கடம் யக்கி²பேதீனம், திரச்சா²னக³தித்தி²யா.

933. புரிஸே ஸதி விஞ்ஞுஸ்மிம், ஸயம் உட்டா²ய வா புன;

தே³ஸேந்தஸ்ஸ நிஸீதி³த்வா, மாதுகா³மஸ்ஸ வா ததா².

934. அஞ்ஞிஸ்ஸா புன அஞ்ஞிஸ்ஸா, இத்தி²யா ப⁴ணதோபி ச;

ச²ஹி பஞ்சஹி வாசாஹி, அனாபத்தி பகாஸிதா.

935. பத³ஸோத⁴ம்மதுல்யாவ, ஸமுட்டா²னாத³யோ மதா;

அயமேவ விஸேஸோதி, க்ரியாக்ரியமித³ம் பன.

த⁴ம்மதே³ஸனாகதா².

936. மஹக்³க³தம் பணீதம் வா, ஆரோசேந்தஸ்ஸ பி⁴க்கு²னோ;

ட²பேத்வா பி⁴க்கு²னிம் பி⁴க்கு²ம், பூ⁴தே பாசித்தியம் ஸியா.

937. நோ சே ஜானாதி ஸோ வுத்தம், ஆரோசேந்தஸ்ஸ பி⁴க்கு²னோ;

பரியாயவசனே சஸ்ஸ, ஹோதி ஆபத்தி து³க்கடம்.

938. அனாபத்தி ததா²ரூபே, காரணே ஸதி பா⁴ஸதோ;

ஸப்³ப³ஸ்ஸபி ச ஸீலாதி³ம், வத³தோ ஆதி³கம்மினோ.

939. உம்மத்தகபத³ம் ஏத்த², ந வுத்தம் தத³ஸம்ப⁴வா;

பூ⁴தாரோசனகம் நாம, ஸமுட்டா²னமித³ம் மதம்.

940. காயதோ வாசதோ காய-வாசதோ ச திதா⁴ ஸியா;

குஸலாப்³யாகதேஹேவ, த்³விசித்தஞ்ச த்³விவேத³னம்.

பூ⁴தாரோசனகதா².

941. ஆபத்திம் பன து³ட்டு²ல்லம், ஆரோசேந்தஸ்ஸ பி⁴க்கு²னோ;

ஆபத்தானுபஸம்பன்னே, ட²பேத்வா பி⁴க்கு²ஸம்முதிம்.

942. ஸங்கா⁴தி³ஸேஸமாபன்னோ, மோசேத்வா அஸுசிம் அயம்;

க⁴டேத்வா வத்து²னாபத்திம், வத³ந்தஸ்ஸேவ வஜ்ஜதா.

943. இத⁴ ஸங்கா⁴தி³ஸேஸாவ, து³ட்டு²ல்லாபத்தியோ மதா;

தஸ்மா ஸுத்³த⁴ஸ்ஸ து³ட்டு²ல்லம், வத³ம் பாசித்தியம் பு²ஸே.

944. அது³ட்டு²ல்லாய து³ட்டு²ல்ல-ஸஞ்ஞினோ விமதிஸ்ஸ வா;

ஆபத்தியோபி வா ஸேஸா, ஆரோசேந்தஸ்ஸ து³க்கடம்.

945. ததா² அனுபஸம்பன்னே, து³ட்டு²ல்லம் பஞ்சதா⁴ மதம்;

அஜ்ஜா²சாரமது³ட்டு²ல்லம், ஆரோசேதும் ந வட்டதி.

946. வத்து²ம் வா பன ஆபத்திம், ஆரோசேந்தஸ்ஸ கேவலம்;

அனாபத்தீதி ஞாதப்³ப³ம், பி⁴க்கு²ஸம்முதியா ததா².

947. ஏவமும்மத்தகாதீ³னம், ஸமுட்டா²னாத³யோ நயா;

அதி³ன்னாதா³னதுல்யாவ, வேத³னா து³க்க²வேத³னா.

து³ட்டு²ல்லாரோசனகதா².

948. க²ணேய்ய வா க²ணாபேய்ய, பத²விம் யோ அகப்பியம்;

பே⁴தா³பேய்ய ச பி⁴ந்தே³ய்ய, தஸ்ஸ பாசித்தியம் ஸியா.

949. ஸயமேவ க²ணந்தஸ்ஸ, பத²விம் பன பி⁴க்கு²னோ;

பஹாரஸ்மிம் பஹாரஸ்மிம், பாசித்தியமுதீ³ரிதம்.

950. ஆணாபேந்தஸ்ஸ ஏகாவ, தி³வஸம் க²ணதோபி ச;

புனப்புனாணாபேந்தஸ்ஸ, வாசதோ வாசதோ ஸியா.

951. ‘‘க²ண போக்க²ரணிம் வாபிம், ஆவாடம் க²ண கூபகம்’’;

இச்சேவம் து வத³ந்தஸ்ஸ, கோசி தோ³ஸோ ந விஜ்ஜதி.

952. ‘‘இமம் க²ண ச ஓகாஸம், இத⁴ போக்க²ரணிம் க²ண;

இமஸ்மிம் க²ண ஓகாஸே’’, வத்துமேவம் ந வட்டதி.

953. ‘‘கந்த³ம் க²ண குருந்த³ம் வா, தூ²ணம் க²ண ச கா²ணுகம்;

மூலம் க²ண ச தாலம் வா’’, ஏவம் வத³தி வட்டதி.

954. ‘‘இமம் மூலம் இமம் வல்லிம், இமம் தாலம் இமம் நளம்;

க²ணா’’தி நியமேத்வான, வத்தும் பன ந வட்டதி.

955. உஸ்ஸிஞ்சிதும் ஸசே ஸக்கா, க⁴டேஹி தனுகத்³த³மோ;

பி⁴க்கு²னா அபனேதப்³போ³, ப³ஹலம் ந ச வட்டதி.

956. பி⁴ஜ்ஜித்வா நதி³யாதீ³னம், பதிதம் தோயஸந்திகே;

தடம் வட்ட²ம் விகோபேதும், சாதுமாஸம்பி வட்டதி.

957. ஸசே பததி தோயஸ்மிம், தே³வே வுட்டே²பி வட்டதி;

சாதுமாஸமதிக்கந்தே, தோயே தே³வோ ஹி வஸ்ஸதி.

958. பாஸாணபிட்டி²யம் ஸோண்டி³ம், க²ணந்தி யதி³ தத்த² து;

ரஜம் பததி சே புப்³ப³ம், பச்சா² தே³வோபி⁴வஸ்ஸதி.